Karoa 7

Tanobada Idia Haidaua Hereva Hani

IDIA be haba dekenai idia torea hereva kwadogidia hani. To, unai hereva hani ese siahu bada lohia tauna idia hagaria bada. Idia hahedinaraia king rua ese edia dagi do idia halusia, idia ta be do ia mase, bona tanobada ena basileia badana be do ia ore. Unai hereva dainai momo idia laloa bada tomadiho oreana be hemarai ia abia. To gau badana be Iehova tomadiho henia dalana goevana bona ena lohia siahuna idia laloa bada lasi negana lalonai, unai hereva ese unai gaudia idia abia isi. Danu, unai hereva dainai hari inai negai tanobada lalonai idia vara gaudia ita lalo-pararalaia diba! Hereva hani ese unai ibounai be edena bamona idia karaia diba? Mani ita itaia.

² Daniela karoa 4 ese ia gwauraia gaudia idia vara murinai, lagani momo herea idia ore vadaeni. Hekokoroku King Nebukanesa be lagani 582 B.C.E. ai ia mase neganai, ena lagani 43 lohia negana Babulonia dekenai ia ore. Iena bese amo lohia taudia haida idia toreisi, to idia do matamata neganai idia mase eiava idia hamasedia dainai idia ta ta edia lohia negadia idia ore. Dokonai, tau ladana Nabonido ese dagedage karana amo lohia siahuna ia abia. Nabonido be hua diravana Sin ena hahelaga hahine badana ena natuna mero, ia be Babulonia ena lohia besena amo lasi. Diba taudia haida idia gwau ia ese ena lohia siahuna ia hamomokania totona Nebukanesa ena natuna kekeni ia adavaia, edia natuna mero Belesasa be ia ida ia lohia tauna ai ia halaoa, bona ia loaloa negadia ai Babulonia naria maduna be Belesasa dekenai ia henia. Unai ena anina be Belesasa be Nebukanesa ena tubuna mero. Ena tubuna tau ena mauri lalonai idia vara gaudia amo ia diba Iehova be Ataiai Momokani Diravana, bona king iboudiai ia hahemaraia diba, a? Reana lasi!​—⁠Daniela 4:⁠37.

ARIA IDIA NARIA NAMONAMO LASI

³ Daniela karoa 5 ia matamaia neganai, aria ta idia karaia noho. “King Belesasa ese aria badana ta ia karaia, bona iena lohia taudia 1000 ia boiria, vadaeni uaina idia inua hebou.” (Daniela 5:⁠1) Oi laloa diba, unai taudia ibounai, king ena adavadia bona iena hahine ma haida danu, idia vareai diba totona aria be daiutu badana dekenai idia karaia. Diba bada tauna ta ia gwau: “Babulonia taudia edia aria edia toana be namo herea, to dokonai iboudiai idia inuinu kekero. Aniani patana be tano idaudia amo idia mailaia uaina bona davana bada gaudia ma haida amo ia honu. Bonana namona ese unai daiutu badana ia hahonua; ane abia taudia bona miusiki idia karaia taudia ese vadivadi taudia idia hamoalea.” Ruma biaguna Belesasa be iboudiai ese idia itaia diba gabuna dekenai ia helai bona ena uaina ia inua​—⁠bona ia inua noho.

⁴ Babulonia taudia ese October 5/6, 539 B.C.E. ena hanuaboi lalonai, aria idia karaia be hoa gauna. Edia bese be tuari lalonai ia noho, bona tuari ia heau namonamo lasi. Vanegai sibona Mede-Parasa taudia ese Nabonido idia halusia bona ia be Babulonia amo sautwest kahanai ia noho Borsippa dekenai ia heau mauri. Bona hari Kurese ena tuari taudia ese Babulonia murimuriai edia kamepa idia atoa. To, toana be Belesasa bona ena lohia taudia idia laloa momo lasi. Oibe, idia laloa edia hanua Babulonia be ta ese ia halusia diba lasi! Iena magu badadia be koupa dobudia badinai idia gini bona unai koupa be hanua lalonai ia aru lao Euperate Sinavaina ena ranu amo idia honu. Idia lao laganidia handred lalonai edia inai taudia ese Babulonia idia abia lasi. Unai dainai idia laloa momo be anina lasi, ani? Reana Belesasa ia laloa edia aria ena regena be murimuriai idia noho inai taudia dekenai do ia hahedinaraia Babulonia taudia idia gari lasi, bona do idia lalo-manoka.

⁵ Daudau lasi murinai, Belesasa ia kekero momokani. Aonega Herevadia 20:1 ena hereva hegeregerena, ‘uaina ese kerere ia havaraia.’ Hari, king be uaina amo ia kekero dainai kerere badana ia karaia. Oda ia henia Iehova ena dubu ena kapusi helagadia be aria dekenai do idia mailaia. Unai kapusi, Nebukanesa ese Ierusalema ia halusia neganai idia abia mai kapusi, be tomadiho goevana sibona lalonai idia gaukaralaia be maoro. Gunaguna Ierusalema ena dubu dekenai unai kapusi idia gaukaralaia totona gwaumaoro idia abia Iuda hahelaga taudia danu idia sisiba henidia do idia goeva be namo.​—⁠Daniela 5:2; mani Isaia 52:11 itaia.

⁶ To, Belesasa ese hemataurai lasi karana ma ta ia palanilaia. “Uaina idia inua noho neganai, edia dirava, golo bona siliva bona auri labora bona auri bona au bona nadi dekenai idia karaia gaudia idia hanamoa noho.” (Daniela 5:​3, 4) Belesasa ia ura ena dirava koikoidia be Iehova ataiai ia abia isi! Toana be unai be Babulonia taudia edia lalohadai korikorina. Idia abia mauri Iuda taudia idia laloa maragi, edia tomadiho idia kirikirilaia bona idia ura henia tanona dekenai idia giroa lou dalana ta idia kehoa lasi. (Salamo 137:​1-3; Isaia 14:​16, 17) Reana ia kekero king ia laloa unai abia mauri taudia ia hahemaraia bona edia Dirava ia hadikaia karana ese iena hahine taudia bona ofesa taudia edia lalona ia veria bona do idia laloa ena siahu be bada momokani.a To bema Belesasa ena siahu ese ia dekenai moale ena mamina ia henia, ia be noho daudau gauna lasi.

HABA DEKENAI IA NOHO TORETORE

⁷ Dirava ena lauma amo ia vara herevana ia gwau: “Unai neganai tau ta ena imana kwakikwaki idia hedinaraia haraga, bona ruma ena haba [“haba ena semenisi,” NW ] dekenai revareva idia torea. Unai gabu dekenai ruma ena lamepa ena diari be bada, vadaeni unai imana bona toretore be Belesasa ese ia itaia namonamo.” (Daniela 5:⁠5) Unai be gau idauna ta! Imana ta ataiai ia hedinarai kava, haba ena kahana ta ai lamepa ese ia hadiaria namonamo gabuna kahirakahira ia noho. Mani oi laloa, rege ta be lasi bona vadivadi taudia ese unai imana sibona idia raraia. Imana ese semenisi dekenai idia lalo-pararalaia diba lasi herevana ia torea matamaia.b Unai be gari havaraia gauna, idia laloaboio diba lasi gauna, unai dainai ema bona hari taunimanima momo ese kahirakahira dika do ia vara idia herevalaia neganai, idia gwau “haba dekenai toretore ia noho.”

⁸ Unai hekokoroku king, ia bona ena dirava be Iehova ataiai ia abia isi toho tauna, dekenai dahaka ia vara? “Ia itaia neganai, iena vairana ena toana be ia idau, labora bamona ia lao, bona ia gari dainai iena aena idia mareremarere.” (Daniela 5:⁠6) Belesasa ia ura ia lohiaia taudia vairanai ena siahu ia hahedinaraia. To, ia be gari bada ena toana ia hahedinaraia​—⁠iena vairana ia labora, iena tauanina ibounai ia heudeheude bada dainai ena aena idia mareremarere. Davida ese ane amo Iehova dekenai ia gwauraia herevana ia momokani, ia gwau: “Manau taudia be oi ese oi hamauria, to hekokoroku taudia be oi ese oi itaia noho, do oi hamorua totona.”​—⁠2 Samuela 22:​1, 28; mani Aonega Herevadia 18:12 itaia.

⁹ Namona be ita lalo-parara Belesasa ena gari be idau bona Dirava gari henia karana, Iehova matauraia bada karana bona “aonega ena hamatamaia dalana,” ia idau. (Aonega Herevadia 9:10) Lasi, Belesasa ena gari be dika momokani, bona unai heudeheude king dekenai aonega ia havaraia lasi.c Ia hadikaia Diravana ese ena dika do ia gwauatao totona ia noinoi lasi, to ia boiboi badabada “meamea taudia, bona aonega taudia, bona hoa karaia taudia do idia mailaia.” Ma ia gwau: “Inai toretore duahia diba bona ena anina ia gwauraia diba tauna be dabua kakakakana do ia karaia, bona iena aiona dekenai golo seini do lau atoa, bona inai basileia ena dagi namba 3 do lau henia.” (Daniela 5:⁠7) Basileia ena dagi ihatoina be dagi badana momokani, idia lohia king rua, Nabonido bona Belesasa, sibona edia dagi ese unai idia hereaia. Hanaihanai unai bamona dagi be hegeregere Belesasa ena vara guna natuna mero dekenai idia henia. Unai ese ia hahedinaraia king ia ura dikadika unai hoa herevana ena anina ia diba!

¹⁰ Aonega taudia be unai daiutu badana dekenai idia mai. Idia be haida sibona lasi, badina tomadiho koikoi bona dubu momo ese Babulonia idia hahonua. Idia gwau vaira gaudia idia diba bona hehuni herevadia edia anina idia gwauraia taudia be momo. Unai aonega taudia be idia dekenai ia kehoa dalana dainai idia moale bada. Oibe, dala ia kehoa edia kara be siahu bada taudia vairanai do idia hahedinaraia bona king ena lalo-namo bona siahu bada dagina ta do idia abia. To idia kwalimu lasi! “Unai toretore bona iena anina be idia hamaoroa diba lasi.”d​—⁠Daniela 5:⁠8.

¹¹ Ita diba lasi bema Babulonia ena aonega taudia ese unai toretore​—⁠ena leta ta ta​—⁠idia duahia be hegeregere lasi. Bema unai bamona, unai kara gageva taudia ese ena anina koikoina idia gwauraia kava diba, reana king ia hanamoa herevana ta idia gwauraia diba. To reana unai leta ta ta idia duahia diba. Aramia bona Heberu gadodia idia torea neganai vaol letadia (a, e, i, o, u) idia torea lasi dainai, reana hereva ta ta edia anina be idauidau. Bema unai bamona, reana unai aonega taudia idia daradara edena hereva idia abia hidi be maoro. Bona ena be unai idia karaia diba, to edia anina idia gwauraia totona reana edia lalo-parara be hegeregere lasi. Herevana dahaka, to inai be momokani: Babulonia ena aonega taudia idia kwalimu lasi​—⁠idia moru momokani!

¹² Unai dala ai ia hedinarai goevagoeva unai aonega taudia be koikoi taudia bona edia tomadiho oreana, momo idia laloa bada oreana, be koikoi gauna. Idia ese lalohisihisi bada idia havaraia! Belesasa ese unai tomadiho taudia ia abidadama henia kava ia itaia neganai, ia gari dikadika, iena vairana ena kopina ia idau momokani, bona ena lohia taudia danu idia “daradara bada herea.”e​—⁠Daniela 5:⁠9.

LALO-PARARA TAUNA IDIA BOIRIA

¹³ Unai neganai, kwini​—⁠reana king ena sinana​—⁠be aria daiutuna badana dekenai ia vareai. Aria lalonai ia vara regena ia kamonai, bona ia diba tau ta ese haba dekenai ia noho toretore ena anina ia gwauraia diba. Lagani momo gunanai kwini ena tamana, Nebukanesa, ese Daniela be iena aonega taudia ibounai edia lohia ai ia halaoa. Kwini ia laloatao unai tau “ena aonega be idau.” Toana be Belesasa be Daniela ia diba lasi dainai, reana Nebukanesa ia mase murinai unai peroveta tauna ese gavamani lalonai ena dagi badana ia haboioa. To Daniela ese dagi ia laloa bada lasi. Unai nega ai iena mauri lagani be 90 ia hanaia, bona mai kamonai ida Iehova ia do hesiai henia noho. Ena be Babulonia dekenai ia idia abia mauri negana amo lagani 80 bamona idia lao vadaeni, iena Heberu ladana idia do diba. Kwini danu ese guna ia abia Babulonia ladana lasi, to iena ladana Daniela ia gaukaralaia. Oibe, king ia hamaoroa: “Inai Daniela ese inai hereva ena anina oi dekenai do ia hamaoroa.”​—⁠Daniela 1:7; 5:​10-12.

¹⁴ Daniela idia boiria bena Belesasa vairanai ia gini. King be reana ia hemarai, badina ena Dirava ia hadikaia Iuda tauna ta hari ia noia ia do ia durua totona. To, Belesasa ese Daniela ia hanamoa koikoi toho, bona ia gwau ia gwauhamatalaia vadaeni davana​—⁠basileia ena dagi ihatoina​—⁠be ia dekenai do ia henia, bema unai hehuni herevadia ia duahia bona edia anina ia gwauraia. (Daniela 5:​13-16) Daniela ese ena matana ia abia isi, haba dekenai ia noho toretore ia raraia, bona lauma helaga ese ia durua ena anina ia lalo-pararalaia totona. Ia be dika ta ena hadibaia hereva Iehova Dirava amo! Daniela ese unai hekokoroku king ena vairanai​—⁠bona ena adavadia bona lohia taudia edia vairanai​—⁠hahemaoro hereva aukana be edena bamona do ia gwauraia diba? Daniela ena hemami mani oi laloa! King ena hanamoa herevadia bona kohu bona dagi gwauhamatana ese Daniela ena lalona ia veria, a? Unai peroveta tauna ese Iehova ena hereva do ia hamanokaia, a?

¹⁵ Daniela be mai gari lasi ida ia hereva, ia gwau: “Oiemu harihari gaudia be lau ura lasi, idau tauna ta dekenai oi henia. To inai toretore do lau duahia, bona inai hereva ena anina do lau hedinaraia oi dekenai.” (Daniela 5:17) Unai murinai, Daniela ese Nebukanesa ena siahu bada ia herevalaia, ia be siahu bada king dainai ia ura hegeregerena ta ia alaia, botaia, abia isi, o hahemaraia diba. To, Daniela ese Belesasa ia hadibaia, “Ataiai Momokani Dirava,” Iehova, dainai Nebukanesa ena siahu ia bada. Bona unai siahu bada king ia hekokoroku neganai, Iehova ese ia hahemaraia. Oibe, Nebukanesa ia matahakani henia bena ia diba “Siahu Ibounai Dirava ese basileia ibounai ia biagudia, bona ia ura henia tauna dekenai king ena dagi ia henia.”​—⁠Daniela 5:​18-21.

¹⁶ Belesasa be ‘unai ibounai ia diba.’ To unai sivarai amo gau ta ia dibaia lasi. Oibe, ia ese Nebukanesa ena hekokoroku kara dikana ia habadaia bona Iehova hadikaia karana badana ia karaia. Daniela ese king ena kara dika ia hahedinaraia. Danu, idia hebou kaivakuku tomadiho henia taudia vairanai, mai gari lasi ida Belesasa ia hamaoroa dirava koikoi be “gau ta idia itaia diba lasi, bona idia be gau ta idia diba lasi danu.” Dirava ena gari lasi peroveta tauna be ma ia gwau unai anina lasi diravadia lasi, to Iehova be iena “mauri ia biagua Diravana.” Ema bona hari, taunimanima ese mauri lasi gaudia be edia dirava ai idia halaoa bona moni, gaukara, dagi, bona moale karadia danu idia abia isi. To unai gaudia ta ese mauri idia henia diba lasi. Iehova sibona dainai ita ibounai ita mauri, ia sibona dainai ita hahodi.​—⁠Daniela 5:​22, 23; Kara 17:​24, 25.

HEHUNI GAUNA IA HEDINARAI

¹⁷ Hari ia buruka peroveta tauna ese Babulonia ena aonega taudia ibounai idia karaia diba lasi gauna ta ia karaia. Haba dekenai ia noho toretore ia duahia bona ena anina ia gwauraia. Unai hereva be: “MENE, MENE, TEKELE, PARASINI.” (Daniela 5:​24, 25) Edia anina be dahaka?

¹⁸ Unai hereva edia anina korikorina be “mina ta, mina ta, sekele ta, bona sekele ena kahadia.” Hereva ta ta be moni ena metau idia hahedinaraia, badana amo ela bona maragina. Daradara bada gauna unai! Ena be Babulonia ena aonega taudia ese unai leta ta ta idia diba, to ita hoa lasi edia anina idia gwauraia diba lasi.

¹⁹ Dirava ena lauma helaga ese Daniela ia hakaua, bena ia gwau: “Unai hereva edia anina be inai: MENE (Namba): Oiemu basileia ena nega be Dirava ese ia duahia vadaeni, bona ia hadokoa gwauraia.” (Daniela 5:26) Hereva ginigunana ena konsonent letadia dainai inai hereva “mina” bona Aramia gado herevana “idia duahia,” eiava “edia namba idia duahia” idia gwauraia diba, duahia tauna ese ia atoa vaol letadia hegeregerena. Daniela ia diba namonamo Iuda taudia idia abia mauri negana ena dokona ia kahirakahira vadaeni. Idia perovetalaia laganidia 70 amo, lagani 68 idia ore vadaeni. (Ieremia 29:10) Nega Naria Tauna Hereadaena, Iehova, ese tanobada ena basileia badana Babulonia ena lohia dinadia ia duahia vadaeni, bona edia dokona be kahirakahira momokani, to Belesasa ena aria dekenai idia mai taudia ese unai idia laloa lasi. Oibe, nega ia ore vadaeni​—⁠Belesasa ena nega sibona lasi, to ena tamana Nabonido ena nega danu. Reana unai dainai inai hereva “MENE” be nega rua ia torea​—⁠unai king rua edia lohia negadia do idia ore ia hahedinaraia.

²⁰ To, “TEKELE” be nega tamona bona gau tamona ia hahedinaraia dalanai ia torea. Reana unai ese ia hahedinaraia unai hereva be Belesasa sibona totona. Bona unai be maoro, badina ia ese Iehova matauraia lasi karana badana ia karaia. Unai hereva ena anina be “sekele,” to konsonent letadia dainai inai hereva “sikeilia” idia gwauraia diba danu. Unai dainai, Daniela ese Belesasa ia hamaoroa: “TEKELE (Metau): Oiemu kara be metau ena sikele dekenai Dirava ese ia tohoa vadaeni, bona ia itaia, oiemu kara ena namo be hegeregere lasi.” (Daniela 5:27) Iehova dekenai, tanobada besedia be sikele dekenai ia noho kahu bamona. (Isaia 40:15) Idia hegeregere lasi Iena ura do idia koua. Unai dainai, hekokoroku king tamona ese dahaka ia karaia diba? Belesasa ese guba bona tanobada edia Lohiabada ataiai sibona ia abia isi toho. Ia be tau sibona bona ia ura Iehova ia hadikaia bona ena tomadiho goevana ia kirikirilaia, to dokonai ena kara be “hegeregere lasi.” Oibe, ia mai haraga hahemaoro karana be Belesasa dekenai ia vara be maoro!

²¹ Haba dekenai ia noho hereva ginigabena be “PARASINI.” Daniela ese gau tamona ia hahedinaraia dalanai ia duahia, “PERESA,” reana unai ena badina be king iharuana ia noho lasi lalonai king tamona sibona ia hereva henia. Unai hereva ese Iehova ena hunia herevana badana ia haorea namo herea, badina ena anina be toi bamona. “Parasini” ena anina korikorina be “sekele ena kahadia.” To unai leta ese dala idia kehoa anina ma rua​—⁠“idia haria gaudia” bona “Parasa taudia”​—⁠idia atoa diba danu. Unai dainai, Daniela ia peroveta: “PARASINI [“PERESA,” NW ] (Haria): Oiemu basileia ia haria vadaeni, bona Mede bona Parasa taudia dekenai ia henia.”​—⁠Daniela 5:⁠28.

²² Vadaeni, hehuni gauna ia hedinarai. Babulonia goadana be Mede-Parasa ena tuari taudia ese idia halusia gwauraia. Ena be unai hahemaoro herevana dainai Belesasa ia lalohisihisi, to iena gwauhamata ia hagugurua. Iena hesiai taudia ia oda henia dabua kakakaka be Daniela dekenai idia atoa, iena aiona dekenai golo seini idia atoa, bona idia boiboi ia be basileia ena lohia ihatoina. (Daniela 5:29) Daniela ese unai gaudia ia dadaraia lasi, badina ia lalo-parara idia ese Iehova dekenai hemataurai idia hahedinaraia. To momokani, reana Belesasa ia laloa Iehova ese ena hahemaoro karana do ia hamanokaia badina ena peroveta tauna ia matauraia. To bema unai totona ia karaia, unai kara be leiti momokani.

BABULONIA ENA MORU

²³ Belesasa bona ena taunimanima ese edia dirava idia abia isi totona idia inuinu bona Iehova idia hadikaia noho lalonai, king ena ruma murimuriai, dibura lalonai, gau badana ta ia vara noho. Kahirakahira lagani 200 gunanai, Isaia ese ia gwauraia peroveta herevana ia guguru noho. Iehova ese Babulonia ia perovetalaia, ia gwau: “Babulonia ia havaraia hisihisi ibounai, be do ia haorea momokani.” Oibe, unai hanua dikana ese Dirava ena taunimanima ia dagedage henia karadia ibounai be do idia ore. Edena dala ai? Unai peroveta herevana ia gwau: “Elama tuari taudia e! Media tuari taudia e! Babulonia hanuadia do umui tuari henia, bona do umui koua hagegea.” Peroveta Isaia ena nega murinai Elama be Parasa ena kahana ai ia lao. To, Belesasa ese ena aria, Isaia ese ena peroveta herevana lalonai ia gwauraia ariana, ia karaia neganai, Parasa bona Mede tuari taudia be Babulonia idia “tuari henia” bona idia “koua hagegea” hebou.​—⁠Isaia 21:​1, 2, 5, 6.

²⁴ Momokani, unai tuari taudia edia biaguna ena ladana bona ia tuari daladia ia perovetalaia danu. Lagani 200 bamona gunanai, Isaia ia peroveta Iehova ese tau ta ladana Kurese do ia horoa Babulonia ia tuari henia totona. Iena tuari ia karaia lalonai, koua gaudia ibounai be do idia kokia. Babulonia ena ranu be do “idia kaukau,” bona ena iduara badadia be do idia kehoa noho. (Isaia 44:27–45:⁠3) Bona unai bamona ia vara. Kurese ena tuari taudia ese Euperate Sinavaina ena aru dalana idia haidaua, unai amo ranu ia maragi, bena sinavai dekenai idia raka diba. Idia naria namonamo lasi gima taudia ese Babulonia ena iduara idia koua lasi. Histori torea taudia idia gwau bamona, hanua taudia ese aria idia karaia lalonai hanua idia halusia. Babulonia idia halusia neganai idia tuari bada lasi. (Ieremia 51:30) To, dagi bada tauna ta ia mase. Daniela ia gwau: “Unai hanuaboi dekenai, Belesasa, Babulonia ena king, be idia alaia mase. Vadaeni Mede ena bese tauna ladana Dariuse ese king dagi ia abia. Unai neganai Dariuse ena mauri lagani be 62.”​—⁠Daniela 5:​30, 31.

HABA DEKENAI IA NOHO TORETORE AMO DIBA ITA ABIA

²⁵ Daniela karoa 5 ai Dirava ena lauma amo ia torea sivaraina be mai anina bada ita dekenai. Idaunegai Babulonia be tomadiho koikoi karadia edia gabu badana dainai, ia ese tanobada ena tomadiho koikoi ibounai ia laulaulaia namo herea. Apokalupo bukana dekenai rara bubua ariara hahine ese unai koikoi karadia edia tanobada ibounai oreana ia laulaulaia bona ena ladana idia gwauraia “Babulonia badana.” (Apokalupo 17:⁠5) Ia ese Dirava idia hadikaia hahediba hereva bona kara koikoidia dainai ia abia sisiba ibounai ia dadaraia, bona Dirava ena Hereva ena hereva momokani idia harorolaia taudia ia dagedage henia. Lagani 1918 ai, dubu gunalaia taudia idia havaraia dagedage karadia ese Basileia harorolaia gaukarana idia koua neganai, horoa Keristani taudia oredia mai edia kamonai be ‘Babulonia Badana’ lalonai idia abia mauri bamona, idaunegai Ierusalema bona Iuda taudia bamona.

²⁶ To, karaharaga ‘Babulonia Badana’ ia moru! Ena moru ese regerege ia havaraia lasi​—⁠lagani 539 B.C.E. ai, idaunegai Babulonia ia moru neganai regerege be bada lasi bamona. To laulau dalanai ena moru be ia dika herea. Unai be lagani 1919 C.E. ai, Iehova ena taunimanima ese Babulonia ena dibura idia rakatania bona Dirava ena lalo-namo idia abia neganai, ia vara. Unai ese ‘Babulonia Badana’ ena siahu Dirava ena taunimanima dekenai ia haorea bona ia hahedinaraia matamaia, unai ita abidadama henia diba lasi oreana be orea koikoina. Ena moru idia hanamoa lou diba lasi, bona ena ore be kahirakahira. Unai dainai Iehova ena hesiai taudia ese inai sisiba herevana idia gwauraia noho: “Lauegu orea taudia e, ia dekena amo do umui raka siri, ia danu do umui kara dika hebou garina.” (Apokalupo 18:⁠4) Oi ese unai sisiba herevana oi badinaia vadaeni, a? Ma haida dekenai oi gwauraia, a?f

²⁷ Vadaeni, hari inai negai danu toretore ta be haba dekenai ia noho​—⁠to ‘Babulonia Badana’ totona sibona lasi. Daniela bukana ia hahedinaraia hereva momokani badana oi laloatao: Iehova be Guba bona Tanobada edia Lohia Badana. Ia sibona ese taunimanima lohiaia totona ta ia atoa be maoro. (Daniela 4:​17, 25; 5:21) Iehova ena ura idia koua toho gaudia ibounai be do ia kokia. Iehova be kahirakahira kara ta do ia karaia. (Habakuku 2:⁠3) Daniela ena mauri lalonai, ena mauri lagani be 90 idia hanaia neganai, unai bamona nega ia mai. Unai nega ai ia itaia Iehova ese tanobada ena basileia badana ta ia kokia​—⁠Daniela ia mero negana amo Dirava ena taunimanima ia dagedage henia basileiana unai.

²⁸ Hamomokania gaudia idia hahedinaraia Iehova Dirava ese guba terona dekenai taunimanima totona Lohia Tauna ia atoa vadaeni. Tanobada ese unai King ia laloa lasi bona ena lohia siahuna ia dadaraia ese ia hahedinaraia goevagoeva, kahirakahira Iehova ese unai Basileia ena lohia siahuna idia dagedage henia taudia ibounai do ia kokia. (Salamo 2:​1-11; 2 Petero 3:​3-7) Iseda nega be ia ore haraga noho, unai hegeregerena oi kara bona Dirava ena Basileia oi abidadama henia, a? Bema oibe, oi ese haba dekenai ia noho toretore amo diba oi abia vadaeni!

[Footnotes]

DAHAKA OI DIBAIA?

• October 5/6, 539 B.C.E. ena hanuaboi lalonai, Belesasa ena aria be edena bamona idia hadokoa?

• Haba dekenai ia noho toretore ena anina be dahaka?

• Belesasa ena aria idia karaia noho lalonai edena peroveta herevana Babulonia ena moru dekenai be ia guguru noho?

• Haba dekenai ia noho toretore ena anina ita dekenai be dahaka?

[Study Questions]

 1. Idaunegai, haba dekenai idia torea hereva hani edia anina ena bada be edena bamona?

 2. (a) Nebukanesa ena mase murinai Babulonia dekenai dahaka ia vara? (b) Siahu ia abia lohia tauna be daika?

 3. Belesasa ena aria be edena bamona?

 4. (a) Dahaka dainai Babulonia taudia ese October 5/6, 539 B.C.E. ena hanuaboi lalonai, aria idia karaia be hoa gauna? (b) Tano lalonai idia vareai tuari taudia vairanai Babulonia taudia idia gari lasi ena badina be dahaka?

5, 6. Belesasa be uaina amo ia kekero dainai dahaka ia karaia, bona dahaka dainai unai be Iehova hadikaia karana badana?

7, 8. Dahaka ese Belesasa ena aria ia hadokoa, bona unai ena anina king dekenai be edena bamona?

 9. (a) Dahaka dainai Belesasa ena gari karana be Dirava gari henia karana lasi? (b) King ese Babulonia ena aonega taudia dekenai dahaka ia gwauhamatalaia?

10. Aonega taudia ese haba dekenai ia noho toretore bona ena anina idia gwauraia diba, a?

11. Reana Babulonia ena aonega taudia ese unai toretore idia duahia diba lasi ena badina be dahaka?

12. Aonega taudia idia kwalimu lasi karana ese dahaka ia hamomokania?

13. (a) Dahaka dainai kwini ia gwau Daniela idia boiria be namo? (b) Daniela ena mauri be edena bamona?

14. Daniela ese haba dekenai ia noho toretore ia itaia neganai ena hekwakwanai be dahaka?

15, 16. Sivarai gunadia amo Belesasa ese dahaka mai anina bada gauna ia dibaia lasi, bona hari momo be edena dala ai unai bamona idia kerere?

17, 18. Imana ta ese haba dekenai ia torea hereva hani be dahaka, bona edia anina korikorina be dahaka?

19. Inai hereva “MENE” ena anina be dahaka?

20. Inai hereva “TEKELE” ena anina be dahaka, bona ena anina Belesasa dekenai be dahaka?

21. Edena dala ai “PARASINI” ena anina be toi bamona, bona tanobada ena basileia badana Babulonia ena vaira negana dekenai ena anina be dahaka?

22. Hehuni gauna ia hedinarai dainai Belesasa ese dahaka ia karaia, bona reana ia ese dahaka ia laloa?

23. Belesasa ese ena aria ia karaia neganai, dahaka idaunegai peroveta herevana ia guguru noho?

24. Isaia ese Babulonia ena moru ia gwauraia neganai, edena kahana maragidia ia perovetalaia?

25. (a) Dahaka dainai idaunegai Babulonia ese hari inai negai tanobada ena tomadiho koikoi ibounai ia laulaulaia namo herea? (b) Edena dala ai hari inai negai Dirava ena hesiai taudia be Babulonia dekenai idia abia mauri taudia bamona?

26. (a) Lagani 1919 ai, ‘Babulonia Badana’ be edena dala ai ia moru? (b) Edena sisiba ita badinaia bona ma haida dekenai ita gwauraia be namo?

27, 28. (a) Daniela ese edena hereva momokani badana ia laloaboio lasi? (b) Dahaka ese ia hahedinaraia Iehova ese kahirakahira inai tanobada dikana do ia hadikaia ore?

[Full-page picture on page 98]

[Full-page picture on page 103]