Mataio 11:​28-​30

Egu huaia auna be emui pagana dekenai do umui atoa, lau dekenai diba do umui tahua, badina lau be dagedage lasi bona manau tauna. Vadaeni emui laumana be do idia laga-ani. Badina be lauegu huaia auna be ia metau lasi, bona huaia neganai danu hekwarahi lasi.”

“Lauegu Huaia Auna be Metau Lasi, Bona Huaia Neganai Danu Hekwarahi Lasi”

Mataio 11:29 ai Iesu ia gwau: “Lau dekenai diba do umui tahua.” Iesu amo diba ita abia neganai, ita be iena hahediba taudia ai ita lao. Bona iseda mauri ita gwauhamatalaia bona bapatiso ita abia neganai, ita be iena huaia auna ita huaia. (Mataio 28:​19, 20) Ita be Iesu ena hahediba taudia, bema hanaihanai hebou ena kahana idauidau ita durua. Dahaka dainai? Badina Keristani heboudia dekenai ita be Iesu, iena hadibaia herevadia, bona iena hadibaia dalana ita dibaia.

Keriso ia ura edena huaia auna ita huaia? Unai be ia ese ia huaia gauna​​—⁠Dirava hesiai henia ena maduna hereadaena unai. (Ioane 4:​34; 15:⁠8) Dirava ena taravatu ita badinaia totona namona be ita hekwarahi, to unai maduna be ia metau lasi. Bema ita sibona ese unai huaia auna ita huaia, unai huaia auna be do ia metau. To, bema Dirava ena lauma helaga totona ita guriguri bona Keristani heboudia dekenai Baibel amo idia henia hereva ita kamonai, Dirava amo “siahu badana” do ita abia. (2 Korinto 4:⁠7) Keristani heboudia totona ita hegaegae bona ita haere neganai, iseda lalokau Iehova totona be do ia goada. Bona bema lalokau dainai unai bamona ita karaia, Dirava ena taravatu ita dekenai “be metau lasi.”​​—⁠1 Ioane 5:⁠3.

Taunimanima ibounai be vaia hekwakwanai idauidau idia davaria hegeregere gorere, moni gaukara, bona sibodia edia hekwakwanai ma haida. To unai hekwakwanai ita hanaia totona, namona be taunimanima edia aonega dekenai ita tabekau lasi. Kongrigeisen ena hebou ese ita ia durua ita “laloa momo lasi,” badina Iehova be iseda ura gaudia ia henia bona ita do ia durua hekwakwanai ita hanaia totona. (Mataio 6:​25-​33) Oibe, Keristani heboudia amo Dirava be ena lalokau ita dekenai ia hahedinaraia.

“Lau be Dagedage Lasi Bona Manau Tauna”

Iesu be hanaihanai ia karaia bamona, dubu helaga dekenai ia lao Dirava ena Hereva ia herevalaia totona. Iesu be nega ta dubu dekenai ia lao neganai, Isaia ena lokua toretorena ia duahia: “Lohiabada ena Lauma ese lau ia hahonua. Ia ese lau ia abia hidi vadaeni, Sivarai Namona ogogami taudia dekenai do lau haroro henia. Lau ia siaia vadaeni, idia guia taudia do lau ruhaia totona, bona matakepulu taudia edia matana kehoa hereva do lau gwauraia, bona mai edia bero taudia dekenai mauri do lau henia. Ma danu Lohiabada ese iena taunimanima do ia hamauria, ena nega do lau harorolaia.” (Luka 4:​16, 18, 19) Unai murinai Iesu be ma ia gwau: “Inai umui kamonaia herevana, be hari dina ia momokani vadaeni”! Bema unai negai ita noho, bona unai hereva ita kamonai do ita moale bada.​​—⁠Luka 4:​21.

Manau tauna bona “Mamoe Naria Tauna Badana” Iesu, be ena hahediba taudia ia naria noho. (1 Petero 5:​1-4) Iesu ena hakaua henunai, “hesiai tauna mai ena kamonai, bona mai ena kara maoromaoro” ese tatau haida idia abia hidi, Iehova ena Witnes taudia tanobada hegegemadai idia noho kongrigeisen idia naria totona. (Mataio 24:​45-​47; Tito 1:​5-9) Unai tatau be mai manau ida ‘mamoe oreana ibounai idia naria’ bona hebou idia lao henia hanaihanai amo haheitalai namona idia hahedinaraia. Unai tatau, Dirava ena “harihari gaudia” dekenai tanikiu karana ita hahedinaraia totona, hebou ita lao henia bona hebou ena kahana idauidau ita durua.​​—⁠Kara 15:​30-​33; 20:28; Efeso 4:​8, 11, 12.

“Emui Laumana be Do Idia Laga-Ani”

Keristani heboudia dekenai oi lao neganai, edena bamona oi hahedinaraia unai hebou oi moalelaia? Dala ta be Iesu ena sisiba oi badinaia: “Umui emui kamonai do umui naria namonamo.” (Luka 8:​18) Idia ura dikadika diba idia abia taudia be Iesu ena hereva idia kamonai namonamo. Bona Iesu idia nanadaia ia gwauraia parabole edia anina ia herevalaia dainai, edia laloparara ia bada.​​—⁠Mataio 13:​10-​16.

Unai bamona taudia edia kara ita tohotohoa diba, bema hebou dekenai hereva ita kamonai namonamo. (Mataio 5:​3, 6) Gau ta ese oiemu lalona ia veria lasi totona, namona be hereva ia henia tauna ena hereva oi badinaia. Sibona oi nanadaia: ‘Egu mauri lalonai unai sisiba be edena bamona lau badinaia diba? Edena dala amo unai lau gaukaralaia ma haida lau durua totona? Edena dala amo ma haida dekenai unai lau herevalaia diba?’ Bona danu, hereva henia tauna ese ena hereva badadia durua totona ia gwauraia siridia oi itaia. Bema oi kamonai namonamo, hebou do oi moalelaia bada.

Hebou murinai ma haida ida hebou ai idia herevalaia gaudia umui kikilaia. Unai gaudia badinaia daladia umui herevalaia. Bema unai bamona dala ai ta ta umui hagoadaia heheni, hebou do umui moalelaia bada.