Dirava ida Oi Raka Lalonai, Hahemaoro Goevana Hahedinaraia

1-3. (a) Dahaka dainai ita be mai eda abitorehai Iehova dekenai? (b) Iseda lalokau Hamauria Tauna be ita amo dahaka ia noia?

MANI oi laloa, oi be ia mutu noho bouti ta lalonai oi noho. Oi laloa noho hari do oi mase neganai, tau ta ia mai bona oi ia hamauria. Unai tauna ese unai dika amo oi ia abia siri bona ia gwau: “Dika do oi davaria lasi”! neganai, emu gari ia ore. Oi mamia oi be mai emu abiatorehai unai tauna dekenai, ani? Momokani, ia dainai oi mauri.

² Dala haida ai, unai haheitalai ese Iehova be ita totona ia karaia gauna ia hahedinaraia. Momokani, ia dekenai ita be mai eda abiatorehai. Oibe, ia ese mauri davana ia henia, unai amo dala ia kehoa kara dika bona mase amo ita ia hamauria. Unai dava bada boubouna ita abidadama henia noho dainai, ita diba iseda kara dika do ia gwauatao bona iseda vaira negana be do ia namo, unai ita diba dainai iseda mamina ia goada. (1 Ioane 1:7; 4:9) Karoa 14 ai ita itaia bamona, mauri davana be Iehova ese ena lalokau bona ena hahemaoro goeva ia hahedinaraia dalana hereadaena. Unai dainai dahaka ita karaia be namo?

³ Iseda lalokau Hamauria Tauna be ita amo ia noia gauna ita laloa be namo. Iehova be peroveta tauna Mika amo ia gwau: “Tau e, Iehova ese oi dekenai dahaka be maoro ia hadibaia vadaeni. Bona ia ura dahaka do oi karaia? Hahemaoro goevana bona badinaia karana do oi hahedinaraia, bona mai manau danu emu Dirava ida do oi raka!” (Mika 6:8) Iehova be ita amo ia noia gauna ta be “hahemaoro goevana” ita karaia. Edena bamona ita karaia diba?

 4. Edena bamona ita diba Iehova ia ura iena kara maoromaoro taravatudia ita badinaia?

⁴ Iehova ia ura iena taravatu hegeregerena ai, dahaka be maoro bona dahaka be kerere ita badinaia. Iena taravatu be maoromaoro dainai, ita badinaia neganai, ita ese hahemaoro goeva bona kara maoromaoro ita karaia unai. Isaia 1:17 ia gwau: “Kara namo karaia dalana umui diba, kara maoromaoro umui tahua.” Dirava ena Hereva ese ita ia hagoadaia “kara maoromaoro [ita] tahua” totona. (Sefanaia 2:3) Ita ia hagoadaia danu “kara matamata umui atoa be namo. Unai kara be Dirava ena ura hegeregerena ia vara, ia maoromaoro momokani.” (Efeso 4:24) Kara maoromaoro momokani—hahemaoro goeva unai—ese dagedage, kara mirodia, bona matabodaga karadia ia dadaraia, badina unai bamona kara be helaga karana idia hadikaia.​—Salamo 11:5; Efeso 5:3-5.

5, 6. (a) Dahaka dainai Iehova ena taravatu ita badinaia karana be maduna metauna lasi? (b) Baibel ese edena dala ai ia hahedinaraia, kara maoromaoro be hanaihanai ita karaia noho karana ta?

⁵ Iehova ena kara maoromaoro taravatu ita badinaia karana be maduna metauna, a? Lasi. Mai ena kudouna ibounai ida Iehova ia lalokau henia tauna do ia laloa lasi Iehova ena taravatu be metau. Iseda Dirava bona ena kara ibounai ita lalokau henia dainai, ita ura iseda mauri dalana amo ia ita hamoalea. (1 Ioane 5:3) Laloaboio lasi, Iehova be “kara maoromaoro ia ura henia.” (Salamo 11:7) Bema ita ura momokani Dirava ena hahemaoro goeva, eiava kara maoromaoro ita tohotohoa, namona be Iehova ia lalokau henia gaudia ita lalokau henia bona ia inai henia gaudia ita inai henia.​—Salamo 97:10.

⁶ Goevadae lasi taudia idia hekwarahi bada kara maoromaoro idia karaia totona. Namona be mauri gunana mai ena kara dikadia ita kokia bona mauri matamata ita atoa. Baibel ia gwau diba maoromaoro dainai “mauri ia matamata ia lao noho.” (Kolose 3:9, 10) Baibel idia torea gado ginigunana ai, inai hereva “mauri matamata ia lao noho” ena anina be, ia hekwarahi unai kara be hanaihanai ia karaia totona. Herevana ita hekwarahi bada kara maoromaoro ita karaia totona, to ita goevadae lasi dainai nega haida iseda lalohadai, hereva eiava kara dekenai ita kerere.​—Roma 7:14-20; Iamesi 3:2.

 7. Kara maoromaoro karaia totona ita hekwarahi lalonai bema ita moru, edena bamona unai ita laloa be namo?

⁷ Kara maoromaoro karaia totona ita hekwarahi lalonai bema ita moru, edena bamona unai ita laloa be namo? Momokani, namo lasi kara dika ita laloa maragi. Danu, namo lasi ita hesiku, bona ita laloa ita kerere dainai ita hegeregere lasi Iehova ita hesiai henia totona. Iseda hebogahisi Diravana ese dala ia karaia vadaeni, mai momokani ida idia helalo-kerehai taudia be ena lalo-namo idia abia lou totona. Aposetolo Ioane ena hagoadaia herevadia mani oi laloa, ia gwau: “Umui lau tore henia, unai amo kara dika ta do umui karaia lasi.” To ma ia gwau: “Bema ta ese kara dika ta ia karaia, [ia goevadae lasi dainai] ita be mai iseda durua tauna, ia be Tamana ida ia noho, Iesu Keriso.” (1 Ioane 2:1) Oibe, Iehova ese Iesu ena mauri davalaia boubouna ia henia, unai amo Dirava ese iseda hesiai gaukarana ia abia dae diba, ena be ita be goevadae lasi taudia. Unai ese ita ia veria Iehova ita hamoalea totona, ani?

8, 9. Sivarai namona harorolaia karana ese edena dala ai Iehova ena hahemaoro goeva ia hahedinaraia?

⁸ Dirava ena Basileia sivarai namona be ma haida dekenai ita harorolaia neganai, Dirava ena hahemaoro goeva ita hahedinaraia eiava ita tohotohoa unai. Iehova ena hahemaoro goeva bona sivarai namona be edena dala ai idia gaukara hebou?

⁹ Iehova ese inai tanobada dikana do ia hadibaia guna, gabeai do ia hadikaia ore. Iesu ese nega dokona ai do idia vara gaudia ia perovetalaia neganai, ia gwau: “Bese ibounai dekenai sivarai namona do idia harorolaia guna.” (Mareko 13:10; Mataio 24:3) Inai hereva “guna” ese ia hahedinaraia, tanobada ibounai haroro gaukarana murinai gau ma haida do idia vara. Idia ta be Baibel ese ia perovetalaia hisihisi badana, kara dika taudia ibounai do ia haorea bona kara maoromaoro tanobada matamatana ena dala do ia lailaia. (Mataio 24:14, 21, 22) Momokani, tau ta ia gwau diba lasi Iehova ese kara dika taudia dekenai hahemaoro goeva ia hahedinaraia lasi. Ena hadibaia herevana ia halasia dainai, unai bamona taudia dekenai nega ia henia edia mauri do idia haidaua, bona unai dika badana amo do idia heau mauri diba.​—Iona 3:1-10.

10, 11. Sivarai namona ita harorolaia karana ese edena dala ai Dirava ena hahemaoro goeva ia hahedinaraia?

¹⁰ Sivarai namona ita harorolaia karana ese edena dala ai Dirava ena hahemaoro goeva ia hahedinaraia? Gau ginigunana be, ita hekwarahi ma haida ita durua mauri do idia abia be maoro. Ia mutu noho bouti amo oi idia hamauria karana, mani oi laloa lou. Oi idia hamauria boutina lalonai oi noho neganai, oi ura momokani ranu lalonai idia do noho taudia ma haida oi durua. Unai hegeregerena, ita be mai iseda maduna, inai tanobada dikana ena “ranu” lalonai idia do hekwarahi noho taudia ita hamauria totona. Momokani, momo ese iseda sivarai idia dadaraia. To Iehova ia do haheauka noho lalonai, ita be mai iseda maduna taunimanima ita durua “idia helalo-kerehai” totona, unai amo idia mauri diba.​—2 Petero 3:9.

¹¹ Ita davaria taudia ibounai dekenai ita haroro neganai, hahemaoro goeva be mai anina bada dala ma ta ai ita hahedinaraia: Taunimanima edia toana ita laloa lasi. Laloatao, “Dirava be taunimanima edia toana ia laloa lasi, to bese ibounai lalonai ia idia gari henia bona kara maoromaoro idia karaia taudia be ia ese ia abia dae.” (Kara 10:34, 35) Bema ita ura Dirava ena hahemaoro goeva ita tohotohoa, namona be taunimanima ita hahemaoro henidia haraga lasi. To, ma haida dekenai sivarai namona ita gwauraia, herevana idia be edena bese amo, idia be mai edia dagi o lasi, eiava idia be taga o ogogami taudia. Unai amo dala ita kehoa taunimanima ibounai ese sivarai namona idia kamonai bona idia abia dae totona.​—Roma 10:11-13.

12, 13. (a) Dahaka dainai ma haida ita hahemaoro henia haraga lasi be namo? (b) Iesu ena sisiba, “ma haida hahemaoro henia karana umui hadokoa,” ena anina be dahaka? (Futnout itaia danu.)

¹² Hahemaoro goeva ita hahedinaraia diba danu, bema Iehova ese ita ia kara henia hegeregerena ma haida ita kara henia. Nega momo ma haida edia kara dainai idia ita hahemaoro henia, edia kerere bona kara ita maumauraia haraga. To ita amo daika ia ura Iehova ese iseda kara bona kerere be hebogahisi lasi dalanai ia tahua? Iehova ese unai bamona ita ia kara henia lasi. Salamo torea tauna ia gwau: “Iah e, Bema oi be kerere ibounai oi itaia noho, Iehova e, daika be emu vairana ai ia gini diba? (Salamo 130:3) Iseda kara maoromaoro bona hebogahisi Diravana be iseda kerere ia laloa lasi dainai, ia ita tanikiu henia be namo, ani? (Salamo 103:8-10) Vadaeni, edena bamona ma haida ita kara henia be namo?

¹³ Bema Dirava ena hahemaoro goeva mai ena hebogahisi ita lalo-pararalaia, ma haida dekenai idia vara gaudia eiava anina lasi gaudia dainai idia ita hahemaoro henidia haraga lasi. Iesu ena Ororo Harorona lalonai, ia gwau: “Ma haida hahemaoro henia karana umui hadokoa, vadaeni Dirava ese umui do ia hahemaoro henia lasi.” (Mataio 7:1) Luka ena sivarai hegeregerena Iesu ia gwau: “Ma haida umui gwauraia dika lasi, vadaeni Dirava ese umui do ia gwauraia dika lasi.”a (Luka 6:37) Iesu ia hahedinaraia ia be goevadae lasi taudia edia kara ia diba, idia be vaia ma haida idia hahemaoro henia haraga. Bema idia kamonai noho taudia haida edia kara be ma haida idia hahemaoro henia auka, unai kara idia hadokoa be namo.

14. Dahaka dainai ma haida ita “hahemaoro henia” karana ita hadokoa be namo?

¹⁴ Dahaka dainai ma haida ita “hahemaoro henia” karana ita hadokoa be namo? Badina iseda siahu be mai ena hetoana. Hahediba tauna Iamesi ese ita ia hadibaia lou, ia gwau: “Taravatu Henia Tauna bona Hahemaoro Tauna be tamona.”​—Iehova unai. Unai dainai Iamesi ia henanadai: “Oi be daika emu dekena tauna oi hahemaoro henia noho?” (Iamesi 4:12; Roma 14:1-4) Danu, ita be goevadae lasi taudia dainai, unai ese iseda hahemaoro karana ia hagagevaia diba. Iseda lalohadai idauidau—ma haida lalo-dika henia kava, taunimanima ese oi idia kara namo henia lasi dainai oi moale lasi, mama, bona sibona ena kara maoromaoro hekokorokulaia karana—ese iseda lalohadai taunimanima dekenai ia hagagevaia diba. Ita be mai iseda manoka ma haida danu, unai ita laloa namonamo neganai, ma haida edia kerere do ita tahua haraga lasi. Taunimanima edia lalohadai ita diba lasi, bona edia noho daladia ta ta danu ita diba lasi. Unai dainai, ita be daika, iseda tadikaka edia kara ita lalo-dika henia eiava edia gaukara Dirava ena hesiai gaukarana lalonai ita maumauraia? Namona be Iehova ita tohotohoa bona iseda tadikaka bona taihu edia kara namodia ita tahua, bona edia kerere maragidia ita laloa lasi!

15. Edena hereva bona kara be Dirava idia tomadiho henia taudia huanai ia vara lasi be namo, bona dahaka dainai?

¹⁵ Iseda ruma bese taudia be edena bamona? Madi, hari inai negai, ma ta hahemaoro henia auka karana be maino ia noho be namo gabuna—ruma bese—lalonai ia vara. Nega momo tatau, hahine, eiava tama sina edia sivarai ita kamonai, idia ese hanaihanai edia ruma bese taudia idia gwau henidia, eiava idia botaia. To hadikaia herevadia, lalona hahisia herevadia, bona taunimanima hadikaia karadia be Dirava idia tomadiho henia taudia ese idia gwauraia lasi be namo. (Efeso 4:29, 31; 5:33; 6:4) Iesu ena sisiba taunimanima “hahemaoro henia lasi” karana, be ruma bese lalonai ita badinaia danu. Namona be ita laloatao, hahemaoro goeva ena anina be ma haida ita kara henia Iehova ese ita ia kara henia hegeregerena. Bona iseda Dirava be ita ia kara auka eiava ia dagedage henia diba lasi. To, ia idia lalokau henia taudia ia “lalokau” henidia. (Iamesi 5:11) Iena haheitalai hereadaena ita tohotohoa be namo!

16, 17. (a) Iehova ia ura elda taudia be dahaka idia karaia? (b) Kara dika tauna be mai momokani ida ia helalo-kerehai lasi neganai, elda taudia ese dahaka idia karaia, bona dahaka dainai?

¹⁶ Ita ibounai be mai iseda maduna hahemaoro goeva ita hahedinaraia totona, to elda taudia be mai edia maduna badana unai kara idia hahedinaraia totona. Isaia ena peroveta herevana amo “gunalaia taudia,” eiava elda taudia ia gwauraia dalana mani oi itaia, ia gwau: “Itaia, king ta be kara maoromaoro totona do ia lohia, bona gunalaia taudia be kota maoromaoro totona do idia lohia.” (Isaia 32:1) Oibe, Iehova ia ura elda taudia edia gaukara dalana amo hahemaoro goeva idia hahedinaraia. Edena bamona unai idia karaia diba?

¹⁷ Unai lauma dalanai idia goada tatau idia diba namonamo, hahemaoro goeva eiava kara maoromaoro ena anina be kongregesen do ia goeva be namo. Nega haida, elda taudia ese kara dika badana idia karaia taudia idia hahemaoro henidia. Unai bamona idia karaia neganai namona be idia laloatao, Dirava ena hahemaoro goeva be taunimanima dekenai ia hebogahisi, bema dala ia noho. Unai dainai kara dika tauna idia durua ia helalo-kerehai totona. To bema elda taudia idia hekwarahi unai tauna idia durua totona, to ia be mai momokani ida ia helalo-kerehai lasi, be edena bamona? Iehova ena Hereva ia gwau kara ta idia karaia be namo: “Kara dika tauna be emui huana amo umui kokia.” Anina be kongrigeisen amo idia atoa siri. (1 Korinto 5:11-13; 2 Ioane 9-11) Elda taudia be unai idia karaia neganai idia moale lasi, to idia lalo-parara unai bamona idia karaia be maoro, unai amo kongrigeisen be kara miro amo idia gimaia bona lauma dalanai ia goeva. Ena be unai ia vara, to idia ura nega ta unai kara dika tauna do ia helalo-kerehai bona kongrigeisen dekenai ia giroa lou.​—Luka 15:17, 18.

18. Elda taudia ese Baibel ena sisiba be ma haida dekenai idia henia neganai, dahaka idia laloatao be namo?

¹⁸ Elda taudia be mai hahemaoro goeva ida edia gaukara idia karaia anina be hekwakwanai negadia ai, Baibel amo sisiba idia henia danu. Oibe, idia be ma haida edia kara kerere maragidia idia tahua lasi. Eiava idia ura lasi nega ibounai ta idia sisiba henia. To tadikaka ta be reana ia lalo-parara lasi bona “dala kererena ai ia raka bona ia diba lasi.” Namona be elda taudia idia laloatao, Dirava ena hahemaoro goeva be ia dagedage lasi bona haida edia hemami ia laloa. Unai ese elda taudia ia veria ia kara dika tauna idia durua neganai, “mai manau ida umui hamaoromaoroa.” (Galatia 6:1) Unai dainai, elda taudia ese kara dika tauna do idia gwau henia lasi eiava do idia hereva auka henia lasi. To, mai lalokau ida idia henia sisibana ese ia kamonai tauna do ia hagoadaia. Elda taudia be kerere tauna dekenai sisiba aukana—dala kererena ia badinaia dainai ia abia metauna—idia gwauraia neganai namona be idia laloatao, ia be Iehova ena mamoe ta.b (Luka 15:7) Elda taudia ese mai edia lalokau ida sisiba idia henia neganai, reana unai sisiba ese ia kerere tauna ia durua diba.

19. Elda taudia ese dahaka abia hidi idia karaia, bona unai idia karaia neganai, dahaka ese idia ia hakaua be namo?

¹⁹ Nega haida elda taudia ese abia hidi haida do idia karaia, bona edia tadikaka dekenai unai be mai anina bada. Hegeregere, nega ta ta ai elda taudia idia hebou bona idia itaia bema kongrigeisen ai tadikaka haida idia hegeregere elda eiava hesiai tauna ai do idia lao. Elda taudia idia diba gau badana be taunimanima edia toana idia laloa bada lasi. Dirava ena taravatu idia badinaia unai bamona abia hidi idia karaia totona, to sibodia edia lalohadai hegeregerena idia karaia lasi. Unai amo “maka tamona ai taunimanima ibounai oi kara henia.”​—1 Timoteo 5:21.

20, 21. (a) Elda taudia idia hekwarahi dahaka idia karaia totona, bona dahaka dainai? (b) Elda taudia be dahaka idia karaia diba idia “lalometau taudia” idia durua totona?

²⁰ Elda taudia ese Dirava ena hahemaoro goeva be dala ma haida ai idia hahedinaraia danu. Isaia ia peroveta elda taudia be “kota maoromaoro” totona do idia gaukara, unai murinai ia gwau: “Lai bada negana ai idia ta ta be hunia gabuna bamona, medu bada negana ai idia be heau mauri gabuna ta bamona, idia be ranu lasi tanona ai ia aru sinavai bamona, idia be tano kaukauna ai ia noho nadi badana ena ikerukeru bamona.” (Isaia 32:1, 2) Unai dainai, elda taudia idia hekwarahi edia tadikaka idia hagoadaia bona durua totona.

²¹ Hari inai negai, hekwakwanai idauidau ese taunimanima edia lalona ia hamanokaia dainai, momo ese hahegoada herevadia idia abia be gau badana. Elda taudia e, dahaka umui karaia diba “lalometau taudia” umui durua totona? (1 Tesalonika 5:14) Edia hereva oi kamonai bona idia mamia gauna oi mamia danu. (Iamesi 1:19) Reana idia ura edia laloa metau gaudia be idia abidadama henia tauna ida idia herevalaia. (Aonega Herevadia 12:25) Oi hamaorodia Iehova bona edia tadikaka bona taihu danu ese idia ura henidia, idia lalodia bada, bona idia lalokau henidia. (1 Petero 1:22; 5:6, 7) Danu, unai taudia ida oi guriguri hebou eiava idia totona oi guriguri. Elda tauna be mai ena kudouna ibounai ida idia totona ia guriguri idia kamonai, unai ese idia ia hagoadaia bada diba. (Iamesi 5:14, 15) Lalometau taudia durua totona oi hekwarahi karana be hahemaoro goeva Diravana ese ia itaia.

22. Edena dala idauidau ai Iehova ena hahemaoro goevana ita tohotohoa diba, bona unai ese dahaka do ia havaraia?

²² Momokani, Iehova ena hahemaoro goeva ita tohotohoa karana amo, ia kahirakahira momokani ita lao! Iehova ena kara maoromaoro taravatu ita badinaia, mauri ia henia sivarai namona be ma haida dekenai ita herevalaia, bona ma haida edia kerere ita tahua lasi to edia kara namodia ita tahua neganai, ita be Dirava ena hahemaoro goeva ita hahedinaraia unai. Elda taudia e, kongregesen ia goeva totona umui gimaia, Baibel ena hagoadaia sisiba umui henia, taunimanima ibounai be maka tamona dekenai umui kara henia, bona lalomanoka taudia umui hagoadaia neganai, Dirava ena hahemaoro goeva umui hahedinaraia unai. Iehova be guba amo ia itaia ena taunimanima be ia ida idia raka totona, idia hekwarahi ‘hahemaoro goeva’ dalana idia badinaia neganai, ia moale bada!