Mareko​​—⁠‘Hesiai Gaukara Lalonai Durua’ Ia Henia Tauna

ANTIOKA kongrigeisen be mai ena hekwakwanai haida, to aposetolo Paulo bona Banaba huanai ia vara hepapahuahu be ma idau. Idia ruaosi be edia misinari loaloa ta totona palani idia karaia, to idia ura abia hidi daika be idia danu do ia lao neganai, “idia ruaosi idia hepapahuahu.” (Kara 15:39) Idia ruaosi idia parara bona gabu idauidau dekenai idia lao. Idia be misinari tauna ihatoina Mareko dainai, idia hepapahuahu.

Mareko be daika? Dahaka dainai Paulo bona Banaba be ia dainai idia hepapahuahu? Dahaka dainai idia ruaosi edia lalohadai be idauidau? Edia lalohadai be gabeai idia haidaua, a? Bona Mareko ena sivarai amo dahaka oi dibaia diba?

Ena Hanua, Ierusalema Ai

Mareko ena ruma bese be taga taudia, bona ia be Ierusalema dekenai ia tubu daekau. Keristani kongrigeisen ginigunana ena sivarai ita duahia neganai, unai be nega ginigunana Mareko ita dibaia. Lagani 44 C.E. bamona ai, Iehova ena aneru ta ese hoa dalanai Petero be Heroda Agripa I ena dibura ruma amo ia ruhaia neganai, Petero be “ia lao Maria ena ruma dekenai. Inai Maria be Ioane Mareko ena sinana. Unuseni taunimanima momo idia hebou, idia guriguri noho.”​​—⁠Kara 12:​1-​12.a

Toana be Ierusalema kongrigeisen be Mareko ena sinana ena ruma idia gaukaralaia edia hebou idia karaia totona. Unuseniai “taunimanima momo idia hebou” ese ia hahedinaraia Mareko ena sinana ena ruma be bada. Maria ena hesiai kekenina ena ladana be Roda, bona Petero be iduara dekenai ia pidipidi neganai, Roda be iduara dekenai ia lao ia kehoa totona. Unai ibounai ese idia hahedinaraia Maria be taga bada hahinena ta. Danu, Baibel ese ia hahedinaraia unai ruma be Maria ena tau ena lasi, to Maria ena, unai dainai reana Maria be vabu bona Mareko be do mero matamata.​​—⁠Kara 12:⁠13.

Keristani taudia be Mareko ena sinana ena ruma ai guriguri totona idia hebou neganai, Mareko danu ia noho. Reana ia be Iesu ena hahediba taudia bona Iesu ena haroro gaukara ai idia vara gaudia idia itaia taudia haida ia diba namonamo. Danu, reana Mareko be rami o dabua ta sibona ia kwatua uhau merona. Iesu idia dogoatao neganai, ia be Iesu murinai ia lao, to tuari taudia idia ura Mareko idia dogoatao neganai, ena rami ia rakatania bona ia heau.​​—⁠Mar. 14:​51, 52.

Maduna Idauidau Kongrigeisen Lalonai

Mareko be lo Keristani taudia ia bamoa dainai edia kara namodia ese ia idia durua. Ia be lo Keristani tauna ai ia lao bona elda taudia ese ia idia ura henia. Lagani 46 C.E. bamona ai, Antioka tadikaka ese Paulo bona Banaba dekenai moni idia henia bona idia siaidia lao Ierusalema dekenai idia hitolo tadikaka idia durua totona. Ierusalema ai idia ese Mareko idia davaria. Paulo bona Banaba be Antioka dekenai idia giroa lou neganai, Mareko danu idia abia lao.​​—⁠Kara 11:​27-​30; 12:⁠25.

Bema inai sivarai ita duahia namonamo lasi do ita laloa unai taudia toi be Keristani tadikaka sibona, bona Paulo bona Banaba ese Mareko idia abia hidi badina ia be gaukara namonamo tadikaka ta. To, Paulo ena revareva ta ese ia hahedinaraia Mareko be Banaba ena kasin. (Kol. 4:​10) Unai ese ita do ia durua Mareko ena mauri lalonai idia vara gaudia haida ita lalopararalaia totona.

Lagani ta bamona ia hanaia vadaeni, bona lauma helaga ese Paulo bona Banaba ia hadibaia misinari loaloa ma ta idia karaia totona. Idia be Antioka idia rakatania bona Kupro dekenai idia lao. Ioane Mareko danu be idia ida ia lao bona “idia ruaosi ia durua.” (Kara 13:​2-5) Reana, Mareko be ruma gaukara bona gaukara ma haida ia karaia, unai amo Paulo bona Banaba be haroro gaukara bona kongrigeisen durua gaukara idauidau idia karaia diba.

Paulo, Banaba bona Mareko be Kupro ena gabu ibounai dekenai idia haroro, unai murinai Asia Minor dekenai idia lao. Unuseniai, Ioane Mareko ese ia karaia abia hidi ta dainai Paulo ia moale lasi. Sivarai ese idia hahedinaraia, idia be Perega ai idia ginidae neganai, “Ioane Mareko ese idia ia rakatania, ia giroa lou Ierusalema dekenai.” (Kara 13:13) Unai bamona ia karaia ena badina be Baibel ese ia herevalaia lasi.

Lagani haida murinai, Paulo, Banaba, bona Mareko be Antioka dekenai idia giroa lou. Paulo bona Banaba be palani idia karaia misinari loaloa ginigunana ai idia davaria kamonai taudia do idia lou henia bona hagoadaia totona. Banaba ia ura ena kasin Mareko danu be idia ida do ia lao, to Paulo ia ura lasi badina Mareko be guna idia ia rakatania. Unai dainai, matamanai ita duahia bamona, Paulo bona Banaba huanai hepapahuahu ia vara. Banaba be Mareko ia abia bona iena gabu Kupro dekenai idia lao, to Paulo be Suria dekenai ia lao. (Kara 15:​36-​41) Ia hedinarai goevagoeva, guna Mareko ese ia karaia abia hidi dekenai, Paulo bona Banaba edia lalohadai be idauidau.

Idia Gaukara Hebou Lou

Mareko be ia vara gauna dainai ia lalohisihisi bada, to ena hesiai gaukara ia rakatania lasi. Unai hepapahuahu ia vara bona lagani 11 o 12 bamona murinai, Keristani ginigunadia edia sivarai lalonai Mareko ia hedinarai lou. To daika ida? Paulo ida​​—⁠reana ita hoa badina ita laloa ia be Paulo ida do ia gaukara hebou lou lasi!

Lagani 60-​61 C.E. ai, Paulo be Roma ai dibura ruma dekenai ia noho neganai, revareva momo ia torea bona idia be hari Baibel lalonai idia noho. Kolose taudia dekenai ia torea revareva dekenai, Paulo ia gwau: “Arisitako, lau danu dibura ruma lalonai ai noho, ese iena hanamoa hereva ia siaia inai. Banaba ena tadina Mareko danu ese umui ia hanamoa inai. Bema Mareko be umui dekenai ia lao neganai, do umui abia dae. Ia dainai hereva lau siaia guna vadaeni. . . . Iuda taudia edia huanai, inai tau toiosi sibona ese lau danu ai gaukara Dirava ena Basileia totona. Idia ese lau idia durua bada herea.”​​—⁠Kol. 4:​10, 11.

Unai be hoa gauna! Matamanai Paulo be Mareko dekenai ia moale lasi, to gabeai Mareko be Paulo ia durua tauna namona ai ia lao. Paulo ese unai revareva lalonai Kolose tadikaka ia hadibaia Mareko be idia do ia vadivadi henia. Bema Mareko be Kolose tadikaka ia vadivadi henia, vadaeni toana be ia be Paulo ena gwaukau tauna.

Lagani haida gunanai Paulo be Mareko ese ia karaia kerere maragina ta dainai ia gwau henia, a? Mareko be ia abia matahakani dainai, ena kara ia hanamoa, a? Reana unai bamona ia vara. Herevana dahaka ia vara, to idia lalotamona lou karana ese ia hahedinaraia Paulo bona Mareko be lo taudia. Idia ese guna idia vara gaudia idia laloaboio bona idia gaukara hebou lou. Ena Keristani tadikaka ta ida ia lalotamona lasi tauna dekenai unai be haheitalai namona!

Mareko​​—⁠Loaloa Tauna

Mareko ena loaloa sivaraidia oi duahia neganai, do oi itaia ia be gabu momo dekenai ia lao. Ia be Ierusalema amo Antioka dekenai ia lao, bena unuseni amo Kupro bona Perega dekenai ia lao. Unai murinai Roma dekenai ia lao. Unuseni amo Paulo ma ia ura Mareko be Kolose dekenai do ia siaia lao. Bona gabu ma haida dekenai ia lao danu!

Aposetolo Petero ena revareva ginigunana be lagani 62 ia lao 64 C.E. bamona ai ia torea. Ia gwau: “Babulonia ai ia noho hahine . . . bona egu natuna Mareko ese umui dekenai hanamoa hereva idia siaia.” (1 Pet. 5:​13, NW ) Mareko be Babulonia dekenai ia lao aposetolo Petero ia durua totona. Petero be guna Mareko ena sinana ena ruma ai Keristani heboudia ia hakaua.

Lagani 65 C.E. bamona ai, Paulo be nega iharuana Roma ai dibura ruma dekenai idia atoa neganai, Timoteo dekenai revareva ta ia torea, Efeso amo do ia mai totona. Paulo ia gwau: “Mareko do oi abia, bona umui ruaosi lau dekenai do umui mai.” (2 Tim. 4:​11) Unai nega ai Mareko be Efeso ai ia noho. Bona ita gwau diba Mareko be mai moale ida Timoteo ida Roma dekenai ia lao, Paulo ia hereva bamona. Unai negadia ai gabu idauidau dekenai loaloa be mai ena hekwarahi, to Mareko be mai ena ura ida ena loaloa gaukara ia karaia.

Hahenamo Badana Ma Ta

Mareko ese ia abia hahenamo badana ta be, ia be Iehova ese ena lauma amo ia hasiahua dainai, Evanelia bukana ta ia torea. Ena be Evanelia bukana iharuana ese ena torea tauna ia hahedinaraia lasi, to Baibel torea gaukarana idia stadilaia taudia gunadia haida idia gwau Mareko ese unai buka ia torea bona Petero amo ena sivarai ia abia. Oibe, Petero ese ia itaia gaudia iboudiai be Mareko ese ia torea.

Mareko ena Evanelia bukana idia stadilaia taudia idia gwau ia be Idau Bese taudia totona ia torea; to ia herevalaia gaudia momo ese Iuda taudia ia durua danu. (Mar. 7:3; 14:12; 15:42) Mareko ese Aramia gado herevadia ia hahanaia, unai amo Iuda lasi taudia ese idia lalopararalaia diba. (Mar. 3:​17; 5:​41; 7:​11, 34; 15:​22, 34) Ia be Latin gado herevadia momo ia gaukaralaia, bona danu Latin gado herevadia ia gaukaralaia Greek herevadia edia anina ia gwauraia hedinarai totona. Unai ibounai ese idia hamomokania Mareko ese ena Evanelia bukana be Roma ai ia torea.

“Hesiai Gaukara Lalonai Lau Do Ia Durua”

Roma ai Mareko be ena Evanelia bukana ia torea sibona lasi. Paulo ese Timoteo ia hamaoroa herevana oi laloatao, a? Ia gwau: “Mareko danu oi hakaua mai.” Dahaka dainai? “Badina hesiai gaukara lalonai lau do ia durua.”​​—⁠2 Tim. 4:​11, NW.

Paulo ese Timoteo ena revareva lalonai Mareko ia herevalaia karana be ita dekenai gau ta ia hadibaia. Mareko ena sivarai ibounai ita duahia neganai idia gwau lasi ia be aposetolo tauna, gunalaia tauna, o peroveta tauna ta. Ia be hesiai tauna ta, anina be ia be ma haida ia durua bona edia hesiai gaukara ia karaia. Bona Paulo be kahirakahira do ia mase negana ai, Mareko ese ia durua bada.

Mareko ena sivarai ibounai ita laloa namonamo neganai, ita davaria Mareko be mai ena ura bada ida gabu idauidau ai sivarai namona ia harorolaia, bona mai moale ida ma haida ia hesiai henia. Oibe, Mareko be hahenamo momo ia abia badina ia hesiku lasi!

Mareko bamona, hari inai negai ita Iehova ena hesiai taudia danu be mai eda ura ida Basileia sivarai namona ita harorolaia. Mareko ia karaia bamona, ita haida be gabu ma haida o tano daudau dekenai ita lao, sivarai namona ita harorolaia totona. Momokani, ita momo be unai bamona abia hidi ita karaia diba lasi, to ita be mai anina bada dalana ma ta ai Mareko ita tohotohoa diba. Mareko be ena lalona ia hadaia bona ia lao ena Keristani tadikaka ia hagoadaia. Unai hegeregerena, namona be ita danu mai iseda ura ida dala idauidau ai iseda Keristani tadikaka ita durua, Dirava idia hesiai henia noho totona. Unai bamona ita karaia neganai, ita diba momokani ita ese Iehova amo hahenamo momo do ita davaria.​​—⁠Aon. 3:​27; 10:22; Gal. 6:⁠2.

[Footnote]

[Map/Picture on page 8,9]

(For fully formatted text, see publication)

Mareko ese Ia Lao Henia Siti Haida

Roma

Efeso

Kolose

Perega

Antioka (Suria ena siti)

Kupro

MEDITEREINIEN DAVARANA

Ierusalema

Babulonia