Karoa 6

Au Badana Ena Anina Ia Hedinarai

IEHOVA ese King Nebukanesa ia koua lasi bona ia be tanobada ena lohia badana ta ai ia lao. Ia be Babulonia ena king dainai, ena kohu be bada, ena aniani be momo, bona ena ruma be namo herea​—⁠tauanina dalanai ia ura gaudia ibounai ia abia diba. To hemarai gauna ta ia davaria. Nebukanesa ia kavakava, bona ena kara be uda boroma ena kara bamona! Iena aniani patana bona ena ruma amo idia lulua, bona rei gabudia dekenai ia noho bona rei ia ania boromakau bamona. Dahaka dainai unai dika ia vara? Bona dahaka dainai unai ita laloa be namo?​—⁠Mani Iobu 12:​17-19; Hadibaia Tauna 6:​1, 2 itaia.

KING ESE ATAIAI MOMOKANI DIRAVANA IA ABIA ISI

² Nebukanesa ia kavakava negana amo ia namo lou neganai, ia lohiaia gabuna ibounai dekenai ia vara gauna ena sivarai ia siaia. Iehova ese ena lauma amo peroveta tauna Daniela ia hasiahua idia vara gaudia edia sivarai maorona ia torea totona. Inai hereva amo ia matamaia: “King Nebukanesa ese inai bamona ia hereva taunimanima ibounai, bona bese ibounai, bona gado ibounai, tanobada dekenai. Ia gwau, ‘Emui maino do ia bada lao. Ataiai Momokani Dirava ese hoa bona toa karadia lau dekenai ia hedinaraia vadaeni. Inai gaudia lau ura hadibaia umui dekenai: “Iena toa gaudia be bada, bona iena hoa gaudia be herea! Iena basileia be noho hanaihanai ena basileia! Bona iena siahu be nega ibounai lalonai do ia noho.” ’ ”​—⁠Daniela 4:​1-3.

³ Nebukanesa ese ia lohiaia taudia be “tanobada dekenai” idia noho​—⁠Baibel ese ia herevalaia tanobadana ena kahana kahirakahira ibounai be iena basileia henunai ia noho. King ese Daniela ena Dirava ia herevalaia, ia gwau: “Iena basileia be noho hanaihanai ena basileia!” Babulonia Basileiana ibounai lalonai unai hereva ese Iehova ia hanamoa bada! Danu, unai be nega iharuana Nebukanesa ia itaia Dirava ena Basileia sibona be noho hanaihanai basileiana, “ia sibona do ia noho ela bona hanaihanai.”​—⁠Daniela 2:⁠44.

⁴ “Ataiai Momokani Dirava” ese dahaka “hoa bona toa karadia” ia karaia? Inai hereva ese ia hahedinaraia unai kara be king dekenai ia vara gauna amo idia matamaia, ia gwau: “Lau Nebukanesa be lauegu ruma badana dekenai lau noho namo herea, mai moale bona mai kwalimu danu. Nihi ta lau itaia dekenai lau gari. Lauegu mahuta pata dekenai lau hekure noho neganai, lau itaia gaudia dekenai lau laloa momo.” (Daniela 4:​4, 5) Babulonia ena king be ia laloa momo nihina dainai dahaka ia karaia?

⁵ Nebukanesa ese Babulonia ena aonega taudia ia boiria bona ena nihi ia gwauraia. To idia kwalimu lasi! Nihi ena anina idia gwauraia diba lasi. Unai sivarai be ma ia gwau: “Gabeai Daniela ia mai, iena ladana ta be Belitisasa, lauegu dirava ena ladana hegeregerena. Ia dekenai dirava helagadia edia lauma ia noho. Ia dekenai unai nihi lau hadibaia.” (Daniela 4:​6-8) King ena ruma dekenai Daniela idia gwauraia Belitisasa, bona king ese unai dirava koikoina ia gwauraia “lauegu dirava” be reana Bel eiava Nebo eiava Marduk. Nebukanesa be dirava momo tomadiho henia tauna dainai, ia laloa Daniela dekenai “dirava helagadia edia lauma ia noho.” Bona Daniela be Babulonia ena aonega taudia ibounai edia tau badana dainai, king ese ia gwauraia “meamea taudia edia lohia.” (Daniela 2:48; 4:9; mani Daniela 1:20 itaia.) To momokani, kamonai tauna Daniela ese Iehova ena tomadiho ia rakatania lasi bona meamea karadia ia karaia lasi.​—⁠Levitiko 19:26; Deuteronomi 18:​10-12.

AU BADANA

⁶ Babulonia ena king ia hagaria nihina be edena bamona? Nebukanesa ia gwau: “Lauegu mahuta pata dekenai nihi lalonai lau itaia gaudia be inai: Lau itaia, au lata herea ta inai tanobada dekenai ia gini, ena dorina be ataiai momokani. Unai au be ia tubu bona ia goada. Iena dorina be guba dekenai ia kamokau. Tanobada taudia ibounai ese idia itaia diba. Iena rauna be mai hairaina namo herea, bona iena huahua be momo, taunimanima ibounai idia ania. Uda boroma be iena ikerukeruna dekenai idia noho, bona guba manudia be iena rigina dekenai idia helai. Mauri gaudia ibounai ese, unai au dekena amo aniani idia davaria.” (Daniela 4:​10-12) Sivarai haida idia gwau, Nebukanesa ese Lebanona ena sida au badadia ia ura henia, ia lao idia ia itaia totona, bona idia haida be Babulonia dekenai ia mailaia. To ena nihi lalonai ia itaia au bamona ta be guna ia itaia lasi. “Inai tanobada dekenai ia gini,” tanobada ibounai amo idia itaia diba, bona iena huahua be momo dainai iboudiai ese idia ania diba.

⁷ To nihi lalonai gau ma haida idia vara danu, Nebukanesa ia gwau: “Egu nihi dekenai lau itaia, gima aneru helagana naria tauna be guba dekena amo ia diho mai. Ia boiboi badabada, ia gwau: Inai au utua bona hamorua, bona rigina utua oho! Rauna ibounai kokia, bona iena huahua oi gigia rohoroho! Henunai idia noho boroma ibounai lulua, bona iena rigina dekenai idia noho manu danu lulua! To unai au ena badina, mai ena ramuna danu, be do idia noho. Auri bona auri laboralabora gaba dekena amo, au ena badina do oi hagegea. Rei gabuna dekenai do ia noho, bona rei do ia ania. Hanuaboi ena ranu ese inai tau do ia hapariparia, bona ia be boroma danu do ia noho, rei lalonai.”​—⁠Daniela 4:​13-15.

⁸ Babulonia taudia edia tomadiho hahediba hereva ta be lauma namodia bona dikadia idauidau idia noho. To unai guba amo ia mai “gima aneru,” eiava “naria tauna,” be daika? Ia be “aneru helagana” dainai, ita diba ia be Dirava ena gaukara ia karaia kara maoromaoro aneruna ta. (Salamo 103:​20, 21 itaia.) Nebukanesa ese ia laloa momo henanadai, mani oi laloa! Dahaka dainai au idia utua? Auri bona kopa amo au ena badina idia kwatua ena namo be dahaka? Momokani, idia utua au ena badina ena gaukara be dahaka?

⁹ Nebukanesa ese gima aneru ena hereva ma haida ia kamonai neganai, reana ia hoa bada. Aneru ia gwau: “Iena lalona be do ia idau, taunimanima ena bamona lasi, to boroma ena be ia dekenai do lau henia. Unai bamona do ia noho ela bona lagani 7 [“nega 7,” NW ] idia ore. ‘Inai kara be gima aneru edia oda herevana, helaga aneru orea ese inai hereva idia gwauraia. Bona unai dekena amo mauri noho taudia do idia diba, Ataiai Momokani Dirava, be mai ena siahu taunimanima ibounai edia latanai, bona iena ura hegeregerena, basileia naria siahu ia henia taunimanima ta ta dekenai. Ia ese hekokoroku lasi tauna ia habadaia diba.’ ” (Daniela 4:​16, 17) Au ena badina ena lalonai be taunimanima ena lalona ia gaukara lasi. Vadaeni, ia dekenai boroma ena lalona be edena bamona idia henia diba? Unai “nega 7” edia anina be dahaka? Bona unai ibounai ena anina “taunimanima ibounai edia latanai” ia noho lohia siahuna dekenai be dahaka? Reana Nebukanesa ia ura unai ia diba.

SIVARAI DIKANA KING DEKENAI

¹⁰ Daniela ese unai nihi ia kamonai murinai, nega sisina ia hoa, bona ia gari. Nebukanesa ese ia hamaoroa anina do ia herevalaia neganai, Daniela ia gwau: “King badana e, inai nihi bona ena anina be oi dekenai idia tuari taudia dekenai ia lao be namo. . . . Unai au oi itaia gauna, be ia tubu goada bona ena kwarana ia daekau gubai, . . . King badana e, inai au be oi, badina be oi tubu vadaeni, bona goada oi abia vadaeni. Oiemu bada toana be guba ia abia vadaeni, bona oiemu siahu toana be tanobada taudia ibounai idia diba.” (Daniela 4:​18-22) Baibel lalonai, au ese taunimanima, lohia taudia, bona basileia idia laulaulaia diba. (Salamo 1:3; Ieremia 17:​7, 8; Esekiela, karoa 31) Nebukanesa be iena nihi lalonai ia itaia au hegeregerena ia “tubu goada” bona tanobada ena basileia badana ena lohia dagina ia abia. To unai au badana ese “tanobada taudia ibounai,” taunimanima edia basileia ibounai danu, lohiaia siahuna ia laulaulaia. Unai dainai ia ese Iehova ena guba bona tanobada ibounai lohiaia siahuna tanobada dekenai ia laulaulaia.​—⁠Daniela 4:⁠17.

¹¹ Nebukanesa ena mauri do ia idau. Daniela ese unai ia hahedinaraia totona ia gwau: “Inai danu oi itaia gima aneru helaga guba dekena amo ia diho mai, ma ia hereva, ‘Inai au utua bona haorea, to au ena badina, mai ena ramuna danu tano lalonai do idia noho, gaba gauna be auri bona auri labora dekena amo ia hagegea noho. Rei gabuna dekenai do ia noho, bona hanuaboi ena ranu ese do ia hapariparia, unai bamona be boroma danu do ia noho, ela bona lagani 7 [“nega 7,” NW ] idia ore.’ King e, unai nihi ena anina be inai: Ataiai Momokani Dirava ese ia siaia herevana be inai.” (Daniela 4:​23, 24) Momokani siahu bada king dekenai unai hereva ia gwauraia totona ia gari lasi be namo!

¹² Nebukanesa dekenai be dahaka do ia vara? Mani king ena hemami oi laloa badina Daniela be ma ia hereva, ia gwau: “Taunimanima edia noho gabuna dekena amo oi do idia lulua lao, bona do oi lao, uda boroma danu oi noho. Lagani 7 [“nega 7,” NW ] lalonai rei do oi ania, boromakau bamona, bona hanuaboi ena ranu ese oi do ia hapariparia, ela bona oi diba Ataiai Momokani Diravana be taunimanima edia basileia ia biagua noho, bona iena ura tauna dekenai siahu ia henia noho.” (Daniela 4:25) Toana be Nebukanesa ena ofesa taudia danu ese ‘taunimanima edia noho gabuna amo ia do idia lulua.’ To hebogahisi taudia, boromakau bona mamoe idia naria taudia, ese ia do idia naria, a? Lasi, badina Dirava ia gwau Nebukanesa be “uda boroma danu” do ia noho, bona rei do ia ania.

¹³ Au idia utua bamona, Nebukanesa ese tanobada ena lohia siahuna do ia haboioa​—⁠to nega ta lalonai sibona. Daniela ia gwau: “To idia gwau, ‘Au badina ena ramuna be do ia noho tano lalonai.’ Ena anina be, oiemu basileia be do ia noho. Bona bema diba do oi abia, bona oi hamomokania, Dirava tamona sibona ese gau ibounai ia biagua noho neganai, oiemu basileia ma do oi abia lou.” (Daniela 4:26) Nebukanesa ena nihi lalonai, ena be idia utua au idia koua ia tubu lasi totona, to ena badina do ia noho. Unai hegeregerena, ena be Babulonia ena king be “nega 7” idia koua do ia tubu lasi totona, to ena “badina” do ia noho. Iena dagi, tanobada ena lohia badana ena dagi, be idia koua au ena badina bamona. Do ia noho ela bona nega 7 idia ore. Iehova ena kara dainai Nebukanesa ena dagi, Babulonia ena lohia badana ena dagi, be ta ese do ia abia lasi, ena be ena natuna mero Evila Merodaka ese reana ena gabuna ai lohia gaukara ia karaia.

¹⁴ Nebukanesa dekenai do ia vara gauna ia hahedinaraia herevana dainai, Daniela be mai gari lasi ida ia gwau: “Unai dainai, king e, lauegu sisiba herevana mani oi abia dae, oiemu kara dika do oi rakatania, bona kara maoromaoro do oi badinaia, bona ogogami taudia do oi bogahisihisi henidia. Unai dekena amo do oi hedinaraia oiemu kara dika oi rakatania. Unai neganai sedira Dirava ese oi do ia bogahisihisi henia, bona oiemu noho namo be ma do oi davaria lou.” (Daniela 4:27) Bema Nebukanesa ese dagedage bona hekokoroku dalana ia rakatania, reana unai dika be ia dekenai do ia vara lasi. Lagani handred rua bamona gunanai, Iehova ia gwau Asuria ena hanua badana, Nineva, ena taunimanima do ia hadikaia ore, to ena king bona taunimanima idia helalo-kerehai dainai unai ia karaia lasi. (Iona 3:​4, 10; Luka 11:32) To ia hekokoroku tauna Nebukanesa be edena bamona? Iena kara do ia haidaua, a?

NIHI ENA GUGURU NEGANA GINIGUNANA

¹⁵ Nebukanesa ia hekokoroku noho. Au nihina ia abia bena hua 12 murinai ena ruma ena guhi dekenai ia raka bona mai heagi ida ia gwau: “Babulonia badana be inai, lau ese lau haginia, lauegu siahu dekenai lau haginia, bona lauegu heagi totona ia gini.” (Daniela 4:​28-30) Nimiroda ese Babulonia (Babela) ia haginia, to Nebukanesa ese ia hahairaia. (Genese 10:​8-10) Iena toretore ta lalonai, ia heagi ia gwau: “Nebukanesa, Babulonia ena King, Esagila bona Ezida ia haginia lou tauna, Nabopolasa ena natuna tau be lau. . . . Esagila bona Babulonia ena magu lau hagoadadia bona egu lohia negana lau habadaia ela bona hanaihanai.” (George A. Barton, Archaeology and the Bible, 1949, rau 478-9) Toretore ma ta ia gwau dubu 20 bamona ia hanamoa eiava ia haginia lou. The World Book Encyclopedia ia gwau: “Nebukanesa ia lohia lalonai Babulonia be idaunegai tanobadana ena hanua bada hereana ta ai ia lao. Sibona ena toretore lalodiai, iena tuari karadia ia gwauraia momo lasi, to ena ruma haginia gaukarana bona Babulonia ena dirava idauidau ia laloa bada karana ia herevalaia. Toana be Nebukanesa ese Babulonia ena Uma Badana mai Hairaina ia haginia, idia gwau Idaunegai Tanobadana ena Hoa Gaudia Seven amo ia be ta.”

¹⁶ Ena be Nebukanesa ia hekokoroku noho bona ia heagi, to hemarai do ia davaria. Dirava ena lauma amo ia vara sivaraina ia gwau: “Unai hereva Nebukanesa ena uduna dekenai ia do gwauraia noho neganai, guba dekena amo hereva ta ia mai, ia gwau, ‘King Nebukanesa e, egu hereva be oi dekenai ia mai inai. Basileia be oi dekena amo ia kokia vadaeni. Taunimanima edia noho gabuna dekena amo do idia lulua lao oi, uda boroma danu do oi noho. Boromakau bamona, rei do oi ania ela bona lagani 7 [“nega 7,” NW ] idia ore. Unai bamona do oi noho ela bona oi diba Ataiai Momokani Diravana ese taunimanima edia basileia ia gunalaia noho, bona ia sibona ena ura hegeregerena, basileia edia biaguna ia abidia hidi.’ ”​—⁠Daniela 4:​31, 32.

¹⁷ Maoromaoro Nebukanesa ia kavakava ia lao. Taunimanima edia huana amo idia lulua, bona rei ia ania “boromakau bamona.” Rei gabunai uda boromadia ida ia noho neganai, ia be paradaiso bamona gabuna dekenai dina ta ta ai lai namona ia moalelaia lasi. Hari inai negai Iraq dekenai, Babulonia ena nadi momorudia idia noho gabuna ai, siahu negana ena siahu be ia daekau diba 50°C bamona, to keru negana ena keru be 0°C henunai ia diho. Nebukanesa be murimuriai ia noho bona ta ese ia naria lasi dainai, ena huina ia lata bona ena toana be ugava manu ena huina bamona bona ena kahau ia utua lasi dainai edia toana be manu ena kahau bamona. (Daniela 4:33) Unai ese ia hekokoroku tanobada ena lohia badana ia hahemaraia momokani!

¹⁸ Nebukanesa ena nihi lalonai, au badana idia utua bona ena badina be nega 7 idia koua ia tubu lasi totona. Unai hegeregerena, Iehova ese Nebukanesa be kavakava ai ia halaoa neganai, “iena terona dekena amo Dirava ese ia kokia.” (Daniela 5:20) Anina be king ena lalona be boromakau ena lalona ai ia halaoa. To, Dirava ese nega 7 lalonai Nebukanesa ena terona ia gimaia bena ia henia lou. Evila Merodaka ese unai nega lalonai gavamani ia biagua bona Daniela be ‘Babulonia tano ibounai ia naria bona ia be Babulonia ena aonega taudia ibounai edia tau badana.’ Iena Heberu bamodia toi ese unai distrik ena dagi bada gaukarana idia karaia noho. (Daniela 1:​11-19; 2:​48, 49; 3:30) Unai abia mauri taudia hani ese Nebukanesa do ia namo bona ia lohia lou negana idia naria, unai neganai do ia abia dae “Ataiai Momokani Dirava, be mai ena siahu taunimanima ibounai edia latanai, bona iena ura hegeregerena, basileia naria siahu ia henia taunimanima ta ta dekenai.”

NEBUKANESA IA LOHIA LOU

¹⁹ Nega 7 idia ore murinai Iehova ese Nebukanesa ena lalona ia hanamoa lou. Bena king ese Ataiai Momokani Diravana ia abia dae bona ia gwau: “Unai lagani 7 [“nega 7,” NW ] idia ore neganai lau, Nebukanesa, lauegu matana lau abia isi guba dekenai bona lauegu diba ia giroa mai lau dekenai. Ataiai Momokani Diravana lau hanamoa, bona ia noho hanaihanai Dirava dekenai lau tomadiho henia, bona lau matauraia danu. Iena basileia be noho hanaihanai basileiana, bona iena siahu be taunimanima ibounai edia latanai nega ibounai. Inai tanobada besedia ibounai, be gau ta lasi bamona Dirava ena vairanai. Guba ena aneru orea ibounai, be iena siahu henunai idia noho, bona tanobada taudia danu be unai bamona. Tau ta ese Dirava ena kara ia koua diba lasi, o inai bamona ia hereva henia diba lasi, ‘Oi be dahaka oi karaia?’ ” (Daniela 4:​34, 35) Oibe, Nebukanesa ia abia dae taunimanima edia basileia lalonai Ataiai Momokani Diravana be Lohia Tauna Badana.

²⁰ Nebukanesa ia lohia matamaia lou neganai, ia be hegeregere nihi auna ena badina ia koua auri idia kokia. Ia lohia lou karana ia herevalaia, ia gwau: “Unai nega lalonai lauegu aonega ia mai lou lau dekenai, bona lauegu basileia, mai ena siahu lau abia lou. Lauegu kaunsolo taudia bona lauegu basileia taudia idia giroa mai lau dekenai. Lauegu basileia ma idia haginia lou, bona siahu bada bona matauraia bada lau abia, guna bamona lasi.” (Daniela 4:36) Bema guna ena ofesa taudia haida ese unai kavakava king idia matauraia lasi, hari idia “giroa mai” bona ena siahu henunai idia noho.

²¹ Ataiai Momokani Diravana ese “hoa bona toa karadia” ia karaia momokani! Ita hoa lasi Babulonia ia lohiaia lou king ia gwau: “Lau inai Nebukanesa ese guba ena Lohiabada lau hanamoa, lau matauraia, bona lau tomadiho henia. Iena gaukara ibounai be momokani, iena dala ibounai be maoro, bona hekokoroku ena dala dekenai idia raka taudia be ia ese ia atoa diho diba.” (Daniela 4:​2, 37) To, ena be Nebukanesa ese unai dala ai Iehova ia hanamoa, ia be Iehova ia tomadiho henia Idau Bese tauna ta ai ia lao lasi.

HAMOMOKANIA GAUDIA IDIA NOHO, A?

²² Haida idia gwau Nebukanesa ena kavakava gorerena be lycanthropy gorerena bamona. Medikol diksenari ta ia gwau: “LYCANTHROPY . . . ia be [lyʹkos], lupus, uda sisia; [anʹthro·pos], homo, taunimanima amo ia mai. Unai ladana be gorere taudia haida dekenai idia henia, idia laloa idia be animal ai idia lao, bona idia ese animal ta ena gado regena eiava ena boiboi, ena toana eiava kara idia tohotohoa. Nega momo unai taudia idia laloa idia be uda sisia, sisia, eiava pusikasi ai idia lao; nega haida idia laloa idia be boromakau ai idia lao, Nebukanesa ia laloa bamona.” (Dictionnaire des sciences médicales, par une société de médicins et de chirurgiens, Paris, 1818, Volium 29, rau 246) Lycanthropy gorerena idia abia taudia be kava tauna Nebukanesa bamona. To, iena kavakava be Dirava ese ia havaraia dainai, ita gwau diba lasi ia be hari idia diba gorerena ta.

²³ Diba bada tauna John E. Goldingay ese Nebukanesa ena kavakava negana bona ia namo lou negana idia herevalaia gaudia haida ia gwauraia. Hegeregere, ia gwau: “Toretore ta ena kahana ta ai idia hahedinaraia Nebukanesa be mai ena kwara gorerena ta, bona reana iena gaukara ia karaia lasi bona Babulonia ia rakatania.” Goldingay ese toretore ta ladana “Babulonia Ena Iobu” ena hereva ia gwauraia bona ia hahedinaraia gaudia haida be “Dirava ia henia matahakani, gorere, idia hahemaraia, ia gari henia nihi ena anina ia tahua, au bamona idia hamorua, idia lulua murimuriai, rei ia ania, lalona ia haboioa, boromakau tau bamona ia noho, Marduk ese ia siaia medu lalonai ia paripari, kahau idia dika, huina ia tubu, auri amo idia guia, bena ia namo lou dainai dirava ia tanikiu henia.”

NEGA 7, MAI ANINA ITA DEKENAI

²⁴ Au badana ia hahedinaraia hegeregerena, Nebukanesa ese tanobada ena lohia siahuna ia laulaulaia. To mani oi laloatao, unai au ese ia laulaulaia lohia siahuna ese Babulonia ena king ena lohia siahuna ia hereaia momokani. Ia ese Iehova, “guba ena Lohiabada,” ena guba bona tanobada ibounai lohiaia siahuna tanobada dekenai ia laulaulaia. Babulonia taudia ese Ierusalema idia do hadikaia lasi neganai, unai hanua dekenai Davida bona iena natudia be “Lohiabada ena terona ena latanai” idia helai bona unai ese Dirava ena lohia siahuna tanobada dekenai ia laulaulaia. (1 Sivarai 29:23) Dirava ese lagani 607 B.C.E. ai Ierusalema hadikaia totona Nebukanesa ia gaukaralaia neganai, unai lohia siahuna ia utua bona auri amo ia koua. Heberu toretoredia gunadia hegeregerena “nega 7” lalonai, Davida ena bese tauna ta ese Dirava ena lohia siahuna tanobada dekenai ia hahedinaraia lasi. Unai nega 7 ena lata be edena bamona? Edena negai ia matamaia, bona dahaka ese ia hahedinaraia ia ore?

²⁵ Nebukanesa ia kavakava negana lalonai, “iena huina ia tubu lata, ugava manu huina bamona, bona iena kahau be manu edia kahau bamona.” (Daniela 4:33) Unai be dina 7 eiava pura 7 sibona lalonai ia vara diba lasi. Idia hahanaia Baibel haida idia gwau “nega 7,” bona ma haida idia gwau “idia gwauraia negadia” eiava “negadia.” (Daniela 4:​16, 23, 25, 32) Septuagint toretorena ta lalonai idia gwau “lagani 7.” Aposetolo edia negai Iuda taudia edia histori ia torea tauna Josephus ia laloa “nega 7” be “lagani 7.” (Antiquities of the Jews, Buka 10, Karoa 10, paragraf 6) Bona Heberu gado idia diba bada taudia haida idia laloa unai “nega” edia anina be “lagani.” An American Translation Baibel, Today’s English Version Baibel, bona James Moffat ese ia hahanaia Baibel lalonai idia gwau “lagani 7.”

²⁶ Toana be, Nebukanesa ena “nega 7” be lagani 7. Peroveta dalanai, lagani ta ena lata be dina 360 eiava hua 12 mai edia dina 30. (Apokalupo 12:​6, 14 itaia.) Unai dainai king dekenai “nega 7” ena lata be hegeregere dina 360 ita habadaia nega 7, eiava dina 2,520. To iena nihi ena guguru negana badana be edena bamona? Peroveta dalanai unai “nega 7” be dina 2,520 sibona lasi. Iesu ena hereva ese unai ia hahedinaraia, ia gwau: “Idau bese taudia ese aena dekenai Ierusalema do idia moia tao, ia lao bona unai idau bese edia nega do ia ore.” (Luka 21:24) Unai “moia” karana be lagani 607 B.C.E. ai, Ierusalema idia hadikaia bona Dirava ena basileia Iuda dekenai ia ore neganai ia matamaia. Unai moia karana be edena negai do ia ore? “Dirava ese gau ibounai do ia karaia matamata” neganai, unai nega ai Ierusalema ese ia laulaulaia Dirava ena Basileia ese Dirava ena lohia siahuna tanobada dekenai ia hahedinaraia lou.​—⁠Kara 3:⁠21.

²⁷ Bema lagani 607 B.C.E. ai Ierusalema idia hadikaia negana amo dina korikoridia 2,520 ita duahia, do ita davaria laganina be 600 B.C.E., bona Baibel lalonai unai lagani be anina bada lasi. Lagani 537 B.C.E. dekenai danu, idia ruhaia Iuda taudia be Iuda dekenai idia noho lou neganai, Iehova ena lohia siahuna be tanobada dekenai ia hedinarai lasi. Unai ia momokani, badina Serubabele, Davida ena terona ia abia diba tauna, be king ai idia halaoa lasi to Parasa ena provinsi Iuda ena gavana ai idia halaoa.

²⁸ Unai “nega 7” be peroveta laganidia dainai, Baibel ena taravatu ta, ‘dina ta be lagani ta,’ hegeregerena unai dina 2,520 ita laloa be namo. Unai taravatu be Babulonia taudia ese Ierusalema do idia koua hagegea karana ia perovetalaia herevana lalonai ia hedinarai. (Esekiela 4:​6, 7; mani Numera 14:34 itaia.) Unai dainai, Dirava ena Basileia ese Idau Bese taudia ia koua lasi bena tanobada idia biagua ena “nega 7” ena daudau be lagani 2,520. Lagani 607 B.C.E. ai, hua namba 7 (Tishri 15) ai Iuda bona Ierusalema idia hadikaia negana ai unai lagani idia matamaia. (2 King Taudia 25:​8, 9, 25, 26) Unai nega amo ela bona lagani 1 B.C.E., lagani iboudiai be 606. Idia do noho laganidia 1,914 be unai nega amo idia lao ela bona lagani 1914 C.E. Unai dainai, “nega 7,” eiava lagani 2,520, be Tishri 15, eiava October 4/5, 1914 C.E. ai idia ore.

²⁹ Unai lagani ai “idau bese taudia edia nega” idia ore, bona Dirava ese “hekokoroku lasi tauna”​—⁠Iesu Keriso​—⁠dekenai lohia siahuna ia henia, ia be guna ena inai taudia ese idia laloa maragi momokani dainai satauro dekenai idia hamasea. (Daniela 4:17) Iehova ese terona dekenai Mesia Pavapavana ia atoa totona ia sibona ena lohia siahuna ena “badina” idia koua auri bona kopa ia kokia. Ataiai Momokani Diravana ese dala ia kehoa “herahera matamata” be unai badina amo do ia tubu bona tanobada dekenai ena lohia siahuna ia hahedinaraia. Unai lohia siahuna be Davida ena Bese Tauna badana, Iesu Keriso, ese ia lohia guba Basileiana amo ia hahedinaraia. (Isaia 11:​1, 2; Iobu 14:​7-9; Esekiela 21:27) Ita ese unai mai anina bada gauna dainai bona au badana ena anina ia hahedinaraia dainai Iehova ita tanikiu henia bada!

DAHAKA OI DIBAIA?

• Nebukanesa ena nihi lalonai au badana ese dahaka ia laulaulaia?

• Au nihina ia guguru negana ginigunana lalonai dahaka ia vara Nebukanesa dekenai?

• Nebukanesa ena nihi ia guguru murinai, ia be dahaka ia gwau?

• Peroveta au nihina ena guguru negana badana lalonai, “nega 7” ena lata be edena bamona, bona edena negai ia matamaia bona edena negai ia ore?

[Study Questions]

 1. King Nebukanesa dekenai dahaka ia vara, bona unai ese dahaka henanadai ia havaraia?

2, 3. Babulonia ena king ia ura ena taunimanima ese dahaka idia abia, bona Ataiai Momokani Diravana be edena bamona ia laloa?

 4. Nebukanesa dekenai Iehova ena “hoa bona toa karadia” be edena bamona idia matamaia?

 5. Nebukanesa ese Daniela edena bamona ia laloa, bona dahaka dainai?

6, 7. Nebukanesa ese ena nihi lalonai ia itaia gaudia be edena bamona oi gwauraia diba?

 8. “Gima aneru” be daika?

 9. Gima aneru be dahaka ia gwau, bona edena henanadai idia vara?

10. (a) Baibel lalonai au ese dahaka idia laulaulaia diba? (b) Au badana ese dahaka ia laulaulaia?

11. Edena dala ai king ena nihi ese ia hahedinaraia iena mauri be do ia idau?

12. Nebukanesa dekenai dahaka do ia vara?

13. Au nihina ese ia hahedinaraia Nebukanesa ena dagi, tanobada ena lohia badana ena dagi, dekenai dahaka do ia vara?

14. Daniela ese Nebukanesa ia hagoadaia dahaka do ia karaia totona?

15. (a) Nebukanesa ese dahaka kara ia hahedinaraia noho? (b) Toretore gaudia ese Nebukanesa ena gaukara be edena bamona idia herevalaia?

16. Nebukanesa ese edena hemarai gauna do ia davaria?

17. Hekokoroku tauna Nebukanesa dekenai dahaka ia vara, bona nega daudau lasi murinai ena noho be edena bamona?

18. Nega 7 lalonai, dahaka ia vara Babulonia ena terona dekenai?

19. Iehova ese Nebukanesa ena lalona ia hanamoa lou neganai, Babulonia ena king ese dahaka ia abia dae?

20, 21. (a) Edena dala ai nihi auna ena badina ia koua aurina idia kokia karana be Nebukanesa dekenai ia vara? (b) Nebukanesa be dahaka ia gwau, bona unai dainai Iehova ia tomadiho henia tauna ta ai ia lao, a?

22. Haida idia gwau Nebukanesa ena kava gorerena be dahaka gorere bamona, to namona be ia kavakava ena badina dekenai dahaka ita lalo-parara?

23. Dahaka ese ia hamomokania nega ta Nebukanesa ia kavakava?

24. (a) Nihi auna badana ese dahaka ia laulaulaia? (b) Nega 7 lalonai dahaka idia koua, bona unai be edena dala ai ia guguru?

25, 26. (a) Nebukanesa dekenai “nega 7” ena lata be edena bamona, bona dahaka dainai unai bamona oi gwau? (b) “Nega 7” edia guguru negana badana be edena negai bona edena dala ai idia matamaia?

27. Dahaka dainai oi gwau diba lagani 607 B.C.E. ai idia matamaia “nega 7” be dina korikoridia 2,520 murinai idia ore lasi?

28. (a) Peroveta dalanai “nega 7” edia dina 2,520 be edena taravatu hegeregerena ita laloa be namo? (b) Peroveta dalanai “nega 7” edia lata be edena bamona, bona edena nega idia matamaia bona idia ore?

29. “Hekokoroku lasi tauna” be daika, bona Iehova ese terona dekenai ia atoa totona dahaka ia karaia?

[Full-page picture on page 83]

[Full-page picture on page 91]