Dirava Idia Hamoalea Natudia

OI LALOA edena natuna tanobada dekenai ese Iehova ia hamoalea bada herea?— Unai be iena Natuna, Iesu. Iesu be iena guba Tamana ia hamoalea totona ia karaia gaudia mani ita herevalaia.

Iesu ena ruma bese be Ierusalema—Iehova ena dubu hairaina ia noho gabuna—dekenai idia lao totona, dina toi do idia raka. Iesu ese unai dubu ia gwauraia “egu Tamana ena ruma.” Lagani ibounai Iesu bona ena ruma bese be unuseni idia lao Pasova ariana totona.

Lagani ta ai, Iesu ena mauri lagani be 12 neganai, Pasova aria murinai ena ruma bese idia giroa lou. Gabu ia dibura dainai idia laga-ani gwauraia neganai, idia davaria Iesu be edia varavara bona turadia huanai ia noho lasi. Unai dainai Maria bona Iosepa be maoromaoro Ierusalema dekenai idia giroa lou Iesu idia tahua totona. Oi laloa ia be edeseniai ia noho?—

Iesu be dubu lalonai idia davaria. Hahediba taudia edia hereva ia kamonai bona idia dekenai henanadai ia henia. Bona henanadai idia henia neganai, ia haere henidia. Ia henia haere namodia dainai idia hoa bada. Dirava be iena Natuna dekenai ia moale ena badina oi itaia diba, a?—

Oibe, Maria bona Iosepa ese Iesu idia davaria neganai, edia lalona ia namo lou. To Iesu be ia lalo-hekwarahi lasi. Ia diba dubu ai dika do ia davaria lasi. Unai dainai ia henanadai: “Umui diba lasi egu Tamana ena ruma be lauegu noho ruma, a?” Ia diba dubu be Dirava ena ruma bona ia ura unuseniai ia noho.

Gabeai, Maria bona Iosepa ese mauri lagani 12 merona Iesu be idia ida Nasareta dekenai idia laohaia. Oi laloa Iesu ese ena tama sina be edena bamona ia kara henia?— Baibel ia gwau idia “ia kamonai henia.” Oibe, iena tama sina ese idia hamaoroa hegeregerena ia karaia, anina be ruma gaukaradia hegeregere, ranu be ranu guri amo ia abia.​—Luka 2:​41-​52.

Unai dainai mani inai oi laloa: Ena be Iesu ia goevadae, to iena goevadae lasi tama sina ia kamonai henia. Unai ese Dirava ia hamoalea, a?— Oibe, badina Dirava ena Hereva ese natudia ia hadibaia: “Emui tamana bona sinana do umui kamonai henia.” (Efeso 6:1) Dirava do oi hamoalea danu bema emu tama sina oi kamonai henia, Iesu ia karaia bamona.

Dirava oi hamoalea diba dalana ma ta be, ma haida dekenai ia oi herevalaia. Reana taunimanima haida do idia gwau matamata taudia be unai bamona idia karaia lasi be namo. To taunimanima ese memero maragidia idia koudia toho neganai, Iesu ia gwau: ‘Umui be nega ta Buka Helaga umui duahia lasi, a? Natudia maragidia, edia uduna dekenai Dirava do idia hanamoa.’ (Mataio 21:16) Unai dainai bema ita ura momokani, ita ibounai ese ma haida dekenai Iehova ita herevalaia bona ita hahedinaraia diba ia be Dirava hereadaena. Bona bema unai bamona ita karaia, Dirava do ita hamoalea.

Edeseni amo Dirava ita dibaia, unai amo ma haida dekenai ia ita herevalaia diba?— Ruma ai ita karaia Baibel stadi amo. To stadi totona Dirava ena taunimanima idia hebou gabuna ai diba ma haida ita abia. To Iena taunimanima be edena bamona ita dibaia diba?—

Taunimanima be edia hebou dekenai dahaka idia karaia? Baibel lalonai idia noho hereva idia hadibaia momokani, a? Idia duahia bona herevalaia, a? Unai dala amo Dirava ita kamonai henia, ani?— Bona Keristani heboudia ai Dirava ena hereva ita kamonai, ani?— To bema taunimanima idia gwau Baibel ese ia herevalaia dalana hegeregerena oi noho lasi be edena bamona? Do oi gwau idia be Dirava ena taunimanima, a?—

Ita laloa gauna ma ta be inai. Baibel ia gwau Dirava ena taunimanima be “iena ladana idia abia taudia.” (Kara 15:​14, NW ) Dirava ena ladana be Iehova dainai, taunimanima ita nanadaia diba bema Iehova be edia Dirava. Bema idia gwau, lasi, vadaeni ita diba idia be iena taunimanima lasi. Dirava ena taunimanima be ma haida dekenai Dirava ena Basileia idia herevalaia danu. Bona iena taravatu badinaia karana amo edia lalokau Dirava dekenai idia hahedinaraia.​—1 Ioane 5:3.

Bema unai gaudia ibounai idia karaia taudia oi diba, idia ida tomadiho totona oi hebou be namo. Unai heboudia dekenai oi kamonai namonamo bona henanadai idia henia neganai oi haere be namo. Iesu be Dirava ena ruma dekenai ia noho neganai, unai bamona ia karaia. Bona bema unai gaudia oi karaia, Iehova do oi hamoalea, Iesu ia karaia bamona.

Baibel ese ia gwauraia Dirava idia hamoalea natudia haida oi laloa diba, a?— Timoteo be haheitalai namona. Iena tamana be Iehova ia abidadama henia lasi. To iena sinana, Eunike bona ena tubuna hahine, Loi ese Iehova idia abidadama henia. Timoteo ese edia hereva ia kamonai bona Iehova ia dibaia.

Timoteo be tau badana ai ia lao neganai, aposetolo Paulo be ia noho hanuana ia vadivadi henia. Ia itaia Timoteo ia ura bada Iehova ia hesiai henia. Unai dainai Timoteo ia boiria ia do ia bamoa, unai amo Dirava do ia hesiai henia badabada diba. Idia loaloa gabudia ibounai dekenai Dirava ena Basileia bona Iesu idia herevalaia.​—Kara 16:​1-5; 2 Timoteo 1:5; 3:​14, 15.

To Baibel lalonai Dirava idia hamoalea memero matamatadia edia sivarai sibona ia noho, a?— Lasi. Dirava ia hamoalea Israela kekeni ta mani oi laloa. Ia mauri noho neganai, Suria bona Israela bese be idia inai heheni. Dina ta Suria taudia ese Israela taudia idia tuari henia bona unai kekeni idia abia mauri. Tuari biaguna badana ladana Namana ena ruma dekenai idia siaia lao. Unuseniai ia be Namana ena adavana ena hesiai kekenina ai ia lao.

Namana be lepera gorerena ia abia. Doketa ta ese ia durua diba lasi. To unai Israela kekeni matamatana ia diba momokani Dirava ena gaukara helagana ia karaia hesiai taudia ta, peroveta tauna unai, ese Namana ia durua diba. Oibe, Namana bona ena adavana ese Iehova idia tomadiho henia lasi. Unai kekeni be idia dekenai ia dibaia gauna ia herevalaia be namo, a? Bema unai be oi, dahaka do oi karaia?—

Unai kekeni maragina ia gwau: ‘Bema Namana be Israela dekenai ia noho Iehova ena peroveta tauna dekenai ia lao, iena lepera gorere do ia ore.’ Namana ese kekeni ena hereva ia kamonai bona Iehova ena peroveta tauna dekenai ia lao. Peroveta tauna ese ia hadibaia hegeregerena ia karaia neganai, iena gorere ia ore. Unai dainai Namana be Dirava momokani tomadiho henia tauna ai ia lao.​—2 King Taudia 5:​1-​15.

Unai kekeni ia karaia bamona, oi ura ma ta oi durua bena Iehova bona do ia karaia gauna ia dibaia, a?— Daidia oi durua diba?— Oibe, matamanai do idia laloa heduru idia abia be anina lasi. To idia dekenai Iehova ese ia karaia gau namodia oi herevalaia diba. Bona reana do idia kamonai. Oi diba momokani unai ese Dirava do ia hamoalea.