“Dala Lau Hedinarai Vadaeni Umui Dekenai”

“Nega ia ginidae vadaeni, umui be hadibaia taudia.”​—⁠HEBERU 5:⁠12.

 1. Reana dahaka dainai Keristani tauna ese Heberu 5:12 ena hereva ia laloa momo?

ISEDA siri badana, Dirava ena lauma amo ia vara herevana, oi duahia neganai, emu kara oi laloa momo, a? Bema oibe, oi sibona be unai bamona lasi. Ita be Keriso murinai ita raka taudia dainai, ita diba ma haida ita hadibaia be namo. (Mataio 28:​19, 20) Ita diba ita noho negana dainai, ma haida ita hadibaia namonamo be gau badana. Bona ita diba ita hadibaia taudia ese ita hadibaia gaudia amo mauri idia davaria diba! (1 Timoteo 4:16) Unai dainai, reana ita sibona ita nanadaia: ‘Momokani lau be hadibaia tauna namona, a? Egu hadibaia dalana be edena bamona lau hanamoa diba?’

2, 3. (a) Edena dala ai tisa tauna ta ese hadibaia karana namona ena badina ia hahedinaraia? (b) Hadibaia karana dekenai Iesu ese edena bamona dala ita dekenai ia hahedinaraia?

² Namo lasi eda kara ita laloa momo dainai ita lalo-manoka. Bema ita laloa hadibaia karana be diba haida abia karana sibona amo ita hanamoa, reana ita laloa unai be gaukara badana. To, hadibaia karana namona ena badina be diba abia karana ia hereaia gauna ta. Unai ia herevalaia bukana ta ai hadibaia karana ia diba namonamo tisa tauna ena hereva mani oi laloa, ia gwau: “Hadibaia karana namona lalonai diba eiava sitaelo, palani eiava kara be anina bada lasi. . . . Hadibaia karana lalonai lalokau be mai anina bada.” Momokani, unai tauna be tomadiho hadibaia tauna lasi. To, reana ita Keristani taudia ita karaia hadibaia gaukarana lalonai ena lalohadai be mai anina bada. Dahaka dainai?

³ Hadibaia karana dekenai iseda Haheitalai Tauna be Iesu Keriso, ia murinai idia raka taudia ia hamaoroa: “Dala lau hedinaraia vadaeni umui dekenai.” (Ioane 13:15) Ia ese ena haheitalai manau karana dekenai ia herevalaia, to tanobada dekenai taunimanima bamona ia noho neganai ia karaia gaukarana badana​—⁠taunimanima dekenai Dirava ena Basileia ena sivarai namona hadibaia gaukarana​—⁠ena dala be ita dekenai ia hahedinaraia danu. (Luka 4:43) Vadaeni, bema Iesu ena hesiai gaukara hahedinaraia totona hereva tamona sibona oi abia hidi, reana inai hereva “lalokau” do oi abia hidi, ani? (Kolose 1:15; 1 Ioane 4:⁠8) Iesu ena lalokau iena guba Tamana, Iehova, dekenai be bada herea. (Ioane 14:31) To Iesu be hadibaia tauna dainai, dala ma rua ai lalokau ia hahedinaraia. Ia hadibaia hereva momokanidia ia lalokau henia, bona ia hadibaia taudia ia lalokau henia. Unai ita dekenai ia hahedinaraia dalana ena kahana rua mani ita tahua namonamo.

Nega Daudau Dirava Ena Hereva Momokanidia Ia Lalokau Henia

 4. Edena dala ai Iesu ese Iehova ena hadibaia herevadia ia lalokau henia matamaia?

⁴ Hadibaia tauna ena lalohadai ia hadibaia gaudia dekenai be mai anina bada. Bema unai gaudia ia laloa bada lasi unai be do ia hedinarai, bona ena stiuden taudia danu be do unai bamona. Iesu ese ia hadibaia hereva momokani badadia Iehova bona Iena Basileia dekenai ia laloa maragi lasi. Unai gaudia ia lalokau henia bada. Ia be stiuden tauna neganai unai lalokau ia vara. Dirava sibona ese ia havaraia Natuna be tanobada dekenai ia do mai lasi laganidia milioni momo lalonai, ia be stiuden tauna namona. Isaia 50:​4, 5 ese inai hereva namodia ia hahedinaraia, ia gwau: “Lohiabada Dirava ese, dahaka do lau hereva gauna ia hadibaia lau dekenai, vadaeni unai dainai lau ese manoka taudia lau hagoadaia diba. Daba ibounai ia ese laloa goada lau dekenai ia henia noho, vadaeni iena hadibaia hereva lau kamonaia namonamo. Lohiabada ese diba bona aonega lau dekenai ia henia, bona lau ese iena hereva lau negea lasi. Lohiabada dekena amo lau raka siri lasi.”

5, 6. (a) Iesu ese bapatiso ia abia neganai dahaka ia vara, bona ia dekenai unai ena anina be dahaka? (b) Iesu bona Satani ese Dirava ena Hereva idia gaukaralaia daladia be edena bamona idia idau?

⁵ Iesu be tanobada dekenai ia tubu neganai, Dirava amo ia mai aonega ia lalokau henia noho. (Luka 2:52) Bena bapatiso ia abia neganai, gau idauna ta be ia dekenai ia vara. Luka 3:21 ia gwau: “Guba ia kehoa.” Ia hedinarai, unai neganai ena mauri gunana guba dekenai ia laloatao diba. Unai murinai ia be dina 40 lalonai tano gagaena dekenai ia noho bona ia aniani lasi. Guba dekenai Iehova ese ia hadibaia negadia ia laloa dobu karana amo moale bada ia abia. To, daudau lasi murinai, ta ese iena lalokau Dirava ena hereva momokanidia dekenai ia tohoa.

⁶ Iesu ia hesiku bona hitolo neganai, Satani ese ia dibagania. Unai Dirava ena natudia rua edia kara be idau momokani! Idia ruaosi ese Heberu Revarevadia idia gaukaralaia​—⁠to edia lalohadai be idau momokani. Satani ese Dirava ena Hereva ia mogea, hemataurai lasi dalanai sibona ena ura hagugurua totona ia gaukaralaia. Momokani, unai gwau-edeede tauna ese Dirava ena hereva momokanidia ia laloa maragi. To Iesu ese mai lalokau ida Baibel ena hereva ia gwauraia, iena haere ta ta lalonai Dirava ena Hereva ia gaukaralaia namonamo. Unai hereva be Dirava ena lauma amo idia do vara lasi neganai, Iesu be nega daudau ia noho vadaeni, to idia ia matauraia bada. Idia be ena guba Tamana amo idia mai dava bada hereva momokanidia! Iesu ese Satani ia hamaoroa unai bamona hereva Iehova amo ese aniani idia hereaia. (Mataio 4:​1-11) Oibe, Iesu be Iehova ese ia dekenai ia hadibaia hereva momokanidia ibounai ia lalokau henia. To, ia be hadibaia tauna neganai, edena dala ai unai lalokau ia hahedinaraia?

Ia Hadibaia Hereva Momokanidia Ia Lalokau Henia

 7. Dahaka dainai Iesu ese sibona ena lalohadai ia gwauraia lasi?

⁷ Iesu ena lalokau ia hadibaia hereva momokanidia dekenai be hanaihanai ia hedinarai. Oibe, ia ese sibona ena lalohadai ia gwauraia haraga diba. Iena diba bona aonega be bada herea. (Kolose 2:⁠3) To, iena hereva idia kamonai taudia ia hamaoroa loulou ia hadibaia gaudia ibounai be ia sibona amo lasi, to iena guba Tamana amo idia mai. (Ioane 7:16; 8:28; 12:49; 14:10) Ia ese Dirava ena hereva momokanidia ia lalokau henia bada dainai, ia ura lasi sibona ena lalohadai ia gwauraia.

 8. Iesu ese ena haroro gaukarana ia hamatamaia neganai, edena bamona Dirava ena Hereva gaukaralaia dalana ia hahedinaraia?

⁸ Iesu ese ena haroro gaukarana ia hamatamaia neganai, haraga herea dala ta ia hahedinaraia. Ia be gwauhamata Mesia herevana be Dirava ena taunimanima dekenai nega ginigunana ia gwauraia dalana mani oi laloa. Taunimanima hutuma vairanai ia hedinarai, sibona ia gwauraia Keriso, bona hoa karadia badadia amo unai ia hamomokania, a? Lasi. Dubu dekenai ia lao, Dirava ena taunimanima edia kara be unuseniai Buka Helaga idia duahia. Unuseniai Isaia 61:​1, 2 ena peroveta herevana ia duahia badabada bona ia gwauraia hedinarai unai peroveta hereva momokanidia be ia dekenai idia guguru. (Luka 4:​16-22) Iena hoa karadia ese idia hamomokania Iehova be ia danu ia noho. To, ena hadibaia gaukarana lalonai, hanaihanai Dirava ena Hereva ia gaukaralaia.

 9. Iesu ese Farisea taudia ia kara henia lalonai, edena bamona ia hahedinaraia Dirava ena Hereva ia lalokau henia?

⁹ Iesu idia inai henia tomadiho taudia ese ia idia dagedage henia neganai, iena aonega amo idia ia halusia toho lasi, herevana karaharaga idia ia halusia diba. To, Dirava ena Hereva amo edia lalohadai kereredia ia hahedinaraia. Hegeregere, Iesu murinai idia raka taudia be uiti uma idia raka hanaia, uiti ena anina haida idia kokia bona idia ania, bona Farisea taudia ese idia samanidia Sabati taravatuna idia utua negana be mani oi laloa. Iesu ia haere: “Nega ta umui duahia lasi, a, Davida ena kara ta, ia hitolo neganai, ia mai iena orea taudia danu?” (Mataio 12:​1-5) Momokani, reana unai sibodia edia kara maoromaoro idia laloa bada taudia ese Dirava ena lauma amo ia vara sivaraina 1 Samuela 21:​1-6 ai idia duahia vadaeni. Bema idia duahia, ia hahedinaraia hadibaia herevana mai anina bada idia dibaia lasi. To, Iesu ese unai sivarai ia duahia sibona lasi. Ena anina ia laloa bona ena hakaua herevana ia abia dae. Iehova ese unai sivarai amo ia hadibaia hakaua herevadia ia lalokau henia. Unai dainai, ia ese unai sivarai, bona Mose ena Taravatu amo haheitalai ta, Taravatu ena anina namona hahedinaraia totona ia gaukaralaia. Unai hegeregerena, Iesu ese Dirava ena Hereva ia lalokau henia dainai, tomadiho gunalaia taudia ese sibona edia namo abia totona idia mogea eiava taunimanima edia sene herevadia lalonai idia hunia toho neganai, hanaihanai ena maoro ia hamomokania.

10. Iesu ese ena hadibaia dalana idia perovetalaia herevadia be edena bamona ia hagugurua?

¹⁰ Iesu ese ia hadibaia herevadia ia lalokau henia dainai, laloa lasi dalanai, hesiku bona hemami lasi dalanai, ia hadibaia lasi. Dirava ena lauma amo idia vara peroveta herevadia idia gwau Mesia ena “hereva be hariharibada dekena amo idia honu momokani,” bona ia ese “hereva namo hereadia” ia gaukaralaia. (Salamo 45:2; Genese 49:​21, NW ) Iesu ese unai peroveta herevadia ia hagugurua, ia ese lalona veria dalanai ia haroro bona ia hahedinaraia sivaraina ia hamauria, oibe, ia lalokau henia bada hereva momokanidia ia hadibaia neganai, “hereva namodia” ia gaukaralaia. (Luka 4:22) Ita laloa diba ena ura bada be ena vairana ena toana amo ia hahedinaraia, bona ia hadibaia gaudia ia laloa bada dainai ena matana idia diari. Ena hereva idia kamonai mai moale ida, bona unai be dala namona, ita dibaia gaudia be ma haida dekenai ita hadibaia neganai ita badinaia totona!

11. Iesu be hadibaia karana ia diba namonamo to dahaka dainai ia hekokoroku lasi?

¹¹ Iesu ese Dirava ena hereva momokanidia ia lalo-pararalaia namonamo dainai bona ena hereva dalana be namo herea dainai ia hekokoroku, a? Nega momo taunimanima dekenai unai ia vara. To mani oi laloatao, Iesu ese Dirava ena aonega ia hahedinaraia. Unai bamona aonega ia hekokoroku lasi, badina “manau taudia ese aonega idia davaria noho.” (Aonega Herevadia 11:⁠2) Gau ma ta dainai danu, Iesu ia hekokoroku bona heagi lasi.

Iesu ese Ia Hadibaia Taudia Ia Lalokau Henia

12. Edena dala ai Iesu ia hahedinaraia ia ura lasi ia murinai idia raka taudia be ia idia gari henia?

¹² Iesu ena lalokau bada taunimanima dekenai be hanaihanai ena hadibaia karana amo ia hedinarai. Hekokoroku taudia edia hadibaia karana amo taunimanima idia hagaria, to Iesu be unai bamona lasi. (Hadibaia Tauna 8:⁠9) Petero ese Iesu ena hoa karana ta ia itaia murinai, ia hoa bada, bona Iesu ena aena badinai ia tui diho. To Iesu ia ura lasi ia murinai idia raka taudia ese ia idia gari henia. Mai hebogahisi ida ia gwau, “Oi gari lasi,” bena Petero ese do ia karaia hahediba taudia halaoa gaukarana namona ia herevalaia. (Luka 5:​8-10) Iesu ia ura iena hahediba taudia ese edia hadibaia tauna idia gari henia dainai lasi, to Dirava idia hahedinaraia hereva momokanidia idia lalokau henia dainai, kara ta idia karaia.

13, 14. Edena daladia ai Iesu ese ma haida edia hemami ia laloa?

¹³ Iesu ese ia hadibaia taudia ia lalokau henia be edia hemami ia laloa karana amo ia hedinarai danu. “Taunimanima momo Iesu ese ia itaia, vadaeni ia bogahisihisi idia dekenai, badina be edia tauanina idia manokamanoka, bona idia lao idau gabu idau gabu dekenai, mamoe idia naria lasi bamona.” (Mataio 9:36) Edia noho dikana dainai ia hebogahisi henia bona ia ura idia ia durua.

¹⁴ Iesu ese nega ma ta dekenai ma haida edia hemami ia laloa karana mani oi itaia. Hutuma lalonai, rara gorerena ia abia hahinena be Iesu ena dabua isena ia dogoatao neganai, hoa dalanai hahine ia namo. Iesu ia diba siahu be ia amo ia lao, to ia itaia lasi daika ia hanamoa. Ia ura unai hahine ia davaria. Dahaka dainai? Taravatu eiava taravatu hadibaia taudia bona Farisea taudia edia hereva ia utua dainai ia gwauraia dika totona lasi, herevana reana unai hahine be unai dainai ia gari. To, hahine dekenai ia gwau: “Lauegu natuna, oiemu abidadama dainai, mauri oi davaria vadaeni, oi lao mai maino danu, bona oiemu gorere [“dikana,” NW ] do oi davaria lou lasi.” (Mareko 5:​25-34) Mani oi itaia, unai hereva ese ia hahedinaraia Iesu be ma ta ena hemami ia laloa. Inai sibona ia gwauraia lasi, “Oi namo.” To, ia gwau: “Oiemu gorere dikana do oi davaria lou lasi.” Unai dekenai Mareko ese ia gaukaralaia herevana ena anina ta be “kwadia,” unai be dadabaia dalana ta hisihisi havaraia totona. Unai dala ai, Iesu ia abia dae unai gorere ese unai hahine ia hahisia, reana tauanina bona hemami dalanai ia hahisia bada herea. Unai hahine ia hebogahisi henia.

15, 16. Iesu ena hesiai gaukara lalonai edena gaudia amo ia hedinarai ia ese taunimanima edia kara namodia ia laloa?

¹⁵ Iesu ese taunimanima dekenai ena lalokau ia hahedinaraia dalana ma ta be edia kara namodia ia laloa. Ia ese Natanaela, gabeai aposetolo ta ai ia lao tauna, ia davaria neganai ia vara gauna mani oi laloa. “Iesu ese Natanaela ia itaia, ia dekenai ia mai noho, vadaeni ia herevalaia, ia gwau, ‘Israela tauna korikori be inai, ia be koikoi diba lasi momokani tauna!’ ” Hoa dalanai, Iesu ese Natanaela ena kudouna dekenai idia noho gaudia ia itaia, bona unai dainai Natanaela ia dibaia namonamo. Momokani, Natanaela be goevadae tauna lasi. Ia be mai ena kerere, ita ibounai hegeregerena. Momokani, Iesu ena sivarai ia kamonai neganai, ia be hereva sisina auka ia gwauraia: “Nasareta dekena amo gau namona ta do ia mai diba, a?” (Ioane 1:​45-51) To, Iesu ese Natanaela ia herevalaia neganai gau idauidau momo ia gwauraia diba, to ia ese gau namona ta, ena koikoi lasi karana unai, ia gwauraia.

¹⁶ Unai hegeregerena, ami ofesa ta​—⁠Idau Bese tauna, reana Roma tauna ta​—⁠be Iesu dekenai ia mai bona ia noia ena gorere hesiai tauna do ia hanamoa, Iesu ia diba unai tuari tauna be mai ena kerere. Unai negai ia noho ami ofesa ese ena mauri lalonai dagedage, rara bubua, bona tomadiho koikoi karadia momo ia karaia. To, Iesu ese gau namona ta​—⁠unai tauna ena abidadama bada​—⁠ia gwauraia. (Mataio 8:​5-13) Gabeai, Iesu be ia badinai satauro dekenai ia noho kara dika tauna ia hereva henia neganai, unai tau ese guna taravatu ia utua karadia dainai ia gwauraia dika lasi to vaira negana ena helaro namona amo ia hagoadaia. (Luka 23:43) Iesu ia diba, bema ma haida ia gwauraia dika do idia lalo-manoka. Ita laloa diba, ma haida edia kara namodia ia laloa dainai idia momo idia ura edia kara idia hanamoa.

Mai Ena Ura ida Taunimanima Edia Hesiai Gaukara Ia Karaia

17, 18. Iesu be tanobada dekenai ia mai gaukarana ia abia dae karana amo, edena bamona ia hahedinaraia mai ena ura ida ma haida edia hesiai gaukara ia karaia?

¹⁷ Iesu ese ia hadibaia taudia ia lalokau henia ia hahedinaraia dalana ma ta be mai ena ura ida edia hesiai gaukara ia karaia. Dirava ena Natuna be tanobada dekenai ia do mai lasi neganai, hanaihanai tanobada taudia dekenai ia moale. (Aonega Herevadia 8:​30, 31) Ia be Iehova ena “Hereva,” eiava hereva gwauraia tauna, dainai reana nega momo taunimanima ia hereva henia. (Ioane 1:⁠1) To, taunimanima ia hadibaia namonamo totona, “iena dagi badana ia negea, bona hesiai tauna momokani ia lao,” oibe, ena dagi badana guba dekenai ia rakatania. (Filipi 2:7; 2 Korinto 8:⁠9) Iesu be tanobada dekenai ia noho neganai, ia laloa lasi ma haida ese iena hesiai gaukara do idia karaia be namo. Lasi, to ia gwau: “Taunimanima ena Natuna bamona, ia mai lasi taunimanima ese iena hesiai gaukara do idia karaia totona, to ia be taunimanima edia hesiai gaukara karaia totona ia mai, bona iena mauri do ia atoa diho, taunimanima momo edia dika davana karaia totona.” (Mataio 20:28) Iesu ese unai hereva ia hagugurua momokani.

¹⁸ Iesu ese mai ena manau ida ia hadibaia taudia edia hesiai gaukara ia karaia danu, mai ena ura ida idia totona ia hekwarahi. Gwauhamata Tanona dekenai ia raka loaloa momo, ena haroro loaloa lalodiai kilomita handred momo ia raka taunimanima momo ia davaria totona. Ia be hekokoroku Farisea taudia bona taravatu hadibaia taudia bamona lasi, to ia manau bona taunimanima be ia dekenai idia lao be auka lasi. Taunimanima idauidau​—⁠dagi taudia, tuari taudia, loea taudia, hahine, natudia, ogogami taudia, gorere taudia, bona ma haida ese idia dadaraia taudia danu​—⁠be mai edia ura ida ia dekenai idia mai, idia gari lasi. Ena be Iesu ia goevadae, to ia be taunimanima ta, ia hesiku bona ia hitolo. To herevana ia hesiku, eiava ia laga-ani eiava guriguri totona nega ia abia be namo, ma haida edia namo ia tahua guna.​—⁠Mareko 1:​35-39.

19. Iesu ese mai manau, haheauka, bona hebogahisi ida ena hahediba taudia ia kara henia dalana be edena bamona ia hahedinaraia?

¹⁹ Unai hegeregerena Iesu be mai ena ura ida ena hahediba taudia edia hesiai gaukara ia karaia danu. Unai dainai, mai hebogahisi bona haheauka ida idia ia hadibaia. Mai anina bada gaudia idia lalo-pararalaia haraga lasi neganai, ia hesiku lasi, ia badu lasi, bona idia ia gwau henia lasi. Idia lalo-parara totona hadibaia dala matamatadia ia tahua noho. Hegeregere, hahediba taudia ese nega momo idia hepapahuahulaia gauna be idia amo daika ia bada. Iesu ese manau heheni karana idia dekenai ia hadibaia totona dala matamatadia ia tahua loulou, ela bona ena hanuaboi ginigabena. Iesu ese manau karana, bona kara iboudiai, dekenai ia gwau diba: “Dala lau hedinaraia vadaeni umui dekenai.”​—⁠Ioane 13:​5-15; Mataio 20:25; Mareko 9:​34-37.

20. Edena hadibaia dalana dainai Iesu ena kara be Farisea taudia edia kara bamona lasi, bona dahaka dainai unai dala ese namo ia havaraia?

²⁰ Mani oi itaia, Iesu ese ena hahediba taudia dekenai unai dala ia hamaoroa sibona lasi; ia ese “dala ia hedinaraia.” Haheitalai amo idia ia hadibaia. Dagi bada tauna ese dagi lasi taudia ia hereva henia bamona idia ia hadibaia lasi, oibe, ia laloa lasi idia ese do idia karaia totona ia gwauraia gaudia be ia karaia be badina lasi. Farisea taudia be unai bamona. Iesu ese idia ia herevalaia, ia gwau: “Idia hereva, to idia karaia lasi.” (Mataio 23:⁠3) Iesu ese ia hadibaia herevadia be ena mauri lalonai ia badinaia, unai amo mai manau ida iena stiuden taudia dekenai edia anina ia hahedinaraia. Unai dainai, ia murinai idia raka taudia ia hagoadaia kohu tahua lasi karana ese edia mauri ia hametaua lasi be namo neganai, unai ena anina idia lalo-pararalaia. Idia itaia diba ena hereva be momokani, ia gwau: “Uda sisia be mai edia nadi matuna, bona ataiai manudia danu mai edia ruma, to Taunimanima ena Natuna be mai ena mahuta gabuna lasi.” (Mataio 8:20) Iesu ese mai manau ida ena hahediba taudia dekenai dala ia hahedinaraia karana amo edia hesiai gaukara ia karaia.

21. Hereva gabena ese dahaka do ia herevalaia?

²¹ Ia hedinarai goevagoeva, taunimanima iboudiai amo Iesu be Hadibaia Tauna hereadaena! Iena lalokau ia hadibaia herevadia dekenai bona ia hadibaia taudia dekenai be ia idia itaia bona ena hereva idia kamonai kudou-maoro taudia iboudiai ese idia itaia namonamo. Bona hari ita, ia hahedinaraia dalana ita stadilaia taudia, ese unai ita itaia namonamo danu. To, edena dala ai Keriso ena haheitalai goevadaena ita tohotohoa diba? Hereva gabena ese unai henanadai do ia herevalaia.

Edena Bamona Do Oi Haere?

• Hadibaia karana namona ena badina be dahaka, bona daika ese unai ia hahedinaraia?

• Edena daladia ai Iesu ese ia hahedinaraia ia hadibaia hereva momokanidia ia lalokau henia?

• Edena dala ai Iesu ese ia hadibaia taudia dekenai ena lalokau ia hahedinaraia?

• Edena haheitalai idia hahedinaraia Iesu ese mai ena manau bona ura bada ida ia hadibaia taudia edia hesiai gaukara ia karaia?

[Picture on page 6]

Edena dala ai Iesu ese ia hahedinaraia Dirava ena Hereva lalonai idia noho hakaua herevadia ia lalokau henia?