Paradaiso​—⁠Oi Totona?

“Keriso ena tauna ta lau diba, . . . Dirava ese ia abia daekau Paradaiso dekenai.”​​—⁠2 KORINTO 12:​2-4.

 1. Edena gwauhamata Baibel lalonai be momo ese idia moalelaia?

PARADAISO. Dirava ena gwauhamata paradaiso be tanobada dekenai do ia vara be nega ginigunana oi kamonai neganai, oi abia mamina oi laloatao, a? Reana oi dibaia gauna be ‘matakepulu taudia do idia itaia diba, taia kudima taudia do idia kamonai, bona tano kaukau dekenai sinavai do idia vara.’ Eiava, uda sisia bona mamoe be do idia noho hebou mai maino danu, bona taiga be nanigosi danu do idia hekure hebou peroveta herevana oi laloatao, a? Mase taudia be do idia toreisi lou bona tanobada paradaisona lalonai do idia noho sivaraina oi duahia neganai, oi moale bada, ani?​—⁠Isaia 11:6; 35:​5, 6; Ioane 5:​28, 29.

2, 3. (a) Dahaka dainai ita gwau diba Baibel amo oi abia helarona be mai ena badina korikorina? (b) Dahaka badina ma ta dainai ita be mai iseda helaro?

² Emu helaro be mai ena badina korikorina. Oi ese Baibel ena gwauhamata Paradaiso totona oi abia dae diba. Hegeregere, Iesu be ia ida idia hasatauroa kara dika tauna dekenai ia gwauraia herevana oi abia dae, ia gwau: “Oi be lau danu Paradaiso dekenai do ita noho.” (Luka 23:​43, NW ) Inai gwauhamata oi abia dae: “Dirava ese ia gwauhamata vadaeni, guba matamata bona tanobada matamata do ia havaraia. Inai totona do ita naria noho. Unai gabu dekenai be kara maoromaoro sibona do ia noho.” Danu, oi abia dae Dirava be matana ranu do ia dahua; mase do ia ore momokani; lalohisihisi, taitai bona hisihisi be do idia ore momokani. Unai ena anina be tanobada paradaisona be do ia vara lou!​—⁠2 Petero 3:13; Apokalupo 21:⁠4.

³ To, unai Paradaiso helarona ita abia dae ena badina ma ta be, hari tanobada hegegemadai idia noho Keristani taudia be gau ta lalonai idia noho. Unai be dahaka? Dirava be lauma paradaisona ta ia havaraia, bona ia lalonai ena taunimanima ia hakaua vareai. Toana be inai hereva “lauma paradaisona” be reana lalohadai ta sibona, eiava oi lalo-pararalaia diba lasi, to unai bamona paradaiso ta be Baibel ese ia perovetalaia, bona ia noho momokani.

Paradaiso Ena Matahanai Ta

 4. Korinto Iharuana 12:​2-4 ese edena matahanai ia gwauraia, bona toana be daika ese unai matahanai ia itaia?

⁴ Aposetolo Paulo ese lauma paradaisona ia herevalaia dalana oi laloa: “Keriso ena tauna ta lau diba, . . . ia idia abia daekau guba ena atai dekenai momokani [eiava “guba ihatoina ai,” Buka Helağa] . . . Inai tau be lau diba, Dirava ese ia abia daekau Paradaiso dekenai. Sedira ia vara momokani o mata hanai lalonai ia itaia, lau diba lasi, Dirava sibona ia diba. Paradaiso dekenai inai tau be hunia hereva ia kamonai, taunimanima idia gwauraia diba lasi herevadia.” (2 Korinto 12:​2-4) Unai hereva be Paulo ese ena aposetolo dagina ia herevalaia murinai ia gwauraia. Ma danu, Baibel ia gwau lasi unai kara be tau ma ta dekenai ia vara, bona Paulo sibona be ita dekenai unai kara ia herevalaia. Unai dainai reana Paulo be unai matahanai ia itaia. Iehova ese Paulo dekenai unai matahanai ia hahedinaraia neganai, Ia ese Paulo be edena “paradaiso” lalonai ia abia daekau?​—⁠2 Korinto 11:​5, 23-31.

 5. Paulo be dahaka ia itaia lasi, bona unai “paradaiso” be dahaka?

⁵ Unai siri ena badina siridia idia gwau lasi “guba ihatoina” ena anina be iseda tanobada ia gegea hodahoda, eiava guba ai ia noho gabuna ta. Nega momo Baibel lalonai namba 3 idia gaukaralaia gau ta ena anina idia hahedinaraia goevagoeva, habadaia eiava hagoadaia totona. (Hadibaia Tauna 4:12; Isaia 6:3; Mataio 26:​34, 75; Apokalupo 4:⁠8) Unai dainai, Paulo ese matahanai lalonai ia itaia gauna be atai momokani gauna. Ia be lauma dalanai ia vara gauna ta.

 6. Idaunegai idia vara gaudia ese edena bamona ita ia durua Paulo ia itaia gauna ita lalo-pararalaia totona?

⁶ Baibel ena peroveta hereva gunadia amo diba ita abia. Dirava ena idaunegai besena ese ia idia gwau-edeede henia neganai, ia ese Babulonia taudia ia koua lasi dainai idia ese Iuda bona Ierusalema idia hadikaia. Baibel ena nega duahia karana ese ia hahedinaraia hegeregerena, unai dika be lagani 607 B.C.E. ai ia vara. Peroveta herevana ia gwau unai tano be lagani 70 lalonai do ia noho kava; vadaeni Dirava ese dala do ia kehoa idia helalo-kerehai Iuda taudia idia giroa bona tomadiho momokanina idia haginia lou totona. Unai be lagani 537 B.C.E. murinai ia vara matamaia. (Deuteronomi 28:​15, 62-68; 2 King Taudia 21:​10-15; 24:​12-16; 25:​1-4; Ieremia 29:​10-14) To, unai tano dekenai dahaka ia vara? Unai lagani 70 lalodiai, ia be uda bada, tano kaukau bona uda sisia idia noho gabunai ia lao. (Ieremia 4:26; 10:22) To, inai gwauhamata ia noho: “Lau Lohiabada ese Siona do lau hagoadaia. Lau ese Ierusalema idia hadikaia gabudia, be mai bogahisihisi danu do lau itaia. Iena nadi kavakava tano, be Eden bamona do lau halaoa. Iena tano kaukau, be Lohiabada ena uma gabuna [eiava Paradaiso, Septuagint] hegeregerena do lau halaoa.”​—⁠Isaia 51:⁠3.

 7. Lagani 70 lalonai tano ia noho kava murinai dahaka do ia vara?

⁷ Unai kara be lagani 70 murinai ia vara. Dirava ena hahenamo dainai, tano ena toana ia namo lou. Mani emu lalona ena matana amo inai oi itaia: “Taunimanima idia noho lasi tanona, bona tano kaukauna be do idia moale, bona palauapalaua be unai tano dekenai do idia tubu namonamo. Taunimanima idia noho lasi tano dekenai, palauapalaua do idia vara, bona mai moale bada danu ane do idia abia. . . . Edia aena idia dika taudia be do idia roho bona mavaru, bona hereva diba lasi taudia, be mai moale bada do idia boiboi. Tano kaukau dekenai, be sinavai do idia vara, bona edia ranu be, tano do ia heau hanaia lao. Miri tano mai ena siahu bada, be ranu gabuna do ia lao, bona tano kaukauna be gohu do ia lao. Uda sisia idia noho gabuna, be paripari momo gabuna, mai ena rei bona siriho do ia lao.”​—⁠Isaia 35:​1-7.

Idia Giroa Lou Bona Edia Kara Idia Haidaua Taudia

 8. Edena bamona ita diba Isaia karoa 35 be taunimanima ia herevalaia?

⁸ Unai tano be ia idau momokani! Idia hadikaia tanona be paradaiso ai ia lao. To, unai bona idia vara peroveta herevadia ma haida ese idia hahedinaraia taunimanima be do idia idau danu, idia hadikaia tanona be anina ia havaraia tanona ai do ia lao bamona. Dahaka dainai unai bamona ita gwau diba? Badina Isaia be “Lohiabada ese ia hoia lou taudia” ia laloa, idia be “mai moale bada danu” edia tano dekenai do idia giroa bona “do idia moale ela bona hanaihanai.” (Isaia 35:10) Unai be tano korikorina lasi, to taunimanima ia herevalaia. Ma danu, Isaia ese siri ma haida dekenai Siona dekenai idia giroa lou taudia ia herevalaia: “Idia be au namodia bamona, Lohiabada sibona ese ia hadoa gaudia, bona idia ibounai ese kara maoromaoro do idia karaia. . . . Uhe idia tubu noho bona idia vara noho . . . bamona . . . Lohiabada Dirava ese iena bese taudia do ia hamauria momokani. Vadaeni bese idauidau taudia ibounai ese, Lohiabada do idia hanamoa.” Isaia be Dirava ena taunimanima ma ia herevalaia: “Lau [Iehova] ese nega ibounai umui do lau hakaua. . . . Lau ese goada bona mauri namona, be umui dekenai do lau henia. Umui be uma mai ena ranu momo bamona do umui lao.” (Isaia 58:11; 61:​3, 11; Ieremia 31:​10-12) Unai dainai, tano korikorina ena toana do ia namo hegeregerena, idia giroa lou Iuda taudia do idia idau.

 9. Paulo ese edena “paradaiso” ia itaia, bona edena negai ia guguru?

⁹ Unai idaunegai sivaraina ese ita ia durua Paulo ese matahanai lalonai ia itaia gauna ita lalo-pararalaia totona. Unai matahanai be Keristani kongrigeisen ia gwauraia, bona Paulo ese ia gwauraia “Dirava ena uma gabu,” bona anina idia havaraia be namo. (1 Korinto 3:⁠9) Unai matahanai be edena negai ia guguru? Paulo ia gwau ia itaia gauna be ‘Dirava ese ia hahedinaraia herevadia,’ vaira negana ai do ia vara gauna. Ia diba ia mase neganai hereva momokani negea karana do ia bada momokani. (2 Korinto 12:1; Kara 20:​29, 30; 2 Tesalonika 2:​3, 7) Hereva momokani negea taudia idia kwalimu bona Keristani taudia momokanidia idia koua dainai, Keristani taudia momokanidia be uma namona bamona idia noho lasi. To, nega do ia mai tomadiho momokanina idia abia isi lou totona. Dirava ese ena taunimanima do ia hanamoa lou, unai amo “kara maoromaoro taudia be edia Tamana ena Basileia lalonai do idia diaridiari, dina bamona.” (Mataio 13:​24-30, 36-43) Guba dekenai Dirava ena Basileia ia gini bona lagani haida murinai unai ia vara momokani. Bona lagani momo murinai, ia hedinarai Dirava ena taunimanima be lauma paradaisona idia moalelaia, Paulo ese ena matahanai lalonai ia itaia hegeregerena.

10, 11. Herevana ita be goevadae lasi taudia, to dahaka dainai ita gwau diba ita be lauma paradaisona lalonai ita noho?

¹⁰ Oibe, ita diba ita ibounai be goevadae lasi taudia dainai, nega haida iseda huanai hekwakwanai idia vara neganai ita hoa lasi, Paulo ena negai idia noho Keristani taudia huanai be unai bamona ia vara danu. (1 Korinto 1:​10-13; Filipi 4:​2, 3; 2 Tesalonika 3:​6-14) To, hari ita moalelaia lauma paradaisona mani ita laloa. Guna ita be lauma dalanai ita gorere bamona, to hari ita namo vadaeni. Bona guna ita be lauma dalanai ita hitolo, to hari be lauma dalanai ita bogakunu momokani. Dirava ena taunimanima be ia kaukau lauma tanona dekenai idia hekwarahi lasi, to Dirava ena lalo-namo bona hahenamo momo idia abia. (Isaia 35:​1, 7) Ita be lauma diburana lalonai ita matakepulu lasi, to ita be ura kwalimu diarina bona Dirava ena lalo-namo ita itaia. Baibel ena peroveta herevadia idia kamonai lasi taudia momo be Baibel ena hereva idia kamonai bona lalo-pararalaia. (Isaia 35:⁠5) Hegeregere, tanobada hegegemadai Iehova ena Witnes taudia milioni momo herea be Daniela ena peroveta herevana, ena siri ta ta, idia stadilaia. Bena idia ese Isaia bukana ena karoa ta ta idia stadilaia. Unai hagoadaia lauma aniani ita abia ese ia hahedinaraia goevagoeva, ita be lauma paradaisona lalonai ita noho, ani?

¹¹ Danu, mauri daladia idauidau kudou maoro taudia idia hekwarahi Dirava ena Hereva idia lalo-pararalaia bona badinaia dainai, edia kara idia haidaua karana mani oi laloa. Momokani, idia hekwarahi dainai guna idia hahedinaraia dagedage karadia idia rakatania vadaeni. Reana oi bona emu lauma tadikaka bona taihu be unai bamona umui karaia bona anina namona umui havaraia. (Kolose 3:​8-14) Unai dainai, Iehova ena Witnes taudia edia kongrigeisen ta oi bamoa neganai, oi be maino bona moale ai idia lao taudia huanai oi noho. Ena be idia be goevadae lasi taudia, to ita gwau diba lasi idia be laiona dikadia eiava dagedage animal bamona. (Isaia 35:⁠9) Unai bamona hebamo heheni karana lauma dalanai ese dahaka ia hahedinaraia? Ia hedinarai goevagoeva, ita moalelaia noho dalana lauma dalanai be lauma paradaisona ita gwauraia diba be maoro. Bona iseda lauma paradaisona ese tanobada paradaisona ia laulaulaia, bona do ita moalelaia bema Iehova ita badinaia noho.

12, 13. Lauma paradaisona lalonai ita noho totona dahaka ita karaia be namo?

¹² To, gau ma ta ita diba danu be namo. Dirava ese Israela taudia ia hamaoroa: “Hari dina umui dekenai lau henia noho Taravatu ibounai do umui kamonai henia. Unai neganai goada do umui davaria, Ioridane Sinavai do umui hanaia totona, bona do umui noholaia tano do umui abia totona.” (Deuteronomi 11:⁠8) Levitiko 20:​22, 24 ese danu unai tano tamona ia herevalaia: “Lauegu taravatu bona oda ibounai do umui kamonai henia, vadaeni umui dekenai do lau henia tano dekenai noho Kanana taudia ese umui do idia lulua lao lasi. To lau ese umui dekenai lau gwauhamata vadaeni, unai taudia edia tano be umui dekenai do lau henia, emui tano korikori. Inai tano be namo herea, rata bona hani dekenai ia honu tanona.” Oibe, Israela taudia ese Gwauhamata Tanona idia abia totona, Iehova Dirava ida idia hetura namonamo be gau badana. To Israela taudia be Dirava idia badinaia lasi dainai, Babulonia taudia ese Israela taudia idia tuari henia bona edia noho gabuna amo idia kokidia neganai, Dirava ese unai ia koua lasi.

¹³ Reana ita be lauma paradaisona ai gau momo ita moalelaia. Ita noho gabuna be mai hairai bona eda hemami ia hanamoa. Dagedage karadia idia rakatania Keristani taudia danu maino ai ita noho. Idia hekwarahi noho idia manau bona heduru idia henia totona. To, lauma paradaisona lalonai ita noho totona, idia ida ita hetura namonamo sibona be hegeregere lasi. Gau badana be, Iehova ida ita hetura namonamo bona ena ura ita karaia. (Mika 6:⁠8) Ita be sibona eda ura dainai inai lauma paradaisona lalonai ita vareai, to bema Iehova ida iseda hetura karana ita naria namonamo lasi, do ita manoka diba​​—⁠eiava ita do idia atoa siri diba.

14. Dahaka ese ita do ia durua lauma paradaisona lalonai ita noho totona?

¹⁴ Ita do ia durua gauna badana ta be, Dirava ena Hereva amo goada ita abia noho be namo. Salamo 1:​1-3 ai idia gaukaralaia laulau herevana mani oi laloa: “Inai bamona taudia be idia moale momokani: Idia ese kara dika taudia edia sisiba, bona edia laloa idia abia dae lasi. . . . Ma inai taudia ese, Lohiabada ena Taravatu dekenai idia moale, bona Lohiabada ena Taravatu idia laloa, dina bona hanuaboi ibounai lalonai. Ma inai taudia be, sinavai badinai idia hadoa audia bamona, edia huahua atoa neganai, idia ese anina idia atoa bada herea. Edia raurau danu do idia kakoro lasi. Edia gaukara ibounai be ena anina ia vara, bona mai edia kwalimu danu.” Danu, lauma paradaisona dekenai, hesiai tauna mai ena kamonai bona mai ena kara maoromaoro oreana ese Baibel idia herevalaia bukadia amo lauma aniani idia henia.​—⁠Mataio 24:​45-47.

Paradaiso Oi Laloa Noho Karana Hagoadaia

15. Dahaka dainai Mose ese Israela taudia be Gwauhamata Tanona dekenai ia hakaudia vareai lasi, to dahaka ia itaia?

¹⁵ Paradaiso ena toana ia hahedinaraia gauna ma ta oi laloa. Israela taudia be lagani 40 lalonai tano gagaena dekenai idia loaloa murinai, Mose ese idia be Moaba tanona ena tano palaka gabuna, Ioridane Sinavaina ena ist kahana dekenai ia hakaudia lao. Mose ena kerere gunana ta dainai, Iehova ese Mose ia hamaoroa Israela taudia be Ioridane Sinavaina amo do ia hakaudia hanai lasi. (Numera 20:​7-12; 27:​12, 13) Mose be Dirava ia noia: “Mani emu kara lau ura Ioridane Sinavai do lau hanaia, tano palaka namona, . . . do lau itaia.” Ena be Mose be unai tano dekenai do ia vareai lasi, to Pisiga Ororona dekenai ia daekau bona unai tano ena kahana idauidau ia itaia murinai, reana ia diba unai tano be ‘tano namona.’ Oi laloa unai tano ena toana be edena bamona?​—⁠Deuteronomi 3:​25-27.

16, 17. (a) Edena dala ai idaunegai Gwauhamata Tanona be hari ia noho tanona amo ia idau? (b) Dahaka dainai ita abia dae diba guna Gwauhamata Tanona ena toana be paradaiso ta bamona?

¹⁶ Bema hari unai gabu dekenai idia vara gaudia hegeregerena oi laloa, reana do oi laloa unai gabu be miri sibona, nadi, tano kaukau bona siahu bada gabuna. To, badina namona dainai ita gwau diba Baibel negadiai unai gabu ena toana be idau. Ranu bona tano ia stadilaia diba bada tauna ta ladana, Dr. Walter C. Lowdermilk, be ena buka (Scientific American) lalonai ia hahedinaraia, unai tano be “lagani tausen lalonai taunimanima ese idia hadikaia.” Ia gwau: “Unai guna ia noho tano namona be taunimanima edia kara dainai ‘tano kaukauna’ ai ia lao.” Iena stadi ese ia hahedinaraia “guna unai tano be animal edia rei gabuna namo hereana, bona ena toana be paradaiso ta bamona.” To taunimanima ese idia naria namonamo lasi dainai, unai “rei gabuna namo hereana” idia hadikaia.a

¹⁷ Baibel ai oi duahia gauna oi laloa neganai, oi gwau diba Gwauhamata Tanona ena toana be paradaiso ta bamona. Iehova ese Mose amo taunimanima ia hagoadaia herevana mani oi laloa: “Do umui abia totona Ioridane Sinavai do umui raka hanaia tano be ororo bona koura tanona, guba ena medu ese ia hapariparia tano. Lohiabada, emui Dirava ese inai tano ia naria noho.”​—⁠Deuteronomi 11:​8-12.

18. Edena bamona Isaia 35:2 ena hereva ese idau gabu ai idia noho Israela taudia ia durua Gwauhamata Tanona ena toana idia diba totona?

¹⁸ Gwauhamata Tanona be rei gabuna mai hairai bona aniani bada gabuna dainai, Israela taudia be ena tano haida edia ladana sibona idia kamonai neganai, paradaiso bamona gabuna idia laloa. Isaia karoa 35 ena peroveta herevana ese unai ia hahedinaraia goevagoeva, Israela taudia be Babulonia idia rakatania neganai, unai hereva be nega ginigunana ia guguru. Isaia ia peroveta: “Taunimanima idia noho lasi tano dekenai, palauapalaua do idia vara, bona mai moale bada danu ane do idia abia. Unai tano ena hairaina, be dohore Lebanona ena ororo bamona, bona tano ena goada be, Karamele bona Sarona edia goada hegeregerena. Taunimanima ibounai ese Lohiabada ena hairaina do idia itaia. Iena diaridiari badana, bona iena siahu do idia itaia.” (Isaia 35:⁠2) Reana Israela taudia ese Lebanona, Karamele bona Sarona idia kamonai neganai, idia ese tano namo hereana ena toana idia laloa.

19, 20. (a) Idaunegai Sarona hanuana ena toana mani oi kikilaia. (b) Iseda helaro Paradaiso totona do ita hagoadaia dalana ta be dahaka?

¹⁹ Sarona ita laloa, ia be Samaria ena ororo maragidia bona Davara Badana, eiava Meditereinien, edia huanai ia noho kone hanuana. (Rau 10 ai laulau itaia.) Taunimanima momo be unai gabu idia diba, badina ia be mai ena hairai bona aniani momo gabuna. Ia be mai ena ranu bona rei gabu namona animal idia ania totona, to ena not kahana ena uda badadia ai be oak audia idia tubu. (1 Sivarai 27:29; Solomona ena Ane 2:1; Isaia 65:10) Unai dainai, Isaia 35:2 be ia namo lou tano mai hairaina ta ia perovetalaia, unai tano ena toana be paradaiso bamona. Unai peroveta herevana be lauma paradaiso namo hereana ta ia kikilaia danu, unai be aposetolo Paulo ese gabeai matahanai lalonai ia itaia gauna bamona. Dokonai, unai peroveta herevana bona peroveta hereva ma haida ese eda helaro, tanobada paradaisona be taunimanima ese do idia noholaia helarona, ia hagoadaia.

²⁰ Lauma paradaisona lalonai ita noho neganai, namona be unai paradaiso bona eda tanobada Paradaiso helarona totona eda tanikiu karana ita hahedinaraia. Edena dala amo? Baibel lalonai ita duahia gaudia dekenai iseda lalo-parara ita habadaia karana amo. Baibel ena sivarai bona peroveta herevadia be nega momo gabu haida edia ladana maorodia idia gwauraia. Oi ura diba unai gabu be edeseniai idia noho bona edena hanua badinai idia noho, a? Stadi gabena ai, do ita itaia edena dala ai unai bamona ita karaia amo namo do ita abia.

[Footnote]

Oi Laloatao, A?

• Edena “paradaiso” be Paulo ese matahanai lalonai ia itaia?

• Isaia karoa 35 be edena negai ia guguru guna, bona edena bamona ia be Paulo ia itaia matahanaina hegeregerena?

• Edena dala ai lauma paradaiso bona eda tanobada paradaiso helarona totona eda tanikiu karana ita hahedinaraia diba?

[Picture on page 10]

Sarona ena tano palaka gabuna, aniani momo herea gabuna Gwauhamata Tanona dekenai

[Credit Line]

Pictorial Archive (Near Eastern History) Est.

[Picture on page 12]

Mose ia diba unai be ‘tano namona’