Iehova Ena Dina ese Dahaka Do Ia Hahedinaraia?

“Iehova ena dina be henaohenao tauna bamona do ia mai, . . . bona tanobada bona ia lalonai idia noho gaudia be lahi ese do ia araia ore.”​​—⁠2 PET. 3:​10, NW.

1, 2. (a) Inai nega oromana dikana be edena bamona do ia ore? (b) Dahaka henanadai do ita herevalaia?

ENA BE Satani ia gwau Iehova ia dadaraia tauna be tanobada ia lohiaia namonamo diba, to unai be koikoi badina hari tanobada oromana ia namo lasi. (Sal. 2:​2, 3) Koikoi herevadia bona karadia do idia noho hanaihanai, a? Lasi, do idia ore! To, namo lasi ita naria ela bona Satani ena tanobada be sibona do ia ore. Dirava be ena nega korikori ai bona ena ura dalanai Satani ena tanobada do ia hadikaia ore. Unai negai do ia hedinarai goevagoeva gauna be inai: Iehova be hahemaoro goeva bona lalokau Diravana.​​—⁠Sal. 92:7; Aon. 2:​21, 22.

² Aposetolo Petero ia gwau: “Iehova ena dina be henaohenao tauna bamona do ia mai, unai nega ai guba be mai rege bada ida do ia ore haraga, to guba bona tanobada gaudia be do idia siahu momokani bona do idia veve, bona tanobada bona ia lalonai idia noho gaudia be lahi ese do ia araia ore.” (2 Pet. 3:​10, NW ) Unai “guba” bona “tanobada” be dahaka idia laulaulaia? Do idia veve “guba bona tanobada gaudia” be dahaka? Bona Petero ia gwau, “tanobada bona ia lalonai idia noho gaudia be lahi ese do ia araia ore”; iena hereva ena anina be dahaka? Unai henanadai edia haere ita diba be namo, badina unai ese ita do idia durua kahirakahira do idia vara gari karadia totona ita hegaegae.

Guba Bona Tanobada Do Idia Ore

 3. Petero Iharuana 3:​10 ai inai hereva “guba,” be dahaka ia laulaulaia, bona edena dala ai do ia ore?

³ Nega momo Baibel ai inai hereva, “guba,” be gavamani o taunimanima idia lohiaia taudia ia laulaulaia. (Isa. 14:​13, 14; Apok. 21:​1, 2) Do ia ore “guba” be Dirava idia negea taudia edia lohia taudia ia laulaulaia. Do idia ore haraga “mai rege bada ida” karana ese ia hahedinaraia, Dirava ese unai gavamani do ia hadikaia ore haraga.

 4. “Tanobada” be dahaka ia laulaulaia, bona edena dala ai do ia ore?

⁴ Inai hereva, “tanobada,” be Dirava idia negea taudia ia laulaulaia. Unai bamona taudia be Noa ena negai idia noho bona Dirava ese Abata amo ia hamasedia ore. “Harihari idia noho guba bona tanobada be Dirava ese, iena oda hereva dekena amo ia naridia noho. Oibe, idia noho hegaegae, ela bona Kota Badana Dinana dekenai. Unai neganai, lahi badana ese tanobada bona guba do ia araia ore, bona Dirava idia negea taudia be do idia boio.” (2 Pet. 3:⁠7) Abata ese Dirava negea taudia ibounai be nega tamona lalonai ia hadikaia ore, to “hisihisi badana” ai Dirava negea taudia hadikaia karana be nega ta ta ai do ia vara. (Apok. 7:​14, NW ) Hisihisi badana ena matamanai, Dirava be inai tanobada ena politikol lohia taudia do ia doria “Babulonia badana” idia hadikaia totona, unai ese do ia hahedinaraia Dirava be unai tomadiho, ariara hahine unai, ia badu henia. (Apok. 17:​5, 16; 18:​8) Bena hisihisi badana ena dokonai o Aramagedono tuarina ai, Iehova ese Satani ena tanobada o gavamani ibounai do ia haorea.​​—⁠Apok. 16:​14, 16; 19:​19-​21.

“Guba Bona Tanobada Gaudia be . . . Do Idia Veve”

 5. Guba bona tanobada gaudia be dahaka?

⁵ ‘Do idia veve guba bona tanobada gaudia’ be dahaka idia laulaulaia? Idia be Dirava negea taudia edia kara, lalohadai, dala bona tahua gaudia idia laulaulaia. ‘Do idia veve guba bona tanobada gaudia’ ma ta be “tanobada ena lauma”​​—⁠“hari kamonai lasi taudia edia lalona dekenai ia gaukara” gauna. (1 Kor. 2:​12; Efeso 2:2 duahia.a) Unai lauma, o hodahoda, be Satani ena tanobada ia hahonua bamona. Unai dainai, nega momo taunimanima be edia lalohadai, palani, hereva, bona kara amo Satani​​—⁠hekokoroku, gwau-edeede, bona “taunimanima ia biagua hodahodana ena lohia tauna”​​—⁠ena lalohadai idia hahedinaraia.

 6. Edena dala ai tanobada ena lauma ia hedinarai?

⁶ Tanobada ena lauma ese ia biagua taudia​​—⁠herevana unai idia diba o lasi​​—⁠edia kudouna o lalona be Satani ese ia gaukaralaia dainai, idia be Satani ena lalohadai bona ura idia hahedinaraia.b Unai dainai, haida be sibona edia ura gaudia idia karaia, bona Dirava ena ura idia laloa maragi. Idia hekokoroku, sibona edia namo idia tahua, hakaua taudia idia gwau-edeede henia, bona “tauanina ena ura, matana ese idia ura henia gaudia” idia hahedinaraia.​​—⁠1 Ioane 2:​15-​17 duahia.c

 7. Dahaka dainai iseda ‘kudouna do ita naria namonamo’ be namo?

⁷ Momokani, ‘kudouna do ita naria namonamo,’ be gau badana​—⁠anina be turana ita abia hidi, buka ita duahia, moale karadia ita karaia, o Internet ena Web sait ita kehoa neganai, Dirava ena aonega ita gaukaralaia! (Aon. 4:​23) Paulo ia gwau: “Umui naria namonamo, tau ta ese taunimanima edia aonega hereva kava dekena amo umui ia koia garina. Inai bamona hereva be sene taudia edia kara, bona tanobada idia gunalaia lauma dikadia dekena amo idia mai, Keriso dekena amo lasi.” (Kol. 2:⁠8) Unai sisiba ita badinaia be gau badana, badina kahirakahira Iehova ena dina do ia ginidae neganai, Satani ena “guba bona tanobada gaudia” ibounai be “lahi” ese do ia araia ore bamona. Malaki 4:1 ena hereva ita laloa, ia gwau: “Dina be ia mai noho, hekokoroku bona kara dika taudia ibounai be lahi ese do ia gabudia, rei kaukau ia gabua bamona. Unai dina dekenai lahi ese idia do ia gabua ore momokani.”

“Tanobada Bona Ia Lalonai Idia Noho Gaudia be Lahi ese Do Ia Araia Ore”

 8. Edena dala ai “lahi” ese tanobada bona ia lalonai idia noho gaudia do ia araia ore?

⁸ Petero ia gwau “tanobada bona ia lalonai idia noho gaudia be lahi ese do ia araia ore”; iena hereva ena anina be dahaka? Iena anina be inai: Hisihisi badana lalonai, Iehova ese Satani ena tanobada do ia kota henia, badina ia ese Iehova bona ena Basileia ia inai henia. Isaia 26:21 ese unai nega be inai bamona ia perovetalaia: “Lohiabada be iena gabu dekena amo ia mai noho, tanobada taudia edia dika davana do ia henia totona. Tanobada dekenai, hunia dekenai taunimanima idia alaia taudia, edia kara be Dirava ese do ia hedinaraia, bona tano ese, alaia mase taudia do ia hunia lou lasi.”

 9. (a) Dahaka gaudia ita dadaraia be namo, bona dahaka dainai? (b) Dahaka kara ita hahedinaraia be namo, bona dahaka dainai?

⁹ Iehova ena dina lalonai, tanobada bona ena lauma dikana ese idia hamiroa taudia edia kara korikori do ia hedinarai, unai negana ai tau ta ese tau ma ta do ia alaia mase danu. Ita gwau diba, hari inai negai TV bona masini gaudia momo be dagedage bona ala-ala karadia idia hahedinaraia dainai, taunimanima be kara dikadia idia dibaia bona idia hegaegae Iehova ena dina lalonai “ta ta ese ena imana do ia abia isi, ena turadia ia hadikadia totona.” (Sek. 14:​13, BHğ) Unai dainai, Dirava ese ia inai henia karadia​​—⁠hekokoroku o dagedage karadia ura henia karana​​—⁠idia hahedinaraia gaudia hegeregere muvi, buka, vidio gadara, bona ma haida ita dadaraia be gau badana! (2 Sam. 22:28; Sal. 11:⁠5) To, lauma helaga ena huahua ita hahedinaraia noho, badina unai kara be Iehova ena dina lalonai lahi ese do ia araia ore diba lasi.​​—⁠Gal. 5:​22, 23.

“Guba Matamata Bona Tanobada Matamata”

10, 11. “Guba matamata” bona “tanobada matamata” be dahaka idia laulaulaia?

¹⁰ 2 Petero 3:​13 duahia. “Guba matamata” be Dirava ena guba Basileiana, ia be lagani 1914 ai ia gini neganai, “idau bese edia nega” ia ore. (Luka 21:24) Unai gavamani ena lohia taudia be Keriso Iesu bona 144,000 taudia​​—⁠momo ese edia ahuna be guba ai idia abia vadaeni. Apokalupo ese ia hahedinaraia unai horoa taudia be hegeregere “Hanua Helagana, Ierusalema matamatana  . . . , guba dekena amo ia diho mai noho, Dirava dekena amo. Inai Hanua Helagana be headava matamata kekeni bamona, ia herahera namo herea, dabua namona ia karaia, iena adavana totona ia hegaegae vadaeni.” (Apok. 21:​1, 2, 22-​24) Idaunegai Israela ai, Ierusalema be gavamani ia noho gabuna, unai hegeregerena Ierusalema Matamatana bona ena adavana be gavamani oromana matamatana. Unai hanua mai hairaina be “guba dekena amo [do] ia diho mai” bona tanobada do ia hanamoa.

¹¹ “Tanobada matamata” be tanobada besena matamatana ia laulaulaia​​—⁠idia ura dikadika Dirava ena Basileia idia badinaia taudia. Hari inai negai, Dirava ena taunimanima ese idia moalelaia lauma paradaisona be vaira neganai “tanobada matamatana” ena oromana ia hahedinaraia. (Heb. 2:​5, NW ) Edena bamona unai nega matamata lalonai ita noho diba?

Iehova Ena Dina Badana Totona Hegaegae

12. Dahaka dainai Iehova ena dina ia mai neganai tanobada taudia do idia hoa?

¹² Paulo bona Petero idia peroveta, Iehova ena dina do ia mai, “henaoa tauna” ia mai bamona​​—⁠regerege lasi bona ta ia laloa lasi neganai do ia ginidae. (1 Tesalonika 5:​1, 2 duahia.) Ena be Keristani taudia momokanidia be unai dina idia naria noho, to ia ginidae neganai do idia hoa danu. (Mat. 24:44) To, tanobada taudia be do idia hoa sibona lasi, to kara haida do idia vara danu. Paulo ia gwau: “Inai hereva, ‘Maino bona noho namo!’ idia gwauraia neganai, karaharaga dika bada herea be idia latanai do ia ginidae, rogorogo hahinena ese mara ena hisihisi ia abia bamona, bona do idia heau mauri diba lasi.”​​—⁠1 Tes. 5:​3, NW.

13. Edena dala ai inai koikoi herevana, “Maino bona noho namo!” ita dadaraia diba?

¹³ Inai hereva, “Maino bona noho namo!” be demoni edia koikoi herevana ma ta, to, idia ese Iehova ena hesiai taudia do ia koia diba lasi. Paulo ia gwau: “To aiemai varavara taudia e, umui be dibura taudia lasi, unai dainai unai Dina ia ginidae neganai, do umui hoa lasi. Henaoa tauna ese ruma tauna ia dogoatao haraga neganai, ruma tauna do ia hoa bada, to umui be unai bamona lasi. Umui ibounai be diari ena taudia, umui be dina ena taudia.” (1 Tes. 5:​4, 5) Unai dainai, diari dekenai ita noho, Satani ena tanobada ena dibura dekena amo ita daudau. Petero ia gwau: “Lauegu lalokau taudia e, inai gaudia umui diba vadaeni. Unai dainai do umui naria namonamo, koikoi taudia [Keristani kongrigeisen dekenai] ese umui do idia hakaua kerere garina. Oibe, umui emui gini goada gabuna dekena amo do umui moru garina, do umui naria namonamo.”​​—⁠2 Pet. 3:​17.

14, 15. (a) Edena dala ai Iehova ese ita ia durua? (b) Edena hakaua herevadia ita badinaia be namo?

¹⁴ Mani oi laloa, Iehova be ita ia hamaoroa ‘do ita naria namonamo’ sibona lasi, to Ia be kara ma haida ia karaia danu. Ia be ita laloa bada bona ita ia durua vaira neganai do idia vara ‘gaudia ita diba’ guna totona.

¹⁵ To, taunimanima haida be idia gima lasi bona hakaua herevadia idia kamonai lasi. Reana idia gwau, ‘Lagani momo lalonai unai hakaua hereva tamona ita kamonai loulou.’ To, namona be idia ese inai idia laloatao: Unai bamona lalohadai idia abia taudia ese Iehova, ena Natuna, bona hesiai tauna mai ena kamonai oreana ena hakaua dalana idia dadaraia. Iehova ia gwau: ‘Do umui naria noho.’ (Hab. 2:⁠3) Danu, Iesu ia gwau: “Do umui gima noho, badina emui Lohiabada ia mai dinana be umui diba lasi.” (Mat. 24:​42, NW ) Ma danu, Petero ia gwau: “Umui emui kara ibounai do idia helaga be namo, bona Dirava do umui badinaia namonamo. Ma Dirava ena Dina do umui naria noho, bona do ia ginidae haraga totona do umui gaukara goada noho.” (2 Pet. 3:​11, 12) Hesiai tauna mai ena kamonai oreana bona ena Hakaua Oreana idia ura unai hereva ita lalodia bada!

16. Edena kara bona lalohadai ita dadaraia be namo, bona dahaka dainai?

¹⁶ “Hesiai tauna dikana” ia laloa Biaguna be do ia mai haraga lasi. (Mat. 24:​48) Unai hesiai tauna dikana be 2 Petero 3:​3, 4 (NW ) ese inai bamona ia herevalaia: “Nega dokona ai, hevaseha taudia do idia mai bona hevaseha herevadia do idia gwauraia, bona sibodia edia ura hegeregerena do idia kara.” Oibe, unai hevaseha taudia be sibona edia namo o ura gaudia sibona idia laloa bada dainai, Basileia idia laloa maragi. Unai gwau-edeede karana bona lalohadai ita dadaraia! To, ita hahedinaraia ‘Lohiabada ena haheauka karana ita laloa, unai be iseda hahemauri dalana’, anina be hanaihanai Basileia ita harorolaia, hahediba taudia halaoa gaukarana ita karaia, bona hisihisi badana ena ginidae negana ita laloa momo lasi​—⁠Iehova Dirava be ena nega korikori ai unai do ia havaraia.​​—⁠2 Pet. 3:​15, NW; Kara 1:​6, 7 duahia.

Hahemauri Diravana Abidadama Henia

17. Edena dala ai Keristani taudia be Iesu ena hereva hegeregerena Ierusalema idia rakatania, bona dahaka dainai?

¹⁷ Lagani 66 C.E. ai, Roma ena tuari oreana be Iudea tanona ai ia vareai negana ginigunana ai, kamonai Keristani taudia be Iesu ena hereva idia badinaia bona ororo dekenai idia heau lao. (Luka 21:​20-​23) Dahaka dainai ororo dekenai idia heau lao haraga? Ita gwau diba, idia be Iesu ena hadibaia herevana idia laloatao. Idia diba metau do ia davaria danu, unai be Keriso ena hereva bamona. Ma danu, idia diba Iehova be ena hesiai taudia do ia durua.​​—⁠Sal. 55:⁠22.

18. Luka 21:​25-​28 ena hereva dainai, kahirakahira do ia vara hisihisi badana be edena bamona oi laloa?

¹⁸ Namona be ita danu be Iehova ita abidadama henia momokani, badina hisihisi badana bona dika rohorohona ia vara neganai, Iehova ese ita do ia hamauria. Hisihisi badana ia matamaia murinai o Iehova ese tanobada ia do hahemaoro henia lasi neganai, “taunimanima edia kudouna dekenai do idia gari momokani, edia laloa danu do idia doko, unai idia vara gaudia dainai.” Ena be Dirava ena inai taudia do idia gari dikadika, to Iena abidadama hesiai taudia do idia gari lasi. Momokani, idia be do idia moale badina idia diba edia hahemauri negana ia ginidae vadaeni.​​—⁠Luka 21:​25-​28 duahia.

19. Stadi gabena ai dahaka do ita herevalaia?

¹⁹ Inai tanobada o “guba bona tanobada gaudia” idia dadaraia taudia be mai moale ida vaira negana idia naria noho! To, stadi iharuana ese do ia hahedinaraia gauna be inai: Bema ita ura mauri ita abia, kara dika ita dadaraia sibona be hegeregere lasi. Gau badana be Iehova ese ia ura henia karadia bona gaukaradia ita karaia.​​—⁠2 Pet. 3:​11.

[Footnotes]

[Picture on page 5]

Edena dala ai emu ‘kudouna oi naria namonamo’ bona tanobada oi dadaraia?

[Picture on page 6]

Edena dala ai ita hahedinaraia ‘Lohiabada ena haheauka karana ita laloa, unai be iseda hahemauri dalana’?

Anina Oi Gwauraia Diba, A?

• Guba bona tanobada ese dahaka idia laulaulaia?

• “Guba bona tanobada gaudia” ese dahaka idia laulaulaia?

• ‘Guba matamata bona tanobada matamata’ ese dahaka idia laulaulaia?

• Dahaka dainai Dirava ita abidadama henia be maoro?