Moale Davaria Dalana

ITA ibounai ita ura ita moale, ani?— To taunimanima momo idia moale lasi. Ena badina oi diba, a?— Badina moale davaria dalana idia dibaia lasi. Idia laloa gau momo abia karana ese moale ia havaraia. To unai gaudia idia abia neganai, edia moale ia noho daudau lasi.

Mai anina bada hunia gauna be inai. Hadibaia Tauna Badana ia gwau: “Henia kara ena moale be bada, abia kara ena moale be maragi.” (Kara 20:35) Unai dainai, moale davaria dalana be dahaka?— Oibe, anina be ma haida dekenai gaudia ita henia bona idia ita durudia. Unai oi diba, a?—

Mani inai ita laloa. Iesu ia gwau harihari gauna ia abia tauna be do ia moale lasi, a?— Lasi, unai bamona ia hereva lasi. Oi ura harihari gaudia oi abia, ani?— Unai be taunimanima ibounai edia ura danu. Ma haida amo gau namodia ita abia neganai, ita moale.

To Iesu ia gwau, henia karana ese moale bada ia havaraia. Oi laloa daika ese taunimanima dekenai gau momo ia henia?— Oibe, Iehova Dirava.

Baibel ia gwau Dirava ese “mauri bona laga bona gau ibounai ia henia noho taunimanima dekenai.” Ia ese ita dekenai guba amo medu bona dina ena siahu ia henia, unai amo tubutubu gaudia idia tubu bona aniani ita abia. (Kara 14:17; 17:25) Unai dainai Baibel ese Dirava ia gwauraia “moale Diravana”! (1 Timoteo 1:​11, NW) Dirava ia hamoalea karana ta be ia ese taunimanima dekenai henia karana ia hahedinaraia. Bona ma haida dekenai gau ta ita henia neganai, unai ese ita ia hamoalea danu.

Taunimanima ma haida dekenai dahaka ita henia diba? Oiemu haere be dahaka?— Nega haida harihari gaudia be mai davana. Bema sitoa amo unai harihari gauna oi abia, moni do oi negea. Unai dainai bema oi ura unai bamona harihari gauna oi henia, reana moni do oi haboua ela bona oi hegeregere unai gauna oi hoia totona.

To harihari gaudia ibounai be sitoa amo ita abia lasi. Hegeregere, siahu dinana ai, ranu keruma ena mamina be namo herea. Unai dainai ia ranu mase tauna dekenai unai harihari gauna oi henia neganai, henia karana amo ia mai moalena oi mamia diba.

Reana dina ta ai oi bona emu sinana ese bisikesi umui gabua diba. Unai ese moale ia havaraia diba. To emu moale habadaia totona dahaka do oi karaia diba unai bisikesi haida dekenai, ibounai do oi ania ore, a?— Oibe, reana emu turana ta dekenai harihari gauna bamona oi henia diba. Oi ura nega ta unai bamona oi karaia, a?—

Hadibaia Tauna Badana bona ena aposetolo taudia ibounai be henia karana amo ia mai moalena idia diba. Taunimanima ma haida dekenai idia henia gauna oi diba, a?— Unai gauna ese tanobada dekenai idia noho gaudia ibounai ia hereaia! Dirava ena hereva momokani idia diba, bona mai moale ida unai sivarai namona be ma haida dekenai idia harorolaia. Taunimanima amo moni idia abia totona unai gaukara idia karaia lasi.

Dina ta aposetolo Paulo bona ena turana namona Luka ese hahine ta idia davaria bona ia danu ia ura henia karana amo moale ia abia. Unai hahine be sinavai ta badinai idia hedavari henia. Paulo bona Luka be unuseni idia lao badina idia kamonai unai gabu be guriguri gabuna. Bona momokani, idia ginidae neganai, idia davaria hahine haida idia guriguri noho.

Paulo ese unai hahine dekenai Iehova Dirava bona ena Basileia ena sivarai momokani ia hadibaia matamaia. Idia ta ena ladana be Lidia, bona ia kamonai namonamo. Gabeai, Lidia ia ura gau ta ia karaia, unai amo do ia hahedinaraia ia kamonai sivarai namona ia ura henia bada. Unai dainai Paulo bona Luka ia noia: “Bema umui laloa lau be Lohiabada lau abidadama henia hahine, namo umui mai egu ruma, unuseni umui noho.” Bona ena ruma dekenai idia lao.​—Kara 16:​13-​15.

Lidia ia moale Dirava idia hesiai henia taudia be ena ruma dekenai ia boiridia totona. Ia idia durua Iehova, Iesu bona taunimanima ese mauri hanaihanai idia abia dalana ia dibaia dainai, ia ese idia ia ura henia. Ia moale badina Paulo bona Luka dekenai aniani bona laga-ani gabuna ia henia diba. Unai dainai Lidia ena henia karana ese moale ia havaraia badina mai ena ura ida ia henia. Unai ita laloatao be namo. Reana ta ese ita ia hadibaia harihari gauna ta ita henia be namo. To bema ita ura lasi unai ita karaia, unai henia karana ese ita do ia hamoalea lasi.

Hegeregere, bema oi dekenai loli haida idia noho bona oi ura ania be edena bamona? Bema oi lau hamaoroa natuna ma ta dekenai haida oi henia, do oi moale unai oi karaia totona, a?— To bema emu turana namona ta oi davaria neganai, oi dekenai loli haida idia noho be edena bamona? Bema sibona emu ura dainai emu turana ida oi haria, unai ese moale do ia havaraia, a?—

Nega haida ta ita lalokau henia bada dainai ita ura gau ibounai be ia dekenai ita henia, bona ita sibona totona gau ta ita dogoatao lasi. Iseda lalokau Dirava dekenai ita habadaia noho lalonai, namona be iseda hemami Ia dekenai danu be unai bamona.

Hadibaia Tauna Badana be unai bamona hemami ia abia ogogami hahinena ta ia diba. Unai hahine be Ierusalema ai ia noho dubu dekenai ia itaia. Ia dekenai be moni maragimaragidia rua sibona. To unai moni maragimaragidia rua be dubu totona idia henia kontribusen eiava harihari mauana lalonai ia udaia. Ta ese ia doria lasi unai ia karaia totona. Unuseniai idia noho taudia momo ese ia karaia karana idia itaia lasi. Iehova ia lalokau henia dainai mai ena ura ibounai ida unai bamona ia karaia. Henia karana ia hahedinaraia dainai ia moale.​—Luka 21:1-4.

Dala idauidau ai henia karana ita hahedinaraia diba. Dala haida oi laloa diba, a?— Bema mai iseda ura ibounai ida ita henia, do ita moale. Unai dainai Hadibaia Tauna Badana ese ita ia hamaoroa: “Taunimanima dekenai do umui henia lao.” (Luka 6:​38) Bema unai ita karaia, taunimanima ma haida do ita hamoalea. Bona moale bada do ita davaria!