Anina Umui Haboua Mai Moale Ida!

“Uiti ena anina abia negana ia ginidae vadaeni, to utua taudia be momo lasi. Uma ena biaguna dekenai umui noinoi, ia ese utua taudia ma haida do ia siaia, iena uiti do idia utua.”​​—⁠MATAIO 9:​37, 38.

 1. Dahaka ese ita ia durua, Dirava ena ura ita karaia noho totona?

BAPATISO ita abia bona Iehova ena hesiai taudia ai ita lao dinana ita laloa neganai, ena be unai nega amo lagani haida eiava lagani momo idia lao vadaeni, to reana toana be varani sibona ia vara. Iseda mauri ita gwauhamatalaia dainai Iehova hanamoa karana be mai anina bada gauna ai ia lao. Iseda nega ita haorea kava lasi to ma haida ita durua, Basileia ena sivarai idia kamonai bona abia dae totona, bona mai moale ida Iehova ita hesiai henia be ita laloa bada. (Efeso 5:​15, 16) Unai nega amo ema bona hari, ita itaia nega ia hanaia haraga, bema ‘Lohiabada ena gaukara ita karaia goadagoada.’ (1 Korinto 15:58) Ena be hekwakwanai ita davaria, to Iehova ena ura ita karaia lalonai ita abia moalena ese ita ia hagoadaia, ita gaukara noho totona.​​—⁠Nehemia 8:​10.

 2. Laulau dalana ai, ita karaia anina haboua gaukarana ai moale ita abia ena badina be dahaka dahaka?

² Laulau dalana ai, ita Keristani taudia eda gaukara be anina haboua gaukarana bamona. Iesu Keriso ese mauri hanaihanai totona taunimanima haboua gaukarana be uma ena anina haboua gaukarana ida ia hahegeregerea. (Ioane 4:​35-​38) Ita be unai bamona gaukara ita karaia dainai, bema Keristani ginigunadia ese unai anina haboua gaukarana amo idia abia moalena ita laloa, unai ese ita do ia hagoadaia. Hari inai negai anina haboua gaukarana ai moale ita abia ena badina toi ita laloa. Idia be (1) iseda helaro sivaraina, (2) iseda tahua karana dekenai ita kwalimu, bona (3) anina haboua gaukarana ai maino ita hahedinaraia.

Idia Ia Siaia Anina Idia Haboua Totona

 3. Edena dala ai Iesu murinai idia raka taudia ginigunadia ese moale idia abia?

³ Dina ta ai, lagani 33 C.E. lalonai, anina haboua taudia ginigunadia be ia toreisi lou Keriso idia hedavari totona Galilea ena ororo ta dekenai idia daekau, bona unai ese edia mauri ia haidaua momokani​—⁠bona Iesu ena kamonai aposetolo taudia 11 edia mauri ia haidaua bada! (Mataio 28:16) Reana unai gabu dekenai idia lao taudia be “500 mai kahana.” (1 Korinto 15:⁠6) Iesu ese idia dekenai ia henia hahegani idia laloatao loulou noho. Idia ia hamaoroa: “Do umui lao, bese ibounai be diba tahua taudia do umui halaoa, bona Tamana, Natuna, bona Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia.” (Mataio 28:​19, 20) Ena be dagedage bada idia davaria, to anina haboua gaukarana ai moale bada idia abia, badina idia itaia Keriso murinai idia raka taudia edia kongregesen be gabu momo dekenai idia haginia. Gabeai, ‘sivarai namona be tanobada ibounai dekenai idia harorolaia.’​​—⁠Kolose 1:​23; Kara 1:8; 16:⁠5.

 4. Edena negadia ai Keriso ese ena hahediba taudia ia siaia?

⁴ Iesu be guna Galilea dekenai ia haroro neganai, ena aposetolo taudia 12 ia boiria bona ia siaia, do idia gwau: “Guba Basileia be kahirakahira ia mai vadaeni.” (Mataio 10:​1-7) Ia sibona be Galilea ena “hanua badadia bona hanua maragidia dekenai ia loaloa, edia dubu lalonai ia hadibaia karaia, Basileia ena Sivarai Namona ia harorolaia, gorere taudia bona hisihisi taudia ibounai ia hanamoa.” Iesu ese taunimanima hutuma ia hebogahisi henia, “badina be edia tauanina idia manokamanoka, bona idia lao idau gabu idau gabu dekenai, mamoe idia naria lasi bamona.” (Mataio 9:​35, 36) Unai ese ena kudouna ia hamarerea bada bona ena hahediba taudia ia hamaoroa: “Uiti ena anina abia negana ia ginidae vadaeni, to utua taudia be momo lasi. Uma ena biaguna [Iehova Dirava] dekenai umui noinoi, ia ese utua taudia ma haida do ia siaia, iena uiti do idia utua.” (Mataio 9:​37, 38) Iesu ena hesiai gaukara tanobada dekenai ena hua ginigabedia 6 idia do noho neganai, Iudea dekenai anina haboua taudia dekenai unai bamona ia hereva danu. (Luka 10:⁠2) Unai nega ruaosi ai, ia murinai idia raka taudia ia siaia anina idia haboua totona.​—⁠Mataio 10:5; Luka 10:⁠3.

Iseda Helaro Sivaraina

 5. Edena bamona sivarai ita harorolaia?

⁵ Hari inai negai ita be Iehova ena hesiai taudia dainai, anina haboua taudia idia siaia totona idia halasia boiboina ita abia dae bona mai moale ida ita lao. Iseda moale ia habadaia gauna ta be, lalohisihisi bona lalo-metau taudia dekenai helaro sivaraina ita abia lao. Iesu ena hahediba taudia ginigunadia hegeregerena, iseda hahenamo be “edia tauanina idia manokamanoka, bona idia lao idau gabu idau gabu dekenai, mamoe idia naria lasi” taudia dekenai sivarai namona​—⁠helaro sivaraina korikorina​—⁠ita harorolaia!

 6. Aposetolo taudia ese edena gaukara idia karaia?

⁶ Lagani 50 C.E. bamona ai, aposetolo Paulo ese sivarai namona ia harorolaia goadagoada. Bona ena anina haboua gaukarana ia karaia namonamo, badina lagani 55 C.E. bamona ai Korinto Keristani taudia ia tore henia neganai, ia gwau: “Lauegu varavara taudia e, Sivarai Namona umui dekenai lau harorolaia gauna, be umui abia dae vadaeni, bona ia lalonai umui emui abidadama ia gini goada noho. Lau ura inai Sivarai Namona umui laloa lou.” (1 Korinto 15:⁠1) Aposetolo taudia bona Keristani taudia ginigunadia ma haida be anina idia haboua gaukarana idia karaia goadagoada. Ena be Baibel ese ita ia hadibaia lasi lagani 70 C.E. ai Ierusalema idia hadikaia negana vairanai idia vara gaudia amo aposetolo taudia hida idia roho mauri, to ita diba unai ia vara bena lagani 25 murinai aposetolo Ioane be haroro gaukara ia do karaia noho.​—⁠Apokalupo 1:⁠9.

7, 8. Hari Iehova ena hesiai taudia ese mai karaharaga lalohadaina ida idia harorolaia helaro sivaraina be dahaka?

⁷ Unai murinai, lagani handred momo lalonai, Kerisendom ena dubu gunalaia taudia oreana, hereva momokani ia negea “Tau Dika Rohorohona,” ena siahu ia bada. (2 Tesalonika 2:⁠3) To, lagani 1800 be kahirakahira neganai, idia ura Keristani dalana ginigunana idia badinaia taudia ese helaro sivaraina, Basileia ena sivarai unai, idia harorolaia matamaia. Momokani, inai magasin ginigunana (July 1879 gauna) amo ena sinado ai inai hereva, “Keriso Ena Noho Negana Ia Halasia Gauna,” “Keriso Ena Basileia Ia Halasia Gauna,” bona “Iehova Ena Basileia Ia Harorolaia,” idia hahedinaraia.

⁸ Lagani 1914 ai Iesu Keriso ese Dirava ena guba Basileia ia lohiaia matamaia, bona hari ita ese mai karaharaga lalohadaina ida helaro sivaraina ita harorolaia, guna bamona lasi. Dahaka dainai? Badina Basileia ese ia mailaia hahenamo ta be kahirakahira inai tanobada dikana ena oromana be do ia haorea. (Daniela 2:44) Unai be sivarai hereadaena, ani? Bona “hisihisi bada herea” ia do vara lasi lalonai Basileia ita harorolaia be moale bada gauna, ani?​—⁠Mataio 24:21; Mareko 13:⁠10.

Tahua Karana Dekenai Ita Kwalimu

 9. Iesu ese ena hahediba taudia dekenai dahaka ia hadibaia, bona taunimanima edia kara Basileia ena sivarai dekenai be edena bamona?

⁹ Anina haboua gaukarana ai iseda moale ia habadaia gauna ma ta be, hahediba taudia ai do idia lao bona ita ida anina haboua gaukarana do idia karaia taudia ita tahua karana lalonai ita kwalimu. Lagani 31 ia lao 32 C.E. lalonai, Iesu ese ena hahediba taudia ia hadibaia, ia gwau: “Hanua maragina ta dekenai o hanua badana ta dekenai do umui ginidae neganai, kara namona tauna ta do umui tahua.” (Mataio 10:11) Taunimanima ibounai be kara namo taudia lasi, edia kara Basileia ena sivarai dekenai ese unai ia hahedinaraia. To, Iesu ena hahediba taudia ese taunimanima idia davaria gabudia ibounai dekenai mai edia ura bada ida sivarai namona idia harorolaia noho.

10. Edena dala ai Paulo ese kara namo taudia tahua gaukarana ia karaia noho?

¹⁰ Iesu ia mase bona toreisi lou murinai, kara namo taudia tahua gaukarana idia karaia noho mai goada ida. Paulo ese edia dubu lalodiai idia noho Iuda taudia ida ia herevahereva bona Atena ena maketi gabuna ai idia noho taudia ia hereva henia danu. Unai Greek hanuana ena Areo Ororona dekenai ia haroro neganai, “haida be ia dekenai idia hakapua, bona abidadama henia taudia idia halaoa. Idia ta be Dionusio, Areo Ororo ena orea tauna ta, bona ta be hahine, iena ladana be Damari, bona ma haida danu.” Herevana Paulo be edeseniai ia lao, haroro gaukara dekenai ia be haheitalai namona, ‘taunimanima edia vairanai bona ruma ai’ ia haroro mai goada ida.​—⁠Kara 17:​17, 34; 20:⁠20.

11. Lagani gunadia lalonai edena dala ai haroro gaukara idia karaia?

¹¹ Lagani 1800 ia kahirakahira laganidia lalonai, horoa Keristani taudia be mai gari lasi ida kara namo taudia idia tahua. Zion’s Watch Tower, July/August 1881, ena hereva, “Ia Horodia Idia Haroro Totona,” ia gwau: “Sivarai namona harorolaia gaukarana . . . be ‘manau taudia’ huanai idia karaia​—⁠idia ura kamonai bona idia kamonai diba taudia, idia amo Keriso ena taudia, ia ida idia lohia taudia, idia haboua totona.” Nega momo Dirava ena taunimanima, anina haboua taudia unai, ese dubu ena hebou ia ore murinai idia lao taudia idia davaria bona idia dekenai Baibel ena hereva idia halasia pepapepadia idia henia, kara namo taudia edia lalona idia veria totona. Unai haroro dalana ena namo idia laloa namonamo murinai, May 15, 1903 ena Watch Tower ese anina haboua taudia ia hagoadaia unai pepapepa be “ruma ta ruma ta ai, Sunday daba ai” do idia hariharilaia.

12. Edena dala ai iseda haroro gaukara ita haidaua anina ia havaraia totona? Haheitalai oi gwauraia.

¹² Vanegai laganidia lalonai, iseda haroro gaukara ita habadaia totona taunimanima edia ruma dekenai sibona lasi to ma gabu haida ai ita haroro henidia danu. Moni gaukara idia karaia bona moale karadia idia tahua goadagoada dainai, ita haroro negadiai taunimanima be edia ruma dekenai idia noho lasi tanodia dekenai, unai ese anina ia havaraia. England dekenai Witnes taihu ta bona ena bamona idia itaia vadivadi taudia ese kone dekenai dina idia moalelaia murinai hanaihanai basi amo idia lao, unai dainai mai gari lasi ida unai basi lalodiai idia vareai bona idia guia taudia dekenai Gima Kohorona bona Awake! idia hahedinaraia. Hua tamona lalonai, magasin 229 idia hariharilaia. Idia gwau: “Kone ai eiava bisinesi teritori ai haroro gaukarana dainai, eiava ai davaria diba hekwakwanai ma ta dainai ai gari lasi, badina ai diba hanaihanai Iehova be ai ida ia noho.” Idia ese haida dekenai magasin idia abia lao loulou, Baibel stadi idia hamatamaia, bona idia ruaosi ese heduru painia gaukara idia karaia.

13. Gabu haida ai iseda haroro gaukara be edena bamona ita haidaua be namo?

¹³ Kara namo taudia ita tahua noho lalonai, gabu haida ai haroro daladia edia namo idia laloa namonamo be namo. Ena be Witnes taudia momo be hanaihanai Sunday dabai ruma-ta-ruma-ta gaukarana idia karaia, to gabu haida ai idia davaria, daba dekenai taunimanima edia ruma dekenai idia lao karana ese anina ia havaraia lasi badina taunimanima idia do mahuta. Witnes taudia momo ese edia sediual idia haidaua dainai, hari idia ese adorahi kahana dekenai, reana Keristani heboudia murinai, edia tahua gaukarana idia karaia. Bona unai tahua gaukarana ese anina idia havaraia. Lagani gunana ai, tanobada hegegemadai Basileia harorolaia taudia edia namba be 2.3 pesen amo ia bada daekau. Unai ese anina haboua gaukarana ena Biaguna ia hanamoa bona iseda kudouna ia hamoalea.

Anina Haboua Gaukarana ai Maino Oi Hahedinaraia

14. Sivarai namona ita harorolaia neganai edena lalohadai ita hahedinaraia, bona dahaka dainai?

¹⁴ Ita moale ena badina ma ta be anina haboua gaukarana ai maino ita hahedinaraia. Iesu ia gwau: “Ruma dekenai umui raka vareai neganai be do umui hanamoa. Bona bema ruma taudia idia namo, umui emui hanamoa be idia latanai do umui atoa.” (Mataio 10:​12, 13) Heberu hanamoa herevana bona ia hegeregerena Greek herevana ese ia hahedinaraia lalohadai be ‘Ai ura emui mauri do ia namo.’ Taunimanima dekenai sivarai namona ita harorolaia neganai unai lalohadai ita hahedinaraia. Iseda ura be idia ese Basileia ena sivarai do idia abia dae. Idia abia dae taudia ese edia kara dika amo idia helalo-kerehai, edia kara idia haidaua, bona Dirava ena ura idia karaia neganai, Ia ida maino ai do idia noho. Bona, Dirava ida maino ai ita noho dainai mauri hanaihanai do ita abia diba.​—⁠Ioane 17:3; Kara 3:19; 13:​38, 48; 2 Korinto 5:​18-20.

15. Haroro gaukara ai taunimanima ese ita idia dadaraia neganai, edena bamona maino ita dogoatao noho diba?

¹⁵ To, taunimanima ese ita idia dadaraia neganai, edena bamona maino ita dogoatao noho diba? Iesu ia gwau: “Bema ruma taudia . . . idia dika, umui emui hanamoa do umui abia lou.” (Mataio 10:13) Iesu ese hahediba taudia 70 ia siaia ena sivarai be Luka ese ia torea neganai, Iesu ena hereva ia gwauraia danu, ia gwau: “Unai ruma dekenai bema maino tauna ta ia noho, emui maino be iena latanai do ia noho, to bema lasi, oiemu maino hereva do ia giroa lou [umui] dekenai.” (Luka 10:⁠6) Taunimanima dekenai sivarai namona ita harorolaia neganai, moale bona maino ita hahedinaraia be maoro. Badina ruma tauna ia ura lasi, ia maumau, eiava ia hereva dika henia karana amo ia vara gauna tamona be iseda maino sivaraina be ita dekenai ia “giroa lou.” To unai ese iseda maino, Iehova ena lauma helaga ena huahua ta, ia kokia lasi.​—⁠Galatia 5:​22, 23.

Anina Haboua Taudia Edia Tahua Gauna Namona

16, 17. (a) Lou henia ita karaia lalonai iseda tahua gauna be dahaka? (b) Baibel henanadai idia gwauraia taudia be edena bamona ita durua diba?

¹⁶ Ita be anina haboua taudia dainai, ita moale badina mauri hanaihanai totona taunimanima ita haboua diba. Bona ita haroro henia tauna ese iseda hereva ia abia dae, ia ura ena diba ia habadaia, bona ia hedinarai ia be “maino tauna” neganai, moale bada ita abia! Reana ia ese Baibel henanadai momo ia gwauraia bona vadivadi tamona lalonai idia ibounai ita haerelaia diba lasi. Nega ginigunana ai ta ita vadivadi neganai, nega daudau ita noho be maoro lasi dainai, dahaka ita karaia diba? Reana lagani 60 bamona gunanai idia herevalaia tahua gauna ita atoa diba.

¹⁷ “Namona be Iehova ena witnes taudia ibounai idia hegeregere Baibel stadi karaia dalana idia hahedinaraia totona.” Unai hereva be lagani 1937 ia lao 1941 lalonai idia halasia Model Study hadibaia bukadia ihatoina lalonai ia hedinarai. Ma ia gwau: “Namona be [Basileia] harorolaia taudia ibounai ese dala idauidau ai Basileia ena sivarai idia ura kamonai taudia namodia idia durua mai ura bada ida. Unai taudia idia lou henia be namo, . . . henanadai idauidau idia haerelaia, bena stadi karaia dalana idia hahedinaraia haraga.” Oibe, lou henia ita karaia neganai iseda tahua gauna be Baibel stadi do ita hamatamaia bona do ita karaia hanaihanai.a Taunimanima ita laloa bada bona kamonai taudia edia namo be lalokau dalanai ita tahua dainai, ita ura ita hegaegae namonamo bona anina ia havaraia stadi ita karaia.

18. Edena dala ai kamonai matamata taudia ita durua diba, bena Iesu Keriso ena hahediba taudia ai do idia lao?

¹⁸ Diba ese Mauri Dekenai Ita Ia Hakaua Lao bukana bona Dirava Ia Ura Dahaka Ita Karaia? bamona buklet edia heduru amo, anina idia havaraia Baibel stadi ita karaia diba bena kamonai matamata taudia ita durua hahediba taudia ai idia lao totona. Ita ese Hadibaia Tauna Badana, Iesu Keriso, ena kara ita tohotohoa dainai, unai bamona Baibel stiuden taudia ese iseda kara amo diba idia abia danu, badina ita ese maino bona moale ita hahedinaraia, mai momokani ida ita kara, bona Iehova ena taravatu bona hakaua herevadia ita matauraia dainai. Kamonai matamata taudia ita durua bona edia henanadai ita haerelaia neganai, idia dekenai henanadai idia henia taudia idia haere henia dalana idia diba totona ita hadibadia be namo. (2 Timoteo 2:​1, 2; 1 Petero 2:21) Laulau dalanai ita be anina haboua taudia dainai, ita moale badina hesiai lagani gunana lalonai tanobada hegegemadai Baibel stadi edia averes be 4,766,631. Bona, bema ita be Baibel stadi gaukarana idia karaia anina haboua taudia, moale bada ita abia.

Anina Haboua Gaukarana Lalonai Oi Moale Noho

19. Iesu ia haroro negana lalonai bona sisina murinai anina haboua gaukarana ai idia moale ena badina namodia be dahaka?

¹⁹ Iesu ia haroro negana lalonai bona sisina murinai badina namona dainai anina haboua gaukarana ai idia moale. Unai nega ai momo ese sivarai namona idia abia dae. Pentekoste 33 C.E. ai idia moale bada, badina taunimanima 3,000 bamona ese Petero ena hakaua herevana idia abia dae, Iehova ena lauma helaga idia abia, bona Dirava ena bese, lauma Israela, ena kahana ai idia lao. Momokani, edia namba bona edia moale ia bada daekau, badina “dina ibounai, Lohiabada ese mauri ia henia taudia, be abidadama taudia edia orea lalonai ia haboua.”​—⁠Kara 2:​37-41, 46, 47; Galatia 6:16; 1 Petero 2:⁠9.

20. Dahaka dainai anina haboua gaukarana ai ita moale bada?

²⁰ Unai negai, Isaia ena peroveta hereva ia guguru, ia gwau: “Lohiabada e, oi ese edia bese oi habadaia momokani. Oi ese edia moale danu oi habadaia vadaeni. Oiemu vairana dekenai idia moale noho, edia uiti idia utua bona haboua ena moale bamona, bona tuari dekenai abia kohu, idia haria noho ena moale bamona.” (Isaia 9:⁠3) Ena be hari ita itaia unai horoa taudia edia ‘bese badana’ ibounai ia haboua vadaeni, to ita moale bada badina ita itaia lagani ibounai anina haboua taudia ma haida edia namba ia bada daekau noho.​—⁠Salamo 4:7; Sekaraia 8:23; Ioane 10:⁠16.

21. Hereva gabena lalonai dahaka do ita herevalaia?

²¹ Ita be mai badina namodia dainai anina haboua gaukarana ai ita moale noho. Iseda helaro sivaraina, kara namo taudia tahua gaukarana, bona maino lalohadaina hahedinaraia karana​—⁠unai gaudia ibounai dainai anina haboua gaukarana ai ita moale. To, idia dainai momo ese ita idia ura henia lasi. Aposetolo Ioane dekenai unai bamona ia vara. Patamo motumotuna dekenai ia idia hadiburaia, badina ‘Dirava ena hereva, bona ena abidadama Iesu dekenai ia gwauraia hedinarai.’ (Apokalupo 1:⁠9) Unai dainai, dagedage ita davaria bona ita idia dadaraia neganai, edena dala ai ita moale noho diba? Hari ita haroro henia taudia edia kara auka be edena bamona ita haheaukalaia diba? Iseda hereva gabena ese Baibel ena hereva amo unai henanadai do ia haerelaidia.

[Footnote]

Edena Bamona Do Oi Haere?

• Laulau dalanai ita karaia anina haboua gaukarana be dahaka?

• Edena bamona sivarai ita harorolaia?

• Dahaka dainai hahediba taudia tahua gaukarana ai ita kwalimu?

• Edena dala ai anina haboua gaukarana ai maino ita dogoatao noho?

• Dahaka dainai anina haboua gaukarana ai ita moale noho?

[Pictures on page 12, 13]

Haroro gaukara aposetolo taudia edia negai bona iseda negai

[Pictures on page 13]

Hari inai negai anina haboua taudia ese gabu ibounai dekenai taunimanima idia tahua, Paulo bamona

[Picture on page 13]

Sivarai namona oi harorolaia neganai kara namo oi hahedinaraia