Iehova Ita Matauraia

“Lohiabada ena kara be mai edia hairaina, bona idia ese iena King siahuna idia hedinaraia.”​​—SAL. 111:3.

1, 2. (a) Heberu herevana ta idia hahanaia “hairai” ena anina ma haida be dahaka? (b) Edena henanadai be hari do ita tahua?

BAIBEL ese ia hahedinaraia, Dirava matauraia karana be mai anina bada, ia gwau: “Lohiabada e, . . . Oi be King hereadaena, oiemu hairaina be namo herea momokani.” (Sal. 104:1) Danu, aposetolo Paulo ena hereva ese ia hahedinaraia taunimanima be hemataurai idia hahedinaraia diba. Hegeregere, ia ese Keristani hahine ia herevalaia neganai, ia gwau: “Hahine taudia ese mai manau bona mai mataurai danu edia dabua do idia kwatua. Edia huina danu sitaelo sitaelo bamona do idia karaia lasi, bona golo o kavabukavabu herahera gaudia do idia atoa lasi. Davana bada dabua danu do idia abia lasi.” (1 Tim. 2:9) To, Iehova matauraia daladia ma haida idia noho danu.​​—Sal. 111:3.

² Hiri Motu Baibel dekenai, Heberu herevana ta idia hahanaia “hairai” ena anina ma haida be, “siahu,” “dagi,” “goada,” “bada,” “king,” bona “matauraia.” Diksenari ta ia gwau, unai hereva ena anina be ta ita “hanamoa, matauraia, o laloa bada.” Iehova be hereadae, bona ita matauraia be maoro. Ita be Iehova ena hesiai taudia dainai, namona be eda hereva bona kara amo hemataurai ita hahedinaraia. Dahaka dainai hemataurai ita hahedinaraia diba? Edena dala ai Iehova ia karaia gaudia ese ena hairai idia hahedinaraia? Edena dala ai Dirava ita matauraia diba? Iesu ena hemataurai karana amo dahaka ita dibaia? Bona Iehova ita tomadiho henia neganai, hemataurai be edena bamona ita hahedinaraia diba?

Dahaka Dainai Hemataurai Ita Hahedinaraia Diba?

3, 4. (a) Iehova be ita ia hanamoa dainai, dahaka ita karaia be namo? (b) Salamo 8:​5-9 be daika ia perovetalaia? (Futnout itaia.) (c) Gunaguna Iehova be daika ia hanamoa?

³ Dirava ese taunimanima ibounai be ena toana hegeregerena ia karaia dainai, idia be hemataurai idia hahedinaraia diba. Iehova be Adamu dekenai tanobada naria gaukarana ia henia. (Gen. 1:​26, 27) Ena be Adamu ia kerere, to Iehova ia gwau lou taunimanima be tanobada do idia naria. Momokani, Dirava be taunimanima ia do matauraia bona laloa bada noho. (Salamo 8:​5-9 duahia.)a Unai hegeregerena, Iehova ita matauraia be mai anina bada​​—anina be mai gari bona hemataurai ida Iena ladana hereadaena ita hanamoa.

⁴ Iehova be ena hesiai taudia ia hanamoa o siahu ia henia. Ia ese Abela ena boubou gauna ia hanamoa to Kaino ena ia dadaraia. (Gen. 4:​4, 5) Iehova ese Mose ia hamaoroa, ena “siahu” amo Iosua do ia hasiahua, unai amo Iosua be Mose ena gabu do ia abia bona Israela taudia do ia gunalaia. (Num. 27:20) Baibel ese Davida ena natuna be inai bamona ia herevalaia: “Lohiabada ese Israela taudia ibounai edia vairana dekenai Solomona ena sivarai ia habadaia, bona king ena hairaina namo herea ia henia. Iena king siahuna ese ia idia gunalaia Israela king ibounai edia siahuna ia hereaia momokani.” (1 Siv. 29:25) Dirava be mase amo idia toreisi vadaeni horoa taudia ia hanamoa, badina idia be mai edia abidadama ida Iena “basileia ena goada bona hairaina” idia harorolaia. (Sal. 145:​11-​13) Iesu ena “mamoe idaudia” hutuma danu be Iehova ena ladana idia hanamoa dainai, Iehova be idia ia hanamoa.​​—Ioa. 10:16.

Iehova Ena Hairai Idia Hahedinaraia Gaudia

 5. Iehova ena hairai ena bada be edena bamona?

⁵ Davida ese ia hahedinaraia Dirava be taunimanima ia hereaia, ia gwau: “Lohiabada e, aiemai Lohiabada, tanobada ena kahana ibounai lalonai, oiemu ladana be namo herea. Oiemu hairaina, be guba dekenai oi atoa vadaeni!” (Sal. 8:1) Momokani, Dirava ese “guba bona tanobada” ia do karaia lasi neganai, bona tanobada be paradaiso ai do ia lao bona taunimanima do idia goevadae neganai​—anina be idaunega amo ela bona hanaihanai​—Iehova Dirava be ia hereadae momokani.​​—Gen. 1:1; 1 Kor. 15:​24-​28; Apok. 21:​1-5.

 6. Dahaka dainai Davida ia gwau, Iehova ena hairai be namo herea momokani?

⁶ Davida be guba ai hisiu momo herea ia itaia neganai, reana ia hoa bada! Momokani, Dirava ese ‘guba bona hisiu ia karaia, tau ta ese palai ruma ia haginia bamona.’ Reana Davida be unai hoa gaudia ia itaia dainai, ia gwau Iehova ena hairai be namo herea momokani. (Salamo 104:​1, 2 duahia.) Havaraia Tauna hereadaena ena hairai be ia havaraia gaudia ibounai ese idia hahedinaraia.

7, 8. Guba dekenai Iehova ena hairai idia hahedinaraia gaudia haida be dahaka?

⁷ Hisiu orea ta ladana, Milky Way galaksi mani ita laloa. Unai galaksi sibona lasi, to planeti ibounai bona sola sistem edia huanai, tanobada sibona be maragi momokani, kone ena miri maragimaragi ta bamona. Mani oi laloa, Milky Way galaksi lalonai be hisiu 100 bilioni mai kahana idia noho! Bema dina ta ta, hora 24 bona sekeni ta ta lalonai, hisiu tamona tamona oi duahia, anina be lagani 3,000 mai kahana murinai, oi be hisiu 100 bilioni do oi duahia.

⁸ Bema Milky Way galaksi sibona lalonai hisiu 100 bilioni idia noho, vadaeni galaksi ma haida be edena bamona? Guba gaudia stadilaia taudia idia laloa reana galaksi ibounai be 50 bilioni eiava 125 bilioni bamona, bona Milky Way galaksi be idia ta. Guba dekenai hisiu ibounai be hida? Idia be momo herea. To, Iehova be “hisiu edia namba ia gwauraia vadaeni, bona ia ese idia ibounai edia ladana ia atoa.” (Sal. 147:4) Iehova ena hairai idia hahedinaraia gaudia oi itaia neganai, oi ura Iena ladana hereadaena oi abia isi, ani?

9, 10. Edena dala ai paraoa ese iseda Havaraia Tauna ena aonega ia hahedinaraia?

⁹ Hari, aniani gauna ta ita kikilaia​​—unai be paraoa. Iehova be “guba bona tanobada” ia karaia sibona lasi, to Ia be “ogogami taudia dekenai aniani (“paraoa,” NW ) ia henia” danu. (Sal. 146:​6, 7) Dirava ese ia havaraia gaudia, hegeregere uiti​​—paraoa ai idia halaoa gauna​​—ese Iena hairai idia hahedinaraia danu. (Salamo 111:​1-5 duahia.) Iesu ese ena hahediba taudia dekenai inai guriguri ia hadibaia: “Hari dina aiemai aniani (“paraoa,” NW ) mani oi henia ai dekenai.” (Mat. 6:​11) Paraoa be idaunegai idia noho taudia momo​​—Israela taudia danu​​—edia aniani badana ta. Ena be paraoa be aniani gauna ta sibona, to uiti bona gau ma haida be paraoa namona ai idia lao dalana be hoa gauna.

¹⁰ Baibel negadiai, Israela taudia ese uiti o bali be ranu ida idia mikisi bena paraoa idia karaia. Bona nega haida paraoa hatubua muramurana, o yeast idia gaukaralaia danu. To, unai gau maragidia idia gaukara hebou ela bona paraoa ai idia lao be hoa gauna, bona saiens taudia be unai idia lalopararalaia lasi. Danu, eda bogana lalonai paraoa ia makohia maragimaragi bena eda tauanina ia durua dalana be hoa gauna. Unai dainai, salamo torea tauna ia gwau: “Lohiabada e, oi ese gau ibounai oi karaia vadaeni. Mai oiemu aonega bada danu idia ibounai oi karaia”! (Sal. 104:24) Oi danu oi ura Iehova oi hanamoa, a?

Edena Dala ai Dirava Ita Matauraia Diba?

11, 12. Dirava ena hoa karadia ita laloa dobu karana ena namo be dahaka?

¹¹ Momokani, guba stadilaia taudia eiava paraoa stadilaia saiens taudia ai ita lao be anina lasi. To, namona be nega ita atoa Dirava ese ia karaia gaudia ita laloa dobu totona, unai amo eda Havaraia Tauna ena hairai do ita moalelaia. Unai bamona laloa dobu karana ena namo be dahaka? Unai ese ita do ia durua Iehova ena kara ma haida ita diba totona.

¹² Davida be Iehova ese ena taunimanima totona ia karaia hoa karadia dainai, ia gwau: “Idia ese oiemu hairaina bona oiemu King siahuna, do idia herevalaia, bona lau ese oiemu hoa karadia do lau laloa noho.” (Sal. 145:5) Davida bamona, Baibel ita stadilaia bona nega ita atoa ita duahia gaudia ita laloa dobu totona. Unai ena namo be dahaka? Unai ese ita do ia durua Dirava ena siahu ita laloa bada totona. Momokani, Iehova ita matauraia dainai, Davida ida do ita gwau: “Lau ese oiemu ladana ena bada do lau gwauraia.” (Sal. 145:6) Dirava ena hoa karadia ita laloa dobu karana ese ita do ia durua Iehova kahirakahira ita noho bona ma haida dekenai Iehova ena sivarai ita harorolaia totona. Oi ura sivarai namona oi harorolaia goadagoada bona taunimanima oi durua Iehova Dirava ena siahu idia laloa bada totona, a?

Iesu be Dirava Ena Hemataurai Karana Ia Hahedinaraia Goevagoeva

13. (a) Daniela 7:​13, 14 ena hereva hegeregerena, Iehova be ena Natuna dekenai dahaka ia henia? (b) King Iesu ese ena taunimanima be edena bamona ia kara henidia?

¹³ Dirava ena Natuna, Iesu Keriso, be sivarai namona ia harorolaia goadagoada bona ena guba Tamana ia hanamoa. Iehova be Iesu dekenai ‘siahu bona basileia’ ia henia. (Daniela 7:​13, 14 duahia.) To, Iesu be ia hekokoroku lasi, bona taunimanima haida edia namo ia laloa bada. Iesu be ena taunimanima ia hebogahisi henidia, ia matauraidia, bona ia diba edia goada be mai ena hetoana. Namona be Iesu, King ai ia lao tauna, ese ia davaria taudia​​—taunimanima ese idia ura henia lasi taudia danu​​—ia kara henia dalana ena sivarai ta mani ita itaia.

14. Idaunegai Israela taudia ese lepera taudia be edena bamona idia laloa?

¹⁴ Idaunegai, nega momo lepera gorere idia abia taudia be hisihisi idia ania ela bona idia mase. Unai gorere ese ta ena tauanina ena kahana momo be metairametaira ia hadikaia diba. Taunimanima idia laloa lepera tauna hanamoa dalana ta be lasi, mase tauna hamauria lou dalana ta be lasi hegeregerena. (Num. 12:12; 2 Kin. 5:​7, 14) Idia gwau lepera taudia be miro, bona taunimanima ida idia noho hebou be taravatu. Lepera taudia be taunimanima kahirakahira idia raka lao neganai, namona be idia boiboi: “Miro, miro!” (Lev. 13:​43-​46) Taunimanima ese lepera tauna be mase tauna ta bamona idia kara henia. Rabi taudia edia buka ta ia gwau, lepera tauna ta be taunimanima amo ia gini ena daudau be reana 1.7 mita bamona. Unai buka ma ia gwau, tomadiho gunalaia tauna ta be lepera tauna ta ia itaia neganai, nadi do ia nege lao​​—lepera tauna ia mai kahirakahira lasi totona.

15. Iesu ese lepera tauna ta be edena bamona ia kara henia?

¹⁵ Lepera tauna ta be Iesu dekenai ia mai bona ia noinoi ena gorere ia hanamoa totona neganai, Iesu be dahaka ia karaia? (Mareko 1:​40-​42 duahia.) Ia be lepera tauna ia lulua lasi, to ia hebogahisi henia bona hemataurai ia hahedinaraia. Ia itaia, unai lepera tauna danu be taunimanima, bona hisihisi ia mamia dainai heduru ia abia be namo. Unai dainai, Iesu be hebogahisi karana sibona ia hahedinaraia lasi, to kara ta ia karaia danu. Hegeregere, ena imana amo lepera tauna ia dogoatao bona ena gorere ia hanamoa.

16. Iesu ese haida ia kara henia dalana amo dahaka oi dibaia?

¹⁶ Iesu bamona, edena dala ai Dirava ena hemataurai ita hahedinaraia goevagoeva diba? Dala ta be inai: Gau badana be, taunimanima ibounai ita laloa bada bona matauraia​​—herevana idia be dahaka dagi idia huaia, idia gorere eiava lasi, bona edia mauri lagani be hida. (1 Pet. 2:​17) Namona be tau, tama sina, bona elda taudia ese edia henunai idia noho taudia idia matauraia bona idia durudia idia moale totona. Baibel ese ia hahedinaraia Keristani taudia ibounai ese unai bamona idia karaia be gau badana, ia gwau: “Umui ta ta do umui lalokau henia, tadikaka edia lalokau ta ta dekenai bamona. Umui ta ta dekenai danu do umui matauraia.”​​—Roma 12:10.

Iehova Tomadiho Henia Karana Matauraia Noho

17. Iehova ita tomadiho henia neganai, hemataurai karana ita hahedinaraia dalana be Baibel ese edena bamona ia herevalaia?

¹⁷ Baibel be ia hahedinaraia, Iehova ita tomadiho henia neganai, hemataurai karana ita hahedinaraia be namo. Hadibaia Tauna 5:1 ia gwau: “Dirava ena Dubu Helaga oi raka vareai neganai do oi naria namonamo.” Mose bona Iosua be helaga gabuna dekenai idia lao neganai, Iehova ese ia hamaorodia edia tamaka idia kokia be namo. (Eso. 3:5; Ios. 5:​15) Unai amo hemataurai karana idia hahedinaraia. Taravatu hegeregerena, Israela ena hahelaga taudia ese piripou idia karaia be namo, unai amo “edia hemarai do ia hedinarai lasi.” (Eso. 28:​42, 43) Unai dainai, idia be pata dekenai idia gaukara neganai, edia tauanina idia koua namonamo. Ma danu, hahelaga tauna ena ruma bese taudia ibounai ese hemataurai idia hahedinaraia be namo.

18. Iehova ita tomadiho henia neganai, hemataurai be edena bamona ita hahedinaraia diba?

¹⁸ Namona be Iehova tomadiho henia taudia ibounai ese edia mauri lalonai hemataurai idia hahedinaraia. Momokani, haida ese ita idia matauraia totona, namona be hemataurai karana ita hahedinaraia. To, namo lasi ma haida ita matauraia koikoi. Lasi, mai eda kudouna ibounai ida hemataurai ita hahedinaraia be namo, badina Dirava be eda kudouna ia itaia. (1 Sam. 16:7; Aon. 21:2) Unai bamona ita karaia neganai, eda kara, lalohadai, bona ma haida ita tura henia karana do ia idau. Danu, ita sibona eda hemami bona lalohadai do ita matauraia. Momokani, nega ibounai, eda hereva bona kara amo hemataurai ita hahedinaraia be namo. Danu, iseda kara, dabua bona tauanina ena toana namona sibona ita laloa lasi, to Paulo ena sisiba ita badinaia, ia gwau: “Ai ura lasi taunimanima idia gwau aiemai gaukara ia dika. Unai dainai ai ese taunimanima hadikaia kara ta ai karaia lasi, lasi momokani! To aiemai kara ibounai dekena amo ai hedinaraia ai be Dirava ena hesiai taudia.” (2 Kor. 6:​3, 4) Momokani, ‘gau ibounai dekenai ita ese iseda Hahemauri Tauna, Dirava, ena hahediba herevadia do ita hahairaia.’​​—Tito 2:​10, NW.

Hemataurai Hahedinaraia Noho

19, 20. (a) Ma haida matauraia dalana namona ta be dahaka? (b) Namona be eda lalona ita hadaia dahaka ita karaia totona?

¹⁹ “Keriso ena hereva gwauraia hedinarai” horoa Keristani taudia be hemataurai idia hahedinaraia. (2 Kor. 5:​20) Edia bamodia, “mamoe idaudia” unai, danu be Mesia Basileia idia laloa bada bona ena gaukara idia karaia. Tanobada ena gavamani ta ena hereva gwauraia tauna ta o gaukara tauna ta be mai hemataurai bona boga auka ida ena gavamani ena hereva ia halasia. Unai hegeregerena, mai hemataurai bona boga auka ida Dirava ena gavamani o Basileia ena hereva ita harorolaia be namo. (Efe. 6:​19, 20) Ma haida dekenai “sivarai namona” ta ita gwauraia hedinarai neganai, ita be hemataurai karana ita hahedinaraia unai, ani?​​—Isa. 52:7.

²⁰ Namona be iseda lalona ita hadaia kara namodia amo Dirava ita hanamoa totona. (1 Pet. 2:​12) Namona be nega ibounai Iehova, ena tomadiho dalana, bona iseda tadikaka taihu ita matauraidia. Unai amo eda King hereadaena Iehova be iseda tomadiho do ia abia dae.

[Footnote]

Edena Bamona Do Oi Haere?

• Dirava ena hoa karadia ita laloa dobu karana ena namo be dahaka?

• Iesu ese lepera tauna ia durua karana amo dahaka ita dibaia?

• Iehova ita tomadiho henia neganai, hemataurai be edena bamona ita hahedinaraia diba?

[Picture on page 12]

Edena dala ai Iehova be Abela ia hanamoa?

[Picture on page 14]

Gau idauidau, paraoa danu, ese Iehova ena hairai idia hahedinaraia

[Picture on page 15]

Iesu ese lepera tauna ia durua karana amo dahaka oi dibaia?

[Picture on page 16]

Iehova ita tomadiho henia neganai, hemataurai karana ita hahedinaraia be namo