“Dirava Ena Hereva . . . be mai Ena Siahu”

¹ Aposetolo Paulo ia gwau: “Dirava ena hereva be ia mauri noho, bona ia be mai ena siahu.” (Heb. 4:12) Iena hereva ena anina be dahaka? Baibel lalonai ita davaria Dirava ena hereva be mai ena siahu bona taunimanima edia lalona ia veria. Baibel lalonai ia noho aonega be mai ena siahu ta ena mauri ia haidaua totona. Ia henia goada bona helaro ese Mauri Henia Tauna, Iehova Dirava, dekenai taunimanima ia hakaua lao. Ena sivarai ese mauri hanaihanai ia lao henia dalana dekenai kudou-maoro taudia do ia hakaua matamaia diba. To, unai ia vara totona, namona be ma haida ita haroro henia neganai, Baibel ita gaukaralaia.

² Dala Ia Kehoa Negadia Ibounai Baibel Siri ta Duahia: Papua New Guinea dekenai, pablisa momo ese haroro lalonai Baibel gaukaralaia karana idia manadalaia bona unai be namo herea. To, bema toana be taunimanima be nega lasi idia hereva daudau totona, ta be haraga herea buka henia karana eiava siri herevalaia sibona karana ia manadalaia diba. Pablisa ibounai ai hagoadaia, sivarai namona umui harorolaia neganai, do umui hekwarahi Baibel amo siri ta umui duahia, bena unai amo unai tauna ese do ia itaia iseda sivarai be Dirava ena Hereva lalonai do idia davaria.

³ Haroro gaukara lalonai ita davaria taudia momo be Baibel idia matauraia bada bona reana idia duahia noho. Idia bisi taudia danu be miniti haida lalonai sivarai idia kamonai bema Dirava ena Hereva amo ita duahia. Siri namona be mai hebogahisi ida ita duahia bona hereva kwadogi ai ita kikilaia neganai, Iehova ena hereva ena siahu ese kamonai tauna dekenai anina namona do ia havaraia diba. To edena dala ai Baibel amo siri ta duahia karana be emu hamatamaia herevana ida do oi hakapua?

⁴ Magasin Gaukara Dekenai Inai Oi Tohoa: Magasin oi hahedinaraia bona ena kahana ta be nega kwadogi lalonai oi herevalaia murinai, Baibel oi kehoa bona unai kahana ida ia hegeregere sirina ta oi duahia. Reana inai bamona oi henanadai, “Emu lalohadai inai hagoadaia gwauhamatana dekenai be dahaka?” bena oi abia hidi sirina ta oi duahia.

⁵ Kamonai taudia ibounai dekenai Baibel siri ta eiava rua oi duahia be emu tahua gauna ai oi halaoa. Baibel ena lalona veria siahuna ese taunimanima momo dekenai dala do ia kehoa diba, Dirava dekenai idia mai totona.​—Ioa. 6:44.