Duahia Taudia Edia Henanadai

Dahaka dainai Iesu ese ariara hahinena ta ia hamaoroa iena dika be ia gwauatao vadaeni?​—⁠Luka 7:​37, 48.

Iesu be Farisea tauna Simona ena ruma dekenai ia aniani neganai, hahine ta be ‘Iesu ena aena badinai ia helai.’ Ia tai, bona iena matana ranu amo Iesu ena aena ia hapariparia, bona ena huina amo ia dahua kaukau. Bena Iesu ena aena ia kisi henia, bona ena aena dekenai dehoro ia bubua. Unai hahine be ariara hahinena ta, to Iesu be ia dekenai ia gwau: “Oiemu dika be lau gwauatao vadaeni.” (Luka 7:​36-38, 48) Iesu ena hereva ena anina be dahaka? Boubou gauna ia do henia lasi dainai, edena dala ai unai hahine ena kara dika ia gwauatao diba?

Unai hahine ese Iesu ena aena ia huria, to Iesu ese iena dika ia do gwauatao lasi neganai, Iesu be Simona dekenai mai anina bada haheitalai ta ia gwauraia: Unai haheitalai amo ia hahedinaraia kara dika be abitorehai badana ta bamona bona ta ese davana ia henia lou diba lasi. Ia gwau: “Tau ta mai ena abiatorehai taudia rua, ta ena abiatorehai be 100 kina, ma ta ena abiatorehai be 10 kina. Idia ruaosi be hegeregere lasi, edia abiatorehai davana do idia karaia, vadaeni ia ese idia ruaosi edia abiatorehai ia gwauatao. Idia ruaosi huanai be daika ese heniatorehai tauna do ia lalokau henia bada?” Simona ia haere, ia gwau: “Sedira iena abiatorehai badana ia gwauatao tauna.” Iesu ia gwau: “Oibe, momokani.” (Luka 7:​41-43) Ita ibounai ese Dirava ena taravatu ita badinaia be gau badana, unai dainai ita kara dika neganai, unai be hegeregere ita be mai eda abitorehai Dirava dekenai. To, Iehova be iseda abitorehai ia gwauatao tauna bamona. Unai dainai, Iesu ese iena hahediba taudia ia hadibaia Dirava dekenai idia guriguri neganai do idia gwau: “Aiemai dika mani oi gwauatao, badina be ai dekenai idia hadikaia taudia edia dika ai gwauatao.” (Mat. 6:12) Unai haheitalai ese ia hahedinaraia iseda kara dika be abitorehai bamona.

Edena dala ai Iehova ese idaunegai idia noho taudia edia kara dika ia gwauatao? Iena hahemaoro goevagoeva amo ia hahedinaraia kara dika ena davana be mase. Unai hegeregerena, Adamu be ena kara dika dainai ia mase. To, Dirava ese Israela besena dekenai ia henia Taravatu henunai, kara dika tauna be Iehova ese iena kara dika ia gwauatao totona, animal ta do ia bouboulaia be maoro. Aposetolo Paulo ia gwau: “Oibe, Taravatu ena hereva hegeregerena, gau momo herea be rara ese ia hagoevaia. Bona bema rara idia bubua lasi neganai, kara dika be idia gwauatao diba lasi.” (Heb. 9:22) Iuda taudia idia diba animal bouboulaia karana sibona amo Dirava ese edia dika ia gwautao diba. Unai dainai, Iesu ese unai ariara hahine ia hamaoroa ‘iena kara dika ia gwauatao’ neganai, iena hereva idia kamonai taudia ese unai idia abia dae lasi. Iesu danu idia aniani hebou taudia be ta ta idia nanadaia, idia gwau: “Inai be daika, dika ia gwauatao?” (Luka 7:49) Edena dala ai Iesu ese unai ariara hahinena ena kara dika ia gwauatao diba?

Adamu bona Heva idia gwau-edeede murinai Iehova be peroveta herevana ginigunana amo iena ura ia hahedinaraia. Ia gwau “garana” ta do ia haginia bona Satani bona iena “garana” ese unai “garana” ena aena geduna do ia haberoa. (Gen. 3:​15, NW ) Dirava ena inai taudia ese Iesu idia hamasea neganai, unai peroveta herevana ia guguru. (Gal. 3:​13, 16) Iesu ena rara goevadaena ese taunimanima be kara dika bona mase edia igui amo ia hamauria. Gau ta ese Iehova ena ura do ia hagugurua dalana ia koua diba lasi. Unai dainai, Genese 3:15 ena peroveta herevana ia gwauraia neganai, unai be hegeregere Iesu ese boubou gauna ia henia bona kara dika ena davana ia karaia vadaeni. Iehova ese ena gwauhamata idia abidadama henia taudia edia dika ia gwauatao diba.

Keriso ia do vara lasi neganai, Iehova ese taunimanima haida ia gwauraia maoromaoro. Idia haida be Enoka, Noa, Aberahamo, Rahaba bona Iobu. Idia be mai abidadama ida Iehova ena gwauhamata edia guguru negana idia naria. Aposetolo Iamesi ia gwau: “Aberahamo ese Dirava ia abidadama henia, bona iena abidadama dainai Dirava ia gwau ia be maoromaoro vadaeni.” Iamesi be Rahaba ia herevalaia neganai, ia gwau: “Unai bamona danu, ariara hahine Rahaba be iena kara dainai Dirava ena vairanai ia maoromaoro.”​—⁠Iam. 2:​21-25.

Ena be King Davida be kara dika badadia haida ia karaia, to ia be Dirava momokanina ia abidadama henia dainai, ia helalo-kerehai. Ma danu, Baibel ia gwau: “Dirava ese Iesu ia abia hidi, ia be do ia mase, vadaeni iena rarana ia bubua, be idia abidadama henia taudia edia dika do ia gwauatao. Dirava ese inai bamona ia karaia, iena kara maoromaoro hedinaraia totona. Gunaguna neganai ia mai bona hari, Dirava ese taunimanima edia dika davana ia henia haraga lasi, bona edia dika ia laloaboio bamona. To harihari inai neganai, Dirava ese taunimanima edia dika hamaoromaoroa gaukara ia karaia noho, iena kara maoromaoro hedinaraia totona. Inai dala dekenai, Dirava sibona ena kara maoromaoro, be taunimanima ese idia itaia noho. Bona idia diba danu, Iesu dekenai idia abidadama taudia be Dirava ese ia gwauraia idia be maoromaoro vadaeni.” (Roma 3:​25, 26) Dirava ena matanai Iesu ena mauri davalaia boubouna be ia henia vadaeni, unai dainai Dirava ese Davida ena kara dika ia gwauatao diba bona unai amo Iena ena hahemaoro goeva karana ia hadikaia lasi.

Unai dainai, ita gwau diba ena be Iesu ese ena boubou gauna ia do henia lasi, to unai ariara hahine ena dika ia gwauatao diba. Ia be ariara hahinena to ia helalo-kerehai. Ia diba do ia helalo-kerehai be gau badana, bona ena kara amo ia hahedinaraia, ia be taunimanima hamauria totona Iehova ena abia hidi tauna, Iesu Keriso, ia abidadama henia. Ena be Iesu ese ena mauri ia do bouboulaia lasi, to unai ariara hahine be unai boubou gauna amo ena dika ia gwauatao vadaeni. Unai dainai, Iesu be ia dekenai ia gwau: “Oiemu dika be lau gwauatao vadaeni.”

Unai sivarai ese ia hahedinaraia, Iesu be kara dika taudia ia dadaraia lasi, to ia kara namo henidia. Danu, Iehova ia ura helalo-kerehai taudia ia gwauatao. Unai ese ita goevadae lasi taudia ia hagoadaia!

[Picture on page 7]

Edia abidadama dainai Dirava ese idia ia gwauraia maoromaoro