Oi ese ‘Nega Oi Haorea Kava,’ A?

APOSETOLO Paulo ese Keristani taudia ginigunadia Efeso dekenai ia sisiba henidia, ia gwau: “Unai dainai umui emui kara do umui naria namonamo. Aonega taudia bamona do umui noho, kavakava taudia bamona lasi. Harihari emui nega namona ia noho Dirava ena kara do umui karaia totona. Emui nega do umui haorea kava lasi, badina hari nega be nega dikana.” (Efeso 5:​15, 16) Dahaka dainai unai sisiba ia henia be maoro? Unai henanadai ena haere davaria totona, unai siti gunana dekenai idia noho Keristani taudia ese idia davaria gaudia ita diba be namo.

Efeso hanua be taga bada, lebulebu kara dikadia momo, taravatu utua karadia, bona meamea karadia idauidau momo gabuna. Danu, taunimanima be tanobada ena aonega hegeregerena nega idia laloa bona unai ese unuseniai idia noho Keristani taudia dekenai hekwakwanai ia havaraia. Efeso dekenai Keristani lasi Greek taudia idia abia dae lasi nega be kahana tamona dekenai ia lao. Greek lalohadaina hegeregerena mauri be ia doko diba lasi, to ia vara loulou. Ena mauri lalonai nega ia gaukaralaia namonamo lasi tauna be ma mauri ta lalonai unai nega ibounai do ia abia lou. Unai bamona lalohadai ese Efeso Keristani taudia ia veria diba, bena Iehova ese do ia karaia gaudia bona iena hahemaoro totona ia atoa nega idia laloa bada lasi. Unai dainai, Paulo ena sisiba ‘nega idia haorea kava lasi’ totona be ia maoro.

Paulo be taunimanima ese vaia idia laloa nega sibona ia herevalaia lasi. Ia gaukaralaia Greek herevana ena anina be, idia abia hidi negana ta, gau ta idia karaia be namo ena nega. Paulo be Keristani taudia ginigunadia ia sisiba henia, idia moalelaia noho nega namona ena dokona ia do mai lasi bona Dirava ena hebogahisi bona ia kehoa mauri abia dalana ia do ia kokia lasi negana do idia gaukaralaia namonamo.​—⁠Roma 13:​11-13; 1 Tesalonika 5:​6-11.

Ita be unai bamona nega namona lalonai ita noho danu. Keristani taudia ese tanobada ena moale karadia, idia noho daudau lasi moale karadia, dekenai edia nega namona idia haorea kava lasi be namo, to idia aonega bema idia dekenai ia noho nega namona idia gaukaralaia ‘Dirava do idia badinaia’ bona Havaraia Tauna, Iehova Dirava, ida edia hetura karana idia hagoadaia totona.​—⁠2 Petero 3:11; Salamo 73:28; Filipi 1:⁠10.