Daika ese Iehova Ena Dina amo Do Ia Roho Mauri?

“Dina be ia mai noho, . . . lahi ese idia do ia gabua ore.”​​—⁠MALAKI 4:⁠1.

 1. Malaki be inai tanobada ena oromana dikana do ia ore negana be edena bamona ia herevalaia?

DIRAVA ese peroveta tauna Malaki dekenai iena lauma ia henia, bona ia ese daudau lasi murinai do idia vara gau badadia edia sivarai ia torea. Unai gaudia be tanobada taudia ta ta edia mauri do idia haidaua. Malaki karoa 4:1 ia gwau: “Siahu Ibounai Lohiabada ia gwau, ‘Dina be ia mai noho, hekokoroku bona kara dika taudia ibounai be lahi ese do ia gabudia, rei kaukau ia gabua bamona. Unai dina dekenai lahi ese idia do ia gabua ore momokani, bona idia ta do ia noho lasi.’ ” Inai tanobada ena oromana dikana hadikaia gaukara ena bada be edena bamona? Ia be hegeregere lahi ese rei kaukauna ia gabua ore momokani, bena unai murinai do ia tubu lou diba lasi.

 2. Siri haida be edena dala ai Iehova ena dina idia gwauraia?

² Reana oi henanadai, ‘Malaki ese edena “dina” ia perovetalaia?’ Unai dina be Isaia karoa 13:9 ese ia herevalaia danu, ia gwau: “Momokani, Lohiabada ena dina ia mai noho, mai ena dagedage, bona mai ena badu danu. Mai badu siahu bada herea danu, Dirava ese tanobada do ia hadikaia, bona tanobada ena kara dika taudia do ia hadikadia ore.” Sepanaia 1:15 ese ia herevalaia inai bamona, ia gwau: “Unai dina be badu ena dina, hisihisi bona laloa hekwarahi ena dina, hadikaia kava, bona hadikaia ore ena dina. Dibura bona lalohisihisi ena dina. Ori koremakorema, bona diari lasi ena dina.”

“Hisihisi Bada Herea”

 3. ‘Iehova ena dina’ be dahaka?

³ Malaki ia perovetalaia ‘Iehova ena dina’ ena hagugurua negana badana ai, “hisihisi bada herea” ese unai nega do ia hahedinaraia. Iesu ia gwau: “Unai dinadia lalonai hisihisi bada herea do idia vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi.” (Mataio 24:21) Lagani 1914 amo ema bona hari, tanobada dekenai idia vara hisihisi momo herea mani oi laloa. (Mataio 24:​7-12) Tanobada Tuarina Iharuana sibona lalonai, taunimanima milioni 50 bona ma haida idia mase! To, “hisihisi bada herea” lalonai do idia vara gaudia ese unai do idia hanaia momokani. Unai nega bona Iehova ena dina ena nega edia dokona be Aramagedono, bona unai neganai inai tanobada ena oromana dikana ena dina dokodia do idia ore danu.​—⁠2 Timoteo 3:​1-5, 13; Apokalupo 7:14; 16:​14, 16.

 4. Iehova ena dina ia doko neganai, dahaka ia vara vadaeni?

⁴ Iehova ena dina ia ore neganai, Satani ena tanobada bona ena taunimanima be do idia ore vadaeni. Gau ginigunana be tomadiho koikoi ibounai do ia ore. Bena, Iehova ese Satani ena bisinesi bona politikol oreadia do ia kota henia. (Apokalupo 17:​12-14; 19:​17, 18) Esekiela be inai ia perovetalaia: “Idia ese edia siliva be ariara dekenai do idia negea, edia golo danu, gau mirona bamona, do idia negea lao. Badina be Lohiabada ena badu mai siahu danu dinana dekenai, edia siliva bona golo ese idia do ia hamauria diba lasi.” (Esekiela 7:19) Sepanaia 1:14 ese unai dina ia herevalaia, ia gwau: “Lohiabada ena dina badana be ia kahirakahira vadaeni inai. Ia be ia mai noho haraga.” Baibel ena hereva Iehova ena dina badana dekenai ita laloa neganai, namona be iseda lalona ita hadaia Dirava ena kara maoromaoro taravatudia hegeregerena do ita kara.

 5. Iehova ena hereva idia kamonai henia taudia ese dahaka idia mamia?

⁵ Malaki 4:2 ese Iehova ena dina be Satani ena tanobada dekenai dahaka do ia karaia gaudia ia perovetalaia murinai, ia gwau Iehova ena hereva be inai: “To umui, lauegu hereva umui kamonai henia taudia, be lau ese umui do lau hamauria. Lauegu hamauria siahuna be bada herea, dina ena diari ena goada bamona. Bona inai egu hamauria siahuna ese umui do ia hanamoa, dina ese taunimanima edia kopina ia hasiahua bamona. Vadaeni do umui moale bada, boromakau natudia edia magu dekena amo idia ruhaia negea bamona.” Unai “dina ena diari” be Iesu Keriso. Lauma dalanai ia be “tanobada ena diari.” (Ioane 8:12) Iesu be ena hanamoa karana amo taunimanima ia hadiaria; guna, lauma dalanai ita ia hanamoa, bona hari unai ita mamia; bona dohore, tanobada matamatana lalonai, tauanina edia gorere bona dika ibounai do ia hanamoa. Iehova ia gwau, hanamoa karana idia mamia taudia be “moale bada, boromakau natudia edia magu dekena amo idia ruhaia negea bamona.”

 6. Iehova ena hesiai taudia ese edena bamona kwalimu ariana do idia moalelaia?

⁶ To Iehova ena taravatu idia laloa lasi taudia be edena bamona? Malaki 4:3 ia gwau: “Inai kara do lau karaia dinana dekenai, umui [Dirava ena hesiai taudia] ese kara dika taudia dekena amo do umui kwalimu. Umui ese idia do umui moia diho, tano ena kahu bamona.” Dirava idia tomadiho henia taudia ese Satani ena tanobada do idia hadikaia lasi. To laulau dalanai ‘kara dika taudia idia moia diho,’ Iehova ena dina murinai ia vara kwalimu ariana badana dekenai idia vareai karana amo. Farao bona ena tuari taudia be Davara Kakakakana dekenai idia mase murinai, moale negana badana ia vara. (Esodo 15:​1-21) Hisihisi badana lalonai, Satani bona ena tanobada idia haorea murinai, kwalimu ariana do ia vara. Iehova ena dina amo idia roho mauri abidadama taudia do idia gwau: “Ita ese ita abidadama henia, bona hari ita moale bada noho, ia ese ita ia hamauria dainai.” (Isaia 25:⁠9) Iehova ena lohia siahuna ena maoro ia hamomokania bona ia hagoevaia vadaeni tanobada ena maino ita itaia neganai, do ita moale bada!

Kerisendom ese Israela Ia Tohotohoa

7, 8. Malaki ena negai, lauma dalanai Israela taudia edia noho mani oi gwauraia.

⁷ Iehova idia tomadiho henia taudia ia lalo-namo henia, bona ia idia tomadiho henia lasi taudia ia lalo-namo henia lasi. Malaki be ena buka ia torea neganai, ia be unai bamona danu. Lagani 537 B.C.E. ai, lagani 70 lalodiai Israela taudia be Babulonia dekenai igui hesiai gaukara idia karaia murinai, Israela taudia oredia be edia tano dekenai idia giroa. To murina lagani 100 bamona lalonai, Israela besena ese tomadiho momokani negea karana bona kara dika idauidau idia karaia matamaia. Unai taudia momo ese Iehova ena ladana idia matauraia lasi; iena kara maoromaoro taravatudia idia dadaraia; mata-kepulu, aena dika, bona gorere animal bouboulaia karana amo iena dubu idia hamiroa; bona edia matamata negana ai idia adavaia hahine idia rakatania.

⁸ Unai dainai, Iehova ese idia ia hamaoroa: “Lau be umui dekenai do lau mai, umui do lau kota henia. Lau ese karaharaga inai bamona kara dika taudia do lau samania: Vada idia karaia taudia, heudahanai taudia, kota dekenai idia hereva koikoi taudia, edia gaukara taudia edia davana koikoi dekena amo idia hamaragia taudia, vabu bona ogogami taudia idia hisihisi henidia taudia, bona idau bese taudia idia hadikaia noho taudia. Inai bamona idia karaia noho taudia ese lau idia gari henia lasi. . . . Lau be Lohiabada, bona lauegu kara lau haidaua lasi.” (Malaki 3:​5, 6) To, Iehova ese kara dika idia rakatania taudia ia boiria, ia gwau: ‘Lau dekenai umui giroa mai neganai, umui dekenai do lau giroa lou.’​—⁠Malaki 3:⁠7.

 9. Malaki ena peroveta hereva ia guguru negana ginigunana ai dahaka ia vara?

⁹ Unai hereva be aposetolo taudia edia nega ai idia guguru danu. Iuda taudia oredia be Iehova idia hesiai henia bona horoa Keristani besena matamatana ena kahana ta ai idia lao, bona gabeai Idau Bese taudia idia vareai danu. To Israela taudia korikoridia, kahirakahira iboudiai, be Iesu idia dadaraia. Unai dainai, Iesu ese Israela besena ia hamaoroa: “Emui ruma be do ia noho kava anina lasi.” (Mataio 23:38; 1 Korinto 16:22) Lagani 70 C.E. ai, Malaki 4:1 ia perovetalaia hegeregerena, Israela taudia korikoridia dekenai “dina be ia mai noho, . . . lahi ese idia do ia gabua ore.” Ierusalema bona iena dubu idia hadikaia, bona taunimanima milioni ta bona ma haida idia mase badina idia hitolo, siahu taudia idia tuari heheni, bona Roma ami taudia ese idia dagedage henidia dainai. To, Iehova idia hesiai henia taudia be unai dika amo idia roho mauri.​—⁠Mareko 13:​14-20.

10. Edena dala ai taunimanima bona tomadiho gunalaia taudia ese aposetolo taudia edia negai ia noho Israela besena idia tohotohoa?

¹⁰ Taunimanima momo, Kerisendom danu, ese aposetolo taudia edia negai ia noho Israela besena idia tohotohoa. Nega momo Kerisendom ena taunimanima bona ena gunalaia taudia idia ura sibodia idia haginia tomadiho herevadia idia badinaia, to Dirava ena hereva momokani, Iesu ia hadibaia herevana, idia ura lasi. Dubu gunalaia taudia idia kerere momokani. Iehova ena ladana idia gaukaralaia lasi, bona edia Baibel idauidau amo idia kokia. Iehova ena ladana idia matauraia lasi badina Baibel lalonai idia noho lasi herevadia idia hadibaia, hegeregere hel lahina dekenai hisihisi hanaihanai herevana, Toi Tamona herevana, souli ia mase diba lasi, bona evolusen. Unai amo, Iehova ia abia be maoro hanamoa herevadia idia henaoa bamona, Malaki ena nega ai idia noho hahelaga taudia ese idia karaia hegeregerena.

11. Inai tanobada ena tomadiho oreadia idia hahedinaraia daika idia hesiai henia momokani?

¹¹ Lagani 1914 ai, nega dokona ia matamaia neganai, tanobada ena tomadiho oreadia, sibodia idia gwauraia Keristani tomadiho oreadia danu, idia hahedinaraia daika idia hesiai henia momokani. Tanobada ibounai tuari rua ai, edia memba taudia idia hagoadaia tuari dekenai do idia lao, herevana ena anina be edia tomadiho tamona taudia do idia hamasea danu. Dirava ena Hereva ese Iehova idia kamonai henia bona ia idia kamonai henia lasi taudia edia idau ia hahedinaraia goevagoeva, ia gwau: “Dirava ena natuna taudia be idau, bona Satani ena natuna taudia be ma idau. Edia idau be inai: Kara maoromaoro ia karaia noho lasi tauna be Dirava ena natuna lasi, bona iena tadikakana ia lalokau henia lasi tauna be Dirava ena natuna lasi. Hamatamaia nega dekena amo ia mai bona harihari umui kamonai hadibaia hereva be inai: Ibounai ta ta dekenai do ita lalokau henia. Kaino ena kara bamona do ita karaia lasi, ia be Satani ena tau, bona ia ese iena tadina Abela ia alaia mase.”​—⁠1 Ioane 3:​10-12.

Peroveta Herevana Hagugurua

12, 13. Hari inai negai, Dirava ena hesiai taudia be edena peroveta herevadia idia hagugurua?

¹² Lagani 1918 ai, Tanobada Tuarina Ginigunana ia ore neganai, Iehova ena hesiai taudia idia itaia diba Dirava ese Kerisendom bona tomadiho koikoi ibounai ia gwauraia dika vadaeni. Unai murinai, Dirava ese kudou-maoro taudia ia boiria, ia gwau: “Lauegu orea taudia e, ia dekena amo do umui raka siri, ia danu do umui kara dika hebou garina, bona ia danu panisi do umui abia hebou garina! Badina Babulonia ena kara dikadia be momo herea momokani, ororo bamona idia daekau lao, ela bona guba dekenai. Bona Dirava ese, Babulonia ena kara dikadia do ia laloaboio lasi.” (Apokalupo 18:​4, 5) Iehova idia ura idia hesiai henia taudia be tomadiho koikoi karadia amo sibodia idia hagoevaia matamaia bona Dirava ia haginia vadaeni Basileia ena sivarai namona be tanobada ibounai lalonai idia harorolaia, bona inai tanobada ena oromana dikana ia do ore lasi neganai, unai gaukara do idia haorea.​—⁠Mataio 24:⁠14.

¹³ Unai idia karaia Malaki 4:5 ena peroveta herevana idia hagugurua totona, badina unuseniai Iehova ia gwau: “Inai dina badana do ia ginidae neganai, taunimanima be do idia gari bada momokani. To unai dina do ia ginidae lasi neganai, lau ese peroveta tauna Elia do lau siaia umui dekenai guna.” Ioane Bapatiso ena gaukara be unai peroveta herevana ia hagugurua negana ginigunana, bona Elia ese Ioane ia laulaulaia. Ioane ese Elia ia karaia gaukara ia karaia bamona, Taravatu gwauhamata dekenai edia kara dika amo idia helalo-kerehai Iuda taudia ia bapatiso henia. To gau badana be, Ioane be Mesia ena dala ia lailaia tauna. To, Ioane ena gaukara be unai peroveta herevana ena hagugurua negana ginigunana sibona. Iesu ia gwau Ioane be Elia iharuana neganai, ia hahedinaraia vaira negana ai “Elia” ia karaia bamona gaukara ma ta do ia vara danu.​—⁠Mataio 17:​11, 12.

14. Inai tanobada ena oromana dikana ia do ore lasi neganai, edena mai anina bada gaukara do ia vara guna?

¹⁴ Malaki ena peroveta herevana ia hahedinaraia ‘Iehova ena dina mai garina’ ia do mai lasi neganai, Elia ia karaia bamona gaukara badana do idia haorea. Kahirakahira, Siahu Ibounai Diravana ena tuari Aramagedono ai, unai dina do ia doko. Ena anina be inai tanobada ena oromana dikana ia do ore lasi bona lohia Iesu Keriso henunai Dirava ena guba Basileiana ena Lagani 1,000 Lohia Negana ia do hamatamaia lasi neganai, Elia ia karaia bamona gaukarana ta do ia vara guna. Unai peroveta herevana hegeregerena, Iehova ese inai tanobada dikana ia do hadikaia lasi neganai, hari inai negai Elia oreana taudia, bona tanobada helarona idia abia Keristani taudia ma milioni momo danu, be mai edia goada bona ura ida tomadiho goevana idia hanamoa, Iehova ena ladana idia abia isi, bona mamoe bamona taudia dekenai Baibel ena hereva momokani idia hadibaia noho.

Iehova be Iena Hesiai Taudia Ia Hanamoa

15. Iehova be edena dala ai iena hesiai taudia ia laloatao?

¹⁵ Iehova ese ia idia hesiai henia taudia ia hanamoa. Malaki 3:16 ia gwau: “Gabeai Lohiabada dekenai idia gari henia taudia ese idia ta ta dekenai idia herevahereva, bona Lohiabada ese edia hereva ia kamonai. Vadaeni Lohiabada ese guba dekenai oda ia gwauraia, bona buka ta lalonai be Lohiabada idia gari henia taudia, bona Lohiabada idia matauraia noho taudia edia ladana idia torea.” Abela ena nega murinai, Dirava ese mauri hanaihanai do idia abia taudia ia laloatao totona, buka ta lalonai edia ladadia ia torea bamona. Iehova ese idia dekenai ia gwau: “Umui ese emui kohu bona moni ibounai do umui haria kahana 10, bona unai kahana 10 dekena amo kahana ta do umui mailaia, egu Dubu Helaga dekenai do umui atoa. Unai neganai egu gaukara taudia be mai edia aniani. Lau do umui tohoa karaia. Unai kahana ta lau dekenai do umui henia, vadaeni lauegu kara namona do umui itaia. Lau ese guba ena uindo do lau kehoa, bona gau namodia momo herea umui dekenai do lau bubua diho.”​—⁠Malaki 3:⁠10.

16, 17. Iehova be edena dala ai iena taunimanima bona edia gaukara ia hanamoa?

¹⁶ Iehova ese ia idia hesiai henia taudia ia hanamoa momokani. Edena dala ai? Dala ta be edia lalo-parara iena ura dekenai idia habadaia noho. (Aonega Herevadia 4:18; Daniela 12:10) Dala ma ta be edia haroro gaukara ese huahua namo hereana ia havaraia. Kudou-maoro taudia momo herea ese tomadiho momokani lalonai ita idia bamoa matamaia bona idia be hutuma bada herea. “Idia be bese idauidau, iduhu idauidau, kopina idauidau, bona gado idauidau. . . . Idia boiboi badabada, idia gwau, ‘Taunimanima hamauria siahuna be iseda Dirava ena, helai gabu badana dekenai ia helai Diravana. Inai siahu be Mamoe ena Natuna ena danu.’ ” (Apokalupo 7:​9, 10) Unai hutuma bada herea be dala namo hereana ta ai ia hedinarai, bona tanobada hegegemadai Iehova idia tomadiho henia taudia edia namba be hari milioni 6 ia hanaia bona kongregesen 93,000 lalonai idia noho!

¹⁷ Taunimanima edia histori ibounai lalonai, Iehova ena Witnes taudia edia Baibel herevalaia bukadia bona magasin be tanobada hegegemadai idia halasia momo bukadia bona magasin. Hari, hua ta ta ai, Gima Kohorona bona Awake! magasin edia kopi milioni 90 idia karaia, Gima Kohorona be gado 144 bona Awake! be gado 87 dekenai idia printaia. Lagani 1968 ai, Baibel stadi bukana ta, Mauri Ia Lao Henia Hereva Momokanina bukana idia halasia, bona kopi milioni 107 mai kahana be gado 117 ai idia karaia. Lagani 1982 ai, Mauri Hanaihanai Paradaiso Lalonai bukana idia halasia, bona milioni 81 mai kahana be gado 131 ai idia karaia. Bona lagani 1995 ai, Diba ese Mauri Dekenai Ita Ia Hakaua Lao bukana idia halasia, bona milioni 85 bamona be gado 154 dekenai idia karaia. Lagani 1996 ai, buklet ta, Dirava Ia Ura Dahaka Ita Karaia? idia halasia, bona kopi milioni 150 bamona be hari gado 244 ai idia hariharilaia vadaeni.

18. Ena be dagedage ita davaria, to dahaka dainai lauma dalanai ita taga?

¹⁸ Ena be nega daudau lalonai Satani ena tanobada amo dagedage bada ita abia, to lauma dalanai ita taga. Ia hahedinaraia Isaia 54:17 ena hereva be momokani. “ ‘Tuari gauna ta ese oi do ia hadikaia diba lasi. Bona oi idia samania gwauraia taudia, be oi ese idia edia hereva ibounai do oi koua diba. Lau ese egu hesiai taudia do lau naria namonamo, bona kwalimu idia dekenai do lau henia.’ Lohiabada ese inai bamona ia hereva vadaeni.” Iehova ena hesiai taudia idia diba Malaki 3:17 ena guguru negana badana be idia dekenai ia vara dainai, idia ia durua bada! Ia gwau: “Bona Siahu Ibounai Lohiabada ia gwau, ‘Inai taudia be lauegu taunimanima momokani. Bona unai Dina, lau ese kara ta do lau karaia dinana dekenai, idia be lau sibona egu.’ ”

Iehova Hesiai Henia mai Moale Ida

19. Iehova idia hesiai henia taudia bona idia hesiai henia lasi taudia edia idau be dahaka?

¹⁹ Iehova ena abidadama hesiai taudia bona Satani ena tanobada taudia edia idau ena bada ia hedinarai goevagoeva noho. Malaki 3:18 ia gwau: “Unai neganai lauegu kara ena idau do umui itaia lou, kara maoromaoro taudia dekenai edena bamona do lau karaia, bona kara dika taudia dekenai edena bamona do lau karaia. Oibe, do umui itaia Dirava ena gaukara idia karaia, bona iena gaukara idia karaia lasi taudia dekenai, dahaka do ia vara.” Iehova idia hesiai henia taudia ia hahedinaraia gauna be idia gaukara mai moale bada ida. Ena badina ta be helaro namona idia abia. Iehova idia abidadama henia momokani, ia gwau: “Lau ese tanobada matamata bona guba matamata lau karaia noho, bona kara gunadia be do idia laloa lou lasi, do idia laloaboio momokani. Lau ese lau karaia gauna dainai do umui moale bada ela bona hanaihanai.”​—⁠Isaia 65:​17, 18; Salamo 37:​10, 11, 29; Apokalupo 21:​4, 5.

20. Dahaka dainai ita be moale taudia?

²⁰ Ita ese Iehova ena gwauhamata, ia idia badinaia taudia ese ena dina badana amo do idia roho mauri bona tanobada matamatana lalonai do idia noho, ita abidadama henia. (Sepanaia 2:3; Apokalupo 7:​13, 14) Ena be ia do mai lasi neganai idia haida idia buruka, idia gorere, eiava aksiden idia davaria dainai idia mase, to Iehova ia henia gwauhamatana be idia do ia hatorea isi lou bona mauri hanaihanai do idia abia. (Ioane 5:​28, 29; Tito 1:⁠2) Unai dainai ena be ita ibounai be hekwakwanai idauidau ita davaria, to Iehova ena dina ita naria noho lalonai, badina momo dainai, tanobada taudia ibounai amo ita be moale bada taudia.

Edena Bamona Do Oi Haere?

• ‘Iehova ena dina’ be dahaka?

• Tanobada ena tomadiho oreadia be edena dala ai idaunegai Israela idia tohotohoa?

• Iehova ena hesiai taudia ese edena peroveta herevadia idia hagugurua?

• Iehova be edena dala ai iena taunimanima ia hanamoa?

[Picture on page 27]

Aposetolo edia nega lalonai Ierusalema idia “gabua ore”

[Pictures on page 29]

Iehova ese ia idia hesiai henia taudia ia durua

[Pictures on page 30]

Iehova ena hesiai taudia ese helaro namona idia abia dainai, idia moale momokani