Nikodemo be vara lou karana dekenai ia daradara lasi totona, Iesu be ma ia gwau: “Do oi vara lou.” (Ioane 3:⁠7) Iesu ena hereva ese ia hahedinaraia goevagoeva, tau ta be “Dirava ena Basileia lalonai do ia vareai” totona, ia vara lou be mai anina bada.​​—⁠Ioane 3:⁠5.

Vara Lou Karana​​—⁠Be Tau ta Sibona ese Ia Abia Hidi, A?

VARA lou karana be daika ese ia havaraia? Haroro taudia be nega momo Iesu ena hereva idia gwauraia, hegeregere kamonai taudia dekenai idia gwau: “Do oi vara lou.” (Ioane 3:⁠7) Unai haroro taudia ese Iesu ena hereva be oda herevana ta bamona idia boiboilaia, idia gwau: “Oi vara lou!” Idia gwau taunimanima ta ta sibona ese abia hidi do ia karaia, Iesu ena hereva do ia badinaia bona kara haida do ia karaia ela bona do ia vara lou. Unai hahediba herevana amo idia hahedinaraia, taunimanima ta ta sibona ese vara lou karana ia abia hidi diba. To, unai hahediba herevana be Iesu ese Nikodemo ia hamaoroa herevana hegeregerena, a?

Iesu ena hereva ita duahia namonamo neganai, ita itaia Iesu ia gwau lasi vara lou karana be taunimanima sibodia ese idia abia hidi gauna. Dahaka dainai unai bamona ita hereva? Greek gado herevana idia hahanaia “vara lou” ena anina ma ta be “atai dekenai amo ia vara.”a Unai hereva hegeregerena ita gwau diba vara lou karana be “atai dekenai” amo ia mai​​—⁠anina be “Dirava dekena amo” o guba amo ia vara. (Ioane 19:11; Iamesi 1:17) Oibe, unai ese ia hamomokania Dirava ese vara lou karana ia havaraia.​​—⁠1 Ioane 3:⁠9.

Bema unai hereva “atai dekenai” ita laloa neganai, do ita laloparara dahaka dainai tau ta sibona ese ena vara lou karana ia havaraia diba lasi. Mani beibi ta oi laloa: Ia vara totona ia sibona be abia hidi ia karaia, a? Lasi! Unai hegeregerena, ita sibona ese vara lou totona abia hidi ita karaia lasi. To, vara lou karana be Dirava, iseda guba Tamana sibona ese ia havaraia karana. (Ioane 1:​13) Unai dainai, aposetolo Petero ia gwau: “Namona be Dirava, iseda Lohiabada Iesu Keriso ena Tamana, ita hanamoa. Iena hebogahisi bada dainai ita vara lou.”​​—⁠1 Petero 1:⁠3.

Ia be Oda Herevana ta, A?

To haida idia laloa, ‘Bema tau ta be sibona ena vara lou karana ia abia hidi diba lasi, vadaeni, dahaka dainai Iesu be inai oda herevana ia gwauraia: “Do oi vara lou”?’ Unai be henanadai namona. Mani inai ita laloa: Bema Iesu ena hereva be oda ta bamona, anina be ia ese ita ia hamaoroa ita karaia diba lasi gauna ta ita karaia totona, ani? To, unai lalohadai be maoro lasi. Vadaeni, edena dala ai unai hereva, “Do oi vara lou” ita lalopararalaia be namo?

Bema Greek gado ai unai hereva ita stadilaia namonamo, do ita davaria unai hereva be oda herevana lasi, to guba lao dalana ia herevalaia. Mani inai haheitalai ita laloa: Siti badana ta be mai ena sikuli momo bona sikuli tamona be idia makaia, tano biagudia edia natudia sibona idia sikuli totona. Dina ta ai, idau tano merona ta ese hedmasta ia hereva henia ia gwau: “Lau ura emu sikuli dekenai lau sikuli.” Hedmasta ia gwau: “Emai sikuli dekenai oi vareai totona, namona be oi be inai hanua merona ta.” Hedmasta be unai mero ia oda henia lasi unai hanua merona ai ia lao totona. Lasi, hedmasta be unai sikuli dekenai do ia lao diba dalana ia gwauraia hedinarai. Unai hegeregerena, Iesu ia gwau: “Do oi vara lou” neganai, ia be guba lao dalana ia gwauraia hedinarai. Oibe, ta be Dirava ena Basileia lalonai ia vareai totona, ia vara lou be mai anina bada.