Tatau e, Keriso Ena Lalokau Tohotohoa!

IESU ena tanobada maurina ena hanuaboi ginigabena ai, ena hahediba taudia ia hamaoroa: “Taravatu matamatana lau henia umui dekenai, inai bamona: Umui ta ta dekenai umui lalokau henia. Lau ese umui dekenai lau lalokau henia hegeregerena, umui danu ta ta dekenai umui lalokau henia. Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioa. 13:​34, 35) Unai dainai, Keristani taudia momokanidia idia lalokau heheni be namo.

Aposetolo Paulo be Keristani tatau ia herevalaia neganai, ia gwau: “Tatau e, emui adavana do umui lalokau henia, Keriso ese ekalesia ia lalokau henia bamona. Keriso ese danu iena mauri ia atoa diho ekalesia dainai.” (Efe. 5:​25) Edena dala ai tadikaka ta ese ena headava lalonai unai Baibel sisibana ia badinaia diba, bema ena adavana be bapatiso taihu ta?

Keriso be Kongrigeisen Ia Laloa Bada

Baibel ia gwau: “Namona be tatau ese edia adavana do idia lalokau henia, idia edia tauanina idia lalokau henia hegeregerena. Adavana ia lalokau henia tauna ese sibona ia lalokau henia noho. Badina be tau ta ese sibona ena tauanina ia badu henia diba lasi. To ia ubua noho, bona ia naria noho, Keriso ese ekalesia ia ubua bona naria noho hegeregerena.” (Efe. 5:​28, 29) Iesu be ena hahediba taudia ia lalokau henidia. Ena be idia goevadae lasi, to Iesu ese ia hebogahisi henidia bona kara namo henidia. “Ia ura kongrigeisen be ena matanai ia hairai” dainai, ia be ena hahediba taudia edia kara namodia ia laloa bada.​​—⁠Efe. 5:​27, NW.

Keriso ese kongrigeisen ia lalokau henia bamona, namona be tau ese ena hereva bona kara amo ia hahedinaraia ena adavana ia lalokau henia. Bema tau be hanaihanai unai bamona ia karaia, ena hahine be do ia moale. To bema tau be ena adavana ia lalokau henia lasi, ena hahine do ia moale lasi, herevana idia be ruma namona ai idia noho bona mai edia kohu o moni momo.

Edena dala ai tau ese do ia hahedinaraia ia be ena adavana ia lalokau henia? Ma haida vairanai ena adavana ia herevalaia neganai, namona be ia hahedinaraia ena adavana ia matauraia bona ia karaia karadia dainai ia tanikiu henia. Bema ena hahine be ruma bese lalonai gaukara namona ia karaia bona ruma bese idia moale, vadaeni tau ese ma haida vairanai unai ia gwauraia hedinarai be kerere lasi. Idia sibona idia noho neganai, namona be hahine ia mamia ena adavana ese ia ia lalokau henia. Bema tau ese ena adavana dekenai gau maragidia haida ia karaia hegeregere, ena imana ia dogoatao, ia kiri henia, ia rosia, eiava ia tanikiu henia, ena hahine ese unai bamona kara be do ia laloaboio lasi.

“Mai Hemarai Lasi Danu, Idia Ia Gwauraia ‘Iena Tadina’ ”

“Mai hemarai lasi danu, Iesu ese [ena horoa tadikaka] be iena tadina ia gwauraidia.” (Heb. 2:​11, 12, 17) Keristani tadikaka e, namona be oi laloatao oiemu adavana be emu Keristani taihu danu. Herevana ia bapatiso o ia do bapatiso lasi lalonai oi adavaia, to ia ese Iehova dekenai ia karaia gwauhamatana be headava lalonai umui karaia gwauhamatana ia hereaia. Emu adavana be kongrigeisen hebou ai haere ia henia gwauraia neganai, hebou ia hakaua tadikaka ese ia gwauraia “taihu.” Unai dainai emu adavana be emu taihu danu, Kingdom Hall bona emui ruma dekenai. Kingdom Hall dekenai oi karaia bamona, ruma ai emu adavana oi hebogahisi henia bona kara namo henia be mai anina bada.

Bema kongrigeisen ai maduna haida oi huaia, reana oi hekwarahi unai maduna bona emu ruma bese ena maduna oi huaia hebou totona, ani? Namona be kongrigeisen elda bona hesiai taudia ida oi gaukara hebou, bona emu maduna haida oi haria, unai amo oi be mai emu nega oi ia ura henia bada taihuna​​—⁠emu adavana unai​​—⁠totona. Laloatao, tadikaka ma haida ese kongrigeisen ai oi karaia gaukarana idia karaia diba, to emu adavana naria karana be oi sibona emu maduna.

Ma danu, oi be emu hahine ena kwarana. Baibel ia gwau: “Tatau ibounai edia kwarana be Keriso, hahine edia kwarana be edia tau.” (1 Kor. 11:⁠3) Unai kwara dagina be edena bamona oi gaukaralaia be namo? Mai lalokau ida emu kwara dagina oi gaukaralaia, to namo lasi emu adavana dekenai unai siri ena hereva oi gwauraia loulou o unai siri dainai emu adavana oi hamaoroa oi ia matauraia. Kwara dagina gaukaralaia dalana maorona be inai: Keriso Iesu bamona, emu adavana oi kara namo henia.​​—⁠1 Pet. 2:​21.

“Umui be Lauegu Turadia”

Iesu be ena hahediba taudia ia gwauraidia iena turadia. Idia dekenai ia gwau: “Hesiai taudia bamona umui do lau boiria lou lasi, badina hesiai tauna be ena biaguna ese ia karaia gaudia ia diba lasi. To umui lau boiria turadia, badina egu Tamana amo lau kamonai gaudia ibounai be umui dekenai lau gwauraia hedinarai vadaeni.” (Ioa. 15:​14, 15, NW ) Iesu bona ena hahediba taudia be idia herevahereva hebou namonamo. Danu, gau haida idia karaia hebou. “Iesu bona ena hahediba taudia” be Kana ena headava ariana dekenai idia boiria. (Ioa. 2:​2, NW ) Ia bona ena hahediba taudia be gabu haida idia lao hebou, hegeregere Getesemane Umana. Baibel ese ia hahedinaraia, “Iesu be nega momo ena hahediba taudia ida unuseniai idia hebou.”​​—⁠Ioa. 18:⁠2.

Momokani, namona be hahine ia mamia ena adavana be iena turana namona. Tau bona hahine e, emui mauri lalonai mai anina bada gaudia umui karaia hebou be gau badana! Dirava umui hesiai henia hebou. Mai moale ida Baibel umui stadilaia hebou. Nega umui atoa umui raka hebou, herevahereva hebou bona aniani hebou totona. Namona be umui be headava tau bona hahine sibona lasi, to umui be turana namodia danu.

“Ia Lalokau Henidia, Ia Lao Bona Dokona”

Iesu ese ena hahediba taudia “ia lalokau henidia, ia lao bona dokona.” (Ioa. 13:⁠1) Tatau haida be nega momo unai Iesu ena haheitalai idia tohotohoa lasi. Idia ese edia “uhau dinadia lalonai” idia adavaia “hahine” idia rakatania, bona reana kekeni matamata ta idia adavaia.​​—⁠Mal. 2:​14, 15, NW.

Tatau ma haida, hegeregere Willi be Keriso idia tohotohoa. Willi ena adavana be ia gorere momo dainai, hanaihanai ta ese ia naria be namo. Willi ese unai be edena bamona ia laloa? Ia gwau: “Hanaihanai lau laloatao gauna be inai: Egu adavana be Dirava ena harihari gauna bona lau laloa bada. Danu, lagani 60 gunanai, lau gwauhamata nega namodia bona nega dikadia ai lau ese egu adavana do lau naria totona. Unai gwauhamata be do lau laloaboio lasi.”

Keristani tatau e, Keriso ena lalokau karana umui tohotohoa. Emu adavana, Dirava ia gari henia hahinena unai, oi lalokau henia​​—⁠ia be oi emu taihuna bona turana namona.

[Picture on page 20]

Emu adavana be emu turana namona, a?

[Picture on page 20]

‘Emu adavana oi lalokau henia noho’