Inai Oi Laloatao, A?

Vanegai idia halasia Gima Kohorona magasin edia hereva be mai moale ida oi duahia, a? Vadaeni, mani oi tohoa bema inai henanadai oi haerelaia diba:

• Roma 5:​3-5 ai, dahaka dainai aposetolo Paulo ese helaro be ena hereva dokona kahanai ia gwauraia?

Paulo be Keristani taudia idia mamia gaudia​​—⁠hisihisi, haheauka, Dirava ena lalo-namo, bona helaro​​—⁠ia gwauraia. Inai “helaro” be Baibel amo ita abia matamaia helarona lasi, to inai be Keristani tauna ia hagoadaia, habadaia, bona iena mauri lalonai ia mamia momokani helarona.​​—⁠12/15, rau 22-3.

• Dahaka dainai Keristani tauna ta be idaunegai Greece dekenai idia abia gadaradia ia laloa be namo?

Unai gadara ena anina bona ena dala ita lalo-pararalaia karana amo Baibel ena siri haida edia anina ita dibaia. Siri haida be ‘gadara helulu ena taravatu ita badinaia,’ ‘metau gaudia ibounai ita negea bona Iesu ena haheitalai ita raraia tao,’ ‘heau helulu ita haorea’ bona kwalimu ahuna do ita abia idia herevalaia. (2 Timoteo 2:5; 4:​7, 8; Heberu 12:​1, 2; 1  Korinto 9:​24, 25; 1 Petero 5:⁠4)​​—⁠1/1, rau 28-​30.

• January 1914 ai edena dala matamatana ai sivarai namona idia harorolaia?

Unai neganai “Photo-Drama of Creation” idia halasia. Unai be kahana hani ai idia hahedinaraia laulauna bona galasi slaid piksa handred momo, danu miusiki rekodi namodia bona rekodi herevadia idia hegaegaelaia. Kopi 20 idia karaia bona tanobada ibounai dekenai idia gaukaralaia taunimanima dekenai Baibel idia hadibaia totona.​​—⁠1/15, rau 8-9.

• Hakaua Oreana be edena bamona ia idau koporeisen amo?

Koporeisen edia dairekta taudia be edia memba taudia ese vouti amo gaukara dagi idia henia, to Hakaua Oreana be tau ta ese ia abia hidi lasi, Iesu Keriso ese ia abia hidi. Badina ta ia noho lasi horoa Keristani taudia sibona be Iehova ena Witnes taudia ese idia gaukaralaia gaukara oreadia edia dairekta taudia ai idia lao diba. Watch Tower Bible and Tract Society of Pennsylvania ena lagani ta ta hebouna dekenai, Hakaua Oreana taudia haida, idia be dairekta bona dagi taudia, be sibona edia ura dainai unai dagi gaukaradia amo idia gini siri. Edia gabu abia totona, “mamoe idaudia” oreana amo abidadama goada tadikaka idia abia hidi. (Ioane 10:16) Unai amo Hakaua Oreana taudia dekenai nega bada ia noho, lauma aniani idia hegaegaelaia totona bona tanobada ibounai tadikaka oreana be lauma dalanai idia naria namonamo totona.​​—⁠1/15, rau 29, 31.

• Edena haheitalai rua Baibel lalonai ita tahua namonamo diba lalo-manoka haheaukalaia dalana ita diba totona?

Ta be Hana, Samuela ena sinana. Hahelaga tauna badana Eli ese Hana ia lalo-dika henia neganai, reana Hana be sibona ena lalona ia hamanokaia diba. To, mai hemataurai ida ena kara ena anina momokanina ia hahedinaraia goevagoeva. Danu, Hana be Eli dekenai ia badu lasi. Iharuana be Mareko, reana ia lalohisihisi badina aposetolo Paulo ena misinari loaloa dekenai ia abia lao lasi. Herevana unai hahenamo ia haboioa to ia lalo-metau lasi, iena hesiai gaukara ia goadalaia noho bona Banaba ida ia loaloa.​​—⁠2/1, rau 20-2.

• Dahaka dainai Keristani taudia be ma haida dekenai kompiuta program idia henia, eiava idia amo idia abia, karana do idia naria namonamo?

Kompiuta program momo (gadara program danu) be mai edia laiseni, biaguna o gaukaralaia tauna be kompiuta tamona sibona dekenai ia atoa diba. Nega momo unai laiseni ia gwau biaguna ese program ena kopi be ma haida dekenai ia henia be copyright taravatuna utua karana. Keristani taudia idia ura taravatu idia badinaia, ‘Kaisara ena gaudia idia henia Kaisara dekenai.’ (Mareko 12:17)​​—⁠2/15, rau 28-9.

• Cyril bona Methodius be daidia, bona dahaka heduru idia henia Baibel stadi karana dekenai?

Idia be tadikaka rua, lagani 800 C.E. murinai, Thessalonica, Greece dekenai idia vara. Idia be Slavic taudia edia gado torea dalana idia hanamoa bona Slavonic gado ai Baibel ena kahana momo idia hahanaia.​​—⁠3/1, rau 28-9.

• Inai hereva “lauma helaga dekenai oi laloa” ena anina be dahaka?​​—⁠Roma 8:⁠6.

Ena anina be Iehova ena gaukara siahuna ese ita ia hakaua, biagua, bona hasiahua. Dirava ena lauma helaga be ita lalonai do ia gaukara bema Baibel ita duahia bona stadilaia, Dirava ena taravatu ita badinaia mai eda kudouna ibounai ida bona Dirava ena lauma helaga ita gurigurilaia.​​—⁠3/15, rau 15.

• Dahaka ita karaia diba bema ita laloa haida ese eda kara idia laloa kerere?

Gau badana be lalokau dalana amo ita hamaoromaoroa. Bema unai ia hegeregere lasi, oi lalo-metau lasi. Iehova oi noia lalo-parara bona heduru totona, badina ia “ese oiemu lalona gaudia ia tohoa noho.” (Aonega Herevadia 21:2; 1 Samuela 16:⁠7)​​—⁠4/1, rau 21-3.