Ma Haida Dekenai Emu Lalokau Oi Habadaia Diba, A?

BOUTI ena dogo ia dogoatao seini ia goada be namo, unai amo bouti do ia hure oho lasi. To, bema lai badana ia toa bona dogo be ia goada lasi, seini ia makohia diba.

Keristani kongrigeisen danu be unai bamona. Kongrigeisen ta ia goada totona, kongrigeisen taudia ta ta idia lalotamona be namo. Dahaka ese idia ia hatamonaia? Lalokau. Unai dainai Iesu Keriso ese ena hahediba taudia ia hamaoroa: “Taravatu matamatana lau henia umui dekenai, inai bamona: Umui ta ta dekenai umui lalokau henia. Lau ese umui dekenai lau lalokau henia hegeregerena, umui danu ta ta dekenai umui lalokau henia. Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” Oibe, Keristani taudia momokanidia be ta ta idia tura henia bona matauraia sibona lasi, to idia lalokau heheni. Bona idia ese sibona edia ura dadaraia lalokauna idia hahedinaraia.​​—⁠Ioane 13:​34, 35.

Iseda Keristani Tadikaka Ita Lalodia Bada

Kongrigeisen momo lalonai, mauri lagani, bese, kastom, gado, bona mauri dala idauidau taudia idia noho. Idia ta ta be mai edia ura gaudia bona ura lasi gaudia, gau haida idia gari henia, bona idia ta ta be mai edia hekwakwanai​​—⁠reana gorere eiava moni dalanai idia hegeregere lasi. Unai gau idauidau dainai, nega haida Keristani lalotamona hahedinaraia totona be ia auka. Vadaeni, ena be hekwakwanai ita davaria, to dahaka ese ita ia durua diba iseda lalokau ita habadaia bona ita gini goada totona? Bema kongrigeisen taudia ibounai ita lalokau henia momokani, idia ta ta dekenai iseda lalokau ita habadaia diba.

To, edena bamona ita hahedinaraia ma haida ita laloa bada? Bema iseda tadikaka ita lalodia bada, anina be idia do ita hebogahisi henia, do ita matauraia, edia namo ita laloa, bona ita moale badina Dirava ita tomadiho henia hebou. Unai dainai, idia ita lalokau henia bada. Aposetolo Paulo ena revareva Keristani ginigunadia dekenai mani ita laloa, unai ese ita do ia durua Keristani lalokauna ita hahedinaraia totona.

Korinto Taudia ‘Edia Lalokau Ia Maragi’

Paulo be lagani 55 C.E. ai Korinto taudia dekenai ena revareva ginigunana ia siaia, bona unai lagani tamona lalonai ena revareva iharuana ia siaia danu. Unai revareva lalodiai ia hahedinaraia, Korinto kongrigeisen dekenai, haida ese edia tadikaka idia laloa bada lasi. Paulo ena hereva amo unai ia hahedinaraia, ia gwau: “Lauegu turana lalokau taudia Korinto dekenai! Hereva momo ai gwauraia hedinarai umui dekenai, ai hunia lasi. Aiemai kudouna ai kehoa vadaeni, umui ai lalokau henia dainai. Aiemai lalokau umui dekenai be ia bada, to emui lalokau ai dekenai be ia maragi.” (2 Korinto 6:​11, 12) Dahaka dainai Paulo ia gwau ‘edia lalokau ia maragi’?

Paulo ena hereva ena anina be, lalokau bona hebogahisi karana idia hahedinaraia lasi. Baibel ia diba momo tauna ta ia gwau, “gau haida dainai Korinto taudia be Paulo dekenai idia badu kava, . . . idia laloa Paulo ese idia ia kara namo henia lasi.”

Paulo be idia ia sisiba henia, ia gwau: “Umui dekenai lau hereva henia, tamana ese iena natuna ia hereva henidia bamona. Lau gwau, aiemai lalokau davana ai dekenai do umui henia, emui lalokau ai dekenai mani do umui habadaia!” (2 Korinto 6:​13) Paulo ese Korinto taudia ia hagoadaia, tadikaka lalokau henia karana do idia habadaia totona. Anina be edia tadikaka do idia laloa dika henia lasi eiava edia kerere maragidia do idia laloa lasi, to badina maorona bona hebogahisi dainai do idia durudia be namo.

Hari, Tadikaka Lalokau Henia Karana Habadaia

Hari, Dirava tomadiho henia taudia idia hekwarahi ta ta dekenai lalokau idia hahedinaraia, unai ita itaia neganai ita moale. Oibe, ma haida lalokau henia karana ita habadaia totona, gau haida ita karaia be namo. To unai gaudia karaia dalana ita dibaia sibona be hegeregere lasi. Lalokau ita habadaia anina be, Baibel ena taravatu idia badinaia lasi taudia edia kara ita tohotohoa lasi. Unai bamona taudia ese ma haida idia laloa bada lasi, idia matauraia lasi, bona idia dekenai hahisia herevadia idia gwauraia. Namo lasi unai kara ita hahedinaraia. Bona Korinto kongrigeisen lalonai ia vara bamona, bema iseda tadikaka ita abidadama henia lasi bona idia ita lalokau henia lasi, madi, unai be dika. Unai ia vara diba ita dekenai, bema iseda Keristani tadikaka ena kerere ita itaia haraga to ena kara namodia ita itaia lasi. Eiava ia be idau tano amo dainai, ia dekenai lalokau ita hahedinaraia lasi.

To, Dirava ena hesiai tauna ese ma haida ia lalokau henia neganai, ia hahedinaraia ena tadikaka bona taihu ia lalodia bada. Idia ia matauraia bona hebogahisi henidia. Ena be ta be ia dekenai ia kara kerere dainai, ia be mai ena maoro ia badu totona, to ia badu lasi bona kerere tauna ena dika ia gwauatao. Herevana ta ena kara dainai ita moale lasi, to namona be ita laloa ia be badina maorona dainai unai bamona ia karaia. Hebogahisi karana ese ia ia durua Iesu ese ia gwauraia lalokauna ia hahedinaraia: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.”​​—⁠Ioane 13:⁠35.

Dala Oi Tahua Ma Haida Oi Tura Henia Totona

Lalokau korikorina ese ita do ia durua iseda turadia sibona ita kara namo henidia lasi, to dala do ita tahua kongrigeisen lalonai ita diba namonamo lasi taudia ita tura henidia totona. Unai taudia be daidia? Iseda Keristani tadikaka bona taihu haida be idia hemarai, eiava badina ma haida dainai idia be mai edia turadia momo lasi. Reana ita laloa ena be Dirava ita tomadiho henia hebou, to iseda kara momo be idia hegeregere lasi. To Baibel ese ia hahedinaraia, ena be haida be ta ta amo idia idau to idia be tura namodia ai idia lao, ani?

Hegeregere, Ruta bona Naomi edia mauri lagani, edia tano, kastom, bona gado be idauidau. To, unai gaudia ese idia ia koua lasi tura namodia ai idia lao totona. Ionatana be lohia tauna ena natuna bona Davida be mamoe naria tauna. Ionatana ena mauri lagani be ia bada Davida ena amo, to Baibel ese ia hahedinaraia idia be tura namodia momokani. Unai taudia edia hetura karana ese moale ia havaraia bona ia durudia tomadiho momokani idia goadalaia totona.​​—⁠Ruta 1:​16; 4:​15; 1 Samuela 18:3; 2 Samuela 1:​26.

Hari danu, Keristani taudia momokanidia be tura namodia ai idia lao diba, ena be edia mauri lagani eiava noho daladia be idauidau. Hegeregere sina ta ladana Regina, mai ena natudia rua edia sivarai ita laloa.a Ia bisi bada dainai, nega be lasi ma haida ia bamodia totona. To idia buruka headava tau bona hahine, Harald bona Ute be natudia lasi. Toana be unai ruma bese rua be ta ta amo idia idau momokani. To Harald bona Ute be Baibel ena sisiba, ma haida dekenai lalokau habadaia sisibana unai, idia badinaia. Unai dainai, dala idia tahua Regina bona ena natudia ida gau momo idia karaia totona, hegeregere idia haroro hebou bona moale karadia idia karaia hebou.

Iseda turadia sibona lasi to ma haida dekenai lalokau ita habadaia diba, a? Dala oi tahua diba tano, kastom bona mauri lagani idauidau taudia oi tura henia totona, a?

Ma Haida Edia Namo Ita Laloa

Hebogahisi karana ese ita do ia veria ma haida ita durua totona. Edena bamona ita durudia diba? Mani Keristani kongrigeisen lalonai idia noho taudia ta ta ita laloa. Matamata taudia dekenai hakaua herevadia ita henia, buruka taudia ita hagoadaia, ful-taim hesiai gaukara idia karaia taudia ita hanamodia, bona idia lalometau tadikaka bona taihu ita durua be namo. Taunimanima ibounai be heduru idia abia be namo. Bona ita ura dala ita tahua idia ita durudia totona.

Haida dekenai lalokau ita hahedinaraia anina be, idia gorere eiava hekwakwanai idia davaria taudia ita lalodia. Hebogahisi bona lalokau karana ese ita do idia durua haida edia noho ita laloa, bona idia ita durua totona.

Baibel ena peroveta herevadia vaira nega totona do idia guguru ita naria lalonai, kongrigeisen lalonai lalotamona karana ese ita do ia durua bada, to kohu, iseda diba bona mauri lalonai ita hagugurua gaudia ese ita do ia durua lasi. (1 Petero 4:​7, 8) Ita ta ta ese iseda kongrigeisen lalonai lalotamona ita habadaia diba, bema tadikaka bona taihu dekenai lalokau ita hahedinaraia. Iesu Keriso ia gwau: “Lauegu taravatu be inai, umui ta ta umui lalokau henia, lau ese umui lau lalokau henia hegeregerena.” (Ioane 15:12) Bema unai hereva ita badinaia, ita diba momokani Iehova ese ita do ia hanamoa.

[Footnote]

[Blurb on page 8]

Iseda tadikaka ita lalodia bada anina be, idia ita matauraia, edia namo ita laloa, bona ita hebogahisi henidia dainai ita durudia