Karoa 40

Gaigai Ena Kwarana Ia Moia

Matahanai 14​—⁠Apokalupo 20:​1-​10

Anina: Satana be guri dobu masemase gabuna lalonai ia negea, Lagani 1,000 Lohia Negana ai, taunimanima edia hetoho ginigabena, bona Satana ia hamasea

Hagugurua negana: Hisihisi bada herea ena dokona ela bona Satana idia hadikaia ore negana

BAIBEL ena peroveta herevana ginigunana oi laloatao, a? Iehova Dirava ese unai peroveta herevana ia gwauraia, Gaigai dekenai ia gwau: “Lau ese badu oi bona hahine huanai do lau atoa bona oiemu garana bona iena garana huanai. Ia ese emu kwarana do ia haberoa bona oi ese iena aena geduna do oi haberoa.” (Genese 3:​15, NW ) Unai peroveta hereva ena guguru negana ia ginidae! Satana ese Iehova ena guba oreana, iena hahine bamona gauna, be lagani handred momo lalodiai ia tuari henia sivaraina ita tahua vadaeni. (Apokalupo 12:​1, 9) Gaigai ena garana taudia tanobada dekenai, mai edia tomadiho, edia politikol karadia, bona bisinesi badadia, ese hahine ena garana taudia, Iesu Keriso bona iena horoa taudia 144,000 tanobada dekenai, idia dagedage henidia bada herea. (Ioane 8:​37, 44; Galatia 3:​16, 29) Satana dainai Iesu be hisihisi bada masena ia abia. To unai kara be hegeregere Iesu ia haberoa aena geduna dekenai, badina Dirava ese iena kamonai Natuna be dina ihatoina dekenai ia hatorea isi lou.​—⁠Kara 10:​38-​40.

² Gaigai bona iena garana be edena bamona? Lagani 56 C.E. bamona ai, aposetolo Paulo ese revareva latana be Roma Keristen taudia dekenai ia siaia. Unai revareva ena hereva dokonai, edia lalona ia hagoadaia, ia gwau: “Vadaeni iseda maino ia havaraia Diravana ese nega sisina Satani do ia moia momokani umui emui aena henuna dekenai.” (Roma 16:20) Unai be bero maragina ta sibona lasi. Satana do idia moia momokani! Unai siri lalonai Paulo ese Greek herevana ta, syn·triʹbo, ia torea, anina be moia patapata, moia haorea. Lohiabada ena dina lalonai Gaigai ena tanobada garana ese hisihisi ia abia bona hisihisi bada herea negana lalonai Iesu ese Babulono Badana, inai tanobada ena politikol oreadia bona edia bisinesi bona tuari turadia do ia moidia momokani. (Apokalupo, karoa 18 bona 19) Unai dala amo Iehova ese unai garana rua edia tuari heheni karana ia hagugurua. Dirava ena hahine ena Garana ese Gaigai ena tanobada garana ia halusia, bona unai garana ia boio vaitani!

Satana Ia Negea Guri Dobu Masemase Lalonai

³ Satana bona iena demoni dekenai dahaka do ia vara? Ioane ia gwau: “Vadaeni aneru ta lau itaia, guba dekena amo ia diho. Iena imana dekenai guri dobu masemase ena ki ia dogoatao, bona auri seini badana ta danu. Inai aneru ese unai huala, unai idaunegai gaigaina, ma iena ladana be ‘Diabolo’ bona ‘Satani,’ ia dogoatao, seini dekenai ia guia. Vadaeni do ia guia noho ela bona lagani 1,000 idia ore. Aneru ese huala unai guri dobu masemase lalonai ia negea diho. Vadaeni unai guri ia lokaia, bona koua toana ia karaia. Satani be unai bamona ia koua, tanobada bese do ia koia diba lasi totona, lagani 1,000 lalonai. Unai lagani 1,000 idia ore neganai idia ese Satani ma do idia ruhaia lou nega sisina sibona.”​—⁠Apokalupo 20:​1-3.

⁴ Unai aneru be daika? Ia be mai ena siahu bada badina Iehova ena inai tauna badana ia kokia. “Guri dobu masemase ena ki . . . bona auri seini badana ta danu” ia dogoatao. Unai be ma matahanai ta bamona, ani? Oibe, kwadi edia pavapava ena ladana be “guri dobu masemase ena aneru”! (Apokalupo 9:11) Unai dainai ita itaia Iehova ena Maoromaoro Ia Hahedinaraia Tauna Badana, hairai tauna Iesu Keriso, ese kara ta ia karaia. Unai aneru badana ese Satana be guba amo ia negea diho, bona Babulono Badana ia hahemaoro henia, bona Aramagedono dekenai “tanobada ena king taudia mai edia tuari oreadia” ia kokidia. Vadaeni, ita gwau diba lasi ia ese dala do ia kehoa, dagi bada lasi aneruna ese Satana be guri dobu masemase dekenai ia negea totona!​—⁠Apokalupo 12:​7-9; 18:​1, 2; 19:​11-​21.

⁵ Huala badana kakakakana be guba amo ia negea diho ena sivarai lalonai, iena ladana be “idaunegai gaigaina, . . . Diabolo bona Satani. Ia be tanobada taudia ibounai ia koia noho gauna.” (Apokalupo 12:​3, 9) Unai huala idia dogoatao bona guri dobu masemase lalonai idia negea gwauraia neganai, iena ladana ibounai idia gwauraia lou, ia be “huala, unai idaunegai gaigaina, ma iena ladana be ‘Diabolo’ bona ‘Satani.’ ” Unai hadikaia tauna, koikoi tauna, ladana hadikaia tauna, bona gwau-edeede tauna be seini dekenai idia guia bona ia be “unai guri dobu masemase lalonai ia negea diho”; vadaeni unai guri idia lokaia bona idia koua namonamo, “tanobada bese do ia koia diba lasi totona.” Satani be guri dobu masemase lalonai ia noho ela bona lagani 1,000 idia ore, unai nega lalonai taunimanima edia lalona ia veria diba lasi, to ia be dibura lalonai ia noho tauna bamona, ia be siahu lasi. Guri dobu masemase ena aneru ese ia koua dainai Satana ese Basileia maoromaorona amo ia noho daudau herea. Unai be namo herea taunimanima dekenai!

⁶ Demoni dekenai dahaka do ia vara? Idia danu idia naria “ela bona Kota Bada Dinanai.” (2 Petero 2:⁠4) Satana ena ladana be “Belesebulo, lauma dikadia edia biaguna.” (Luka 11:​15, 18; Mataio 10:25) Nega daudau lalonai Satana ida idia gaukara hebou lalonai, idia ese iena hahemaoro hegeregerena idia abia danu be maoro, ani? Nega daudau lalonai demoni be guri dobu masemase garina idia gari dikadika; nega ta Iesu ia hereva henidia neganai, idia “noia, guri dobu masemase dekenai do ia siaidia lasi.” (Luka 8:​31, NW ) To, Satana be guri dobu masemase dekenai idia negea neganai, momokani iena aneru be unuseniai do idia negedia danu. (Isaia 24:​21, 22 itaia.) Satana bona iena demoni be guri dobu masemase dekenai idia negedia murinai, Iesu Keriso ena Lagani 1,000 Lohia Negana do ia matamaia.

⁷ Satana bona iena demoni ese kara haida do idia karaia guri dobu masemase lalonai idia noho neganai, a? Dagedage gauna kakakakana mai ena kwarana 7 oi laloatao. “Gunaguna ia noho, to harihari ia noho lasi. To nega daudau lasi, ia be guri dobu masemase gabuna dekena amo do ia daekau.” (Apokalupo 17:⁠8) Guri dobu masemase lalonai ia noho neganai, ia be hegeregere “ia noho lasi.” Gaukara ta ia karaia lasi, bona ena toana be hegeregere ia mase vadaeni bamona. Unai hegeregerena, aposetolo Paulo ese Iesu ia herevalaia neganai ia gwau: “ ‘Daika dobu gabuna dekenai do ia diho?’ Inai be Keriso mase taudia edia gabu dekena amo do ia abia daekau totona.” (Roma 10:⁠7) Iesu be unai dobu gabuna dekenai ia noho neganai, ia mase vadaeni.a Vadaeni, ita gwau diba Satana bona iena demoni be mase taudia bamodia gau ta do idia karaia diba lasi lagani 1,000 lalonai, guri dobu masemase lalonai idia noho neganai. Kara maoromaoro idia ura henia taudia iboudiai dekenai unai be sivarai namo herea momokani!

Kota Karaia Taudia Lagani 1,000 Lalonai

⁸ Lagani 1,000 do idia ore murinai, Satana be guri dobu masemase gabuna amo idia ruhaia bona nega sisina lalonai do ia noho. Dahaka dainai? Haere ia do henia lasi neganai, Ioane ese unai nega ena matamana ia herevalaia. Ia gwau: “Inai murinai helai gabudia haida lau itaia, bona idia latanai helai taudia danu lau itaia. Unai taudia dekenai Dirava ese kota biaguna ena siahu ia henia.” (Apokalupo 20:4a) Daidia be terona latanai idia helai bona Iesu danu guba dekenai idia lohia hebou?

⁹ Idia be “helaga taudia,” Daniel ia gwau Tau Ta “taunimanima ena natuna bamona” ida Basileia lalonai idia lohia hebou. (Daniela 7:​13, 14, 18) Idia be unai elda taudia 24, Iehova vairanai guba ena terona dekenai idia helai taudia. (Apokalupo 4:⁠4) Idia haida be aposetolo taudia 12, Iesu be idia dekenai inai gwauhamata ia henia: “Lauegu murina dekenai umui raka taudia, be gau ibounai karaia matamata ena neganai, Taunimanima ena Natuna ena terona diaridiari dekenai do ia helai neganai, terona 12 dekenai do umui helai, Israela edia iduhu 12 dekenai dohore umui kota henia.” (Mataio 19:28) Danu, unai taudia ta be Paulo, bona edia abidadama lalonai idia gini goada Korinto Keristen taudia. (1 Korinto 4:8; 6:​2, 3) Danu, unai taudia haida be idia kwalimu Laodikea kongregesen taudia.​—⁠Apokalupo 3:⁠21.

¹⁰ Terona​—⁠iboudiai 144,000⁠​—⁠​be unai horoa kwalimu taudia totona idia noho hegaegae, unai taudia be “taunimanima ibounai edia huanai dekena amo Dirava ese idia ia hoia vadaeni. Bona idia be taunimanima ginigunadia Dirava bona Mamoe ena Natuna ese idia abia, edia.” (Apokalupo 14:​1, 4) Ioane be ma ia gwau: “Bona taunimanima momo edia laumadia lau itaia. Inai taudia be edia kwaradia idia utua oho, badina be Iesu ena hereva momokani, bona Dirava ena hereva idia gwauraia dainai. Idia ese dagedage gauna o iena laulauna idia tomadiho henia lasi. Bona dagedage gauna ena maka edia baguna dekenai o edia imana dekenai, idia abia lasi.” (Apokalupo 20:4b) Unai pavapava taudia haida be horoa Keristen taudia, edia abidadama dainai idia mase taudia. Guna, buka koua toana namba 5 idia makohia neganai, Iehova idia nanadaia, ela bona edena negai do ia naria, edia rara ena davana do ia karaia totona. Unai neganai, dabua kurokuro be idia dekenai idia henia, bona ta ese idia ia hamaoroa, do idia naria noho nega sisina. To inai negai Babulono Badana idia hadikaia ore, bona king ibounai edia King bona lohia ibounai edia Lohia ese tanobada besedia ia hadikaia ore dainai, bona Satana be guri dobu masemase lalonai idia negea dainai, edia rara ena davana idia karaia vadaeni.​—⁠Apokalupo 6:​9-​11; 17:16; 19:​15, 16.

¹¹ Unai kota karaia pavapavadia 144,000 iboudiai “edia kwaradia idia utua oho,” a? Reana unai idia davaria taudia be momo lasi. To unai hereva ese edia abidadama dainai idia mase horoa Keristen taudia iboudiai ia gwauraia.b (Mataio 10:​22, 28) Momokani, Satana ia ura idia iboudiai edia kwarana ia utua oho, to Iesu ena horoa tadikakadia haida be edia abidadama dainai idia mase lasi. Idia momo idia mase badina idia gorere dainai o idia buruka dainai. To unai bamona taudia be Ioane ia itaia oreana lalonai idia noho. Idia iboudiai edia mase be hegeregere boubou karana bamona. (Roma 6:​3-5) Danu, idia iboudiai be tanobada ena lasi. Unai dainai, inai tanobada ese idia iboudiai ia inai henidia, bona tanobada taudia dekenai idia be hegeregere idia mase bamona. (Ioane 15:19; 1 Korinto 4:13) Idia ta lasi ese dagedage gauna bona iena laulau idia tomadiho henia, bona idia mase neganai, idia ta lasi ese dagedage gauna ena maka idia abia. Idia iboudiai be kwalimu taudia bamona idia mase.​—⁠1 Ioane 5:4; Apokalupo 2:7; 3:12; 12:⁠11.

¹² Unai kwalimu taudia idia mauri lou! Ioane ia gwau: “Idia be mase dekena amo idia mauri lou, vadaeni Keriso danu lohia siahu idia abia, ela bona lagani 1,000 idia ore.” (Apokalupo 20:4c) Unai hereva ena anina be unai kota karaia taudia idia toreisi lou lasi ela bona tanobada besedia idia ore bona Satana bona iena demoni be guri dobu masemase gabuna dekenai idia negedia, a? Lasi. Idia momo idia mauri lou vadaeni bona Aramagedono lalonai Iesu danu do idia gaukara hebou tanobada besedia idia tuari henidia totona. (Apokalupo 2:​26, 27; 19:14) Lagani 1914 ai Iesu ena noho negana ia matamaia. Paulo ia hahedinaraia unai nega sisina murinai unai taudia idia toreisi lou bona idia haida idia toreisi lou guna, ma haida be gabeai. (1 Korinto 15:​51-​54; 1 Tesalonika 4:​15-​17) Unai dainai, nega sisina ia hanai lalonai idia ta ta idia toreisi lou bona mase diba lasi maurina guba dekenai idia abia.​—⁠2 Tesalonika 1:7; 2 Petero 3:​11-​14.

¹³ Lagani 1,000 lalonai do idia lohia bona kota gaukara do idia karaia. Unai namba be namba korikorina ta, a? Eiava ia ese nega daudauna ta ia laulaulaia? “Tausen momo” ena anina ta be namba badana ta. Haheitalai ta be 1 Samuela 21:11 ena hereva. To, Apokalupo be lagani “1,000” ia gwauraia neganai, unai be namba korikorina. Unai ita diba badina Apokalupo 20:​5-7 lalonai nega toi ia gwau “1,000,” ia gwau lasi tausen momo. Paulo ese unai hahemaoro negana ia gwauraia “dina ta,” ia gwau “Dirava ese dina ta ia abia hidi vadaeni, unai dina dekenai iena abia hidi tauna ese tanobada ibounai do ia kota henia mai maoromaoro danu.” (Kara 17:31) Petero ia gwau Iehova dekenai dina ta be lagani 1,000 bamona. Unai dainai Kota Badana Dinana ena lata be lagani 1,000 be maoro.c​—⁠2 Petero 3:⁠8.

Mase Taudia Oredia

¹⁴ Aposetolo Ioane ia gwau: “Mase taudia oredia do idia mauri lou lasi ela bona lagani 1,000 idia ore.” (Apokalupo 20:5a) Unai dainai unai pavapava ese daika do idia kota henia? “Mauri lou” herevana ena anina ita abia totona, namona be ma siri haida edia hereva ita tahua. Unai hereva ena anina be idauidau gabu idauidau dekenai. Haheitalai ta be Paulo ese iena horoa Keristen tadikakadia ia herevalaidia neganai, ia gwau: “Ena be umui kara kerere bona kara dika lalonai umui mase, to Dirava ese umui ia hamauria.” (Efeso 2:​1, NW ) Oibe, Dirava ese iena lauma amo ia horoa Keristen taudia ia ‘hamauridia,’ bona idia ia gwauraidia maoro, Iesu ena boubou dekenai idia abidadama dainai.​—⁠Roma 3:​23, 24.

¹⁵ Unai hegeregerena, idaunegai Dirava ese Iehova ena Witness taudia ia gwauraidia maoro bona idia hegeregere iena turana ai idia lao; bona ena be Abraham, Isako, bona Iakobo idia mase vadaeni, to Iesu ia gwau idia be “mauri taudia.” (Mataio 22:​31, 32; Iamesi 2:​21, 23) To, idia bona idia toreisi lou taudia iboudiai, idia kamonai namonamo mamoe idaudia, Aramagedono amo do idia roho mauri taudia, bona nega matamata lalonai idia havaraia natudia danu be do idia goevadae idia lao. Lagani 1,000 Kota Badana Dinana lalonai, Keriso bona ia ida idia lohia pavapavadia bona hahelaga taudia be Iesu ena boubou dainai taunimanima do idia durudia, idia goevadae idia lao totona. To unai Dina ena dokona ai, “mase taudia oredia” do idia “mauri lou,” anina be do idia goevadae. Do ita itaia, gau badana be hetoho dokona idia hanaia, to unai hetoho do idia abia idia goevadae neganai. Unai hetoho idia hanaia murinai, Dirava do ia gwau idia be kara maoromaoro taudia momokani. Inai gwauhamata ena guguru do idia abia: “Kara maoromaoro taudia ese tanobada do idia abia, bona ia latanai do idia noho ela bona hanaihanai.” (Salamo 37:29) Nega vairanai, idia kamonai taudia ese mauri namona do idia abia!

Toreisi Lou Ginigunana

¹⁶ Ioane ese “mase dekena amo idia mauri lou, vadaeni Keriso danu lohia siahu idia abia” taudia ia herevalaidia lou, ia gwau: “Mase dekena amo toreisi lou ginigunana be inai.” (Apokalupo 20:5b) Dahaka dainai unai be toreisi lou ginigunana? Nega dekenai ia be “toreisi lou ginigunana” badina unai bamona idia toreisi lou taudia be “taunimanima ginigunadia Dirava bona Mamoe ena Natuna ese idia abia, edia.” (Apokalupo 14:⁠4) Danu ia be toreisi lou ginigunana badina ia be toreisi lou badana. Unai bamona idia toreisi lou taudia be Iesu ida idia lohia hebou iena guba Basileiana lalonai bona taunimanima iboudiai idia hahemaoro henidia. Danu, edia toreisi lou be toreisi lou ginigunana badina unai toreisi lou ese ma toreisi lou karadia haida ia hereadia. Baibel lalonai, Iesu Keriso bona toreisi lou ginigunana idia abia taudia sibodia ese mase diba lasi maurina idia abia.​—⁠1 Korinto 15:53; 1 Timoteo 6:⁠16.

¹⁷ Horoa taudia dekenai unai be hahenamo badana! Ioane ia hereva hegeregerena: “Inai toreisi lou ginigunana dekenai idia toreisi taudia be moale bona helaga momokani. Idia be Dirava ena taudia korikori. Mase iharuana be mai ena siahu lasi unai taudia dekenai.” (Apokalupo 20:6a) Iesu be Semurana Keristen taudia, “toreisi lou ginigunana” idia abia taudia dekenai ia gwauhamata, ia gwau “mase iharuana” ese unai kwalimu taudia do ia hadikaia lasi. Mase iharuana ena anina be mase ela bona hanaihanai, toreisi lou lasi. (Apokalupo 2:11; 20:14) Unai kwalimu taudia dekenai mase iharuana “be mai ena siahu lasi,” badina bodaga diba lasi gauna bona mase diba lasi gauna idia atoa.​—⁠1 Korinto 15:⁠53.

¹⁸ Satana ese tanobada ia lohiaia neganai, tanobada ena pavapavadia be unai amo idia idau vaitani! Idia haida be lagani 50 o 60 sibona lalonai idia lohia, bona idia momo be lagani momo lasi lalonai idia lohia. Idia momo ese taunimanima idia dagedage henia. To edia lohia bona edia lohia daladia idia haidaua loulou dainai tanobada besedia ese namo hanaihanai idia davaria diba lasi, ani? Ioane ese tanobada ena lohia matamatadia ia herevalaidia, edia kara be idau momokani, ia gwau: “Idia be Dirava bona Keriso edia boubou helaga karaia taudia. Bona lagani 1,000 lalonai Keriso danu do idia lohia.” (Apokalupo 20:6b) Lagani 1,000 lalonai, idia be Iesu danu unai gavamani tamona lalonai do idia lohia. Iesu ena boubou goevadaena, iena mauri goevadaena ena heduru do idia henia bona hahelaga gaukara do idia karaia. Unai dala amo idia kamonai taudia do idia durua, lauma dalanai, edia kara ai, bona edia tauanina ai do idia goevadae totona. Edia pavapava gaukarana dainai, tanobada ibounai lalonai, taunimanima ese Iehova ena kara maoromaoro bona ena kara helaga do idia hahedinaraia. Lagani 1,000 lalonai kota idia karaia neganai, idia be Iesu ida idia gaukara bona kamonai taudia do idia hakaudia lao mauri hanaihanai dekenai.​—⁠Ioane 3:⁠16.

Hetoho Ginigabena

¹⁹ Lagani 1,000 Lohia Negana do ia ore neganai, tanobada ibounai ena toana be Eden umana ena toana bamona. Dohore ia be paradaiso momokani ai ia lao. Hahelaga tauna badana ese Dirava do ia noia lasi, ia ese edia kara dika ia gwauatao totona, badina Adam ena amo ia vara kara dika ibounai do ia ore vaitani bona inai tauna ginigabena, mase, do ia ore. Keriso ena Basileia ese Dirava ena ura do ia havaraia, iena ura be tanobada tamona, gavamani tamona henunai, do ia karaia. Unai neganai, Iesu Keriso “ese Dirava ena Basileia Tamana Dirava ena imana dekenai do ia atoa.”​—⁠1 Korinto 15:​22-​26; Roma 15:⁠12.

²⁰ Hetoho ginigabena ena nega ia ginidae unai. Unai goevadae taudia be edia abidadama dekenai do idia gini goada, bona Eden ena taunimanima ginigunadia amo do idia idau, a? Ioane be ita ia hadibaia dahaka do ia vara, ia gwau: “Lagani 1,000 idia ore neganai, Satani be unai guri dobu masemase dekena amo do idia ruhaia. Vadaeni ia ese tanobada ena gabu ibounai idia noho taudia dekenai do ia lao, idia do ia koia. Inai taudia edia bese ladana be Gog bona Magog. Satani ese unai taudia ibounai do ia haboua tuari totona. Edia momo be hutuma bada herea momokani, kone ena miri bamona. Idia be tanobada kahana ibounai dekenai idia raka lao, bona idia ese Dirava ena helaga taudia edia kamepa bona ia lalokau henia hanuana idia hagegea.”​—⁠Apokalupo 20:​7-9a.

²¹ Satana ena kara ginigabena amo dahaka do ia vara? “Tanobada ena gabu ibounai idia noho taudia” ia koidia. “Inai taudia edia bese ladana be Gog bona Magog.” Unai taudia ia hakaudia lao “tuari totona.” Daika be Satana ena kahana dekenai ia ura gini, badina lagani 1,000 lalodiai Dirava ena lohia henunai ia noho bona moale bona lalo-goada ia davaria vadaeni? Laloaboio lasi, Satana ese goevadae taudia, Adam bona Eva, ia koidia diba, idia be Eden Paradaiso lalonai idia noho neganai. Bona ena be guba anerudia ese gwau-edeede ginigunana ena dika idia itaia vadaeni, to idia ia veridia diba. (2 Petero 2:4; Iuda 6) Unai dainai ita hoa lasi ena be lagani 1,000 lalonai Dirava ena Basileia ia lohia neganai moale idia davaria, to taunimanima goevadaedia haida be Satana do idia badinaia.

²² Baibel ia gwau unai gwau-edeede taudia be “tanobada ena gabu ibounai idia noho taudia.” Ita gwau diba lasi unai hereva ena anina be taunimanima be bese idauidau dekenai do idia hapararaia lou. To unai hereva ese ia hahedinaraia, unai taudia be Iehova ena kara maoromaoro bona gini goada taudia amo do idia gini siri, bona hari inai negai idia noho besedia edia lalohadai dikana do idia hahedinaraia, Esekiel ena peroveta herevana lalonai Gog, Magog tanona amo, ese “kara dikana ia lalohadailaia” hegeregerena. Unai do idia karaia, Dirava ena gavamani tanobada dekenai do idia hadikaia ore totona. (Esekiela 38:​3, 10-​12) Unai dainai, edia ladana idia hatoa “Gog bona Magog.”

²³ Satana ida do idia gwau-edeede taudia edia namba be “hutuma bada herea momokani, kone ena miri bamona.” Unai namba be hida? Dirava ese unai namba be hida ia gwauraia lasi. (Iosua 11:4; Gunalaia Taudia 7:12 itaia danu.) Unai gwau-edeede taudia edia namba be taunimanima ta ta edia kara Satana ena koikoi karadia dekenai hegeregerena. To, momokani unai bamona taudia be idia sisina momo, badina idia laloa edia goada ia hegeregere, “helaga taudia edia kamepa bona ia lalokau henia hanuana” idia halusia totona.

²⁴ “Ia lalokau henia hanuana” be Apokalupo 3:12 dekenai mai ena hairai tauna Iesu Keriso be ena murina dekenai idia raka taudia dekenai ia gwauraia gauna; ia gwau, “lauegu Dirava ena hanua ladana danu, Ierusalema matamatana. Unai hanua be guba dekena amo do ia diho, lauegu Dirava dekena amo.” Unai hanua be guba oreana dainai, unai tanobada tuari taudia be edena bamona idia “hagegea” diba? Badina idia ese “helaga taudia edia kamepa” idia hagegea. Kamepa be hanua murimuri ai ia noho; unai dainai “helaga taudia edia kamepa” ena anina be tanobada dekenai guba Ierusalem Matamatana murimuri ai idia noho bona mai edia abidadama danu Iehova ena gavamani dalana idia badinaia taudia. Unai gwau-edeede taudia, Satana henunai, ese abidadama taudia idia tuari henia neganai, Lohiabada Iesu dekenai unai be hegeregere ia idia tuari henia bamona. (Mataio 25:​40, 45) “Inai taudia edia bese” be dala do idia tahua, guba Ierusalem Matamatana ese ia havaraia gaudia namodia iboudiai, tanobada be paradaiso ai ia halaoa karadia iboudiai, do idia hadikaia ore totona. Unai dainai, “helaga taudia edia kamepa” idia tuari henia neganai, idia ese “ia lalokau henia hanuana” danu idia tuari henia.

Lahi Bona Salifa Gohuna

²⁵ Satana ena kara ginigabena do ia kwalimu, a? Lasi vaitani​—⁠hari iseda negai Gog, Magog tauna, ese lauma Israel ia tuari henia neganai do ia kwalimu lasi hegeregerena! (Esekiela 38:​18-​23) Ioane ese do idia vara gaudia ia herevalaia, ia gwau: “To lahi be guba dekena amo ia diho, Satani ena tuari orea ia araia ore. Unai neganai Satani, idia ia koia tauna, be lahi bona salifa gohuna lalonai Dirava ese ia negea diho. Unai gabunai be guna dagedage gauna bona peroveta koikoi tauna idia negea diho vadaeni.” (Apokalupo 20:9b-​10a) Unai neganai, Satana be guri dobu masemase gabuna dekenai do idia negea sibona lasi, to Satana, idaunegai gaigaina, do idia moia patapata idia hadikaia ore vaitani, hegeregere lahi ese ia araia ore bamona.

²⁶ Vadaeni, ita itaia vadaeni, “lahi bona salifa gohuna” be hisihisi gabuna korikorina lasi. (Apokalupo 19:20) Bema Satana ese hisihisi bada herea ia abia ela bona hanaihanai, anina be Iehova ese Satana do ia hamasea lasi. To mauri be harihari gauna, ia be panisi lasi. Kara dika ena davana be mase, bona Baibel ena hereva hegeregerena, idia mase murinai hisihisi idia ania diba lasi. (Roma 6:23; Hadibaia Tauna 9:​5, 10) Danu, gabeai, do ita itaia, mase bona Hade be unai lahi bona salifa gohuna lalonai idia negedia. Momokani, mase bona Hade ese hisihisi idia ania diba lasi!​—⁠Apokalupo 20:⁠14.

²⁷ Unai hereva ibounai ese ia hahedinaraia lahi bona salifa gohuna be gabu korikorina lasi, to ia be laulau sibona. Danu, lahi bona salifa ia gwauraia dainai, Sodoma bona Gomora dekenai ia vara gauna ita laloatao, Dirava ese unai hanua ia hadikaia ore badina idia kara dika rohoroho dainai. Edia nega dokona ia ginidae neganai, “Iehova ese salifa bona lahi Iehova amo, bona guba amo, ia negea diho, Sodoma bona Gomora latadiai.” (Genese 19:​24, NW ) Unai hanua rua dekenai ia vara gauna be inai bamona idia gwauraia: “Dirava ese edia kerere davana ia henidia, noho hanaihanai lahina ena hisihisi.” (Iuda 7) Unai hanua rua idia hisihisi ela bona hanaihanai lasi, to unai hanua bona unuseniai idia noho kara bodaga taudia idia ore vaitani ela bona hanaihanai. Hari inai negai unai hanua idia noho lasi, bona edia gabu korikori ia diba tauna ta be lasi.

²⁸ Unai hereva hegeregerena, Baibel ese lahi bona salifa gohuna ena anina ia gwauraia, ia gwau: “Inai lahi gohuna be mase iharuana.” (Apokalupo 20:14) Iesu ese unai gabu ia gwauraia Gehena, kara dika taudia ese hisihisi idia ania ela bona hanaihanai lasi to idia mase ela bona hanaihanai gabuna. (Mataio 10:​28, NW ) Iena anina be, mase ela bona hanaihanai, bona toreisi lou helarona be lasi. Unai dainai, mase, Hade, bona guri dobu masemase edia ki idia noho, to lahi bona salifa gohuna kehoa totona ki ta be lasi. (Apokalupo 1:18; 20:⁠1) Ia guia taudia do ia ruhadia nege lasi.​—⁠Mareko 9:​43-​47 itaia.

Dina Bona Hanuaboi Idia Hisihisi Ela Bona Hanaihanai

²⁹ Ioane ese Diabolo bona dagedage gauna bona peroveta koikoi tauna ia herevalaidia, ia gwau: “Unuseni hisihisi do idia abia dina bona hanuaboi, ela bona hanaihanai.” (Apokalupo 20:10b) Unai hereva ena anina be dahaka? Ita diba vadaeni, dagedage gauna bona peroveta koikoi tauna, mase bona Hade ese hisihisi korikorina idia ania diba lasi. Unai dainai, ita gwau diba lasi Satana do ia hisihisi ela bona hanaihanai. Lasi, to do ia ore momokani.

³⁰ Greek gado herevana ba·sa·niʹzo idia hahanaia “hisihisi.” Unai Greek gado herevana ena anina badana be “tohoa, hegeregere auri idia tohoa ena namo idia diba totona.” Ma anina ta be “haere abia totona idia hahisihisia.” (The New Thayer’s Greek-English Lexicon of the New Testament) Unai siri lalonai, unai Greek gado herevana ia hahedinaraia, ela bona hanaihanai, Satana dekenai do idia vara gaudia ese do idia hamomokania Iehova ia lohia be maoro bona iena lohia dalana be mai ena kara maoromaoro. Daika ia lohia be maoro gabeai do idia daradaralaia lasi. Bema nega ta ai haida ese Iehova ena lohia dalana ena maoro idia hepapahuahulaia, nega daudau do idia henidia lasi, edia kara ena kerere do idia hedinarai totona.​—⁠Salamo 92:​1, 15 itaia.

³¹ Danu, Greek herevana ta ba·sa·ni·stesʹ, “hahisihisia tauna,” be Baibel lalonai idia gaukaralaia, ena anina be “dibura rumana naria tauna.” (Mataio 18:​34, Kingdom Interlinear) Unai hereva hegeregerena, Satana be lahi gohuna dekenai do idia hadiburaia ela bona hanaihanai; do idia ruhaia lasi. Danu, Greek Septuagint Baibel, Ioane ia diba namonamo gauna, lalonai Greek gado herevana baʹsa·nos ena anina ta be tau ta idia hahemaraia ela bona ia mase. (Esekiela 32:​24, 30) Unai amo ita itaia Satana ena panisi be hemarai gauna, mase hanaihanai lahi bona salifa gohuna dekenai. Unuseniai, ia bona iena kara idia ore.​—⁠1 Ioane 3:⁠8.

³² Unai siri lalonai demoni ia gwauraidia lasi. Lagani 1,000 edia dokona ai Satana danu guri dobu masemase amo do idia ruhadia bena murinai ia danu do idia mase ela bona hanaihanai, a? Oibe. Mamoe bona nanigosi ia parabolelaia neganai, Iesu ia gwau nanigosi do idia lao “lahi do ia bodo lasi lalonai . . . ia araia hegaegae vadaeni, Satani . . . mai ena aneru danu edia.” (Mataio 25:41) “Lahi do ia bodo lasi” be lahi bona salifa gohuna, unuseniai Satana do idia negea diho. Diabolo ena aneru danu be guba amo idia negedia diho. Iesu be ena Lagani 1,000 Lohia Negana ia hamatamaia neganai, demoni be Diabolo danu guri dobu masemase dekenai idia lao. Vadaeni, ia danu lahi bona salifa gohuna dekenai do idia mase ela bona hanaihanai.​—⁠Mataio 8:⁠29.

³³ Unai dala amo, Genese 3:15 ena hereva dokona do ia guguru. Satana be lahi gohuna dekenai idia negea neganai, do ia mase, gaigai ena kwarana be auri aena geduna amo idia moia neganai ia mase hegeregerena. Satana bona iena demoni do idia ore ela bona hanaihanai. Apokalupo bukana ese unai taudia ia gwauraidia lou lasi. Vadaeni, hari, Iehova ena lauma helaga ese gau ta ia hahedinaraia bona ia be mai anina bada tanobada dekenai mauri hanaihanai helarona idia dogoatao taudia dekenai: “King ibounai edia King” bona “Mamoe ena Natuna idia badinaia taudia, bona ia idia abidadama henia taudia . . . idia be ia ese ia abia hidi vadaeni taudia” be guba dekenai idia lohia dainai taunimanima ese dahaka do idia davaria? (Apokalupo 17:14) Haere ia henia totona, Ioane ese Lagani 1,000 Lohia Negana ena matamana ma ia herevalaia.

[Footnotes]

[Study Questions]

 1. Baibel ena peroveta herevana ginigunana be edena bamona ia guguru gwauraia?

 2. Gaigai be bero edena bamona ia abia, bona Gaigai ena tanobada garana taudia dekenai dahaka ia vara?

 3. Ioane ia gwau Satana dekenai dahaka do ia vara?

 4. Guri dobu masemase gabuna ena ki ia dogoatao aneruna be daika, bona edena bamona unai ita diba?

 5. Guri dobu masemase ena aneru ese dahaka ia karaia Satana Diabolo dekenai, bona dahaka dainai?

 6. (a) Dahaka gaudia idia hahedinaraia demoni danu be guri dobu masemase dekenai idia lao? (b) Dahaka ia matamaia diba, bona dahaka dainai?

 7. (a) Satana bona iena demoni be guri dobu masemase lalonai do idia noho neganai idia be edena bamona, bona edena bamona unai ita diba? (b) Hade bona guri dobu masemase gabuna be gau tamona, a? (Futnout itaia.)

8, 9. Ioane ese terona latanai idia helai taudia edena bamona ia herevalaidia, bona unai taudia be daidia?

10. (a) Ioane ese pavapava 144,000 be edena bamona ia herevalaidia? (b) Ioane ena hereva gunana ta dainai ita diba pavapava 144,000 haida be daidia?

11. (a) “Edia kwaradia idia utua oho” herevana edena bamona ita laloa be namo? (b) Dahaka dainai ita gwau diba 144,000 taudia iboudiai edia mase be boubou karana ta bamona?

12. Ioane ese pavapava 144,000 edia sivarai edena bamona ia herevalaia, bona edena negai idia mauri lou?

13. (a) Lagani 1,000 lalonai 144,000 taudia idia lohia negana be edena bamona ita laloa be namo, bona dahaka dainai? (b) Papias, Hierapolis tauna, ese lagani 1,000 edena bamona ia laloa? (Futnout itaia.)

14. (a) Ioane ese “mase taudia oredia” edena bamona ia herevalaidia? (b) Aposetolo Paulo ena hereva haida ese “mauri lou” herevana ena anina be edena bamona idia hahedinaraia?

15. (a) Idaunegai idia noho Iehova ena Witness taudia edia gini Dirava vairanai be edena bamona? (b) Mamoe idaudia be edena bamona idia “mauri lou,” bona edena negai idia ese tanobada do idia abia momokani?

16. Ioane be edena bamona Iesu danu idia lohia hebou taudia edia toreisi lou ia gwauraia, bona dahaka dainai?

17. (a) Ioane be horoa Keristen taudia edia helaro namona be edena bamona ia herevalaia? (b) “Mase iharuana” be dahaka, bona dahaka dainai kwalimu taudia 144,000 dekenai ia be “mai ena siahu lasi”?

18. Ioane ese tanobada ena lohia matamatadia edena bamona ia herevalaidia, bona dahaka namo do idia karaia?

19. Lagani 1,000 Lohia Negana do ia ore neganai, tanobada bona taunimanima be edena bamona, bona unai neganai Iesu ese dahaka do ia karaia?

20. Ioane ia gwau hetoho ginigabena ia ginidae neganai dahaka do ia vara?

21. Satana ena kara ginigabena be dahaka, bona dahaka dainai ita hoa lasi bema Lagani 1,000 Lohia Negana ena dokona ai haida ese Satana do idia badinaia?

22. (a) “Tanobada ena gabu ibounai idia noho taudia” ena anina be dahaka? (b) Dahaka dainai gwau-edeede taudia edia ladadia idia hatoa “Gog bona Magog”?

23. Gwau-edeede taudia edia namba be “hutuma bada herea momokani, kone ena miri bamona” dainai, unai ese dahaka ia hahedinaraia?

24. (a) “Ia lalokau henia hanuana” be dahaka, bona edena bamona idia hagegea diba? (b) “Helaga taudia edia kamepa” ese dahaka ia laulaulaia?

25. Ioane ia gwau gwau-edeede taudia ese “helaga taudia edia kamepa” idia tuari henia dainai dahaka ia vara, bona Satana dekenai unai ena anina be dahaka?

26. Dahaka dainai “lahi bona salifa gohuna” be hisihisi gabuna korikorina ta lasi?

27. Sodoma bona Gomora dekenai ia vara gauna ese ita edena bamona ia durua lahi bona salifa gohuna ena anina ita diba namonamo totona?

28. Lahi bona salifa gohuna be dahaka, bona edena bamona ia be mase, Hade, bona guri dobu masemase amo ia idau?

29, 30. Ioane ese Diabolo, dagedage gauna, bona peroveta koikoi tauna edena bamona ia gwauraidia, bona unai hereva edena bamona ita laloa be namo?

31. “Hisihisi” idia gwauraia Greek gado herevadia rua ese ita edena bamona idia durua, Satana Diabolo ena panisi dekenai ita lalo-parara totona?

32. Demoni ese dahaka panisi do idia abia, bona ita be unai edena bamona ita diba?

33. Dahaka hereva dokona Genese 3:15 lalonai do ia guguru, bona Iehova ena lauma helaga ese Ioane ia hadibaia dahaka ia laloa totona?

[Picture on page 293]

Tadi Gohuna. Reana Sodoma bona Gomora hanuadia be unuseniai idia noho

[Pictures on page 294]

“Lau ese badu oi bona hahine huanai do lau atoa bona oiemu garana bona iena garana huanai. Ia ese emu kwarana do ia haberoa bona oi ese iena aena geduna do oi haberoa”