Iehova Ena Hereva be Ia Mauri Noho

Daniela Bukana Ena Hereva Badadia

BUKA ta Holman Illustrated Bible Dictionary ia gwau: “Baibel lalonai, Daniela bukana be buka idau momokani, . . . unai buka ena hereva be mai edia anina hari inai negai bona nega vaira totona.” Daniela ena toretore be lagani 618 B.C.E. ai ia hamatamaia, bona unai nega ai Babulonia ena King Nebukanesa ese Ierusalema ia hagegea bona ia hadikaia, bona ia ese Israela ena “uhau taudia” be Babulonia dekenai ia abia lao. (Daniela 1:​1-3) Idia ta be mero matamata ta ladana Daniela. Daniela bukana ena sivarai dokona ai ia hahedinaraia Daniela be Babulonia dekenai ia noho. Daniela ena mauri lagani be 100 neganai, Dirava ese Daniela dekenai inai gwauhamata ia gwauraia: “Do oi laga-ani, to nega dokona dekenai be do oi toreisi, bona oiemu gaukara davana namona do oi abia.”​​—⁠Daniela 12:⁠13.

Daniela bukana ena kahana ginigunana be idia vara gaudia edia nega edia nega hegeregerena ia torea. Kahana iharuana be Daniela ese idia vara gaudia be ena matana amo ia itaia hegeregerena ia torea. Unai buka lalonai, Daniela ese Basileia badadia edia gini bona moru, Mesia ena ginidae negana, bona hari iseda nega ai idia vara gaudia edia peroveta herevadia ia torea.a Danu, Daniela ese ia dekenai idia vara gaudia haida ia torea, ita ia hagoadaia Dirava ita badinaia noho totona. Daniela bukana ena hereva be ia mauri noho bona mai ena siahu.​​—⁠Heberu 4:​12.

DANIELA BUKANA ENA KAHANA GINIGUNANA AMO DAHAKA ITA DIBAIA?

(Daniela 1:1–​6:​28)

Lagani 617 B.C.E. ai, Daniela bona iena turadia toi, Sataraka, Misaka, bona Abetenigo be Babulonia ena king ena ruma ai idia noho. Lagani toi lalonai king ena ruma ai treinini idia abia neganai, idia be Dirava badinaia karana idia rakatania lasi. Lagani 8 murinai, King Nebukanesa be nihi idauna ta ia abia. Daniela ese King ena nihi ia gwauraia bona ena anina danu ia hahedinaraia. King ia gwau, Iehova “Dirava be dirava ibounai edia Dirava, hereadae momokani, bona king ibounai edia Lohiabada. Ia be hunia gaudia hedinaraia Diravana.” (Daniela 2:​47) To, daudau lasi murinai, Nebukanesa be unai ia laloaboio. Daniela ena turadia toi be kaivakuku badana idia tomadiho henia lasi neganai, king ese lahi dekenai ia negedia. To, Dirava momokanina ese unai memero toi ia hamauria, bona Nebukanesa ia abia dae “idau dirava ta ese inai bamona ia hamauria diba lasi.”​​—⁠Daniela 3:​29.

Nebukanesa be mai anina bada nihi ma ta ia abia. Ia ese au badana ta ia itaia, idia utua diho bona ena tubu dalana idia koua. Daniela ese unai nihi ena anina ia gwauraia hedinarai. Nebukanesa ia kavakava bona ia namo lou karana ese unai nihi ena kahana ia hagugurua. Lagani momo murinai, King Belesasa be iena lohia taudia totona aria badana ta ia karaia bona Iehova ena dubu amo idia abia kapusi be mai hemataurai lasi ida ia gaukaralaia. Unai hanuaboi ai, Belesasa idia hamasea bona Mede tauna Dariuse ese Babulonia ia abia. (Daniela 5:​30, 31) Dariuse ena lohia negana lalonai, Daniela ena mauri lagani be 90 neganai, gavamani taudia haida idia mama bona idia ura Daniela idia hamasea. To, “laiona edia dagedage dekena amo” Iehova ese ia hamauria.​​—⁠Daniela 6:​27.

Baibel Henanadaidia Edia Haere:

1:​11-​15​​—⁠Iuda memero foa be uma aniani idia ania dainai edia vairana ena toana ia namo herea, a? Lasi. Dina 10 lalonai uma aniani sibona ania karana ese unai ia havaraia lasi. To, Heberu memero edia vairana ena toana ia namo herea, badina idia ese Iehova idia abidadama henia bona ia ese ia hanamodia.​​—⁠Aonega Herevadia 10:⁠22.

2:1​​—⁠Nebukanesa ese kaivakuku badana ena nihi be edena negai ia abia? Siri ese ia hahedinaraia unai be “Nebukanesa ia king ena lagani iharuana lalonai.” Lagani 624 B.C.E. ai, ia be Babulonia ena king ai ia lao. Unai ese ia hahedinaraia, iena lohia laganina iharuana be 623 B.C.E.​​—⁠unai nega ai ia be Iuda besena ia do hadikaia lasi. Unai dainai, Daniela be unai nega ai nihi ena anina ia gwauraia hedinarai lasi, badina unai lagani ai ia be Babulonia dekenai ia noho lasi. Unai ese ia hahedinaraia, “lagani iharuana” be lagani 607 B.C.E. murinai idia duahia. Unai nega ai Babulonia king ese Ierusalema ia hadikaia bona tanobada ena lohia badana ai ia lao.

2:​32, 39​​—⁠Edena dala ai golo ese ia laulaulaia basileiana ese siliva gauna ia hereaia, bona siliva ese ia laulaulaia basileiana ese auri laboralabora gauna ia hereaia? Kaivakuku ena golo kwarana ese ia laulaulaia Babulonia Basileiana be Mede-Parasa basileiana, siliva kahana ese ia laulaulaia gauna ia hereaia, badina Mede-Parasa ese Iuda besena ia hadikaia lasi. Mede-Parasa basileia murinai be Greece, auri laboralabora ese ia laulaulaia. Greece be Mede-Parasa henunai, siliva ese auri laboralabora ia hereaia bamona. Ena be Greece Basileiana be tano momo ia abia, to Dirava ena taunimanima be igui hesiai amo ia ruhaia lasi, Mede-Parasa bamona.

4:​8, 9​​—⁠Daniela be meamea tauna ai ia lao, a? Lasi. Inai hereva “meamea taudia edia lohia” be Daniela ena dagi ia herevalaia, ia be “Babulonia ena aonega taudia ibounai edia tau badana.”​​—⁠Daniela 2:​48.

4:​10, 11, 20-​22​​—⁠Nebukanesa ena nihi lalonai, au lata herea be dahaka ia laulaulaia? Unai au be Nebukanesa ia laulaulaia guna, ia be tanobada ibounai ia lohiaia basileiana ena lohia tauna. Bona Nebukanesa be “tanobada taudia ibounai” ia lohiaia, danu unai au ese Iehova ena lohia siahuna ia laulaulaia, bona unai ese Babulonia ena lohiaia siahuna ia hereaia momokani. Daniela 4:​17 ia hahedinaraia, unai nihi be “Ataiai Momokani Diravana” ia herevalaia. Danu, au ese Iehova ena guba bona tanobada lohia siahuna tanobada dekenai ia laulaulaia. Unai dainai, unai nihi be dala rua ai ia guguru​​—⁠Nebukanesa ena lohia negana ai bona Iehova ena lohia siahuna dekenai.

4:​16, 23, 25, 32​—⁠“Lagani 7” ena daudau be edena bamona? King Nebukanesa dekenai, unai lagani 7 ena anina be lagani korikoridia 7 eiava dina ibounai be 2,520, badina lagani ta ta ena dina ibounai be 360. To dala badana ai do ia guguru neganai, unai peroveta “lagani 7” ena anina be lagani 2,520. (Esekiela 4:​6, 7) Unai lagani be lagani 607 B.C.E. ai Ierusalema idia hadikaia negana amo ia hamatamaia, ela bona lagani 1914 ai ia doko, unai negai, Iesu be guba ai King ai ia lao.​—⁠Luka 21:⁠24.

6:​6-​10​​—⁠Iehova ita guriguri henia neganai, ita helai, gini, eiava hekure be gau badana lasi dainai, unai dina 30 lalodiai dahaka dainai Daniela be aonega dalanai ia hunia bona ia guriguri lasi? Taunimanima idia diba Daniela be dina ta lalonai nega toi Dirava dekenai ia guriguri. Unai dainai idia mama taudia be guriguri ia koua taravatuna idia karaia. Bema, Daniela be hunia dekenai ia guriguri, do idia gwau ia ese edia taravatu ia badinaia bona unai ese do ia hahedinaraia ia be Iehova ena tomadiho dalana ia dadaraia.

Ita Dibaia Gaudia:

1:​3-8. Daniela bona iena turadia idia gini goada bona Iehova idia badinaia karana ese ia hahedinaraia, edia tama sina ese idia hadibaia namonamo. Dirava idia gari henia tama sina be edia mauri lalonai Dirava ena ura idia atoa guna bona edia natudia idia hadibaia unai bamona do idia karaia neganai, edia natudia be sikuli eiava ma gabu haida dekenai hahetoho bona laloani karadia idia hanaia diba.

1:​10-​12. Daniela ia laloparara dahaka dainai Asipenasa be king ia gari henia, bona unai dainai ia doria lasi. To, Daniela be gabeai idia ia naria tauna dekenai ia lao, badina unai naria tauna be edia ura ia karaia. Hekwakwanai ita davaria neganai, namona be Daniela bamona aonega bona laloparara ita gaukaralaia.

2:​29, 30. Namona be Daniela bamona Iehova ita hanamoa, badina Ia ese ita ia hadibaia dainai, diba ita abia bona kara namodia ita hahedinaraia.

3:​16-​18. Bema matamanai, Heberu memero toi ese king ena aniani idia ania bona Dirava ena taravatu idia utua, reana idia be kaivakuku ena hahetoho dekenai idia moru danu. To unai bamona idia karaia lasi bona idia gini goada. Ita danu “kara ibounai lalonai” ita gini goada be namo.​​—⁠1 Timoteo 3:​11.

4:​24-​27. Basileia ena sivarai ita harorolaia neganai, Dirava ena hahemaoro herevadia danu ita gwauraia. Unai ita karaia totona Daniela ena abidadama, goada bona gari lasi karana ita tohotohoa be namo. Daniela ese Nebukanesa dekenai do ia vara dika ia gwauraia hedinarai bona king ia hadibaia dahaka do ia karaia ‘ena noho namo do ia davaria lou’ totona.

5:​30, 31. Babulonia ena king dekenai idia abia ane be ia guguru momokani. (Isaia 14:​3, 4, 12-​15) Satani Diabolo ena hekokoroku karana be Babulonia ena bamona, unai dainai ia be dika badana do ia abia danu.​​—⁠Daniela 4:​30; 5:​2-4, 23.

DANIELA ENA MATAHANAI ESE DAHAKA IA HAHEDINARAIA?

(Daniela 7:1–​12:⁠13)

Lagani 553 B.C.E. ai, Daniela be iena nihi ginigunana ia abia neganai, iena mauri lagani be 70 bamona. Unai nihi lalonai dagedage boroma 4 ia itaia. Idia ese Daniela ena nega amo ia mai bona iseda nega ai idia lohia tanobada ena basileia badadia idia laulaulaia. Matahanai amo ia itaia guba lalonai, tau ta be “taunimanima ena toana bamona,” bona ia dekenai ‘do ia noho hanaihanai siahu’ idia henia. (Daniela 7:​13, 14) Lagani rua murinai, Daniela ese matahanai lalonai Mede-Parasa, Greece, bona “king dika rohoroho” ai ia lao gauna ia itaia.​​—⁠Daniela 8:​23.

Lagani 539 B.C.E. ai Babulonia ia moru, bona Mede tauna Dariuse be Babulonia ena king dagina ia abia. Daniela be Iehova ia guriguri henia Ierusalema hanuana do ia hanamoa lou totona. Ia guriguri noho lalonai, Iehova ese aneru Gabriela ia siaia Daniela ia durua Mesia ena mai ia lalopararalaia totona. (Daniela 9:​20-​25) Lagani 536/535 B.C.E. ai, Iuda taudia haida be Ierusalema dekenai idia giroa lou. To, dubu haginia gaukara be bese haida ese idia koua toho. Unai dainai Daniela ia lalohekwarahi. Iena lalohekwarahi ia gurigurilaia, bona Iehova ese Daniela dekenai aneru ta ia siaia. Unai aneru be Daniela ia hagoadaia murinai, not kahana ena king bona saut kahana ena king be siahu abia totona mai goada ida idia tuari ena peroveta herevana ia gwauraia. Unai king rua edia tuari be Alesana Badana ena basileia ena ami jeneral foa huanai idia hapararaia negana amo ia hamatamaia ema bona Lohia Tauna Badana Mikaela “do ia toreisi” negana.​​—⁠Daniela 12:⁠1.

Baibel Henanadaidia Edia Haere:

8:9​​—⁠“Gwauhamata tanona” ena anina be dahaka? Inai siri lalonai, “gwauhamata tanona” ese hari inai negai Anglo-America Basileiana ena lohia negana ai idia noho horoa Keristani taudia tanobada ai ia laulaulaia.

8:​25​​—⁠“King iboudiai edia King” be daika? Heberu herevana sar, Hiri Motu Baibel dekenai idia hahanaia “king,” ena anina be “lohia tauna.” Unai siri lalonai inai hereva “king iboudiai edia King” be Iehova Dirava sibona ia gwauraia. Iehova be aneru iboudiai, Mikaela danu, edia Lohia badana.​​—⁠Daniela 10:⁠13.

9:​21​​—⁠Dahaka dainai Daniela be aneru Gabriela ia gwauraia “unai tau”? Badina aneru Gabriela be taunimanima ta bamona ia hedinarai Daniela dekenai, matahanai gunana ai ia hedinarai hegeregerena.​​—⁠Daniela 8:​15-​17.

9:​27​​—⁠Edena gwauhamata be taunimanima momo dekenai ia noho ela bona lagani edia pura namba 70 ena dokonai o 36 C.E.? Iehova ese lagani 33 C.E. ai Keriso ena mase amo Taravatu gwauhamatana ia kokia. To, Aberahamo ena gwauhamata be Israela bese korikorina amo ia kokia lasi ela bona lagani 36 C.E., Iuda taudia be Aberahamo ena tubudia dainai, Iehova ese unai gwauhamata ena namo be idia dekenai ia henia. Aberahamo ena gwauhamata be “Dirava ena Israela” amo ia kokia lasi.​​—⁠Galatia 3:​7-9, 14-​18, 29; 6:​16.

Ita Dibaia Gaudia:

9:​1-​23; 10:11. Daniela be manau tauna, Dirava ia badinaia, gaukara ia karaia namonamo, bona hanaihanai ia guriguri, unai dainai Dirava ese “ia lalokau henia bada.” Unai kara namodia ese ia idia durua bona Dirava ia abidadama henia noho ela bona ia mase. Namona be iseda lalona ita hadaia Daniela ita badinaia totona.

9:​17-​19. Ita be Dirava ena “kara maoromaoro” tanobadana totona ita guriguri neganai, namo lasi iseda hekwakwanai bona lalohisihisi do idia ore ita laloa momo, to gau badana be Iehova ena ladana bona iena lohia siahuna ita abia isi.​​—⁠2 Petero 3:​13.

10:​9-​11, 18, 19. Daniela dekenai ia mai aneru ita tohotohoa be namo, anina be ta ta ita durua bona hagoadaia heheni.

12:⁠3. Inai nega dokona lalonai, “aonega taudia”​​—⁠horoa Keristani taudia unai​​—⁠be hisiu bamona “tanobada idia hadiaria” bona taunimanima momo​—⁠“mamoe idaudia” taudia⁠​—⁠be dala maoromaoro dekenai idia hakaua mai. (Filipi 2:​15; Apokalupo 7:9; Ioane 10:16) Keriso ena lohia lagani 1,000 lalonai, Iesu bona horoa taudia be “hisiu bamona” do idia hururu, bona tanobada ai idia noho kamonai taudia dekenai unai mauri davalaia boubouna ena namo ibounai do idia henia. “Mamoe idaudia” be horoa taudia ida idia gaukara hebou bona dala idauidau ai idia durudia be namo.

‘Iehova Idia Matauraia Taudia’ be Ia Hanamoa Noho

Daniela bukana ese edena dala ai ita dekenai Iehova ena kara ia hadibaia? Unai buka lalonai idia noho peroveta herevadia​​—⁠idia guguru vadaeni gaudia bona idia do guguru lasi gaudia⁠​—⁠mani oi laloa. Unai ese idia hahedinaraia Iehova be iena hereva ia Hagugurua Tauna!​​—⁠Isaia 55:⁠11.

Daniela bukana ena kahana ginigunana ese iseda Dirava be edena bamona ia gwauraia? Heberu memero foa be Babulonia ena mauri dalana idia abia dae lasi dainai, Dirava ese idia dekenai diba bona aonega ia henia. (Daniela 1:​17) Dirava momokani ese iena aneru ia siaia bona Sataraka, Misaka, bona Abetenigo be lahi amo ia hamauria. Daniela be laiona ena guri amo ia hamauria. Iehova ese ia idia abidadama henia bona matauraia taudia ia durua, ia naria, bona ia hanamodia.​​—⁠Salamo 115:​9, 13.

[Footnote]

[Picture on page 4]

Dahaka dainai Daniela be Dirava ese “ia lalokau henia bada”?