Inai Heiriheiri Negana Lalonai Dirava ida Ita Raka

“Enoka be Dirava momokanina ida ia raka noho. Bena gabeai ia noho lasi, badina Dirava ese ia abia oho.”​​—⁠GENESE 5:​24, NW.

 1. Iseda nega lalonai idia vara dika gaudia haida be dahaka?

HEIRIHEIRI negana! Unai hereva ese lagani 1914 ai, Mesia Basileiana ia vara negana amo ia matamaia heai bona dagedage negana ia gwauraia hedinarai goevagoeva. Unai nega ibounai lalonai, taunimanima be “nega dokona” lalonai idia noho. Hekwakwanai idauidau, hegeregere hitolo bada, gorere, tano mareremarere, bona tuari ese taunimanima idia hahisia bada, guna bamona lasi. (2 Timoteo 3:1; Apokalupo 6:​1-8) Iehova idia tomadiho henia taudia danu be unai bamona. Ita ibounai ese hari inai nega ena hisihisi bona hekwakwanai idauidau ita mamia, herevana idia be bada eiava maragi. Moni ena hekwakwanai, gavamani idia heiriheiri, raskol karadia, bona gorere dainai mauri ia auka.

 2. Iehova ena hesiai taudia be dahaka hekwakwanai idia davaria?

² Danu, Iehova ena hesiai taudia momo be dagedage bada idia davaria loulou, badina Satani ese “Dirava ena taravatu idia badinaia . . . bona Iesu ena hereva momokani idia gwauraia hedinarai” taudia ia tuari henia noho. (Apokalupo 12:17) Bona ena be ita ibounai ese dagedage ita davaria lasi, to Keristani momokani taudia ibounai idia hekwarahi Satani Diabolo bona ia ese taunimanima huanai ia havaraia kamonai lasi karana idia dadaraia totona. (Efeso 2:2; 6:12) Nega ibounai do ita noga noho bona unai kara ita dadaraia be namo, badina tomadiho goevana idia ura henia lasi taudia ese unai kara be gaukara gabunai, sikuli gabunai bona gabu ma haida dekenai idia hahedinaraia.

Dirava ida Ita Raka, Tanobada Taudia Ita Bamoa Lasi

3, 4. Edena dala ai Keristani taudia be tanobada amo idia idau?

³ Aposetolo edia negai, Keristani taudia be inai tanobada ena lauma idia dadaraia goadagoada, bona unai dainai, idia be Keristani kongrigeisen murimurinai idia noho taudia amo idia idau. Paulo ese edia idau ia herevalaia: “Unai dainai, Lohiabada ena ladana dainai umui lau sisiba henia, harihari ia lao, Dirava diba lasi taudia bamona umui noho lasi. Idia edia laloa be anina lasi. Edia laloa be dibura. Dirava ena mauri be idia davaria diba lasi, badina be ia dekena amo edia laloa idia koua, bona iena dala idia diba lasi. Idia be hemarai lasi momokani. Lebulebu daladia idia ura dikadika, bona matabodaga karadia idia tahua doko lasi.”​—⁠Efeso 4:​17-19.

⁴ Unai hereva ese ia hahedinaraia goevagoeva, Paulo ena negai bona iseda negai, tanobada be lauma dalanai ia dibura bona kara maoromaoro taravatudia idia dadaraia! Aposetolo edia nega hegeregerena, Keristani taudia hari be ‘Dirava diba lasi taudia bamona idia raka lasi.’ To, idia be Dirava ida idia raka noho ena hahenamo idia moalelaia. Oibe, taunimanima haida idia daradaralaia gauna be, goevadae lasi manoka taudia be Iehova ida idia raka diba eiava lasi. To, Baibel ia hahedinaraia unai bamona idia karaia diba. Danu, Iehova ia ura ia ida do idia raka. Lagani 800 B.C.E. murinai, peroveta tauna Mika ese ena buka lalonai inai hereva ia torea: “Lohiabada ese kara namo dalana ita ia hamaoroa vadaeni. Lohiabada ia ura ita karaia gauna be inai: Kara maoromaoro do ita karaia, taunimanima ibounai do ita lalokau henia nega ibounai, bona mai manau danu Dirava danu do ita raka hebou.”​—⁠Mika 6:⁠8.

Dirava ida Ita Raka​—⁠Edena Bamona Bona Dahaka Dainai?

 5. Goevadae lasi tauna be edena dala ai Dirava ida ia raka diba?

⁵ Edena dala ai ita be siahu ibounai bona ita itaia diba lasi Diravana ida ita raka diba? Oibe, Iehova ida ita raka be taunimanima ta ida ita raka bamona lasi. Baibel lalonai inai hereva “raka” ese ‘mauri dalana ta badinaia’ karana ia herevalaia.a Unai dainai, ita laloparara Dirava ida ia raka tauna be Dirava ese ia hahedinaraia bona ia moalelaia mauri dalana ia badinaia. Unai dala dekenai ita raka neganai, ita be ita kahirakahira idia noho taudia amo ita idau. To, Keristani tauna dekenai, unai dala sibona be mauri dalana maorona. Badina be dahaka? Ena badina be momo.

6, 7. Dahaka dainai Dirava ida ita raka be dala hereadaena?

⁶ Badina ginigunana be, Iehova be iseda Havaraia Tauna, iseda mauri ena Badina, bona ita mauri noho totona gau iboudiai ia Henia Tauna. (Apokalupo 4:11) Unai dainai, Ia be mai ena maoro iseda raka dalana ia gwauraia hidi totona. Danu, Dirava ida ita raka be mauri dala hereadaena. Iehova ese ia ida idia raka taudia edia kara dika gwauatao dalana ia karaia, bona mauri hanaihanai helarona ia henia. Danu, iseda lalokau bada Tamana be ia ida idia raka taudia dekenai aonega sisibana ia henia dainai, ena be idia be goevadae lasi taudia bona Satani ena siahu lalonai ia noho tanobadana ai idia noho, to edia mauri dekenai idia kwalimu diba. (Ioane 3:16; 2 Timoteo 3:​15, 16; 1 Ioane 1:8; 2:25; 5:19) Badina ma ta be: Mai eda ura ida Dirava ida ita raka neganai, kongrigeisen lalonai maino bona lalotamona ia noho.​—⁠Kolose 3:​15, 16.

⁷ Dirava ida ita raka ena badina badana ginigabena be inai: Ita hahedinaraia Eden umana ai ia vara hepapahuahuana​—⁠lohia siahuna ena hepapahuahu unai​—⁠lalonai ita be daika ena kahana ai ita gini. (Genese 3:​1-6) Iseda mauri dalana amo ita hahedinaraia ita be Iehova ena kahanai ita gini, bona mai gari lasi ida ita gwau Ia be Lohia Tauna maorona. (Salamo 83:18) Unai amo iseda guriguri herevana​—⁠Dirava ena ladana do ia hahelagaia bona iena ura be tanobada ai do ia karaia​—⁠ita badinaia. (Mataio 6:​9, 10) Dirava ida do idia raka ena abia hidi idia karaia taudia be aonega taudia! Iehova be “aonega Dirava tamona” dainai, idia diba momokani idia be dala maorona ai idia raka noho. Dirava be ia kerere diba lasi.​—⁠Roma 16:⁠27.

 8. Edena dala ai Enoka bona Noa edia nega be iseda nega danu idia hegeregere?

⁸ To, heiriheiri negadia bona taunimanima momo idia ura lasi Iehova idia hesiai henia negadia dekenai, Keristani taudia be edena bamona Dirava ida idia raka diba? Idaunegai kamonai taudia be nega aukadia ai edia gini auka karana ita lalohadailaia neganai, haere do ita davaria. Unai bamona taudia rua be Enoka bona Noa. Idia ruaosi idia noho negadia be iseda nega danu idia hegeregere. Kara dika be bada herea. Noa ena nega ai, dagedage bona matabodaga karadia ese tanobada idia hahonua. To, Enoka bona Noa ese tanobada ena lauma idia dadaraia bona Iehova ida idia raka. Edena bamona unai idia karaia diba? Unai henanadai ita haerelaia totona inai stadi lalonai, ita ese Enoka ena haheitalai do ita herevalaia. Stadi gabena lalonai, Noa do ita herevalaia.

Heiriheiri Negadia ai Enoka be Dirava ida Ia Raka

 9. Enoka ena sivarai be dahaka?

⁹ Baibel ia hahedinaraia Enoka be Dirava ida ia raka tauna ginigunana. Ia gwau: “Metusela ia vara murinai, Enoka be Dirava danu idia turana karaia [“raka,” NW ] noho.” (Genese 5:22) Baibel ese Enoka ena mauri lagani ia gwauraia murinai ma ia gwau: “Enoka be Dirava momokanina ida ia raka noho. Bena gabeai ia noho lasi, badina Dirava ese ia abia oho.” Ena be Enoka ena mauri lagani unai nega ai be kwadogi sibona, to iseda danu ita hahegeregerea diba lasi. (Genese 5:​24, NW ) Oibe, Enoka be dagedage taudia ese idia do alaia lasi neganai, Iehova ese mauri gabuna amo ia abia bona mase dekenai ia hamahutaia. (Heberu 11:​5, 13) Unai be siri kwadogidia sibona, to siri ma haida lalonai Baibel ese Enoka ia herevalaia danu. To, unai hereva bona ma sivarai haida amo ita diba, Enoka ena nega be heiriheiri negana.

10, 11. (a) Adamu bona Heva idia gwau-edeede murinai, kara gageva be edena bamona ia bada ia lao? (b) Enoka ese edena peroveta herevana ia harorolaia, bona taunimanima ese edena bamona ia idia kara henia?

¹⁰ Adamu ia kara dika murinai, kara gageva be taunimanima dekenai ia hanaia haraga dalana mani ita laloa. Baibel ese ita ia hamaoroa Adamu ena natuna merona roboana, Kaino, be iena tadina Abela ia alaia mase neganai, ia be taunimanima alaia tauna ginigunana ai ia lao. (Genese 4:​8-10) Abela be ia mase murinai, Adamu bona Heva be natudia mero ma ta idia havaraia bona ena ladana idia hatoa Seta. Baibel ia gwau: “Seta ese natuna ta ia havaraia, iena ladana ia atoa Enosi. Unai nega dekenai taunimanima ese Lohiabada ena ladana helagana dekenai guriguri idia hamatamaia.” (Genese 4:​25, 26) Unai be hereva momokani negea dalana ai, “Lohiabada ena ladana helagana dekenai guriguri idia hamatamaia.”b Enosi ia vara bena lagani momo murinai, Kaino besena ta, Lameka, be iena adavana rua totona ane ta ia torea. Unai ane lalonai ia gwau mero ta ese ia ia botaia, vadaeni ia ese unai mero ia alaia mase. Danu, ia gwau: “Kaino ia botaia tauna be davana do ia abia nega 7. To lau ia botaia tauna be davana do ia abia nega 77.”​—⁠Genese 4:​10, 19, 23, 24.

¹¹ Ataiai ita herevalaia gaudia ese idia hahedinaraia, Satani ese Eden umana ai ia havaraia kara gageva be Adamu ena bese dekenai ia hanaia haraga. Unai bamona nega ai, Enoka be Iehova ena peroveta tauna bona iena hereva goadadia be mai anina bada hari inai negai danu. Iuda ia gwau, Enoka ia peroveta: “Lohiabada do ia mai, bona iena aneru helagadia momo herea be ia danu do idia hedinarai. Lohiabada ese taunimanima ibounai do ia kota henia. Ia ese Dirava idia badinaia lasi taudia edia dika davana do ia gwauraia, Dirava idia negea dainai. Ma idia momo ese Dirava idia hereva dika henia vadaeni. Idia danu be Lohiabada ese edia kerere davana do ia gwauraia.” (Iuda 14, 15) Aramagedono ai, unai hereva ena anina be do ia guguru momokani. (Apokalupo 16:​14, 16) To, ita daradara lasi, Enoka ena nega ai “Dirava idia badinaia lasi taudia” be momo bona Enoka ena peroveta herevana idia kamonai neganai idia badu. Unai dainai, Iehova ese Enoka ia abia siri be lalokau karana!

Dahaka ese Enoka Ia Hagoadaia Dirava ida Ia Raka Totona?

12. Edena dala ai Enoka be taunimanima ma haida amo ia idau?

¹² Eden umana ai, Adamu bona Heva ese Satani idia kamonai henia, bona Adamu be Dirava ena hakaua herevadia ia dadaraia. (Genese 3:​1-6) To, edia natuna Abela be dala idauna ia badinaia, bona Iehova ese ia moale henia. (Genese 4:​3, 4) Madi, Adamu ena natudia momo be Abela bamona lasi. To, lagani handred momo murinai ia vara tauna, Enoka, be Abela bamona. Adamu ena natudia momo bona Enoka ena kara be edena bamona idia idau? Paulo ese unai ia haerelaia: “Abidadama dainai, Dirava ese Enoka ia abia hanai, mase do ia itaia lasi totona, bona idia davaria diba lasi, badina be Dirava ese ia abia hanai; ia do idia abia hanai lasi neganai, ia hadibaia vadaeni Dirava ia hamoalea bada vadaeni.” (Heberu 11:​5, NW ) Keriso ia do mai lasi neganai, abidadama idia hahedinaraia hutuma bada taudia huanai Enoka be ta. (Heberu 12:​1, NW ) Ena abidadama dainai Enoka be ena mauri laganidia 365​—⁠iseda mauri laganidia ia hanaia momokani​—⁠lalonai kara maoromaoro ia badinaia!

13. Enoka ena abidadama be edena bamona?

¹³ Paulo ese Enoka bona witnes taudia ma haida edia abidadama ia herevalaia neganai, ia gwau: “Abidadama ena anina be inai bamona: Ita daradara lasi, to ita diba momokani, Dirava ena davana namona ita naria kava lasi. Matana dekenai ita itaia lasi, to iseda lalona ia diba momokani, inai gauna do ita abia.” (Heberu 11:⁠1) Oibe, abidadama ena anina be ita diba momokani ita naria noho gaudia be do idia vara. Unai dainai, iseda mauri lalonai unai gaudia ita laloa bada. Unai bamona abidadama ese Enoka ia durua Dirava ida ia raka totona, ena be tanobada taudia ese Dirava idia dadaraia.

14. Enoka be dahaka diba maoromaoro ia abia dainai ena abidadama ia goada?

¹⁴ Abidadama momokanina ia vara totona, diba maoromaoro be mai anina. Enoka be dahaka ia diba? (Roma 10:​14, 17; 1 Timoteo 2:⁠4) Ita daradara lasi, Enoka be Eden umana dekenai idia vara gaudia ia diba. Reana, Eden umana ena mauri ena sivarai haida ia kamonai danu​—⁠reana, unai neganai unai uma be ia do noho to taunimanima idia vareai be taravatu. (Genese 3:​23, 24) Bona ia diba, Dirava ena ura be Adamu ena natudia ese tanobada do idia hahonua, bona idia ese tanobada ibounai be unai Paradaiso ginigunana bamona ai do idia halaoa. (Genese 1:28) Bona danu, Enoka ese ia laloa bada gauna be Iehova ena gwauhamata: Garana ta do ia mailaia bena Satani ena kwarana do ia haberoa bona Satani ena koikoi dainai idia vara dika ibounai do ia haorea. (Genese 3:15) Oibe, Enoka ena peroveta herevana Iuda bukana lalonai ese Satani ena garana hadikaia karana ia herevalaia. Ita diba Enoka be mai ena abidadama, bona ia abia dae momokani Iehova ese ia ‘idia tahua taudia ibounai be davana namona ia henidia.’ (Heberu 11:⁠6) Ena be Enoka be hari ita diba gaudia ia diba lasi, to ia diba gaudia be hegeregere ena abidadama ia goada totona. Unai bamona abidadama dainai, heiriheiri negadia lalonai ia gini goada.

Enoka Ena Haheitalai Tohotohoa

15, 16. Edena bamona Enoka ena kara ita tohotohoa diba?

¹⁵ Hari inai heiriheiri negana ai, ita ura Enoka bamona Iehova ita hamoalea dainai, namona be ena kara ita tohotohoa. Iehova bona iena ura dekenai diba maoromaoro do ita abia be namo. To unai sibona lasi. Namona be iseda mauri ibounai lalonai, unai diba maoromaoro ita badinaia. (Salamo 119:101; 2 Petero 1:19) Dirava ena lalohadai ese ita ia hakaua be namo. Nega ibounai iseda lalohadai bona kara ese Iehova do ia hamoalea totona, ita hekwarahi be namo.

¹⁶ Ita diba lasi Enoka ena negai daika danu be Iehova ia hesiai henia, to ia hedinarai goevagoeva Enoka be sibona eiava orea maragina ta danu ia noho. Tanobada ai ita danu be orea maragina ta sibona, to ita gari lasi. Herevana daika ese ita do ia dagedage henia, to Iehova ese ita do ia durua. (Roma 8:31) Enoka be mai gari lasi ida kara dika taudia ia hadibaia dika do idia davaria. Ita danu, ena be ita dekenai idia hevaseha bona idia dagedage, to mai gari lasi ida “Basileia ena Sivarai Namona” ita harorolaia noho. (Mataio 24:14) Enoka ena mauri lagani be iena negai idia noho taudia momo edia bamona lasi. To, ia be unai tanobada ia laloa momo lasi. Badina ia be mai anina bada gauna ta ia raraia noho. (Heberu 11:​10, 35) Ita danu Iehova ena ura do ia hagugurua negana ita raraia noho. Unai dainai, ita ese tanobada gaudia abia totona ita hekwarahi bada lasi. (1 Korinto 7:31) To, iseda goada bona kohu ita gaukaralaia Iehova ena hesiai gaukara ita karaia totona.

17. Dahaka ita diba be Enoka ia diba lasi, unai dainai dahaka ita karaia be namo?

¹⁷ Enoka ia abia dae momokani Dirava ese ia gwauhamatalaia Garana be Iena ura negana ai do Ia hahedinaraia. Unai Garana​—⁠Iesu Keriso​—⁠be lagani 2,000 mai kahana gunanai ia hedinarai. Iesu ese mauri davalaia boubouna ia henia, bona dala ia karaia ita bona idaunegai idia noho witnes taudia, hegeregere Enoka be mauri hanaihanai ita abia totona. Unai Garana, hari Dirava ena Basileia ena terona dekenai ia helai tauna be guba amo Satani ia negea diho tanobada dekenai. Unai dainai ita ese hisihisi bona dagedage bada ita itaia noho. (Apokalupo 12:12) Momokani, ita be Enoka bamona lasi, to hari ita be diba bada ita abia noho. Unai dainai, namona be iseda abidadama ia goada Enoka ena bamona. Namona be ita karaia gaudia ibounai ese idia hahedinaraia, ita abia dae momokani Dirava ese ena gwauhamata do ia hagugurua. Ena be heiriheiri negana lalonai ita noho, namona be Enoka bamona, Dirava ida ita raka noho.

[Footnotes]

Edena Bamona Do Oi Haere?

• Dirava ida ita raka ena anina be dahaka?

• Dahaka dainai Dirava ida ita raka be dala hereadaena?

• Heiriheiri negana lalonai, dahaka ese Enoka ia durua Dirava ida ia raka totona?

• Edena dala ai Enoka ita tohotohoa diba?

[Picture on page 21]

Mai abidadama ida, “Enoka be Dirava momokanina ida ia raka”

[Picture on page 23]

Ita abia dae momokani Iehova ena gwauhamata be do idia guguru

[Picture Credit Lines on page 19]

Woman, far right: FAO photo/B. Imevbore; collapsing building: San Hong R-C Picture Company