Karoa 14

King Ruaosi Edia Ladana Idia Idau Idia Lao

SURIA ena king Antiochus Namba 4 be Aigupito dekenai ia vareai bona ia gwau ia be unai gabu ena king. Aigupito ena King Ptolemy Namba 6 ese Roma ia noia dainai, Roma ese Gavana Caius Popilius Laenas be Aigupito dekenai ia siaia. Bouti oreana badana ia mailaia bona Roma ena Kaunsolo ena oda ia abia mai, ia gwau Antiochus Namba 4 ese Aigupito ena king dagina do ia dogoatao diba lasi bona unai tano do ia rakatania be namo. Eleusis ai, Alesandria ena kahana ta dekenai, Suria ena king bona Roma ena gavana tauna idia hedavari. Antiochus Namba 4 ese ia noia nega do ia henia, ena sisiba henia taudia ida guna ia herevahereva totona, to Laenas ese tano dekenai king ia hagegea laini ia torea bona ia gwau unai laini ia hanaia diba lasi ela bona haere ia henia guna. Unai ese Antiochus Namba 4 ia hahemaraia, bena Roma ena oda ia badinaia bona lagani 168 B.C.E. ai Suria dekenai ia giroa. Not kahana ena Suria king bona saut kahana ena Aigupito king edia tuari be unai nega ai ia ore.

² Hari Middle East dekenai Roma ena siahu ia bada bona Suria ia biagua noho. Unai dainai, ena be lagani 163 B.C.E. ai Antiochus Namba 4 ia mase murinai Seleucus ena lohia besena ena king taudia be Suria idia lohiaia, to idia be “[not kahana] ena king” ai idia lao lasi. (Daniela 11:15) Bena lagani 64 B.C.E. ai, Suria be Roma ena provinsi ta ai ia lao.

³ Antiochus Namba 4 ia mase murinai, lagani 130 bamona lalonai Aigupito ena Ptolemy lohia besena be do “[saut kahana] ena king.” (Daniela 11:14) Actium ena tuari lalonai, lagani 31 B.C.E. ai, Roma ena lohia Octavian ese Ptolemy lohia besena ena kwini ginigabena​—⁠Cleopatra Namba 7​—⁠bona ena heudahanai tauna Mark Antony edia tuari taudia ia halusia. Murina laganina ai Cleopatra ese sibona ia hamasea murinai, Aigupito danu be Roma ena provinsi ta ai ia lao bona ia be saut kahana ena king lasi. Lagani 30 B.C.E. ai, Roma ese Suria bona Aigupito ia lohiaia vadaeni. Vadaeni, lohia siahudia ma haida be not kahana ena king bona saut kahana ena king ai do idia lao, a?

KING MATAMATA ESE ODA TA IA SIAIA

⁴ Lagani 33 C.E. ena keru negana ia ore lalonai, Iesu Keriso ese ena hahediba taudia ia hamaoroa, ia gwau: “Peroveta tauna Daniela ese guna ia gwauraia, gau dika rohorohona, gabu ia hadikaia gauna, Dubu Helaga ena lalonai ia gini dohore umui itaia. . . . Unai neganai Iudea dekenai idia noho taudia be ororo dekenai do idia heau lao.” (Mataio 24:​15, 16) Iesu ese Daniela 11:31 ena hereva ia gwauraia lou neganai, ia murinai idia raka taudia ia hadibaia ‘gabu ia hadikaia gau dika rohorohona’ be gabeai do ia mai. Inai not kahana ena king perovetalaia herevana be Antiochus Namba 4, not kahana ena king ai ia lao Suria ena king ginigabena, ia mase bena lagani 195 bamona murinai Iesu ese ia gwauraia. Unai dainai ita laloa diba, ma lohia siahuna ta be not kahana ena king ai do ia lao. Unai be daika?

⁵ Iehova Dirava ena aneru ia peroveta: “Iena [Antiochus Namba 4 ena] gabu ia abia tauna do ia toreisi, bona iena basileia hagoadaia totona takisi moni momo do ia gogoa. To nega daudau lasi, unai king do idia alaia, to unai be [“badu lalonai lasi eiava,” NW ] tuari dekenai do ia mase lasi.” (Daniela 11:20) Unai dala ai “ia toreisi” tauna be Roma ena lohia ginigunana, Octavian, ena ladana ta be Kaisara Augusto.​—⁠“Ta Idia Matauraia, Ma Ta Idia Gwauraia Dika” rau 248 dekenai itaia.

⁶ Augusto ena “basileia” ena kahana ta be “hairai bada herea tanona”​—⁠Roma ena provinsi Iudea. (Daniela 11:16) Lagani 2 B.C.E. ai, Augusto ese taravatu herevana ta ia siaia taunimanima do idia rejista, reana takisi moni bona tuari taudia abia totona ia ura taunimanima edia namba ia diba. Unai taravatu herevana dainai, Iosepa bona Maria be rejista totona Betelehema dekenai idia lao, bona unai dainai Iesu be guna idia perovetalaia gabuna ai ia vara. (Mika 5:2; Mataio 2:​1-12) Mauri lagani 76 tauna Augusto be August 14 C.E. ai​—⁠“nega daudau lasi” unai rejista karana totona taravatu herevana ia siaia murinai​—⁠ia mase, “badu lalonai” tau ta ese ia alaia lasi bona “tuari dekenai” lasi, to gorere dainai ia mase. Not kahana ena king ia idau momokani unai! Hari unai king be Roma Basileiana bona ena lohia taudia.

‘TAU DIKANA IA TOREISI’

⁷ Aneru ese ena peroveta herevana ia gwauraia noho, ia gwau: “Tau dikana ta do ia toreisi, [not kahana ena] king [Augusto] ena gabu dekenai, king ena dagi do ia abia henaoa. Ia be mai lalona ania karadia dekenai unai dagi do ia abia. Ia ese tuari orea momo dekenai do ia tuari henidia, bona abata bamona do ia haoredia momokani, gwauhamata taravatuna ena lohia ta danu do ia hadikaia momokani.”​—⁠Daniela 11:​21, 22.

⁸ Unai “tau dikana” be Kaisara Tiberio, Augusto ena adavana ihatoina Livia ena natuna mero. (“Ta Idia Matauraia, Ma Ta Idia Gwauraia Dika” rau 248 dekenai itaia.) Augusto ese unai mero be ena kara dikadia dainai ia ura henia lasi bona ia ura lasi ena murinai Kaisara ai do ia lao. King ai idia lao diba taudia ma haida idia mase sibona murinai, ena be ia ura momokani lasi to “king ena dagi” idia henia. Augusto ese lagani 4 C.E. ai Tiberio be ena natuna ai ia halaoa bona ia murinai do ia lohia tauna ai ia halaoa. Augusto ia mase murinai, mauri lagani 54 tauna Tiberio​—⁠idia gwauraia dika tauna​—⁠“ia toreisi,” Roma ena kaisara ena dagi ia abia, bona not kahana ena king ai ia lao.

⁹ The New Encyclopædia Britannica ia gwau: “Tiberio ese Kaunsolo taudia dekenai lalo-ani karadia ia karaia bona [Augusto ena mase murinai] kahirakahira hua tamona lalonai kaisara ai idia halaoa dalana ia koua.” Ia be Kaunsolo taudia ia hamaoroa Augusto sibona ia hegeregere Roma Basileiana lohiaia ena metau ia huaia totona bona ia noia idia ese ripablik lohia dalana idia haginia lou bona unai siahu badana be tau tamona dekenai lasi to tatau edia orea ta dekenai do idia henia. Histori torea tauna Will Durant ia gwau: “Kaunsolo taudia ese ena hereva abia dae garina idia gari, bona ia ida hanamoa koikoi herevadia idia gwauraia heheni ela bona ia ese unai dagi ia abia dae.” Durant be ma ia gwau: “Unai kahana ruaosi taudia ese unai koikoi karana idia karaia namo herea. Tiberio ese unai lohia siahuna ia ura abia, badina bema ia ura lasi, dala do ia davaria ia dadaraia totona; Kaunsolo ese ia idia gari henia bona idia inai henia, to idia ura lasi ripablik idia haginia lou.” Unai dala ai Tiberio ese ‘lalona ania karadia dekenai dagi ia abia.’

¹⁰ Aneru ese “tuari orea momo”​—⁠edia dekena basileia edia tuari oreadia​—⁠ia herevalaia neganai, ia gwau: “Abata bamona do ia haoredia momokani.” Tiberio be not kahana ena king ai ia lao neganai, iena tadina ena natuna mero Kaisara Germanicus be Rhine Sinavaina dekenai idia noho Roma tuari taudia edia biaguna. Lagani 15 C.E. ai, Germanicus ese ena tuari taudia ia hakaua Germany ena goada tauna Arminius idia tuari henia totona, bona idia kwalimu. To, unai kwalimu karadia dekenai davana bada idia henia, bena Tiberio ese Germany dekenai tuari karadia ia koua. To, ia ese Germany taudia huanai tuari heheni karana ia havaraia toho, Germany ena iduhu idauidau idia lalo-tamona lasi totona. Tiberio ena politikol lalohadai be ia lao lasi tuari to ena tano ia gimaia namonamo bona tano ena hetoadia naria karana ia hagoadaia. Unai ese namo ia havaraia. Unai dala amo “tuari orea momo” ia koua bona ia “haoredia.”

¹¹ Iehova Dirava ese tanobada besedia ibounai hanamoa totona Aberahamo ida ia karaia “gwauhamata taravatuna ena lohia” ia “hadikaia” danu. Iesu Keriso be unai gwauhamata taravatuna ese ia gwauhamatalaia Aberahamo ena Garana. (Genese 22:18; Galatia 3:16) Nisan 14, 33 C.E. ai, Iesu be Ierusalema dekenai ia noho Roma gavana tauna ena ruma dekenai Pontio Pilato vairanai ia gini. Iuda hahelaga taudia ese Iesu idia samania, idia gwau kaisara ia dagedage henia. To Iesu be Pilato dekenai ia gwau: “Lauegu Basileia be inai tanobada gauna lasi. . . . Lauegu Basileia be iniseni lasi.” Roma gavana ese kerere lasi tauna Iesu ia ruhaia lasi totona, Iuda taudia idia boiboi: “Unai tau bema oi ruhaia, oi be Kaisara ena turana lasi! Bema tau ta ia gwau ia be king, ia ese Kaisara ia hadikaia inai!” Iesu do ia hamasea totona idia boiboi badabada, bena idia gwau: “Ai be mai emai king ta lasi, Kaisara sibona.” Tiberio ese “king hadikaia taravatuna” ia habadaia dainai Kaisara hadikaia herevadia bona karadia ibounai be taravatu, bona unai taravatu hegeregerena Pilato ese Iesu ia henia hanai do idia “hadikaia,” eiava idia hasatauroa totona.​—⁠Ioane 18:36; 19:​12-16; Mareko 15:​14-20.

DAGEDAGE TAUNA ESE ‘PALANI IA KARAIA’

¹² Aneru ese Tiberio ia perovetalaia noho, ia gwau: “Ia ida idia gaukara hebou dainai, koikoi karana do ia karaia noho bona ia daekau bona bese maragina ena heduru amo do ia goada.” (Daniela 11:​23, NW ) Roma ena taravatu hegeregerena Roma ena Kaunsolo be Tiberio “ida idia gaukara hebou,” bona guna idia dekenai ia tabekau. To unai kara koikoi ia karaia, bona “bese maragina ena heduru amo ia goada.” Unai bese maragina be Roma ena Praetorian Guard oreana, edia kamepa be Roma ena magu kahirakahira ai ia noho. Kahirakahira idia noho dainai Kaunsolo taudia idia gari bona unai ese Tiberio ia durua taunimanima huanai iena siahu gwau-edeede henia karadia ia koua totona. Unai dainai, gima taudia 10,000 bamona dainai, Tiberio ena siahu ia bada noho.

¹³ Aneru ese inai peroveta herevana ia gwauraia danu: “Tano kahana ta, kohu momo gabuna, bona maino ia noho gabuna dekenai do ia vareai kava, bona ia ese iena sene taudia idia karaia diba lasi karadia do ia karaia. Inai king ese, tuari dekenai ia abia kohu be iena orea taudia dekenai do ia haria. Palani do ia karaia, gabu goadadia haida do ia tuari henidia totona. To iena kwalimu be nega daudau lasi.” (Daniela 11:24) Tiberio be taunimanima ia abidadama henidia lasi, bona ia lohia negana lalonai ena ura dainai taunimanima momo idia alaia mase. Iena lohia negana ena dokona kahana ai taunimanima idia gari bada, bona unai ena badina badana be Praetorian Guard oreana ena biaguna Sejanus ese iena lalona ia veria. Dokonai, Tiberio ese Sejanus ia abidadama henia lasi bona iena ura dainai idia alaia mase. Tiberio ese taunimanima ia dagedage henidia, bona unai kara dekenai ena sene taudia edia kara ia hanaia.

¹⁴ To, Tiberius ese Roma ena provinsi iboudiai dekenai “tuari dekenai ia abia kohu” ia haria. Ia mase negana ai, ia abia besedia ibounai edia noho ia namo. Takisi moni ia gogoa bada lasi, bona nega dika idia davaria gabudia dekenai heduru bada ia henia. Bema tuari taudia eiava opesa taudia ese ta idia hahisia eiava taravatu hegeregerena idia kara henia lasi, idia diba kaisara ese davana do ia henia. Siahu ia dogoatao auka dainai taunimanima edia noho ia gimaia, bona dala momo idia karaia dainai bisinesi karadia idia heau namonamo. Tiberio ese ia hamomokania Roma lalonai bona murimuri gabudiai gavamani ena gaukara idia karaia lalonai dala tamona ai taunimanima idia kara henia bona gaukara idia karaia namonamo. Taravatu ia hanamodia, bona Kaisara Augusto ese ia hamatamaia gaukaradia idia habadaia, unai amo taunimanima edia noho bona kara biagua taravatudia idia hanamoa. To, Tiberio ese ena ‘palani ia karaia,’ bona unai dainai Roma ena histori torea tauna Tacitus ia gwau ia be koikoi tauna, toana koikoina ia hahedinaraia mai diba bada ida. March 37 C.E. ai ia mase neganai, Tiberio idia gwauraia dagedage tauna.

¹⁵ Tiberio murinai idia lohia taudia bona not kahana ena king ai idia lao taudia haida be Kaisara Gaius (Caligula), Klaudio Namba 1, Nero, Vespasian, Titus, Domitian, Nerva, Trajan, bona Hadrian. The New Encyclopædia Britannica ia gwau: “Augusto ena murinai idia lohia taudia momo be ia hamatamaia lohia dalana bona haginia gaukarana idia badinaia, bona ena be gaukara badana idia karaia lasi to idia heagilaia bada.” Unai buka tamona be ma ia gwau: “Lagani 100 C.E. vairanai bona murinai Roma ena hairai be bada bona ena noho taudia be momo.” Ena be unai nega lalonai Roma ena basileia ena hetoana haida dekenai hekwakwanai idia vara, to idia perovetalaia tuari saut kahana ena king ida ia vara lasi ela bona lagani 200 C.E. murinai.

SAUT KAHANA ENA KING IA TUARI HENIA

¹⁶ Dirava ena aneru ese peroveta herevana ia gwauraia noho, ia gwau: “Bona ena [not kahana ena king] siahu bona ena ura do ia habadaia, tuari orea badana ida saut kahana ena king ia tuari henia totona; bona saut kahana ena king danu be ena ura do ia hagoadaia ena tuari orea bada hereana bona goadana ida unai tuari do ia lao henia totona. To do ia [not kahana ena king] gini lasi, badina be ia hadikaia palani do idia palania. Bona iena aniani digaradia idia ania taudia sibodia ese ia do idia hadikaia. Bona iena tuari oreana be abata ese do ia abia lao, bona momokani momo do idia alaia mase.”​—⁠Daniela 11:​25, 26, NW.

¹⁷ Octavian ese Aigupito be Roma ena provinsi ta ai ia halaoa bena lagani 300 bamona murinai, Roma ena Lohia Tauna Aurelian be not kahana ena king ai ia lao. Unai nega lalonai, Roma ena teritori Palmyra ena Kwini Septimia Zenobia be saut kahana ena king.a (“Zenobia​—⁠Palmyra Ena Kwini Bona Tuari Hahinena” rau 252 dekenai itaia.) Lagani 269 C.E. ai, Palmyra ena tuari taudia be Aigupito dekenai idia vareai, badina be idia gwau idia ura hamomokania ia be Roma ena teritori ta. Zenobia ia ura Palmyra be ist kahana ena hanua badana ai ia halaoa, bona ia ura ist kahana ai idia noho Roma ena provinsi ia lohiaia. Aurelian be Zenobia ena ura dekenai ia gari, bona “ena siahu bona ena ura do ia habadaia” Zenobia ia tuari henia totona.

¹⁸ Zenobia ese ia gunalaia lohia siahuna, saut kahana ena king, “be ena ura do ia hagoadaia” bona ami jeneral rua, Zabdas bona Zabbai, henunai “tuari orea bada hereana bona goadana ida” not kahana ena king ia tuari henia. To Aurelian ese Aigupito ia abia bena Asia Minor bona Suria dekenai ia vareai. Emesa (hari Homs) dekenai Zenobia idia halusia bona ia be Palmyra dekenai ia giroa lao. Aurelian ese unai hanua ia koua hagegea neganai, Zenobia be mai ena gari lasi ida ia tuari to ia kwalimu lasi. Ia bona ena natuna mero be Parasa kahana idia heau lao, to Roma taudia ese Euperate Sinavaina dekenai idia abidia. Palmyra taudia ese lagani 272 C.E. ai edia hanua idia henia. Aurelian ese Zenobia ia hamasea lasi, bona lagani 274 C.E. ai Roma ena ariara dekenai kwalimu ena raka idia karaia neganai Zenobia be ena dava bada gauna bamona ia hahedinaraia. Bena Zenobia be Roma ena lada bada hahinena ta bamona ia noho ela bona ia mase.

¹⁹ Aurelian be ‘ia gini lasi badina ia hadikaia palanina’ idia karaia. Lagani 275 C.E. ai, Parasa tuari henia totona ia lao. Asia Minor dekenai ia hanaia lao totona Thrace dekenai ia naria noho neganai, ‘iena aniani idia ania taudia’ ese palani idia karaia bona ia “idia hadikaia.” Ia ura ena seketere tauna Eros ena kara koikoi edia davana do ia henia. To, Eros ese lista koikoina, do idia hamasea taudia edia ladadia edia lista koikoina, ia torea. Unai tuari opesa taudia ese lista idia itaia dainai Aurelian hamasea dalana idia karaia bona ia idia alaia mase.

²⁰ Not kahana ena king ena gaukara be Lohia Tauna Aurelian ia mase neganai ia ore lasi. Roma lohia taudia ma haida be ena murinai idia mai. Nega sisina lalonai, west kahana be mai ena lohia bona ist kahana be mai ena lohia. Unai taudia idia lohia lalonai not kahana ena king ena “tuari oreana” be ‘abata ese ia abia lao,’ eiava “gabu idauidau idia heau lao,”b bona not kahana amo idia mai Germany taudia edia iduhu idauidau dainai momo “idia alaia mase.” Lagani 300 C.E. murinai, Goth taudia be Roma ena hetoana lalonai idia vareai. Kahana momo ai tuari idia karaia noho. Lagani 476 C.E. ai, Germany ena gunalaia tauna Odoacer ese Roma ai ia lohia tauna ginigabena ia kokia. Lagani 500 C.E. murinai, Roma Basileiana ena west kahana idia hadikaia, bona Germany ena king taudia be Britannia, Gaul, Italia, North Africa, bona Spain ai idia lohia. Roma ena basileia ena ist kahana ia noho ela bona lagani 1450 C.E. bamona.

BASILEIA BADANA IA PARARA

²¹ Iehova ena aneru ese lagani handred momo lalonai Roma Basileiana ia parara daladia ia herevalaia lasi, to not kahana ena king bona saut kahana ena king edia kara ma haida ia herevalaia. To, Roma Basileiana lalonai idia vara gaudia ita laloa sisina be namo, unai amo do ita diba dina gabediai idia tuari king ruaosi be daidia.

²² Lagani 300 C.E. murinai, Roma Lohiana Constantine ese Keristani momokani dalana ia negea oreana ia abia dae. Ia ese lagani 325 C.E. lalonai, Nicaea, Asia Minor dekenai, dubu ena hebou badana ta ia hegaegaelaia bona ia hakaua. Gabeai, Constantine ese lohia rumana ia haidaua, Roma amo ia hanaia Byzantium, eiava Constantinople, dekenai bona unai hanua be ena hanua badana ai ia halaoa. Roma Basileiana be lohia ta ta ese idia lohiaia ela bona Lohia Tauna Theodosius Namba 1 be January 17, 395 C.E. ai ia mase.

²³ Theodosius ia mase murinai, Roma Basileiana be ena natuna memero ese idia haria. Honorius ese west kahana ia abia, bona Arcadius ese ist kahana ia abia, bona ena hanua badana be Constantinople. West kahana ena provinsi idauidau be Britannia, Gaul, Italia, Spain, bona North Africa. Ist kahana ena provinsi idauidau be Makedonia, Thrace, Asia Minor, Suria, bona Aigupito. Lagani 642 C.E. ai, Saracen taudia (Arab taudia) ese Aigupito ena hanua badana, Alesandria, idia halusia, bona Aigupito be caliph lohia taudia edia provinsi ai ia lao. January 1449 ai, Constantine Namba 11 be ist kahana ena lohia ginigabena ai ia lao. Sultan Mehmed Namba 2 ese Turkey ena Ottoman taudia ia gunalaia bena May 29, 1453 ai Constantinople idia abia, bona unai amo Roma ena East Basileiana idia haorea. Lagani 1517 ai Aigupito be Turkey ena provinsi ta ai ia lao. To gabeai, unai idaunegai saut kahana ena king ena tano be west kahana amo ia toreisi basileia ma ta henunai do ia noho.

²⁴ Roma Basileiana ena west kahana ai be Roma ena Katolik bisop, ladana bada tauna Pope Leo Namba 1, ia toreisi, bona momo be ia idia diba badina lagani 400 C.E. murinai pope edia siahu ia habadaia. Gabeai, pope ese sibona ena ura dainai west kahana ena lohia taudia dekenai lohia siahuna ia henia. Unai be lagani 800 C.E. ena Kerisimasi dinana ai, Roma dekenai ia vara, Pope Leo Namba 3 ese Frank taudia edia King Charles (Charlemagne) dekenai Roma ena West Basileiana matamatana ena lohia siahuna ia henia. Unai amo Roma dekenai kaisara edia lohia negana ia matamaia lou, bona histori torea tauna ta ia gwau, unai be Roma Basileia Helagana ena matamana. Unai nega amo East Basileiana ia noho bona west dekenai Roma Basileiana Helagana ia noho, idia ruaosi idia gwau idia be Keristani basileiadia.

²⁵ Nega ia hanaia lalonai, Charlemagne murinai idia lohia taudia be lohia taudia namodia lasi. Nega ta, lohia tauna ena dagi be ta ese ia abia lasi. Unai nega lalonai, Germany ena King Otto Namba 1 ese Italia ena not kahana bona ihuana kahana ia abia. Ia ese sibona Italia ena king ai ia halaoa. February 2, 962 C.E. ai, Pope John Namba 12 ese Otto Namba 1 dekenai Roma Basileiana Helagana ena lohia siahuna ia henia. Unai basileia ena hanua badana be Germany dekenai, bona ena lohia taudia be Germany taudia, bona idia lohiaia taudia momo danu. Lagani 500 murinai, Austria besena ladana Hapsburg ese “lohia” ena dagi idia abia bona Roma Basileiana Helagana ena lagani ginigabedia lalonai unai dagi idia dogoatao.

KING RUAOSI IDIA HEDINARAI GOEVAGOEVA LOU

²⁶ Napoléon Namba 1 be lagani 1805 ai Germany dekenai ia kwalimu murinai Roma Basileiana Helagana ena siahu ia abia dae lasi neganai, unai basileia ia ore. Lohia Tauna Francis Namba 2 ese ena lohia siahuna ia gimaia diba lasi dainai, August 6, 1806 ai, Roma ena lohia dagina ia rakatania, bona iena tano Austria sibona ena lohia ai ia lao. Lagani 1,006 murinai, Roma Basileiana Helagana​—⁠Roma ena Katolik pope Leo Namba 3 bona Frank taudia edia king Charlemagne ese idia haginia gauna​—⁠be ia ore. Lagani 1870 ai, Roma be Italia basileiana ena hanua badana ai ia lao, bona ia dekenai Vatican be siahu lasi. Lagani gabena ai, Wilhelm Namba 1 be kaisara ena dagi ia abia bona Germany basileiana ia vara. Unai dala ai iseda nega ena not kahana ena king​—⁠Germany​—⁠ia hedinarai.

²⁷ To iseda nega ena saut kahana ena king be daika? Histori ena sivarai ia hahedinaraia lagani 1600 murinai Britain be basileia badana ai ia lao. Napoléon Namba 1 ia ura Britain ena bisinesi daladia ia koua dainai, lagani 1798 ai Aigupito ia abia. Unai amo tuari ia vara, bona idia tuari hebou Britain bona Ottoman taudia ese Aigupito, saut kahana ena king gunana, amo France taudia idia lulua. Unai murinai lagani 100 lalodiai, Britain ena siahu Aigupito dekenai ia bada ia lao. Lagani 1882 murinai, Aigupito be Britain ese ia biagua tanona ta. Lagani 1914 ai Tanobada Ibounai Tuarina Ginigunana ia vara neganai, Aigupito be Turkey ena kahana ta bona Turkey ena gavana ta idia gwauraia khedive ese ia lohiaia. To, tuari lalonai Turkey be Germany ena kahana dekenai ia lao dainai, Britain ese unai gavana ia kokia bona Aigupito be Britain ese ia naria gabuna ai ia halaoa. Britain bona United States of America ese edia gaukara hebou karana idia habadaia, bena Tanobada ena Basileia Badana Anglo-America ai idia lao. Idia be saut kahana ena king ai idia lao.

[Footnotes]

DAHAKA OI DIBAIA?

• Roma ena lohia tauna ginigunana, not kahana ena king ai ia lao, be daika, bona edena negai ia ese oda ta ia siaia?

• Augusto murinai daika be not kahana ena king ai ia lao, bona edena dala ai “gwauhamata ena lohia” idia hamasea?

• Not kahana ena king Aurelian bona saut kahana ena king Zenobia idia karaia tuari amo dahaka ia vara?

• Roma Basileiana dekenai dahaka ia vara, bona lagani 1900 be kahirakahira neganai daidia be unai king rua ai idia lao?

[Study Questions]

1, 2. (a) Dahaka ia vara bena Antiochus Namba 4 ese Roma ena oda ia badinaia? (b) Edena negai Suria be Roma ena provinsi ta ai ia lao?

 3. Edena negai bona edena dala ai Roma ese Aigupito ia lohiaia?

 4. Dahaka dainai ita laloa diba ma lohia siahuna ta be not kahana ena king ai do ia lao?

 5. Daika ia toreisi bona not kahana ena king ai ia lao, unai amo Antiochus Namba 4 ena gabu ia abia?

 6. (a) Edena negai “hairai bada herea tanona” dekenai taravatu herevana idia siaia, bona dahaka dainai unai be mai anina bada? (b) Dahaka dainai ita gwau diba Augusto be “badu lalonai lasi” bona “tuari dekenai” ia mase lasi? (c) Edena dala ai not kahana ena king ia idau?

7, 8. (a) Augusto murinai daika be not kahana ena king ai ia lao? (b) Dahaka dainai Kaisara Augusto murinai ia lohia tauna dekenai “king ena dagi” idia henia, ena be idia ura momokani lasi?

 9. Edena dala ai Tiberio ese ‘lalona ania karadia dekenai dagi ia abia’?

10. Edena dala ai ‘tuari orea momo ia haoredia’?

11. Edena dala ai ‘gwauhamata taravatuna ena lohia idia hadikaia’?

12. (a) Daidia be Tiberio ida idia gaukara hebou? (b) Edena dala ai Tiberio be “bese maragina ena heduru amo ia goada”?

13. Edena dala ai Tiberio ese ena sene taudia ia hanaia?

14. (a) Edena dala ai Tiberio ese Roma ena provinsi iboudiai dekenai “tuari dekenai ia abia kohu” ia haria? (b) Tiberio ia mase neganai edena bamona ia idia gwauraia?

15. Lagani 100 C.E. vairanai bona murinai Roma be edena bamona?

16, 17. (a) Daniela 11:25 ese ia gwauraia not kahana ena king be daika? (b) Daika be saut kahana ena king ai ia lao, bona unai be edena dala ai ia vara?

18. Lohia Tauna Aurelian, not kahana ena king, bona Kwini Zenobia, saut kahana ena king, idia tuari amo dahaka ia vara?

19. Edena dala ai Aurelian be ‘ia gini lasi badina ia hadikaia palanina’ idia karaia?

20. Edena dala ai not kahana ena king ena “tuari oreana” be ‘abata ese ia abia lao’?

21, 22. Lagani 300 C.E. murinai, Constantine ese edena gaudia ia haidaua?

23. (a) Theodosius ia mase murinai Roma Basileiana be edena bamona ia parara? (b) Edena negai East Basileiana ia ore? (c) Lagani 1517 ai daika ese Aigupito ia lohiaia?

24, 25. (a) Histori torea taudia haida idia gwau Roma Basileiana Helagana be edena bamona ia matamaia? (b) Gabeai Roma Basileiana Helagana ena “lohia” dagina dekenai dahaka ia vara?

26. (a) Roma Basileiana Helagana be edena bamona ita gwauraia diba? (b) Daika be not kahana ena king ai ia lao?

27. (a) Edena dala ai Aigupito be Britain ese ia naria gabuna ai ia lao? (b) Daidia be saut kahana ena king ai idia lao?

[Box/Picture on page 248-251]

TA IDIA MATAURAIA, MA TA IDIA GWAURAIA DIKA

TA ESE heai momo dainai idia hadikaia ripablik be tanobada ena basileia goadana ta ai ia halaoa. Ma ta ese lagani 23 lalonai unai basileia ena taga be nega 20 ia habadaia. Ta ia mase neganai idia matauraia, to ma ta idia gwauraia dika. Iesu be unai Roma ena lohia taudia rua edia lohia negadia lalonai ia mauri. Idia be daidia? Bona dahaka dainai ta idia matauraia, to ma ta idia gwauraia dika?

‘ROMA BE BIRIKI HANUANA AMO DAVANA BADA HANUANA AI IA HALAOA’

Lagani 44 B.C.E. ai Julius Caesar idia hamasea neganai, ena taihuna ena tubuna Gaius Octavian ena mauri lagani be 18 sibona. Octavian be Julius Caesar ese ena natuna ai ia halaoa bona ena dagi do ia abia tauna dainai, maoromaoro Roma dekenai ia lao ena ahuna ia abia totona. Unuseniai ena inai tauna badana ia davaria​—⁠ia be Mark Antony, Caesar ena ami biaguna badana bona ia laloa lohia dagina do ia abia. Unai nega ai, siahu abia totona lagani 13 lalonai idia heai bona tuari.

Octavian ese idia tuari hebou Aigupito ena Kwini Cleopatra bona ena heudahanai tauna Mark Antony edia tuari taudia ia halusia murinai sibona (lagani 31 B.C.E. ai), Roma Basileiana ena lohia dagina ia abia momokani. Lagani gabena lalonai Antony bona Cleopatra be sibodia idia hamasea, bona Octavian ese Aigupito ia abia. Unai dala ai Greece Basileiana ena kahana ginigabena ia ore, bona Roma be tanobada ena basileia badana ai ia lao.

Octavian ia laloatao Julius Caesar idia hamasea badina ia be lohia tauna aukana, unai dainai ia naria namonamo iena kerere ia karaia lasi. Roma taudia ese ripablik lohia dalana idia ura henia bona ia ura lasi edia hemami ia hadikaia dainai, sibona ese gavamani ia biagua karana be ripablik toana amo ia hahedinaraia. Ia ese dagi ladadia “king” bona “lohia badana” ia dadaraia. To unai sibona lasi, ia gwau ia ese provinsi ibounai lohiaia siahuna be Roma ena Kaunsolo dekenai do ia henia bona ena dagi ibounai do ia rakatania. Unai dala amo ena ura gauna ia abia. Iena kara idia laloa bada Kaunsolo taudia idia ura Octavian ese ena dagi ibounai ia dogoatao bona provinsi haida do ia lohiaia danu.

Ma danu, January 16, 27 B.C.E. ai, Kaunsolo ese Octavian dekenai dagi ladana “Augusto” ia henia, anina be “Idia Abia Isi Tauna, Helaga Tauna.” Octavian ese unai dagi ladana ia abia dae sibona lasi, to hua ta ena ladana be ia sibona ena ladana ia gwauraia bona February huana amo dina ta ia abia, August ena dina edia momo be July ena dina edia momo hegeregerena do ia lao totona, July be Julius Caesar ena ladana idia henia. Unai dala ai Octavian be Roma ena lohia tauna ginigunana ai ia lao bona unai murinai idia gwauraia Kaisara Augusto eiava “Augusto Tauna.” Gabeai ia ese dagi ladana “pontifex maximus” (hahelaga tauna badana) ia abia danu, bona lagani 2 B.C.E. ai​​—⁠Iesu ia vara laganina ai​—⁠Kaunsolo ese dagi ladana Pater Patriae, “Iena Tano Ena Tamana,” idia henia.

Unai lagani tamona ai, “Kaisara Augusto ese taravatu herevana ta ia siaia lao, tanobada taudia ibounai edia ladana do idia torea. . . . Unai taravatu dainai, taunimanima ibounai edia ladana torea totona, ta ta edia hanua korikori dekenai idia giroa lou.” (Luka 2:​1-3) Unai taravatu dainai, Iesu be Betelehema dekenai ia vara Baibel ena peroveta herevana hegeregerena.​—⁠Daniela 11:20; Mika 5:⁠2.

Augusto ia lohia neganai ena gavamani taudia idia koikoi lasi bona edia moni ena siahu be bada. Danu, Augusto ese revareva siaia dalana namona ia karaia bona dala bona nese-hanai momo ia haginia. Ia ese ami oreana ia hegaegaelaia lou, ia gini hegaegae neivi ia haginia, bona tuari taudia namodia edia orea ta kaisara gimaia totona ia haginia, idia gwauraia Praetorian Guard. (Filipi 1:13) Ia naridia dainai, Virgil bona Horace bamona toretore taudia idia gaukara namonamo diba bona nadi laulaudia karaia taudia ese hari idia gwauraia klasikal dalanai laulau namodia idia karaia. Julius Caesar ese ia haginia matamaia ruma momo be Augusto ese ia haginia ore bona dubu momo ia hanamoa lou. Ia hamatamaia Pax Romana (“Roma Mainona”) ia noho ela bona lagani 200 mai kahana idia ore. August 19, 14 C.E. ai, Augusto ena mauri lagani be 76 neganai, ia mase bona murinai ia idia gwauraia dirava ta.

Augusto ia heagi, ia gwau “Roma be biriki hanuana amo davana bada hanuana ai lau halaoa.” Ia ura lasi guna ripablik lohia dalana lalonai ia vara dagedage bada be Roma dekenai do ia vara lou dainai, ena palani be ena gabu ai do ia lohia tauna ia hadibaia namonamo. To ia abia hidi diba taudia be momo lasi. Iena taihuna ena mero, tubuna memero rua, ena kekeni ena adavana, bona ia ubua natuna mero ta be iboudiai idia mase vadaeni, unai dainai natuna ai ia halaoa merona Tiberio sibona ia noho ena dagi do ia abia totona.

“TAU DIKANA TA”

Augusto ia mase bena hua ta ia do ore lasi lalonai, Roma ena Kaunsolo ese mauri lagani 54 tauna Tiberio be lohia tauna ai ia halaoa. Tiberio be ia mauri bona ia lohia noho ela bona March 37 C.E. Unai dainai, Iesu ia haroro negana lalonai Tiberio be Roma ena lohia.

Kaisara Tiberio ena kara haida idia namo, haida idia dika. Iena kara namona ta be ia ura lasi dava bada gaudia dekenai moni ia negea kava. Unai dainai, ena basileia be mai ena moni bada dika badadia bona nega aukadia lalonai taunimanima ia durua totona. Tiberio ena kara namona ta be, ia laloa ia be tau ta sibona, dagi ladadia momo ia dadaraia, bona ia gwau kaisara tomadiho henia karadia be ia dekenai lasi to Augusto dekenai do idia karaia. Ia ese hua ta dekenai sibona ena ladana ia atoa lasi, Augusto bona Julius Caesar idia karaia bamona, bona ia ura lasi ma haida ese unai kara amo ia idia abia isi.

To, Tiberio ena kara dikadia ese ena kara namodia idia hanaia. Ma haida ia abidadama henia lasi bona taunimanima vairanai ia kara koikoi, bona ena lohia negana lalonai ena ura dainai momo idia hamasea​—⁠ena turadia ia hamasea danu. Ia ese lèse-majesté (king hadikaia taravatuna) ia habadaia, bena gavamani dagedage henia karadia sibona lasi, to ia sibona idia hadikaia herevadia danu be taravatu. Toana be unai taravatu dainai, Iuda taudia ese Roma ena Gavana Pontio Pilato idia doria, Iesu hamasea herevana ia gwauraia totona.​—⁠Ioane 19:​12-16.

Tiberio ese Praetorian Guard be Roma kahirakahira ia abia mai bona hanua ena not maguna kahirakahira edia noho rumadia goadadia ia haginia. Unai gima taudia idia noho kahirakahira karana ese Roma ena Kaunsolo, Tiberio ena siahu idia hamaragia toho taudia, ia koua sisina bona taunimanima edia gwau-edeede karadia ia koua danu. Tiberio ese ma haida samania karana ia hagoadaia danu, bona iena lohia negana ena dokona kahana ai taunimanima idia gari bada.

Tiberio ia mase neganai, ia idia gwauraia dagedage tauna. Ia mase neganai, Roma taudia idia moale bona Kaunsolo taudia idia ura lasi ia idia gwauraia dirava ta. Unai badina bona badina ma haida dainai ita itaia Tiberio ese peroveta herevana ia hagugurua, ia gwau “tau dikana ta” be “[not kahana] ena king” ai do ia lao.​—⁠Daniela 11:​15, 21.

DAHAKA OI DIBAIA?

• Edena dala ai Octavian be Roma ena lohia tauna ginigunana ai ia lao?

• Augusto ena gavamani ese ia karaia gaudia be edena bamona ita gwauraia diba?

• Tiberio ena kara namodia bona kara dikadia be dahaka?

• Edena dala ai Tiberio ese “tau dikana ta do ia toreisi” peroveta herevana ia hagugurua?

[Picture]

Tiberio

[Box/Pictures on page 252-255]

ZENOBIA​—⁠PALMYRA ENA KWINI BONA TUARI HAHINENA

“IENA kopina ena kala be kurokuro momokani lasi . . . Ena isena be kurokuro, bona ena matana badadia idia diaridiari lahi bamona, to ena hebogahisi be bada. Ena gado regena ia bada bona ia be miusiki bamona. Ena lalona be tatau edia bamona bona stadi karana ese ia hagoadaia bona ia hahairaia. Ia be Latin gado ia diba, to Greek, Suria, bona Aigupito gadodia ia diba namo herea danu.” Histori torea tauna Edward Gibbon ese unai hereva amo Zenobia​—⁠Suria ena hanua Palmyra ena kwini bona tuari hahinena​—⁠ia hanamoa.

Zenobia ena adavana be Palmyra ena dagi bada tauna Odaenathus, ia be lagani 258 C.E. ai Roma gavamani tauna ena dagi badana ia abia, badina Roma Basileiana totona Parasa ia tuari henia bona ia kwalimu. Lagani rua murinai, Odaenathus ese Roma ena Lohia Gallienus amo dagi ladana corrector totius Orientis (East ibounai ena gavana) ia abia, badina Parasa ena King Shāpūr Namba 1 ia tuari henia neganai ia kwalimu. Gabeai, Odaenathus ese ia sibona dekenai dagi ladana “king iboudiai edia king” ia henia. Reana Zenobia ena gari lasi bona aonega karadia dainai Odaenathus be unai bamona ia kwalimu.

ZENOBIA IA URA BASILEIA BADANA IA HAGINIA

Lagani 267 C.E. ai, Odaenathus ena siahu ia bada neganai, ia bona ena dagi do ia abia tauna idia hamasedia. Zenobia ena natuna mero ia maragi dainai ia lohia diba lasi, unai dainai Zenobia ese ena adavana ena dagi ia abia. Zenobia be mai ena hairai, siahu ia ura abia, lohia dalana ia diba namonamo, ena adavana ida ia tuari karana ia manadalaia, bona gado momo ia diba dainai, ia lohiaia taudia ese ia idia matauraia bona idia ura durua. Zenobia ia ura bada gau matamatadia ia diba bona ia ura aonega taudia ia bamoa. Ia ena sisiba tauna ta be aonega bona herevahereva dalana ia hadibaia tauna Cassius Longinus​—⁠ia idia gwauraia “ia mauri laiberi bona ia raka loaloa miusiam.” Toretore tauna Richard Stoneman be ena buka ladana Palmyra and Its Empire​​—⁠Zenobia’s Revolt Against Rome lalonai, ia gwau: “Odaenathus ena mase murinai lagani ima lalonai . . . , Zenobia ia lohiaia taudia idia abia dae ia be East ena lohia hahinena badana.”

Zenobia ese ia lohiaia gabuna ena kahana ta dekenai, ia bona ena adavana ese idia hamanokaia Parasa basileiana ia noho, bona kahana ta dekenai be ia manoka ia lao noho Roma basileiana. Histori torea tauna J. M. Roberts ese unai negai Roma Basileiana ia herevalaia, ia gwau: “Lagani 200 C.E. murina laganidia . . . be dika bada negana Roma ena ist bona west hetoadia dekenai, bona hanua lalonai taunimanima idia tuari heheni bona daika be lohia maorona idia heailaia. Lohia taudia 22 (unai dagi idia abia koikoi taudia idia duahia lasi) be edia nega ta ta ai idia lohia.” To, Suria lohia hahinena ia lohiaia teritori dekenai ena lohia siahuna ia goada. Stoneman ia gwau: “Ia [Zenobia] ese basileia rua [Parasa bona Roma] edia noho hebou dalana ia gimaia dainai, ia hegeregere basileia ihatoina do ia haginia bona unai ruaosi ia biagua.”

Lagani 269 C.E. ai, Aigupito dekenai lohia koikoina ia toreisi bona Roma ena lohia siahuna ia hepapahuahulaia neganai, dala ia kehoa Zenobia ese ena lohia siahuna ia habadaia totona. Karaharaga Zenobia ena tuari taudia be Aigupito dekenai idia vareai, unai dagedage tauna idia hadikaia, bona tano idia abia. Sibona ia gwauraia Aigupito ena kwini, bona idia karaia moni dekenai ena ladana ia atoa. Hari ena basileia be Naila sinavaina amo ia lao ela bona Euperate sinavaina. Unai nega ai, Zenobia be “saut kahana ena king” ai ia lao.​—⁠Daniela 11:​25, 26, NW.

ZENOBIA ENA HANUA BADANA

Zenobia ese ena hanua badana, Palmyra, ia hagoadaia bona ia hahairaia ela bona ia be Roma tanodia ibounai edia hanua badadia hegeregerena. Ia lalonai idia noho taudia edia namba be 150,000 ia hanaia. Ruma badadia mai hairaina, dubu idauidau, uma gabudia, du, bona mase taudia laloatao nadidia ese Palmyra idia hahonua, bona unai hanua ia koua hegege maguna ena lata be kilomita 21. Ena dala badana badinai du 1,500 bamona, Korinto taudia edia hegeregerena, idia gini bona edia lata be mita 15 ia hanaia. Ladana bada taudia bona heduru idia henia taga taudia edia laulau momo herea idia koroa bona hanua lalonai idia gini. Lagani 271 C.E. ai, Zenobia ese ia bona ena adavana, ia mase vadaeni tauna, edia laulau ia haginidia.

Dina ena Dubu be Palmyra ena ruma mai hairaina momokani bona ia be unai hanua ena tomadiho gabuna badana. Reana Zenobia ese dina diravana ia tomadiho henia. To, lagani 200 C.E. murinai, Suria be tomadiho momo tanona. Zenobia ese ia lohiaia teritori dekenai be sibona idia gwauraia Keristani taudia, Iuda taudia, bona dina bona hua idia tomadiho henia taudia idia noho. Unai tomadiho daladia idauidau be edena bamona ia laloa? Toretore tauna Stoneman ia gwau: “Aonega lohiana ese ena taunimanima idia ura henia kastom karadia ta ia dadaraia lasi. . . . Idia laloa unai dirava be Palmyra ena kahana ai idia gini.” Toana be, Zenobia ese tomadiho idauidau ia abia dae.

Zenobia ena kara namodia dainai, momo ese ia idia laloa bada. To ia dekenai ia vara mai anina bada gauna be Daniela ena peroveta herevana ese ia perovetalaia politikol lohiana ai ia lao. To, iena lohia negana ena lata be lagani ima sibona. Roma Lohiana Aurelian ese lagani 272 C.E. ai Zenobia ia halusia bona Palmyra ia hadikaia ore. Zenobia dekenai hebogahisi idia hahedinaraia. Haida idia gwau ia ese Roma ena kaunsolo tauna ta ia adavaia bona toana be ena mauri ena dokona lalonai gau badadia ia karaia lasi.

DAHAKA OI DIBAIA?

• Zenobia be edena bamona hahine?

• Zenobia ese ia karaia gaudia haida be dahaka?

• Zenobia ena lalohadai tomadiho dekenai be dahaka?

[Picture]

Kwini Zenobia ese ena tuari taudia ia hereva henia

[Chart/Pictures on page 246]

KING TAUDIA DANIELA 11:​20-​26 AI

Daniela 11:20 Augusto

Daniela 11:​21-24 Tiberio

Daniela 11:​25, 26 Aurelian Kwini Zenobia

[Picture]

Tiberio

[Picture]

Aurelian

[Picture]

Charlemagne ena laulau maragina

[Picture]

Augusto

[Picture]

Britain ena tuari boutina ta lagani 1600 murinai

[Full-page picture on page 230]

[Picture on page 233]

Augusto

[Picture on page 234]

Tiberio

[Picture on page 235]

Augusto ena oda dainai, Iosepa bona Maria be Betelehema dekenai idia lao

[Picture on page 237]

Idia peroveta hegeregerena Iesu idia ‘hamasea’

[Pictures on page 245]

1. Charlemagne 2. Napoléon  Namba 1 3. Wilhelm Namba 1 4. Germany ena tuari taudia, Tanobada Ibounai Tuarina Ginigunana