‘Huahua Momo Umui Atoa Noho’

‘Huahua momo do umui atoa noho, unai dekena amo lauegu diba tahua taudia korikori do umui lao.’​—⁠IOANE 15:⁠8.

 1. (a) Iesu ese ena aposetolo taudia ia hamaorodia, hahediba tauna ese edena hahegani do ia badinaia? (b) Edena henanadai be ita sibona dekenai ita henia be namo?

INAI be Iesu do ia mase ena hanuaboi ginigabena. Ia ese nega bada ia atoa ena aposetolo taudia ia hereva henidia namonamo totona. Reana hanuaboi 12 o’klok ia hanaia vadaeni, to Iesu ese ena turadia ia lalokau henia dainai, ia do hereva noho. Bena ena hereva lalonai, do idia badinaia hahegani ma ta ia gwauraia, unai amo do idia hamomokania noho idia be iena hahediba taudia. Ia gwau: “Bema huahua momo do umui atoa neganai, egu Tamana be taunimanima ese do idia hanamoa. Unai dekena amo lauegu diba tahua taudia korikori do umui lao.” (Ioane 15:⁠8) Unai hahediba tauna ese do ia badinaia hahegani ita badinaia, a? “Huahua momo” havaraia ena anina be dahaka? Haere ita diba totona, namona be Iesu ese unai hanuaboi ai ena hahediba taudia dekenai ia gwauraia herevadia ita laloa lou.

 2. Iesu ia do mase lasi hanuaboi ginigabena ai, edena huahua haheitalaina ia gwauraia?

² Huahua havaraia ena sisiba herevana be Iesu ese ena aposetolo taudia dekenai ia gwauraia haheitalai ena kahana ta. Ia gwau: “Lau be vain korikori, egu Tamana be vain edia uma gabu naria tauna. Lauegu rigi ibounai bema huahua idia atoa lasi, be egu Tamana ese ia kokia. Mai huahua rigi ibounai be ia ese ia utua kwadogi, do idia goeva, bona huahua momo do idia atoa totona. Umui be umui goeva, umui dekenai lau henia herevadia dainai. Lauegu lalona dekenai do umui noho, lau danu umui emui lalona dekenai do lau noho. Rigi be sibona huahua do ia atoa lasi, to bema vain auna do ia badinaia, be huahua do ia atoa. Vadaeni unai bamona bema umui badinaia lasi lau dekenai, umui emui huahua do ia atoa lasi. Vain be lau, ena rigi be umui. . . . Bema huahua momo do umui atoa neganai, egu Tamana be taunimanima ese do idia hanamoa. Unai dekena amo lauegu diba tahua taudia korikori do umui lao. Egu Tamana ese lau ia lalokau henia hegeregerena, lau danu umui lau lalokau henia. Egu lalokau dekenai do umui noho hanaihanai. Bema umui ese lauegu taravatu do umui badinaia, vadaeni egu lalokau dekenai do umui noho.”​—⁠Ioane 15:​1-10.

 3. Iesu ena murinai idia raka taudia ese dahaka idia karaia be namo huahua idia havaraia totona?

³ Unai haheitalai lalonai Iehova be Uma Naria Tauna, Iesu be vain, bona Iesu ese ia hereva henia aposetolo taudia be rigi. Bema aposetolo taudia idia hekwarahi Iesu idia “badinaia,” huahua do idia havaraia. Iesu ese aposetolo taudia dekenai, unai lalo-tamona idia dogoatao noho diba karana ia gwauraia hedinarai: “Bema umui ese lauegu taravatu do umui badinaia, vadaeni egu lalokau dekenai do umui noho.” Gabeai, aposetolo Ioane ese Keristani taudia dekenai unai bamona hereva ia torea: “[Keriso ena] taravatu ia badinaia noho tauna be Dirava ena lalona dekenai ia noho.”a (1 Ioane 2:24; 3:24) Unai dainai Keriso ena murinai idia raka taudia ese iena hahegani idia badinaia karana amo ia ida idia lalo-tamona, bona unai lalo-tamona dainai huahua idia havaraia. Edena bamona huahua ita havaraia be namo?

Dala Ia Noho Idia Tubu Totona

 4. Iehova ese huahua idia havaraia lasi rigidia ibounai ia “kokia” karana amo, dahaka ita dibaia?

⁴ Vain ena haheitalai lalonai, Iehova ese huahua ia havaraia lasi rigina ia “kokia.” Unai ese ita dekenai dahaka ia hadibaia? Ita ia hadibaia hahediba taudia ibounai ese huahua idia havaraia be namo, to unai sibona lasi, ita ia hadibaia danu ibounai idia hegeregere huahua idia havaraia totona, herevana edia noho dalana eiava goada be edena bamona. Momokani, Keriso ena hahediba tauna ta be ena diba ia hanaia gauna ta ia hagugurua lasi dainai Iehova ese ia “kokia,” eiava ia laloa ia be hegeregere lasi, be Iena lalokau daladia hegeregerena lasi.​—⁠Salamo 103:14; Kolose 3:23; 1 Ioane 5:⁠3.

 5. (a) Edena dala ai Iesu ia gwauraia haheitalai ese ia hahedinaraia, huahua momo havaraia karana ita habadaia diba? (b) Edena huahua rua do ita laloa?

⁵ Iesu ese ia gwauraia vain haheitalaina ese ia hahedinaraia danu, herevana iseda goada be mai ena hetoana, to ita be hahediba taudia dainai dala ita tahua iseda gaukara ita habadaia. Iesu ese unai ia gwauraia dalana mani ita laloa: “Rigi ibounai bema huahua idia atoa lasi, be egu Tamana ese ia kokia. Mai huahua rigi ibounai be ia ese ia utua kwadogi, do idia goeva, bona huahua momo do idia atoa.” (Ioane 15:⁠2) Haheitalai ena dokona ai, Iesu ese ena murinai idia raka taudia ia hagoadaia “huahua momo” idia havaraia totona. (Siri 8) Unai ese dahaka ia hahedinaraia? Ita be Iesu ena hahediba taudia dainai, namo lasi ita laloa ita hegeregere. (Apokalupo 3:​14, 15, 19) To, namona be dala ita tahua huahua havaraia karana ita habadaia totona. Edena huahua ita havaraia badabada be namo? Unai huahua rua be (1) ‘lauma helaga ese ia havaraia’ huahua bona (2) Basileia ena huahua.​—⁠Galatia 5:​22, 23; Mataio 24:⁠14.

Keristani Kara Namodia

 6. Iesu Keriso ese edena dala ai lauma helaga ena huahua ginigunana ena namo ia gwauraia?

⁶ ‘Lauma helaga ese ia havaraia’ huahua ena lista dekenai, lalokau be ginigunana. Dirava ena lauma helaga ese lalokau be Keristani taudia edia lalona dekenai ia havaraia, badina Iesu ese vain mai ena huahua ena haheitalai ia do gwauraia lasi neganai ia gwauraia guna haheganina idia badinaia. Iena aposetolo taudia ia hamaoroa ia gwau: “Taravatu matamatana lau henia umui dekenai, inai bamona: Umui ta ta dekenai umui lalokau henia.” (Ioane 13:34) Momokani, Iesu ena tanobada maurina ena hanuaboi ginigabena ai, ia kikilaia gaudia lalonai, aposetolo taudia ia hadibaia loulou lalokau idia hahedinaraia totona.​—⁠Ioane 14:​15, 21, 23, 24; 15:​12, 13, 17.

 7. Edena dala ai aposetolo Petero ia hahedinaraia, huahua ita havaraia karana amo Keriso ena kara idauidau ita hahedinaraia diba?

⁷ Unai hanuaboi ai ia noho tauna Petero ia lalo-parara, Keriso ese ia hahedinaraia lalokauna bona kara namodia ma haida be Keriso ena hahediba taudia korikoridia ese idia hahedinaraia be namo. Lagani momo murinai, Petero ese Keristani taudia ia hagoadaia unai bamona kara, hegeregere sibona ena ura biagua, tadikaka ura henia, bona lalokau idia habadaia totona. Ia gwau unai bamona ita karaia neganai, ‘do ita noho kava lasi, to iseda kara be mai anina.’ (2 Petero 1:​5-8) Herevana iseda noho dalana be edena bamona, to lauma ena huahua ita havaraia diba. Unai dainai, namona be ita hekwarahi lalokau, hebogahisi, manau, bona Keriso ese ia hahedinaraia karadia ma haida ita hahedinaraia badabada, badina “inai bamona karadia idia karaia taudia be taravatu ta ese ia koudia diba lasi.” (Galatia 5:23) Unai dainai, namonamo be “huahua momo” ita havaraia.

Basileia Ena Huahua Havaraia

 8. (a) Lauma ena huahua bona Basileia ena huahua be edena bamona idia gaukara hebou? (b) Edena henanadai ita laloa be namo?

⁸ Mai edia kala namodia bona mamina namona huahuadia ese au ta idia hahairaia. To, unai bamona huahua ena namo be ena hairai sibona dekenai lasi. Huahua be mai anina bada danu badina edia uhe amo unai bamona tubutubu gaudia momo oi havaraia diba. Unai hegeregerena, lauma helaga ena huahua ese iseda Keristani kara ia hahairaia sibona lasi. Lalokau bona abidadama bamona karadia ese ita idia durua danu Dirava ena Hereva lalonai ia noho Basileia sivarai ena uhe ita hadoa totona. Aposetolo Paulo ese unai mai anina bada karana ia gwauraia dalana mani oi itaia. Ia gwau: “Ai danu be ai abidadama noho [lauma helaga ena huahua ta], unai dainai ai danu ai hereva noho.” (2 Korinto 4:13) Unai dala ai, Paulo ma ia hahedinaraia “hahenamo herevadia boubouna be Dirava do ita henia,” unai be iseda “bibinadia edia huahua”​—⁠huahua iharuana unai bona do ita hahedinaraia be namo. (Heberu 13:​15, NW ) Ita be Dirava ena Basileia harorolaia taudia dainai, iseda mauri lalonai dala haida idia noho “huahua momo” ita havaraia totona, a?

 9. Huahua havaraia ena anina be ma haida be hahediba taudia ai ita halaoa, a? Oi gwauraia hedinarai.

⁹ Haere maorona ita henia totona, gau ginigunana be ita lalo-parara unai Basileia huahua be dahaka. Ia maoro bema ita gwau ma haida be hahediba taudia ai ita halaoa ena anina be huahua ita havaraia, a? (Mataio 28:19) Ita havaraia huahua be Iehova tomadiho henia totona ita durua bena bapatiso idia abia taudia, a? Lasi. Bema unai be momokani, lagani momo lalonai taunimanima idia kamonai lasi teritori dekenai mai edia kamonai ida Basileia ena sivarai idia harorolaia Witnes taudia edia lalona ia hamanokaia diba. Unai dainai, bema ita havaraia Basileia ena huahua be hahediba taudia matamatadia ia laulaulaia, unai bamona idia gaukara goadagoada Witnes taudia be Iesu ena haheitalai lalonai huahua idia havaraia lasi rigina bamona! To, unai be ia momokani lasi. Vadaeni, iseda hesiai gaukara lalonai ita havaraia Basileia ena huahua badana be dahaka?

Basileia Ena Uhe Halasia Karana amo Huahua Momo Oi Havaraia

10. Edena dala ai Iesu ia gwauraia hadohado tauna bona tano idauidau edia haheitalai, ese ia hahedinaraia Basileia ena huahua be dahaka bona ia be dahaka lasi?

¹⁰ Iesu ese ia gwauraia uhe hadoa tauna bona tano idaudia foa ena haheitalai ese haere ia henia​—⁠unai haere ese anina bada ia havaraia lasi teritori dekenai idia haroro taudia ia hagoadaia. Iesu ia gwau unai uhe be Dirava ena Hereva lalonai ia noho Basileia sivaraina bona tano be taunimanima edia kudouna ia laulaulaia. “Uhe haida be tano namona dekenai idia moru, vadaeni idia tubu namonamo, edia anina idia atoa.” (Luka 8:⁠8) Edena bamona huahua? Uiti ia tubu bona ia bada murinai, huahua ia havaraia, uiti tubutubu ia havaraia lasi, to uhe matamatadia. Unai hegeregerena, Keristani tauna ta ia havaraia huahua be hahediba tauna matamatana lasi, to Basileia uhena matamatana.

11. Basileia ena huahua ena anina be dahaka?

¹¹ Unai dainai, hari ita herevalaia huahuana be hahediba taudia matamatadia lasi, eiava ia be edia Keristani kara lasi. Idia hadoa uhena be Basileia ena sivarai dainai, unai huahua be unai uhe bamona uhedia ma haida ia herevalaia. Huahua idia havaraia ena anina be Basileia idia gwauraia hedinarai. (Mataio 24:14) Ita be Basileia ena huahua ita havaraia noho​—⁠anina be Basileia ena sivarai namona ita harorolaia​—⁠herevana iseda noho dalana be edena bamona, a? Oibe! Unai haheitalai tamona ai, Iesu ese badina ia gwauraia hedinarai.

Dirava Hanamoa Totona Ita Gaukara Goadagoada

12. Keristani taudia ibounai ese Basileia ena huahua idia havaraia diba, a? Oi gwauraia hedinarai.

¹² Iesu ia gwau, “tano namona dekenai ia moru gauna. . . . be edia anina idia atoa, ta 100, ta 60, ta 30.” (Mataio 13:23) Badina idauidau dainai idia hadoa uiti ese anina idauidau idia havaraia diba. Unai hegeregerena, iseda noho daladia dainai sivarai namona harorolaia totona ita karaia diba gaudia be do ia tamona lasi, bona Iesu ese ia hahedinaraia unai ia diba. Haida dekenai dala momo ia kehoa; ma haida be idia gorere lasi bona edia tauanina ia goada. Unai dainai, ita karaia diba gaudia be ma haida amo ia bada eiava ia maragi, to bema mai iseda goada ida ita karaia, Iehova do ia moale. (Galatia 6:⁠4) Ena be ita buruka eiava gorere dainai haroro gaukara ita karaia badabada lasi, to iseda hebogahisi Tamana, Iehova, ese ita be “huahua momo” idia havaraia taudia bamona ia itaia. Dahaka dainai? Badina ia dekenai iseda gau ‘ibounai ita henia’​—⁠mai eda kudouna ibounai ida ita hesiai henia.b​—⁠Mareko 12:​43, 44; Luka 10:⁠27.

13. (a) Dahaka badina badana dainai, Basileia ena huahua ita havaraia “hanaihanai”? (b) Taunimanima momo idia kamonai lasi teritori dekenai, dahaka ese ita ia durua huahua ita havaraia noho totona? (Rau 27 dekenai ia noho mauana itaia.)

¹³ Herevana Basileia ena huahua ita havaraia ena bada be dahaka, bema unai ita karaia ena badina ita laloatao unai ese ita do ia hagoadaia ‘huahua do ita atoa hanaihanai.’ (Ioane 15:16) Iesu ese unai bamona ita karaia ena badina badana ia gwauraia: “Bema huahua momo do umui atoa neganai, egu Tamana be taunimanima ese do idia hanamoa.” (Ioane 15:⁠8) Oibe, iseda haroro gaukara ese taunimanima ibounai vairanai Iehova ena ladana ia hahelagaia. (Salamo 109:30) Kamonai Witnes taihuna ta ladana Honor, ena mauri lagani be 75, ia gwau: “Ena be taunimanima momo idia kamonai lasi teritori dekenai ai haroro, to Atai Momokani Diravana ena gaukara lau karaia be hahenamo ta.” Lagani 1974 amo ia gaukara goadagoada Witnes tauna, Claudio, be ena teritori lalonai taunimanima momo idia kamonai lasi to ia do haroro noho ena badina idia henanadailaia neganai, Ioane 4:34 ena hereva ia gwauraia, unuseniai Iesu ia gwau: “Egu aniani be inai: Lau ia siaia Diravana ena ura do lau karaia, iena gaukara do lau karaia haorea momokani.” (Ioane 4:34) Claudio ma ia gwau: “Iesu bamona, lau ura Basileia harorolaia gaukarana lau hamatamaia sibona lasi, to lau ura lau haorea.” (Ioane 17:⁠4) Iehova ena Witnes taudia tanobada hegegemadai dekenai, be iena hereva dekenai idia lalo-tamona.​​—⁠Rau 21 ai, maua ladana “ ‘Idia Hesiku Lasi Ela Bona Huahua Idia Havaraia’ Dalana” itaia.

Haroro Bona Hadibaia

14. (a) Ioane Bapatiso bona Iesu ese edena gaukara rua idia karaia? (b) Hari inai negai idia karaia noho Keristani gaukarana be edena bamona oi gwauraia diba?

¹⁴ Evanelia bukadia ese idia gwauraia Basileia harorolaia tauna ginigunana be, Ioane Bapatiso. (Mataio 3:​1, 2; Luka 3:18) Unai ia karaia ena badina badana be “hereva momokani ia gwauraia” bona mai ena abidadama bada ida unai ia karaia bona ena ura be “taunimanima ibounai ese iena hereva do idia kamonai.” (Ioane 1:​6, 7) Momokani, Ioane ia haroro henia taudia haida be Keriso ena hahediba taudia ai idia lao. (Ioane 1:​35-37) Unai dainai, Ioane be haroro tauna bona taunimanima be hahediba taudia ai ia halaoa danu. Iesu danu be haroro tauna bona hadibaia tauna. (Mataio 4:23; 11:⁠1) Unai dainai ita hoa lasi, Iesu ese ia murinai idia raka taudia ia hagania Basileia ena sivarai do idia harorolaia sibona lasi, to unai sivarai idia abia dae taudia idia durua iena hahediba taudia ai idia lao totona. (Mataio 28:​19, 20) Unai dainai iseda gaukara hari inai negai be, haroro gaukara bona hadibaia gaukarana.

15. Aposetolo edia negai bona hari inai negai idia karaia haroro gaukara be edena dala ai idia hegeregere?

¹⁵ Aposetolo edia negai, Paulo ia harorolaia bona ia hadibaia gaudia idia kamonai taudia “haida be Paulo ena hereva idia abia dae, to haida idia ura lasi.” (Kara 28:24) Hari inai nega danu be unai bamona. Madi, Basileia ena uhe momo be ia namo lasi tanona latanai idia moru. To danu, uhe haida be tano namona latanai idia moru, edia ramuna be tano lalonai ia diho, bona idia tubu, Iesu ese ia gwauraia hegeregerena. Momokani, tanobada hegegemadai taunimanima 5,000 bamona be pura ta ta lalonai Keriso ena hahediba taudia korikoridia ai idia lao! Unai hahediba taudia matamatadia ese “hereva idia abia dae,” herevana taunimanima ma momo idia kamonai lasi. Edena heduru dainai Basileia ena sivarai idia abia dae? Nega momo Witnes taudia ese unai taudia edia namo idia tahua karana​—⁠unai be hegeregere idia hadoa matamata uhena dekenai ranu idia henia​—⁠ese idia ia durua bada. (1 Korinto 3:⁠6) Mani haheitalai momo amo rua ita laloa.

Edia Namo Tahua Karana ese Idia Ia Durua Bada

16, 17. Dahaka dainai haroro gaukara lalonai ita davaria taudia edia namo ita tahua be gau badana?

¹⁶ Belgium dekenai ia noho Witnes kekeni matamatana ta ladana, Karolien, ese Basileia ena sivarai ia laloa bada lasi hahine burukana ta ia vadivadi henia. Unai hahine ena imana be bandesi amo idia kumia dainai, Karolien bona ena turana ese idia nanadaia bema heduru idia henia diba, to unai hahine ia ura lasi. Dina rua murinai, unai Witnes kekeni rua be iena ruma dekenai idia giroa lou bona idia nanadaia ena hemami be edena bamona. Karolien ia gwau: “Unai ese ia durua bada. Ia hoa badina ia itaia ai be momokani iena namo ai tahua. Ena ruma lalonai ai ia boiria vareai, bona ia ida Baibel stadi ai hamatamaia.”

¹⁷ United States dekenai ia noho Witnes taihuna ta Sandi danu ese ia haroro henia taudia edia namo ia tahua. Idia vara beibi matamata edia hadibaia hereva be niuspepa lalonai ia itaia bona unai murinai ia ese Lau Egu Bible Sivarai Buka be unai beibi ena tama sina dekenai ia abia lao.c Nega momo unai beibi ena sinana be ruma dekenai ia noho bona ia ura vadivadi taudia dekenai ena beibi ia hahedinaraia dainai, nega momo idia vadivadi taudia ida ia herevahereva. Sandi ia gwau, “Idia dekenai edena bamona duahiduahi karana amo tama sina be edia beibi matamatana ida idia hetura karana ena namo lau hahedinaraia. Gabeai lau ese inai tanobada dekenai natuna naria ena hekwakwanai idauidau lau herevalaia.” Vanegai sibona unai bamona vadivadi ta dainai, sina ta bona ena natudia siks ese Iehova idia hesiai henia matamaia. Haroro gaukara lalonai ma haida edia namo ita tahua karana amo, ita danu ese unai bamona moale do ita davaria.

18. (a) Dahaka dainai “huahua momo” havaraia ena hahegani be ita ibounai ese ita badinaia diba? (b) Ioane ena Evanelia bukana lalonai edena hahegani toi, hahediba taudia totona, be oi ura oi badinaia momokani?

¹⁸ Iseda lalona ia goada badina ita diba huahua momo havaraia haheganina be do ita badinaia diba! Herevana ita be matamata eiava buruka taudia, ita gorere lasi eiava ita gorere, taunimanima idia kamonai eiava idia kamonai lasi teritori dekenai ita haroro, to ita ibounai be huahua momo ita havaraia diba. Edena dala ai? Lauma helaga ena huahua ita havaraia badabada bona mai iseda goada ibounai ida Dirava ena Basileia ena sivarai ita harorolaia karana amo. Danu, ita hekwarahi ‘Iesu ena hereva ita badinaia’ bona ‘ta ta ita lalokau henia.’ Oibe, Ioane ena Evanelia bukana lalonai, hahediba taudia ai idia lao taudia edia hahegani badadia toi ita badinaia neganai, do ita hamomokania ita be Keriso ena “diba tahua taudia momokani.”​—⁠Ioane 8:31; 13:⁠35.

[Footnotes]

Riviu Henanadai

• Edena bamona huahua ita havaraia badabada be gau badana?

• Dahaka dainai ita ibounai ese “huahua momo” ita havaraia diba?

• Ioane ena Evanelia bukana lalonai, hahediba taudia ese do idia badinaia hahegani badadia toi be dahaka dahaka?

[Box/Picture on page 27]

‘IDIA HESIKU LASI ELA BONA HUAHUA IDIA HAVARAIA’ DALANA

DAHAKA ese oi ia durua mai kamonai ida Basileia ena sivarai namona idia abia dae momo lasi teritori dekenai oi haroro noho totona? Unai henanadai dekenai haere namodia haida be inai.

“Ita diba Iesu ese ita ia durua momokani dainai, iseda helaro bona haheauka karana ia hagoadaia, herevana teritori lalonai taunimanima idia kamonai eiava lasi.”​​—⁠Harry, ena mauri lagani be 72; lagani 1946 ai bapatiso ia abia.

“Korinto Iharuana 2:​17 ese hanaihanai lau ia hagoadaia. Ia gwau ita be ‘Keriso ena hesiai taudia dainai, Dirava ena vairana dekenai’ iseda hesiai gaukara ita karaia noho. Haroro gaukara lau karaia neganai, lauegu turadia namodia edia hebamo lau moalelaia.”​​—⁠Claudio, ena mauri lagani be 43; lagani 1974 ai bapatiso ia abia.

“Momokani, haroro gaukara lau hekwarahilaia. To, lau davaria Salamo 18:29 ena hereva idia momokani: ‘Dirava ese goada lau dekenai ia henia dainai edia magu lau hamakohia diba.’ “​​—⁠Gerard, ena mauri lagani be 79; lagani 1955 ai ia bapatiso.

“Bema haroro gaukara lalonai siri tamona sibona lau duahia, lau moale badina Baibel ese ta ena kudouna ia tahua.”​​—⁠Eleanor, ena mauri be lagani 26; lagani 1989 ai bapatiso ia abia.

“Hereva daladia idauidau lau tohoa. Hamatamaia herevadia be momo herea dainai do lau hegeregere lasi idia ibounai be egu mauri lagani oredia lalonai do lau gaukaralaia.”​​—⁠Paul, ena mauri lagani be 79; lagani 1940 ai bapatiso ia abia.

“Taunimanima idia kamonai lasi neganai, lau badu lasi. Lau ura edia turadia bamona idia lau kara henia, idia ida lau herevahereva bona edia lalohadai lau kamonai.”​​—⁠Daniel, ena mauri lagani be 75; lagani 1946 ai bapatiso ia abia.

“Idia bapatiso matamata taudia lau hedavari henidia bona idia ese lau idia hamaoroa, egu haroro gaukarana danu ese idia ia durua Witnes taudia ai idia lao totona. Unai lau diba lasi, gabeai ta ese idia ida Baibel ia stadilaia bona idia ia durua lauma dalanai idia goada. Lau moale badina lau diba iseda haroro gaukara be ita karaia hebou gaukarana.”​​—⁠Joan, ena mauri lagani be 66; lagani 1954 ai bapatiso ia abia.

Dahaka ese oi ia durua oi ‘hesiku lasi ela bona huahua oi havaraia’ totona?​—⁠Luka 8:15.

[Pictures on page 26]

Lauma ena huahua ita hahedinaraia bona Basileia ena sivarai ita harorolaia karana amo, huahua momo ita havaraia

[Picture on page 29]

Iesu be aposetolo taudia dekenai inai hereva, “Huahua momo do umui atoa,” ia gwauraia neganai, ena hereva ena anina be dahaka?