Karoa 15

Idia Heai King Ruaosi Lagani 1900 Murinai

“LAGANI 1800 murina laganidia lalonai, Europe dekenai siahu be bada herea, guna bamona lasi.” Unai be histori torea tauna Norman Davies ena hereva. Ia be ma ia gwau: “Dala matamatana ai Europe dekenai siahu ese gau idauidau ia haidaua diba: idia karaia masini idauidau edia siahu, moni ena siahu, bese idauidau edia siahu, tanobada badadia edia siahu.” Ia gwau: “Europe ena kwalimu bada ‘siahu laganidia 100’ ” dekenai gunalaia tano badadia be “guna Great Britain . . . bona gabeai laganidia lalonai Germany.”

“TA TA HADIKAIA TOTONA DO IDIA HEREVA”

² Lagani 1900 be kahirakahira neganai, Germany Basileiana be “not kahana ena king” bona Britain be “saut kahana ena king.” (Daniela 11:​14, 15, NW ) Iehova ena aneru ia gwau: “Unai king ruaosi, [saut kahana] ena, bona [not kahana] ena, be aniani pata tamona dekenai do idia helai hebou, to ta ta hadikaia totona do idia hereva koikoi gwauraia.” Ma ia gwau: “To edia koikoi ena anina be do ia vara lasi, badina be dokona be dohore, Dirava ena ura hegeregere.”​​—⁠Daniela 11:⁠27.

³ January 18, 1871 ai, Wilhelm Namba 1 be Germany Basileiana ena lohia ginigunana ai ia lao. Ia ese Otto von Bismarck be praiminista ai ia halaoa. Bismarck ena ura be unai basileia matamatana ia hagoadaia dainai, ia ura lasi tano ma haida ida ia heai bona Austria-Hungary bona Italia ida gaukara hebou gwauhamatana ia karaia, unai idia gwauraia Triple Alliance. To nega sisina murinai unai not kahana ena king matamatana ena ura gaudia bona saut kahana ena king ena ura gaudia idia idau vaitani.

⁴ Wilhelm Namba 1 bona ia murinai ena dagi ia abia tauna, Frederick Namba 3, be lagani 1888 ai idia mase neganai, mauri lagani 29 tauna Wilhelm Namba 2 ese lohia dagina ia abia. Wilhelm Namba 2, eiava Kaisara Wilhelm, ese Bismarck ia doria ena gaukara do ia rakatania, bona tanobada ibounai dekenai Germany ena siahu ia habadaia toho. Histori torea tauna ta ia gwau: “Wilhelm Namba 2 ena lohia negana lalonai, [Germany] ia hekokoroku bona ia dagedage.”

⁵ Russia ena Lohia Tauna Nicholas Namba 2 ese August 24, 1898 ai, Hague, Netherlands dekenai, maino hebouna ta idia karaia totona gavamani idauidau taudia ia boiria neganai, lalo-maino ena hemami ia noho lasi. Unai hebou bona gabeai lagani 1907 ai idia karaia hebou ma ta ai idia ese Hague dekenai kota badana ta idia haginia. Germany Basileiana bona Great Britain be unai kota ena memba ai idia lao neganai, toana be idia ura maino ai idia noho. Idia be “pata tamona dekenai” idia helai, bona toana be idia turana karaia, to ‘ta ta hadikaia totona idia hereva koikoi.’ Idia kara heheni dalana, ‘pata tamona dekenai idia hereva koikoi,’ ese maino korikorina ia hagoadaia lasi. Bona politikol, bisinesi, bona ami daladia ai idia tahua gaudia edia ‘anina ia vara lasi’ badina unai king rua edia ‘dokona be dohore, Iehova Dirava ena ura hegeregerena.’

DIRAVA ENA TAUDIA IA TUARI HENIA

⁶ Dirava ena aneru be ma ia gwau: “Vadaeni [not kahana] ena king ese tuari dekenai ia abia kohu momo herea ia gogoa, bona iena tano dekenai ia giroa lou. Bona unai neganai ia ura bada Dirava ena taudia korikori edia guriguri karana do ia haorea momokani [“gwauhamata helagana dekenai ia dagedage,” NW ]. Vadaeni unai iena ura karadia do ia karaia, bona unai murinai iena tano dekenai do ia giroa lou.”​—⁠Daniela 11:⁠28.

⁷ Kaisara Wilhelm be idaunegai not kahana ena king ena “tano,” eiava ena noho dalana, dekenai ia giroa lou. Edena dala ai? Ia ese Germany Basileiana habadaia lalohadaina ia abia isi bona ena siahu ia habadaia. Wilhelm Namba 2 ese Africa bona ma gabu haida ai teritori ia abia. Ia ura Britain ena siahu davara dekenai ia hereaia dainai, neivi badana ia haginia matamaia. The New Encyclopædia Britannica ia gwau: “Lagani 10 bamona sibona lalonai Germany ena neivi be ia maragi momokani amo ia bada ia lao ela bona Britain ena neivi sibona ese ia hereaia.” Britain ena neivi ese iboudiai ia hereaia noho totona ena neivi ia habadaia be gau badana. Danu, Britain ese France bona Russia ida entente cordiale (lalo-tamona) gwauhamatana ia karaia, unai amo Triple Entente idia haginia. Hari Europe ia parara bona tuari kamepa rua idia noho​—⁠Triple Alliance be kahana ta ai ia noho bona kahana ma ta dekenai be Triple Entente ia noho.

⁸ Germany Basileiana ese lohia dalana aukana ia badinaia, unai amo Germany ese “kohu momo herea ia gogoa,” badina ia be Triple Alliance ena tano badana. Austria-Hungary bona Italia be Roman Katolik tanodia. Unai dainai, pope ese Triple Alliance ia abia dae danu, to saut kahana ena king, bona ena Katolik bada lasi Triple Entente, ia abia dae lasi.

⁹ Iehova ena taunimanima be edena bamona? Nega daudau lalonai idia gwau “idau bese edia nega” be lagani 1914 ai do ia ore.a (Luka 21:24) Unai lagani ai, Dirava ena Basileia be guba dekenai ia gini bona King Davida ena dagi ia abia Tauna, Iesu Keriso, ese ia lohiaia. (2 Samuela 7:​12-16; Luka 22:​28, 29) Lagani momo gunanai, hegeregere March 1880 ai, Watch Tower magasin ese Dirava ena Basileia ena lohia negana be ‘idau bese edia nega ia ore’ negana ida ia hakapua. To not kahana ena Germany king ia ura bada ‘Basileia gwauhamata helagana dekenai ia dagedage.’ Kaisara Wilhelm ese Basileia ena lohia siahuna ia abia dae lasi, to tanobada ibounai do ia lohia totona ‘iena ura karadia ia karaia.’ Unai ia karaia lalonai, Tanobada Ibounai Tuarina Ginigunana ena uhe ia hadoa.

TUARI LALONAI KING “IA GARI”

¹⁰ Aneru ia peroveta: “Nega gabeai [not kahana] ena king do ia lao, [saut kahana ena] king dekenai do ia tuari henia lou, to inai neganai, guna ia kwalimu bamona do ia karaia lou lasi.” (Daniela 11:29) Dirava ese lagani 1914 ai guba Basileiana ia haginia neganai, tanobada dekenai Idau Bese taudia edia lohia negana ia haorea totona ia atoa ‘negana’ ia abia. Unai lagani ai, June 28 dekenai, Serbia ena terorist tauna ta ese Sarajevo, Bosnia dekenai, Austria ena Archduke Francis Ferdinand bona ena adavana ia alaia mase. Unai kara ese Tanobada Ibounai Tuarina Ginigunana ia hamatamaia.

¹¹ Kaisara Wilhelm ese Austria-Hungary ia hagoadaia Serbia dekenai davana ia henia totona. Germany ena heduru ia abia dainai, Austria-Hungary ese July 28, 1914 ai, Serbia tuari henia herevana ia halasia. To Russia ese Serbia ia durua. Bona Germany ese Russia tuari henia herevana ia halasia neganai, France (Triple Entente ena tano ta) ese Russia ia durua. Unai neganai Germany ese France tuari henia herevana ia halasia. Germany ese Paris do ia abia haraga totona Belgium lalonai ia vareai, to guna Britain ia gwau Belgium ena gini siri karana do ia durua. Unai dainai, Britain ese Germany tuari henia herevana ia halasia. Bese ma haida be tuari lalonai idia vareai danu, bona Italia ese ia durua kahana ia haidaua. Tuari lalonai, Britain ese Aigupito ia naria matamaia, unai amo not kahana ena king ese Suez Canal ia do koua lasi bona saut kahana ena king ena idaunegai tanona Aigupito dekenai do ia vareai lasi.

¹² The World Book Encyclopedia ia gwau: “Ena be idia tuari hebou besedia edia goada be bada, to toana be tuari lalonai Germany do ia kwalimu.” Guna unai king ruaosi idia tuari lalonai, Roma Basileiana be not kahana ena king neganai, hanaihanai ia kwalimu. To hari, ‘guna bamona ia kwalimu lasi.’ Not kahana ena king be tuari lalonai idia halusia. Aneru ese unai ena badina ia hahedinaraia, ia gwau: “Roma [“Kittim,” NW ] taudia be edia kada badadia dekenai do idia mai, [not kahana] ena king do idia tuari henia gwauraia, vadaeni do ia gari.” (Daniela 11:30a) Unai ‘Kittim taudia edia kada’ be dahaka?

¹³ Daniela ena negai Kittim be Kupro. Tanobada Ibounai Tuarina Ginigunana ena matamana kahanai, Britain ese Kupro ia lohiaia. Danu, The Zondervan Pictorial Encyclopedia of the Bible hegeregerena, inai ladana Kittim “be W[est] ibounai ia gwauraia, to nega momo davara dekenai idia loaloa W[est] tanodia ia gwauraia.” New International Version Baibel ese inai hereva ‘Kittim taudia edia kada’ ia hahanaia “west konena ena tano edia bouti.” Tanobada Ibounai Tuarina Ginigunana lalonai, Kittim ena bouti, be Britain ena bouti, ia be Europe ena west konena kahirakahira ia noho motumotuna.

¹⁴ Tuari idia karaia noho lalonai, Kittim ena bouti ma haida amo Britain ena Neivi idia hagoadaia. May 7, 1915 ai, Germany ena sabmarin U-20 ese Ireland ena saut konena kahirakahira ai bouti badana Lusitania ia hadikaia. Idia mase taudia huanai be America taudia 128. Gabeai, Germany ese sabmarin amo idia karaia tuarina ia habadaia ela bona Atlantic davarana. Unai dainai, April 6, 1917 ai, America ena Presiden Woodrow Wilson ese Germany tuari henia herevana ia halasia. America ena tuari bouti bona tuari taudia edia heduru dainai, saut kahana ena king​—⁠hari Tanobada ena Basileia Badana Anglo-America​—⁠idia hagoadaia dainai, ia ida ia heai king ia tuari henia badabada.

¹⁵ Tanobada ena Basileia Badana Anglo-America ese not kahana ena king ia tuari henia neganai, “ia gari” bona November 1918 ai ia abia dae tuari lalonai ia idia halusia. Wilhelm Namba 2 be Netherlands dekenai ia heau mauri, bona Germany dekenai ripablik lohia dalana idia hamatamaia. To not kahana ena king ia do ore lasi.

KING BE “MAI KWALIMU IDA IA KARA”

¹⁶ “Unai neganai, mai badu dikadika danu [not kahana ena king] do ia giroa lou, Dirava ena taudia korikori edia guriguri karadia do ia hadikaia toho [“bona mai kwalimu ida ia kara,” NW ]. Dirava ena guriguri kara idia rakatania taudia edia sisiba herevadia, be unai king ese do ia kamonai henia.” (Daniela 11:30b) Aneru be unai bamona ia peroveta, bona unai bamona ia vara.

¹⁷ Lagani 1918 ai tuari ia ore murinai, idia kwalimu besedia ese Germany ida maino gwauhamata aukana idia karaia. Ena taravatu idauidau dainai Germany taudia idia hekwarahi bada, bona unai ripablik matamatana be ena matamana negana amo ia manoka. Lagani haida lalonai Germany dekenai mauri ia auka bada bona moni dalanai hekwakwanai badana idia davaria, unai dainai taunimanima milioni 6 be gaukara lasi. Lagani 1930 murinai, dala ia hegeregere Adolf Hitler ese siahu ia abia totona. January 1933 ai, praiminista ai ia lao bona lagani gabena lalonai Nazi taudia idia gwauraia Basileia Ihatoina ena presiden ai ia lao.b

¹⁸ Hitler ese lohia siahuna ia abia murinai, maoromaoro “Dirava ena taudia korikori,” eiava Iesu Keriso ena horoa tadikakadia, ia dagedage henia bada herea. (Mataio 25:40) “Mai kwalimu ida” unai kara maoromaoro Keristani taudia ia dagedage henia, bona idia momo ia hahisidia bada. Hitler ese moni gaukaralaia dalanai bona gavamani ma haida ida gaukara hebou karadia lalonai anina namona ia havaraia dainai, “mai kwalimu ida ia kara” danu. Lagani haida sibona lalonai, Germany ena siahu ia habadaia dainai tano idauidau huanai ena siahu ia bada danu.

¹⁹ Hitler ese “Dirava ena guriguri kara idia rakatania taudia edia sisiba herevadia” ia kamonai henia. Unai taudia be daidia? Ia hedinarai idia be Kerisendom ena gunalaia taudia, idia gwau Dirava ida gwauhamata idia karaia to Iesu Keriso ena hahediba taudia idia rakatania vadaeni. Hitler ese unai “guriguri kara idia rakatania taudia” edia heduru ia tahua bona ia kwalimu. Hegeregere, Roma ena pope ida gwauhamata ta ia karaia. Lagani 1935 ai, Hitler ese gavamani lalonai Dubu Gaukara ena Dipatmen ia haginia. Ia tahua gauna ta be Evanelia dubu iboudiai be gavamani ena siahu henunai ia halaoa.

KING ENA “TUARI TAUDIA” IDIA TOREISI

²⁰ Nega daudau lasi murinai, Hitler ese tuari ia hamatamaia, aneru ese ia perovetalaia hegeregerena, ia gwau: “Iena tuari taudia haida do idia toreisi, Dubu Helaga ena helaga bada gabuna do idia hadikaia. Dina ibounai idia karaia boubou gauna do idia hadokoa.” (Daniela 11:31a) Unai “tuari taudia” be not kahana ena king ese Tanobada Ibounai Tuarina Iharuana lalonai saut kahana ena king ia tuari henia totona ia gaukaralaia ami taudia. September 1, 1939 ai, Nazi “tuari taudia” be Poland dekenai idia vareai. Dina rua murinai, Britain bona France ese Poland idia durua totona Germany tuari henia herevana idia halasia. Unai dala ai Tanobada Ibounai Tuarina Iharuana ia matamaia. Poland be karaharaga ia moru, bona nega sisina murinai, Germany tuari taudia ese Denmark, Norway, Netherlands, Belgium, Luxembourg, bona France idia abia. The World Book Encyclopedia ia gwau: “Lagani 1941 ena dokona kahana ai Nazi Germany ese Europe tanona ia lohiaia.”

²¹ Ena be Germany bona Soviet Union ese Hetura Karana, Gaukara Hebou, Bona Tano Hetoana Atoa ena Gwauhamata idia sainia, to June 22, 1941 ai, Hitler be Soviet ena teritori dekenai ia vareai. Unai kara dainai Soviet Union be Britain ena kahana dekenai ia hanaia. Soviet tuari taudia ese Germany tuari taudia edia dala idia koua goadagoada ena be matamanai Germany tuari taudia idia goada. December 6, 1941 ai, Germany ena tuari taudia be Moscow dekenai idia halusia. Murina dinana ai, Germany ena turana Japan ese Pearl Harbor, Hawaii dekenai, bomu ia negedia. Hitler ese unai ia kamonai neganai, iena turadia dekenai ia gwau: “Tuari dekenai do ita lusi diba lasi.” Ia laloa namonamo lasi bena December 11 ai United States tuari henia herevana ia halasia. To Soviet Union bona United States edia siahu ena bada be ia diba lasi. Soviet tuari taudia be ist kahana amo bona Britain bona America tuari taudia be west kahana amo Hitler idia tuari henia dainai, ia kwalimu noho lasi. Germany ena teritori ta ta idia abia, bona Hitler ese sibona ia hamasea murinai, May 7, 1945 ai, Germany be tuari hebou besedia vairanai edia tuari gaudia idia atoa diho.

²² Aneru ia gwau: “Do idia [Nazi tuari taudia] toreisi, Dubu Helaga ena helaga bada gabuna do idia hadikaia. Dina ibounai idia karaia boubou gauna do idia hadokoa.” Idaunegai Iuda dekenai helaga herea gabuna be Ierusalema ena dubu ena kahana ta. To, Iuda taudia ese Iesu idia dadaraia neganai, Iehova ese idia bona edia dubu ia dadaraia. (Mataio 23:37–24:⁠2) Iesu ena nega amo, Iehova ena dubu be lauma dubuna ta, ena helaga herea gabuna be guba dekenai bona lauma dalanai ena ariara gabuna be tanobada dekenai, Hahelaga Tauna Badana, Iesu, ena horoa tadikakadia be unuseniai idia gaukara. Lagani 1930 murina laganidia amo, ‘hutuma bada herea’ taudia be horoa orena taudia ida Dirava idia tomadiho henia bona unai dainai ita gwau diba idia be “Dirava ena dubu” lalonai hesiai gaukara idia karaia. (Apokalupo 7:​9, 15; 11:​1, 2; Heberu 9:​11, 12, 24) Not kahana ena king ese ia lohiaia tanodia ai, horoa orena taudia bona edia bamodia ia dagedage henia karana amo, unai dubu ena ariara tanobada dekenai ia hadikaia. Unai dagedage karana ia auka herea dainai, “dina ibounai idia karaia boubou gauna”​—⁠taunimanima vairanai Iehova ena ladana idia abia isi karana​—⁠ia koua. (Heberu 13:15) To, ena be horoa Keristani taudia mai edia kamonai bona “mamoe idaudia” taudia ese Tanobada Ibounai Tuarina Iharuana lalonai hisihisi bada idia davaria to idia haroro noho.​—⁠Ioane 10:⁠16.

‘DIKA ROHOROHO GAUNA IDIA HAGINIA’

²³ Tanobada Ibounai Tuarina Iharuana ena dokona be kahirakahira neganai, gau ma ta ia vara, Dirava ena aneru ese ia perovetalaia hegeregerena. “Dika Rohoroho Gauna do idia haginia.” (Daniela 11:31b) Iesu ese “gau dika rohorohona” ia herevalaia danu. Keristani taudia ginigunadia edia negai, unai be lagani 66 C.E. ai Iuda taudia edia gwau-edeede karana hadokoa totona Ierusalema dekenai idia mai Roma tuari taudia.c​—⁠Mataio 24:15; Daniela 9:⁠27.

²⁴ Hari inai negai ‘idia haginia Dika Rohoroho Gauna’ be dahaka? Ia hedinarai ia be Dirava ena Basileia ena gabu ai idia atoa “Dika Rohoroho Gauna” ta. Unai be League of Nations, Tanobada Ibounai Tuarina Iharuana ia matamaia neganai guri dobu masemase dekenai ia diho dagedage gauna kakakakana, anina be tanobada ena maino oreana bamona ia gini noho lasi. (Apokalupo 17:⁠8) To, unai “dagedage gauna” be “guri dobu masemase gabuna dekena amo do ia daekau.” Bona unai be October 24, 1945 ai ia vara, unai nega ai United Nations idia haginia, bona ena memba taudia be 50 bona idia ta be Soviet Union. Unai dala ai, aneru ese ia perovetalaia “Dika Rohoroho Gauna”​—⁠United Nations​—⁠idia haginia.

²⁵ Tanobada ibounai tuaridia ruaosi lalonai Germany be not kahana ena king bona ia be saut kahana ena king ena inai tauna badana. Gabeai, daika be unai king ai do ia lao?

[Footnotes]

DAHAKA OI DIBAIA?

• Lagani 1900 be kahirakahira neganai, edena lohia siahudia be not kahana ena king bona saut kahana ena king?

• Tanobada Ibounai Tuarina Ginigunana lalonai, edena dala ai not kahana ena king be ‘guna bamona ia kwalimu lasi’?

• Tanobada Ibounai Tuarina Ginigunana murinai, edena dala ai Hitler ese Germany ena siahu ia habadaia bona tano idauidau huanai ena siahu ia bada danu?

• Tanobada Ibounai Tuarina Iharuana lalonai, not kahana ena king bona saut kahana ena king idia heai neganai dahaka ia vara?

[Study Questions]

 1. Histori torea tauna ta ena hereva hegeregerena, lagani 1800 murina laganidia lalonai edena tano be Europe idia gunalaia tano badadia?

 2. Lagani 1900 be kahirakahira neganai, daika be “not kahana ena king” bona daika be “saut kahana ena king”?

3, 4. (a) Germany Basileiana ena lohia ginigunana be daika, bona dahaka gwauhamata idia karaia? (b) Kaisara Wilhelm ese dahaka ia karaia toho?

 5. Edena dala ai unai king rua be “pata tamona dekenai” idia helai hebou, bona dahaka idia gwauraia?

6, 7. (a) Edena dala ai not kahana ena king be “iena tano dekenai ia giroa lou”? (b) Not kahana ena king ena siahu ia bada ia lao dainai saut kahana ena king be dahaka ia karaia?

 8. Edena dala ai Germany Basileiana ese “kohu momo herea ia gogoa”?

 9. Edena dala ai not kahana ena king ia ura bada “gwauhamata helagana dekenai ia dagedage”?

10, 11. Edena dala ai Tanobada Ibounai Tuarina Ginigunana ia matamaia, bona edena bamona unai be Dirava ese ia atoa ‘negana’?

12. Tanobada Ibounai Tuarina Ginigunana lalonai, edena dala ai tuari be ‘guna bamona lasi’?

13, 14. (a) Not kahana ena king idia tuari henia ‘Kittim taudia edia kada’ be dahaka? (b) Tanobada Ibounai Tuarina Ginigunana idia karaia lalonai, edena dala ai Kittim ena bouti ma haida be tuari lalonai idia vareai?

15. Edena negai not kahana ena king “ia gari”?

16. Peroveta herevana hegeregerena, not kahana ena king idia halusia murinai dahaka ia karaia?

17. Dahaka ia vara murinai Adolf Hitler ese siahu ia abia?

18. Edena dala ai Hitler be “mai kwalimu ida ia kara”?

19. Hitler ese daidia edia heduru ia tahua?

20. Not kahana ena king ese ia gaukaralaia “tuari taudia” be daidia, bona daika tuari henia totona ia gaukaralaia?

21. Tanobada Ibounai Tuarina Iharuana lalonai, edena dala ai not kahana ena king ia kwalimu noho lasi, bona dahaka ia vara?

22. Edena dala ai not kahana ena king ese ‘dubu ia hadikaia bona dina ibounai idia karaia boubou gauna ia hadokoa’?

23. Keristani taudia ginigunadia edia negai “gau dika rohorohona” be dahaka?

24, 25. (a) Hari inai negai “Dika Rohoroho Gauna” be dahaka? (b) Edena negai bona edena dala ai ‘Dika Rohoroho Gauna idia haginia’?

[Chart/Pictures on page 268]

KING TAUDIA DANIELA 11:​27-​31 AI

[Picture]

Presiden Woodrow Wilson, King George Namba 5 ida

[Picture]

Keristani taudia momo be dibura kamepadia dekenai idia dagedage henidia

[Picture]

Kerisendom ena gunalaia taudia ese Hitler idia durua

[Picture]

Archduke Ferdinand be inai motuka lalonai idia alaia mase

[Picture]

Germany ena tuari taudia, Tanobada Ibounai Tuarina Ginigunana lalonai

[Picture on page 257]

Yalta dekenai, 1945 ai, Britain ena Praiminista Winston Churchill, U.S. Presiden Franklin D. Roosevelt, bona Soviet Lohiana Joseph Stalin ese palani idia karaia Germany do idia abia, Poland dekenai gavamani matamata idia haginia, bona hebou ta do idia karaia United Nations idia haginia totona

[Pictures on page 258]

1. Archduke Ferdinand 2. Germany ena neivi 3. Britain ena neivi 4. Lusitania 5. America ena tuari hamatamaia pepana

[Pictures on page 263]

Germany ena kahana ai ia tuari besena Japan ese Pearl Harbor dekenai bomu ia negedia murinai Adolf Hitler ia laloa do idia kwalimu momokani