Dahaka be mai Anina Bada?

DINA ta tau ta ia mai Iesu ia itaia totona. Ia diba Iesu ena aonega be bada herea dainai, ia dekenai ia gwau: ‘Hadibaia tauna e, mani emu kara lauegu kakana oi hamaoroa iena kohu haida lau dekenai do ia henia.’ Unai tauna ia laloa unai gaudia haida ia abia be namo.

Bema oi be Iesu, dahaka do oi gwau?— Iesu ia itaia unai tauna be mai ena hekwakwanai. To iena hekwakwanai be ena kakana dekenai idia noho gaudia ia ura abia totona lasi. To iena hekwakwanai be ia diba lasi iena mauri lalonai dahaka be mai anina bada.

Mani inai ita laloa. Ita dekenai dahaka be mai anina bada? Gadara gaudia namodia, dabua matamatadia, eiava unai bamona gaudia, a?— Lasi, gau ta be mai anina bada. Bona Iesu ia ura unai gauna ia hadibaia. Unai dainai Dirava ia laloaboio tauna ta ena sivarai ia gwauraia. Oi ura kamonai, a?—

Unai tauna ena kohu be momo herea. Tano bona aniani haboua rumadia ia biagua. Ia hadoa uhe be idia tubu namo herea. Iena aniani haboua rumadia lalonai uhe ibounai haboua totona gabu be lasi. Unai dainai, dahaka do ia karaia? Ia sibona dekenai ia gwau: ‘Egu aniani haboua ruma do lau kokia, badadia haida do lau haginia, vadaeni egu uma aniani bona egu kohu namodia ibounai unuseni do lau haboua.’

Kohu momo tauna ia laloa unai be aonega karana. Ia laloa ia be aonega bada tauna, badina gau momo ia haboua. Sibona dekenai ia gwau: ‘Lauegu kohu namodia be momo herea, lagani momo ena hegeregerena. Unai dainai do lau laga-ani. Do lau aniani, do lau inuinu, bona do lau moale.’ To kohu momo tauna ena lalohadai dekenai gau ta ia kerere. Oi diba unai gauna be dahaka?— Ia be sibona ena namo ia laloa. Dirava ia laloaboio.

Unai dainai Dirava be unai kohu momo tauna ia hereva henia. Ia gwau: ‘Kavakava tauna! Hari hanuaboi do oi mase, vadaeni inai oi haboua kohudia be daika ese do ia abia?’ Unai kohu momo tauna be ia mase murinai, unai gaudia do ia gaukaralaia, a?— Lasi, ma ta ese do ia abia. Iesu ia gwau: “Iena kohu sibona dekenai ia haboua, to Dirava dekenai ia be gau momo ia henia lasi tauna be unai bamona.”—Luka 12:​13-​21.

Oi ura lasi unai kohu momo tauna ena kara oi tohotohoa, ani?— Iena ura badana be tauanina gaudia ia haboua. Unai be kerere. Gau momo ia ura henia. To “Dirava dekenai ia be gau momo ia henia lasi.”

Taunimanima momo be unai kohu momo tauna bamona. Gau momo idia ura henia. To unai ese hekwakwanai badadia ia havaraia diba. Hegeregere, oi be mai emu gadara gaudia, ani?— Oi dekenai idia noho gadara gaudia haida be dahaka? Mani lau oi hamaoroa.— Bema emu turana ta be mai ena bolo, doli eiava gadara gauna ma ta, to oi dekenai unai gaudia be lasi, be edena bamona? Emu tama sina do oi doria oi totona ta idia hoia be namo, a?—

Nega haida oi dekenai gadara gauna ta be mai anina bada. To nega sisina murinai unai gauna dekenai dahaka do ia vara?— Gau gunana ta ai do ia lao. Reana do ia makohia, bona do oi ura henia lou lasi. Momokani, oi dekenai gadara gaudia ia hereaia gauna ta ia noho. Oi diba unai gauna be dahaka?—

Unai be oiemu mauri. Emu mauri be mai anina bada, badina bema oi mauri lasi, gau ta oi karaia diba lasi. To oi mauri totona Dirava idia hamoalea karadia oi karaia be mai anina bada, ani?— Unai dainai namo lasi ita be unai kavakava kohu momo tauna bamona, Dirava ia laloaboio.

Natudia sibona ese kohu momo tauna ia karaia kavakava karana idia karaia lasi. Taunimanima badadia ese idia karaia danu. Idia momo be hanaihanai idia ura kohu ma haida idia haboua. Reana idia be mai edia aniani, dabua, bona noho gabuna. To gau ma haida idia ura abia. Idia ura dabua momo herea. Bona idia ura ruma badadia. Unai gaudia edia davadia be bada. Unai dainai idia gaukara goada moni momo idia abia totona. Bona moni momo idia abia neganai, kohu ma momo idia ura abia.

Taunimanima badadia haida idia bisi bada moni idia abia totona dainai, idia be nega lasi edia ruma bese ida idia noho totona. Bona Dirava totona nega idia atoa lasi. Edia moni ese idia ia hamauria diba, a?— Lasi, unai ia karaia diba lasi. Idia mase murinai edia moni idia gaukaralaia diba, a?— Lasi. Badina mase taudia be gau ta idia karaia diba lasi.​—Hadibaia Tauna 9:​5, 10.

Unai ena anina be moni ita abia be kerere, a?— Lasi. Moni amo aniani bona dabua ita hoia diba. Baibel ia gwau moni ese ita ia gimaia. (Hadibaia Tauna 7:​12) To bema moni ita ura henia bada, vadaeni hekwakwanai do ita davaria. Ita be unai kohu momo tauna bamona ai do ita lao, ia sibona totona kohu momo ia haboua, to Dirava dekenai gau momo ia henia lasi.

Dirava dekenai gau momo ita henia ena anina be dahaka?— Anina be iseda mauri dekenai Dirava ita atoa guna. Haida idia gwau Dirava idia abidadama henia. Bona idia laloa unai sibona be hegeregere. To Dirava dekenai gau momo idia henia, a?— Lasi, idia be Dirava ia laloaboio kohu momo tauna bamona.

Iesu be ena Tamana guba dekenai ia laloaboio diba lasi. Moni momo ia haboua toho lasi. Bona ia be kohu momo tauna lasi. Iesu ia diba mauri lalonai dahaka be mai anina bada. Oi diba unai gauna be dahaka?— Oibe, Dirava dekenai gau momo ita henia be namo.

Edena dala ai Dirava dekenai gau momo ita henia diba?— Dirava idia hamoalea karadia hahedinaraia karana amo Dirava dekenai gau momo ita henia. Iesu ia gwau: “Iena ura be nega ibounai lau karaia.” (Ioane 8:​29) Dirava ia moale bema ia ura ita karaia gaudia ita karaia. Dirava oi hamoalea totona, dahaka oi karaia diba?— Oibe, Baibel oi duahia diba, Keristani heboudia dekenai oi lao, Dirava dekenai oi guriguri, bona ma haida oi durudia Ia idia dibaia totona. Unai be mai anina bada gaudia iseda mauri lalonai.

Iesu be Dirava dekenai gau momo ia henia dainai, Iehova ese ia naria. Ia ese Iesu dekenai mauri hanaihanai ahuna ia henia. Bema ita be Iesu bamona, Iehova ese ita do ia lalokau henia bona naria danu. Unai dainai namona be ita be Iesu bamona, to Dirava ia laloaboio kohu momo tauna bamona lasi.