Mai Lalo-goada ida Oi Hereva

TA BE mai lalo-goada ida ia hereva neganai, ma haida idia itaia ia herevalaia gauna ia abia dae momokani. Unai bamona lalo-goada be aposetolo Paulo ena haroro gaukara lalonai ia hedinarai. Abidadama taudia ai idia lao Tesalonika taudia ia tore henia, ia gwau: “Sivarai Namona ai mailaia umui dekenai, hereva sibona dekenai lasi, to . . . ai diba momokani inai Sivarai Namona be hereva momokani dainai, ai gwauraia mai siahu danu.” (1 Tes. 1:5) Unai lalo-goada be ena hereva bona kara amo ia hedinarai. Baibel ena hereva momokanidia ita harorolaia dalana ai danu, lalo-goada ia hedinarai be gau badana.

Lalo-goada ita hahedinaraia be lalohadai dogoatao auka eiava hekokoroku karana lasi. To lalo-goada ia hahedinaraia tauna ese Dirava ena Hereva ia herevalaia neganai, ia hereva dalana amo ena abidadama goadana ia hahedinaraia.​—Heb. 11:1.

Lalo-Goada Oi Hahedinaraia Negadia. Haroro gaukara lalonai mai lalo-goada ida oi hereva be gau badana. Nega momo taunimanima ese oi herevalaia gauna sibona lasi to oi hereva dalana idia laloa danu. Oi herevalaia gauna oi laloa dalana idia mamia. Emu lalo-goada ese mai siahu danu ia hahedinaraia oi harorolaia gauna be mai anina bada, to hereva gwauraia sibona be unai bamona lasi.

Abidadama tamona taudia oi hereva henia neganai danu, lalo-goada oi hahedinaraia be namo. Aposetolo Petero be ena revareva helagana ginigunana ia torea, badina ‘ia ura unai leta amo idia do ia hagoadaia, bona ia gwauraia hedinarai Dirava ena hariharibada korikori ena dala be ena hereva lalonai ia noho.’ Unai lalonai, tadikaka ia hagoadadia, ia gwau: “Umui gini goada.” (1 Pet. 5:12) Aposetolo Paulo be Roma kongregesen ia tore henia neganai, ia hahedinaraia lalo-goada ese idia dekenai namo ia havaraia. Ia gwau: “Lau diba momokani vadaeni, gau ta ia goada lasi, mase o mauri, o aneru, o lohia herea taudia, o guba ena siahu gaudia, o harihari idia noho gaudia, o gabeai do idia vara gaudia, o ataiai gaudia, o dobu gabuna gaudia, o tanobada dekenai karaia gaudia, ta ese Dirava ena lalokau, Keriso Iesu iseda Lohiabada ese ia hedinaraia vadaeni gauna, dekena amo ita do ia kokia diba lasi.” (Roma 8:​38, 39) Danu, Paulo ese lalona veria dalanai ia hahedinaraia ma haida ita haroro henia be gau badana, bona mai ura bada ida unai gaukara ia karaia karana amo ia hahedinaraia goevagoeva ia diba momokani unai be mai anina bada. (Kara 20:​18-21; Roma 10:​9, 13-15) Hari inai negai Keristani elda taudia ese Dirava ena Hereva idia hadibaia neganai, unai bamona lalo-goada idia hahedinaraia be namo.

Stadi negadia ai bona nega ma haida lalonai, namona be tama sina ese edia natudia ida lauma gaudia idia herevalaia neganai lalo-goada idia hahedinaraia. Unai ena anina be tama sina ese sibona edia kudouna lalonai Dirava lalokau henia karana idia habadaia. Bena mai lalo-goada ida edia kudouna amo natudia idia hereva henia diba, badina taunimanima ese edia kudouna dekenai idia noho gaudia be edia uduna amo idia gwauraia. (Luka 6:45; Deu. 6:​5-7) Danu, unai bamona lalo-goada karana ese tama sina ia hagoadaia dainai, “abidadama momokani” ena haheitalai idia hahedinaraia.​—2 Tim. 1:5.

Emu abidadama idia henanadailaia neganai, mai lalo-goada ida oi hereva be mai anina bada. Reana sikuli turana, tisa tauna, eiava gaukara turana ia hoa, badina idia danu dina ta oi hahelagaia lasi. Mai lalo-goada ida oi henia haere dainai reana Baibel amo oi abia dae lalohadai do ia matauraia. Bema ta ese kara dika ta​—koikoi, drag ania, eiava matabodaga karana​—dekenai oi ia veria toho be edena bamona? Namona be oi hahedinaraia goevagoeva oi ese unai bamona kara do oi karaia lasi bona oi idia veria diba lasi emu lalohadai oi haidaua totona. Unai ia vara totona edia hereva oi dadaraia neganai mai lalo-goada ida oi hereva be namo. Potifara ena adavana ese mahuta hebou totona Iosepa ia veria neganai, Iosepa be mai lalo-goada ida ia gwau: “Dirava ena vairana dekenai inai bamona do lau kara dika be edena bamona?” Hahine ese Iosepa ena lalona ia veria noho neganai, Iosepa be ruma dekena amo ia heau.​—Gen. 39:​9, 12.

Lalo-Goada Oi Hahedinaraia Daladia. Oi gaukaralaia herevadia ese emu lalo-goada idia hahedinaraia diba. Nega momo Iesu ese mai anina bada herevana ta ia gwauraia matamaia neganai ia gwau: “Momokani, momokani umui lau hamaoroa.” (Ioa. 3:​3, 5, 11; 5:​19, 24, 25) Hereva haida ese Paulo ena lalo-goada idia hahedinaraia, hegeregere ia gwau “lau diba momokani” bona “lau koikoi lasi, lau hereva momokani inai.” (Roma 8:38; 14:14; 1 Tim. 2:7) Nega haida Iehova ese ena peroveta taudia ia hasiahua Iena hereva do ia guguru momokani herevana idia gwauraia goada, hegeregere idia gwau, “Do ia vara momokani.” (Hab. 2:3) Unai peroveta herevadia oi herevalaia neganai, reana unai bamona hereva oi gaukaralaia danu. Bema oi sibona dekenai oi tabekau lasi to Iehova dekenai oi tabekau bona hemataurai dalanai ma haida oi hereva henia, unai bamona lalo-goada herevadia ese idia hahedinaraia emu abidadama ia goada.

Mai momokani bona mai siahu ida oi hereva neganai lalo-goada oi hahedinaraia danu. Oiemu vairana, oiemu imana gaukaralaia dalana, bona emu tauanina ena toana amo unai do ia hedinarai, ena be taunimanima ta ta ese reana unai gaudia amo unai idia hahedinaraia daladia be idauidau. Herevana oi be hemarai eiava hereva manada tauna, to bema oi diba momokani oi herevalaia gauna be hereva momokani bona ma haida ese idia kamonai be namo, emu lalo-goada do ia hedinarai.

To momokani, namona be mai momokani ida lalo-goada ita hahedinaraia. Bema taunimanima idia itaia toana sibona ita hahedinaraia to kudouna amo ita hereva lasi, do idia laloa ita harorolaia sivaraina be anina lasi. Unai dainai, gau badana be sibona emu kara bamona oi hereva. Kamonai taudia edia momo hegeregerena, reana emu gado regena oi habadaia bona mai siahu bada ida oi hereva be namo. To emu tahua gauna be mai momokani ida sibona emu kara bamona oi hereva.

Lalo-Goada Oi Hahedinaraia Totona Oi Idia Durua Gaudia. Lalo-goada oi hahedinaraia lalonai, do oi herevalaia gauna dekenai oiemu hemami be mai anina bada dainai, oi hegaegae namonamo be namo. Buka ta amo hereva haida oi abia hidi bona idia oi gwauraia sibona be hegeregere lasi. Namona be do oi herevalaia gauna oi lalo-pararalaia namonamo bona sibona emu hereva amo oi gwauraia diba. Gau badana be oi diba momokani unai be hereva momokani bona kamonai taudia idia kamonai be mai anina bada. Unai dainai, emu hereva oi hegaegaelaia neganai, edia noho dalana bona oi herevalaia gauna dekenai idia diba vadaeni gaudia bona edia lalohadai oi laloa.

Iseda hereva ia heau namonamo neganai, ma haida ese eda lalo-goada idia itaia haraga. Unai dainai, emu hereva totona gau namodia oi abia hidi sibona lasi, to oi herevalaia dalana oi hegaegaelaia namonamo danu. Bema emu hereva lalonai kahana haida be mai emu ura bada ida oi herevalaia be namo, unai gaudia oi laloa namonamo, bena pepa amo do oi duahia lasi to idia do oi herevalaia namonamo. Danu, namona be Iehova oi guriguri henia emu hekwarahi ia hanamoa totona. Unai neganai, ‘Dirava ese oi ia hagoadaia dainai mai gari lasi danu’ oi hereva diba bona do oi hahedinaraia oi diba momokani oi herevalaia gauna be hereva momokani bona mai anina bada.​—1 Tes. 2:2.