Paraoa Hatubua Muramurana

9, 10. (a) Paraoa hatubua muramurana ena parabole amo Iesu ese dahaka ia hahedinaraia? (b) Baibel lalonai nega momo hatubua muramurana be dahaka ia laulaulaia, bona edena henanadai do ita laloa?

⁹ Taunimanima be gau ta ia tubu dalana idia itaia diba lasi. Iesu ena parabole ma ta lalonai, unai point ia hahedinaraia. Ia gwau: “Guba Basileia be hatubua ena muramura bamona, hahine ta ese ia abia, paraoa momo, hegeregere disi toi danu ia mikisi karaia, ia lao bona inai muramura ese paraoa ibounai ia hatubua, ia bada vadaeni.” (Mat. 13:33) Unai hatubua muramurana be dahaka ia laulaulaia, bona Basileia ena tubu karana dekenai ena anina be dahaka?

¹⁰ Baibel lalonai nega momo hatubua muramura be kara dika ia laulaulaia. Aposetolo Paulo be Korinto kongrigeisen lalonai tau ta ena kara dika ese ma haida do ia hadikaia diba karana ia hahedinaraia totona, paraoa hatubua muramurana ia herevalaia. (1 Kor. 5:​6-8) Vadaeni, Iesu be hatubua muramurana ia herevalaia neganai, ia be gau dikana ta ia gwauraia, a?

11. Gunaguna Israela taudia be edena dala ai hatubua muramurana idia gaukaralaia?

¹¹ Namona be point toi do ita laloa guna bena gabeai unai henanadai do ita haerelaia. Gau ginigunana be, ena be nega haida Iehova ese Pasova ariana dekenai paraoa hatubua muramurana ia abia dae lasi, to nega ma haida ai paraoa mai edia hatubua muramura edia boubou gaudia ia abia dae. Israela tauna be Iehova ese ia henia hahenamo idauidau dainai Dirava ia tanikiu henia totona, gabua beredi mai ena hatubua muramura ia bouboulaia diba. Gabeai, idia bouboulaia gaudia be mai moale ida idia ania.​​—Lev. 7:​11-​15.

12. Baibel lalonai parabole idia torea daladia amo dahaka ita dibaia?

¹² Gau iharuana be, nega haida Baibel ena parabole lalonai idia gaukaralaia gauna ta ese gau namona ia laulaulaia, to ma nega haida ia be gau dikana ia laulaulaia danu. Hegeregere, 1 Petero 5:8 ese Satani be laiona bamona ia gwauraia, badina unai ese ia hahedinaraia ia be dagedage bona mase ia havaraia diba. To, Apokalupo 5:5 ia gwau Iesu be laiona bamona​​—“Iuda iduhuna ena Laiona.” Unai ese hahemaoro mai ena gari lasi karana ia laulaulaia.

13. Kamonai tauna ena hetura karana Dirava ida ia goada ia lao be Keriso ese edena bamona ia hahedinaraia?

¹³ Gau ihatoina be, Iesu ena parabole lalonai ia gwau lasi hatubua muramurana ese paraoa ibounai ia hadikaia bena idia negea. Lasi. To, ia be vaia taunimanima ese paraoa idia karaia dalana ia hahedinaraia sibona. Ruma hahinena be paraoa lalonai hatubua muramura ia atoa bona paraoa ibounai ia bada. Hatubua muramura be paraoa ibounai lalonai ia mikisia, unai dainai ruma hahinena be hatubua muramurana ena gaukara dalana ia itaia diba lasi. Unai ita duahia neganai, uhe ia hadoa bena hanuaboi ia mahuta tauna ena parabole ita laloatao. Iesu ia gwau, “uhe hadoa gauna ia tubu bona ia vara, to hadoa tauna ia diba lasi edena bamona uhe ia tubu.” (Mar. 4:​27) Unai amo Keriso ese kamonai tauna ena hetura karana Dirava ida ia goada ia lao karana ia hahedinaraia! Matamanai, ena kara ia haidaua bona ia goada be iseda matana amo ita itaia lasi, to gabeai ia hedinarai goevagoeva.

14. Hatubua muramura ese paraoa ibounai ia habadaia ena anina haroro gaukara dekenai be dahaka?

¹⁴ Unai parabole ese unai sibona ia hahedinaraia lasi, to inai point ma ta ia hahedinaraia danu: Tanobada hegegemadai kamonai taudia momo be Dirava idia tura henia noho. Parabole lalonai hatubua muramurana ese paraoa ena “disi toi” ia hatubua. (Luka 13:21) Paraoa hatubua muramura hegeregerena, haroro gaukarana dainai hahediba taudia edia namba be ia bada ia lao, bona hari idia ese Basileia ena sivarai namona be “tanobada ena kahana ibounai” dekenai idia harorolaia noho. (Kara 1:8; Mat. 24:14) Unai Basileia harorolaia gaukara badana lalonai ita vareai be hahenamo badana ta!

Hatubua muramurana be paraoa lalonai idia mikisia bona paraoa ia bada hegeregerena, ena be taunimanima edia matana amo idia itaia lasi to kamonai tauna ena hetura karana Dirava ida ia goada ia lao!