Karoa 13

King Rua Idia Tuari

IDIA heai king rua be lohia siahuna abia totona idia tuari mai goada ida. Lagani idia hanaia lalonai, nega haida ta ia goada, bona gabeai ma ta ia goada. Nega haida, king ta ena siahu ia bada bona ma ta be siahu lasi, bona nega haida idia tuari lasi. Bena karaharaga heai ma ta ia vara, bona idia tuari noho. Unai tuari lalonai idia noho taudia haida be Suria ena King Seleucus Namba 1 Nicator, Aigupito ena King Ptolemy Lagus, Suria ena king ena natuna kekeni bona Aigupito ena Kwini Cleopatra Namba 1, Roma Lohiadia Augusto bona Tiberio, bona Palmyra ena Kwini Zenobia. Unai tuari ena dokona kahanai, Nazi Germany, Komiunis tanodia, Tanobada ena Basileia Badana Anglo-America, League of Nations, bona United Nations be unai tuari lalonai idia vareai. Unai politikol oreadia ese unai tuari ena dokona ai idia vara gaudia idia laloa diba lasi. Iehova ena aneru ese lagani 2,500 gunanai peroveta tauna Daniela dekenai unai peroveta herevana namona ia hahedinaraia.​—⁠Daniela, karoa 11.

² Daniela ia moale bada, badina aneru ese do idia mai king rua edia heai be ia dekenai ia hahedinaraia dainai! Unai heai ita laloa danu be namo, badina ma ta hereaia totona idia tuari king rua be do idia heai noho ema bona iseda nega. Histori ena sivarai amo unai peroveta herevana ena matamana kahana ia guguru dalana ita itaia neganai, iseda abidadama do ia hagoadaia bona ita abia dae momokani ena dokona kahana do ia guguru danu. Unai peroveta herevana ita laloa namonamo neganai, do ita itaia goevagoeva ita be dokona negana lalonai ita noho. Danu, ita ia hagoadaia unai tuari amo ita gini siri bona Dirava ese ita totona kara ta do ia karaia negana ita naria mai haheauka ida. (Salamo 146:​3, 5) Unai dainai, Iehova ena aneru be Daniela dekenai ia hereva neganai, ita kamonai namonamo.

GREECE ENA BASILEIA IA TUARI HENIA

³ Aneru ia gwau: “Dariuse, Mede besena tauna, ia king lagani ginigunana lalonai [539/538 B.C.E.] lau ese durua bona hagoadaia totona iena badinai lau gini noho.” (Daniela 11:⁠1) Dariuse ia mase vadaeni, to aneru ese ena lohia negana ia gwauraia unai amo ena peroveta herevana ia hamatamaia totona. Unai king ese oda ia henia dainai Daniela be laiona edia guri amo idia ruhaia. Danu, Dariuse ese oda herevana ia henia, ia lohiaia taudia ibounai ese Daniela ena Dirava do idia gari henia be namo. (Daniela 6:​21-27) To, aneru ese ia durua tauna be Mede tauna Dariuse lasi, to ia be aneru ena bamona Mikaela​—⁠Daniela ena bese ena lohia ta. (Daniela 10:​12-14 itaia.) Mikaela be Mede-Parasa ena demoni lohiana ida ia heai neganai Dirava ena aneru ese ia durua.

⁴ Dirava ena aneru be ma ia gwau: “King toi ma ese Parasa do idia biagua, gabeai namba 4 do ia toreisi, iena kohu be do ia bada herea momokani. Iena kohu bona siahu idia bada herea momokani neganai, iena boiboi dainai bese momo herea ese ia do idia durua, vadaeni do idia lao, Helene dekenai do idia tuari karaia.” (Daniela 11:⁠2) Unai Parasa ena king taudia be daidia?

⁵ King ginigunadia toi be Kurese Badana, Cambyses Namba 2, bona Dariuse Namba 1. Bardiya (eiava reana koikoi tauna ta ladana Gaumata) be hua 7 sibona ia lohia dainai, unai peroveta herevana ese ena lohia negana kwadogina ia gwauraia lasi. Lagani 490 B.C.E. ai, king ihatoina, Dariuse Namba 1, be nega iharuana Greece lalonai ia vareai toho. To, Parasa taudia be Marathon dekenai idia halusia bona Asia Minor dekenai idia giroa lao. Ena be Dariuse ia hegaegae namonamo Greece do ia tuari henia lou totona, to ena mauri lalonai unai ia karaia diba lasi badina lagani hani murinai ia mase. Unai tuari be ena natuna mero, ia murinai ia lohia king Xerxes Namba 1, king “namba 4” unai, ese ena ura hegeregerena do ia karaia. Ia be Eseta ia adavaia King Ahasuero.​—⁠Eseta 1:1; 2:​15-17.

⁶ Bona momokani, Xerxes Namba 1 ese ‘Helene dekenai ia tuari karaia,’ anina be sibona idia lohiaia Greece provinsi iboudiai ia tuari henia. Buka ladana The Medes and Persians​​—⁠Conquerors and Diplomats ia gwau: “Siahu idia ura abia lalo-ani taudia ese Xerxes ena lalona idia veria dainai, tano bona davara dekenai tuari ia karaia.” Lagani 500 B.C.E. murinai ia mauri Greek histori torea tauna Herodotus ia gwau, “ita diba tuaridia amo inai be badana.” Ia torea sivaraina ia gwau, davara dekenai idia tuari taudia “edia namba be 517,610. Idia raka tuari taudia be 1,700,000; hosi idia guia taudia be 80,000; bona kamelo idia guia Arabia taudia bona kariota ai idia tuari Libia taudia ita duahia danu be namo, bona lau laloa edia namba be 20,000 bamona. Unai dainai, tano ai bona davara ai idia tuari taudia ibounai edia namba be 2,317,610.”

⁷ Xerxes Namba 1 ia laloa do ia kwalimu momokani, bona lagani 480 B.C.E. ai ena ami badana be Greece dekenai ia hakaua lao. Parasa taudia ese Thermopylae dekenai edia dala idia koua toho Greece taudia idia halusia, bena Atena idia hadikaia. To, Salamis dekenai Greece taudia ese idia halusidia. Lagani 479 B.C.E. ai, Plataea dekenai Greece taudia idia kwalimu lou. Xerxes murinai, lagani 143 lalonai, Parasa Basileiana idia lohiaia king taudia 7 be Greece idia tuari henia lasi. To gabeai, Greece dekenai king goadana ta ia toreisi.

BASILEIA BADANA BE KAHANA HANI DEKENAI IDIA HARIA

⁸ Aneru ia gwau: “King goadana ta do ia toreisi. Iena siahu do ia bada herea momokani, bona iena ura hegeregere do ia karaia.” (Daniela 11:⁠3) Mauri lagani 20 tauna, Alesana, be lagani 336 B.C.E. ai “ia toreisi” bona Makedonia ena king ai ia lao. Ia be “king goadana ta”​—⁠Alesana Badana​—⁠ai ia lao. Alesana ese ena tamana, Philip Namba 2, ena palani ia badinaia dainai, Middle East tanodia ai Parasa ena provinsi ia abidia. Ena tuari taudia 47,000 ese Euperate bona Taigarisi sinavaidia idia hanaia, bona Gaugamela dekenai Dariuse Namba 3 ena tuari taudia 250,000 idia lulua lao. Dariuse ia heau bona ia idia alaia mase, unai amo Parasa lohia besena ia ore. Unai neganai Greece be tanobada ena basileia badana ai ia lao, bona Alesana ‘ena siahu ia bada herea momokani bona ena ura hegeregerena ia karaia.’

⁹ Alesana ese tanobada ia lohiaia negana ia kwadogi sibona, badina Dirava ena aneru be ma ia gwau: “To iena siahu ia bada momokani neganai, iena basileia do ia parara, bona do idia haria kahana 4 dekenai, to iena natuna ese iena gabu do idia abia lasi. Iena gabu be haida ese do idia abia, to edia siahu be iena siahu danu do idia hegeregere lasi.” (Daniela 11:⁠4) Lagani 323 B.C.E. ai, Alesana ena mauri lagani be kahirakahira 33 neganai, Babulonia dekenai ia gorere bona ia mase.

¹⁰ Alesana ena tano badana be “iena natuna” ese idia abia lasi. Iena tadina Philip Namba 3 Arrhidaeus ena lohia negana be lagani 7 ia abia lasi, badina Alesana ena sinana, Olympias, ena ura dainai, lagani 317 B.C.E. ai ia idia hamasea. Alesana ena natuna mero Alesana Namba 4 ia lohia ela bona lagani 311 B.C.E. ai, ena tamana ena ami jeneral ta, Cassander, ese ia hamasea. Alesana ese hahine idauna ta amo ia havaraia natuna mero Heracles be ena tamana ena ladana dekenai ia lohia toho, to lagani 309 B.C.E. ai ia idia hamasea. Unai dala amo Alesana ena lohia besena ia ore, bona “iena basileia” be ena bese amo idia kokia.

¹¹ Alesana ena mase murinai, ena basileia “idia haria kahana 4 dekenai.” Ena ami jeneral momo be teritori idia abia totona idia heai. Matana tamona Jeneral Antigonus Namba 1 ese Alesana ena basileia ibounai ia biagua toho. To Perigia dekenai Ipsus ena tuari lalonai ia idia hamasea. Lagani 301 B.C.E. ia abia neganai, Alesana ena ami jeneral hani ese edia biaguna ia abia teritori badana idia lohiaia. Cassander ese Makedonia bona Greece ia lohiaia. Asia Minor bona Thrace be Lysimachus ena siahu henunai. Seleucus Namba 1 Nicator ese Mesopotamia bona Suria ia abia. Bona Ptolemy Lagus ese Aigupito bona Palestine ia dogoatao. Peroveta herevana hegeregerena, Alesana ena basileia badana idia haria bena Helene basileiadia hani idia vara.

IDIA TUARI KING RUA IDIA HEDINARAI

¹² Cassander ese siahu ia abia bena lagani haida murinai ia mase, bona lagani 285 B.C.E. ai, Lysimachus ese Europe ai ia noho Greece Basileiana ena teritori ia dogoatao. Lagani 281 B.C.E. ai, Lysimachus be Seleucus Namba 1 Nicator ia tuari henia lalonai ia mase, unai amo Seleucus ese Asia ai idia noho teritori edia kahana badana ia abia. Antigonus Namba 2 Gonatas, Alesana ena ami jeneral ta ena tubuna, be lagani 276 B.C.E. ai Makedonia ia lohiaia matamaia. Gabeai, Makedonia be Roma ena heduru dekenai ia tabekau bada bona lagani 146 B.C.E. ai Roma ena provinsi ta ai ia lao.

¹³ Unai Helene basileiadia hani amo rua sibona idia do noho bona idia goada​—⁠ta be Seleucus Namba 1 Nicator ena siahu henunai bona ma ta be Ptolemy Lagus ena siahu henunai ia noho. Seleucus ese sibona ena lohia besena be Suria dekenai ia haginia. Ia haginia hanuadia amo ta be Antioka​—⁠Suria ena hanua badana matamatana​—⁠bona ta be kone hanuana Seleukia. Gabeai, aposetolo Paulo be Antioka dekenai ia hadibaia, unuseniai nega ginigunana Iesu murinai idia raka taudia idia gwauraia Keristani taudia. (Kara 11:​25, 26; 13:​1-4) Lagani 281 B.C.E. ai Seleucus idia alaia mase, to ena lohia besena ia lohia noho ela bona lagani 64 B.C.E. ai, Roma ena Jeneral Gnaeus Pompey ese Suria be Roma ena provinsi ta ai ia halaoa.

¹⁴ Unai Helene basileiadia hani amo ia noho daudau basileiana be lagani 305 B.C.E. ai king dagina ia abia tauna Ptolemy Lagus, eiava Ptolemy Namba 1, ena basileia. Ia haginia Ptolemy lohia besena ese Aigupito ia lohiaia ela bona lagani 30 B.C.E. ai Roma ese ia abia.

¹⁵ Unai dala ai, Helene basileiadia hani amo king goadadia rua idia toreisi​—⁠Seleucus Namba 1 Nicator Suria dekenai bona Ptolemy Namba 1 Aigupito dekenai. Unai king rua amo Daniela karoa 11 ia hahedinaraia “not kahana ena king” bona “saut kahana ena king” huanai ia noho daudau tuarina ia hamatamaia.a Iehova ena aneru ese unai king edia ladadia ia gwauraia lasi, badina lagani handred momo lalonai unai king rua edia ladana bona edia tano be do idia idau. Aneru ese gau maragidia idauidau ia gwauraia lasi, to unai tuari lalonai mai anina lohiadia bona idia vara gaudia sibona ia gwauraia.

TUARI IA MATAMAIA

¹⁶ Mani oi kamonai! Iehova ena aneru ese unai tuari ena matamana ia gwauraia neganai, ia gwau: “Inai murinai [saut kahana] ena king be do ia goada. To iena [Alesana ena] tuari lohia ta [not kahana ena king] ese king ena siahu do ia hereaia, vadaeni ia ese sibona ena basileia do ia biagua bona habadaia.” (Daniela 11:⁠5) “Not kahana ena king” bona “saut kahana ena king” ese Daniela ena bese taudia, unai negana ai idia be Babulonia amo idia giroa lou vadaeni bona Iuda tanona dekenai idia noho, edia not bona saut kahanai idia noho king taudia idia gwauraia. Aigupito ena Ptolemy Namba 1 be “saut kahana ena king” ginigunana. Ptolemy Namba 1 ena siahu ia hereaia bona ena basileia ia “habadaia” king be guna Alesana ena ami jeneral bona hari Suria ena King Seleucus Namba 1 Nicator. Ia be “not kahana ena king” ai ia lao.

¹⁷ Tuari ia matamaia neganai, Iuda tanona be saut kahana ena king ena basileia lalonai ia noho. Lagani 320 B.C.E. bamona amo, Ptolemy Namba 1 ese Iuda taudia edia lalona ia veria, Aigupito dekenai idia mai bona idia noho totona. Iuda taudia momo be Alesandria, Ptolemy Namba 1 ese laiberi badana ia haginia gabuna, dekenai idia noho. Iuda dekenai idia noho Iuda taudia be Ptolemy lohia besena ia lohiaia Aigupito, saut kahana ena king, henunai idia noho ela bona lagani 198 B.C.E.

¹⁸ Aneru ese unai king rua ia perovetalaia, ia gwau: “Bena lagani haida edia dokonai idia ta ta do idia gaukara hebou, bona saut kahana ena king ena natuna kekeni korikori be not kahana ena king dekenai do ia mai gwaubou namona ta do idia karaia totona. To hahine ena imana ena siahu do ia dogoatao lasi; bona tau, bona ena imana danu, be do ia gini lasi; bona hahine do idia haorea, ia, bona ia idia abia mai taudia, bona ia ia havaraia tauna, bona unai nega lalodiai ia ia hagoadaia tauna.” (Daniela 11:​6, NW ) Unai be edena dala ai ia guguru?

¹⁹ Peroveta herevana ese Seleucus Namba 1 Nicator ena natuna mero, ia murinai ia lohia tauna Antiochus Namba 1, ia gwauraia lasi, badina ia ese saut kahana ena king dekenai tuari badana ta ia karaia lasi. To ia murinai ia lohia tauna, Antiochus Namba 2, ese nega daudau lalonai Ptolemy Namba 1 ena natuna mero, Ptolemy Namba 2, ia tuari henia. Unai neganai Antiochus Namba 2 be not kahana ena king bona Ptolemy Namba 2 be saut kahana ena king. Antiochus Namba 2 ena adavana be Laodice, bona idia be mai edia natuna mero ladana Seleucus Namba 2, bona Ptolemy Namba 2 be mai ena natuna kekeni ladana Berenice. Lagani 250 B.C.E. ai, unai king rua ese “gwaubou namona ta” idia karaia. Unai hagoadaia karana ia vara totona, Antiochus Namba 2 ese ena hahine Laodice ia rakatania bona “saut kahana ena king ena natuna kekeni korikori” Berenice ia adavaia. Berenice amo natuna mero ia abia bona ia be Suria ena king ai do ia lao, to Laodice ena natuna memerodia lasi.

²⁰ Berenice ena tamana, Ptolemy Namba 2, be iena “imana,” eiava ia durua siahuna. Lagani 246 B.C.E. ai tamana ia mase neganai, Berenice “ena imana ena siahu do ia dogoatao lasi,” anina be iena adavana dekenai ia be siahu lasi. Antiochus Namba 2 ese Berenice ia dadaraia, Laodice ia adavaia lou, bona edia natuna mero ia gwauraia ia murinai king ai do ia lao tauna. Laodice ena palani hegeregerena, Berenice bona ena natuna mero idia alaia mase. Toana be, Aigupito amo Suria dekenai Berenice “idia abia mai” hesiai taudia idia alaia danu. Laodice ese Antiochus Namba 2 be poisini amo ia alaia, bona unai dala ai tau “ena imana,” eiava ena siahu, “ia gini lasi.” Unai dala ai, Berenice ena tamana​—⁠“ia ia havaraia tauna”​—⁠bona ena tau​—⁠nega sisina lalonai ia “ia hagoadaia” Suria tauna​—⁠idia mase. Unai dainai, Seleucus Namba 2, Laodice ena natuna mero, be Suria ena king ai ia lao. Ptolemy lohia besena ena king be unai ibounai dainai dahaka do ia karaia?

KING ESE ENA TAIHUNA IDIA ALAIA ENA DAVANA IA HENIA

²¹ Aneru ia gwau: “Unai neganai unai hahine ena varavara ta be Aigupito king dagi do ia abia, do ia toreisi, [not kahana] ena king ena tuari magu goadana dekenai do ia vareai, do ia tuari henia, bona do ia kwalimu.” (Daniela 11:⁠7) Unai Berenice ena “varavara ta” be ena taihuna. Ena tamana ia mase neganai, “ia toreisi” bona saut kahana ena king, Aigupito ena Farao Ptolemy Namba 3, ai ia lao. Maoromaoro, ena taihuna Berenice idia alaia ena davana henia totona ia lao. Suria ena King Seleucus Namba 2, guna Laodice ese Berenice bona ena natuna mero alaia mase totona ia gaukaralaia tauna, tuari henia totona ia lao neganai, “not kahana ena king ena tuari magu goadana dekenai” ia ginidae. Ptolemy Namba 3 ese Antioka ena magu kahana ia abia bona Laodice ia hamasea. Not kahana ena king ena basileia lalona amo ist kahana dekenai ia lao bona Babulonia amo kohu ia abia bona ia lao ela bona India.

²² Bena dahaka ia vara? Dirava ena aneru ese ita ia hadibaia, ia gwau: “Ia ese Suria edia dirava ena kaivakuku gaudia, bona golo bona siliva gau namodia do ia abia lao Aigupito dekenai. Unuseni do ia noho lagani haida, bona ia ese [not kahana] ena king do ia tuari henia lasi.” (Daniela 11:⁠8) Lagani 200 bamona gunanai, Parasa ena King Cambyses Namba 2 ese Aigupito ia abia bona Aigupito diravadia, “kaivakuku gaudia,” be ena gabu dekenai ia abia lao. Ptolemy Namba 3 ese Parasa ena king ena hanua badana gunana Susa amo kohu ia abia neganai unai dirava ia davaridia bona Aigupito dekenai ia “abia lao.” Danu, ia ese “golo bona siliva gau namodia” be ena tuari amo ia abia. Bona Ptolemy Namba 3 be ena gabu dekenai dagedage karana do ia koua be namo dainai, ‘not kahana ena king ia tuari henia lasi.’

SURIA ENA KING ESE DAVANA IA HENIA

²³ Not kahana ena king be dahaka ia karaia? Aneru ese Daniela ia hamaoroa: “Vadaeni [not kahana] ena king do ia lao, [saut kahana] ena king ena tano dekenai do ia tuari henia, to tuari ia auka dainai, do ia giroa lou iena tano dekenai.” (Daniela 11:⁠9) Not kahana ena king​—⁠Suria ena King Seleucus Namba 2​—⁠ese tuari ia karaia. Ia be saut kahana ena Aigupito king “ena tano,” eiava ena basileia, lalonai ia vareai to idia halusia. Bena Seleucus Namba 2 be ena tuari taudia orena maragina ida ‘iena tano dekenai ia giroa lou,’ oibe, lagani 242 B.C.E. ai Suria ena hanua badana Antioka dekenai ia giroa lao. Ia mase murinai, iena natuna mero Seleucus Namba 3 be king ai ia lao.

²⁴ Peroveta herevana ese Suria ena King Seleucus Namba 2 ena natudia be edena bamona ia herevalaia? Aneru ese Daniela ia hamaoroa: “To Suria king ena natuna tau do idia toreisi, do idia hegaegae tuari totona, tuari orea bada herea do idia haboua. Do idia toreisi, bona abata badana bamona do idia lao Aigupito . . . [“To do ia giroa, bona sibona ena ura do badinaia ela bona ena hanua goadana,” NW ].” (Daniela 11:10) Seleucus Namba 3 ena lohia negana be lagani toi ia do abia lasi neganai ia ore, badina ia idia alaia mase. Iena tadina, Antiochus Namba 3, be ena murinai Suria ia lohiaia. Unai Seleucus Namba 2 ena natuna tau ese tuari orea badana ia haboua saut kahana ena king, unai neganai ia be Ptolemy Namba 4, ia tuari henia totona. Not kahana ena Suria king matamatana be Aigupito ia tuari henia lalonai ia kwalimu bona kone hanuana Seleukia, Coele-Suria provinsi, Turo bona Ptolemaïs hanuadia, bona kahirakahira idia noho hanua ma haida, ia abia lou. King Ptolemy Namba 4 ena tuari taudia ia halusia bona Iuda ena hanua momo ia abia. Lagani 217 B.C.E. ena keru negana ia ore lalonai, Antiochus Namba 3 ese Ptolemaïs hanuana ia rakatania bona not kahanai ia lao “ela bona ena hanua goadana,” Suria lalonai, ia ginidae. To gau haida do idia idau.

EDIA NOHO IDIA IDAU

²⁵ Daniela bamona Iehova ena aneru ena hereva ita kamonai namonamo, ia gwau: “[Saut kahana] ena king be mai badu dikadika danu do ia lao, [not kahana] ena king do ia tuari henia. Suria king ena tuari oreana be bada herea, to Aigupito ena king be do ia kwalimu.” (Daniela 11:11) Saut kahana ena king, Ptolemy Namba 4, bona ena tuari taudia 75,000 be not kahana dekenai idia lao, edia inai tauna idia tuari henia totona. Unai tuari totona not kahana ena king, Suria ena Antiochus Namba 3, ia haboua “tuari oreana be bada herea,” idia be tuari taudia 68,000. To kone hanua Raphia ai, Aigupito ena hetoana kahirakahira dekenai, idia tuari neganai saut kahana ena king ia “kwalimu” bona unai ‘orea badana’ ia halusia.

²⁶ Peroveta herevana be ma ia gwau: “Ia kwalimu bona tuari taudia momo ia hamasedia dainai, do ia hekokoroku dikadika, to do ia kwalimu noho lasi.” (Daniela 11:12) Ptolemy Namba 4, saut kahana ena king, ese Suria ena tuari taudia 10,000 bona hosi guia taudia 300 “ia hamasedia” bona idia 4,000 bamona ia abia lao. Bena unai king rua ese gwauhamata idia karaia, Antiochus Namba 3 ese Suria ena kone hanua Seleukia ia dogoatao diba to Poinikia bona Coele-Suria ia haboioa. Unai kwalimu dainai, saut kahana ena Aigupito king “ia hekokoroku,” bona Iehova vairanai ia hekokoroku bada. Iuda be Ptolemy Namba 4 ena siahu henunai ia noho. To, not kahana ena Suria king vairanai ia “kwalimu noho lasi.” Lasi, Ptolemy Namba 4 be lebulebu mauri dalana ia badinaia matamaia, bona ena lagani 5 natuna mero, Ptolemy Namba 5, be saut kahana ena king ai ia lao bena lagani haida murinai Antiochus Namba 3 ia mase.

LADANA BADA KING IA GIROA LOU

²⁷ Antiochus Namba 3 ese ia karaia kara badadia dainai ia idia gwauraia Antiochus Badana. Aneru ese ia herevalaia, ia gwau: “[Not kahana] ena king do ia toreisi lou, bona orea bada herea momokani ma do ia haboua, guna oreana be ia maragi. Bona lagani haida idia ore murinai, unai orea matamata mai edia tuari gaudia danu tuari totona do idia lao.” (Daniela 11:13) Unai “lagani haida” be Aigupito taudia ese Raphia dekenai Suria taudia idia halusia murinai, lagani 16 eiava 16 bona ma haida. Mero matamata Ptolemy Namba 5 be saut kahana ena king ai ia lao neganai, Antiochus Namba 3 be “orea bada herea momokani” ida ia lao saut kahana ena Aigupito king ese ia abia teritori do ia abia lou totona. Unai ia karaia totona, Makedonia ena King Philip Namba 5 ena tuari taudia ida idia lao.

²⁸ Saut kahana ena king be ena basileia lalonai hekwakwanai ia davaria danu. Aneru ia gwau: “Unai neganai orea momo do idia toreisi, [saut kahana] ena king do idia tuari henia.” (Daniela 11:14a) Bona momokani, momo ese ‘saut kahana ena king idia tuari henia.’ Saut kahana ena king matamatana be Antiochus Namba 3 bona ena Makedonia turadia sibona ese idia tuari henia lasi, to ena tano Aigupito ai hekwakwanai ia davaria danu. Ena naria tauna, iena ladana ai ia lohia tauna Agathocles, be mai hekokoroku ida Aigupito taudia ia kara henia dainai, momo idia dagedage. Aneru be ma ia gwau: “Unai neganai oi Daniela, oiemu bese dekena amo dagedage taudia haida mata hanai ta idia itaia dainai do idia toreisi, Aigupito ena king do idia tuari henia, to do idia kwalimu lasi.” (Daniela 11:14b) Daniela ena bese taudia haida be “dagedage taudia,” eiava king gwau-edeede henia taudia, ai idia lao danu. To bema unai Iuda taudia ese edia tano ai Idau Bese taudia edia siahu haorea ‘matahanai’ ta idia abia, ia be koikoi gauna, bona “do idia kwalimu lasi.”

²⁹ Iehova ena aneru be ma ia peroveta: “[Not kahana] ena king do ia lao, Aigupito ena king do ia tuari henia, bona ia ese hanua goada hereana ta do ia halusia, bona unai gabu do ia abia. Aigupito tuari taudia do idia gini goada diba lasi, mai edia goada taudia danu edia goada do ia hegeregere lasi. Unai dainai unai Suria tuari taudia be edia ura hegeregere do idia karaia, unai tano taudia ese idia koudia diba lasi. Hairai bada herea tanona danu do idia abia, bona unai tano do idia biagua momokani [“bona ena imana amo dika ia havaraia,” NW ].”​—⁠Daniela 11:​15, 16.

³⁰ Ptolemy Namba 5 ese ia biagua “Aigupito tuari taudia” be not kahana amo idia mai tuari taudia vairanai idia moru. Paneas (Kaisarea Filipi) dekenai, Antiochus Namba 3 ese Aigupito ena Jeneral Scopas bona ena tuari taudia namodia, “mai edia goada taudia,” 10,000 be “hanua goada hereana,” Sidono, dekenai ia lulua lao. Unuseniai Antiochus Namba 3 ese idia “ia tuari henia” bona lagani 198 B.C.E. ai unai Poinikia kone hanuana ia abia. Ia be ‘sibona ena ura hegeregerena ia karaia’ badina saut kahana ena Aigupito king be iena vairanai ia gini diba lasi. Bena Antiochus Namba 3 be “hairai bada herea tanona,” Iuda, ena hanua badana Ierusalema dekenai ia lao. Lagani 198 B.C.E. ai, Ierusalema bona Iuda be saut kahana ena Aigupito king ena siahu henuna amo not kahana ena Suria king ena siahu henunai ia vareai. Bona Antiochus Namba 3, not kahana ena king, ese ‘hairai bada herea tanona ia abia.’ Bona idia gwau-edeede Iuda bona Aigupito taudia dekenai “ena imana amo dika ia havaraia.” Not kahana ena king be sibona ena ura ia karaia diba ela bona edena nega?

ROMA ESE LADANA BADA KING IA KOUA

³¹ Iehova ena aneru be inai haere ia henia: “[Not kahana] ena king ese iena basileia ibounai ena tuari taudia do ia haboua, unai Aigupito basileia ibounai do ia abia gwauraia. . . . [“bona ia ida gwauhamata namona ia karaia, bona ena gaukara ia karaia namonamo,” NW ] Suria ena king ese lohia ena kekeni ta headava totona do ia henia Aigupito ena king dekenai. To unai dala ia karaia gauna be ena anina do ia davaria lasi.”​—⁠Daniela 11:⁠17.

³² Not kahana ena king, Antiochus Namba 3, ese guna ena lalona ia hadaia “iena basileia ibounai ena tuari taudia” ida Aigupito do ia biagua. To Roma ena ura dainai, ena palani ia haidaua bona saut kahana ena king, Ptolemy Namba 5, ida “gwauhamata namona ia karaia.” Antiochus Namba 3 bona Makedonia ena King Philip Namba 5 ese Aigupito ena king matamatana ena teritori idia abia totona idia tuari hebou neganai, Ptolemy Namba 5 ena naria taudia ese Roma ena heduru idia tahua. Bena Roma ese ena siahu ia habadaia totona dala ia kehoa neganai, kara ta ia karaia.

³³ Roma ese ia doria dainai, Antiochus Namba 3 ese saut kahana ena king ida maino gwauhamatana idia karaia. Antiochus Namba 3 ese ia abia teritori be Roma ena ura hegeregerena ia henia lou lasi, to palani ia karaia “ena kekeni” Cleopatra Namba 1 be Ptolemy Namba 5 adavaia totona ia henia neganai idia dekenai do ia henia. Anina be provinsi haida, idia ta be “hairai bada herea tanona” Iuda, be ena kekeni ena adavana dekenai do ia henia harihari gauna. To, lagani 193 B.C.E. ai unai headava idia karaia neganai, Suria ena king ese Ptolemy Namba 5 dekenai unai provinsi ia henidia lasi. Unai headava be politikol headava ta danu, unai amo Aigupito be Suria ena siahu henunai do ia vareai. To unai palani ‘ena anina ia davaria lasi,’ badina Cleopatra Namba 1 be ena adavana ia badinaia. Antiochus Namba 3 bona Roma huanai tuari ia vara neganai, Aigupito be Roma ia durua.

³⁴ Aneru ese not kahana ena king ena hekwakwanai ia gwauraia neganai, ma ia gwau: “Unai murinai motumotu kahana basileia be Suria king ese do ia tuari henidia, bona haida dekenai do ia kwalimu. To idau bese ena lohia tauna ta [Roma] do ia mai, do ia tuari henia, bona ia ese Suria ena lohia ena hekokoroku karadia do ia hadokoa. Do ia halusia [Roma ese], bona do ia hahemaraia momokani. Unai Suria ena king be iena tano dekenai do ia giroa lou gwauraia, to tuari dekenai haida ese do idia halusia. Iena dokona ia ginidae unai.”​—⁠Daniela 11:​18, 19.

³⁵ Unai “motumotu kahana basileia” be Makedonia, Greece, bona Asia Minor. Lagani 192 B.C.E. ai, Greece dekenai tuari ia matamaia, bona Antiochus Namba 3 be Greece dekenai ia lao. Roma ia moale lasi badina Suria ena king ia ura Greece dekenai teritori ma haida ia abia toho, bona ia tuari henia matamaia. Thermopylae dekenai Roma ese ia halusia. Lagani 190 B.C.E. ai, Magnesia ena tuari ai ia idia halusia bena lagani tamona bamona murinai, ena teritori ibounai Greece, Asia Minor, bona Taurus Ororodia edia west kahana gabudia ibounai ia haboioa. Roma ese Suria amo kompensesen badana ia tahua bona not kahana ena Suria king be ena siahu henunai ia vareai. Antiochus Namba 3 be Greece bona Asia Minor amo idia lulua bona kahirakahira ena bouti ibounai ia haboioa murinai, Suria, ‘ena tano dekenai ia giroa lou.’ Roma taudia ese ‘ena hekokoroku karadia idia hadokoa bona idia hahemaraia momokani.’ Antiochus Namba 3 be lagani 187 B.C.E. ai, Elymaïs, Parasa dekenai, dubu ta ena kohu idia henaoa gwauraia neganai ia mase. Unai dala ai mase ese ia “halusia” bona ena murinai ena natuna mero Seleucus Namba 4 ese king dagina ia abia, not kahana ena king matamatana ai ia lao.

IDIA TUARI NOHO

³⁶ Saut kahana ena king, Ptolemy Namba 5, ese Cleopatra ia adavaia neganai idia gwauhamatalaia provinsi ia abidia toho, to ena hekwarahi ia ore badina poisini amo ia idia alaia mase. Iena murinai Ptolemy Namba 6 be king ai ia lao. Seleucus Namba 4 be edena bamona? Roma dekenai kompensesen badana ia henia diba totona moni ia abia be namo, unai dainai ena moni naria tauna Heliodorus be Ierusalema dekenai ia siaia badina idia gwau ena dubu dekenai kohu ia noho. Heliodorus ia ura terona ia abia dainai, Seleucus Namba 4 ia alaia mase. To, Peregamo ena King Eumenes bona ena tadina Attalus ese Selucus Namba 4 ena tadina Antiochus Namba 4 be king ai idia halaoa.

³⁷ Not kahana ena king matamatana, Antiochus Namba 4, be Dirava ataiai sibona ia abia isi badina ia ura Iehova tomadiho henia karana ia haorea. Iehova vairanai ia hekokoroku, bona Ierusalema ena dubu be Zeus, eiava Jupiter, dekenai ia hahelagaia. December 167 B.C.E. ai, dubu ena ariara dekenai dina ta ta ai Iehova dekenai gabua ore boubouna idia karaia boubou patana badana latanai kaivakuku ena boubou patana ta idia haginia. Dina 10 murinai, unai kaivakuku ena boubou patana dekenai boubou ta be Zeus dekenai idia karaia. Unai hadikaia karana dainai Maccabee taudia ese Iuda taudia idia gunalaia bona idia gwau-edeede. Antiochus Namba 4 be lagani toi lalonai idia ia tuari henia. Lagani 164 B.C.E. ai, hadikaia karana guna idia karaia dinana tamona ai, Judas Maccabaeus ese Iehova dekenai dubu ia hahelagaia lou bona dubu hagoevaia ariana​—⁠Hanukkah​—⁠idia matamaia unai.​—⁠Ioane 10:⁠22.

³⁸ Toana be Maccabee taudia ese lagani 161 B.C.E. ai Roma ida gwauhamata ta idia karaia bona lagani 104 B.C.E. ai basileia ta idia haginia. To idia bona not kahana ena Suria king idia heai noho. Dokonai, unai hepapahuahu idia haorea totona Roma idia boiria. Roma ena Jeneral Gnaeus Pompey ese lagani 63 B.C.E. ai, hua toi Ierusalema ia koua hagegea bena ia abia. Lagani 39 B.C.E. ai, Roma ena Kaunsolo ese Heroda​—⁠Edoma tauna​—⁠be Iuda ena king ai ia halaoa. Lagani 37 B.C.E. ai Ierusalema ia abia, bona Maccabee taudia edia lohia siahuna ia ore.

³⁹ Ita hoa dikadika badina ita itaia idia tuari king rua ia perovetalaia herevana ena matamana kahana ia guguru momokani! Oibe, ita moale bada, badina Daniela dekenai unai peroveta herevana idia hahedinaraia murinai, lagani 500 lalonai idia hedinarai gaudia ita itaia diba bona not kahana ena king bona saut kahana ena king idauidau ita diba! To, Iesu Keriso be tanobada dekenai ia noho negana ai bona iseda nega lalonai, unai king rua idia tuari noho lalonai politikol dalanai edia anina idia idau. Histori ena sivarai ese ia hahedinaraia gaudia bona unai peroveta herevana ena kahana idauidau ita hahegeregerea neganai, unai tuari noho king rua edia anina do ita dibaia diba.

[Footnote]

DAHAKA OI DIBAIA?

• Edena king goadadia rua be Helene basileiadia amo idia vara, bona edena tuari idia hamatamaia?

• Daniela 11:6 ia peroveta hegeregerena, edena dala ai unai king rua ese “gwaubou namona ta” idia karaia?

• Edena dala ai inai king ese unai tuari idia karaia:

Seleucus 2 bona Ptolemy 3 (Daniela 11:​7-9)?

Antiochus 3 bona Ptolemy 4 (Daniela 11:​10-​12)?

Antiochus 3 bona Ptolemy 5 (Daniela 11:​13-​16)?

• Cleopatra 1 bona Ptolemy 5 idia headava ena badina be dahaka, bona dahaka dainai unai palani ena anina ia vara lasi (Daniela 11:​17-​19)?

• Daniela 11:​1-​19 oi laloa namonamo amo dahaka namo oi abia?

[Study Questions]

1, 2. Dahaka dainai Daniela karoa 11 ena peroveta herevana ita laloa namonamo be namo?

 3. “Dariuse, Mede besena tauna, ia king lagani ginigunana lalonai” aneru ese ia durua tauna be daika?

4, 5. Peroveta herevana ese ia gwauraia Parasa ena king hani be daidia?

6, 7. (a) Edena dala ai king namba 4 be ‘Helene dekenai ia tuari karaia’? (b) Xerxes ese Greece ia tuari henia karana amo dahaka ia vara?

 8. Edena “king goadana ta” ia toreisi, bona edena dala ai ‘ena siahu ia bada herea momokani’?

9, 10. Alesana ena natuna ese ena basileia idia abia lasi peroveta herevana be edena bamona ia guguru?

11. Edena dala ai Alesana ena basileia “idia haria kahana 4 dekenai”?

12, 13. (a) Edena dala ai Helene basileiadia hani amo rua sibona idia noho? (b) Seleucus ese edena lohia besena Suria dekenai ia haginia?

14. Edena negai Ptolemy ese ena lohia besena Aigupito dekenai ia haginia?

15. Edena king goadadia rua be Helene basileiadia hani amo idia toreisi, bona edena tuari idia hamatamaia?

16. (a) Unai king rua be daidia edia not bona saut kahanai idia noho? (b) Edena king be “not kahana ena king” bona “saut kahana ena king” ai idia lao king ginigunadia?

17. Not kahana ena king bona saut kahana ena king idia tuari matamaia neganai, Iuda tanona be daika ena siahu henunai ia noho?

18, 19. Gabeai, edena dala ai idia tuari king rua ese “gwaubou namona ta” idia karaia?

20. (a) Edena dala ai Berenice ena “imana” ia moru? (b) Edena dala ai Berenice, ia “idia abia mai taudia,” bona “ia ia hagoadaia tauna” idia negea? (c) Antiochus Namba 2 ese ena “imana,” eiava ena siahu, ia haboioa murinai daika be Suria ena king ai ia lao?

21. (a) Daika be Berenice ena “varavara ta,” bona edena dala ai “ia toreisi”? (b) Edena dala ai Ptolemy Namba 3 be “not kahana ena king ena tuari magu goadana dekenai” ia lao bona ia vairanai ia kwalimu?

22. Ptolemy Namba 3 ese Aigupito dekenai dahaka ia abia mai, bona dahaka dainai ‘lagani haida lalonai not kahana ena king ia tuari henia lasi’?

23. Not kahana ena king be saut kahana ena king ena basileia lalonai ia vareai murinai, dahaka dainai ‘iena tano dekenai ia giroa lou’?

24. (a) Dahaka ia vara Seleucus Namba 3 dekenai? (b) Edena dala ai King Antiochus Namba 3 ‘ia toreisi, bona abata badana bamona ia lao Aigupito’ dekenai?

25. Edena gabu ai Ptolemy Namba 4 bona Antiochus Namba 3 idia tuari, bona saut kahana ena Aigupito king ia “kwalimu” neganai daidia ia halusia?

26. (a) Raphia dekenai idia tuari neganai saut kahana ena king ese edena “taudia momo” ia hamasea bona ia abia lao, bona unuseniai maino totona idia karaia gwauhamata be dahaka? (b) Edena dala ai Ptolemy Namba 4 “ia kwalimu noho lasi”? (c) Ia murinai daika be saut kahana ena king ai ia lao?

27. Edena dala ai not kahana ena king be “lagani haida idia ore murinai” ia giroa Aigupito amo teritori haida ia abia lou totona?

28. Saut kahana ena king matamatana ese edena bamona hekwakwanai ia davaridia?

29, 30. (a) Edena dala ai “Aigupito tuari taudia” be not kahana amo idia mai tuari taudia vairanai idia moru? (b) Edena dala ai not kahana ena king be ‘hairai bada herea tanona ia abia’?

31, 32. Dahaka dainai not kahana ena king ese saut kahana ena king ida “gwauhamata namona ia karaia”?

33. (a) Antiochus Namba 3 bona Ptolemy Namba 5 idia karaia maino gwauhamatana be dahaka? (b) Cleopatra Namba 1 bona Ptolemy Namba 5 be dahaka dainai idia headava, bona dahaka dainai unai palani ia moru?

34, 35. (a) Not kahana ena king ese edena “motumotu kahana” ia tuari henia? (b) Edena dala ai Roma ese not kahana ena king ‘ena hekokoroku karadia ia hadokoa’? (c) Antiochus Namba 3 be edena dala ai ia mase, bona daika be not kahana ena king matamatana ai ia lao?

36. (a) Edena dala ai saut kahana ena king ese tuari ia karaia toho, to dahaka ia vara ia dekenai? (b) Seleucus Namba 4 be edena dala ai ia moru, bona ia murinai daika be king ai ia lao?

37. (a) Edena dala ai Antiochus Namba 4 ese Iehova Dirava ataiai sibona ia abia isi toho? (b) Antiochus Namba 4 ese Ierusalema ena dubu ia hadikaia karana dainai dahaka ia vara?

38. Edena dala ai Maccabee taudia edia lohia siahuna ia ore?

39. Daniela 11:​1-19 oi laloa namonamo amo, dahaka namo oi abia?

[Chart/Pictures on page 228]

KING IDAUIDAU DANIELA 11:​5-19 AI

Daniela 11:​7-9 Seleucus Namba 2 Ptolemy Namba 3

Daniela 11:​10-12 Antiochus Namba 3 Ptolemy Namba 4

[Picture]

Moni ta dekenai Ptolemy Namba 2 bona ena hahine

[Picture]

Seleucus Namba 1 Nicator

[Picture]

Antiochus Namba 3

[Picture]

Ptolemy Namba 6

[Picture]

Ptolemy Namba 3 bona ia murinai idia lohia taudia ese Horus ena dubu idia haginia Idfu ai, Aigupito ena atai kahana dekenai

[Map/Pictures on page 216, 217]

(For fully formatted text, see publication)

Inai ladana “not kahana ena king” bona “saut kahana ena king” edia anina be Daniela ena bese taudia edia tano amo not kahanai bona saut kahanai idia noho king taudia

MAKEDONIA

GREECE

ASIA MINOR

ISRAELA

LIBIA

AIGUPITO

ETIOPIA

SYRIA

Babulonia

ARABIA

[Picture]

Ptolemy Namba 2

[Picture]

Antiochus Badana

[Picture]

Antiochus Badana ese ia gwauraia taravatudia be nadi ta ai idia torea

[Picture]

Moni ta dekenai Ptolemy Namba 5 ena laulau

[Picture]

Ptolemy Namba 3 ena geiti Karnak ai, Aigupito dekenai

[Full-page picture on page 210]

[Picture on page 215]

Seleucus Namba 1 Nicator

[Picture on page 218]

Ptolemy Namba 1