Karoa 8

Laiona Edia Uduna Amo Ia Roho Mauri!

BABULONIA ia moru vadaeni! Lagani handred lalonai ia be tanobada ena basileia badana, to hora haida lalonai ena hairai ia ore. Nega matamatana ta​—⁠Mede bona Parasa taudia edia nega​—⁠ia matamaia gwauraia. Belesasa ena gabu ai ia lohia matamaia Mede tauna Dariuse ena gaukara aukana be ena basileia badana ia haheaua namonamo totona ia hegaegae.

² Dariuse ese ia karaia gaukara ginigunana ta be lohia taudia 120 ia abia hidi. Haida idia laloa unai dagi idia abia taudia be nega haida king ena varavara taudia huanai amo idia abia hidi. Lohia taudia ta ta ese unai basileia ena kahana badana ta eiava maragina ta ia lohiaia. (Daniela 6:⁠1) Iena maduna be takisi moni ia gogoa bona king ena ruma dekenai unai moni ia henia. Ena be nega haida king ese ia siaia tauna be unai lohia taudia edia gaukara ia tahua, to edia siahu be bada. Edia dagi ladana ena anina be “Basileia ia gimaia tauna.” Edia provinsi dekenai unai lohia taudia be king bamona, king badana ena siahu henunai idia lohia.

³ Unai lohia dalana matamatana lalonai, Daniela ese dahaka dagi do ia abia? Mede tauna Dariuse ese unai Iuda peroveta tauna burukana, ena mauri lagani be 90 ia hanaia, be gaukara amo do ia hadokoa, a? Lasi momokani! Reana Dariuse ia diba Daniela ese Babulonia ena moru ia perovetalaia namonamo bona ia lalo-parara unai ia karaia totona taunimanima sibona ena aonega be hegeregere lasi. Danu, Daniela be lagani momo herea lalonai Babulonia dekenai idia abia mauri bese idauidau taudia ida ia gaukara vadaeni. Dariuse ia ura ia lohiaia taudia matamatadia ida maino ai ia noho. Unai dainai, ia ura bada Daniela bamona aonega bona diba tauna be ia kahirakahira do ia gaukara. Edena dagi do ia henia?

⁴ Bema Dariuse ese unai abia mauri Iuda tauna Daniela be lohia tauna ta ai ia halaoa, taunimanima be do idia hoa. To reana idia hoa mai regerege bada danu, badina Dariuse ia gwau iena lalona ia hadaia lohia taudia idia biagua ofesa taudia toi edia dagi ta be Daniela dekenai do ia henia! Danu, Daniela “ena gaukara ibounai be ia namo herea momokani,” bona ia hahedinaraia ia ida ofesa gaukara idia karaia taudia ia hereaia. Oibe, idia davaria iena aonega be idau momokani. Bona Dariuse ia laloa, praiminista ena dagi be Daniela dekenai do ia henia.​—⁠Daniela 6:​2, 3.

⁵ Reana ofesa badadia ma haida bona lohia taudia idia badu dikadika. Idia ura lasi edia ataiai Daniela​—⁠Mede eiava Parasa tauna lasi bona king ena ruma bese tauna lasi​—⁠ese siahu dagi ta do ia abia! Dariuse be edena bamona idau bese tauna ta dekenai unai bamona dagi badana ia henia diba bona sibona ena tano taudia bona ena ruma bese taudia ia reaia? Reana idia laloa unai bamona kara be maoro lasi. Danu, toana be lohia taudia idia laloa Daniela ena kara maoromaoro dainai edia henaohenao bona kara gageva ma haida, do idia karaia be auka. To, ofesa badadia bona lohia taudia be gari dainai Dariuse dekenai unai idia herevalaia diba lasi. Oibe, idia diba Dariuse ese Daniela ia laloa bada.

⁶ Unai dainai, idia mama politikol taudia ese Daniela hadikaia dalana idia karaia toho. Idia ese “Daniela ena gaukara dekenai kerere idia tahua.” Iena maduna ia huaia dalana dekenai kerere ta idia davaria diba, a? Koikoi karana ta ia karaia, a? Ofesa badadia bona lohia taudia ese Daniela ena gaukara dekenai kara gageva ta eiava kerere ta idia davaria diba lasi. Idia gwau: “Daniela samania gauna ta do ita davaria diba lasi, to sedira iena guriguri karana dekenai sibona dekena amo do ita davaria diba.” Bena unai tatau dikadia ese hehuni dalanai palani ta idia karaia. Idia laloa unai palani amo Daniela do ia mase.​—⁠Daniela 6:​4, 5.

HAMASEA PALANINA TA IDIA KARAIA

⁷ Ofesa badadia bona lohia taudia hutuma be Dariuse dekenai “idia lao.” Aramia gado dekenai idia gaukaralaia herevana ena anina be idia lao neganai regerege bada idia havaraia. Toana be unai tatau idia ura Dariuse ia laloa do idia herevalaia gauna be mai anina bada. Reana idia laloa Dariuse ese edia lalohadai do ia henanadailaia lasi, bema mai goada ida idia gwauraia bona edia kara amo idia hahedinaraia ia ese karaharaga kara ta do ia karaia be namo. Unai dainai idia hereva maoromaoro, idia gwau: “Ai inai, oiemu gavamani ena gaukara taudia ibounai, gavana taudia bona durua taudia, bona lohia taudia badadia bona maragidia, be laloa tamona ai abia, ai ura oi ese taravatu ta oi karaia, bona oi ha-aukaia momokani. Inai bamona: Dina 30 lalonai be tau ta ese gau ta do ia noia lasi dirava ta dekenai, o tau ta dekenai, to oi dekenai sibona do ia noia. Bema tau ta ese inai hereva ia utua, be do idia negea laiona ena guri dekenai.”a​—⁠Daniela 6:​6, 7.

⁸ Histori ena sivarai ese ia hamomokania nega momo Mesopotamia ena king taudia be dirava bamona idia laloa bona idia tomadiho henidia. Vadaeni, reana edia hereva dainai Dariuse ia moale. Bona reana ia itaia unai kara amo gau namona ta do ia vara diba. Mani oi laloatao, Babulonia ai idia noho taudia dekenai Dariuse be idau bese tauna ta bona vanegai sibona ia mai. Unai taravatu matamata ese iena king dagina do ia hagoadaia, bona Babulonia dekenai idia noho taudia edia lalona ia veria unai lohia siahuna matamatana idia badinaia bona durua totona. To, ofesa badadia bona lohia taudia ese unai taravatu idia gwauraia neganai, king ena namo idia tahua lasi. Edia ura gauna badana be unai kara amo Daniela do idia tarapua, badina idia diba dina iboudiai nega toi iena ataiai daiutuna dekenai idia kehoa noho uindo vairadiai Dirava dekenai ia guriguri.

⁹ Unai guriguri koua taravatuna ese Babulonia ai idia noho tomadiho orea idauidau taudia dekenai hekwakwanai do ia havaraia, a? Reana lasi, badina unai taravatu be hua tamona lalonai sibona do ia noho. Danu, Iuda lasi taudia do idia laloa lasi nega sisina lalonai taunimanima ta idia tomadiho henia be kerere. Baibel ia diba bada tauna ta ia gwau: “Kaivakuku tomadiho henia karana ia goadalaia besena dekenai king tomadiho henia karana be kara idauna lasi; bona unai dainai Babulonia taudia ese edia tano ia abia tauna​—⁠Mede tauna Dariuse​—⁠be dirava bamona idia matauraia totona edia lalona idia veria neganai, mai edia ura ida unai idia karaia. Iuda taudia sibona ese unai bamona hahegani idia dadaraia.”

¹⁰ Vadaeni, Dariuse ena vadivadi taudia ese ia idia hagoadaia, idia gwau: “Inai taravatu oi atoa, bona oiemu ladana oi torea inai taravatu pepa dekenai. Vadaeni Mede bona Parasa edia taravatu hegeregerena be do idia haidaua diba lasi.” (Daniela 6:⁠8) Idaunegai East tanodia dekenai, nega momo king ena ura be hahegani badana. Unai dainai taunimanima do idia laloa ia be kerere ia karaia diba lasi. Kerere lasi taudia edia mase idia havaraia taravatudia danu be idia haidaua lasi!

¹¹ Dariuse ese Daniela ia laloa lasi, bona taravatu pepana ia sainia. (Daniela 6:⁠9) Unai ia karaia neganai, ena be ia diba lasi, to iena ofesa tauna namo hereana ena mase dalana ia karaia. Oibe, unai taravatu dainai Daniela dekenai dika ia vara diba.

DARIUSE IDIA DORIA HAHEMAORO AUKANA DO IA HENIA

¹² Daudau lasi murinai Daniela ia diba unai guriguri koua taravatuna idia karaia. Maoromaoro, iena ruma dekenai ia vareai bona ataiai daiutuna dekenai ia lao, ena uindo be Ierusalema ena kahanai idia kehoa.b Unuseniai Daniela be Dirava dekenai ia guriguri matamaia “nega ibounai ia karaia bamona.” Reana Daniela ia laloa ia sibona ia noho, to unai palani idia karaia taudia be ia idia raraia. Karaharaga idia vareai, reana Dariuse dekenai idia lao hegeregerena. Hari, sibona edia matana amo idia itaia​—⁠Daniela ese “Dirava ia guriguri henia noho.” (Daniela 6:​10, 11) Ofesa badadia bona lohia taudia ese idia ura gauna idia itaia bona king ena vairanai Daniela idia samania diba.

¹³ Daniela ena inai taudia ese mai koikoi danu Dariuse idia nanadaia, idia gwau: “Taravatu ta oi torea vadaeni, dina 30 lalonai bema tau ta ese idau dirava o idau tauna ta dekenai ia noinoi, to oi Dariuse dekenai be ia noia lasi neganai, be laiona ena guri dekenai do idia negea.” Dariuse ia haere: “Io, Mede bona Parasa edia taravatu hegeregerena, taravatu lau torea vadaeni, haidaua diba lasi.” Vadaeni karaharaga unai dika havaraia taudia idia hereva. “Iuda dekena amo abia mauri tauna ta ena ladana Daniela ese oiemu hereva ia matauraia lasi, bona ia badinaia lasi. Nega ibounai dina ta lalonai nega toi ia guriguri.”​—⁠Daniela 6:​12, 13.

¹⁴ Namona be oi itaia unai ofesa badadia bona lohia taudia idia gwau Daniela be “Iuda dekena amo abia mauri tauna.” Toana be, idia ura idia hahedinaraia Dariuse ese dagi badana ia henia tauna Daniela be igui hesiai Iuda tauna sibona. Idia laloa unai dainai ia be taravatu henunai ia noho​—⁠herevana king ese ia laloa bada!

¹⁵ Reana ofesa badadia bona lohia taudia idia laloa king ese davana namona do ia henidia badina pulisi gaukara namona idia karaia. Bema unai bamona idia laloa, do idia hoa. Dariuse ese idia gwauraia sivaraina dainai ia lalohisihisi bada. Dariuse ese Daniela ia badu henia lasi bona maoromaoro laiona edia guri dekenai ia siaia lasi, to unai dina ibounai dala ia tahua Daniela ia hamauria totona. To dala ta ia davaria lasi. Daudau lasi murinai, unai dika havaraia taudia idia giroa mai, bona hemarai lasi dalanai idia gwau Daniela be do ia mase.​—⁠Daniela 6:​14, 15.

¹⁶ Dariuse ia laloa ia vairanai dala tamona sibona ia noho. Taravatu ia haidaua diba lasi, bona Daniela ena “kara dika” ia gwauatao diba lasi. Dariuse ese ia karaia diba gauna tamona be Daniela ia hamaoroa “oiemu Dirava, nega ibounai oi tomadiho henia Diravana ese do ia hamauria oi.” Toana be Dariuse ese Daniela ena Dirava ia matauraia. Iehova ese Daniela dekenai diba ia henia dainai, Babulonia ena moru ia perovetalaia diba. Danu, Dirava ese Daniela dekenai aonega idauna ia henia, unai dainai ia ese ofesa badadia ma haida ia hereaia. Reana Dariuse ia diba danu, lagani momo gunanai unai Dirava ese lahi siahuna amo Heberu matamata taudia toi ia hamauria. Toana be, Dariuse ese ia sainia taravatuna ia haidaua diba lasi dainai, ia ura Iehova ese Daniela do ia hamauria. Unai dainai, Daniela be laiona edia guri dekenai idia negea.c Bena, “nadi ta idia mailaia, unai guri ena iduara idia koua. King ese sibona ena koua toana ia atoa, bona ia lokaia, bona iena opesa taudia edia koua toana danu ia atoa, unai dainai tau ta ese Daniela ia hamauria diba lasi.”​—⁠Daniela 6:​16, 17.

HOA GAUNA TA IA VARA

¹⁷ Ia lalohisihisi Dariuse be ena ruma dekenai ia giroa. Miusiki gadaralaia taudia be ia vairanai idia mai lasi, badina gau ta ia moalelaia diba lasi. To, hanuaboi ibounai lalonai Dariuse ia mahuta bona ia aniani lasi. “King ia mahuta sisina lasi.” Daba rere ai, Dariuse be karaharaga laiona edia guri dekenai ia lao. Mai lalohisihisi ida ia boiboi: “Daniela e, mauri Diravana ena hesiai tauna e! Oiemu Dirava, iena hesiai oi karaia namonamo Diravana ese laiona dekena amo oi ia hamauria, a?” (Daniela 6:​18-20) Vadaeni ia hoa bada​—⁠bona ia moale bada danu​—⁠badina haere ta ia kamonai!

¹⁸ “Egu king, oi mauri hanaihanai!” Unai hemataurai hanamoa herevana amo, Daniela ia hahedinaraia king ia badu henia lasi. Ia lalo-parara Dariuse amo lasi to idia mama ofesa badadia bona lohia taudia amo dagedage ia davaria. (Mani Mataio 5:44; Kara 7:60 itaia.) Bona Daniela be ma ia gwau: “Dirava ese iena aneru ia siaia mai, laiona edia uduna ia koua, bona idia hadikaia lasi lau. Inai bamona ia karaia, badina ia diba lau be kerere lasi, bona oi danu lau hadikaia lasi, egu king e.”​—⁠Daniela 6:​21, 22.

¹⁹ Reana unai hereva ese Dariuse ena lalona idia hahisia! Hanaihanai ia diba Daniela ia kerere lasi bona laiona edia guri dekenai idia negea be maoro lasi. Dariuse ia diba maoromaoro ofesa badadia bona lohia taudia ese palani idia karaia, Daniela idia hamasea totona bona king ena lalona idia veria, sibona edia ura gauna idia hagugurua totona. Guna idia gwau “gavamani ena gaukara taudia ibounai” idia ura unai taravatu idia karaia, bona unai hereva ena anina koikoina be Daniela ida unai gauna idia herevalaia danu. Dariuse ese gabeai unai koikoi taudia edia davana do ia henia. To guna, oda ia henia Daniela be laiona edia guri amo do idia veria daekau. Hoa gauna be, Daniela ese bero ta ia abia lasi!​—⁠Daniela 6:⁠23.

²⁰ Dariuse ia itaia Daniela ia namo, bena ia ese gaukara ma ta ia karaia. “Vadaeni king ese oda hereva ia gwauraia, Daniela idia samania taudia mai adavadia bona mai natudia do idia mailaia, laiona ena guri lalonai do idia negea. Unai guri lalonai idia moru diho noho, bona tano idia do davaria lasi neganai, laiona ese unai taudia idia koridia, bona edia turiana ibounai idia hamakohia.”d​—⁠Daniela 6:⁠24.

²¹ Reana toana be unai inai taudia sibona lasi to edia adavadia bona natudia danu idia hamasea be kara aukana. Oibe, Dirava ese peroveta Mose amo ia henia Taravatu ia gwau: “Tamana taudia be do idia alaia lasi edia natudia edia kerere dainai, bona memero do idia alaia lasi, edia tamana edia kerere dainai. To tau ta ta ena kara dika davana dainai do idia alaia mase.” (Deuteronomi 24:16) To, idaunegai bese haida lalonai, ta ese taravatu utua karana badana ia karaia neganai, unai kara dika tauna ena ruma bese taudia be ia ida idia hamasea danu. Reana unai idia karaia ena badina be ruma bese taudia ese gabeai davana idia henia lou diba lasi. To, unai ofesa badadia bona lohia taudia edia ruma bese hamasea karana be Daniela ese ia havaraia gauna lasi. Ita laloa diba, ia be unai tatau dikadia ese edia ruma bese taudia dekenai idia havaraia dika dainai ia lalohisihisi.

²² Sibona edia palani idia karaia ofesa badadia bona lohia taudia idia mase vadaeni. Dariuse ese hadibaia hereva ta ia halasia, ia gwau: “Hereva lau gwauraia inai, lauegu basileia dekenai noho taudia ibounai ese Daniela ena Dirava do umui matauraia bona gari henia. Ia be mauri ena Dirava, bona do ia noho hanaihanai. Iena basileia do idia hamorua lasi ela bona hanaihanai, bona iena siahu be do ia ore diba lasi. Taunimanima ia hamauria, bona mase dekena amo idia ia veria mauri. Hoa gaudia bona toa karadia ia karaia, tanobada dekenai bona guba dekenai danu. Laiona edia dagedage dekena amo, ia ese Daniela ia hamauria.”​—⁠Daniela 6:​25-27.

NEGA IBOUNAI DIRAVA OI HESIAI HENIA

²³ Daniela ese hari inai negai Dirava idia hesiai henia taudia ibounai dekenai kara namona ia haheitalaia. Nega ta ena kara idia gwauraia dika lasi. Iena gaukara lalonai, “Daniela dekenai gageva karana ta o kerere karana ta be lasi.” (Daniela 6:⁠4) Unai hegeregerena, Keristani tauna ese ena moni gaukara dekenai ia gaukara goadagoada be namo. To ita gwau lasi hebogahisi lasi dalanai bisinesi ia karaia goada moni bada ia abia totona eiava ma haida hadikaia dalanai dagi bada ia tahua. Lasi. (1 Timoteo 6:10) To Baibel ia gwau namona be Keristani tauna ese ena maduna ibounai tauanina dalanai ia huaia mai momokani ida bona mai ena kudouna ibounai ida, ‘Iehova ena gaukara ia karaia bamona.’​—⁠Kolose 3:​22, 23; Tito 2:​7, 8; Heberu 13:⁠18.

²⁴ Daniela ese ena tomadiho ia badinaia goadagoada. Ena guriguri karadia be taunimanima ibounai idia diba. Danu, ofesa badadia bona lohia taudia idia diba namonamo Daniela ese ena tomadiho ia laloa bada. Oibe, idia diba ena be ena tomadiho karana idia taravatua, to do ia rakatania lasi. Unai be haheitalai namona hari inai negai Keristani taudia dekenai! Idia danu ese Dirava tomadiho henia karana idia atoa guna bona taunimanima ese unai idia itaia. (Mataio 6:33) Taunimanima ese unai idia itaia diba be namo, badina Iesu be ia murinai idia raka taudia ia hagania: “Umui emui diari taunimanima edia vairana dekenai unai bamona do umui hedinaraia, vadaeni umui emui kara namodia do idia itaia neganai, umui emui Tamana guba dekenai do idia hanamoa.”​—⁠Mataio 5:⁠16.

²⁵ Reana haida idia gwau diba Daniela ese unai dika ia davaria lasi bema unai dina 30 lalonai hehuni dalanai Iehova dekenai ia guriguri. Oibe, hereva ta ia hahedinaraia lasi Dirava ese dala eiava gabu tamona sibona amo ita gwauraia guriguridia ia kamonai. Ia ese iseda kudouna lalonai idia noho gaudia ia diba danu. (Salamo 19:14) To, Daniela ia laloa iena kara ia haidaua be hegeregere iena Dirava ia badinaia lasi karana. Dahaka dainai?

²⁶ Taunimanima ese Daniela ena guriguri karana idia diba dainai, bema unai kara ia hadokoa taunimanima be dahaka do idia laloa? Unai idia itaia taudia be reana do idia laloa Daniela ese taunimanima ia gari henia bona king ena taravatu ese Iehova ena taravatu ia hereaia. (Salamo 118:⁠6) To Daniela ese ena kara amo ia hahedinaraia Iehova sibona ia badinaia. (Deuteronomi 6:​14, 15; Isaia 42:⁠8) To momokani, Daniela ese unai ia karaia neganai mai hemataurai lasi ida king ena taravatu ia hamakohia lasi. To danu, gari dainai ena kara maoromaoro ia rakatania lasi. Daniela be iena ataiai daiutuna dekenai ia guriguri noho sibona, king ese ena taravatu ia do henia lasi neganai “nega ibounai ia karaia bamona.”

²⁷ Hari inai negai Dirava idia hesiai henia taudia ese Daniela ena haheitalai amo diba idia abia. Idia noholaia tanodia edia taravatu idia badinaia karana amo ‘gavamani idia kamonai henia.’ (Roma 13:⁠1) To, taunimanima edia taravatu ese Dirava ena taravatu idia utua neganai, Iehova ena taunimanima be Iesu ena aposetolo taudia bamona, mai gari lasi ida idia gwau: “Dirava ai kamonai henia be namo, taunimanima ai kamonai henia be dika.” (Kara 5:29) Keristani taudia ese unai idia karaia neganai, dagedage eiava gwau-edeede karana idia hahedinaraia lasi. To, idia ura taunimanima ida maino ai do idia noho, unai amo idia be ‘Dirava idia badinaia bona maino ai idia noho namonamo.’​—⁠1 Timoteo 2:​1, 2; Roma 12:⁠18.

²⁸ Dariuse ia gwau Daniela ese “nega ibounai” Dirava ia tomadiho henia namonamo. (Daniela 6:​16, 20) Aramia gado herevana idia hahanaia “nega ibounai” ena anina be “raka hagegea.” Ia hahedinaraia lalohadaina be karaia loulou, eiava karaia hanaihanai. Daniela ena kara maoromaoro be unai bamona. Ia badinaia loulou karana idia diba. Idia daradara lasi Daniela be hahetoho, herevana badana eiava maragina, ia davaria neganai dahaka do ia karaia. Ia ese lagani momo lalodiai ia manadalaia dalana do ia badinaia noho​—⁠mai ena kamonai ida Iehova badinaia dalana unai.

²⁹ Hari inai negai Dirava idia hesiai henia taudia idia ura Daniela ena kara idia tohotohoa. Momokani, aposetolo Paulo ese Keristani taudia ibounai ia hagoadaia idaunegai Dirava gari henia taudia edia haheitalai idia laloa namonamo. Edia abidadama dainai, “kara maoromaoro idia karaia, bona Dirava ena gwauhamata gauna idia davaria,” bona​—⁠toana be Daniela ia herevalaia​—⁠ia gwau “laiona edia uduna idia koua.” Ita be hari inai negai Iehova ita hesiai henia taudia dainai, namona be Daniela bamona abidadama bona nega ibounai Dirava hesiai henia karana do ita hahedinaraia bona “iseda vairana dekenai ia noho heau helulu, be mai haheauka danu do ita heau goada.”​—⁠Heberu 11:​32, 33; 12:⁠1.

[Footnotes]

DAHAKA OI DIBAIA?

• Dahaka dainai Mede tauna Dariuse ia ura Daniela dekenai dagi badana ia henia?

• Ofesa badadia bona lohia taudia ese edena palani dikana idia karaia? Edena dala ai Iehova ese Daniela ia hamauria?

• Daniela ena kamonai karana oi laloa namonamo amo dahaka oi dibaia?

[Study Questions]

1, 2. (a) Mede tauna Dariuse ese ena basileia badana ia haheaua totona edena bamona ia hegaegae? (b) Lohia taudia edia maduna bona edia siahu oi herevalaia.

3, 4. Dahaka dainai Dariuse ese Daniela ia ura henia, bona king ese ia dekenai edena dagi ia henia?

 5. Daniela ia abia dagi dainai reana ofesa badadia bona lohia taudia be dahaka idia laloa, bona dahaka dainai?

 6. Edena dala ai ofesa badadia bona lohia taudia ese Daniela idia hadikaia toho, bona dahaka dainai idia kwalimu lasi?

 7. Ofesa badadia bona lohia taudia ese king dekenai dahaka lalohadai idia hahedinaraia, bona edena dala ai idia gwauraia?

 8. (a) Dahaka dainai Dariuse ese idia gwauraia taravatuna ia ura henia? (b) Ofesa badadia bona lohia taudia edia ura gauna badana be dahaka?

 9. Dahaka dainai unai taravatu matamata ese Iuda lasi taudia momo dekenai hekwakwanai ia havaraia lasi?

10. Mede bona Parasa taudia ese king ia atoa taravatuna be edena bamona idia laloa?

11. Dariuse ena taravatu dainai Daniela dekenai dahaka do ia vara?

12. (a) Daniela ese unai taravatu matamata ia diba neganai, dahaka ia karaia? (b) Daidia ese Daniela idia raraia, bona dahaka dainai?

13. Daniela ena inai taudia be king dekenai dahaka idia gwau?

14. Dahaka dainai ofesa badadia bona lohia taudia idia gwau Daniela be “Iuda dekena amo abia mauri tauna”?

15. (a) Ofesa badadia bona lohia taudia ese idia gwauraia sivaraina dainai Dariuse ena hemami be edena bamona? (b) Ofesa badadia bona lohia taudia ese edena dala ma ta ai idia hahedinaraia Daniela idia inai henia?

16. (a) Dahaka dainai Dariuse ese Daniela ena Dirava ia matauraia? (b) Bona Dariuse ia ura Daniela dekenai be dahaka do ia vara?

17, 18. (a) Dahaka ese ia hahedinaraia Dariuse be Daniela dekenai ia vara gauna dainai ia lalohisihisi bada? (b) Daba rere ai king be laiona edia guri dekenai ia giroa lao neganai dahaka ia vara?

19. Edena dala ai ofesa badadia bona lohia taudia ese Dariuse idia koia bona ena lalona idia veria?

20. Dahaka ia vara Daniela ena inai taudia dikadia dekenai?

21. Mose ena Taravatu henunai bona idaunegai bese haida lalonai, kara dika taudia edia ruma bese kara henia karadia be edena bamona idia idau?

22. Dariuse ese dahaka hadibaia hereva matamatana ia halasia?

23. Daniela ese ena gaukara lalonai ia hahedinaraia haheitalai be edena bamona, bona edena dala ai ia bamona ita kara diba?

24. Edena dala ai Daniela ese ia hahedinaraia ena tomadiho ia badinaia goadagoada?

25, 26. (a) Daniela ena kara dainai reana haida be dahaka idia laloa? (b) Dahaka dainai Daniela ia laloa iena kara ia haidaua be hegeregere iena Dirava ia badinaia lasi karana?

27. Edena dala ai hari inai negai Dirava idia hesiai henia taudia ese Daniela bamona (a) gavamani idia kamonai henia? (b) Dirava idia kamonai henia to taunimanima idia kamonai henia lasi? (c) taunimanima ida maino ai idia noho?

28. Daniela ese “nega ibounai” Iehova ia hesiai henia ena anina be dahaka?

29. Edena dala ai hari inai negai Iehova idia hesiai henia taudia ese Daniela ena kamonai karana amo namo idia davaria diba?

[Full-page picture on page 114]

[Full-page picture on page 121]

[Picture on page 127]

Daniela ese “nega ibounai” Iehova ia hesiai henia. Oi danu, a?