“Galilea Ena Gabu Hereadaena Ta”

IESU ia tubu daekau hanuana Nasareta ena notwest kahanai bona kilomita 6.5 bamona dekenai be siti ta ia noho, to Evanelia bukadia ese ena ladana idia gwauraia lasi. Histori ia torea Iuda tauna Flavius Josephus ese unai hanua ia gwauraia, “dava bada gauna Galilea ibounai dekenai.” Unai siti ena ladana be Seporis. Unai siti dekenai dahaka ita diba?

Lagani 1 B.C.E. bamona ai Heroda Badana ia mase murinai, Seporis taudia be edia gwau-edeede karana dainai, Roma taudia ese edia hanua idia hadikaia. Heroda ena natuna Anetipa ese Galilea bona Perea ia biagua neganai, Seporis ia abia hidi bena ena siti matamatana ai ia halaoa. Unai siti be Roma bona Greek edia sitaelo ai idia karaia, to Iuda taudia momo ese idia noholaia. Profesa Richard A. Batey ia gwau: “Gavamani be unai siti amo Galilea bona Perea ia biagua.” Lagani 21 C.E. bamona ai, Anetipa ese Tiberia be siti ai ia halaoa, bona Seporis ena gabu ia abia. Unai nega ai, Iesu be unai hanua kahirakahira ia noho.

Seporis ena tano ia geia bona ia stadilaia Profesa James Strange ia laloa, guna Seporis dekenai be ripoti haboua gabudia, dava bada gaudia, tuari kohudia, banika, ruma badadia, bona maketi ai idia hoihoilaia gaudia hegeregere hodu, galasi, auri gaudia, herahera gaudia, bona aniani idauidau idia noho. Unai hanua dekenai be dabua turia taudia bona dabua hoihoilaia taudia idia noho, bona sitoa dekenai bosea, au kohudia, bonana namo muramura bona ma gau haida idia hoihoilaia. Unai nega lalonai, toana be hanua dekenai idia noho taudia be 8,000 eiava 12,000 bamona.

Ena be Nasareta bona Seporis ena daudau be hora tamona oi raka diba, to Iesu be Seporis ia vadivadi henia, a? Evanelia bukadia ese unai idia gwauraia lasi. To, The Anchor Bible Dictionary, ia gwau: “Nasareta ena dala badana ta be ia lao Seporis dekenai, bena ia hanai lao Galilea ena hanua Kana dekenai.” (Ioane 2:1; 4:​46) Nasareta amo be Seporis ena ororo oi itaia diba, ena lata be mita 120 bamona. Haida idia laloa Iesu be Seporis ia herevalaia danu, badina ia gwau: “Ororo dekenai ia noho hanua be ia hunia diba lasi.”​​—⁠Mataio 5:​14.

Lagani 70 C.E. ai Ierusalema idia hadikaia neganai, Galilea dekenai Seporis be Iuda ena siti badana ai ia lao, bona gabeai, unai hanua ai Sanhedrin​—⁠Iuda taudia edia kota badana​—⁠idia haginia. Daudau lasi murinai, Iuda ena diba bada taudia be unuseniai idia stadi bona hadibaia gaukarana idia karaia.

[Map/​Picture on page 32]

(For fully formatted text, see publication)

Galilea Davarana

GALILEA

Kana

Tiberia

SEPORIS

Nasareta

PEREA

[Picture Credit Line on page 32]

Pottery: Excavated by Wohl Archaeological Museum, Herodian Quarter, Jewish Quarter. Owned by Company for the Reconstruction of the Jewish Quarter in the Old City of Jerusalem, Ltd