Sivarai Namona Harorolaia Guguru

“Iesu ese ai ia hagania taunimanima dekenai ai haroro.”​​—⁠KARA 10:​42, NW.

 1. Petero be Korenelio ia haroro henia neganai, edena hahegani ia herevalaia?

ITALY ami ofesa ta mai ena ruma bese bona turadia be iena ruma dekenai idia hebou bona Dirava ese kara idauna ta ia karaia bona unai be mai anina bada taunimanima ibounai dekenai. Unai Dirava gari henia tauna be Korenelio. Aposetolo Petero ese idia hebou taudia ia hamaoroa aposetolo taudia be Iesu ese ia hagania ‘taunimanima dekenai do idia haroro bona ia do idia gwauraia hedinarai.’ Petero ena haroro gaukara be anina namodia ia havaraia. Hegeregere, kopina utua lasi Idau Bese taudia be Dirava ena lauma helaga idia abia, idia bapatiso bona Iesu ida guba dekenai idia lohia hebou. Petero ese sivarai namona ia harorolaia guguru dainai unai hahenamo idia abia!​​—⁠Kara 10:​22, 34-​48.

 2. Edena dala ai ita diba Iesu ese haroro gaukara be aposetolo taudia 12 sibona dekenai ia henia lasi?

² Unai be lagani 36 C.E. ai ia vara. Lagani rua gunanai, Keristani tomadiho dalana ia dagedage henia tauna Saulo dekenai kara ta ia vara bona ena mauri ia haidaua momokani. Ia be Damaseko dekenai ia lao noho lalonai, Iesu be ia dekenai ia hedinarai bona ia gwau: “Oi toreisi, hanua lalonai oi raka vareai, unuseni tau ta ese oi do ia hamaoroa dahaka do oi karaia.” Iesu ese Anania ia hamaoroa Saulo be “idau bese taudia bona king bona Israela taudia edia vairanai lauegu ladana do ia gwauraia.” (Kara 9:​3-6, 13-​20 duahia.) Anania ese Saulo ia hamaoroa: “Iseda sene edia Dirava ese oi ia abia hidi vadaeni, . . . Badina be, ia dainai, oi itaia bona oi kamonai gaudia do oi gwauraia hedinarai, taunimanima ibounai edia vairanai.” (Kara 22:​12-​16) Saulo, gabeai ladana idia haidaua Paulo, be unai haroro gaukara ia laloa bada, a?

Sivarai Namona Ia Gwauraia Hedinarai Guguru!

 3. (a) Hari dahaka do ita herevalaia? (b) Efeso elda taudia be Paulo ena hereva idia abia neganai, dahaka idia karaia, bona edena dala ai unai be haheitalai namona?

³ Paulo ena mauri ia haidaua bena ia karaia gaudia ibounai be mai moale ida ita stadilaia diba, to hari ita be lagani 56 C.E. ai, Kara karoa 20 lalonai Paulo ese ia gwauraia herevana ta do ita itaia. Paulo ena misinari loaloa ihatoina dokonai ia ese unai hereva ia gwauraia. Ia be Aegean Davara badinai ia noho taoni Mileto dekenai ia ginidae bona Efeso kongrigeisen ena elda taudia dekenai hereva ia siaia. Mileto hanuana amo Efeso ena daudau be kilomita 50 bamona, bona taunimanima idia raka lao neganai ia be daudau. Efeso elda taudia be Paulo ena hereva idia abia neganai, idia moale bada. (Aonega Herevadia 10:28 hahegeregerea.) To, namona be dala idia hegaegaelaia Mileto dekenai do idia lao. Idia haida be edia moni gaukara amo laga-ani idia abia o edia sitoa idia koua, a? Hari inai negai, Keristani taudia momo be unai bamona idia karaia badina idia ura lasi lagani ta ta ai idia karaia distrik hebouhebou idia reaia.

 4. Paulo be Efeso dekenai lagani haida ia noho neganai, dahaka ia karaia?

⁴ Paulo be Mileto dekenai dina toi eiava foa lalonai elda taudia ia naria neganai, dahaka ia karaia? Bema oi be Paulo, dahaka oi karaia? (Kara 17:​16, 17 hahegeregerea.) Paulo ese Efeso elda taudia dekenai ia gwauraia herevana ese unai henanadai ia haerelaia. Ia ese idia hanaia lagani lalonai ia karaia haroro gaukara ia kikilaia, bona guna Efeso dekenai ia lao negana ia herevalaia danu. (Kara 20:​18-​21 duahia.) Ia diba ibounai ese ena hereva do idia hamomokania dainai, ia gwau: “Lauegu kara, guna lau ginidae Asia dekenai ia mai bona hari, umui dekenai edena bamona lau noho, be umui diba . . . Iuda taudia bona Helene taudia danu dekenai lau sisiba henia goada.” Oibe, ia ura momokani Iesu ese ia henia hahegani do ia hagugurua. Efeso ai edena bamona unai ia karaia? Dala ta be Iuda taudia momo idia noho gabudia dekenai ia lao bona ia haroro. Luka ena toretore lalonai ia gwau, Paulo be lagani 52-​55 C.E. ai Efeso dekenai ia noho neganai, sinagoga “Dirava ena Basileia hereva ia harorolaia bona ia hadibaia goada.” Iuda taudia “haida be lalona auka dainai, idia kamonai henia lasi” neganai, Paulo be siti ena gabu ta dekenai ia lao bona taunimanima ma haida dekenai ia haroro. Unai amo ia ese Efeso dekenai Iuda bona Helene taudia ia haroro henidia.​​—⁠Kara 19:​1, 8, 9.

5, 6. Dahaka dainai ita diba momokani Paulo be ruma-ta-ruma-ta haroro gaukara amo Dirava idia diba lasi taudia ia haroro henidia?

⁵ Efeso dekenai guna Paulo ese ia haroro henia taudia haida be Keristani taudia ai idia lao bona elda maduna idia abia. Hari, Mileto dekenai Paulo be unai taudia haida ia hereva henia. Paulo ese ena gaukara dalana ia gwauraia lou idia dekenai: “Umui diba vadaeni umui dekenai lau haroro bona hadibaia neganai, emui ruma dekenai, bona taunimanima edia vairana dekenai durua hereva ta lau hunia lasi.” Hari inai negai, haida idia gwau unai hereva amo Paulo be mamoe vadivadi gaukarana ia herevalaia. To, unai be momokani lasi. Inai hereva ‘haroro bona hadibaia, emui ruma bona taunimanima edia vairana dekenai’ ese ia hahedinaraia, ia ese Dirava idia diba lasi taudia ia haroro henia. Ena hereva ma haida amo unai ia hedinarai goevagoeva, ia gwau: “Iuda taudia bona Helene taudia danu dekenai lau sisiba henia goada edia lalona do idia giroa Dirava dekenai, bona Lohiabada Iesu do idia abidadama henia.” Oibe, Paulo be Dirava idia diba lasi taudia ia haroro henidia, namona be idia helalo-kerehai bona Iesu idia abidadama henia.​​—⁠Kara 20:​20, 21.

⁶ Diba bada tauna ta be Kara 20:20 ia stadilaia murinai ia gwau: “Paulo be Efeso dekenai lagani toi ia noho. Ruma-ta-ruma-ta ai ia haroro, o taunimanima ibounai ia haroro henidia (Kara karoa 20 siri 26). Inai Baibel siri ese ruma-ta-ruma-ta haroro gaukarana bona taunimanima vairanai haroro gaukarana ia hamomokania.” Unai diba bada tauna ena hereva hegeregerena, herevana Paulo be ruma-ta-ruma-ta ibounai ia vadivadi henia eiava lasi, to Paulo ia ura Efeso elda taudia ese ia karaia haroro gaukarana bona ena namo do idia laloaboio lasi. Luka ia gwau: “Asia tano dekenai idia noho taudia, Iuda taudia bona Helene taudia, ibounai ese Lohiabada ena hereva idia kamonai.” (Kara 19:10) To, edena dala ai Asia dekenai idia noho taudia “ibounai” be sivarai namona idia kamonai, bona unai ena anina be dahaka iseda haroro gaukara dekenai?

 7. Edena dala ai Paulo ese ia haroro henia lasi taudia be sivarai namona idia kamonai?

⁷ Paulo be taunimanima momo idia noho gabudia bona ruma-ta-ruma-ta ai ia haroro dainai, momo ese ia harorolaia sivaraina idia kamonai. Oi laloa Paulo ena hereva idia kamonai taudia ibounai be Efeso sibona dekenai idia noho, a? Reana, idia haida be bisinesi karadia dainai ma gabu ta dekenai idia lao. Eiava, edia varavara idia vadivadi henidia. Eiava siti maurina idia hesikulaia dainai edia hanua dekenai idia giroa lou. Hari inai negai taunimanima momo be unai badina idauidau dainai edia noho gabudia idia rakatania. Bona danu, Paulo ena nega ai, gabu idauidau amo taunimanima be Efeso dekenai idia lao bisinesi karadia idia karaia totona. Unuseniai, reana Paulo idia hedavari henia o iena haroro herevana idia kamonai. Edia hanua dekenai idia giroa lou neganai, dahaka idia karaia? Hereva momokani idia abia dae taudia be ma haida dekenai idia haroro. Haida be hereva momokani idia abia dae lasi, to Efeso dekenai idia kamonai gaudia be ma haida dekenai idia kikilaia. Unai dala amo, varavara, dekena taudia eiava bisinesi turadia be sivarai namona idia kamonai bona reana idia haida ese idia abia dae. (Mareko 5:​14 hahegeregerea.) Unai hereva ena anina be dahaka sivarai namona oi harorolaia guguru karana dekenai?

 8. Asia tanodia ai taunimanima be edena dala ai hereva momokani idia kamonai?

⁸ Paulo be guna Efeso dekenai ia karaia haroro gaukara ia herevalaia neganai, ia gwau: “Iduara badana ia kehoa vadaeni, bona hari be gaukara badana bona mai anina ena nega namona.” (1 Kor. 16:​8, 9) Unai iduara be dahaka bona Paulo dekenai edena bamona ia kehoa? Paulo be Efeso dekenai ia haroro dainai sivarai namona be gabu ibounai dekenai ia lao. Mani gunika hanua toi Kolose, Laodikea, bona Hieropoli ita laloa. Ena be Paulo be unai gabu dekenai ia lao lasi, to unai gabu dekenai idia noho taudia be sivarai namona idia kamonai. Epafra be unai gabu tauna. (Kol. 2:1; 4:​12, 13) Reana, Epafra be Efeso dekenai Paulo ena haroro herevana ia kamonai bena Keristani tauna ai ia lao, a? Baibel ese unai ia herevalaia lasi. To, Epafra be Paulo ena gwaukau tauna bamona ia lao bona ena hanua dekenai hereva momokani ia harorolaia. (Kol. 1:⁠7) Danu, Paulo be Efeso dekenai ia haroro laganidia lalonai, Piladelepia, Sadi, bona Tuatira hanua taudia be hereva momokani idia kamonai.

 9. (a) Paulo ena ura badana be dahaka? (b) Lagani 2009 ena siri badana be dahaka?

⁹ Unai badina namodia dainai, Efeso elda taudia be Paulo ena hereva idia abia dae, ia gwau: “Lauegu mauri lau laloa lasi, badina be lau ura lauegu heau lau haorea, bona egu gaukara, Lohiabada Iesu ese lau dekenai ia henia gaukara do lau haorea. Inai gaukara be, Dirava ena hariharibada Sivarai Namona do lau gwauraia hedinarai.” Unai dainai lagani 2009 ena siri badana ese ita ia hagoadaia: Sivarai Namona Harorolaia Gaukarana Hagugurua.​​—⁠Kara 20:⁠24.

Hari Inai Negai Sivarai Namona Ita Harorolaia Guguru

10. Edena dala ai ita diba ita danu be sivarai namona do ita harorolaia guguru be namo?

¹⁰ Iesu ese aposetolo taudia sibona dekenai haroro gaukara ena hahegani ia henia lasi, to ma haida dekenai ia henia danu. Iesu ia toreisi lou murinai, Galilea dekenai idia hebou hahediba taudia 500 bamona ia hereva henidia bona ia haganidia: “Do umui lao, bese ibounai be diba tahua taudia do umui halaoa, bona Tamana, Natuna, bona Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia.” Unai hahegani be hari idia noho Keristani taudia ibounai dekenai ia henia danu, badina Iesu ia gwau: “Lau be hanaihanai umui danu ita noho ela bona tanobada dokona.”​​—⁠Mat. 28:​19, 20.

11. Taunimanima idia diba Iehova ena Witnes taudia be edena mai anina bada gaukarana idia karaia?

¹¹ Idia gaukara goadagoada Keristani taudia be unai hahegani idia badinaia noho, sivarai namona idia gwauraia hedinarai guguru totona. Unai gaukara karaia dalana badana be Paulo ese Efeso elda taudia dekenai ia herevalaia, unai be ruma-ta-ruma-ta haroro gaukara. Lagani 2007 ai, David G. Stewart, Jr., ena buka lalonai misinari gaukara idia karaia namonamo oreadia ia herevalaia neganai, ia gwau: “Iehova ena Witnes taudia ibounai ese idia dibaia hereva momokanidia be ma haida dekenai idia harorolaia dalana be mai ena namo bada, [idia be dubu lalonai sibona idia haroro lasi]. Iehova ena Witnes taudia momo be ma haida dekenai Baibel ena hereva momokanidia harorolaia gaukarana idia moalelaia.” Unai bamona idia karaia dainai dahaka ia vara? “Lagani 1999 ai, Eastern Europe tanodia rua ai tahua gaukara lau karaia neganai, lau davaria taunimanima 2 pesen ia lao 4 pesen be ‘Mormon’ misinari taudia ese idia vadivadi henidia. To, taunimanima 70 pesen mai kahana idia gwau idia ta ta be Iehova ena Witnes taudia ese nega momo idia haroro henidia.”

12. (a) Dahaka dainai iseda teritori dekenai idia noho taudia be “nega momo” ita haroro henidia? (b) Tau ta be guna ia kamonai lasi, to gabeai sivarai namona ia abia dae ena ekspiriens ta mani oi gwauraia.

¹² Reana, oiemu teritori ai idia noho taudia danu be unai bamona. Reana oi be edia ruma dekenai nega momo oi haroro henidia vadaeni. Emu ruma-ta-ruma-ta haroro gaukarana ai, oi be “idia ta ta”​—⁠tatau, hahine bona matamata taudia oi hereva henidia. Ena be “nega momo” oi haroro henidia to idia haida be idia kamonai lasi. Haida be nega kwadogina lalonai Baibel siri ta oi duahia eiava Baibel ena lalohadai oi kikilaia neganai idia kamonai. To, ma haida be emu haroro herevana idia kamonai namonamo, bona sivarai namona idia abia dae. Sivarai namona ita harorolaia neganai, unai bamona taudia ita davaria. Ita diba vadaeni, taunimanima momo be “nega momo” ita haroro henidia bona idia kamonai lasi, to gabeai edia lalona idia haidaua. Reana edia mauri lalonai, eiava edia lalokau tauna ta dekenai gau ta ia vara, bena unai ese edia kudouna ia kehoa hereva momokani idia abia dae totona. Hari idia be iseda tadikaka bona taihu. Unai dainai, ena be taunimanima momo idia kamonai lasi, to oi hesiku lasi. Ita diba, taunimanima ibounai be Iehova ena orea lalonai do idia vareai lasi. To, Dirava ia ura ita be mai goada ida iseda haroro gaukara do ita karaia guguru.

Ita Diba Lasi Dahaka Do Ia Vara

13. Ena be ita diba lasi, to edena dala ai iseda haroro gaukara amo ita hereva henia lasi taudia be hereva momokani idia kamonai?

¹³ Haroro gaukara lalonai Paulo ese ia durua bena Keristani taudia ai idia lao taudia sibona ese namo idia davaria lasi. To, ma haida danu be namo idia davaria. Iseda haroro gaukarana be unai bamona danu. Ita ura hanaihanai ruma-ta-ruma-ta haroro gaukarana do ita karaia, bona taunimanima momo do ita hereva henia. Sivarai namona be iseda dekena taudia, gaukara taudia, sikuli taudia bona varavara dekenai do ita herevalaia. Iseda gaukara ese ia havaraia anina namona ibounai ita diba, a? Ita haroro henia taudia haida be hereva momokani do idia abia dae haraga. To, taunimanima haida be nega daudau lalonai hereva momokani idia kamonai sibona, to gabeai hereva momokani ena uhe be edia kudouna dekenai ia tubu bamona bona idia ura Baibel stadi idia abia dae. To, bema unai ia vara lasi, ita haroro henia taudia ese ita harorolaia sivaraina, Baibel ena hereva momokani bona iseda kara be ma haida dekenai idia kikilaia. Oibe, ena be idia diba lasi, to idia ese hereva momokani ena uhe be tano namona ma ta dekenai idia negea bamona.

14, 15. Tadikaka ta ena haroro gaukara amo dahaka anina namona ia vara?

¹⁴ Mani Ryan bona ena adavana Mandi, Florida, U.S.A. dekenai idia noho, edia ekspiriens ita laloa. Ryan be ena gaukara tauna ta ia haroro henia. Unai tauna be Hindu tomadiho tauna, to ia be Ryan ena dabua toana bona herevahereva dalana ia ura henia. Edia herevahereva lalonai, Ryan ese toreisi lou bona mase taudia dekenai dahaka ia vara hahediba herevadia ia kikilaia. January hanuaboina ta ai, unai tauna ese ena adavana Jodi ia nanadaia bema ia be Iehova ena Witnes taudia ia diba. Ia be Katolik tomadiho hahinena bona ia gwau ia diba gau tamona be, Witnes taudia be “ruma-ta-ruma-ta haroro gaukara” idia karaia taudia. Vadaeni, Jodi ese Internet dekenai “Jehovah’s Witnesses” ia torea bona iseda orea ena Web sait ia davaria. Hua haida lalonai Jodi be unai Web sait dekenai idia hedinarai Baibel hereva idauidau bona Baibel siri ia duahia.

¹⁵ Daudau lasi murinai, Jodi bona Mandi idia hedavari badina idia ruaosi be nesi gaukara idia karaia. Mandi be mai moale ida Jodi ena henanadai ia haerelaidia. Wiki haida lalonai Jodi bona Mandi be Baibel ena hereva idauidau idia kikilaia. Jodi ese Baibel stadi ia abia dae. Daudau lasi murinai, Kingdom Hall dekenai ia mai. October lalonai Jodi be bapatiso lasi pablisa ai ia lao, bena February lalonai ia bapatiso. Jodi ia gwau: “Hari lau be hereva momokani lau diba dainai, egu mauri lau moalelaia bada.”

16. Florida dekenai ia noho tadikaka ena ekspiriens ese edena dala ai ita ia durua sivarai namona ita harorolaia guguru totona?

¹⁶ Ryan ia diba lasi sivarai namona be tau ta dekenai ia harorolaia dainai, ma ta be Iehova ena orea lalonai ia vareai. Ita gwau diba inai ekspiriens lalonai Ryan ia diba ena haroro gaukara ese anina namona ia havaraia. Nega haida oi be ruma-ta-ruma-ta ai, moni gaukara gabuna, sikuli gabuna eiava ma gabu ta ai ta oi haroro henia neganai, ena be oi diba lasi, to sivarai namona be ma haida ese idia kamonai diba. Bona Paulo ena haroro gaukara dainai, “Asia” dekenai anina namona ia havaraia be ia diba lasi hegeregerena, reana oi danu be sivarai namona oi harorolaia guguru dainai do idia vara anina namodia edia sivarai do oi diba lasi. (Kara 23:11; 28:23 duahia.) To, gau badana be emu haroro gaukara oi karaia noho!

17. Lagani 2009 ai dahaka do oi karaia?

¹⁷ Lagani 2009 lalonai, namona be ita ibounai ese ruma-ta-ruma-ta ai bona dala ma haida ai do ita haroro ena hahegani ita badinaia. Unai amo, ita be Paulo bamona ita gwau diba: “Lauegu mauri lau laloa lasi, badina be lau ura lauegu heau lau haorea, bona egu gaukara, Lohiabada Iesu ese lau dekenai ia henia gaukara do lau haorea. Inai gaukara be, Dirava ena hariharibada Sivarai Namona do lau gwauraia hedinarai.”

Edena Bamona Do Oi Haere?

• Aposetolo Petero, Paulo bona ma haida be edena dala ai sivarai namona idia harorolaia guguru?

• Ena be ita diba lasi, to edena dala ai iseda haroro gaukara ese anina namona ia havaraia diba?

• Lagani 2009 ena siri badana be dahaka, bona dahaka dainai oi laloa ia be siri namona?

[Blurb on page 19]

Lagani 2009 ena siri badana be: Sivarai Namona harorolaia gaukarana hagugurua. ​—⁠Kara 20:⁠24.

[Picture on page 17]

Efeso elda taudia idia diba Paulo be ruma-ta-ruma-ta haroro gaukara ia karaia

[Picture on page 18]

Sivarai namona oi harorolaia guguru dainai, daidia ese hereva momokani do idia kamonai diba?