Tatau Haroro Henia Daladia

 1. Basileia harorolaia gaukarana ia bada dainai, daidia idia noho be namo?

¹ Inai nega dokona lalonai Basileia harorolaia gaukarana ia bada ia lao dainai, tadikaka idia noho be namo unai gaukara idia gunalaia totona. (Mar. 4:​30-​32; Kara 20:28; 1 Tim. 3:​1-​13) To, gabu haida dekenai hahine momo be Basileia ena sivarai idia abia dae, to tatau momo be idia abia dae lasi. Tano haida dekenai, tatau idia laloa natudia dekenai tomadiho gaudia hadibaia karana be hahine edia maduna. Edena dala ai tatau momo ita hagoadaia diba Dirava ena hereva idia laloa bada, bona ita ida Iehova do idia tomadiho henia?

 2. Paulo bona Petero be tatau idia haroro henidia dainai dahaka namo idia davaria?

² Tatau Haroro Henidia: Bema ruma bese kwarana be hereva momokani ia abia dae, ruma bese taudia ma haida ia hagoadaia diba tomadiho momokani idia abia dae totona. Hegeregere, Paulo bona Sila be edia haroro gaukara dainai idia hadiburadia neganai, idia ese dibura ruma naria tauna idia haroro henia. Unai tau bona ena ruma taudia ibounai be bapatiso idia abia. (Kara 16:​25-​34) Bona Korinto ai, Paulo ena haroro gaukara dainai, “sinagoga ena ofesa tauna Krisipo be Lohiabada abidadama henia tauna ai ia lao, bona ena ruma taudia ibounai danu.” (Kara 18:8) Danu, Iehova ese Petero ia gaukaralaia Korenelio, ‘tomadiho ia laloa bada bona Dirava ia gari henia’ ami ofesa tauna ia haroro henia totona. Unai murinai, Korenelio bona ena ruma taudia ibounai be bapatiso idia abia.​​—Kara 10:​1-​48.

 3. Filipo ia karaia bamona, edena bamona “lohia” taudia ita haroro henidia diba?

³ “Lohia” taudia ita haroro henidia be mai ena namo danu. (1 Tim. 2:​1, 2) Hegeregere, Iehova ena aneru ese Filipo ia hamaoroa “Etiopia ena kwini hahine ena kohu ia naria tauna” ia haroro henia totona. Filipo ia kamonai unai tauna be “peroveta tauna Isaia ena buka ia duahia badabada” bona unai amo ia dekenai Iesu ena sivarai namona ia harorolaia. Unai Etiopia tauna be hahediba tauna ta ai ia lao, bona ena hanua dekenai ia giroa lou neganai ma haida dekenai sivarai namona ia harorolaia. Reana unai Etiopia tauna be kwini bona ena ruma taudia ia haroro henidia danu, unai dala amo kwini ena ruma dekenai idia noho taudia be sivarai namona idia kamonai diba.​​—Kara 8:​26-​39.

 4. Edena dala ai tatau momo ita haroro henia diba?

⁴ Tatau Momo Haroro Henidia Dalana: Nega momo tatau be moni gaukara idia karaia dainai, emu sediual oi haidaua diba adorahi kahanai, wikeni eiava holide negadiai emu haroro gaukara oi habadaia totona, a? Bisinesi teritori ita karaia loulou neganai, ruma dekenai idia noho lasi tatau ita haroro henidia diba. Danu tadikaka be edia gaukara gabudia ai tatau idia haroro henidia diba. Ruma-ta-ruma-ta haroro gaukara ai, bona ita haroro momo teritori ai, namona be ruma ta dekenai ita lao neganai dala ita karaia ruma bese kwarana eiava ruma biaguna ita haroro henia.

 5. Taihu ta ese kamonai tauna ta ia davaria neganai, dahaka ia karaia diba?

⁵ Bema taihu ta ese tau ta ia davaria, bona unai tauna ia kamonai, namo lasi ia sibona ese lou henia ia karaia. Reana taihu be ena tau eiava ma tadikaka ta ese ia bamoa diba. Bema unai tauna be ia ura ia stadi noho, namona be tadikaka ta dekenai ia henia.

 6. Taunimanima momo ita veria mauri totona, edena dala ai Paulo ita tohotohoa diba?

⁶ Tatau ese Idia Laloa Bada Gaudia Herevalaia: Aposetolo Paulo be ena hereva ia kamonai taudia ia laloa bada bona edia diba hegeregerena idia ia hereva henia, unai amo momo ia veria mauri diba. (1 Kor. 9:​19-​23) Unai dainai, iseda haroro herevadia ita hegaegaelaia neganai, namona be tatau ese idia laloa bada gaudia ita laloa danu. Hegeregere, tatau be nega momo moni ena hekwakwanai, gavamani namona, bona ruma bese ena namo idia laloa momo. Danu, mauri ena anina be dahaka, nega vaira ai do idia vara gaudia, bona Dirava ese hisihisi ia koua lasi ena badina idia laloa momo. Bema unai bamona gaudia be idia dekenai ita herevalaia do idia ura Basileia ena sivarai namona idia kamonai.​​—Aon. 16:23.

 7. Witnes lasi tatau be kongrigeisen hebou dekenai idia mai neganai, dahaka ita karaia diba?

⁷ Witnes Lasi Tatau Durudia: Nega momo Keristani taihu edia kara namodia ese edia Witnes lasi tatau ia durua hereva momokani idia abia dae totona, to danu tadikaka taihu edia kara namodia amo unai bamona taudia idia durua diba. (1 Pet. 3:​1-4) Bema taihu ta ena Witnes lasi tau be kongrigeisen ena hebou dekenai ia mai, tadikaka taihu edia heabidae karana amo haroro namona idia henia diba. Hebou dekenai ia mai ese ia hahedinaraia hereva momokani ia ura henia bona reana Baibel stadi do ia abia dae.

 8. Tadikaka haida ese hereva momokani idia abia dae lasi Witnes lasi tatau be edena bamona idia durudia diba?

⁸ To tatau haida be reana guna Baibel ena hereva idia laloa bada lasi, to metairametaira edia ura ia bada neganai do idia ura idia manada henia tadikaka ida Baibel idia stadilaia. Kongrigeisen ta dekenai, tadikaka be dala idia karaia nega ta ta ai tomadiho dalanai ia parara ruma bese ta idia vadivadi henia totona. Idia vadivadi negadiai, edia tahua gauna be unai ruma bese kwarana, Witnes lasi tauna unai, ese ia laloa bada gaudia do idia herevalaia. Bena gabeai, unai tau ida Baibel idia herevalaia diba, bona hari unai tau be ia bapatiso vadaeni. Ma kongrigeisen ta dekenai, tadikaka ta ese taihu ta ena Witnes lasi tau ia durua edia ruma ena magu idia haginia totona. Tadikaka ena kara dainai unai Witnes lasi tau be Baibel stadi ia abia dae. (Gal. 6:​10; Fili. 2:4) Bema oi be Keristani tadikaka ta, Witnes lasi tatau be unai bamona eiava ma dala haida amo oi durudia diba.

 9. Keristani tatau be kongrigeisen lalonai maduna huaia dalana idia dibaia neganai, dahaka namo idia abia?

⁹ Keristani Tatau Durua Gabeai Maduna Idia Huaia Totona: Tatau haida be Basileia ena sivarai namona idia abia dae bona elda taudia ai idia lao Iehova ena taunimanima idia naria totona. Idia be kongrigeisen lalonai “harihari gaudia” bamona. (Efe. 4:8; Sal. 68:18) Unai tatau be mai edia lalona ibounai ida kongrigeisen idia naria. (1 Pet. 5:​2, 3) Unai dainai tanobada hegegemadai tadikaka oreana lalonai, idia be harihari gaudia bamona!

10. Anania ese Paulo ia durua karana be edena dala ai hari inai negai taunimanima momo ia durua?

¹⁰ Ena be Saulo be guna Keristani taudia ia dagedage henidia, to gabeai ‘Iuda lasi taudia totona aposetolo gaukara ia karaia.’ (Roma 11:13) Saulo ena dagedage karana dainai, hahediba tauna Anania be matamanai ia gari Saulo ia haroro henia totona. To Anania ese Iesu ena hereva ia badinaia bona Saulo ia haroro henia, bena gabeai ladana idia haidaua aposetolo Paulo. Lagani momo murinai, Paulo ena haroro gaukara amo taunimanima tausen momo ia durudia, bona Baibel lalonai ia torea revareva helagadia be hari inai negai taunimanima milioni momo ia durua noho.​​—Kara 9:​3-​19; 2 Tim. 3:​16, 17.

11. Dahaka dainai sediual namona ita karaia be namo tatau momo ita haroro henia totona?

¹¹ Unai dainai, namona be sediual namona ita karaia bona ita hekwarahi haroro gaukara ai tatau momo ita haroro henidia totona. Unai ita karaia neganai, ita diba momokani Iehova ese ita do ia durua Basileia gaukara idauidau ita karaia bona iseda tahua gauna ita hagugurua totona.