Iehova be Haheauka Diravana

“Lau Lohiabada be bogahisihisi bona hariharibada Diravana. Lau be badu dekenai lau haraga lasi, to bogahisihisi bona lalokau dekenai lau be haraga.”​—⁠ESODO 34:⁠6.

1, 2. (a) Gunaguna daidia ese Iehova ena haheauka dainai namo idia davaria? (b) Inai hereva “haheauka” ena anina be dahaka?

NOA ena negai idia noho taudia, tano gagaena dekenai Mose ida idia loaloa Israela taudia, Iesu be tanobada dekenai ia noho negana ena Iuda taudia​—⁠idia ibounai edia noho dalana be idauidau. To idia ibounai ese Iehova ena kara namona ta dainai namo idia davaria​—⁠unai kara be haheauka. Idia haida ese unai kara dainai hahemauri idia davaria. Bona Iehova ena haheauka dainai hahemauri ita davaria diba danu.

² Haheauka ena anina be dahaka? Edena negai Iehova ese ia hahedinaraia, bona dahaka dainai? “Haheauka” ena anina idia gwauraia “dika ta eiava habadua karana ta lalonai gini goada karana, ia dika ia lao hetura karana do ia namo lou ena helaro ia haboioa lasi karana ida idia hakapua.” Unai dainai ita haheauka be mai ena badina. Ena badina dainai dika ia havaraia tauna dekenai namo havaraia totona ita haheauka. To, ena be ita haheauka to kara dika ita abia dae lasi. Ita haheauka ena badina ia guguru neganai eiava ita haheauka noho be anina lasi neganai, haheauka ia ore.

 3. Iehova ia haheauka ena badina be dahaka, bona edena negai do ia ore?

³ Taunimanima ese haheauka idia hahedinaraia diba, to Iehova be unai kara ena haheitalai hereadaena. Iehova ese ia havaraia taunimanima edia hetura karana ia ida be kara dika dainai ia dika ia lao negana amo, ita ia Havaraia Tauna ese haheauka ia hahedinaraia bona dala ia kehoa, idia helalo-kerehai taudia be ia ida edia hetura karana idia hanamoa totona. (2 Petero 3:9; 1 Ioane 4:10) To ena haheauka ena badina ia guguru neganai, Dirava ese mai edia ura ida kara dika idia karaia taudia do ia hahemaoro henia, bona hari inai tanobada dikana ena oromana do ia hadikaia ore.​—⁠2 Petero 3:⁠7.

Dirava Ena Kara Badadia ida Ia Hegeregere

 4. (a) Heberu Revarevadia lalonai haheauka karana be edena bamona idia hahedinaraia? (Futnout itaia danu.) (b) Edena dala ai Nahumu ese Iehova ia herevalaia, bona unai ese Iehova ena haheauka karana dekenai dahaka ia hahedinaraia?

⁴ Heberu Revarevadia lalonai, haheauka karana be Heberu herevadia rua amo idia hahedinaraia, edia anina korikorina be “udu baubau matuna edia lata” bona New World Translation Baibel lalonai idia hahanaia “badu haraga lasi.”a Peroveta tauna Nahumu ese Dirava ena haheauka ia herevalaia neganai, ia gwau: “Lohiabada be ia badu haraga lasi, to ia be mai ena siahu bada herea. Lohiabada ese kerere taudia edia dika davana, be do ia henia momokani.” (Nahumu 1:⁠3) Unai dainai, Iehova ena haheauka be manoka ena toana lasi bona ia be mai ena hetoana. Siahu Ibounai Diravana ena siahu be bada bona nega tamona ai ia badu haraga lasi ese ia hahedinaraia mai ena ura ida ena kara ia biagua bena haheauka ia hahedinaraia. Ia be mai ena siahu panisi henia totona, to maoromaoro ia karaia lasi, badina ia ura ia kara dika tauna dekenai dala ia kehoa ena kara ia haidaua totona. (Esekiela 18:​31, 32) Unai dainai, Iehova ena haheauka ese ia hahedinaraia ena lalokau be bada bona ia ese mai aonega ida ena siahu ia gaukaralaia.

 5. Edena dala ai Iehova ena haheauka be ena kota maoromaoro ida ia hegeregere?

⁵ Danu, Iehova ena haheauka be ena kota maoromaoro bona kara maoromaoro ida ia hegeregere. Mose dekenai ia sibona ia hahedinaraia neganai, ia gwau: “Lau Lohiabada be bogahisihisi bona hariharibada Diravana. Lau be badu dekenai lau haraga lasi [eiava lau haheauka], to bogahisihisi bona lalokau dekenai lau be haraga.” (Esodo 34:⁠6) Lagani momo murinai, Mose ese ane amo Iehova ia hanamoa, ia gwau: “Iena dala ibounai be maoro, bona iena kota be momokani. Ia be abidadama ena Diravana, ia kara dika lasi. Ia be momokani bona maoromaoro.” (Deuteronomi 32:⁠4) Oibe, Iehova ena hebogahisi, haheauka, kota maoromaoro, bona kara maoromaoro ese namo idia havaraia hebou.

Abata Ia Do Vara Lasi Negana ai Iehova Ia Haheauka

 6. Edena dala badana ai Iehova ese ia hamomokania Adamu bona Heva edia natudia ia haheauka henia?

⁶ Adamu bona Heva be Eden lalonai idia gwau-edeede dainai edia hetura karana idia ia lalokau henia Havaraia Tauna, Iehova, ida idia hadikaia momokani. (Genese 3:​8-13, 23, 24) Unai dainai edia natudia ese kara dika, goevadae lasi maurina, bona mase idia abia. (Roma 5:​17-19) Ena be tau bona hahine ginigunadia be mai edia ura ida idia kara dika, to Iehova ese maoromaoro idia ia hadikaia lasi dainai natudia idia havaraia diba. Gabeai, mai lalokau ida dala ia kehoa, Adamu bona Heva edia natudia be ia ida maino ai do idia noho totona. (Ioane 3:​16, 36) Aposetolo Paulo ia gwau: “Dirava ese iena lalokau badana ia hedinaraia ita dekenai, badina ita be do kara dika noho taudia neganai, Keriso be ita dainai ia mase. Iesu ena rarana dainai, Dirava ena vairanai ita be maoromaoro vadaeni, ani? Unai dainai . . . Dirava ena badu Dinana dekena amo ita do ia hamauria. Guna ita maino lasi Dirava dekenai, to iena Natuna ia mase dekena amo maino ia karaia, vadaeni Dirava bona ita be turana vadaeni. Oibe, hari ita be Dirava ena turana, unai dainai . . . Keriso ese ita do ia hamauria!”​—⁠Roma 5:​8-10.

 7. Abata ia do vara lasi negana ai Iehova ese edena dala ai haheauka ia hahedinaraia, bona dahaka dainai unai negai idia noho taudia ia hadikaia ore be maoro?

⁷ Iehova ena haheauka be Noa ena negai ia hedinarai. Lagani handred bamona Abata ia do vara lasi negana ai, “Dirava ese tanobada ia itaia, ia dika rohoroho vadaeni, badina taunimanima ibounai edia kara be dika momokani.” (Genese 6:12) To, nega sisina lalonai, Iehova ese taunimanima dekenai haheauka ia hahedinaraia. Ia gwau: “Egu lauma be nega ibounai taunimanima edia lalonai do ia noho lasi, badina idia be hidio sibona. Hari ia lao, edia mauri lagani be dohore lagani 120 sibona.” (Genese 6:⁠3) Unai lagani 120 ese Noa dekenai nega ia henia, ruma bese ia havaraia totona bona​—⁠Dirava ena oda ia abia neganai​—⁠lagatoi ia haginia bona Abata do ia mai sivaraina be iena negai idia noho taudia dekenai ia hadibaia totona. Aposetolo Petero ia gwau: “Dirava ese davana ia henidia haraga lasi. Lasi, to mai haheauka danu idia ia naria noho, Noa ese lagatoi ia karaia neganai. Lagatoi lalonai idia noho taudia, ibounai 8 sibona be ranu dekena amo idia mauri.” (1 Petero 3:20) Momokani, taunimanima ese Noa ena haroro herevana “idia laloa lasi,” iena ruma bese sibona. (Mataio 24:​38, 39) Noa ese lagatoi ia haginia bona lagani momo lalonai “kara maoromaoro ia harorolaia” karadia amo, Iehova ese Noa ena negai idia noho taudia dekenai dala ia kehoa, edia dagedage karadia amo idia helalo-kerehai bona Ia idia hesiai henia totona. (2 Petero 2:5; Heberu 11:⁠7) Gabeai, unai uru dikana ia hadikaia ore be maoro momokani.

Israela Besena Dekenai Haheauka Bada Ia Hahedinaraia

 8. Edena dala ai Iehova ese Israela besena dekenai haheauka ia hahedinaraia?

⁸ Iehova ese Israela taudia ia haheauka henia negana ena lata be lagani 120 ia hanaia. Lagani 1,500 mai kahana lalonai idia be Dirava ia abia hidi besena, bona nega haida sibona lalonai Israela taudia ese Dirava ena haheauka idia tohoa lasi. Iehova ese hoa dalanai Aigupito amo idia ia hamauria bena pura haida sibona murinai, kaivakuku idia tomadiho henia, unai amo idia ia Hamauria Tauna dekenai hemataurai lasi karana badana idia hahedinaraia. (Esodo 32:4; Salamo 106:21) Unai murinai lagani 40 lalonai, Israela taudia be Iehova ese tano gagaena ai hoa dalanai ia henia aniani bona Mose bona Arona idia maumauraia, Iehova idia gwauraia dika, dirava koikoi tomadiho henia taudia ida idia sihari kava, bona Bala idia tomadiho henia danu. (Numera 11:​4-6; 14:​2-4; 21:5; 25:​1-3; 1 Korinto 10:​6-11) Iehova ese ena taunimanima ia hadikaia ore be maoro, to ia ese haheauka ia hahedinaraia.​—⁠Numera 14:​11-21.

 9. Edena dala ai Iehova ese Hahemaoro Taudia bona king taudia edia nega ai ia hahedinaraia ia be haheauka Diravana?

⁹ Hahemaoro taudia edia negai, Israela taudia ese kaivakuku idia tomadiho henidia loulou. Unai idia karaia neganai, Iehova ese edia inai taudia edia imana dekenai ia rakatanidia. To idia helalo-kerehai bona heduru totona ia idia noia neganai, ia haheauka henidia bona hahemaoro taudia ia haginia idia ruhadia totona. (Gunalaia Taudia 2:​17, 18) King taudia edia nega daudauna lalonai, king haida sibona ese Iehova idia badinaia. Bona kamonai king taudia edia siahu henunai danu, nega momo taunimanima ese tomadiho momokanina bona tomadiho koikoina idia hakapua. Iehova ese peroveta taudia ia haginia bona kamonai lasi karana idia gwauraia dika, to nega momo taunimanima idia ura kara dika hahelaga taudia bona peroveta taudia koikoidia edia hereva sibona idia kamonai. (Ieremia 5:31; 25:​4-7) Momokani, Israela taudia ese Iehova ena kamonai peroveta taudia idia dagedage henia bona haida idia hamasedia danu. (2 Sivarai 24:​20, 21; Kara 7:​51, 52) To, Iehova ese haheauka ia hahedinaraia noho.​—⁠2 Sivarai 36:⁠15.

Iehova Ia Haheauka Noho

10. Edena negai Iehova ena haheauka ia ore?

¹⁰ To, histori ena sivarai ese ia hahedinaraia Dirava ena haheauka be mai ena hetoana. Lagani 740 B.C.E. ai, Asuria taudia ia koua lasi bona Israela ena iduhu ten basileiana idia hadikaia bona ena taunimanima idia abia mauri. (2 King Taudia 17:​5, 6) Babulonia taudia ia koua lasi dainai lagani 607 B.C.E. ai, Iuda ena iduhu rua basileiana lalonai idia vareai bona Ierusalema bona ena dubu idia hadikaia.​—⁠2 Sivarai 36:​16-19.

11. Iehova ese hahemaoro ia henia neganai edena dala ai haheauka ia hahedinaraia?

¹¹ To, Iehova ese Israela bona Iuda ia hahemaoro henia neganai danu, haheauka ia hahedinaraia. Iehova be ena peroveta tauna Ieremia amo ia hahedinaraia ia abia hidi besena be edia tano dekenai do idia giroa. Ia gwau: “Lagani 70 be Babulonia dekenai do idia ore, vadaeni lau ese umui do lau laloa lou, bona egu gwauhamata umui dekenai do lau hamomokania. Lau ese umui do lau hakaua mai lou inai gabu dekenai. Momokani umui ese lau do umui davaria, . . . Bona bese ibounai edia huanai dekena amo, bona umui lau lulua lao gabudia ibounai dekena amo, umui do lau haboua lou.”​—⁠Ieremia 29:​10, 14.

12. Dahaka ese ia hahedinaraia Iuda orena taudia be Iuda dekenai idia giroa ena badina ta be Dirava ese Mesia ena mai totona ia hegaegae?

¹² Bona momokani, idia abia mauri Iuda orena taudia be Iuda dekenai idia giroa lou bona Ierusalema dekenai idia haginia dubu lalonai Iehova idia tomadiho henia lou. Iehova ena ura ia guguru lalonai, unai orena taudia be Iehova ese “ia siaia hanuaboi ena paripari namona bamona,” goada bona noho namo idia havaraia. Danu, idia gari lasi bona idia goada “laiona, uda dekenai ia noho bamona.” (Mika 5:​7, 8) Reana unai hereva gabena be Maccabee taudia edia nega lalonai ia guguru, badina Iuda taudia be Maccabee besena ena henunai Gwauhamata Tanona amo edia inai taudia idia lulua bona unai taudia ese idia hamiroa dubuna be idia hahelagaia lou. Unai dala ai, unai tano bona dubu idia do noho, bona unuseniai Dirava ena Natuna be Mesia bamona ia hedinarai neganai, kamonai orena taudia ma haida ese ia idia abia dae diba.​—⁠Daniela 9:25; Luka 1:​13-17, 67-79; 3:​15, 21, 22.

13. Iuda taudia ese Iehova ena Natuna idia hamasea murinai danu, edena dala ai idia dekenai haheauka ia hahedinaraia?

¹³ Iuda taudia ese Iehova ena Natuna idia hamasea murinai danu, ia ese lagani toi mai kahana lalonai idia dekenai haheauka ia hahedinaraia bona idia sibona amo taunimanima ia boiria, lauma dalanai Aberahamo ena garana ena kahana ai idia lao totona. (Daniela 9:27)b Lagani 36 C.E. vairanai bona murinai, Iuda taudia haida ese unai boiboi idia abia dae, bona unai dala ai, Paulo be gabeai ia gwauraia bamona, taunimanima orena ese “Dirava idia badinaia noho, iena bogahisihisi dekenai ia abidia hidi taudia sibona inai.”​—⁠Roma 11:⁠5.

14. (a) Lagani 36 C.E. ai, daidia be lauma dalanai Aberahamo ena garana taudia ai idia lao diba? (b) Paulo be ena lalohadai Iehova ese lauma Israela taudia ia abia hidi dalana dekenai be edena bamona ia hahedinaraia?

¹⁴ Lagani 36  C.E. ai, nega ginigunana Iuda lasi bona Iuda tomadiho idia abia dae lasi taudia be lauma dalanai Aberahamo ena garana taudia ai idia lao diba. Unai hahenamo idia abia dae taudia ibounai be Iehova ese ia hebogahisi bona haheauka henidia. (Galatia 3:​26-29; Efeso 2:​4-7) Iehova be hebogahisi bona haheauka ia hahedinaraia dalanai lauma Israela taudia edia namba ibounai ia haboua bona unai kara lalonai ia hedinarai aonega bona palani be Paulo ese ia laloa bada bona ia gwau: “Dirava ena namo bona iena hariharibada be bada bona bada herea, ani? Iena aonega bona iena laloa dobu be edena bamona ita tahua diba? Iena dala be daika ese do ia davaria diba?”​—⁠Roma 11:​25, 26, 33; Galatia 6:​15, 16.

Iena Ladana Dainai Ia Haheauka

15. Dirava ia haheauka ena badina badana be dahaka, bona dahaka henanadai haerelaia totona nega ia henia?

¹⁵ Dahaka dainai Iehova ia haheauka noho? Ena badina badana be iena ladana helagana ia abia isi totona bona ena lohia siahuna ena maoro ia hamomokania totona. (1 Samuela 12:​20-22) Satani be Iehova ese Iena lohia siahuna ia gaukaralaia dalana ia henanadailaia dainai, Iehova ese nega ia henia, Ia havaraia taudia ibounai vairanai unai ia haerelaia namonamo totona. (Iobu 1:​9-11; 42:​2, 5, 6) Unai dainai, ena taunimanima be Aigupito ena igui lalonai idia noho neganai, Iehova be Farao ia hamaoroa: “Inai totona oi dekenai mauri lau henia vadaeni: Lauegu siahu dohore oi itaia, vadaeni tanobada taudia ibounai ese lauegu ladana dohore idia matauraia totona.”​—⁠Esodo 9:⁠16.

16. (a) Edena dala ai Iehova ia haheauka dainai iena ladana totona taunimanima ia abia dae diba? (b) Edena dala ai Iehova ese ena ladana ia hahelagaia bona ena lohia siahuna ena maoro ia hamomokania?

¹⁶ Aposetolo Paulo be Dirava ese Iena ladana helagana hahairaia lalonai haheauka ena gaukara ia herevalaia neganai, Iehova ena hereva Farao dekenai ia gwauraia. Bena Paulo ia gwau: “[Dirava] ia ura be iena badu bona iena siahu do ia hedinaraia. Unai dainai ia ese ia badu henia gaudia dekenai ia haheauka henia ela bona do idia mase ore. Bona ia ura danu iena hairai badana do ia hedinaraia. Ia ese inai hairaina haida ia henia vadaeni ita dekenai. Oibe, mai bogahisihisi danu ia ese ita ia karaia hegaegae vadaeni, iena hairaina do ita abia totona. Badina be ia ese ita ia boiria, ai Iuda taudia sibona lasi, to umui Iuda lasi taudia danu. Dirava be inai bamona Hosea ena Buka lalonai ia hereva, ia gwau: ‘Lauegu bese lasi taudia, be do lau gwauraidia “Lauegu bese.” ’ ” (Roma 9:​17, 22-25) Iehova ia haheauka dainai, “iena ladana” totona idau bese taudia amo taunimanima ia abia dae diba. (Kara 15:​14, NW ) Edia Kwarana, Iesu Keriso, henunai unai “helaga taudia” be Iehova ese Iena ladana badana hahelagaia totona bona Iena lohia siahuna ena maoro ia hamomokania totona ia gaukaralaia Basileiana do idia abia.​—⁠Daniela 2:44; 7:​13, 14, 27; Apokalupo 4:​9-11; 5:​9, 10.

Iehova Ena Haheauka Dainai Hahemauri Ia Vara

17, 18. (a) Ita ura lasi Iehova ena haheauka ita maumauraia to dahaka ita karaia neganai unai ia vara? (b) Ita idia hagoadaia Iehova ena haheauka be edena bamona ita laloa totona?

¹⁷ Taunimanima be nega ginigunana kara dika lalonai idia moru negana amo ema bona hari, Iehova ese ia hahedinaraia ia be haheauka Diravana. Abata ia do vara lasi negana ai, iena haheauka dainai nega ia noho, taunimanima hadibaia bona hahemauri dalana haginia totona. To ia haheauka negana ia ore, bona Abata ia vara. Hari danu be unai bamona, Iehova ese haheauka badana ia hahedinaraia, bona ia haheauka negana ena lata be guna haida idia laloa negana ia hanaia. To, unai ita lalohisihisilaia be badina lasi. Unai ita lalohisihisilaia be hegeregere Dirava ena haheauka ita maumauraia. Paulo ia henanadai: “Dirava ena kara be namo herea oi dekenai, ia badu haraga lasi, bona oiemu kara dika davana be oi dekenai ia henia haraga lasi. Inai Dirava ena kara namodia, oi laloa idia be anina lasi, a? Sedira oi diba lasi, Dirava ena bogahisihisi kara ena badina korikori be inai: Oiemu lalona do oi giroa totona?”​—⁠Roma 2:⁠4.

¹⁸ Ita diba lasi Dirava ese ita ia lalo-namo henia bona hamauria totona lagani hida lalonai ita do ia haheauka henia be namo. Paulo ese ita ia sisiba henia, ‘mai gari bona mai heudeheude danu eda hahemauri ita tahua noho.’ (Filipi 2:12) Aposetolo Petero be ena Keristani tadikaka ia tore henidia, ia gwau: “Lohiabada ia gwauhamata vadaeni, kara haida do ia karaia. Ia ese iena gwauhamata badinaia totona ia hesiku lasi, haida idia laloa bamona. Lasi, to umui totona ia haheauka noho. Badina be ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.”​—⁠2 Petero 3:⁠9.

19. Edena dala ai Iehova ena haheauka dainai namo ita davaria diba?

¹⁹ Unai dainai, namona be Iehova ena gaukara dalana ita hesikulaia lasi. To, namona be Petero ena sisiba ma ta ita badinaia bona ita laloa ‘Lohiabada ese nega ia henia hahemauri totona.’ Daika ena hahemauri? Iseda bona edia namba ita diba lasi “Sivarai Namona” do idia ura idia kamonai taudia edia. (2 Petero 3:15; Mataio 24:14) Unai lalohadai ese ita ia durua Iehova ena haheauka ita laloa bada totona, bona ita ia veria ma haida dekenai haheauka ita hahedinaraia totona.

[Footnotes]

Anina Oi Gwauraia Diba, A?

• Baibel lalonai inai hereva “haheauka” ena anina be dahaka?

• Abata ia do vara lasi negana ai, Babulonia amo idia giroa murinai, bona aposetolo taudia edia negai, Iehova be edena dala ai haheauka ia hahedinaraia?

• Iehova ese haheauka ia hahedinaraia ena badina badana be dahaka?

• Ita ese Iehova ena haheauka be edena bamona ita laloa be namo?

[Picture on page 9]

Abata ia do mai lasi negana ai Iehova ena haheauka dainai, dala ia kehoa taunimanima idia helalo-kerehai totona

[Picture on page 10]

Babulonia ia moru murinai, Iuda taudia ese Iehova ena haheauka dainai namo idia davaria

[Picture on page 11]

Aposetolo taudia edia negai, Iuda taudia bona Iuda lasi taudia ese Iehova ena haheauka dainai namo idia davaria

[Pictures on page 12]

Hari inai negai Keristani taudia idia ura bada Iehova ena haheauka dainai namo idia davaria