Oi ese Lalokau Ena ‘Dala Namo Hereana’ Oi Badinaia, A?

“DIRAVA be lalokau.” Aposetolo Ioane be Dirava ena kara badana ia herevalaia unai. (1 Ioa. 4:⁠8) Dirava be taunimanima ia lalokau henia dainai, ita be Ia kahirakahira ita lao bona Ia ita tura henia diba. Edena dala ma ta ai Dirava ena lalokau ese iseda mauri ia haidaua diba? Tau ta ia gwau: “Ita lalokau henia bada gauna ta ese iseda mauri ia haidaua diba.” Unai be momokani. To danu, ita lalokau henia tauna bona ita ia lalokau henia tauna ese iseda mauri ia haidaua diba. Ita be Dirava ena toana hegeregerena dainai, eda mauri lalonai Dirava ena lalokau ita hahedinaraia diba. (Gen. 1:​27) Aposetolo Ioane ia gwau, Dirava ita lalokau henia badina “Dirava ese ita ia lalokau henia guna.”​​—⁠1 Ioa. 4:​19.

Lalokau Ena Hereva Foa

Aposetolo Paulo ia gwau, lalokau be ‘dala namo hereana.’ (1 Kor. 12:31) Dahaka dainai unai bamona ia hereva? Paulo be edena lalokau ia herevalaia? Unai ita diba totona, namona be “lalokau” ena anina ita itaia.

Idaunegai Greek gado ai lalokau ena hereva be foa bona dala idauidau ai idia gaukaralaia. Gaudia be inai: stor·geʹ, eʹros, phi·liʹa, bona a·gaʹpe. To a·gaʹpe sibona be Dirava ena “lalokau” ia herevalaia.a Professor William Barclay be ena buka ta New Testament Words lalonai unai lalokau be inai bamona ia gwauraia: “Agapē be darana dekenai ia vara gauna: Ia be iseda kudouna dekenai ia vara kava lasi; to ia be taravatu ta bamona bona ita ura eda mauri lalonai ita badinaia. Agapē be mai anina bada bona ita ura henia.” Unai hereva ese ia hahedinaraia, ena be a·gaʹpe lalokauna be mai ena hebogahisi, to unai lalokau be hakaua hereva maorodia ese ia biagua danu. Hakaua hereva haida be namo bona ma haida be namo lasi, to namona be Keristani taudia be hakaua hereva namodia​​—⁠Iehova Dirava ese Baibel dekenai ia atoa herevadia unai​​—⁠ese ia biagudia. Baibel ese ia gwauraia a·gaʹpe be lalokau ma haida ida ita hahegeregerea neganai, do ita laloparara edena dala ai lalokau ita hahedinaraia be namo.

Ruma Bese Lalonai Ia Noho Lalokauna

Iseda ruma bese lalonai lalokau bona lalotamona ia noho neganai, ita moale, ani? Nega momo Greek taudia be inai hereva stor·geʹ idia gaukaralaia, ruma bese lalonai ia noho lalokauna idia herevalaia totona. Keristani taudia idia hekwarahi, edia ruma bese taudia idia lalokau henia totona. Paulo ia peroveta, nega dokona lalonai, taunimanima be “lalokau do idia diba lasi.”​​—⁠2 Tim. 3:​1, 3.

Hari inai negai, ruma bese taudia momo huanai lalokau be lasi. Dahaka dainai rogorogo hahine momo be edia bogana lalonai natuna idia hamasea? Dahaka dainai ruma bese momo be edia tama sina burukadia idia laloa bada lasi? Dahaka dainai headava hadokoa karana be ia bada daekau? Inai henanadai ibounai edia haere be inai: Lalokau be lasi.

Danu, Baibel ia gwau “taunimanima edia kudouna be mai koikoi bada.” (Ier. 17:⁠9) Ruma bese lalonai ita hahedinaraia lalokauna be iseda kudouna amo ia vara hemamina. To, Paulo ese Baibel dekenai a·gaʹpe lalokauna ia gaukaralaia, badina ia ura tau ese ena adavana dekenai unai lalokau ia hahedinaraia be namo. Paulo ese ia hahedinaraia unai lalokau bona Keriso ese kongrigeisen totona ia hahedinaraia lalokauna be hegeregere. (Efe. 5:​28, 29) A·gaʹpe lalokauna be Iehova​​—⁠ruma bese ia Havaraia Tauna​​—⁠ena hakaua herevadia ese ia biagua karana.

Ruma bese taudia lalokau henia karana ese ita do ia durua, eda tama sina burukadia bona natudia ita naria totona. Danu, unai lalokau ese tama sina ia durua edia natudia idia kerere neganai idia matahakani henidia totona. Momokani, bema tama sina be edia natudia idia matahakani henia lasi, gabeai edia natudia be do idia kamonai lasi to sibona edia ura dekenai abia hidi do idia karaia.​​—⁠Efe. 6:​1-4.

Headava Lalonai Ia Noho Lalokauna Bona Baibel Ena Hakaua Herevadia

Headava lalonai ia noho lalokauna be Dirava ena harihari gauna. (Aon. 5:​15-​17, BHğ) To, Baibel torea taudia be unai lalokau idia herevalaia neganai, idia be inai hereva eʹros idia gaukaralaia lasi. Dahaka dainai? Lagani haida gunanai Watchtower ta ia gwau: “Hari, toana be tanobada hegegemadai taunimanima be idaunegai Greek taudia edia kerere idia karaia lou. Hegeregere, idia ese dirava ladana Eros idia tomadiho henia, ena pata vairanai idia igo diho bona ia dekenai boubou gaudia idia henia. . . . To histori ese ia hahedinaraia, momo be mahuta hebou karadia idia tomadiho henia bamona, bona kara dika rohorohodia idia karaia. Reana unai badina dainai, Baibel torea taudia ese eʹros herevana idia gaukaralaia lasi.” Ita ura ta ita adavaia badina ia be mai ena hairai, a? Lasi, ita ura Baibel ena hakaua herevadia ese eda hemami ia biagua. Oi sibona oi nanadaia, ‘Lau ura henia merona (o kekenina) lau lalokau henia momokani, a?’

Nega momo “matamata negana” lalonai mahuta hebou urana be ia goada momokani, to Baibel ena hakaua herevadia idia badinaia matamata taudia be kara goevadia idia karaia. (1 Kor. 7:​36, NW; Kol. 3:⁠5) Ita diba, headava be Iehova ena harihari gauna ta bona ia helaga. Iesu ese headava taudia be inai bamona ia herevalaia: “Dirava ese ia hakapua taudia, be taunimanima ese do idia hapararaia lasi.” (Mat. 19:⁠6) Ta ena hairai dainai ita adavaia bena ena hairai ia ore neganai ita rakatania be namo, a? Lasi, ta ita adavaia neganai, ita noho hebou ela bona hanaihanai be namo. Headava lalonai hekwakwanai idia vara neganai, maoromaoro headava ita hadokoa lasi, to ita hekwarahi Dirava ena kara ita hahedinaraia bona eda ruma bese maurina ita hanamoa. Bema unai bamona ita hekwarahi neganai, moale do ita davaria ela bona hanaihanai.​​—⁠Efe. 5:​33; Heb. 13:⁠4.

Turadia Huanai Ia Noho Lalokauna

Bema oi be turana lasi, oiemu mauri do oi moalelaia lasi! Baibel ia gwau: “Turana ta ia noho, iena turana kara, ese tadikaka ta ena lalokau ia hereaia noho.” (Aon. 18:24) Iehova ia ura taunimanima namodia sibona ita bamoa. Momo idia diba Davida bona Ionatana idia hetura namo herea. (1 Sam. 18:⁠1) Baibel ia gwau, Iesu ese aposetolo Ioane “ia lalokau henia.” (Ioa. 20:⁠2) Greek herevana phi·liʹa be unai bamona lalokau karana ia herevalaia. Kongrigeisen lalonai ta oi tura henia be kerere lasi. To, 2 Petero 1:7 (NW ) ese ita ia hagoadaia, namona be a·gaʹpe lalokauna amo eda “tadikaka lalokau henia karana” (Greek gado ai be phi·la·del·phiʹa​—⁠phiʹlos anina be “turana,” bona a·del·phosʹ, anina be “tadikaka.”) ita biagua. Eda hetura karana ia dika lasi totona, unai sisiba ita badinaia be namo. Ita sibona ita nanadaia, ‘Lau ese Baibel ena hakaua herevadia lau badinaia dainai, egu turana lau lalokau henia, a?’

Baibel ese ita ia durua eda turadia ita kara namo henia totona. To namo lasi eda turana korikoridia sibona ita kara namo henia, bona ma haida ita kara auka henia. Danu, namo lasi lalona veria herevadia amo ma haida ita tura henia. Gau badana be inai: Baibel ena hakaua herevadia ita badinaia be namo, unai amo laloparara do ita abia, turana namodia do ita bamoa, bona ‘iseda kara namodia do idia hadikaia’ karadia ita dadaraia.​​—⁠1 Kor. 15:⁠33.

Lalokau​—⁠Kara Hereadaena!

Lalokau be Keristani taudia ia hatamonaia karana! Aposetolo Paulo ia gwau: “Taunimanima umui lalokau henia koikoi lasi. . . . Umui ta ta do umui lalokau henia, tadikaka edia lalokau ta ta dekenai bamona.” (Roma 12:​9, 10) Momokani, Keristani taudia be ‘taunimanima idia lalokau (a·gaʹpe) henia koikoi lasi.’ Inai lalokau be iseda kudouna dekenai ia vara kava hemamina ta sibona lasi. To, ia be Baibel ena hakaua herevadia ese ia biagua karana. Danu, Paulo ese “tadikaka lalokau henia karana” (phi·la·del·phiʹa) bona “ta ta do umui lalokau henia” (phi·loʹstor·gos) ia herevalaia danu. (Inai hereva phi·loʹstor·gos be hereva rua, idia be phiʹlos bona stor·geʹ). Diba bada tauna ta ia gwau, “tadikaka lalokau henia karana” anina be tadikaka “hebogahisi henia, kara namo henia, laloa bada, bona heduru henia” karana. Iehova idia tomadiho henia taudia ese unai lalokau be a·gaʹpe lalokauna ida idia hahedinaraia dainai, idia hetura namonamo. (1 Tes. 4:​9, 10) Hereva ma ta (phi·loʹstor·gos) idia hahanaia “lalokau” be nega tamona Greek Baibel ai ia hedinarai, ena anina be ta tura henia namonamo, ruma bese ta bamona.

Ruma bese lalonai ia noho lalokauna bona turana momokani lalokau henia karana be Keristani taudia momokanidia ia durua idia lalotamona totona. Danu, edia lalokau karadia ibounai be Baibel ena hakaua herevadia ese idia biagua. Keristani kongrigeisen be pati gabuna lasi eiava tanobada oreana ta lasi. To, ia be ruma bese ta bamona, unuseniai taunimanima idia hebou bona mai lalotamona ida Iehova Dirava idia tomadiho henia. Danu, unuseniai idia hebou taudia ita gwauraia tadikaka bona taihu. Idia be iseda turadia, ita lalokau henidia, bona Baibel ena hakaua herevadia hegeregerena ita kara namo henidia. Lalokau be Keristani kongrigeisen ena toana ta bona lalotamona ia havaraia karana dainai, namona be lalokau ita hahedinaraia noho.​​—⁠Ioa. 13:⁠35.

[Footnote]

[Blurb on page 12]

Edena dala ai ita ia hatamonaia lalokauna ita habadaia diba?