Karoa 11

Mesia Ia Mai Negana Ia Hedinarai

IEHOVA be Nega Naria Tauna Hereadaena. Ia ese iena gaukara do ia karaia dinadia bona negadia ibounai ia biagua. (Kara 1:⁠7) Unai negadia totona ia palanilaia gaudia be do idia vara. Do idia moru lasi.

² Peroveta tauna Daniela be Baibel ia stadilaia namonamo tauna, bona ia abia dae Iehova ia hegeregere do idia vara gaudia edia nega ia atoa bona ia hagugurua. Daniela ese ia laloa bada peroveta herevadia be Ierusalema idia hadikaia karana idia herevalaia. Dirava ese unai hanua helagana ia noho kava negana ia hahedinaraia bona Ieremia ese ia torea, bona Daniela ese unai peroveta herevana ia laloa namonamo. Ia gwau: “Dariuse ia king lagani ginigunana lalonai, lau Daniela ese Buka Helaga lalonai Dirava ena hereva, Ieremia peroveta tauna ia torea gauna lau tahua: Unai be ia gwauraia lagani 70 lalonai Ierusalema hanua do ia makohia dika noho.”​—⁠Daniela 9:​2; Ieremia 25:⁠11.

³ Unai negana ai Mede tauna Dariuse be “Babulonia tanobada ena king dagi ia abia.” Guna Daniela ese haba dekenai ia noho toretore ena anina ia hahedinaraia neganai ia gwauraia peroveta herevana be karaharaga ia guguru. Babulonia Basileiana ia ore vadaeni. Dirava ese lagani 539 B.C.E. ai, “Mede bona Parasa taudia dekenai ia henia.”​—⁠Daniela 5:​24-28, 30, 31.

MAI MANAU IDA DANIELA ESE IEHOVA IA NOIA

⁴ Daniela ia lalo-parara Ierusalema ia noho kava laganidia 70 be kahirakahira do idia ore. Bena dahaka ia karaia? Ita ia hadibaia, ia gwau: “Vadaeni Dirava dekenai lau guriguri, lau noinoi henia. Lau aniani lasi, bona puse dabua lau karaia, bona lahi ena kahu dekenai lau helai. Lohiabada egu Dirava lau guriguri henia, bona egu dika, bona egu bese edia kara dika lau gwauraia hedinarai.” (Daniela 9:​3, 4) Dirava ese ena hebogahisi dainai idia do ia ruhaia totona edia lalona idia giroa be namo. (Levitiko 26:​31-46; 1 King Taudia 8:​46-53) Namona be idia abidadama, idia manau, bona edia kara dika amo idia helalo-kerehai momokani, unai kara dika dainai idia be abia mauri bona igui hesiai taudia. Unai dainai, Daniela ese ena kara dika besena totona Dirava ia noinoi henia. Edena dala ai? Ia aniani lasi, ia lalohisihisi, bona puse dabua ia atoa, unai be mai kudouna ibounai ida helalo-kerehai karana korikorina ena toana.

⁵ Ieremia ena peroveta herevana ese Daniela dekenai helaro ia henia, badina ia hahedinaraia kahirakahira Iuda taudia be edia tano Iuda dekenai do idia giroa lou diba. (Ieremia 25:12; 29:10) Ita daradara lasi, Daniela ia abia dae momokani igui hesiai Iuda taudia ese namo do idia davaria, badina tau ta ladana Kurese ese Parasa ia lohiaia vadaeni. Isaia ia peroveta vadaeni, Kurese dainai Iuda taudia do idia ruhaia bena Ierusalema bona ena dubu do idia haginia lou, ani? (Isaia 44:28–45:⁠3) To Daniela ia diba lasi unai be edena bamona do ia vara. Unai dainai Iehova dekenai ia noinoi noho.

⁶ Daniela ese Dirava ena hebogahisi mai lalokauna ia laloa. Mai manau ida ia abia dae Iuda taudia idia kara dika, badina idia gwau-edeede, Iehova ena taravatu idia rakatania, bona iena peroveta taudia idia dadaraia. Dirava ese ‘edia dika dainai idau tano dekenai idia ia lulua’ be maoro. Daniela ia guriguri: “Lohiabada e, aiemai king, bona aiemai lohia taudia, bona aiemai sene taudia edia kara be mai hemaraina, badina be oi dekenai idia kara dika vadaeni. Lohiabada Dirava e, oi be mai emu bogahisihisi, bona kara dika oi gwauatao diba, to ai ese oi dekenai ai dagedage henia vadaeni. Oi Lohiabada, aiemai Dirava ese oiemu hereva oi gwauraia vadaeni ai dekenai oiemu peroveta taudia edia uduna dekena amo, to unai hereva be ai kamonai henia lasi. Io, Israela taudia ibounai ese oiemu taravatu idia utua, bona oiemu hereva idia kamonai henia lasi. Ai kara dika oi dekenai, bona oiemu hesiai tauna, Mose, ena taravatu lalonai ia torea taunimanima hadikaia hereva, be oi siaia mai ai dekenai.”​—⁠Daniela 9:​5-11; Esodo 19:​5-8; 24:​3, 7, 8.

⁷ Dirava ese guna Israela taudia ia hadibaia, bema ia idia kamonai henia lasi bona idia ida ia karaia gwauhamata idia dadaraia, dika do idia davaria. (Levitiko 26:​31-33; Deuteronomi 28:15; 31:17) Daniela ia abia dae Dirava ena kara be maoro, ia gwau: “Guna oi sisiba henia do oi karaia gaudia, be oi karaia vadaeni ai dekenai, bona aiemai lohia taudia dekenai. Ierusalema dekenai oi siaia panisi ese hanua ibounai idia davaria panisi ia hanaia momokani. Mose ena taravatu dekenai ia torea panisi ibounai be ai davaria vadaeni. To hari inai nega lalonai danu, Lohiabada aiemai Dirava e, oiemu ura karadia be ai badinaia lasi, bona aiemai kara dika ai rakatania lasi, bona oiemu hereva momokani be ai badinaia lasi. Unai dainai oi, Lohiabada, aiemai Dirava, inai panisi oi abia hegaegae, vadaeni ai dekenai oi siaia mai, badina oiemu gaukara ibounai be maoro momokani. To ai be ai kamonai henia lasi oi.”​—⁠Daniela 9:​12-14.

⁸ Daniela ese ena bese taudia edia maoro ia gwauraia lasi. Edia kerere dainai idia abidia mauri, bona unai ia hahedinaraia, ia gwau: “Ai ese kara dika ai karaia, bona ai ese kerere bada ai karaia vadaeni danu.” (Daniela 9:15) Bona ia be hisihisi do ia ore sibona ia laloa lasi. Lasi, to ena noinoi ena badina badana be Iehova ena hairai bona ia abia hemataurai. Dirava ese Iuda taudia edia kara dika ia gwauatao bona edia tano dekenai idia ia hakaua lou neganai, Ieremia amo ia torea gwauhamata do ia hagugurua bona Iena ladana helagana do ia abia isi. Daniela ia noinoi: “Lohiabada e, oiemu kara maoromaoro hegeregerena lau noinoi, oi ese Ierusalema do oi badu henia lou lasi. Unai be oiemu hanua, oiemu ororo helagana. Aiemai kara dika bona aiemai sene taudia edia kerere dikadia dainai, Ierusalema ena badinai idia noho idau bese taudia ese Ierusalema bona aiemai hemarai idia kirikirilaia noho.”​—⁠Daniela 9:⁠16.

⁹ Daniela be mai momokani ida ia guriguri noho, ia gwau: “Aiemai Dirava e, mani lauegu guriguri bona lauegu noinoi oi kamonai henia. Oiemu Dubu Helaga, ia makohia noho gauna mani do oi haginia lou, vadaeni taunimanima do idia diba oi be Dirava. Dirava e, mani ai dekenai do oi kamonai henia. Oiemu matana mani oi kehoa, bona aiemai dika ena hisihisi bona hemarai, bona oiemu ladana ia noho Ierusalema hanua ena dika ia davaria gauna mani oi itaia. Ai be kara maoromaoro dainai oi dekenai ai noinoi, a? Lasi momokani. Oi dekenai ai noinoi, badina ai diba oi be mai oiemu bogahisihisi. Lohiabada e, mani ai dekenai do oi kamonai henia. Aiemai dika do oi gwauatao. Lohiabada e, mani oi kamonai henia ai, bona durua kara do oi karaia. Vadaeni taunimanima ibounai do idia diba oi be Dirava. Oi naria daudau lasi! Inai hanua Ierusalema, bona iena taudia be oiemu.” (Daniela 9:​17-19) Bema Dirava be dika ia gwauatao lasi bona ena bese taudia be tano idauna dekenai ia rakatania, bona ena hanua helagana, Ierusalema, be do ia noho kava ela bona hanaihanai, bese idauidau taudia do idia laloa ia be Guba bona Tanobada edia Lohia Badana, a? Reana do idia laloa Babulonia ena dirava edia vairanai Iehova be siahu lasi, ani? Oibe, unai ese Iehova ena ladana do ia hadikaia, bona unai dainai Daniela ia lalohisihisi. Daniela bukana ena gado korikorina ai Dirava ena ladana Iehova be nega 19 ia hedinarai, bona 18 be inai guriguri lalonai idia hedinarai.

GABRIELA BE KARAHARAGA IA MAI

¹⁰ Daniela ia do guriguri noho neganai, aneru Gabriela ia hedinarai. Ia gwau: “Daniela e, unai mata hanai ena anina hedinaraia totona lau mai. Oi ese Dirava oi guriguri henia hamatamaia neganai, Dirava ia kamonai henia oi. Bona unai guriguri ena haere hamaoroa totona lau mai, badina Dirava ia lalokau henia bada oi. Unai dainai inai mata hanai ena anina, lau hadibaia gauna, do oi kamonai namonamo.” To dahaka dainai Daniela ese Gabriela ia gwauraia “unai tau”? (Daniela 9:​20-23) Daniela ese guna ia itaia mamoe tau bona nanigosi tau matahanaina ena anina ia tahua neganai, “iena toana be taunimanima bamona” tauna ta be ena vairanai ia hedinarai. Ia be aneru Gabriela, Daniela dekenai lalo-parara ia henia totona ia mai. (Daniela 8:​15-17) Unai hegeregerena, Daniela ia guriguri murinai, unai aneru be taunimanima ta bamona ia mai kahirakahira bona ia hereva henia, tau ta be ma tau ta dekenai ia hereva bamona.

¹¹ Gabriela be “adorahi kahanai boubou gauna idia karaia ena hora lalonai” ia mai. Iehova ena boubou patana bona ena dubu Ierusalema dekenai idia hadikaia vadaeni, bona Iuda taudia be kaivakuku tomadiho henia Babulonia taudia ese idia abia mauri. Unai dainai, Babulonia dekenai idia noho Iuda taudia ese Dirava dekenai boubou gaudia idia henia lasi. To, edia tomadiho karana idia laloa bada Iuda taudia Babulonia dekenai ese Mose ena Taravatu henunai idia karaia boubou negadia ai Iehova idia hanamoa bona idia guriguri henia be maoro. Daniela ese Dirava ia badinaia momokani dainai, ia idia gwauraia Dirava ese “ia lalokau henia bada” tauna. ‘Guriguri ia kamonai’ Diravana, Iehova, ese Daniela ia lalo-namo henia, bona karaharaga Gabriela ia siaia Daniela ese mai abidadama ida ia henia gurigurina ia haerelaia totona.​—⁠Salamo 65:⁠2.

¹² Ena be Daniela be Iehova dekenai ia guriguri dainai ena mauri ia haboioa diba, to dina iboudiai nega toi Dirava ia guriguri henia. (Daniela 6:​10, 11) Ita hoa lasi Iehova ese ia lalokau henia bada! Daniela ia guriguri sibona lasi, to Dirava ena Hereva ia lalohadailaia dainai Iehova ena ura ia diba. Daniela ese guriguri karana ia rakatania lasi bona Iehova dekenai ia noinoi dalana maorona ia diba dainai ena guriguri ena haere ia abia. Ia ese Dirava ena kara maoromaoro ia gwauraia hedinarai. (Daniela 9:​7, 14, 16) Bona ena be Daniela ena inai taudia ese ia dekenai kerere ta idia davaria diba lasi, to ia diba Dirava ena matana ai ia be kara dika tauna bona ena kara dika ia gwauraia hedinarai.​—⁠Daniela 6:4; Roma 3:⁠23.

“PURA 70” KARA KERERE HAOREA TOTONA

¹³ Guriguri laloa bada tauna Daniela ese ia abia haere be namo herea! Iehova ese Daniela ia hamaoroa Iuda taudia be edia tano dekenai do idia giroa lou, bona lalo-parara ia henia danu, unai ia hereaia gauna​—⁠idia perovetalaia Mesia do ia mai negana​—⁠ia diba totona. (Genese 22:​17, 18; Isaia 9:​6, 7) Gabriela ese Daniela ia hamaoroa, ia gwau: “Lagani 490 [“Pura 70,” NW ] Dirava ese ia maka karaia oiemu taudia bona oiemu hanua helaga dekenai, edia kara kerere do idia haorea, bona edia kara dika do idia hadokoa momokani. Edia kara dika davana do idia karaia haorea, bona kara maoromaoro do idia karaia ia lao hanaihanai. Helaga Herea Gabuna danu be do idia hahelagaia lou. Inai kara idia vara ese mata hanai bona peroveta herevana do idia hamomokania. Inai oi laloa namonamo: Ierusalema haginia lou herevana idia gwauraia ela bona Mesia ia ginidae be lagani ibounai 483 [“pura 7, bona pura 62 danu,” NW ] be do idia ore. Ierusalema ena ariara bona magu badadia do idia karaia lou, to nega dika lalonai do idia karaia.”​—⁠Daniela 9:​24, 25.

¹⁴ Unai be sivarai namona momokani! Ierusalema idia haginia lou bona dubu matamatana ai tomadiho karana idia hamatamaia lou sibona lasi, to nega maorona ai “Mesia” do ia ginidae danu. Unai be “pura 70” lalonai do ia vara. Gabriela ese dina ia gwauraia lasi dainai unai be pura mai edia dina 7 lasi, eiava dina 490 lasi​—⁠lagani tamona bona hua hani sibona lasi. Idia perovetalaia gaukarana, Ierusalema bona “ena ariara bona magu” haginia lou gaukarana be unai nega lalonai idia karaia diba lasi. Unai pura be lagani edia pura. Hari idia hahanaia Baibel momo idia hahedinaraia unai pura ta ta edia lata be lagani 7. Hegeregere, The Jewish Publication Society ese ia halasia Baibel ladana Tanakh​​—⁠The Holy Scriptures be Daniela 9:​24 ena futnout dekenai ia gwau “lagani edia pura 70.” An American Translation Baibel ia gwau: “Lagani edia pura 70 be emu bese taudia bona emu hanua helagana dekenai idia gwauraia.” Moffatt bona Rotherham ese idia hahanaia Baibel edia hereva be unai bamona danu.

¹⁵ Aneru ena hereva hegeregerena, unai “pura 70” be kahana toi dekenai idia hapararaia: (1) “pura 7,” (2) “pura 62,” bona (3) pura ta. Unai ena anina be lagani 49, lagani 434, bona lagani 7​—⁠ibounai be lagani 490. The Revised English Bible ia gwau: “Nega 70 amo lagani 7 ita habadaia negana be emu bese taudia bona emu hanua helagana totona idia makaia.” Iuda taudia be Babulonia dekenai idia abia mauri bona lagani 70 lalonai unuseniai hisihisi idia abia murinai, lagani 490, eiava lagani 70 be nega 7 amo ita habadaia negana, lalonai Dirava ese idia ia hanamoa bada. Unai nega be “Ierusalema haginia lou herevana idia gwauraia” negana amo do ia matamaia. Unai be edena negai ia vara?

“PURA 70” IDIA MATAMAIA

¹⁶ “Pura 70” edia matamana ita laloa neganai, namona be mai anina bada gaudia toi ita laloa. Gau ginigunana be, lagani 537 B.C.E. ai ia vara, unai neganai Kurese ese Iuda taudia be edia tano dekenai idia giroa lou hahegani ia gwauraia. Ia gwau: “Inai be Sairasi, Parasa ena king ena oda: Lohiabada, guba ena Dirava ese tanobada basileia ibounai lau dekenai ia henia, lau biagua. Bona Lohiabada ese lau ia oda henia, iena Dubu ta Ierusalema, Iuda tano dekenai do lau haginia. Lau ura Dirava ese umui, iena bese taudia ta ta ibounai dekenai do ia noho. Umui be Ierusalema, Iuda tano dekenai do umui lao, unuseni Lohiabada, Israela ena Dirava, ena Dubu Helaga do umui haginia lou. Dirava be Ierusalema dekenai ia noho. Bona Ierusalema dekenai do idia lao lasi Iuda taudia ese edia varavara do idia durua, Ierusalema do idia lao totona. Do idia lao lasi taudia ese Ierusalema idia lao taudia dekenai inai gaudia do idia henia: Siliva, golo, kohu idauidau, kohu huaia totona hosi bona doniki, bona ubua gaudia, harihari gaudia, Dirava ena Dubu Helaga dekenai henia totona.” (Esera 1:​2-4) Ia hedinarai goevagoeva, unai hahegani ia henia, dubu helaga​—⁠“Dirava ena Dubu Helaga”​—⁠be guna ia noho gabuna dekenai do idia haginia lou totona.

¹⁷ Gau iharuana be, Parasa ena King Aratasaseta (Aratasaseta Longimanus, Xerxes Namba 1 ena natuna mero) ena lohia laganina namba 7 lalonai ia vara. Unai nega ai, hadibaia tauna Esera be hua hani laolaona Babulonia amo Ierusalema dekenai ia karaia. Ia ese king ena revareva ia abia lao, to unai revareva ese gwaumaoro ia henia lasi Ierusalema idia haginia lou totona. To, Esera ese ia abia gaukarana be “Lohiabada ena Dubu Helaga do ia hanamoa.” Unai dainai unai revareva ese golo bona siliva, helaga gaudia, bona dubu lalonai tomadiho durua totona idia henia diba kontribusen gaudia, uiti, uaina, dehoro, bona damena ia gwauraia, bona ia gwau dubu lalonai hesiai gaukara idia karaia taudia be takisi moni do idia henia lasi.​—⁠Esera 7:​6-27.

¹⁸ Gau ihatoina be, lagani 13 murinai, Parasa ena King Aratasaseta ena lohia laganina namba 20 lalonai, ia vara. Unai neganai “Susa hanua badana dekenai” Nehemia be king ena uaina kapusi naria tauna. Babulonia amo idia giroa lao orena taudia ese Ierusalema idia haginia lou sisina. To gau ibounai idia namo lasi. Nehemia ia kamonai ‘Ierusalema ena magu ia dika noho bona ena iduara be lahi ese ia araia ore vadaeni.’ Unai dainai ia laloa momo, bona ia lalohisihisi bada. Ena lalohisihisi ena badina idia nanadaia neganai, Nehemia ia gwau: “King do ia mauri hanaihanai! Lalohisihisi ena toana lau dekenai ia noho, ena badina be lauegu sene taudia edia guria gabuna ena hanua be ia dika, bona iena magu ena iduara bona ikoukou be lahi ese ia araia ore vadaeni.”​—⁠Nehemia 1:​1-3; 2:​1-3.

¹⁹ Nehemia ia herevalaia sivaraina be ma ia gwau: “Vadaeni king ese lau ia nanadaia, ia gwau, ‘Oiemu noinoi be dahaka?’ Unai dainai lau be Guba ena Dirava dekenai lau guriguri. Unai murinai king dekenai lau haere, lau gwau, ‘King badana e, bema oi laloa ia hegeregere neganai, bona bema lau dekenai oi laloa namo neganai, mani lau do oi siaia, Iuda dekenai do lau lao. Unuseni lauegu sene taudia idia guria vadaeni, bona lau ura unai gabu do lau haginia lou.’ ” Aratasaseta ese unai hereva ia abia dae, bona Nehemia ia noia gauna ma ta ia henia danu, Nehemia ia gwau: “Bema oi ura neganai, mani revareva haida do oi torea, Euperate Sinavai ena dina diho kahana ena gavana taudia dekenai do lau henia totona. Unai neganai idia ese gwaumaoro do idia henia, lau ese tano do lau raka hanaia ela bona Iuda do lau abia. Bona revareva ta danu, Asapa, king ena uda naria tauna dekenai, vadaeni ia ese au do ia henia, Dubu Helaga ena kohoro ena ikoukou, bona hanua ena magu, bona lau do lau noholaia ruma haginia gaudia.” Nehemia ia lalo-parara Iehova dainai unai gaudia idia vara bona ia gwau: “Vadaeni king ese lau noia gaudia ibounai lau dekenai ia henia, badina be Dirava ese iena durua namona lau dekenai ia henia dainai.”​—⁠Nehemia 2:​4-8.

²⁰ Ena be unai gwaumaoro be hua ladana Nisan ai ia abia, unai be Aratasaseta ena lohia laganina namba 20 ena matamana kahanai, to, “Ierusalema haginia lou herevana idia gwauraia” negana be hua haida murinai ia vara. Nehemia be Ierusalema dekenai ia ginidae bona ena haginia lou gaukarana ia hamatamaia neganai unai ia vara. Esera ese ena laolao be hua hani lalonai ia karaia, to Susa be Babulonia amo kilomita 322 bamona ist kahanai ia noho bona unai dainai ena daudau Ierusalema amo be ia bada. Unai dainai, ita laloa diba Nehemia be Aratasaseta ena lohia laganina namba 20 ena dokona kahana ai, eiava lagani 455 B.C.E. lalonai, Ierusalema dekenai ia ginidae. Unai nega ai, idia perovetalaia “pura 70,” eiava lagani 490, idia matamaia. Idia be lagani 36 C.E. ena dokona kahana ai do idia ore.​—⁠“Edena Negai Aratasaseta Ia Lohia Matamaia?” rau 197 dekenai itaia.

“MESIA” IA HEDINARAI

²¹ Lagani hida murinai Ierusalema idia haginia lou? Unai hanua haginia lou gaukarana be “nega dika lalonai” idia karaia, badina Iuda taudia huanai hekwakwanai idia vara bona Samaria taudia bona ma haida ese edia gaukara idia koua toho dainai. Toana be unai gaukara be lagani 406 B.C.E. bamona ai idia karaia ore​—⁠anina be “pura 7,” eiava lagani 49 lalonai. (Daniela 9:25) Unai murinai, ma pura 62, eiava lagani 434, be do idia mai. Unai nega ia ore murinai, idia gwauhamatalaia Mesia be do ia hedinarai. Lagani 455 B.C.E. amo lagani ibounai 483 (49 bona 434) ita duahia neganai, lagani 29 C.E. ita abia. Unai nega ai dahaka ia vara? Evanelia torea tauna Luka ese ita ia hadibaia, ia gwau: “Tiberio Kaisara be lagani 15 ia lohia neganai, Pontio Pilato be Iudea edia gavana, bona Heroda be Galilea dekenai ia lohia. . . . Unai neganai Dirava ese Ioane Sekaraia dekenai ia hereva, taunimanima idia noho lasi tanona dekenai. Unai dainai Ioane ese Ioridane Sinavai kahana ena tano ibounai dekenai ia loaloa. Ia haroro, ia gwau, ‘Umui emui lalona umui giroa, bapatiso umui abia, bona Dirava ese emui kara dika do ia gwauatao.’ ” Unai nega lalonai taunimanima ese Mesia ena mai negana “idia laloa momo.”​—⁠Luka 3:​1-3, 15.

²² Ioane be gwauhamata Mesiana lasi. To lagani 29 C.E. ena keru negana ia matamaia lalonai, Nasareta tauna Iesu ia bapatisoa neganai ia itaia gauna ia herevalaia bona ia gwau: “Lauma Helaga lau itaia vadaeni, guba dekena amo ia diho, pune manu bamona, ia latanai ia kamokau. Lau be lau diba lasi ia, to Dirava ese ranu dekenai bapatiso karaia totona lau ia siaia. Unai neganai Dirava ese lau ia hadibaia, ia gwau, ‘Tauna be oi ese do oi itaia, Lauma Helaga be do ia diho, bona iena latanai do ia kamokau. Inai tauna ese Lauma Helaga dekena amo taunimanima do ia bapatiso henidia.’ . . . Lau ese lau itaia vadaeni, bona umui dekenai lau gwauraia hedinaraia inai, ia be Dirava ena Natuna.” (Ioane 1:​32-34) Iesu ese bapatiso ia abia neganai ia be Horoa Tauna​—⁠Mesia, eiava Keriso​—⁠ai ia lao. Nega sisina murinai, Ioane ena hahediba tauna Andrea ese horoa tauna Iesu ia hedavari henia bona Simona Petero dekenai ia gwau: “Ai be Mesia ai davaria vadaeni.” (Ioane 1:41) Unai dala ai, “Mesia” be nega maorona ai​—⁠pura 69 edia dokonai​—⁠ia hedinarai!

PURA GINIGABENA AI IDIA VARA GAUDIA

²³ Pura namba 70 lalonai be dahaka gaudia do idia vara? Gabriela ia gwau “pura 70” negana idia atoa ena badina be “edia kara kerere do idia haorea, bona edia kara dika do idia hadokoa momokani. Edia kara dika davana do idia karaia haorea, bona kara maoromaoro do idia karaia ia lao hanaihanai. Helaga Herea Gabuna danu be do idia hahelagaia lou. Inai kara idia vara ese mata hanai bona peroveta herevana do idia hamomokania.” Unai ia vara totona, “Mesia” do ia mase. Edena negai? Gabriela ia gwau: “Unai nega ena dokona dekenai [“Pura 62 murinai,” NW ] be idia ese Mesia do idia hamasea, to iena kerere dainai lasi. . . . Unai lohia tauna ese lagani 7 [“pura tamona,” NW ] lalonai gwauhamata do ia gwauraia taunimanima momo dekenai. To unai lagani 7 ena kahana, (lagani 3 1/2) [“pura ena kahana,” NW ] ia ore neganai, ia ese boubou gauna bona harihari gauna karana do ia hadokoa.” (Daniela 9:26a, 27a) Mai anina bada negana be “pura ena kahana” ai, anina be, lagani edia pura ginigabena ena kahana ia ore negana.

²⁴ Iesu Keriso ena taunimanima durua gaukarana be lagani 29 C.E. ena dokona kahanai ia matamaia bona lagani toi mai kahana lalonai ia karaia. Peroveta herevana hegeregerena, lagani 33 C.E. ena matamana kahanai, Keriso be satauro ai idia “hamasea,” unai amo ena tanobada maurina be taunimanima edia mauri davana totona ia henia. (Isaia 53:8; Mataio 20:28) Ia toreisi lou tauna Iesu ese ia bouboulaia tauanina ena davana be guba dekenai Dirava vairanai ia hahedinaraia murinai, animal bouboudia bona harihari gaudia, Taravatu ese ia gwauraia gaudia, idia henia be anina lasi. Ena be Iuda hahelaga taudia ese unai boubou gaudia idia karaia noho ela bona lagani 70 C.E. ai Ierusalema ena dubu idia hadikaia, to Dirava vairanai unai boubou gaudia be anina lasi. Boubou gauna hereadaena ese edia gabu ia abia, bona unai boubou gauna be do idia karaia lou be anina lasi. Aposetolo Paulo ia gwau: “To Keriso ese, kara dika kokia totona, boubou gauna tamona sibona ia henia. Inai boubou gauna be mai ena siahu ela bona hanaihanai. . . . Keriso ese boubou gauna tamona dekena amo iena helaga taudia ia hagoevadia momokani, ela bona hanaihanai.”​—⁠Heberu 10:​12, 14.

²⁵ Ena be kara dika bona mase ese taunimanima idia do hahisia noho, to Iesu idia hamasea bona guba dekenai ia toreisi lou karana ese peroveta herevadia ia hagugurua. Ia ese ‘kara kerere ia haorea, kara dika idia hadokoa momokani, kara dika ena davana ia karaia haorea, bona kara maoromaoro ia mailaia.’ Dirava ese Taravatu gwauhamatana ia kokia vadaeni, unai taravatu ia hahedinaraia Iuda taudia be kara dika taudia bona kara dika ena davana idia abia be maoro. (Roma 5:​12, 19, 20; Galatia 3:​13, 19; Efeso 2:15; Kolose 2:​13, 14) Hari idia helalo-kerehai taudia edia kara dika bona kara dika ena davana ia kokia diba. Mesia ena boubou gauna dainai, abidadama taudia ese Dirava ida maino ai idia noho diba. Dirava ena harihari gauna “mauri hanaihanai, Iesu Keriso” amo, idia naria diba.​—⁠Roma 3:​21-26; 6:​22, 23; 1 Ioane 2:​1, 2.

²⁶ Vadaeni, Iehova ese lagani 33 C.E. ai Keriso ena mase amo Taravatu gwauhamatana ia kokia. To, edena dala ai Mesia ese “lagani 7 [“pura tamona,” NW ] lalonai gwauhamata do ia gwauraia taunimanima momo dekenai”? Badina be ia dainai Aberahamo gwauhamatana be do mai ena siahu. Dirava ese unai gwauhamata ena namo be Aberahamo ena Heberu tubudia dekenai ia do henia, ela bona pura namba 70 ia ore. To lagani edia “pura 70” idia ore murinai, lagani 36 C.E. ai, aposetolo Petero ese Dirava badinaia Italia tauna Korenelio, iena ruma taudia, bona Idau Bese taudia ma haida ia haroro henia. Bona unai dina amo, sivarai namona be bese idauidau ibounai huanai idia harorolaia noho.​—⁠Kara 3:​25, 26; 10:​1-48; Galatia 3:​8, 9, 14.

²⁷ Unai peroveta herevana ese “Helaga Herea Gabuna” hahelagaia karana ia gwauraia danu. Unai ese Ierusalema ena dubu ena Helaga Herea Gabuna, eiava lalona momokani daiutuna, hahelagaia karana ia herevalaia lasi. Iniseniai “Helaga Herea Gabuna” be Dirava ena noho gabuna guba dekenai. Unuseniai, Iesu ese ia bouboulaia tauanina ena davana be ena Tamana vairanai ia hahedinaraia. Lagani 29 C.E. ai Iesu ia bapatiso neganai, Dirava ese iena noho gabuna guba dekenai ia hahelagaia, eiava atoa siri, bona “Helaga Herea Gabuna” ai ia lao, guna tanobada ai palai dubu bona dubu helaga edia Helaga Herea Gabuna ese unai idia laulaulaia.​—⁠Heberu 9:​11, 12.

DIRAVA ESE IA HAMOMOKANIA PEROVETA HEREVANA

²⁸ Aneru Gabriela ese ia gwauraia Mesia peroveta herevana ese ‘matahanai bona peroveta herevana hamomokania’ karana ia herevalaia danu. Unai ena anina be Mesia perovetalaia herevadia ibounai​—⁠ena boubou, toreisi lou, bona guba dekenai ia hedinarai karadia amo ia hagugurua gaudia ibounai, bona pura namba 70 lalonai idia vara gaudia ibounai danu​—⁠be Dirava ese do ia hamomokania, do idia vara momokani, bona idia ita abidadama henia diba. Unai matahanai ese Mesia sibona ia herevalaia. Mesia dekenai bona Dirava ese ia amo ia karaia gaudia lalonai do ia guguru. Unai matahanai ia guguru dalana maorona be ia perovetalaia Mesia sibona dekenai ita davaria. Gau ma ta ese ena anina ia hahedinaraia lasi.

²⁹ Gabriela be guna ia peroveta, Ierusalema do idia haginia lou. Hari ia ese idia haginia lou hanuana bona ena dubu idia hadikaia karana ia perovetalaia, ia gwau: “Idau bese ena lohia ta ena taudia do idia mai, unai hanua bona Dubu Helaga do idia hamakohia. Unai gau ibounai edia dokona be abata bamona, tuari do ia vara, bona gau ibounai do idia dika. . . . Vadaeni Hadikaia Dika Rohoroho Gauna be Dubu Helaga ena ataiai momokani do idia atoa. Unuseni do ia noho ela bona unai dika ia havaraia tauna be Dirava ese iena dika davana do ia henia.” (Daniela 9:26b, 27b) Ena be unai hadikaia ore karana be “pura 70” idia ore murinai do ia vara, to ia be “pura” ginigabena lalonai idia vara gaudia, Iuda taudia ese Keriso idia dadaraia bona idia hamasea karadia, dainai ia vara.​—⁠Mataio 23:​37, 38.

³⁰ Histori ena sivarai ese ia hahedinaraia lagani 66 C.E. ai, Suria ena Gavana Cestius Gallus ese Roma ena tuari taudia ia hakaua bona Ierusalema idia koua hagegea. Ena be Iuda taudia idia tuari goada, to Roma tuari taudia, kaivakuku bamona pepe bona ma toa haida idia huaia, be hanua lalonai idia vareai bona not kahanai dubu ena magu henunai tano idia geia matamaia. Unuseniai idia noho be dika bada ia havaraia diba “gau dika rohorohona.” (Mataio 24:​15, 16) Lagani 70 C.E. ai, ami jeneral Titus ese Roma tuari taudia ia hakaua neganai, “abata” bamona idia mai bona hanua bona ena dubu idia hadikaia ore. Gau ta ese idia ia koua diba lasi, badina Dirava ese ia gwauraia vadaeni, “do idia dika.” Nega Naria Tauna Hereadaena, Iehova, ese ena hereva ia hagugurua lou!

DAHAKA OI DIBAIA?

• Ierusalema ia noho kava laganidia 70 be kahirakahira idia ore neganai, Daniela be edena bamona Iehova dekenai ia noinoi?

• “Pura 70” edia lata be edena bamona, bona edena negai idia matamaia bona edena negai idia ore?

• Edena negai “Mesia” ia hedinarai, bona edena nega mai anina bada ai ia idia “hamasea”?

• Edena gwauhamatana be ‘pura tamona lalonai taunimanima momo dekenai’ do mai ena siahu?

• “Pura 70” idia ore murinai dahaka ia vara?

[Study Questions]

 1. Iehova be Nega Naria Tauna Hereadaena dainai, dahaka ita diba momokani?

2, 3. Daniela ese ia laloa namonamo peroveta herevana be dahaka, bona unai nega ai edena basileia ese Babulonia ia lohiaia?

 4. (a) Dirava ese idia ia ruhaia totona dahaka idia karaia be namo? (b) Edena dala ai Daniela ese Dirava ia noinoi henia?

 5. Dahaka dainai Daniela ia abia dae momokani Iuda taudia be edia tano dekenai do idia giroa lou diba?

 6. Daniela ena guriguri lalonai dahaka ia gwauraia hedinarai?

 7. Dahaka dainai ita gwau diba Iuda taudia idia abia mauri neganai Iehova ese unai ia koua lasi be kara maorona?

 8. Daniela ese Iehova ia noinoi henia ena badina badana be dahaka?

 9. (a) Daniela ese ena guriguri ena dokonai dahaka ia gwauraia? (b) Dahaka dainai Daniela ia lalohisihisi, to edena dala ai ia hahedinaraia Dirava ena ladana ia laloa bada?

10. (a) Daika be Daniela dekenai ia mai, bona dahaka dainai? (b) Dahaka dainai Daniela ese Gabriela ia gwauraia “unai tau”?

11, 12. (a) Ena be Iehova ena dubu eiava boubou patana be Babulonia dekenai idia noho lasi, to edena dala ai kamonai Iuda taudia idia hahedinaraia Taravatu henunai idia karaia boubou gaudia idia laloa bada? (b) Dahaka dainai Daniela idia gwauraia Dirava ese “ia lalokau henia bada” tauna?

13, 14. (a) Gabriela ese Daniela dekenai dahaka diba mai anina bada ia hahedinaraia? (b) “Pura 70” edia lata be edena bamona, bona edena bamona unai ita diba?

15. “Pura 70” be kahana toi dekenai edena bamona idia hapararaia, bona edena negai idia matamaia?

16. Kurese ena hahegani ese ia hahedinaraia hegeregerena, Iuda taudia be edia tano dekenai ia siaia lou ena badina be dahaka?

17. Esera ese ia abia revareva ia hahedinaraia Ierusalema dekenai ia lao ena badina be dahaka?

18. Dahaka sivarai dainai Nehemia ia laloa momo, bona King Aratasaseta ese edena dala ai unai sivarai ia kamonai?

19. (a) King Aratasaseta ese Nehemia ia nanadaia neganai, Nehemia be dahaka ia karaia guna? (b) Nehemia ese dahaka ia noia, bona edena dala ai ia hahedinaraia unai gaudia be Iehova dainai idia vara?

20. (a) Edena negai “Ierusalema haginia lou herevana idia gwauraia”? (b) Edena negai “pura 70” idia matamaia, bona edena negai idia ore? (c) Dahaka gaudia ese “pura 70” idia matamaia negana bona idia ore negana idia hamomokania?

21. (a) “Pura 7” lalonai dahaka idia karaia ore, bona unai ia vara ena be edia noho be edena bamona? (b) Edena lagani ai Mesia be do ia hedinarai, bona Luka ena Evanelia hegeregerena unai nega ai dahaka ia vara?

22. Edena negai bona edena dala ai Iesu be idia gwauhamatalaia Mesia ai ia lao?

23. Dahaka dainai “Mesia” ia mase, bona edena negai unai do ia vara?

24, 25. (a) Peroveta herevana hegeregerena, edena nega ai Keriso ia mase, bona ena mase bona toreisi lou ese dahaka idia haorea? (b) Iesu ena mase dainai dahaka ia vara diba?

26. (a) Ena be Dirava ese Taravatu gwauhamatana ia kokia vadaeni, to ‘pura tamona lalonai’ edena gwauhamatana be do mai ena siahu? (b) Pura namba 70 ena dokonai dahaka ia vara?

27. Dirava ese edena “Helaga Herea Gabuna” ia hahelagaia, bona edena dala ai?

28. ‘Matahanai bona peroveta herevana hamomokania’ ena anina be dahaka?

29. Idia haginia lou Ierusalema dekenai be dahaka do ia vara, bona dahaka dainai?

30. Histori ena sivarai ia hahedinaraia hegeregerena, Nega Naria Tauna Hereadaena ena hereva be edena bamona ia guguru?

[Box/Picture on page 197]

Edena Negai Aratasaseta Ia Lohia Matamaia?

HISTORI torea taudia be Parasa ena King Aratasaseta ia lohia matamaia laganina dekenai idia lalo-tamona lasi. Haida idia laloa unai be 465 B.C.E., badina ena tamana, Xerxes, be 486 B.C.E. ai ia lohia matamaia bona ia lohia laganina namba 21 lalonai ia mase. To gau haida idia hahedinaraia Aratasaseta be 475 B.C.E. ai terona ia abia bona ena lohia laganina ginigunana be 474 B.C.E.

Idaunegai Parasa ena hanua badana Persepolis ai idia geia toretore bona laulau idia hahedinaraia Xerxes bona ena tamana, be idia lohia hebou. Bema lagani 10 lalonai idia lohia hebou bona 486 B.C.E. ai Dariuse ia mase murinai Xerxes be lagani 11 ia lohia, Aratasaseta ena lohia laganina ginigunana be 474 B.C.E.

Gau iharuana ese Atena ena ami jeneral Themistocles ia herevalaia, ia ese 480 B.C.E. ai Xerxes ena tuari taudia ia halusia. Gabeai Greek taudia ese idia ura henia lasi bona idia gwau gavamani ia gwau-edeede henia. Themistocles ia heau lao Parasa ena king ena ruma ai gabu ia tahua, bona ia idia abia dae. Greek histori torea tauna Thucydides ia gwau, unai be Aratasaseta ese “terona ia abia bena nega sisina murinai” ia vara. Greek histori torea tauna Diodorus Siculus ia gwau Themistocles be 471 B.C.E. ai ia mase. To Themistocles ia noinoi lagani ta lalonai Parasa gado do ia dibaia guna bena murinai King Aratasaseta vairanai ia hedinarai, unai dainai ita laloa diba 473 B.C.E. ai Asia Minor dekenai ia noho vadaeni. Jerome ia torea Chronicle of Eusebius ese unai lalohadai ia durua. Aratasaseta be “terona ia abia bena nega sisina murinai” Themistocles be 473 B.C.E. ai Asia dekenai ia ginidae, unai dainai Germany ena diba bada tauna Ernst Hengstenberg be Christology of the Old Testament dekenai ia gwau Aratasaseta be 474 B.C.E. ai ia lohia matamaia, gau ma haida ese unai idia hahedinaraia danu. Ma ia gwau: “Aratasaseta ena lohia laganina namba 20 be lagani 455, Keriso ia do mai lasi neganai.”

[Picture]

Themistocles ena laulau

[Diagram/Pictures on page 188, 189]

(For fully formatted text, see publication)

“PURA 70”

pura 7 62 pura pura 1

lagani 49 434 lagani lagani 7

[Full-page picture on page 180]

[Full-page picture on page 193]