Karoa 17

Tomadiho Momokani Taudia Dokona Negana Lalonai

IDIA tuari diba lasi orea maragina ta be tanobada ena basileia badana ese ia tuari henia mai goada ida. Idia roho mauri bona idia namo lou danu​—⁠sibona edia goada dainai lasi to Iehova Dirava ese idia ia laloa bada dainai. Daniela ena karoa 7 ese unai gaudia ia perovetalaia, bona lagani 1900 murinai idia guguru. To, unai taudia be daidia? Unai karoa tamona Daniela bukana lalonai ese idia gwauraidia Iehova Dirava, “Ataiai Momokani Dirava ena helaga taudia.” Danu, ia hahedinaraia unai taudia be gabeai Mesia Basileiana lalonai Keriso ida do idia lohia!​—⁠Daniela 7:​13, 14, 18, 21, 22, 25-27.

² Daniela karoa 11 lalonai ita dibaia hegeregerena, not kahana ena king ese unai kamonai taudia edia noho lauma dalanai ia hadikaia gwauraia neganai, unai king do ia ore. (Daniela 11:45; mani Esekiela 38:​18-23 itaia.) Oibe, Iehova ese ena kamonai horoa taudia ia naria namonamo. Salamo 105:​14, 15 ese ita ia hadibaia: “Lohiabada ese king haida ia sisiba henidia, Israela taudia do idia hadikaia lasi totona. Lohiabada ia gwau, ‘Lau ese lau abia hidi bese taudia, be do umui hisihisi henidia lasi. Lauegu peroveta taudia do umui hadikaia lasi.’ ” Unai dainai, inai nega dikana lalonai ena namba ia bada ia lao noho ‘hutuma bada herea’ taudia ese unai helaga taudia idia bamoa momokani be aonega karana, ani? (Apokalupo 7:9; Sekaraia 8:23) Iesu Keriso ese mamoe bamona taudia ia hagoadaia unai do idia karaia​—⁠ena horoa tadikaka idia bamoa bona edia gaukara lalonai idia durudia.​—⁠Mataio 25:​31-46; Galatia 3:⁠29.

³ To, Dirava ena Inai Tauna, Satani, ese unai horoa taudia ia tuari henia mai ena goada ida. Ia ese tomadiho koikoi ia habadaia, Keristani taudia koikoidia amo tanobada ia hahonua noho. Unai dainai, taunimanima momo ia hakaua kerere. Ma haida idia hesiku, idia laloa tomadiho momokani idia badinaia taudia do idia davaria diba lasi. (Mataio 7:​15, 21-23; Apokalupo 12:​9, 17) “Orea maragi” taudia idia davaria bona idia bamoa taudia danu be edia abidadama idia dogoatao totona idia hekwarahi be namo, badina inai tanobada be hanaihanai abidadama ia hadikaia toho. (Luka 12:32) Oi be edena bamona? Oi ese “Ataiai Momokani Dirava ena helaga taudia” oi davaria vadaeni bona idia oi bamoa noho, a? Oi davaria taudia be Dirava ese ia abia hidi taudia korikoridia be gau badadia haida ese idia hamomokania, unai gaudia oi diba, a? Unai hamomokania gaudia ese emu abidadama idia hagoadaia diba. Danu, unai gaudia dainai ma haida do oi durua diba inai tanobada ena tomadiho daradaralaia karana do idia lalo-pararalaia. Daniela karoa 12 ese unai bamona hahemauri herevadia momo herea ia hahedinaraia.

LOHIA BADANA IA TOREISI

⁴ Daniela 12:1 ia gwau: “Unai neganai Mikaela do ia toreisi. Ia be lohia aneru badana, oiemu bese taudia ia gimaia [“totona ia gini,” NW ] tauna.” Unai siri ese Mikaela ena kara rua ia perovetalaia: kara ginigunana be, “ia gini,” anina be nega ta lalonai ia gini noho karana; kara iharuana be, “do ia toreisi,” anina be unai gini noho negana lalonai kara ta do ia karaia. Ita ura ita diba gauna ginigunana be, edena nega lalonai Mikaela be ‘Daniela ena bese taudia totona ia gini.’ Mani oi laloatao Iesu ese guba Lohiana ena gaukara ia karaia neganai unai ladana Mikaela amo ia idia gwauraia. Inai hereva, ia “gini” dainai, Daniela bukana ena siri ma haida lalonai unai hereva idia gaukaralaia dalana ita laloa. Nega momo unai hereva be king ena kara ta, lohia siahuna ia abia karana, ia hahedinaraia.​—⁠Daniela 11:​2-4, 7, 20, 21, NW.

⁵ Ia hedinarai aneru ese ia gwauraia negana be Baibel ena peroveta herevana ma ta ese ia herevalaia danu. Iesu ese unai nega ia gwauraia ‘ia mai negana’ (Greek gado ai, pa·rou·siʹa), unai nega ai ia be King bona guba dekenai ia lohia. (Mataio 24:​37-39) Danu, unai nega idia gwauraia “nega ena dokona” bona “dokona negana.” (2 Timoteo 3:1; Daniela 12:​4, 9) Lagani 1914 ai unai nega ia matamaia amo ema bona hari, Mikaela be guba ai ia “gini” noho King tauna.​—⁠Mani Isaia 11:10; Apokalupo 12:​7-9 itaia.

⁶ To, edena negai Mikaela “do ia toreisi”? Gaukara badana ta do ia karaia neganai do ia toreisi. Iesu ese vaira negana ai unai do ia karaia. Apokalupo 19:​11-16 ena peroveta herevana lalonai Iesu be Mesia Pavapavana badana, aneru edia ami vairanai hosi ia guia bona Dirava ena inai taudia idia hadikaia ore. Daniela 12:1 be ma ia gwau: “Unai neganai nega dika bada herea do ia vara. Matamana negana ia mai bona hari ia lao bona unai nega, be nega dika ta unai bamona do ia vara lasi.” Keriso be Iehova ena Davana Henia Tauna Badana bona idia perovetalaia “hisihisi bada herea” lalonai, inai tanobada ena oromana dikana ibounai do ia hadikaia ore.​—⁠Mataio 24:21; Ieremia 25:33; 2 Tesalonika 1:​6-8; Apokalupo 7:14; 16:​14, 16.

⁷ Unai nega lalonai abidadama taudia be edena bamona? Daniela ma ia hadibaia: “Unai neganai, oiemu bese taudia ese mauri do idia davaria, Dirava ena buka lalonai edia ladana idia torea vadaeni taudia ibounai.” (Luka 21:​34-36 itaia.) Unai buka be dahaka? Unai buka be Iehova Dirava ese iena ura idia karaia taudia ia laloatao karana ia laulaulaia. (Malaki 3:16; Heberu 6:10) Unai mauri bukana lalonai edia ladana idia torea taudia edia noho namona ese tanobada taudia ibounai edia noho ia hereaia, badina Dirava ese idia ia gimaia. Herevana dahaka dika do idia davaria, to do ia hanamoa lou. Ena be ia mai noho “nega dikana” ia do vara lasi neganai idia mase, Iehova ena lalona ai idia noho. Idia ia laloatao bona Iesu Keriso ena Lagani 1,000 Lohia Negana lalonai idia do ia hatoreaisi lou.​—⁠Kara 24:15; Apokalupo 20:​4-6.

HELAGA TAUDIA DO “IDIA TOREISI”

⁸ Toreisi lou helarona ese iseda lalona ia hagoadaia bada. Daniela 12:2 ese unai ia herevalaia sisina, ia gwau: “Tano kahuna lalonai idia mahuta noho taudia momo do idia toreisi, bona haida be mauri hanaihanai do idia abia, to haida be noho hanaihanai hemaraina do idia davaria.” (Isaia 26:19 itaia.) Reana unai herevadia dainai Iesu Keriso ena toreisi lou gwauhamatana namona ita laloatao. (Ioane 5:​28, 29) Unai be helaro namo hereana! Mani oi laloa, lalokau turadia bona ruma bese taudia​—⁠idia mase vadaeni taudia​—⁠be vaira negana lalonai do idia mauri lou! To inai Daniela bukana lalonai ia noho gwauhamatana ese toreisi lou idauna ta ia herevalaia​—⁠unai toreisi lou ia vara vadaeni. Edena bamona unai ia vara vadaeni?

⁹ Mani ena badina siridia oi laloa. Ita itaia vadaeni, karoa 12 ena siri ginigunana ese inai tanobada ena oromana ena dokona ia herevalaia sibona lasi, to dina gabedia negana ibounai. Momokani, unai karoa ena hereva momo herea be do ia mai tanobada paradaisona lalonai lasi, to dokona negana lalonai idia guguru. Unai nega lalonai toreisi lou ta ia vara, a? Aposetolo Paulo ia gwau “Keriso idia badinaia taudia” be “ia giroa mai neganai” do idia toreisi lou. To, guba dekenai idia toreisi lou taudia be “do idia mase lou diba lasi.” (1 Korinto 15:​23, 52) Idia ese Daniela 12:2 ia perovetalaia “noho hanaihanai hemaraina do idia davaria” lasi. Toreisi lou ma ta do ia vara danu, a? Nega haida Baibel lalonai, toreisi lou ena anina be lauma dalanai ia vara gauna ta. Hegeregere, Esekiela bona Apokalupo edia peroveta herevadia haida be lauma dalanai namo lou, eiava toreisi lou, karana ta idia hahedinaraia.​—⁠Esekiela 37:​1-14; Apokalupo 11:​3, 7, 11.

¹⁰ Dokona negana lalonai, Dirava ena horoa hesiai taudia be lauma dalanai unai bamona idia namo lou, a? Oibe! Histori ena sivarai ese ia hahedinaraia lagani 1918 ai, kamonai Keristani orena taudia idia dagedage henia bada dainai, edia haroro gaukarana ia ore bamona. Bona ena be toana be lauma dalanai idia mauri lou diba lasi, to lagani 1919 ai unai ia vara. Unai gaudia be Daniela 12:2 ese ia herevalaia toreisi lou hegeregerena. Haida be unai nega ai bona unai nega murinai lauma dalanai “idia toreisi.” To madi, idia ibounai be lauma dalanai idia mauri noho lasi. Idia toreisi murinai Mesia Pavapavana idia dadaraia bona Dirava ena hesiai gaukara idia rakatania taudia ese Daniela 12:2 ia herevalaia “noho hanaihanai hemaraina” idia davaria. (Heberu 6:​4-6) To, kamonai horoa taudia be lauma dalanai idia noho namo lou dainai, Mesia Pavapavana idia badinaia noho mai edia kamonai ida. Gabeai, edia kamonai karana dainai, peroveta herevana hegeregerena, “mauri hanaihanai do idia abia.” Hari inai negai, herevana dagedage idia davaria, to lauma dalanai idia gaukara goada dainai idia ita gwauraia hedinarai diba.

‘HISIU BAMONA IDIA HURURU’

¹¹ Daniela karoa 12 ena siri 3 bona 4 ese ita idia durua bada, “Ataiai Momokani Dirava ena helaga taudia” ita diba totona. Siri 3 ai aneru ese Daniela ia hamaoroa: “Dirava ena aonega taudia be do idia diaridiari namo herea, dina bamona. Dala maoromaoro be taunimanima momo dekenai idia hadibaia taudia be do idia hururu mai diari namona danu, hisiu bamona, ela bona hanaihanai.” Hari inai negai unai “Dirava ena aonega taudia” be daidia? Hamomokania gaudia ese ma idia hahedinaraia, idia be unai “Ataiai Momokani Dirava ena helaga taudia.” Oibe, kamonai horoa orena taudia sibona idia lalo-parara Mikaela, Lohia Badana, be lagani 1914 ai King dagina ia abia neganai ia gini matamaia, ani? Unai bamona hereva momokani idia herevalaia​—⁠bona Keristani kara idia hahedinaraia​—⁠amo, lauma dalanai dibura ai ia noho tanobadana “idia hadiaria.” (Filipi 2:15; Ioane 8:12) Iesu ese idia ia perovetalaia, ia gwau: “Unai neganai Dirava ena kara maoromaoro taudia be edia Tamana ena Basileia lalonai do idia diaridiari, dina bamona.”​—⁠Mataio 13:⁠43.

¹² Daniela 12:3 dainai, horoa Keristani taudia ese dokona negana lalonai idia karaia gaukarana ita diba danu. “Dala maoromaoro be taunimanima momo dekenai idia hadibaia.” Horoa orena taudia ese Keriso danu do idia lohia taudia 144,000 oredia idia gogoa matamaia. (Roma 8:​16, 17; Apokalupo 7:​3, 4) Unai gaukara idia karaia ore neganai​—⁠ia hedinarai unai be lagani 1935 bamona ai​—⁠idia ese “mamoe idaudia” “hutuma bada herea” idia gogoa matamaia. (Apokalupo 7:​9, NW; Ioane 10:16) Idia danu ese Iesu Keriso ena mauri davalaia boubouna dekenai abidadama idia hahedinaraia. Unai dainai, Iehova vairanai idia goeva. Hari edia namba be milioni momo vadaeni bona edia helaro be do ia mai tanobada dikana ena dokona amo idia roho mauri. Keriso ena Lagani 1,000 Lohia Negana lalonai, Iesu bona ia ida idia lohia king bona hahelaga taudia 144,000 ese tanobada dekenai idia noho kamonai taudia dekenai unai mauri davalaia boubouna ena namo ibounai do idia henia. Unai dala ai abidadama taudia ibounai do idia durua, Adamu amo idia abia hanai kara dika ibounai idia kokia totona. (2 Petero 3:13; Apokalupo 7:​13, 14; 20:​5, 6) Unai neganai, horoa taudia ese dala badana ai, “dala maoromaoro be taunimanima momo dekenai idia hadibaia” bona guba dekenai ‘hisiu bamona idia hururu.’ Keriso bona ia ida idia lohia taudia edia guba gavamani henunai tanobada dekenai oi mauri diba ena helaro oi laloa bada, a? Unai “helaga taudia” ida Dirava ena Basileia ena sivarai namona ita harorolaia diba be hahenamo badana!​—⁠Mataio 24:⁠14.

“IDIA HEAU LAO, HEAU MAI”

¹³ Aneru ese Daniela dekenai ia halasia herevana, Daniela 10:20 amo ia matamaia, be inai hereva namodia amo ia hadokoa, ia gwau: “To oi Daniela, inai peroveta herevana do oi hunia noho, bona inai buka do oi koua momokani, do ia noho ela bona dokona negana ia ginidae. Unai neganai taunimanima momo do idia heau lao, heau mai, bona aonega [“diba momokanina,” NW ] do ia bada herea.” (Daniela 12:⁠4) Momokani, Daniela ese lauma helaga ena hakaua henunai ia torea herevadia momo be hunia gauna bamona bona taunimanima ese idia lalo-pararalaia diba lasi. Oibe, Daniela be gabeai ia gwau: “Ia gwauraia herevana lau kamonai, to unai hereva ena anina be lau diba lasi.” (Daniela 12:⁠8) Unai dala ai, lagani handred momo lalonai Daniela bukana be ia koua bamona. Hari inai negai be edena bamona?

¹⁴ Iseda hahenamo be Daniela bukana ia perovetalaia “dokona negana” lalonai ita noho. Peroveta herevana hegeregerena, kamonai taudia momo be Dirava ena Hereva ena rau lalodiai idia “heau lao, heau mai” bamona. Dahaka ia vara? Iehova ena hahenamo dainai, diba maorona be ia bada ia lao. Iehova ese ena kamonai horoa Witnes taudia ia hanamoa dainai, idia lalo-parara taunimanima ena Natuna be lagani 1914 ai King ai ia lao, Daniela ena peroveta herevana ena dagedage gaudia edia anina idia diba, bona “Hadikaia Dika Rohoroho Gauna” dainai sisiba herevana idia halasia​—⁠bona idia dibaia gaudia amo unai be haida sibona. (Daniela 11:31) Unai diba bada be maka ma ta, unai amo ita diba daidia be “Ataiai Momokani Dirava ena helaga taudia.” To Daniela ese hamomokania gauna ma ta ia abia.

‘IDIA HADIKADIA’

¹⁵ Ita laloatao aneru ese “Taigarisi Sinavai ena badinai” Daniela dekenai inai hereva ia gwauraia. (Daniela 10:⁠4) Hari ia ese unuseniai aneru toi ia itaia bona ia gwau: “Vadaeni lau, Daniela, lau itaia tau rua idia gini noho, ta be sinavai inai kahana ia gini, ma ta be sinavai unai kahana ia gini. Unai tau ruaosi ese dabua aukana ia karaia tauna idia itaia, sinavai ranu ena ataiai ia gini noho. Idia ta ese unai tau ia nanadaia, ia gwau, ‘Ela bona edena neganai inai hoa bona gari gaudia do idia doko?’ ” (Daniela 12:​5, 6) Aneru ena henanadai dainai reana “Ataiai Momokani Dirava ena helaga taudia” ita laloa lou. Lagani 1914 ai “dokona negana” ia matamaia neganai, idia ese Dirava ena gwauhamata do idia guguru negana idia laloa bada. Idia be inai peroveta herevana lalonai idia hedinarai be unai henanadai ena haere ese ia hahedinaraia goevagoeva.

¹⁶ Daniela ia hereva noho, ia gwau: “Dabua aukana ia karaia tauna be iena imana ruaosi ia abia isi momokani, guba dekenai ia duduia bamona, bona Noho Hanaihanai Dirava ena ladana dekenai ia gwauhamata. Iena hereva lau kamonai, ia gwau, ‘Inai gari bona hoa karadia be do idia vara noho ela bona lagani 3 1/2 [“ia atoa nega, ia atoa negadia bona nega ena kahana ta,” NW ] idia ore. Dirava ena helaga taudia edia siahu idia hadikaia karana do ia ore neganai, inai gau ibounai do idia vara haorea.’ ” (Daniela 12:⁠7) Unai gau be mai anina bada. Aneru ese gwauhamata ia henia neganai ena imana ruaosi ia abia isi, reana sinavai badana ena kahana kahana ai idia gini anerudia ese unai idia itaia totona. Unai amo ia hahedinaraia unai peroveta herevana be do ia guguru momokani. To, ia atoa negadia be edena nega? Reana oi laloa haere oi davaria be auka, to ia auka lasi.

¹⁷ Unai peroveta herevana be peroveta herevadia ma rua hegeregerena. Idia ta, inai buka ena Karoa 9 dekenai ita herevalaia gauna, be Daniela 7:​25 dekenai; ma ta be Apokalupo 11:​3, 7, 9 dekenai. Idia hegeregere daladia haida mani oi itaia. Idia ruaosi be dokona negana lalonai idia guguru. Idia ruaosi ese Dirava ena hesiai taudia helagadia idia herevalaia, idia hahedinaraia unai hesiai taudia idia dagedage henidia bona nega ta lalonai edia haroro gaukarana idia karaia diba lasi. Idia ruaosi idia hahedinaraia Dirava ena hesiai taudia idia namo lou bona edia gaukara idia hamatamaia lou, bona unai amo edia inai taudia edia ura idia koua. Bona unai peroveta herevadia ruaosi ese helaga taudia idia davaria nega aukana ena lata idia hahedinaraia. Daniela bukana ena peroveta herevadia ruaosi (7:​25 bona 12:⁠7) ese ‘nega, negadia, bona nega ena kahana ta’ (NW ) idia gwauraia. Diba bada taudia momo idia gwau unai ena anina be nega toi mai kahana. Apokalupo ese unai nega ia gwauraia hua 42, eiava dina 1,260. (Apokalupo 11:​2, 3) Unai ese ia hamomokania Daniela bukana lalonai idia hedinarai nega toi mai kahana ena anina be lagani toi mai kahana, lagani ta ta be dina 360. To unai dina 1,260 be edena negai idia matamaia?

¹⁸ Peroveta herevana ese unai dina 1,260 edia dokona ia hahedinaraia goevagoeva​—⁠ia be “Dirava ena helaga taudia edia siahu idia hadikaia karana do ia ore neganai.” Lagani 1918 ihuana kahanai, Watch Tower Bible and Tract Society ena tau badadia, ena presiden J. F. Rutherford danu, idia samania koikoi, lagani momo ena hahemaoro herevana idia henidia, bona dibura rumana dekenai idia atodia. Dirava ena helaga taudia idia itaia momokani, edia gaukara bona edia ‘siahu idia hadikadia.’ Lagani 1918 ihuana amo lagani toi mai kahana ita duahia giroa neganai, lagani 1914 ena dokona ita davaria. Unai nega ai horoa taudia edia grup maragina be sibona idia hagoadaia, dagedage karadia do idia haheaukalaia totona. Tanobada Ibounai Tuarina Ginigunana ia matamaia vadaeni, bona edia gaukara koua karadia idia bada idia lao. Lagani 1915 totona idia abia hidi siri badana be Keriso ese ena murinai idia raka taudia dekenai ia henia henanadai ia hahedinaraia, ia gwau: “Egu kapusi amo umui inua diba, a?” (Mataio 20:​22, King James Version) Apokalupo 11:3 ia peroveta hegeregerena, horoa taudia dekenai unai dina 1,260 negana be lalohisihisi ena nega​—⁠puse dabua idia karaia bona idia peroveta bamona. Dagedage karana ia bada ia lao. Idia haida be dibura dekenai idia atodia, taunimanima hutuma ese idia dadabadia, bona ma haida idia hahisidia bada. Lagani 1916 ai, Society ena presiden ginigunana, C. T. Russell, ia mase dainai momo idia lalo-manoka. To, unai helaga taudia edia haroro oreana idia hamasea bamona ena nega aukana ia ore neganai dahaka ia vara?

¹⁹ Unai bamona peroveta herevana Apokalupo 11:​3, 9, 11 ai, ese ia hahedinaraia unai “uitnesi taudia rua” idia hamasea murinai, nega kwadogina sibona​—⁠dina toi mai kahana​—⁠lalonai idia noho mase bamona, bena do idia namo lou. Unai hegeregerena, Daniela karoa 12 ena peroveta herevana ia hahedinaraia helaga taudia be do idia noho kava lasi to gaukara ma haida do idia karaia.

IDIA ‘GOEVA BONA KUROKURO’

²⁰ Guna ita itaia vadaeni, Daniela ese inai gaudia ia torea to ia lalo-pararalaia lasi. To, reana dagedage taudia ese unai helaga taudia do idia hadikaia ore eiava lasi ia lalo-hekwarahilaia, badina ia henanadai: “Lauegu lohia e, inai gaudia dekena amo be dahaka do ia vara?” Aneru ia haere, ia gwau: “Daniela, vadaeni, oi lao, badina inai hereva ena anina be do hunia bamona ia lao, ela bona dokona negana ia ginidae. Taunimanima momo ese tohoa dekena amo goeva do idia davaria, bona do idia kurokuro. Dika taudia be do idia kara dika noho, idia be diba do idia davaria lasi. To mai edia aonega taudia be diba do idia davaria.” (Daniela 12:​8-10) Helaga taudia dekenai helaro ia noho! Do idia hadikadia ore lasi, to do idia kurokuro, Iehova Dirava ena vairanai do idia goeva. (Malaki 3:​1-3) Lauma gaudia idia lalo-pararalaia dainai Dirava ena matana ai do idia goeva noho. To, dika taudia idia ura lasi lauma gaudia idia lalo-pararalaia. Unai ibounai be edena negai do ia vara?

²¹ Daniela idia hadibaia: “Dina ibounai karaia boubou gauna do idia hadokoa, . . . bona Hadikaia Dika Rohoroho Gauna do idia haginia dina dekenai [“dekena amo,” NW ], be dina 1290 do idia ore.” Ia hedinarai, unai nega be gau rua idia vara neganai do ia matamaia. “Dina ibounai karaia boubou gauna”a do idia hadokoa guna. (Daniela 12:11) Aneru ese ia herevalaia boubou gauna be dahaka? Tanobada ai idia noho dubu dekenai idia karaia animal bouboudia lasi. Oibe, guna Ierusalema dekenai ia noho dubu danu be “laulau sibona”​—⁠Iehova ena lauma dubuna badana, lagani 29 C.E. ai Keriso be ena Hahelaga Tauna Badana ai ia lao neganai ena gaukara ia matamaia dubuna, ia laulaulaia! Unai lauma dubuna, Dirava ese tomadiho goevana totona ia kehoa dalana, dekenai kara dika boubouna idia karaia loulou be anina lasi, badina “Keriso ese nega tamona sibona iena mauri Dirava dekenai ia henia, taunimanima momo edia kara dika kokia totona.” (Heberu 9:​24-28) To, Keristani taudia momokanidia ibounai ese unai dubu lalonai boubou gaudia idia henia. Aposetolo Paulo ia gwau: “[Keriso] ena amo nega ibounai hahenamo herevadia boubouna be Dirava do ita henia, ena ladana idia gwauraia hedinarai bibinadia edia huahua be unai.” (Heberu 13:​15, NW ) Unai dainai, peroveta herevana hegeregerena ia vara guna gauna ginigunana​—⁠“dina ibounai karaia boubou gauna” idia hadokoa​—⁠be lagani 1918 ihuana bamona ai haroro gaukara idia hadokoa neganai ia vara.

²² To, do ia vara gauna iharuana​—⁠“Hadikaia Dika Rohoroho Gauna do idia haginia”​—⁠be edena bamona? Daniela 11:31 ita herevalaia neganai ita itaia unai dika rohoroho gauna be guna League of Nations bona gabeai ia hedinarai lou neganai, ia be United Nations. Idia ruaosi be dika rohoroho badina taunimanima idia gwau idia sibodia amo maino be tanobada dekenai do ia vara. Unai dainai, taunimanima momo edia kudouna ai unai orea ese Dirava ena Basileia ena gabu idia abia! Unai League haginia herevana be January 1919 ai idia halasia. Unai neganai, Daniela 12:11 ia hahedinaraia gaudia rua idia vara vadaeni. Unai dainai, dina 1,290 be lagani 1919 ena matamana kahana ai idia matamaia ela bona September 1922 ai ia ore.

²³ Unai nega lalonai, helaga taudia be Dirava ena matanai idia goeva bona idia kurokuro idia lao, a? Oibe! March 1919 ai, Watch Tower Society ena presiden bona ena bamodia be dibura amo idia ruhaia. Gabeai kota herevana ta ese ia hahedinaraia idia be kerere lasi. Idia lalo-parara edia gaukara ia do ore lasi bona maoromaoro idia gaukara goadagoada matamaia, bona September 1919 totona hebouhebou ta idia hegaegaelaia. Unai lagani tamona ai, magasin ma ta be The Watch Tower magasin ida idia halasia matamaia. Guna ena ladana be The Golden Age (hari Awake!) bona hanaihanai ia ese The Watchtower ia durua bona mai gari lasi ida inai tanobada ena dika ia hahedinaraia bona Dirava ena taunimamina ia durua idia goeva noho totona. Idia perovetalaia dinadia 1,290 murinai, helaga taudia idia goeva bona idia namo idia lao. September 1922 ai, unai nega ia ore neganai, Cedar Point, Ohio, U.S.A. dekenai, mai anina bada hebouhebouna idia karaia. Ia ese haroro gaukara ia hagoadaia bada. To, dala ma haida ai do idia namo idia lao be namo. Unai be nega ma ta lalonai do ia vara.

HELAGA TAUDIA IDIA MOALE

²⁴ Iehova ena aneru ese helaga taudia ia perovetalaia herevana ia haorea neganai, inai bamona ia gwau: “Do idia naria noho namonamo, ia lao bona dina 1335 idia ore taudia be moale bona namo do idia davaria.” (Daniela 12:12) Aneru ese unai nega ena matamana eiava dokona idia hahedinaraia gaudia ta ia gwauraia lasi. Histori ena sivarai ese ia hamomokania ia be unai nega gunana murinai, maoromaoro ia matamaia. Unai dainai, ia be September 1922 amo ela bona May 1926 bamona. Ia ore neganai helaga taudia idia moale lou, a? Oibe, lauma dalanai, mai anina bada daladia dekenai.

²⁵ Lagani 1922 ena hebouhebou (rau 302 ia hedinarai) murinai danu, Dirava ena helaga taudia haida ese guna gaudia idia do laloa noho. Edia hebou dekenai idia do stadilaia gaudia be Baibel bona C. T. Russell ese ia halasia Studies in the Scriptures edia volium idauidau. Unai nega ai, momo idia laloa lagani 1925 ai toreisi lou do ia matamaia bona Paradaiso be tanobada dekenai do ia noho lou. Unai dainai, momo be Dirava idia hesiai henia lalonai, idia ese dina ta idia laloa bada. Haida be mai edia hekokoroku ida taunimanima haroro henia gaukarana idia dadaraia. Unai be moale negana lasi.

²⁶ To, dina 1,335 negana lalonai, unai ibounai ia idau. Haroro gaukara idia laloa bada matamaia, badina iboudiai ese haroro gaukara idia karaia totona dala idauidau idia karaia. Hebou edia sediual idia karaia, pura ta ta ai The Watch Tower idia stadilaia totona. March 1, 1925 ena magasin ese mai anina bada herevana ia halasia, ena sinado be “Bese ta Ia Vara,” bona ia ese Dirava ena taunimanima ia durua, lagani 1914 ia lao 1919 lalonai idia vara gaudia idia lalo-pararalaia namonamo totona. Lagani 1925 ia ore murinai, helaga taudia ese Dirava ena hesiai gaukara idia karaia lalonai, do ia mai dinana ta idia laloa lasi. To, Iehova ena ladana hahelagaia karana idia laloa bada. Unai hereva momokani mai anina bada be January 1, 1926 ena Watch Tower ena hereva “Daika be Iehova Do Ia Matauraia?” lalonai idia hahedinaraia goevagoeva, guna bamona lasi. May 1926 ena hebouhebou dekenai, Deliverance bukana idia halasia. (Rau 302 itaia.) Unai be Studies in the Scriptures edia gabu do idia abia bukadia ta. Unai neganai, helaga taudia ese guna gaudia idia laloa lasi. Mai edia lalo-goada ida vaira negana bona edia gaukara idia laloa. Unai dainai, peroveta herevana hegeregerena, dina 1,335 idia ore neganai helaga taudia idia moale.

²⁷ Momokani, haida ese unai nega dikana idia haheaukalaia lasi. Unai dainai, aneru ese ia hahedinaraia “idia naria noho” be gau badana. Idia haheauka bona idia naria noho taudia ese hahenamo badadia idia abia. Daniela karoa 12 oi laloa lou karana amo unai do oi itaia namonamo. Peroveta herevana hegeregerena, lauma dalanai horoa taudia idia namo lou, eiava idia toreisi lou. Dirava ena Hereva idia lalo-pararalaia namonamo, siahu idia abia ena rau lalodiai idia “heau lao, heau mai” bamona, bona lauma helaga ese ia hakaudia idaunegai hunia herevadia edia anina idia dibaia totona. Iehova ese idia ia hagoevaia bona lauma dalanai idia diaridiari, idia hururu hisiu bamona. Unai dainai, idia ese momo idia durua Iehova Dirava ena vairanai idia kara maoromaoro totona.

²⁸ Unai peroveta maka ibounai ese “Ataiai Momokani Dirava ena helaga taudia” idia hahedinaraia dainai, ta ese idia ia diba lasi bona ia badinaia lasi ena badina namona ta ia gwauraia diba lasi, ani? Hari edia namba ia maragi ia lao horoa taudia ida Iehova idia hesiai henia hutuma bada herea taudia ese hahenamo badadia do idia abia. Namona be ita ibounai ese Dirava ena gwauhamata idia guguru negana ita naria noho. (Habakuku 2:⁠3) Hari iseda negai, Mikaela, Lohia Badana, be Dirava ena taunimanima totona lagani momo herea lalonai ia gini vadaeni. Kahirakahira ia ese Dirava amo ia abia gaukarana dainai inai tanobada ena oromana do ia hahemaoro henia. Unai ia karaia neganai, ita be edena bamona?

²⁹ Unai henanadai ena haere be hari kara maoromaoro ita badinaia eiava lasi amo do ia hedinarai. “Dokona negana” ia ore gwauraia lalonai iseda lalona ita hagoadaia unai do ita karaia totona, unai dainai Daniela bukana ena siri ginigabena ita laloa be namo. Karoa gabena lalonai ita herevalaia neganai, do ita itaia Dirava ena vairanai Daniela be edena bamona ia gini bona vaira negana lalonai Iena vairanai edena bamona do ia gini.

[Footnote]

DAHAKA OI DIBAIA?

• Edena nega lalonai Mikaela “ia gini” bona edena dala ai bona edena negai “do ia toreisi”?

• Daniela 12:2 ese ia herevalaia toreisi lou be edena bamona?

• Edena dina ai inai nega idia hamatamaia bona idia ore:

Daniela 12:7 ia gwauraia nega toi mai kahana?

Daniela 12:11 ia perovetalaia dina 1,290?

Daniela 12:12 ia perovetalaia dina 1,335?

• Edena dala ai Daniela karoa 12 ita laloa namonamo karana ese ita ia durua, Iehova tomadiho henia taudia momokanidia ita diba totona?

[Study Questions]

 1. Daniela karoa 7 hegeregerena, iseda negai idia tuari diba lasi orea maragina dekenai dahaka ia vara?

 2. (a) Iehova ese ena horoa hesiai taudia be edena bamona ia laloa? (b) Hari inai negai dahaka ita karaia be aonega dalana?

 3. (a) Dahaka dainai Iesu murinai idia raka horoa taudia ita davaria bona ita badinaia be auka? (b) Unai ita karaia totona Daniela karoa 12 ese edena bamona ita ia durua diba?

 4. (a) Daniela 12:1 ia peroveta Mikaela ena kara rua be dahaka dahaka? (b) Daniela bukana lalonai nega momo king ia “gini” ena anina be dahaka?

5, 6. (a) Edena nega lalonai Mikaela ia “gini” noho? (b) Edena negai bona edena dala ai Mikaela “do ia toreisi,” bona dahaka ia vara?

 7. (a) “Nega dika” lalonai kamonai taudia ibounai edia helaro be dahaka? (b) Iehova ena buka be dahaka, bona dahaka dainai iseda ladana be unai buka lalonai ia noho be gau badana?

 8. Daniela 12:2 ia hahedinaraia helaro namona be dahaka?

 9. (a) Dahaka dainai ita laloa diba Daniela 12:2 be dina gabedia lalonai ia guguru? (b) Unai peroveta herevana ese edena bamona toreisi lou ia herevalaia, bona edena bamona unai ita diba?

10. (a) Edena dala ai horoa orena taudia be dokona negana lalonai idia toreisi lou? (b) Edena dala ai idia namo lou horoa taudia haida ese “noho hanaihanai hemaraina” idia davaria?

11. Hari inai negai “Dirava ena aonega taudia” be daidia, bona edena dala ai hisiu bamona idia hururu?

12. (a) Dokona negana lalonai, edena dala ai horoa taudia ese “dala maoromaoro be taunimanima momo dekenai idia hadibaia”? (b) Keriso ena Lagani 1,000 Lohia Negana lalonai, edena dala ai horoa taudia ese kara maoromaoro dekenai momo do idia hakaua mai bona idia be ‘hisiu bamona idia hururu’?

13. Edena dala ai Daniela bukana ena hereva be ia koua bona ia be hunia gauna?

14. (a) “Dokona negana” lalonai, daidia idia “heau lao, heau mai” bamona bona edeseniai? (b) Dahaka ese ia hamomokania Iehova ese unai “heau lao, heau mai” karana ia hanamoa?

15. Aneru be dahaka henanadai ia gwauraia, bona unai henanadai dainai reana daidia ita laloa?

16. Aneru ese ia gwauraia peroveta herevana be dahaka, bona edena dala ai ia hahedinaraia do ia guguru momokani?

17. (a) Daniela 7:​25, Daniela 12:​7, bona Apokalupo 11:​3, 7, 9 edia peroveta herevadia be edena bamona idia hegeregere? (b) Nega toi mai kahana ena lata be edena bamona?

18. (a) Daniela 12:​7 hegeregerena, dahaka ese dina 1,260 edia dokona ia hahedinaraia? (b) Edena negai ‘helaga taudia edia siahu’ idia hadikaia, bona edena dala ai ia vara? (c) Edena dala ai unai dina 1,260 idia matamaia, bona edena dala ai horoa taudia ese ‘puse dabua idia karaia bona idia peroveta’?

19. Edena dala ai Apokalupo karoa 11 ena peroveta herevana ese ia hamomokania horoa orena taudia be nega kwadogina sibona lalonai idia gaukara lasi?

20. Daniela 12:​10 hegeregerena, horoa taudia ese nega aukana idia davaria murinai dahaka hahenamo idia abia?

21. (a) Daniela 12:11 ese ia perovetalaia negana be dahaka gaudia idia vara neganai do ia matamaia? (b) “Dina ibounai karaia boubou gauna” be dahaka, bona edena negai idia hadokoa? (Rau 298 ai ia noho mauana itaia.)

22. (a) “Hadikaia Dika Rohoroho Gauna” be dahaka, bona edena negai idia haginia? (b) Daniela 12:11 ese ia perovetalaia negana be edena negai ia matamaia, bona edena negai ia ore?

23. Edena dala ai Dirava ena taunimanima be Daniela karoa 12 ese ia perovetalaia dina 1,290 lalonai idia goeva idia lao?

24, 25. (a) Daniela 12:​12 ese ia perovetalaia negana be dahaka, bona edena negai ia matamaia bona ia ore? (b) Dina 1,335 idia matamaia neganai horoa orena taudia edia noho lauma dalanai be edena bamona?

26. Dina 1,335 negana lalonai, horoa taudia edia noho lauma dalanai be edena bamona ia namo ia lao?

27. Edena dala ai Daniela karoa 12 ita laloa lou karana amo Iehova ena horoa taudia do ita diba?

28, 29. “Dokona negana” ia ore gwauraia lalonai dahaka karaia totona iseda lalona ita hagoadaia be namo?

[Box on page 298]

DINA IBOUNAI BOUBOU GAUNA IDIA HADOKOA

Daniela bukana lalonai, inai hereva ‘dina ibounai boubou gauna’ be nega ima ia hedinarai. Ia be Iehova Dirava dekenai ena hesiai taudia ese hanaihanai idia henia hanamoa ena boubou​—⁠“uduna bibina” amo idia henia. (Heberu 13:15) Daniela 8:​11, 11:​31, bona 12:11 ese unai boubou gauna idia koua karana idia herevalaia.

Tanobada ibounai tuaridia ruaosi lalonai, “[not kahana] ena king” bona “[saut kahana] ena king” idia lohiaia teritori idauidau dekenai Iehova ena taunimanima idia dagedage henia mai edia goada ida. (Daniela 11:​14, 15) Unai ‘dina ibounai boubou gauna’ be Tanobada Ibounai Tuarina Ginigunana ena dokona kahanai, lagani 1918 ihuanai haroro gaukara idia hadikaia neganai, idia hadokoa. (Daniela 12:⁠7) Unai hegeregerena, Tanobada Ibounai Tuarina Iharuana lalonai, ‘dina ibounai boubou gauna’ be dina 2,300 lalonai Tanobada ena Basileia Badana Anglo-America ese ia “koua.” (Daniela 8:​11-14; inai buka ena Karoa 10 itaia.) Nazi “tuari taudia” ese idia hadokoa danu to Baibel ese unai nega ena daudau ia gwauraia lasi.​—⁠Daniela 11:31; inai buka ena Karoa 15 itaia.

[Chart/Pictures on page 301]

PEROVETA NEGADIA DANIELA BUKANA AI

[Pictures on page 287]

Iehova ena hesiai taudia mai edia dagi idia samania koikoi bona Atlanta, Georgia, U.S.A. dekenai, dibura rumana ai idia atoa. Lauri amo ia lao idiba: (helai taudia) A. H. Macmillan, J. F. Rutherford, W. E. Van Amburgh; (gini taudia) G. H. Fisher, R. J. Martin, G. DeCecca, F. H. Robison, bona C. J. Woodworth

[Pictures on page 299]

Lagani 1919 ai (ataiai) bona lagani 1922 ai (henunai), Cedar Point, Ohio, U.S.A. dekenai, mai anina bada hebouheboudia idia karaia

[Full-page picture on page 302]