Taunimanima Edia Lalohadai Laloa Bada Lasi

GABU idauidau ai taunimanima ese kara haida idia abia dae bona idia hanamoa, to kara haida be idia gwauraia dika bona kirikirilaia. Danu, nega ia hanaia lalonai, taunimanima edia lalohadai unai gaudia dekenai be idia idau idia lao. Unai dainai, Baibel lalonai guna ia vara sivaraina ta ita duahia neganai, unai negai idia noho taudia idia laloa bada gaudia bona kara ita laloa namonamo be namo. To, namo lasi ita duahia sirina dekenai ita sibona eda lalohadai ita gwauraia.

Hegeregere, Keristani Grik Toretoredia ese tau ta ena ladana hanamoa karana eiava hahemaraia karana idia herevalaia momo. Unai siri idauidau ita lalopararalaia totona, unai negai idia noho taudia edia lalohadai unai kara rua dekenai ita tahua guna be namo.

Iesu Ena Negai Idia Noho Taudia ese Idia Laloa Bada Gaudia

Diba bada tauna ta ia gwau: “Greek, Roma, bona Iuda taudia edia mauri lalonai ma haida ese edia ladana do idia hanamoa bona matauraia be gau badana. Idia momo be ladana bada bona ma haida ese idia matauraia totona, edia mauri idia halusia.” Idia be unai gaudia idia ura henia dikadika dainai, ma haida edia lalohadai idia laloa bada.

Inai taudia edia mauri lalonai, king amo ela bona hesiai taudia be dagi idia laloa bada, badina idia ura ma haida ese do idia matauraia. Ena be ta ia diba ia be mai ena dagi badana, to ma haida ese iena ladana do idia abia isi karana ia laloa bada. Danu, taunimanima ibounai vairanai ia karaia kara namodia do idia gwauraia hedinarai. Bona taunimanima ese do idia hanamoa bona matauraia badina ia be kohu momo bona dagi bada tauna. Tau ta be kara namodia ia karaia bona ma haida ia hereaia neganai, ia idia matauraia bona ena ladana idia hanamoa. To, taunimanima ese idia matauraia lasi tauna be ma haida edia vairanai idia hahemaraia bona kirikirilaia. Unai tauna be kerere ta dainai ia hemarai lasi, to taunimanima ese idia kirikirilaia dainai ia hemarai.

Iesu ia gwau bema aria ta dekenai tau ta be ‘gabu namo herea momokani’ dekenai ia helai ia be dagi bada tauna, to ‘henunai gabu dekenai’ ia helai tauna be ladana maragi tauna. Iesu be unai bamona ia hereva badina iena negai idia noho taudia be dagi idia laloa bada. (Luka 14:​8-10) Nega rua Iesu ena hahediba taudia be “sibona idia hepapahuahu, idia be daika do ia herea.” (Luka 9:46; 22:24) Idia be edia negai idia noho taudia edia lalohadai bona kara badana ta idia hahedinaraia. To danu, hekokoroku Iuda tomadiho gunalaia taudia be Iesu dekenai idia badu, badina idia laloa Iesu ese ena haroro gaukara amo edia ladana ia hadikaia bona momo ese idia do idia matauraia lasi. Unai dainai, idia ura taunimanima vairanai Iesu ida idia hepapahuahu bona ia idia hahemaraia, to idia kwalimu lasi.​—⁠Luka 13:​11-17.

Iuda, Greek bona Roma taudia edia lalohadai ta be, bema tau ta “idia dogoatao bona taunimanima edia vairanai idia kota henia,” unai be hemarai karana. Bema tau ta be seini amo idia lokaia bona dibura ruma ai idia atoa, unai be hemarai bada gauna. Herevana kota ia gwau unai tauna be mai ena kerere eiava lasi, to seini amo idia lokaia bona dibura ruma ai idia atoa dainai ena turadia, ruma bese bona hanua taudia ese idia ura henia lasi. Unai bamona idia kara henia dainai, ia laloa ia be anina lasi bona unai ese iena hetura karana ma haida ida ia hadikaia. To, hemarai bada gauna be ma haida edia vairanai iena dabua idia kokia bona idia kwadia. Unai bamona kara dainai taunimanima ese idia kirikirilaia, idia matauraia lasi bona idia laloa ia be anina lasi.

Bema ta be au dekenai idia kokoa kau unai be hemarai bada gauna. Diba bada tauna, Martin Hengel ia gwau: “Igui hesiai taudia be unai dala ai idia hamasedia. Unai be ta hahisia bona hahemaraia bada karana.” Idia hahemaraia tauna ena ruma bese bona turadia be hanua taudia ese idia doria ia idia lulua totona. Keriso be hesiai tauna ta bamona idia hamasea dainai, Keristani taudia be iena murinai idia raka neganai, taunimanima ese idia kirikirilaia. Unai nega ai bema tau ta ia gwau ia be Iesu ena murinai ia raka, taunimanima idia gwau ia be kavakava tauna. Aposetolo Paulo ia gwau: “To ai ese Keriso idia hasatauroa ai harorolaia noho. Inai hereva ese Iuda taudia ia habadua. Bona Helene taudia idia laloa inai hereva be kavakava.” (1 Kor. 1:23) Keristani taudia ginigunadia be dahaka idia karaia unai idia haheaukalaia totona?

Keristani Taudia ese Idia Laloa Bada Gaudia

Keristani taudia ginigunadia be taravatu ta idia utua lasi dainai, ma haida ese idia hahemaraia diba lasi. Aposetolo Petero ia gwau: “To ia namo lasi bema umui ta ia hisihisi, sibona ena kerere dainai. Tau ta sedira ia ala-ala, o ia henaoa, o ia kara dika, o haida edia kara ia herevalaia kerere, bona unai kara dainai ia hisihisi. Unai bamona hisihisi be mai ena hanamoa ta lasi.” (1 Pet. 4:15) To, Iesu ese ena hahediba taudia ia hamaoroa iena ladana dainai dagedage do idia davaria. (Ioa. 15:20) Petero ma ia gwau: “To tau ta, bema ia be Keristani tauna dainai ia hisihisi, unai tau be do ia hemarai lasi. Lasi momokani, to ia ese Dirava do ia tanikiu henia, Keriso ena ladana ia abia dainai.” (1 Pet. 4:16) Iesu ena hahediba taudia be iena ladana dainai hisihisi idia davaria, to unai idia hemarailaia lasi badina idia ese unai negai idia noho taudia edia lalohadai idia dadaraia.

Unai negai idia noho Keristani taudia be ma haida edia lalohadai ese edia kara ia biagua lasi. Iesu be au dekenai idia kokoa kau dainai taunimanima idia laloa ia be Mesia korikorina lasi. Edia kara ese Keristani taudia edia lalona ia veria diba unai lalohadai idia abia dae totona. Herevana Keristani taudia be ma haida ese idia kirikirilaia, to idia abia dae momokani Iesu be Mesia bona ia idia abidadama henia. Iesu ia gwau: “Bema tau ta lau dainai ia hemarai, o lauegu hereva dainai ia hemarai, inai Dirava ura lasi bona kara dika taunimanima edia vairanai, Taunimanima ena Natuna danu be unai tau dekenai do ia hemarai, iena giroa mai neganai, iena Tamana ena siahu, mai aneru helagadia danu.”​—⁠Mar. 8:⁠38.

Hari inai negai, ma haida ese ita idia doria iseda Keristani tomadiho dalana ita rakatania totona. Iseda sikuli turadia, dekena taudia eiava gaukara turadia ese ita idia doria diba matabodaga karadia, koikoi karadia bona Baibel ese ia taravatua karadia ita karaia totona. Baibel ena taravatu ita badinaia dainai, taunimanima ese ita idia kirikirilaia. To, dahaka ita karaia be namo?

Idia Haheauka Taudia Ita Tohotohoa

Iesu be Iehova ia badinaia dainai, au dekenai idia kokoa kau ena hemarai ia haheaukalaia. Ia be “hisihisi auna ia haheaukalaia, bona do ia abia hemaraina ia laloa lasi.” (Heb. 12:​2, NW ) Ena inai taudia ese ena vairana idia botaia, idia kanudia, kwadia, au dekenai idia kokoa kau bona idia hevasehalaia. (Mar. 14:65; 15:​29-32) To, Iesu be ena inai taudia ese ia idia hahemaraia karadia ia laloa bada lasi. Edena dala ai? Edia kara dainai ia lalomanoka lasi. Iesu ia diba Iehova ese ia lalonamo henia, bona taunimanima ese ia idia hanamoa be anina lasi. Ena be Iesu be hesiai tauna ta bamona idia hamasea, to Iehova ese ia hatorea isi lou, ladana badana ia henia bona Iena idibana kahanai ia helai. Filipi 2:​8-11 ia gwau: “[Keriso Iesu] ese Dirava ia kamonai henia ela bona ia mase, oibe, satauro dekenai ia mase. Unai dainai Dirava ese Keriso ia abia isi, gabu bada herea momokani ia henia. Bona ladana ta ia henia, inai ladana ese ladana ibounai ia hereaia. Bona Iesu ena ladana hanamoa totona ibounai be dohore idia tui diho, guba taudia, tanobada taudia, bona tanobada henunai noho taudia danu. Bona taunimanima ibounai ese Iesu Keriso do idia gwauraia hedinarai ‘Lohiabada,’ badina be unai dekena amo Tamana Dirava ena ladana do idia abia isi momokani.”

Iesu ia diba au dekenai ia idia kokoa kau karana be hemarai bada gauna, badina unai ese iena Tamana ena ladana do ia hadikaia. Unai dainai, Iesu ese Iehova ia guriguri henia, ia gwau: “Mani inai kapusi be lau amo oi kokia.” (Mar. 14:​36, NW ) To, Iesu be Dirava ena ura ia badinaia, bona ia mamia hemarai ia haheaukalaia. Bema Iesu be unai negai idia noho taudia edia lalohadai ia laloa bada, reana do ia hemarai. To Iesu be unai bamona lalohadai ia dadaraia momokani.

Iesu ena hahediba taudia danu idia dogoatao bona idia dadabaia. Hanua taudia edia vairanai unai kara ese edia ladana ia hadikaia. Danu, taunimanima ese idia kirikirilaidia bona idia ura henidia lasi, to unai idia laloa lasi. Bona ena be haida ese idia kara auka henidia, to unai idia hemarailaia lasi. (Mat. 10:17; Kara 5:40; 2 Kor. 11:​23-25) Idia laloparara idia ese edia ‘hisihisi auna do idia huaia bona Iesu ena murinai do idia raka noho’ be namo.​—⁠Luka 9:​23, 26, NW.

To, ita be edena bamona? Ena be hari tanobada taudia idia laloa ita be kavakava taudia bona ita idia kirikirilaia, to Iehova ena matanai ita be mai eda aonega, goada bona gaukara namona ita karaia. (1 Kor. 1:​25-28) Momokani, tanobada taudia edia lalohadai ita abia dae be kavakava karana.

Bema tau ta be ladana bada ia ura henia, ia ese taunimanima edia lalohadai do ia laloa bada. To Iesu bona iena murinai idia raka taudia hegeregerena, ita Keristani taudia ita ura Iehova ese ita ia lalonamo henia. Unai dainai, ita ura Iehova ese ia laloa bada gaudia ita abia dae, bona Iehova ese ia ura henia lasi gaudia ita dadaraia.

[Picture on page 4]

Iesu be au dekenai idia kokoa kau ena hemarai ia laloa bada lasi