“Keriso Ena Lalokau Do Umui Diba”

1-3. (a) Dahaka dainai Iesu ia ura iena Tamana ena kara ia tohotohoa? (b) Dahaka daladia toi amo Iesu ese ena lalokau ia hahedinaraia?

ENA tamana ena kara ia ura tohotohoa mero maragina ta oi itaia vadaeni, a? Unai mero be reana ena tamana ena raka, hereva bona kara ia tohotohoa. Gabeai, reana mero be ena tamana ese ia badinaia kara goeva bona taravatudia ia badinaia danu. Oibe, mero ese ena tamana ia lalokau henia bona ia laloa bada, bona unai ese ia veria ena tamana bamona ia kara totona.   

² Iesu bona ena guba Tamana huanai ia noho hetura karana be edena bamona? Nega ta Iesu ia gwau: “Tamana lau lalokau henia.” (Ioane 14:31) Taunimanima ta ese Iehova do ia lalokau henia lasi Iesu ese ia lalokau henia bamona, taunimanima bona aneru idia do noho lasi neganai, Iesu be nega daudau herea lalonai ena Tamana ida ia noho vadaeni. Unai lalokau ese Natuna ia veria ena Tamana bamona ia kara totona.​—Ioane 14:9.    

³ Inai buka ena karoa ginigunadia lalonai, Iesu ese Iehova ena siahu, hahemaoro goeva, bona aonega ia tohotohoa goevagoeva dalana ita herevalaia. To, Iesu ese edena dala ai ena Tamana ena lalokau ia hahedinaraia? Iesu ese lalokau ia hahedinaraia daladia toi do ita herevalaia, sibona ena ura ia dadaraia, ena hebogahisi, bona mai ena ura ida dika ia gwauatao karadia.

 4. Iesu ese sibona ena ura dadaraia lalokauna dekenai, edena dala ai haheitalai hereadaena ia hahedinaraia?

⁴ Iesu ese sibona ena ura dadaraia lalokauna dekenai, haheitalai hereadaena ia hahedinaraia. Sibona eda ura dadaraia, anina be ma haida edia dabu gaudia bona idia lalohekwarahilaia gaudia ita laloa. Iesu ese unai bamona lalokau be edena bamona ia hahedinaraia? Ia ese unai ia gwauraia hedinarai: “Lalokau karana hereadaena be inai, tau ta ese ena turadia totona ena mauri do ia atoa diho.” (Ioane 15:13) Iesu be mai ena ura ida ena mauri goevadaena be ita totona ia henia. Ia be taunimanima ta ese ia hahedinaraia diba lasi lalokau hereadaena ia hahedinaraia. To Iesu ese dala ma haida amo sibona ena ura dadaraia lalokauna ia hahedinaraia danu.

 5. Dahaka dainai Dirava ena Natuna tamona ese sibona ena ura ia dadaraia bona guba ia rakatania be lalokau karana?

⁵ Dirava ena Natuna tamona sibona be guba ai ia noho neganai, dagi badana ia dogoatao. Iehova bona aneru momo herea ia tura henidia. Herevana unai lalokau Natuna ese unai gau namodia ia moalelaia, to “gau ibounai ia rakatania bona hesiai tauna bamona ai ia lao. Ia be taunimanima ta ai ia lao.” (Filipi 2:7) “Dika Tauna ena siahu lalonai ia noho” tanobadana ai mai ura ida ia diho mai bona kara dika taudia huanai ia noho. (1 Ioane 5:19) Momokani, Dirava ena Natuna be sibona ena ura dadaraia lalokauna ia hahedinaraia, ani?

6, 7. (a) Iesu be tanobada ai hesiai gaukara ia karaia lalonai, edena dala idauidau ai sibona ena ura dadaraia lalokauna ia hahedinaraia? (b) Sibona ena ura dadaraia lalokauna dekenai, dahaka haheitalai namona be Ioane 19:25-27 ai ia noho?

⁶ Iesu ena tanobada hesiai gaukara ibounai lalonai, sibona ena ura dadaraia lalokauna be dala idauidau ai ia hahedinaraia. Ia be sibona ena namo ia dadaraia. Ena hesiai gaukara ia laloa bada dainai, taunimanima ese vaia edia mauri lalonai idia abia gaudia be ia abia lasi. Ia gwau: “Uda sisia be mai edia kohua bona guba manudia be mai edia ruma, to taunimanima ena Natuna ena kwarana ia atoa gabuna be lasi.” (Mataio 8:20) Iesu be kapenta tauna namona dainai, nega ia atoa diba ia sibona ena ruma namona ta ia haginia eiava moni ma haida abia totona, sea o teibolo namodia ia karaia bona ia hoihoilaia diba. To iena diba ia gaukaralaia lasi kohu ia abia totona.

⁷ Iesu ese sibona ena ura dadaraia lalokauna ia hahedinaraia ena haheitalai ta be, Ioane 19:25-27 ai ia noho. Iesu do ia mase adorahina ai, gau momo herea ia laloa. Hisihisi auna ai ia noho neganai, ena hahediba taudia, haroro gaukara bona iena abidadama karana ese ena Tamana ena ladana do ia hanamoa eiava lasi ia laloa. Momokani, vaira negana ai taunimanima do idia mauri hanaihanai ena helaro be Iesu ena imana dekenai ia noho! Danu, Iesu ia mase gwauraia neganai, iena sinana Maria, ia be ia vabu vadaeni, ia totona ia laloa momo. Iesu ese aposetolo Ioane ia noia Maria be ena sinana bamona do ia naria, bona unai murinai Ioane ese Maria be ena ruma dekenai ia hakaua lao. Oibe, Iesu be ena sinana totona dala ia karaia ta ese tauanina dalanai ia naria bona ia durua Iehova kahirakahira ia noho totona. Unai amo sibona ena ura dadaraia lalokau hereadaena ia hahedinaraia!

 8. Iesu ena hebogahisi herevalaia totona, Baibel ese ia gaukaralaia Greek herevana ena anina be dahaka?

⁸ Iesu be ena Tamana bamona, ia be mai ena hebogahisi. Baibel ia gwau Iesu ia hekwarahi hisihisi idia abia taudia ia durua totona, badina idia ia hebogahisi henia bada. Iesu ena hebogahisi karana herevalaia totona, Baibel ese inai Grik herevana “hebogahisi” ia gaukaralaia. Diba bada tauna ta ia gwau: “Unai kara be . . . tau ta ese ena lalona momokani ai ia mamia hemami goadana ta. Unai hereva ese Grik herevana, hebogahisi bada ena anina ia hahedinaraia.” Idia vara gaudia haida dekenai unai do ita itaia, Iesu be ena kara amo unai hebogahisi bada karana ia hahedinaraia.

9, 10. (a) Dahaka dainai Iesu bona ena aposetolo taudia idia ura taunimanima noho lasi gabuna ta dekenai idia lao? (b) Hutuma be Iesu ena laga-ani negana idia hadikaia neganai, dahaka ia karaia bona dahaka dainai?

⁹ Taunimanima ia hebogahisi henia dainai ia hadibaia. Mareko 6:30-34 dekenai ia noho sivaraina ese Iesu be taunimanima dekenai ia hebogahisi ena badina badana ia hahedinaraia. Mani idia vara gaudia oi laloa. Aposetolo taudia idia moale, badina haroro gaukara badana idia haorea. Iesu dekenai idia giroa lou bona mai moale ida idia itaia bona kamonai gaudia ibounai idia herevalaia. To hutuma idia haboua, bona Iesu bona ena aposetolo taudia be nega lasi idia aniani totona. Iesu ia itaia ena aposetolo taudia idia hesiku bada. Idia ia hamaoroa, ia gwau: “Namona be taunimanima lasi gabuna dekenai ita lao bona umui laga-ani sisina.” Bouti ta dekenai idia guia, bona Galilea Gohuna ena not kahana, taunimanima lasi gabuna dekenai idia lao. To idia lao neganai hutuma ese idia itaia. Ma haida be idia lao gabuna idia dibaia danu. Vadaeni, idia ibounai be kone dekenai idia heau lao bona bouti ia do ginidae lasi neganai, idia ginidae guna!

¹⁰ Iesu ena laga-ani negana idia hadikaia dainai ia badu henidia, a? Lasi vaitani! Iesu ese ia idia naria hutuma tausen momo ia itaia neganai, ia hebogahisi bada. Mareko ia gwau: “Taunimanima hutuma ia itaia bona ia hebogahisi henidia, badina idia be mamoe naria tauna ese ia naria lasi mamoe bamona. Bona idia dekenai gau momo ia hadibaia matamaia.” Iesu ia itaia unai taudia ta ta be ta ese ia hakaua be namo. Idia be mamoe boio mamoe bamona, mamoe naria tauna ese ia hakaua eiava gimaia lasi. Ia itaia tomadiho gunalaia taudia ese edia mamoe idia hebogahisi henia lasi bona lalokau henia lasi. (Ioane 7:47-49) Unai dainai, taunimanima ia hebogahisi henia bada, bona idia dekenai “Dirava ena Basileia” ia hadibaia matamaia. (Luka 9:11) Unai amo ita itaia diba, Iesu be taunimanima ia hebogahisi henia, ena be ia hadibaia gaudia do idia badinaia eiava lasi. Oibe, Iesu dekenai unai hebogahisi ia noho vadaeni dainai, taunimanima ia hadibaia matamaia.

11, 12. (a) Baibel negadiai, taunimanima ese lepera taudia be edena bamona idia laloa, to “lepera gorere ese ena tauanina ibounai ia hadikaia tauna ta” be Iesu dekenai ia lao neganai, Iesu be dahaka ia karaia? (b) Iesu ese lepera tauna ia dogoatao neganai, lepera tauna ena hemami be edena bamona, bona doketa ta ena sivarai ese edena bamona unai ia hahedinaraia?

¹¹ Hebogahisi dainai hisihisi idia abia taudia ia durua. Gorere idauidau taudia idia mamia Iesu be hebogahisi tauna, unai dainai idia ura ia dekenai idia lao. Nega ta unai ia hamomokania, hutuma be Iesu murinai idia lao neganai, “lepera gorere ese ena tauanina ibounai ia hadikaia tauna ta” be Iesu dekenai ia lao. (Luka 5:12) Baibel negadiai, lepera taudia be taunimanima amo idia noho daudau, unai amo ma haida be unai gorere do idia abia lasi. (Numera 5:1-4) To gabeai, rabi taudia badadia be lepera taudia idia hebogahisi henia lasi, bona sibodia edia taravatu aukadia idia atoa.a To, mani Iesu ese unai lepera tauna ia kara henia dalana oi itaia: “Lepera tauna ta be Iesu dekenai ia mai, ia tui diho bona ia noinoi: ‘Bema oi ura, lau do oi hanamoa.’ Iesu ese unai tauna ia hebogahisi henia dainai, ena imana ia toia roro, unai tauna ia dogoatao bona ia gwau: ‘Oibe, lau ura! Harihari oi namo.’ Maoromaoro ena lepera gorere ia ore bona unai tauna ia namo.” (Mareko 1:40-42) Iesu ia diba lepera tauna be taunimanima huanai ia noho be taravatu. To, Iesu be unai tauna ia lulua lasi, ia dekenai ia hebogahisi bada dainai gau idauna ta ia karaia. Iesu ese lepera tauna ia dogoatao!

¹² Iesu ese lepera tauna ia dogoatao neganai, ena hemami mani oi laloa. Unai haheitalaia totona, mani sivarai ta ita laloa. Lepera gorere ia diba momo tauna, Dr. Paul Brand be India dekenai ia durua lepera tauna ta ena sivarai ia gwauraia. Doketa ese unai lepera tauna ia sekea lalonai, ena imana be lepera tauna ena pagana latanai ia atoa bona gado hahanaia hahinena ta amo lepera tauna ia hadibaia, ena gorere hanamoa totona dahaka muramura do ia abia. Lepera tauna ia tai matamaia. Doketa ia henanadai, “Hereva kererena ta lau gwauraia, a?” Bena gado hahanaia hahinena be gado dekenai unai tau matamatana ia nanadaia bena doketa ia hamaoroa: “Lasi, doketa. Ia gwau ia tai badina emu imana be ena pagana latanai oi atoa. Lagani momo herea lalonai tau ta ese ia dogoatao lasi.” Lepera tauna be Iesu dekenai ia lao bona Iesu ese ia dogoatao karana be mai anina bada. Iesu ese nega tamona sibona ia dogoatao murinai, ena gorere—taunimanima ese unai dainai ia idia dadaraia gorerena—ia ore!

13, 14. (a) Iesu be Naina siti ia lao henia neganai, dahaka ia vara, bona dahaka dainai unai be hebogahisi bada negana? (b) Iesu be hebogahisi karana dainai Naina vabuna totona dahaka ia karaia?

¹³ Hebogahisi dainai idia taitai taudia ia durua. Iesu be taunimanima edia lalohisihisi ia itaia neganai, ia hebogahisi bada. Hegeregere, Luka 7:11-15 ai ia noho sivaraina ita laloa. Iesu be Galilea ena siti ladana Naina kahirakahira ia ginidae neganai unai ia vara, unai neganai ia be kahirakahira lagani rua ena hesiai gaukara ia karaia vadaeni. Unai siti ena geiti ia lao henia neganai, ia itaia mase tauanina ta idia huaia lao. Unai tauna ena mase ese lalohisihisi bada ia havaraia. Mero matamata ta ia mase bona ia be vabu ta ena natuna tamona sibona. Guna danu, ena tau ia mase neganai, vabu be unai bamona ia raka lao. To hari ena natuna mero ia mase, reana unai natuna sibona ese tauanina dalanai ena sinana ia naria. Ia ida idia raka taudia be reana mai taitai ida edia lalohisihisi herevadia idia anelaia bona miusiki mai hebogahisina idia gadaralaia. (Ieremia 9:17, 18; Mataio 9:23) Iesu be unai sinana ia itaia, ia lalohisihisi bada herea, bona ena natuna idia huaia patana badinai ia raka.   

¹⁴ Iesu be ia mase merona ena sinana “hebogahisi henia.” Mai gado namo ida ia hamaoroa, ia gwau: “Oi taitai lasi.” Ena be idia noia lasi, to ia lao bona mase tauna ia hekure patana ia dogoatao. Mase tauanina idia huaia taudia—bona reana hutuma danu—idia gini. Mai gado goadana ida Iesu be mase tauanina dekenai ia gwau: “Mero matamata e, oi lau hamaoroa, oi toreisi!” Bena dahaka ia vara? “Mase merona ia toreisi, ia helai bona ia hereva matamaia,” toana be mahuta amo ia noga bamona! Bena moale bada gauna be inai: “Iesu ese ena sinana dekenai ia henia.”

15. (a) Edena dala ai, Baibel ena sivarai ese ia hahedinaraia Iesu ena hebogahisi be mai ena kara? (b) Edena bamona Iesu ita tohotohoa diba?

¹⁵ Unai sivarai idauidau amo dahaka ita dibaia? Unai sivarai ta ta ai, ita itaia gauna be hebogahisi be mai ena kara. Hanaihanai Iesu ese taunimanima edia hisihisi bona metau ia itaia neganai, ia hebogahisi henidia, bona ena hebogahisi dainai idia totona kara ta ia karaia. Edena bamona ena haheitalai ita tohotohoa diba? Ita be Keristani taudia dainai, ita be mai iseda maduna sivarai namona do ita harorolaia bona hahediba taudia ita halaoa. Unai ita karaia ena badina badana be Dirava ita lalokau henia. Danu, namona be ita laloatao, inai gaukara be hebogahisi dainai ita karaia. Iesu bamona, taunimanima ita hebogahisi henia neganai, unai ese iseda kudouna ia veria bona ita gaukara goada idia dekenai sivarai namona ita harorolaia. (Mataio 22:37-39) Metau eiava mase dainai idia lalohisihisi tadikaka bona taihu dekenai hebogahisi ita hahedinaraia be namo, ani? Hoa dalanai hisihisi do ita hanamoa lasi eiava ia mase tauna do ita hatorea isi lou lasi. To, iseda hebogahisi be iseda kara amo ita hahedinaraia diba, ita hamaorodia idia ita laloa bada eiava gau haida ita karaia diba idia ita durua totona.​—Efeso 4:32.    

16. Ena be hisihisi auna dekenai Iesu idia kokoa, to edena dala ai mai ura ida kara dika gwauatao karana ia hahedinaraia?

¹⁶ Iesu ese ena Tamana ena lalokau be mai anina bada dalana ma ta amo ia hahedinaraia—ia “noho hegaegae dika gwauatao totona.” (Salamo 86:5) Hisihisi auna dekenai idia kokoa neganai, unai ura bada karana ia hamomokania danu. Hemarai dalana ai ia idia hamasea, ena imana bona aena be ikoko amo idia kokoa, to Iesu be dahaka ia hereva? Iehova ia boiboi henia ia idia hamasea taudia ia panisidia totona, a? Lasi, to Iesu ena hereva ginigabedia lalonai ia gwau: “Egu tamana e, edia dika oi gwauatao, badina idia diba lasi dahaka idia karaia noho.”​—Luka 23:34.b

17-19. Edena dala haida ai Iesu ia hahedinaraia aposetolo Petero ia gwauatao?

¹⁷ Iesu ena gwauatao karana ia hahedinaraia namonamo haheitalai namona ta be, aposetolo Petero ia kara henia dalana. Ita diba Petero ese Iesu ia lalokau henia momokani. Nisan 14 ai, Iesu do ia mase hanuaboina ai, Petero ese Iesu ia hamaoroa: “Lohiabada e, lau hegaegae oi ida dibura ruma dekenai do lau lao bona oi ida do lau mase.” To, hora haida sibona murinai, Petero ese nega toi Iesu dekenai ia gwau oi lau diba lasi! Petero ese nega ihatoina ai unai hereva ia gwauraia neganai, Baibel gwau: “Lohiabada ia giroa bona Petero ia itaia.” Petero be ena kara dika dainai ia lalometau bada bona “murimuri ai ia lao bona ia tai dikadika.” Gabeai unai dina ai Iesu ia mase neganai, reana Petero ia laloa, ‘Egu Lohiabada ese lau ia gwauatao, eiava?’​—Luka 22:33, 61, 62.

¹⁸ Petero ia naria daudau lasi unai henanadai ena haere ia abia totona. Iesu be Nisan 16 ena daba ai ia toreisi lou, bona unai dina tamona ai, Petero ia vadivadi henia. (Luka 24:34; 1 Korinto 15:4-8) Dahaka dainai Iesu ese Petero, mai ena goada ida ia gorea tauna, ia itaia guna? Reana Iesu ia ura ia helalo-kerehai tauna, Petero ia hagoadaia, iena Lohiabada ese ia do lalokau henia bona ia laloa bada noho. To Iesu ese Petero ia hagoadaia sibona lasi, gau ma haida ia karaia danu.

¹⁹ Gabeai, Iesu be Galilea Gohuna dekenai ena hahediba taudia dekenai ia hedinarai. Unai nega ai, Iesu ese nega toi, Petero (nega toi ena Lohiabada ia gorea tauna), ia nanadaia bema ia ese ia lalokau henia eiava lasi. Nega ihatoina ia nanadaia murinai, Petero ia haere: “Lohiabada e, oi be gau ibounai oi diba. Oi diba lau be oi lau lalokau henia.” Oibe, Iesu be taunimanima edia kudouna ia itaia diba, unai dainai ia diba vadaeni Petero be ia lalokau henia bada. To, Iesu be Petero dekenai dala ia kehoa ena lalokau ia dekenai ia hamomokania totona. Ma danu, Iesu ese Petero ia hagania iena “mamoe” ia “ubua” bona ia “naria.” (Ioane 21:15-17) Guna, Petero be sivarai namona harorolaia gaukarana ia abia dae. (Luka 5:10) To hari, Iesu ia hahedinaraia Petero ia abidadama henia bada, ia dekenai maduna badana ia henia—Keriso ena murinai idia raka taudia ia naria totona. Daudau lasi murinai, Iesu ese Petero dekenai hahediba taudia edia gaukara lalonai maduna badana ia henia. (Kara 2:1-41) Reana Petero ia moale bada badina ia diba Iesu ese ia gwauatao bona ia do abidadama henia!

20, 21. Edena dala ai “Keriso ena lalokau” do ita diba namonamo?

²⁰ Momokani, Iehova ena Hereva ese Keriso ena lalokau ia gwauraia hedinarai namonamo. Iesu ena lalokau dainai, dahaka ita karaia be namo? Baibel ese ita ia hagoadaia: “Keriso ena lalokau do umui diba, unai lalokau ese diba ia hereaia.” (Efeso 3:19) Ita herevalaia vadaeni, Iesu ena mauri bona hesiai gaukara edia sivarai Evanelia bukadia lalonai ese Keriso ena lalokau dekenai gau momo idia hadibaia. To, ‘Keriso ena lalokau ita diba’ namonamo totona, Baibel ese Iesu ia sivarailaia gaudia sibona ita dibaia be hegeregere lasi.

²¹ Greek herevana idia hahanaia “do umui diba” ena anina be emu “ekspiriens amo, diba abia karana.” Iesu ia hahedinaraia lalokauna ita tohotohoa, ita ese ma haida edia namo do ita laloa, idia ita durua, mai hebogahisi ida edia dabu gaudia ita henia, iseda kudouna amo idia ita gwauatao neganai, Iesu ena lalohadai ita lalopararalaia momokani diba. Unai dala amo ‘Keriso ena lalokau ita diba, unai lalokau ese diba ia hereaia.’ Bona namona be ita laloaboio lasi, Keriso bamona ita kara neganai, Iesu ese ia tohotohoa namonamo tauna, iseda lalokau Diravana, Iehova, kahirakahira do ita lao.