Daidia Do Idia Toreisi Lou? Edeseniai Do Idia Noho?

KAROA 34 bona 35 ai, idia toreisi lou taudia hida edia sivarai ita duahia?— Idia ibounai be ima. Bona hida be natudia?— Toi. Bona namba foa be tau matamatana. Oi laloa unai ese dahaka ia hahedinaraia?—

Ia hahedinaraia Dirava ese matamata taudia ia lalokau henia. To ia ese taunimanima ma haida do ia hatorea isi lou danu. Dirava be kara namo idia karaia taudia sibona do ia hatorea isi lou, a?— Reana unai bamona ita laloa. To, taunimanima momo be Iehova Dirava bona ena Natuna edia sivarai momokani idia dibaia lasi. Unai dainai kara dikadia idia karaia, badina idia dekenai gau kereredia idia hadibaia. Oi laloa Iehova ese unai bamona taudia do ia hatorea isi lou, a?—

Baibel ia gwau: “Mase taudia dohore idia toreisi lou, kara maoromaoro taudia, bona kara maoromaoro lasi taudia danu.” (Kara 24:15) Dahaka dainai kara maoromaoro idia karaia lasi taudia do idia toreisi lou?— Badina edia mauri lalonai Iehova bona ia ura taunimanima ese idia karaia gauna, be ta ese idia dekenai ia hadibaia lasi.

Oi laloa taunimanima be edena negai do idia toreisi lou?— Lasaro ia mase bona Iesu ese ena taihuna Mareta dekenai ia henia gwauhamata herevana mani oi laloa lou, ia gwau: “Oiemu taihuna be do ia toreisi lou.” Mareta ia gwau: “Lau diba dina gabeai, toreisi lou dinana neganai, do ia toreisi lou.” (Ioane 11:​23, 24) Mareta ia gwau Lasaro be “dina gabeai” do ia toreisi lou neganai, ena hereva ena anina be dahaka?—

Mareta be Iesu ena gwauhamata ia diba: ‘Mase guria gabu dekenai idia noho taudia ibounai do idia toreisi lou.’ (Ioane 5:​28, 29) Unai dainai “dina gabeai” dekenai Dirava ese ia laloatao taudia ibounai do ia hatorea isi lou. Unai dina gabeai be hora 24 dinana ta lasi. Ena lata be lagani 1000. Unai dina ai, Baibel ia gwau, ‘Dirava ese tanobada taudia do ia kota henia.’ Do idia toreisi lou taudia do ia kota henia danu.​—Kara 17:31; 2 Petero 3:8.

Mani oi laloa unai dina be moale dinana! Unai dina ta ena lata be lagani 1000 lalonai, idia mase taunimanima milioni momo do idia toreisi lou. Iesu be idia toreisi lou taudia ese do idia noholaia tanona ia gwauraia Paradaiso. Mani ita itaia Paradaiso do ia noho gabuna bona unuseniai mauri be edena bamona.

Hora toi idia do noho bena Iesu be au ta dekenai do ia mase neganai, ia badinai ia noho tauna dekenai Paradaiso ia herevalaia. Unai tauna be taravatu ia utua dainai idia hamasea. To unai kerere tauna ese Iesu ia itaia bona Iena sivarai ia kamonai neganai, Iesu ia abidadama henia matamaia. Unai dainai kerere tauna ia gwau: “Oiemu Basileia do oi abia neganai, do oi laloa lau!” Iesu ia haere: “Momokani lau hamaoroa oi dekenai, hari dina ita ruaosi Paradaiso dekenai do ita ginidae.”​—Luka 23:​42, 43.

Iesu ena hereva ena anina be dahaka? Paradaiso be edeseniai?— Mani unai oi laloa. Paradaiso ginigunana be edeseniai?— Laloatao, Dirava ese tau ginigunana Adamu bona ena adavana dekenai ia henia paradaiso be inai tanobada dekenai ia noho. Idia gwauraia Eden umana. Unai uma ai animal idia noho, to tau ta idia haberoa lasi. Bona au mai edia huahua namodia momo, bona sinavai badana ia noho. Ia be noho gabu namo hereana!​—Genese 2:​8-​10.

Unai dainai unai kerere tauna be Paradaiso ai do ia noho sivaraina ita duahia neganai, namona be iseda lalona ena matana amo ita itaia inai tanobada be noho gabuna hairaina ai do ia lao. Iesu be unai kerere tauna ida unai tanobada Paradaisona ai do ia noho, a?— Lasi. Unuseniai do ia noho lasi ena badina oi diba, a?—

Badina Iesu be guba dekenai do ia King bona tanobada Paradaisona do ia lohiaia. Unai dainai Iesu be unai tauna danu do ia noho, anina be mase amo do ia hatorea isi lou bona do ia naria. To dahaka dainai Iesu ese unai kerere tauna ia koua lasi Paradaiso dekenai do ia noho totona?— Mani ena haere ita tahua.

Kerere tauna be Iesu ia do hereva henia lasi neganai, Dirava ena ura ia diba, a?— Lasi, ia diba lasi. Kara dikadia ia karaia badina Dirava ena hereva momokani ia diba lasi. Paradaiso ai ia dekenai Dirava ena ura do idia hadibaia. Bena dala do ia noho Dirava ena ura ia karaia karana amo ia hamomokania diba Dirava ia lalokau henia.

Idia toreisi lou taudia ibounai be tanobada paradaisona ai do idia noho, a?— Lasi. Ena badina oi diba, a?— Badina haida do idia toreisi lou guba ai Iesu ida idia noho totona. Ia ida tanobada Paradaisona do idia lohiaia. Unai ita diba dalana mani ita itaia.

Iesu ia do mase lasi hanuaboina ai, iena aposetolo taudia ia hamaoroa: ‘Guba ai egu Tamana ena ruma dekenai noho gabu be momo herea, bona lau lao emui gabu ta do lau karaia hegaegae.’ Bena idia dekenai Iesu ia gwauhamata: “Lau be do lau giroa mai, lau dekenai do lau abia dae umui, vadaeni lau noho gabuna dekenai be umui danu unuseni do umui noho.”​—Ioane 14:​2, 3.

Iesu ia toreisi lou murinai, edeseni ia lao?— Oibe, guba dekenai ia giroa ena Tamana ida ia noho totona. (Ioane 17:​4, 5) Unai dainai Iesu ia gwauhamata ena aposetolo taudia bona ia murinai idia raka taudia ma haida do ia hatorea isi lou, unai amo ia ida guba dekenai do idia noho. Iesu ida dahaka do idia karaia?— Baibel ia gwau “toreisi lou ginigunana” ai idia toreisi lou hahediba taudia be guba ai do idia noho bona “lagani 1000 lalonai Keriso danu [tanobada] do idia lohia.”​—Apokalupo 5:​10; 20:6; 2 Timoteo 2:​12.

“Toreisi lou ginigunana” ai do idia toreisi lou bona Iesu ida do idia lohia taudia be hida?— Iesu be ena hahediba taudia ia hamaoroa: “Orea maragi e, umui gari lasi, badina emui Tamana ese ia hereva vadaeni Basileia do ia henia umui dekenai.” (Luka 12:32) Idia toreisi lou bona guba Basileiana ai Iesu ida do idia noho “orea maragi” taudia be namba korikorina. Baibel ese ia hahedinaraia “taunimanima 144,000” be tanobada amo do idia toreisi lou.​—Apokalupo 14:​1, 3.

Tanobada Paradaisona ai do idia noho taudia be hida?— Baibel ese ia gwauraia lasi. To Adamu bona Heva be Eden umana ai idia noho neganai, Dirava ese ia hamaorodia natudia do idia havaraia bona tanobada do idia hahonua. Momokani, unai idia karaia lasi. To Dirava ia ura tanobada be taunimanima namodia amo do ia hahonua bona unai do ia karaia.​—Genese 1:​28; Isaia 45:18; 55:11.

Paradaiso dekenai ita noho be moale gauna momokani! Tanobada ibounai be uma mai hairaina ai do ia lao. Ia be manu, animal, au bona flaoaflaoa namodia idauidau amo do ia honu. Ta be gorere dainai hisihisi do ia mamia lasi, bona ta do ia mase lasi. Ibounai do idia hetura heheni. Bema ita ura Paradaiso ai ita noho hanaihanai, hari be hegaegae negana.