Karoa 2

Daniela Bukana​—⁠Kota Dekenai Idia Tahua

MANI oi laloa oi be kota lalonai oi noho bona mai anina bada gauna ta do idia herevalaia. Tau ta idia samania, idia gwau ia koikoi. Loea tauna ta ia gwau unai tau be mai ena kerere. To, idia samania tauna be nega daudau lalonai ia kara maoromaoro. Reana oi ura iena maoro hamomokania herevana oi kamonai, ani?

² Baibel bukana Daniela be unai bamona ita laloa diba. Buka torea tauna be kara maoromaoro tauna. Iena ladana idia atoa bukana be lagani tausen momo lalonai idia matauraia. Unai buka ia hahedinaraia ia be histori sivaraina maorona, lagani 600 B.C.E. vairana bona murina laganidia lalonai ia noho Heberu peroveta tauna Daniela ese ia torea. Baibel ena nega duahia dalana maorona ese ia hahedinaraia unai buka ese ia sivarailaia negana be lagani 618 B.C.E. amo ela bona lagani 536 B.C.E., bona unai be ena torea ore laganina danu. To unai buka idia hepapahuahulaia. Ensaiklopidia idauidau bona buka ma haida idia hahedinaraia eiava idia gwau ia be koikoi.

³ Hegeregere, The New Encyclopædia Britannica ia gwau, gunaguna “momo idia abia dae [Daniela bukana be] histori sivaraina maorona, mai ena peroveta hereva momokanidia.” To, Britannica ia gwau, Daniela bukana be “hekwakwanai badana ia vara neganai​—⁠[Suria ena King] Antiochus Namba 4 Epiphanes ese Iuda taudia ia dagedage henia bada negana lalonai​—⁠tau ta ese ia torea.” Unai ensaiklopidia ia gwau ta ese lagani 167 ia lao 164 B.C.E. huanai unai buka ia torea. Unai ensaiklopidia tamona ia gwau Daniela bukana ia torea tauna ese vaira negana ia perovetalaia lasi, to “idia vara vadaeni gaudia be vaira negana ai do idia vara gaudia bamona ia gwauraia.”

⁴ Unai bamona lalohadai be edena bamona idia vara? Daniela bukana be hari sibona idia hepapahuahulaia lasi. Unai kara be aonega tauna Porphyry ese lagani 200 C.E. murinai ia hamatamaia. Roma Basileiana taudia momo hegeregerena, Keristani dalana ena siahu dainai ia gari. Ia ese buka 15 ia torea, unai tomadiho “matamata” ena siahu hadikaia totona. Buka namba 12 lalonai Daniela bukana ia hepapahuahulaia. Porphyry ia gwau unai buka be koikoi, Iuda tauna ta ese lagani 200 B.C.E. murinai ia torea. Lagani 1800 vairanai bona murinai, unai bamona idia gwauraia danu. Baibel tahua taudia (critics) bona diba taudia haida (rationalists) idia gwau, peroveta karana​—⁠vaira negana ai do idia vara gaudia gwauraia karana​—⁠be ta ia karaia diba lasi. Daniela idia herevalaia momo. Ia bona iena buka be kota dekenai idia tahua. Tahua taudia idia gwau gau momo ese idia hahedinaraia Iuda taudia be Babulonia ai idia noho lalonai Daniela ese unai buka ia torea lasi, to lagani handred momo murinai tau ma ta ese ia torea.a Unai bamona samania herevadia be momo dainai, toretore tauna ta ese ena maoro hamomokania bukana ia torea, ena ladana be Daniel in the Critics’ Den (Daniela, Tahua Taudia Edia Guri Lalonai).

⁵ Gau haida ese tahua taudia edia hereva idia hamomokania, a? Eiava unai gaudia ese Daniela bukana idia hamomokania, a? Inai henanadai be mai anina bada. Idia be mai anina bada unai idaunegai bukana ita laloa dalana dekenai sibona lasi to iseda vaira negana dekenai danu. Bema Daniela bukana be koikoi, ena gwauhamata taunimanima edia vaira negana totona be hereva kava sibona. To bema ena peroveta herevadia be momokani, reana edia anina ita dekenai oi ura dibaia. Unai ita laloa bona Daniela bukana hepapahuahulaia herevadia haida mani ita itaia.

⁶ Hegeregere, The Encyclopedia Americana ena samania herevana mani oi laloa, ia gwau Daniela bukana ese “nega gunadia edia histori sivaraina [hegeregere Iuda taudia be Babulonia dekenai idia noho sivaraina] ia mogea vaitani.” Unai be momokani, a? Namona be idia gwauraia kerere gaudia toi ita laloa, idia ta ta do ita laloa be namo.

IDIA GWAU KING TA IA NOHO LASI

⁷ Daniela ia gwau Babulonia idia hamorua neganai Belesasa, Nebukanesa ena “natuna,” ese Babulonia ia lohiaia. (Daniela 5:​1, 11, 18, 22, 30) Tahua taudia ese nega daudau unai idia hepapahuahulaia, badina Baibel sibona ese Belesasa ia herevalaia. To idaunegai histori torea taudia idia gwau Nabonido, Nebukanesa murinai ia lohia tauna, be Babulonia ena king ginigabena. Unai dainai, lagani 1850 ai, Ferdinand Hitzig ia gwau Belesasa be toretore tauna sibona ese ia laloa. To toana be Hitzig ia hereva haraga, ani? Inai oi laloa, unai nega idia herevalaia histori sivaraidia be momo lasi, unai dainai unai king idia gwauraia lasi ese ia hamomokania ia be guna ia noho lasi, a? Lagani 1854 ai, idaunegai Babulonia ena siti Uru, hari Iraq ena tano ai, raro gaudia maragidia haida idia geia. Unai gaudia be King Nabonido ena toretore bona idia ta be guriguri ta “Belesasa, lauegu vara guna natuna mero” totona. Tahua taudia ese inai idia dadaraia diba lasi: Unai be Daniela bukana ese ia herevalaia Belesasa.

⁸ To, tahua taudia idia moale lasi. Idia ta, ladana H. F. Talbot, ia gwau: “Unai ese gau ta ia hamomokania lasi.” Ia gwau unai toretore ese ia gwauraia natuna mero be reana natuna maragina sibona, to Daniela ia gwau ia be king, ia lohia noho. Talbot ena hereva idia halasia bena lagani tamona sibona murinai, toretore gaudia ma haida idia geia bona idia hahedinaraia Belesasa be mai ena toretore taudia bona ruma gaukara taudia. Ia be natuna maragina lasi! Gabeai, toretore ma haida ese unai idia hamomokania vaitani, badina idia gwau nega haida Nabonido be lagani haida lalonai Babulonia ia rakatania. Idia hahedinaraia danu, unai nega lalodiai ia ese ena vara guna natuna (Belesasa) dekenai Babulonia ena “king dagina ia henia.” Unai nega lalodiai, Belesasa be king​—⁠iena tamana ida ia lohia king ta.b

⁹ Tahua taudia haida idia do moale lasi bona idia maumau idia gwau, Baibel ia gwau lasi Belesasa be Nabonido ena natuna, to Nebukanesa ena natuna. Haida idia gwau Daniela ese Nabonido ia noho lalohadaina ta ia gwauraia lasi. To, ita tahua namonamo neganai unai hereva ruaosi idia moru. Toana be Nabonido ese Nebukanesa ena natuna kekeni ia adavaia. Unai dainai Belesasa be Nebukanesa ena tubuna. Heberu gado bona Aramia gado lalonai “tubuna tau” eiava “tubuna mero” gwauraia herevadia be lasi; ta “ena natuna” be reana “ena tubuna” eiava “ena tubudia ta.” (Mataio 1:1 itaia.) Danu, Baibel ena hereva dainai ita gwau diba Belesasa be Nabonido ena natuna. Belesasa be haba dekenai ia noho toretore hehunina dainai ia gari neganai, unai hereva edia anina ia gwauraia diba tauna dekenai basileia lalonai dagi ihatoina ia gwauhamatalaia. (Daniela 5:⁠7) Dahaka dainai iharuana lasi to ihatoina? Unai gwauhamata ese ia hahedinaraia ma haida ese dagi ginigunana bona iharuana idia abia vadaeni. Momokani, haida ese idia abia vadaeni​—⁠Nabonido bona ena natuna Belesasa ese.

¹⁰ Unai dainai Daniela ese Belesasa ia herevalaia ese ia hamomokania lasi histori sivaraina “ia mogea vaitani.” Lasi, Daniela​—⁠ena be Babulonia ena histori sivaraina ia torea lasi​—⁠ese Babulonia ena lohia taudia edia sivarai ia torea goevagoeva dainai idaunegai histori torea taudia, hegeregere Herodotus, Xenophon, bona Berossus, ia hereaia. Dahaka dainai Daniela ese idia reaia gaudia ia torea diba? Badina ia be Babulonia dekenai ia noho. Iena buka be idia vara gaudia ia itaia tauna ena toretore, lagani handred momo murinai koikoi tauna ena toretorena lasi.

MEDE TAUNA DARIUSE BE DAIKA?

¹¹ Daniela ia gwau Babulonia ia moru neganai, “Mede ena bese tauna ladana Dariuse” ese king dagina ia abia. (Daniela 5:31) Mede tauna Dariuse ena ladana be toretore gunadia eiava akioleji gaudia lalonai idia do davaria lasi. Unai dainai, The New Encyclopædia Britannica ia gwau unai Dariuse be “ta ena lalona dekenai sibona ia noho.”

¹² Diba bada taudia haida idia naria namonamo. Oibe, guna tahua taudia idia laloa Belesasa be tau “korikorina lasi” to idia kerere. Gabeai do idia davaria Dariuse danu idia laloa kerere. Toretore haida ese idia hahedinaraia vadaeni Parasa ena King Kurese ese Babulonia ia halusia murinai, maoromaoro dagi ladana “Babulonia Ena King” ia abia lasi. Tahua gaukara ia karaia tauna ta ia gwau: “Herevana daika ese dagi ladana ‘Babulonia Ena King’ ia abia, ia be Kurese henunai ia lohia king ta, ia be Kurese lasi.” Ita laloa diba Dariuse be Babulonia ia naria Mede tauna mai ena siahu bada ena lohia ladana, eiava dagi ladana, a? Haida idia gwau reana Dariuse be tau ta ladana Gubaru. Kurese ese Gubaru be Babulonia ena gavana ai ia halaoa, bona sivarai haida ese idia hamomokania mai ena siahu bada ida ia lohia. Toretore ta ia gwau ia ese Babulonia dekenai gavana taudia ma haida ia atoa. Bona Daniela ia gwau, Dariuse ese lohia taudia 120 ia abia hidi Babulonia basileia ai idia lohia totona.​—⁠Daniela 6:⁠1.

¹³ Reana gabeai, gau haida do ita davaria bena unai king do ita diba namonamo. Bona akioleji taudia ese hamomokania gauna ta idia do davaria lasi dainai Dariuse ita gwauraia tau “korikorina lasi” be badina namona lasi, bona Daniela bukana ibounai ita gwauraia koikoi be hegeregere lasi. To aonega dalana be Daniela ena toretore ita abia dae, ia be idia vara gaudia ia itaia tauna ena sivarai bona toretore ma haida ia hereaia.

IEHOIAKIMI ENA LOHIA NEGANA

¹⁴ Daniela 1:1 ia gwau: “Iehoiakimi be Iuda basileia ena king lagani ihatoina lalonai, Babulonia ena king Nebukanesa be Ierusalema dekenai ia lao, . . . [bena] idia koua hagegea.” Tahua taudia idia gwau unai siri be kerere, badina Ieremia ena hereva amo ia idau, ia gwau Iehoiakimi ena lagani namba 4 be Nebukanesa ena lagani ginigunana. (Ieremia 25:1; 46:⁠2) Daniela ese Ieremia ena hereva ia utua, a? Diba ma haida ita abia neganai, unai gauna ita laloa maoro diba. Lagani 628 B.C.E. ai, Farao Neko ese Iehoiakimi dekenai king dagina ia henia, to ia be unai Aigupito lohiana henunai ia lohia. Unai ia vara bena lagani toi bamona murinai, lagani 624 B.C.E. ai, Nebukanesa be ena tamana ena gabunai Babulonia ia lohiaia matamaia. Lagani haida murinai (lagani 620 B.C.E. ai), Nebukanesa be Iuda dekenai ia vareai bona Iehoiakimi be Babulonia henunai ia lohia noho king ai ia halaoa. (2 King Taudia 23:34; 24:⁠1) Babulonia dekenai ia noho Iuda tauna dekenai, Iehoiakimi ena “lagani ihatoina” be Babulonia henunai ia lohia negana ena lagani ihatoina. Daniela ese ena sivarai ia torea neganai unai ia laloa. To, Ieremia ese ena sivarai ia torea neganai, Ierusalema dekenai idia noho Iuda taudia ia laloa. Ia laloa hegeregerena Iehoiakimi ena lohia negana be Farao Neko ese ia dekenai king dagina ia henia laganina ai ia matamaia.

¹⁵ Vadaeni, unai idia gwauraia kerere gauna ese ia hamomokania Daniela be Babulonia dekenai idia noho Iuda taudia huanai ia noho bona ena buka ia torea. To unai Daniela bukana hepapahuahulaia hereva kererena ma ta ia noho danu. Mani oi laloatao, ia hedinarai goevagoeva Daniela bukana ia torea tauna dekenai Ieremia bukana ia noho bona ena hereva ia gwauraia danu. (Daniela 9:⁠2) Bema Daniela ia torea tauna be koikoi tauna mai ena aonega, tahua taudia idia gwauraia bamona, momokani idia matauraia bada tauna Ieremia ena hereva do ia hakoikoia​—⁠bona ena buka ena siri ginigunana dekenai, a? Lasi momokani!

KAHANA MARAGIDIA MAI ANINA BADA

¹⁶ Hari gau namodia haida ita laloa. Daniela bukana ena kahana maragidia haida mani oi laloa, idia hahedinaraia torea tauna ese ia herevalaia negana ia diba namonamo.

¹⁷ Daniela ese idaunegai Babulonia ena sivarai ena kahana maragidia danu ia diba, bona unai ese ena toretore ia hamomokania. Hegeregere, Daniela 3:​1-6 ia gwau Nebukanesa ese kaivakuku badana ta ia haginia, taunimanima iboudiai ese idia tomadiho henia totona. Akioleji taudia idia davaria gaudia ma haida idia hamomokania unai king ia ura bese abia isi bona tomadiho karadia lalonai ena taunimanima ia veria. Daniela ia hahedinaraia danu, Nebukanesa ese ia haginia gaudia momo dainai ia heagi. (Daniela 4:30) Vanegai laganidia sibona lalonai, akioleji taudia idia hamomokania Babulonia dekenai haginia gaukara badadia be Nebukanesa ena oda dainai idia karaia. Bona ia heagi​—⁠oibe, idia gaukaralaia biriki danu ese ena ladana idia hahedinaraia! Tahua taudia idia hahedinaraia diba lasi idia gwauraia toretore koikoi tauna, Maccabee taudia edia nega lalonai (167 ia lao 63 B.C.E.) ia noho, ese unai haginia gaukarana​—⁠iena nega amo lagani 400 gunanai idia karaia gauna bona akioleji taudia ese idia do davaria lasi gauna​—⁠be edena dala ai ia diba.

¹⁸ Daniela bukana ese Babulonia bona Mede-Parasa edia taravatu edia idau ia hahedinaraia danu. Hegeregere, Babulonia ena taravatu henunai Daniela ena bamodia toi be king ena oda idia badinaia lasi dainai lahi siahuna dekenai idia negea. Lagani momo murinai, Daniela ese iena lalona ena mamina ia hadikaia diba Parasa taravatuna ia badinaia lasi dainai, laiona edia guri dekenai idia negea. (Daniela 3:6; 6:​7-9) Haida idia gwau lahi siahuna sivaraina be gori sibona, to akioleji taudia ese idaunegai Babulonia revarevana ta idia davaria bona ia ese unai bamona panisi henia dalana ia gwauraia. To, Mede bona Parasa taudia idia laloa lahi be helaga. Unai dainai panisi henia daladia dikadia ma haida idia gaukaralaia. Unai hegeregerena, laiona edia guri be hoa gauna lasi.

¹⁹ Edia taravatu idia idau dalana ma ta ia hedinarai. Daniela ia hahedinaraia Nebukanesa ese sibona ena ura hegeregerena taravatu ia karaia bona ia haidaua diba. Dariuse ese gau ta ia karaia diba lasi ‘Mede bona Parasa taudia edia taravatu’ ia haidaua totona​—⁠herevana ia sibona ese unai taravatu ia karaia! (Daniela 2:​5, 6, 24, 46-49; 3:​10, 11, 29; 6:​12-16) Histori torea tauna John C. Whitcomb ia gwau: “Idaunegai histori sivaraina ese Babulonia bona Mede-Parasa edia idau ia hahedinaraia, Babulonia dekenai taravatu be king henunai, Mede-Parasa dekenai king be taravatu henunai.”

²⁰ Belesasa ena aria ena sivarai idauna, Daniela karoa 5 lalonai ia noho, ese kahana maragidia momo ia hahedinaraia. Toana be, unai aria idia matamaia lalonai mai edia moale ida idia aniani bona inuinu momo, badina nega momo uaina ia gwauraia. (Daniela 5:​1, 2, 4) Idia koroa laulau haida idia hahedinaraia unai bamona aria lalodiai uaina sibona idia henia. Vadaeni ia hedinarai, unai bamona aria lalodiai uaina be mai anina bada. Danu, Daniela ia hahedinaraia hahine be unai aria lalonai idia noho​—⁠king ena adavana bona ena hahine ma haida. (Daniela 5:​3, 23) Akioleji gaukarana ese unai Babulonia taudia edia kara ia hamomokania. Maccabee taudia edia nega lalonai, hahine be edia tatau ida aria lalodiai idia vareai be Iuda bona Greek taudia idia abia dae lasi karana. Reana unai dainai Greek Septuagint Baibel ginigunadia dekenai Daniela idia hahanaia neganai, unai hahine idia gwauraia lasi.c To bema idia gwau toretore koikoi tauna ese Daniela ia torea, ia be unai Helene (Greek) mauri dalana lalonai, reana Septuagint idia karaia laganidia lalonai, ia noho tauna!

²¹ Unai bamona kahana maragidia ita itaia dainai, Britannica ese Daniela buka torea tauna ia herevalaia ia gwau Babulonia ai idia noho negana dekenai iena diba be “sisina sibona bona maoro lasi” be idau momokani. Edena dala ai lagani handred momo murinai, toretore koikoi tauna ta ese idaunegai Babulonia bona Parasa taudia edia kara ia diba namonamo diba? Mani oi laloatao danu, nega daudau gunanai, lagani 200 B.C.E. ia do abia lasi neganai, unai basileia badadia ruaosi idia moru vadaeni. Unai nega lalonai akioleji taudia be lasi; bona unai negai Iuda taudia ese tano idauidau edia kara bona edia histori sivaraidia idia diba lasi. Peroveta tauna Daniela sibona, ia herevalaia negana bona idia vara gaudia ia itaia tauna, ese iena ladana idia atoa Baibel bukana ia torea diba.

TORETORE MA HAIDA ESE DANIELA BUKANA IDIA HAKOIKOIA, A?

²² Daniela bukana hepapahuahulaia herevana badana be iena gabu Heberu Revarevadia edia lista lalonai. Idaunegai rabi taudia ese Heberu Revarevadia bukadia be grup toi dekenai idia hegaegaelaia: Taravatu, Peroveta Taudia, bona Toretore. Idia ese Daniela be Peroveta Taudia lalonai lasi to Toretore lalonai idia atoa. Tahua taudia idia gwau, unai ena anina be peroveta taudia ma haida edia toretore idia haboua neganai Daniela bukana idia diba lasi. Idia gwau unai buka be Toretore huanai idia atoa badina gabeai idia haboua.

²³ To, Baibel idia tahua taudia haida be idaunegai rabi taudia ese unai dala ai Baibel bukadia edia lista idia karaia eiava Peroveta Taudia lalonai Daniela idia atoa lasi karana idia abia dae lasi. To bema rabi taudia ese Toretore lalonai Daniela idia atoa, unai ese ia hamomokania ta ese lagani gabena ta ai ia torea, a? Lasi. Idia matauraia bada diba taudia ese badina momo idia hahedinaraia, rabi taudia ese Peroveta Taudia ida Daniela idia haboua lasi totona. Hegeregere, reana idia karaia badina unai buka ese edia hemami ia hadikaia eiava idia laloa Daniela ese idau tano ena gavamani gaukarana ia karaia dainai ma peroveta taudia amo ia idau. Unai be herevana, to gau badana be inai: Idaunegai Iuda taudia ese Daniela bukana idia matauraia bona idia laloa ia be Baibel ena buka ta. Danu, gau haida ese idia hahedinaraia Heberu Revarevadia edia lista be idaunegai, lagani 200 B.C.E. ia do abia lasi neganai, idia karaia ore vadaeni. Gabeai idia torea buka ma haida, hegeregere lagani 200 B.C.E. murinai idia torea bukadia haida, be unai lista lalonai idia abia dae lasi.

²⁴ To, unai gabeai idia torea bona lista lalonai idia abia dae lasi bukadia ta be Daniela bukana hakoikoia totona idia gaukaralaia. Apokrifa bukana Ecclesiasticus be Jesus Ben Sirach ese lagani 180 B.C.E. bamona ai ia torea. Tahua taudia idia ura hahedinaraia unai buka ese kara maoromaoro taudia edia lista lalonai Daniela ia gwauraia lasi. Idia gwau unai negana ai Daniela idia diba lasi. Diba bada taudia momo ese unai lalohadai idia abia dae. To mani inai oi laloa: Unai lista ese Esera bona Morodekai (Babulonia dekenai idia noho negana murinai Iuda taudia idia laloa bada taudia) bona King namona Iehosapata ia gwauraia lasi. Hahemaoro taudia ibounai amo, Samuela sibona ia gwauraia.d Unai lista ia gwau lasi kara maoromaoro taudia iboudiai ia hahedinaraia, bona unai lista ia hahedinaraia bukana be Baibel bukana ta lasi, unai dainai ia maoro bema ita gwau ia gwauraia lasi taudia ibounai be taunimanima korikoridia lasi, a? Unai bamona lalohadai ita kirikirilaia diba.

TORETORE MA HAIDA ESE DANIELA IDIA HAMOMOKANIA

²⁵ Hari gau namodia ita herevalaia lou. Haida idia gwau Heberu Revarevadia edia buka idauidau amo Daniela bukana idia hamomokania goevagoeva. Haheitalai ta be inai: Iuda taudia edia histori torea tauna Josephus, momo idia diba tauna, ese Daniela ia hamomokania. Ia gwau Alesana Badana be lagani 400 B.C.E. murinai Parasa ia tuari henia neganai, Ierusalema dekenai ia lao bona unuseniai hahelaga taudia ese Daniela bukana idia hahedinaraia. Alesana ia laloa ia dekenai idia hahedinaraia Daniela ena peroveta herevadia ese iena tuari Parasa dekenai idia gwauraia.e Unai ia vara bena lagani 150 bamona murinai, tahua taudia idia gwauraia “toretore koikoina” ia vara. Momokani, tahua taudia ese Josephus ena toretore lalonai unai kahana idia hepapahuahulaia. Danu, ia idia hepapahuahulaia badina ia gwau Daniela bukana ena peroveta herevadia haida idia guguru. To, histori torea tauna Joseph D. Wilson ia gwau bamona, “reana [Josephus] ena diba unai gauna dekenai ese tanobada ena tahua taudia ibounai edia diba ia hanaia.”

²⁶ Israel dekenai, Qumran ena kohua haida lalonai Mase Davara Lokua Toretoredia idia davaria neganai, Daniela bukana idia hamomokania gaudia ma haida idia hedinarai. Ita hoa badina lagani 1952 ai idia davaria gaudia momo herea be Daniela bukana ena lokua toretoredia bona edia kahadia. Idia amo gunana gauna be lagani 100 B.C.E. ia kahirakahira lalonai idia torea. Unai dainai, unai nega lalonai, Daniela bukana be idia diba momo vadaeni bona idia laloa bada. The Zondervan Pictorial Encyclopedia of the Bible ia gwau: “Ta ese Maccabee taudia edia nega lalonai Daniela bukana ia torea lalohadaina be hari ita dadaraia be namo, badina nega be hegeregere lasi ta ese Daniela bukana ia torea bona ena kopi be Maccabee tomadiho oreana ta ena laiberi dekenai idia hedinarai.”

²⁷ To, ita abia dae diba gau gunana momokani ta ese Daniela bukana ia hamomokania danu. Daniela ena nega lalonai ia noho tauna ta be peroveta tauna Esekiela. Iuda taudia be Babulonia dekenai idia noho negana lalonai ia danu ese peroveta gaukara ia karaia. Nega momo, Esekiela bukana ese Daniela ena ladana ia gwauraia. (Esekiela 14:​14, 20; 28:⁠3) Unai hereva idia hahedinaraia lagani 600 B.C.E. murinai, Daniela ena nega lalonai, taunimanima idia diba vadaeni Daniela be kara maoromaoro bona aonega tauna, Dirava gari henia taudia Noa bona Iobu ida idia gwauraia diba tauna.

DANIELA IA HAMOMOKANIA TAUNA BADANA

²⁸ Dokonai namona be Daniela ia hamomokania tauna badana ita laloa​—⁠Iesu Keriso unai. Iesu ese dina gabedia ia herevalaia neganai, “peroveta tauna Daniela” bona Daniela ena peroveta herevana ta ia gwauraia.​—⁠Mataio 24:15; Daniela 11:31; 12:⁠11.

²⁹ Vadaeni, bema tahua taudia edia Maccabee lalohadaina ia maoro, inai gau rua amo ta be ia momokani. Iesu ese koikoi herevana ia abia dae eiava Mataio ia torea herevana be Iesu ese ia gwauraia lasi. Unai gau ruaosi ita abia dae diba lasi. Bema Mataio ena Evanelia sivaraina ita abidadama henia diba lasi, edena bamona Baibel orena ita abidadama henia diba? Bema unai hereva ita kokia, gabeai dahaka hereva ma haida be Buka Helaga amo do ita kokia? Aposetolo Paulo ia gwau: “Buka Helaga ibounai be Dirava ena lauma amo ia vara bona ia be mai ena namo hadibaia totona, . . . gau idauidau hamaoromaoroa totona.” (2 Timoteo 3:​16, NW ) Unai dainai bema Daniela be koikoi tauna, Paulo be koikoi tauna ma ta! Iesu ese koikoi herevana ia abia dae diba, a? Lasi. Daniela ese ena buka ia torea neganai, Iesu be guba dekenai ia noho. Iesu be ia gwau: “Aberahamo do ia vara lasi, lau be lau noho.” (Ioane 8:58) Daniela hamomokania gaudia ita diba totona taunimanima iboudiai amo Iesu ita nanadaia be namo. To ita henanadai be anina lasi. Ita itaia vadaeni, iena hereva ese Daniela ia hamomokania goevagoeva.

³⁰ Iesu ia bapatiso neganai, Daniela bukana ia hamomokania danu. Unai nega ai, ia be Mesia ai ia lao, unai amo ia ese Daniela ena peroveta herevana, lagani edia pura 69 peroveta herevana, ia hagugurua. (Daniela 9:​25, 26; inai buka ena Karoa 11 itaia.) Ena be lagani gabena ta ai ta ese Daniela bukana ia torea be momokani, to Daniela bukana ia torea tauna be lagani 200 murinai do idia vara gaudia ia diba guna. To ita diba, Dirava ese ena lauma amo koikoi tauna ia hakaua lasi ladana koikoi ai peroveta herevadia momokanidia ia torea totona. Lasi, Dirava badinaia taudia ese mai edia kudouna ibounai ida Iesu ena hereva idia abia dae. Herevana, bema tanobada ena diba bada taudia ibounai, tahua taudia ibounai, ese Daniela idia gwauraia dika, Iesu ena hereva ese idia edia hereva do ia hakoikoia, badina ia be “hereva momokani tauna, bona Dirava ena hereva ia gwauraia maoromaoro tauna.”​—⁠Apokalupo 3:⁠14.

³¹ Baibel tahua taudia momo dekenai unai hereva danu be hegeregere lasi. Ta ese unai gaudia ia laloa namonamo murinai, ia diba herevana hamomokania herevadia be hida, to idia hegeregere lasi unai taudia dekenai. Oxford University ena profesa ta ia gwau: “Samania herevadia haerelaia karana amo ita kwalimu diba lasi, bema lalohadai ginigunana, ‘peroveta herevadia be hoa dalanai idia vara diba lasi,’ idia do dogoatao noho.” Unai dainai edia lalohadai kererena ese edia matana ia hakepulua. To unai be idia abia hidi gauna​—⁠bona unai dainai gau namona idia reaia.

³² Oi be edena bamona? Bema oi itaia Daniela bukana oi daradaralaia be mai badina lasi, oi be oi hegaegae vadaeni gau namodia momo do oi dibaia totona. Do oi davaria Daniela ena sivarai herevadia bona ena peroveta herevadia ese oiemu lalona idia veria. To unai ia hereaia gauna be do oi itaia karoa ta ta iboudiai ese oiemu abidadama idia hagoadaia. Daniela ena peroveta herevana oi laloa namonamo karana be do oi lalohisihisilaia lasi!

[Footnotes]

DAHAKA OI DIBAIA?

• Daniela bukana be edena bamona idia hepapahuahulaia?

• Dahaka dainai tahua taudia ese Daniela bukana idia hepapahuahulaia herevadia be idia maoro lasi?

• Dahaka gaudia ese Daniela ena sivarai idia hamomokania?

• Dahaka ese Daniela bukana ia hamomokania goevagoeva?

[Study Questions]

1, 2. Daniela bukana be edena bamona idia hepapahuahulaia, bona dahaka dainai oi laloa ena maoro hamomokania herevana ita laloa be namo?

 3. The New Encyclopædia Britannica ese edena dala ai Daniela bukana ia hakoikoia?

 4. Edena nega amo Daniela bukana idia hepapahuahulaia, bona gabeai dahaka ese unai kara ia habadaia?

 5. Dahaka dainai Daniela bukana be momokani eiava koikoi ita diba be mai anina bada?

 6. Nega haida Daniela ena histori sivaraina be edena bamona idia gwauraia?

 7. (a) Daniela ese Belesasa ia herevalaia be Baibel tahua taudia ese nega daudau lalonai idia moalelaia ena badina be dahaka? (b) Belesasa be tau korikorina ta lasi lalohadaina dekenai dahaka ia vara?

 8. Daniela ena hereva, Belesasa be ia lohia king ta, be edena bamona idia hamomokania?

 9. (a) Daniela ia gwau Belesasa be Nebukanesa ena natuna neganai, reana ena anina be dahaka? (b) Tahua taudia idia gwau Daniela ese Nabonido ia noho lalohadaina ta ia gwauraia lasi, to dahaka dainai idia kerere?

10. Dahaka dainai Daniela ese Babulonia ena lohia taudia edia sivarai ia torea goevagoeva diba to idaunegai histori torea taudia edia sivarai be unai bamona lasi?

11. Daniela ena hereva hegeregerena Mede tauna Dariuse be daika, to edena bamona idia gwauraia?

12. (a) Dahaka dainai namona be tahua taudia idia gwau lasi Mede tauna Dariuse be guna ia noho lasi? (b) Reana Mede tauna Dariuse be daika, bona dahaka ese unai ia hahedinaraia?

13. Daniela bukana ese Mede tauna Dariuse ia gwauraia to toretore ma haida ese idia gwauraia lasi ena badina namona be dahaka?

14. Dahaka dainai Daniela bona Ieremia edia hereva King Iehoiakimi ena lohia negana dekenai idia idau lasi?

15. Dahaka dainai Daniela 1:1 ia gwauraia negana idia hepapahuahulaia be mai ena badina namona lasi?

16, 17. Edena dala ai akioleji taudia idia davaria gaudia ese idia hahedinaraia Daniela ena sivarai hegeregerena (a) Nebukanesa be kaivakuku ia haginia ena taunimanima ese idia tomadiho henia totona? (b) Nebukanesa be Babulonia dekenai ia karaia haginia gaukarana dainai ia heagi?

18. Daniela ese Babulonia bona Parasa edia siahu henunai idia gaukaralaia panisi henia daladia idaudia ia gwauraia neganai, edena dala ai ia hedinarai ena sivarai be maoro?

19. Daniela bukana ia hahedinaraia goevagoeva Babulonia bona Mede-Parasa edia taravatu be edena dala ai idia idau?

20. Belesasa ena aria ena sivarai lalonai edena kahana maragidia ese idia hahedinaraia Daniela be Babulonia taudia edia kara ia diba namonamo?

21. Daniela ese Babulonia dekenai idia noho negana bona edia kara ia diba namonamo ena badina namona be dahaka?

22. Heberu Revarevadia edia lista lalonai Daniela bukana ia noho gabuna dainai, tahua taudia be dahaka idia gwau?

23. Idaunegai Iuda taudia be edena dala ai Daniela bukana idia laloa, bona edena bamona unai ita diba?

24. Edena dala ai apokrifa bukana Ecclesiasticus idia gaukaralaia Daniela bukana hakoikoia totona, bona dahaka ese ia hahedinaraia unai lalohadai be maoro lasi?

25. (a) Edena dala ai Josephus ese Daniela ena toretore ia hamomokania? (b) Edena dala ai Josephus ese Alesana Badana bona Daniela bukana ia gwauraia herevana be histori ida ia hegeregere? (Futnout iharuana itaia.) (c) Edena dala ai Daniela ia gaukaralaia gado ese ena buka ia hamomokania? (Rau 26 itaia.)

26. Edena dala ai Mase Davara Lokua Toretoredia ese Daniela bukana idia hamomokania?

27. Dahaka gau gunana momokani ese ia hamomokania Iuda taudia be Babulonia dekenai idia noho negana lalonai Daniela be idia diba namonamo tauna?

28, 29. (a) Dahaka ese Daniela bukana ia hamomokania goevagoeva? (b) Dahaka dainai Iesu ena hamomokania herevana ita abia dae be maoro?

30. Edena dala ai Iesu ese Daniela bukana ia hamomokania?

31. Dahaka dainai Baibel tahua taudia momo ese Daniela bukana idia do abia dae lasi?

32. Daniela bukana ita stadilaia neganai dahaka do ita davaria?

[Box on page 26]

Ia Gaukaralaia Gado

DANIELA ese 536 B.C.E. bamona ai ena buka ia torea ore. Heberu bona Aramia gado ai ia torea, bona Greek bona Parasa herevadia haida danu. Baibel lalonai nega haida gado be unai bamona idia gaukaralaia hebou. Baibel buka Esera danu be Heberu bona Aramia ai ia torea. To, tahua taudia haida idia gwau Daniela bukana ia torea tauna ena gado gaukaralaia dalana ese ia hamomokania 536 B.C.E. ai lasi, to lagani gabena ta ai ia torea. Unai taudia ta ena hereva idia torea hanai momo, ia gwau Daniela lalonai Greek herevadia idia noho dainai unai lagani gabena do ita abia dae. Ia gwau unai bamona lagani gabena​—⁠reana 200 B.C.E. murina laganina ta​—⁠ita abia dae be Heberu gado ese ia durua bona Aramia gado ese ia koua lasi.

To, gado tahua taudia ibounai ese unai idia abia dae lasi. Diba taudia haida idia gwau Daniela ena Heberu gado be Esekiela bona Esera edia bamona bona gabeai idia torea Ecclesiasticus bamona apokrifa toretoredia edia gado amo ia idau. Mase Davara Lokua Toretoredia huanai idia davaria toretore rua ai, Daniela ena Aramia torea dalana oi itaia. Idia danu be Aramia gado ai 200 B.C.E. murinai idia torea​—⁠unai be idia gwauraia Daniela bukana koikoina be ta ese ia torea bena daudau lasi murinai. To diba bada taudia idia gwau unai toretore edia Aramia gado bona Daniela ena be idau momokani. Unai dainai, haida idia gwau Daniela bukana be tahua taudia idia gwauraia negana ai lasi, to lagani handred momo gunanai ta ese ia torea.

Daniela ena Greek hereva “mai edia hekwakwanai” be edena bamona? Idia davaria unai hereva haida be Parasa herevadia, Greek herevadia lasi! Idia do gwauraia Greek herevadia be miusiki gadaralaia gaudia toi edia ladadia. Unai hereva toi idia noho dainai do ita abia dae ta ese lagani gabena ta ai Daniela bukana ia torea, a? Lasi. Akioleji taudia idia davaria Greece be tanobada ena basileia badana ai ia do lao lasi neganai, lagani handred momo lalonai Greek mauri dalana be mai ena siahu vadaeni. Danu, bema ta ese 200 B.C.E. murinai, Greek mauri dalana bona gado be mai ena siahu bada negana ai, Daniela bukana ia torea, ia lalonai Greek herevadia toi sibona idia noho, a? Reana lasi. Reana ia be mai ena Greek herevadia momo. Unai dainai Daniela bukana ena gado danu ese unai buka idia hamomokania.

[Full-page picture on page 12]

[Pictures on page 20]

(Ataiai) Nebukanesa ese ena haginia gaukarana ia heagilaia herevana be inai toretore lalonai ia noho

(Henunai) Babulonia ena dubu ta ena toretore ta ese King Nabonido bona ena natuna mero Belesasa edia ladadia ia gwauraia

[Picture on page 21]

Nabonido ena Sivarai hegeregerena, Kurese ena ami taudia be Babulonia lalonai idia vareai ena be idia tuari lasi

[Pictures on page 22]

(Idibana kahanai) “Nabonido Ena Sivarai” ia hahedinaraia Nabonido ese ena vara guna natuna dekenai lohia siahuna ia henia

(Laurina kahanai) Iuda dekenai Nebukanesa ia vareai sivaraina, Babulonia taudia edia toretore lalonai