Lalokau ese Ia Hatamonadia Lagani ena Hebou Ripotina

JERSEY City, New Jersey, U.S.A. ai, Iehova ena Witnes taudia edia Assembly Hall dekenai idia hebou taudia be moale bada idia davaria. October 3, 2009 ena daba ai, taunimanima 5,000 mai kahana be Watch Tower Bible and Tract Society of Pennsylvania ai lagani ena hebou namba 125 idia abia. United States ena Betele toi bona Canada ena Betele be reidio bona vidio idia gaukaralaia dainai, tadikaka taihu tausen ma haida be unai program idia kamonai bona itaia. Iehova lalokau henia karana ese ia hatamonaia taudia 13,235 be hora toi lalonai unai hebou idia moalelaia.

Hakaua Oreana tauna ta, Geoffrey Jackson, be seamani tauna. Unai program ia kehoa totona, Betele ena grup ta ia boiria ane buka matamatana amo ane idia abia totona. Hakaua Oreana tauna ma ta, David Splane, be unai grup ia gunalaia bona ia gwau, tomadiho momokani lalonai miusiki be mai anina bada. Bena helai taudia ia noia unai hebou lalonai ane matamatadia toi idia abia totona; Betele ena grup ese unai ane idia abia guna, bena gabeai idia bona helai taudia ese ane idia abia hebou. Ena be unai hebou ai grup ta ese ane ia abia, to emui kongrigeisen o hebouhebou badadia bona maragidia ai unai bamona ane abia grup umui karaia be anina lasi.

Brens Haida Ena Ripoti

Idia vadivadi Brens Komiti faiv be edia brens ena ripoti idia kikilaia. Kenneth Little ia gwau, kahirakahira Canada brens ese United States bona Canada edia magasin momo do idia printaia; unai dainai, idia printaia gaudia edia namba be nega ten amo do ia bada. Anina be, unai brens be printa masini matamata do idia hoia​—⁠unai printa be dina tamona lalonai hora 16 ia heau diba.

Reiner Thompson ese Dominican Republic ai Basileia ena gaukara ia kikilaia, bona Albert Olih ese Nigeria ai hesiai gaukara ia kikilaia. Mozambique tadikaka Emile Kritzinger ia gwau, ena be lagani momo lalonai tadikaka ese dagedage idia davaria, to lagani 1992 ai gavamani ese Iehova ena Witnes oreana idia rejista. Hari inai negai, unai tano toi ai pablisa edia namba ia bada ia lao. Australia ena brens tadikaka Viv Mouritz be iseda gaukara East Timor dekenai ia herevalaia, unai tano be Australia brens ese ia naria.

Hakaua Oreana Ena Komiti

Lagani 1976 ai, Iehova ena Witnes taudia edia gaukara ibounai be Hakaua Oreana ena komiti siks ese idia naria matamaia. Gabeai, Hakaua Oreana ese mamoe idaudia amo tadikaka haida idia abia hidi, unai gaukara idia durua totona. Hari unai komiti siks idia durua taudia ibounai be 23. Unai komiti dekenai idia gaukara tadikaka siks be unai hebou dekenai idia inteviu henia. Idia ibounai edia ful-taim hesiai gaukara edia lagani ita haboua neganai, ibounai be 341 bamona​​—⁠idia ta ta be lagani 57 lalonai ful-taim hesiai gaukara idia karaia.

Don Adams, lagani 1943 ai Betele ai ia vareai tauna, ia gwau Hakaua Oreana ena komiti faiv edia kodineita ibounai be Kodineita Edia Komiti lalonai idia gaukara, edia maduna be idia itaia unai komiti faiv be idia gaukara hebou namonamo totona. Danu, unai komiti ese tanobada hegegemadai idia noho Iehova ena Witnes taudia ia durua, bema idia dekenai inai hekwakwanai badadia idia vara: Dagedage, kota karadia, tano mareremarere, bona unai bamona hekwakwanai ma haida.

Dan Molchan ia gwau, Gaukara Taudia Naria Komiti ena maduna be tanobada hegegemadai Betele taudia ibounai 19,851 ia durua Iehova idia tura henia bona tauanina dalanai heduru ia abia totona. David Sinclair ia gwau, Buka Karaia Komiti ena maduna be brens ta ta edia printa masini bona kohu ma haida hoia gaukarana ia naria. Unai murinai, Robert Wallen, lagani 60 bamona Betele ai ia gaukara tauna, ia gwau, Hesiai Komiti ena maduna be Iehova ena taunimanima edia haroro gaukara bona kongrigeisen ia naria. William Malenfant ia gwau, Hadibaia Komiti ena maduna badana be, hebouhebou ena program ia hegaegaelaia. Dokonai, John Wischuk ia gwau, Toretore Komiti ena maduna be Baibel idia herevalaia bukadia, magasin bona pepapepa torea namonamo bona halasia gaukarana ia naria.a

Lagani 2010 Ena Siri Badana be Lalokau Ia Herevalaia

Hereva ma toi be Hakaua Oreana taudia ese idia henia. Gerrit Lösch be ena hereva matamanai henanadai ta ia henia, “Oi ura ma haida ese oi idia lalokau henia, a?” Ia gwau, ita ibounai ita ura ma haida ese ita idia lalokau henia, bona unai kara ita moalelaia. Iehova be mai ena lalokau ida ita ia havaraia dainai ita mauri noho. Danu Iehova ita lalokau henia dainai, haroro bona hadibaia gaukara ita karaia.

Oibe, iseda dekena taudia sibona lasi, to eda inai taudia ita lalokau henia danu. (Mat. 5:​43-​45; NW ) Tadikaka ese helai taudia ia hagoadaia, Iesu ena hisihisi idauidau idia laloa totona​—⁠ita totona haida ese ia idia dadabaia, kirikirilaia, kanudia, bona kwadia. Ena be Iesu ese hisihisi ia abia, to ia idia hasatauroa tuari taudia totona ia guriguri. Unai dainai, Iesu ita lalokau henia, ani? Tadikaka Lösch ia gwau, lagani 2010 ena siri badana be, 1 Korinto 13:​7, 8 amo idia abia bona ena ladana be, “Lalokau be Gau Ibounai Ia Haheaukalaia. Lalokau Ia Ore Diba Lasi.” Momokani, mauri hanaihanai ita abia sibona lasi, to hanaihanai ma haida ita lalokau henia, unai amo idia ese ita do idia lalokau henia hanaihanai danu.

Emu Motuka Ena Petrol be Kahirakahira Do Ia Ore, A?

Samuel Herd ese ena hereva be haheitalai ta amo ia hamatamaia. Ia gwau, emu turana ta ese ena motuka amo oi ia udaia bena kilomita 50 bamona umui heau. Umui heau noho lalonai, oi itaia motuka ena petrol be kahirakahira do ia ore. Emu turana oi hadibaia, ena motuka ena petrol be do ia ore. Ia gwau, laloa momo lasi, tanika ai be petrol 4 lita bamona ia do noho. To daudau lasi murinai, motuka ena petrol ia ore. Unai be namo lasi, ani? Hanaihanai, motuka ena tanika ena petrol ita habadaia be gau badana! Unai hegeregerena, hanaihanai Iehova dibaia karana ita habadaia be gau badana.

Hanaihanai motuka ena petrol ita habadaia hegeregerena, dala foa be ita do ia durua hanaihanai Iehova dibaia karana ita habadaia totona. Namba 1: Hanaihanai ita sibona eda stadi bona Baibel duahiduahi ita karaia, unai amo Baibel ita manadalaia. To Baibel ita duahia sibona be hegeregere lasi, namona be ita duahia gaudia edia anina ita lalopararalaia danu. Namba 2: Iseda Ruma Bese Ena Tomadiho negana ita gaukaralaia namonamo. Wiki ta ta ai lauma aniani momo eiava sisina sibona ita abia, a? Namba 3: Kongrigeisen hebou ibounai dekenai ita lao be namo. Namba 4: Regerege lasi negadiai o gabudiai, Iehova ena dala laloa dobu. Salamo 143:5 ia gwau: “Dina gunadia lau laloa noho. Oiemu kara gunadia ibounai lau laloa noho.”

Kara Maoromaoro Taudia be Do Idia Diaridiari

John Barr ese hereva ihatoina ia henia neganai, Iesu ena parabole ta​—⁠witi bona ava dikadia⁠—​ia herevalaia. (Mat. 13:​24-​30, 38, 43, NW ) Ia gwau, “gogoa negana” ai “Basileia ena natudia” idia haboua, to ava dikadia be idia haboua gabua totona.

Tadikaka Barr ia gwau, unai gogoa gaukarana do ia ore. Bena, Mataio 24:34 (NW ) ia duahia: “Umui lau hamaoroa momokani, inai uru be do ia ore lasi ela bona inai gaudia ibounai idia vara.” Bena nega rua inai hereva ia duahia: “Iesu ese ia gwauraia “inai uru” be lagani 1914 ai idia vara matamaia toa idia itaia horoa taudia sibona lasi, to unai horoa taudia idia do noho lalonai hisihisi badana ena matamana do idia itaia horoa taudia danu.” Ita diba lasi “inai uru” ena noho negana be lagani hida, to ia be horoa oreana ena grup rua ia herevalaia. Ena be horoa taudia edia mauri lagani be idauidau, to unai grup rua o “inai uru” be hari nega dokona lalonai idia noho hebou. Ita ia hagoadaia gauna be inai: Lagani 1914 ai idia vara matamaia toa idia itaia horoa taudia burukadia edia negai idia noho horoa taudia matamatadia haida be idia mauri noho lalonai hisihisi badana ena matamana do idia itaia.

“Basileia ena natudia” be mai edia ura bada ida edia guba helarona idia naria noho, to namona be ita be mai abidadama ida ita gini goada noho, ita diaridiari ela bona dokona. Ita moale badina “witi” gogoa gaukara be eda nega lalonai ia guguru noho.

Hebou koua anena idia abia murinai, Hakaua Oreana tauna ta, Theodore Jaracz ese guriguri ginigabena ia gwauraia. Unai program ese tadikaka taihu ia hagoadaia momokani!

[Footnote]

[Box on page 5]

ELDA TAUDIA EDIA SIKULI

Unai hebou dekenai, Hakaua Oreana tauna ta, Anthony Morris, ia gwau, kongrigeisen ena elda taudia be sikuli ta idia abia. Lagani 2008 amo, United States ena elda taudia edia sikuli ta be Patterson, New York ai idia karaia. Unai sikuli ena klas namba 72 idia haorea vadaeni, bona elda taudia 6,720 be sikuli namona idia abia. To gaukara bada ia do noho. United States ai, elda ibounai be 86,000 mai kahana. Unai dainai, Hakaua Oreana ese gwaumaoro ia henia December 7, 2009 ai sikuli ma ta be Brooklyn, New York, ai idia karaia.

Hua rua lalonai, Patterson ai loaloa naria taudia foa be treinini do idia abia, elda taudia edia sikuli ai hadibaia gaukarana idia karaia totona. Idia be Brooklyn dekenai do idia lao elda taudia edia sikuli idia hakaua totona, bena tadikaka ma foa be treinini do idia abia. Idia be Brooklyn dekenai idia siaia lao neganai, tadikaka ginigunadia foa do idia siaia Assembly Hall bona Kingdom Hall ai elda edia sikuli do idia hakaua. Unai program do ia heau noho ela bona hadibaia taudia be 12, bona idia ese wiki ta ta ai English gado ena sikuli 6, United States ai, do idia karaia. Unai murinai, hadibaia taudia ma foa be sikuli do idia abia, Spanish gado amo sikuli idia hakaua totona. Unai sikuli be Basileia Hesiai Gaukara Sikuli ena gabu do ia abia lasi; to sikuli matamatana be elda taudia do ia durua hereva momokani lalonai idia goada totona. Hesiai laganina 2011 ai, tanobada hegegemadai, brens ibounai ese unai sikuli be Assembly Hall bona Kingdom Hall ai do idia karaia hamatamaia.

[Pictures on page 4]

Lagani ena hebou kehoa anena be eda buka matamata ladana, “Sing to Jehovah” amo idia abia