Emu Matamata Negana ai Oi Kwalimu

EUROPE tanona ta dekenai idia noho taudia idia noia inai gaudia toi amo ta do idia abia hidi: hairai, taga, eiava matamata negana. Idia abia hidi gauna ginigunana be matamata negana. Oibe, mauri lagani idauidau taudia ibounai idia gwau mauri lagani 13 ia lao 23 bamona negana be nega idauna. Bona taunimanima ibounai idia ura matamata taudia be maragi negana amo taunimanima badadia ai idia lao negana ai idia kwalimu. To edena dala ai?

Baibel ese idia ia durua diba, a? Haere be oibe. Mani Dirava ena Hereva ese matamata taudia ia durua diba daladia rua ita itaia, unai ese lagani idauidau taudia ia durua to reana matamatadia ia durua bada.

Taunimanima Ma Haida Bamoa Karana

Jugend 2000 ese Germany ai matamata taudia ibounai 5,000 mai kahana edia lalohadai, idia ura henia gaudia, bona edia kara idia tahua gaukarana ta ena sivarai ia herevalaia. Unai tahua gaukarana ese ia hahedinaraia matamata taudia be laga-ani moale karadia​​—⁠hegeregere miusiki kamonai henia, spot gadara, eiava idia loaloa kava​​—⁠ negadiai, nega momo taunimanima ma haida ida idia karaia hebou. Matamata taudia idia ura edia uru taudia sibona idia bamoa momo, to reana uru ma haida be unai bamona lasi. Unai dainai, matamata negana lalonai idia kwalimu dalana ta be taunimanima ma haida bamoa karana.

To nega momo taunimanima ma haida bamoa karana be auka. Momokani, matamata taudia momo idia gwau nega momo taunimanima idia hetura henia karana be hekwakwanai badana. Unai kahana dekenai, Baibel ese heduru namona ia henia. Dirava ena Hereva lalonai hakaua hereva badadia idia noho, matamata taudia do idia durua hetura namonamo karana idia hagoadaia totona. Baibel be dahaka ia gwau?

Taunimanima tura henia karana lalonai hakaua hereva badana ta be Taravatu Hereadaena, ia gwau: “Gau ibounai umui ura taunimanima ese do idia karaia umui dekenai, umui ese unai bamona do umui karaia idia dekenai.” Mai hemataurai, kara namo, bona hebogahisi danu taunimanima ma haida oi kara henia neganai, unai ese idia ia hagoadaia oi dekenai unai bamona idia karaia totona. Hebogahisi karana ese hepapahuahu bona lalo-hekwarahi ia haorea diba. Bema oi ese ma haida edia namo oi laloa bada, idia ese oi do idia laloa bada bona oi do idia abia dae danu. Ma haida ese oi idia abia dae neganai oi moale, ani?​​—⁠Mataio 7:​12.

Baibel ena sisiba be, “oiemu badibadinai tauna dekenai oi lalokau henia, oi sibona dekenai oi lalokau henia bamona.” Oi sibona oi lalokau henia ena anina be sibona oi naria namonamo bona oi matauraia, to oi habadaia momokani lasi bona hamaragia momokani lasi. Dahaka dainai unai ese oi ia durua bada diba? Badina bema oi sibona emu namo oi laloa lasi, reana ma haida do oi maumauraia, bona unai ese hebamo dalana namona do ia hadikaia. To sibona oi matauraia karana be badina aukana, ia latanai hetura karana goadana oi haginia diba.​—⁠Mataio 22:⁠39.

Taunimanima rua idia hetura heheni matamaia neganai, idia ruaosi ese unai hetura karana idia hagoadaia be gau badana. Namona be hetura karana ai ita gaukaralaia ena nega ita moalelaia, badina “henia kara ena moale be bada, abia kara ena moale be maragi.” Henia karana ta be kerere gwauatao karana, anina be ma haida edia kerere maragidia ita laloatao lasi bona ita laloa lasi haida edia kara do idia goevadae be namo. Baibel ia gwau: “Emui manau bona manada kara taunimanima ibounai edia vairanai do umui hedinaraia.” Oibe, “maino karaia daladia umui tahua dala idauidau ibounai dekenai, taunimanima danu mai maino danu do umui noho totona.” Bema turana ta ese emu manoka gauna ta ia gwauraia hedinarai be edena bamona? Edena bamona do oi laloa? Namona be Baibel amo inai sisiba namona oi laloa, ia gwau: “Do oi badu haraga lasi,” badina “oiemu turana ese oi ia hahisia neganai, unai be oi do ia hanamoa totona.” Turadia ese emu lalohadai, hereva, bona kara idia haidaua diba, ani? Unai dainai, Baibel ia gwau: “Bema kara dika taudia danu umui turana karaia neganai, idia ese emui kara namona do idia hadikaia.” To, “aonega tauna danu ia raka hebou noho tauna, be do ia aonega.”​—⁠Kara 20:35; Filipi 4:5; Roma 12:​17, 18; Hadibaia Tauna 7:9; Aonega Herevadia 13:20; 27:6; 1 Korinto 15:⁠33.

Marco be matamata taudia momo durua herevana ia gwauraia, ia gwau: “Taunimanima ma haida bamoa karana dekenai Baibel ena hakaua herevadia be mai edia heduru bada. Lau diba taudia haida be sibona edia namo bona edia mauri lalonai do idia abia gaudia sibona idia laloa bada. Baibel ese ita ia hadibaia, namona be sibona eda namo ita laloa momo lasi, to ma haida edia namo ita laloa danu. Lau itaia, ia be dala namona taunimanima idia hetura namonamo karana dekenai.”

Marco hegeregerena, matamata taudia be Baibel amo diba idia abia neganai, unai ese edia matamata negana ai ia durudia sibona lasi, to edia vaira negana lalonai danu. Bona vaira negana ita herevalaia dainai, Baibel ese matamata taudia do ia durua dalana badana ma ta ita laloa.

Vaira Negana Lalo-Hekwarahilaia Karana

Matamata taudia momo idia ura bada henanadai momo edia haere idia diba. Idia ura ia vara noho gauna bona ena badina idia dibaia, to uru ma haida be reana unai bamona lasi. Bona buka ma ta lasi to Baibel be tanobada oromana ia idau ena badina ia gwauraia hedinarai bona ita ia hamaoroa vaira negana ai dahaka do ia vara. Matamata taudia be unai gauna idia ura idia dibaia. Badina be dahaka unai bamona ita gwau diba?

Ena be taunimanima momo idia laloa matamata taudia be hari noho maurina sibona idia laloa momo, to tahua gaukaradia haida amo lalohadai idauna ta ia hedinarai. Idia hahedinaraia nega momo matamata taudia be idia vara gaudia idia laloa namonamo, bena sibona edia lalohadai amo vaira negana maurina ena toana idia gwauraia. Hamomokania gauna be inai, matamata taudia 4 4 amo 3 3 ese vaira negana be “nega momo” eiava “nega momo herea” idia laloa. Herevana nega momo matamata taudia idia lalo-goada, to idia momo herea ese vaira negana idia lalo-hekwarahilaia danu.

Dahaka dainai idia lalo-hekwarahi? Hari, matamata taudia momo be taravatu utua karadia, dagedage, bona drag ania kava karadia idia karaia. Matamata taudia idia lalo-hekwarahi, idia ura kara helulu taudia huanai moni gaukarana ta idia karaia daudau be namo. Idia lalo-metau, idia ura namona be sikuli dekenai maka namodia idia abia eiava moni gaukara gabunai idia be kwalimu taudia. Mauri lagani 17 kekenina ta ia gwau: “Ita be ta ta sibona ena namo ena namo idia tahua negana lalonai ita noho. Taunimanima iboudiai be sibona edia ura idia badinaia toho. Hanaihanai oi karaia diba gauna do oi hamomokania, bona unai ese lau ia habadua.” Ena mauri lagani 22 merona, ia gwau: “Kwalimu taudia edia mauri idia moalelaia bona idia noho namonamo. To, dika idia davaria taudia be badina ta dainai idia hegeregere lasi, bona idia hekwarahi noho.” Dahaka dainai mauri be mai ena hekwarahi bada? Ela bona hanaihanai mauri be unai bamona, a?

Haere Maorona

Matamata taudia ese taunimanima bona edia noho dalana idia daradaralaia eiava idia lalo-hekwarahilaia neganai, idia be Baibel ena hereva dekenai idia lalo-tamona​​—⁠herevana unai idia diba eiava idia diba lasi. Dirava ena Hereva ese ia hahedinaraia hari “ta ta sibona ena namo ena namo idia tahua negana” be nega ena toana ta. Aposetolo Paulo ese tau matamata ladana Timoteo dekenai iseda nega ia herevalaia revarevana ia siaia neganai, ia gwau: “Metau dikadia momo do idia vara.” Dahaka dainai metau dikadia do idia vara, bona idia be mai edia hekwarahi? Paulo ma ia gwau: “Badina taunimanima ese idia edia ura sibona do idia tahua, moni do idia mataganigani henia, do idia hekokoroku bona heagi. . . . tanikiu henia kara do idia diba lasi, bona helaga karadia do idia negea. . . . Do idia dagedage.” Unai ese hari inai negai taunimanima momo edia kara toana ia herevalaia maoromaoro, ani?​—⁠2 Timoteo 3:​1-3.

Baibel ia gwau “nega ena dokona dekenai” unai nega aukadia do idia vara, bena unai murinai taunimanima ibounai edia noho dalana do ia idau momokani. Taunimanima ibounai, matamata taudia bona buruka taudia, ese unai do idia mamia. Dahaka do ia idau momokani? Kahirakahira guba gavamanina ese taunimanima do ia biagua, bona ia henunai do idia noho taudia be tanobada hegegemadai “mai maino danu” do idia noho. “Kara maoromaoro taudia ese, Dirava ia henidia tano dekenai do idia noho ela bona hanaihanai.” Lalo-hekwarahi bona daradara be do idia ore.​—⁠Salamo 37:​11, 29.

Baibel sibona be vaira negana ia herevalaia maoromaoro. Matamata tauna be vaira lagani lalonai do idia vara gaudia ia diba neganai, do idia vara gaudia dainai do ia hegaegae bona noho namo ia mamia bona iena mauri do ia biagua namonamo. Unai ese lalo-metau bona lalo-hekwarahi ia hamaragia. Unai dala ai, matamata taudia idia ura idia dibaia gaudia​​—⁠taunimanima edia mauri dalana idia lalo-pararalaia bona vaira negana ai idia vara gaudia idia diba​​—⁠be Baibel ese ia gwauraia hedinarai.

Matamata Negana ai Umui Kwalimu

Dahaka ese ia hahedinaraia matamata negana ai idia kwalimu? Edukeisen badana idia abia, mai edia kohu, bona edia turana be momo dainai, a? Momo be reana unai bamona idia laloa. To, ta ena mauri lagani be 13 ia lao 23 bamona neganai, namona be iena mauri be badina aukana latanai ia haginia bona unai be mai anina ena vaira maurina totona. Eiava ita gwau diba, matamata negana ai idia kwalimu karana ese vaira negana ai do ia vara gauna ia hahedinaraia.

Ita itaia vadaeni, Baibel ese matamata tauna ta ia durua diba ena matamata laganidia ai ia kwalimu totona. Matamata taudia momo be edia mauri lalonai unai bamona idia davaria vadaeni. Dina ta ta Dirava ena Hereva idia duahia bona idia dibaia gauna idia badinaia. (“Iehova Ena Hesiai Merona ta amo Heduru Herevana,” rau 6 ai itaia.) Momokani, hari inai negai, Baibel be matamata taudia ia durua bukana korikorina badina ia durudia diba bena ‘edia goada be hegeregere momokani, vadaeni kara namodia ibounai do idia karaia diba, mai kwalimu danu.’​—⁠2 Timoteo 3:​16, 17.

[Blurb on page 5]

Matamata negana ai idia kwalimu dalana ta be  ma haida bamoa karana

[Blurb on page 6]

Matamata taudia idia ura ia vara noho gauna bona ena badina idia dibaia, to uru ma haida be reana unai bamona lasi

[Box on page 6, 7]

Iehova Ena Hesiai Merona ta amo Heduru Herevana

Alexander ena mauri lagani be 19. Ena ruma bese be Iehova ena Witnes taudia, bona ia abia dae gaudia ibounai ia badinaia momokani mai ena moale bada ida. To, guna ia be unai bamona lasi. Alexander ia gwau:

“Reana do oi hoa, to lau maragi neganai lagani 7 mai kahana lalonai lau be bapatiso lasi merona bona Iehova ena Witnes taudia lau bamoa. Unai nega lalonai, egu tomadiho karana be egu kudouna ibounai ida lau karaia lasi, to lau karaia loulou kava sibona. Reana lau sibona ese egu kara lau tahua namonamo totona lau hekwarahi lasi.”

Bena Alexander ena lalohadai ia idau. Ma ia gwau:

“Egu tama sina bona kongregesen turadia ese lau idia hagoadaia dina ta ta lalodiai Baibel lau duahia be namo, Iehova lau diba namonamo totona. Bena, egu lalona lau hadaia do lau karaia toho. Unai dainai, televisen raraia momo karana lau hamaragia bona daba iboudiai Baibel lau duahia. Gabeai, Baibel ena anina lau lalo-pararalaia matamaia. Lau ia durua diba dalana lau itaia. Bona​—gau badana be​​—⁠lau lalo-parara Iehova ia ura ia do lau diba. Unai lau abia dae momokani neganai, egu hetura karana ia ida ia goada matamaia, bona kongregesen taudia tura henia karana lau hanamoa. Baibel ese egu mauri ia haidaua karana be idau momokani! Lau gwau diba, namona be Iehova ena hesiai kekeni bona memero ibounai ese dina ta ta lalodiai Baibel idia duahia.”

Tanobada hegegemadai, matamata taudia milioni momo be Iehova ena Witnes taudia idia bamoa. Oi be idia ta, a? Oi ura Baibel duahia hanaihanai karana amo namo oi abia, a? Alexander ena haheitalai oi tohotohoa be namo, ani? Namona be anina bada lasi gaudia oi rakatania bona dina ta ta ai Baibel oi duahia loulou. Namo bada do oi davaria momokani.