Aberahamo​—⁠Abidadama Ena Haheitalai

‘Aberahamo be abidadama taudia edia tubuna.’​—⁠ROMA 4:⁠11.

1, 2. (a) Hari inai negai Keristani taudia momokanidia be Aberahamo idia laloatao ena badina be dahaka? (b) Dahaka dainai Aberahamo idia gwauraia ‘abidadama taudia edia tubuna’?

IA BE bese badana ena tamana, peroveta tauna, bisinesi tauna, bona hakaua tauna. To, hari inai negai Keristani taudia ese ia idia laloatao ena badina badana be ia hahedinaraia karana ta, unai kara dainai Iehova Dirava ia gwau ia be iena turana​—⁠unai kara be ena abidadama goadana. (Isaia 41:8; Iamesi 2:23) Ena ladana be Aberahamo, bona Baibel ese ia gwauraia ‘abidadama taudia edia tubuna.’​—⁠Roma 4:⁠11.

² Aberahamo ia do vara lasi neganai, taunimanima haida, hegeregere Abela, Enoka, bona Noa, ese abidadama idia hahedinaraia danu, ani? Oibe, to Dirava ese Aberahamo dekenai ia gwauhamata ia dainai tanobada besedia ibounai do ia hanamoa. (Genese 22:18) Unai dainai, laulau dalanai gwauhamata Garana idia abidadama henia taudia ibounai edia tamana ai ia lao. (Galatia 3:​8, 9) Dala ta ai, Aberahamo be iseda tamana bamona, badina ena abidadama be haheitalai namona ita ese ita tohotohoa totona. Iena mauri ibounai lalonai abidadama ia haheitalaia, badina nega momo hahetoho idauidau ia davaria. Momokani, Aberahamo ese ena hahetoho badana​—⁠hahegani ia abia iena natuna Isako do ia hamasea​—⁠ia do davaria lasi neganai, hahetoho idauidau momo lalonai ena abidadama ia hamomokania. (Genese 22:​1, 2) Guna ena abidadama idia tohoa gaudia haida mani ita laloa, bona hari inai negai idia amo ita diba gaudia do ita itaia.

Hahegani Ia Abia Uru Do Ia Rakatania

 3. Baibel ese Aberamo ena noho dalana be edena bamona ia gwauraia?

³ Baibel ese Genese 11:26 ai, nega ginigunana Aberamo (gabeai ena ladana be Aberahamo) ia herevalaia, ia gwau: “Tera ena mauri lagani be 70 murinai, ia ese Aberamo bona Nahoro bona Harana ia havaraia.” Aberamo be Dirava ia gari henia tauna Sema ena tubuna ta. (Genese 11:​10-24) Genese 11:31 hegeregerena, Aberamo bona ena ruma bese be “Uru hanua, Kaledea tano” dekenai idia noho, gunaguna unai kohu bada hanuana be Euperate Sinavaina ena ist kahanai.a Unai dainai, Aberamo ia tubu daekau neganai ia be palai rumadia ai ia noho loaloa tauna lasi, to kohu bada hanuana ia noholaia tauna. Uru ena maketi gabuna ai tano haida amo idia mailaia gaudia idia hoia diba. Ena daladia badinai be ruma kurokuro badadia idia noho, bona unai ruma namodia be mai edia ranu paipa.

 4. (a) Uru lalonai Dirava momokani idia tomadiho henia taudia ese edena bamona hekwakwanai idia davaria? (b) Edena dala ai Aberamo ese Iehova ia abidadama henia matamaia?

⁴ Ena be Uru be kohu bada hanuana, to bema ta ia ura Dirava ia hesiai henia hekwakwanai badana do ia davaria. Unai hanua lalonai kaivakuku tomadiho henia karadia bona meamea karadia momo idia karaia. Momokani, ena ruma badana be hua ena dirava Nanna ia abia isi dubuna ena kohoro latana. Ita laloa diba Aberamo idia doria bada unai tomadiho dikana ia badinaia totona, reana ena varavara haida ese ia idia doria danu. Iuda taudia edia sene herevadia haida hegeregerena, Aberamo ena tamana, Tera, be kaivakuku karaia tauna. (Iosua 24:​2, 14, 15) Unai be herevana, to Aberamo ese koikoi tomadiho dikana ia badinaia lasi. Ena tubuna burukana Sema ia do mauri noho bona ita daradara lasi ia ese Dirava momokani ena sivarai ia harorolaia. Unai dainai, Aberamo ese Nanna lasi to Iehova ia abidadama henia!​—⁠Galatia 3:⁠6.

Abidadama Tohoa Gauna Ta

 5. Aberamo be Uru ai ia do noho neganai, Dirava ese ia henia hahegani bona gwauhamata be dahaka?

⁵ Aberamo ese ena abidadama ia tohoa gauna ta ia davaria. Dirava be ia dekenai ia hedinarai, ia gwau: “Oiemu tano bona oiemu varavara bona oiemu tamana ena ruma oi rakatania, bona oi dohore lau hadibaia tano dekenai do oi lao. Lau be oi dekenai tubuna momo do lau henia, dohore idia be bese bada herea. Oi do lau hanamoa, bona oiemu ladana do lau habadaia, vadaeni taunimanima ese namo bada do idia davaria oi dekena amo. Oi idia hanamoa taudia be lauegu hanamoa do idia davaria, to oi idia hadikaia taudia be dohore lau hadikaia. Tanobada ena bese ibounai, be oi dainai namo bada do idia davaria.”​—⁠Genese 12:​1-3; Kara 7:​2, 3.

 6. Aberamo ese Uru ia rakatania totona dahaka dainai ena abidadama ia goada be namo?

⁶ Aberamo ia buruka bona ia be natudia lasi. Edena dala ai “tubuna momo” do ia abia diba? Bona do ia lao tanona be edeseniai? Dirava ese unai nega ai ia hadibaia lasi. Unai dainai, Aberamo ese kohu bada hanuana Uru bona ena mauri namona ia rakatania totona iena abidadama ia goada be namo. Buka ladana Family, Love and the Bible ese idaunegai mauri ia herevalaia, ia gwau: “Kara dika badana ia karaia ruma bese tauna ta ese ia abia diba panisi badana be ia idia lulua oho, ruma bese ‘tauna ta’ bamona ia noho diba lasi. . . . Unai dainai Aberamo ese Dirava ena hahegani dainai ena tano sibona lasi, to ena varavara danu ia rakatania karana ese kamonai bona abidadama karana badana ia hahedinaraia.”

 7. Edena dala ai Aberamo ia davaria abidadama tohoa gaudia be hari inai negai Keristani taudia ese idia davaria danu?

⁷ Hari Keristani taudia ese unai bamona hahetoho idia davaria diba danu. Aberamo bamona, reana mamina ita abia tomadiho momokani gaudia lasi to tauanina gaudia ita atoa guna be namo. (1 Ioane 2:16) Reana abidadama lasi ruma bese taudia ese ita idia dagedage henia, bona reana orea amo idia atoa siri taudia ese hebamo dikana dekenai ita idia veria toho. (Mataio 10:​34-36; 1 Korinto 5:​11-13; 15:33) Unai dala ai, Aberamo ese ita dekenai haheitalai namona ia hahedinaraia. Ia ese ena hetura karana Iehova ida ia atoa guna​—⁠ena varavara danu be gabeai. Ia diba namonamo lasi edena dala ai, edena nega ai, eiava edeseniai Dirava ena gwauhamata do idia guguru. To, iena mauri ibounai lalonai mai ena ura ida unai gwauhamata ia abidadama henidia. Unai ese ita ia hagoadaia bada, hari iseda mauri lalonai Basileia ita tahua guna totona!​—⁠Mataio 6:⁠33.

 8. Edena dala ai Aberamo ena abidadama ese ena ruma bese taudia ia veria, bona unai amo Keristani taudia be dahaka idia dibaia diba?

⁸ Aberamo ena ruma bese taudia be edena bamona? Ia hedinarai, Aberamo ena abidadama ese idia ia veria goada, badina ena adavana, Sarai, bona ena tadina ena natuna, tama sina lasi merona Lota, ese Dirava ena hahegani idia kamonai henia bona Uru idia rakatania. Gabeai, Aberamo ena tadina Nahoro bona iena natudia haida ese Uru idia rakatania bona Harana dekenai idia lao bona idia noho, unuseniai Iehova idia tomadiho henia. (Genese 24:​1-4, 10, 31; 27:43; 29:​4, 5) Oibe, Aberamo ena tamana, Tera, danu be ena natuna ida ia lao! Ia be ruma bese ena kwarana dainai, Baibel ia gwau ia ese Kanana dekenai ena bese taudia ia hakaua. (Genese 11:31) Bema dala namona ai iseda varavara ita haroro henidia, idia danu do idia kamonai, a?

 9. Aberamo ese ena laolao totona be edena bamona ia hegaegae, bona reana dahaka dainai gau haida ia haboioa?

⁹ Aberamo ese ena loaloa ia do hamatamaia lasi neganai, gau momo ia karaia. Iena tano bona kohu ia hoihoilaia bona palai rumadia, kamelo, aniani, bona gau ma haida ia hoia be namo. Reana Aberamo ese unai gaudia ia karaia haraga dainai moni ia haboioa, to mai moale ida Iehova ia kamonai henia. Aberamo bona ia ida idia lao taudia be edia laolao totona idia hegeregere vadaeni bona Uru ena magu murimurinai idia gini dinana be dina badana! Euperate Sinavaina idia badinaia dainai, notwest kahanai idia lao. Pura momo bona kilomita 1,000 bamona idia lao murinai, idia be Mesopotamia ena not kahana ai ia noho hanua ladana Harana dekenai idia ginidae, laolao taudia be nega sisina idia noho gabuna badana unai.

10, 11. (a) Dahaka dainai Aberamo be nega sisina Harana dekenai ia noho? (b) Tama sina burukadia idia naria Keristani taudia be edena bamona ita hagoadaia diba?

¹⁰ Toana be Aberamo ese ena tamana burukana, Tera, ia laloa dainai Harana dekenai ia noho. (Levitiko 19:32) Unai hegeregerena, hari Keristani taudia momo be mai edia maduna edia buruka eiava gorere tama sina idia naria, bona unai idia karaia totona haida ese edia mauri dalana idia haidaua danu. Unai idia karaia be mai anina bada neganai, namona be idia diba edia lalokau karadia ese ‘Dirava idia hamoalea.’​—⁠1 Timoteo 5:⁠4.

¹¹ Nega ia hanaia lao. “Tera ena mauri lagani ibounai be 205, vadaeni Harana hanua dekenai ia mase.” Aberamo ia lalohisihisi bada, to ena taitai negana ia ore murinai, maoromaoro Harana ia rakatania. Unai neganai “iena mauri lagani be 75. Aberamo ese iena adavana Sarai bona iena vavana [“kakana ena natuna mero,” NW ] Lota ia hakaua lao. Harana hanua dekenai idia davaria kohu bona gaukara memero danu idia abia lao. Idia toreisi, Kanana dekenai idia lao.”​—⁠Genese 11:32; 12:​4, 5.

12. Aberamo be Harana ai ia noho neganai dahaka ia karaia?

¹² Ita itaia Aberamo be Harana dekenai ia noho neganai “kohu” ia abia. Ena be Aberamo ese Uru ia rakatania neganai kohu haida ia haboioa, Harana amo ia lao neganai ia be taga tauna. Ia hedinarai goevagoeva, unai be Dirava ena hahenamo dainai ia vara. (Hadibaia Tauna 5:19) Dirava ia gwau lasi, hari ena taunimanima iboudiai dekenai kohu do ia henia, to iena gwauhamata ia badinaia bona Basileia dainai ‘edia ruma, o tadikakana, o taihuna’ idia rakatania taudia do ia naria. (Mareko 10:​29, 30) Aberamo ese “gaukara memero” eiava hesiai taudia momo ia abia danu. Jerusalem Targum bona Chaldee Paraphrase toretoredia idia gwau Aberamo ese ‘ia haroro henidia.’ (Genese 18:19) Oiemu abidadama ese oi ia veria, emu dekena taudia, gaukara turadia, eiava sikuli turadia oi haroro henia totona, a? Aberamo ese Dirava ena hahegani ia laloaboio lasi bona ia laloa lasi Harana dekenai do ia noho momokani, to unuseniai ena nega ia gaukaralaia namonamo. To unuseniai ia noho negana ia ore. “Vadaeni Aberamo ia lao, Dirava ena oda hegeregere.”​—⁠Genese 12:⁠4.

Euperate Idia Hanaia

13. Edena nega ai Aberamo ese Euperate Sinavaina ia hanaia, bona dahaka dainai unai kara be mai anina bada?

¹³ Guna bamona, Aberamo ia laolao lou. Harana idia rakatania, bona west kahana dekenai kilomita 90 bamona idia lao. Aberamo be Euperate badinai ia ginidae bona reana ia noho sisina, unai gabu amo sinavai ena unai kahana ai be idaunegai hoihoilaia gabuna badana Karakemisi. Laolao taudia be nega momo unai gabu ai sinavai idia hanaia.b Edena dina ai Aberamo bona ia ida idia lao taudia ese sinavai idia hanaia? Baibel ia hahedinaraia unai idia karaia bena lagani 430 murinai, Nisan 14, 1513 B.C.E. ai, Iuda taudia ese Aigupito idia rakatania. Esodo 12:41 ia gwau: “Lagani 430 ia ore dinana momokani neganai, Lohiabada ena orea ibounai be Aigupito tano dekena amo idia raka siri.” Ia hedinarai, Nisan 14, 1943 B.C.E. ai, Aberamo be mai kamonai ida Euperate ia hanaia neganai, Aberahamo gwauhamatana ia gaukara matamaia.

14. (a) Aberamo ese ena abidadama ena matana amo dahaka ia itaia diba? (b)  Edena dala ai hari inai negai Dirava ena taunimanima edia hahenamo ese Aberamo ena ia hanaia?

¹⁴ Aberamo ese kohu bada hanuana ia rakatania. To, hari ia ese ‘hanua mai nadi badina aukana,’ taunimanima ia lohiaia kara maoromaoro gavamanina, ia laloa diba. (Heberu 11:10) Oibe, ena be Aberamo ese gau haida sibona ia diba, to idia mase noho taudia hamauria totona Dirava ena palani ena kahana haida ia lalo-pararalaia matamaia. Aberamo ese Dirava ena palani ia lalo-pararalaia sisina, to hari iseda hahenamo be unai palani dekenai iseda lalo-parara ia bada ia lao. (Aonega Herevadia 4:18) Aberamo ia naria “hanua,” eiava Basileia gavamanina, be hari ia gini vadaeni​—⁠lagani 1914 ai guba dekenai idia haginia. Unai dainai, namona be unai ese ita ia veria abidadama bona Iehova kamonai henia karadia ita hahedinaraia totona, ani?

Gwauhamata Tanona ai Idia Loaloa Matamaia

15, 16. (a) Dahaka dainai Aberamo ese Iehova dekenai boubou patana ia haginia neganai ia gari lasi be namo? (b) Edena dala ai hari inai negai Keristani taudia ese Aberamo ena gari lasi karana idia tohotohoa diba?

¹⁵ Genese 12:​6, ia gwau: “Kanana dekenai idia ginidae neganai, Aberamo ese tano ia raka hanaia, ia lao bona Sekema hanua ena helaga gabuna dekenai ia ginidae, ma ia raka lao, ela bona au helagana ladana More dekenai.” Sekema ena daudau Ierusalema amo be kilomita 50 ena not kahanai bona koura namona ai ia noho, idia gwauraia “tano helagana ena paradaiso.” To, “unai neganai Kanana taudia be unai tano dekenai idia noho.” Kanana taudia ese matabodaga karadia idia karaia dainai, namona be Aberamo ia hekwarahi, edia kara ese ena ruma bese taudia idia hadikaia lasi totona.​—⁠Esodo 34:​11-16.

¹⁶ Nega iharuana, “Lohiabada ese Aberamo dekenai ia hedinarai, ia hereva, ia gwau, ‘Inai tano be oiemu tubuna dekenai do lau henia.’ ” Unai be moale gauna badana! Momokani, Aberamo ena abidadama ia goada be namo, vaira negana ai ena tubudia sibona ese do idia abia hahenamona ia moalelaia totona. Vadaeni, “Aberamo ese boubou patana ia karaia Lohiabada dekenai, badina be Lohiabada ese ia dekenai ia hedinarai unai gabu dekenai.” (Genese 12:⁠7) Baibel ia diba bada tauna ta ia gwau: “Tano dekenai boubou patana ia haginia karana be unai tano ia abia karana hegeregerena, badina ia hahedinaraia unai tano ai ia be mai ena maoro ena tomadiho ia badinaia.” Unai bamona boubou patana haginia karana be gari lasi karana. Ita daradara lasi, unai boubou patana be gabeai Taravatu gwauhamatana ia hahedinaraia bamona, tano ena (idia utua lasi) nadidia amo ia karaia. (Esodo 20:​24, 25) Kanana taudia ese idia gaukaralaia boubou patadia amo ena toana ia idau momokani. Unai dala ai Aberamo ese mai gari lasi ida ia hahedinaraia ia be Dirava momokanina, Iehova, ia tomadiho henia, bona unai dainai ia do idia lalo-dika bona dagedage henia diba. Hari ita be edena bamona? Matamata taudia​—⁠bona ita ma haida​—⁠be iseda sikuli turadia eiava dekena taudia dekenai ita hahedinaraia lasi ita ese Iehova ita tomadiho henia, a? Namona be Aberamo ena gari lasi karana ese ita ia hagoadaia, bona mai moale ida do ita hahedinaraia ita be Iehova ena hesiai taudia!

17. Edena dala ai Aberamo ia hahedinaraia ia be Dirava ena ladana harorolaia tauna, bona unai dainai hari inai negai Keristani taudia be dahaka idia laloa bona idia karaia?

¹⁷ Herevana Aberamo be edeseniai ia lao, hanaihanai Iehova tomadiho henia karadia ia atoa guna. “Unai murinai Aberahamo ese unai gabu ia rakatania, ia lao diho kahanai. Ororo ta, Betele hanua ena dina ia daekau kahana dekenai iena palai ruma ia haginia. Betele be dina ia diho kahanai, Ai hanua be dina ia daekau kahanai. Unuseni boubou patana ia karaia, bona Lohiabada dekenai ia tomadiho.” (Genese 12:⁠8) Heberu herevana, idia hahanaia “Lohiabada dekenai ia tomadiho,” ena anina ma ta be “ladana gwauraia (harorolaia).” Ita daradara lasi, Aberamo ese ia kahirakahira idia noho Kanana taudia dekenai Iehova ena ladana ia harorolaia mai gari lasi ida. (Genese 14:​22-24) Unai dainai hari iseda maduna ita laloa, bona mai eda goada ibounai ida ‘Dirava ena ladana ita gwauraia hedinarai.’​—⁠Heberu 13:​15, NW; Roma 10:⁠10.

18. Edena dala ai Aberamo ese Kanana taudia ia kara henia?

¹⁸ Aberamo ese unai gabudia dekenai ia noho daudau lasi. “Vadaeni ma ia toreisi, ia lao diho kahanai, Negebe tano kahirakahira”​—⁠unai be tano gagaena sisina Iuda ena ororo edia saut kahanai. (Genese 12:⁠9) Aberamo bona ena ruma bese taudia be hanaihanai idia loaloa bona idia lao gabu matamatadia ibounai dekenai idia hahedinaraia idia ese Iehova idia tomadiho henia, unai kara amo idia hahedinaraia ‘idia be gabu idau taudia bona do idia noho daudau lasi.’ (Heberu 11:13) Nega ibounai idia naria namonamo, idia kahirakahira idia noho kaivakuku idia tomadiho henia taudia idia bamoa lasi. Unai hegeregerena, hari inai negai Keristani taudia danu be “tanobada ena lasi.” (Ioane 17:16) Iseda dekena taudia bona gaukara turadia ita kara namo henia, to ita naria namonamo, Dirava idia dadaraia tanobada taudia edia kara bamona ita karaia garina.​—⁠Efeso 2:​2, 3.

19. (a) Dahaka dainai loaloa maurina be mai ena hekwarahi Aberamo bona Sarai dekenai? (b) Aberamo ese edena hahetoho do ia davaridia?

¹⁹ Namona be ita laloaboio lasi, Aberamo bona Sarai ese loaloa maurina ena hekwarahi idauidau idia manadalaia be auka. Edia aniani be Uru ena maketi namodia amo idia hoia lasi, to edia animal amo idia abia; ruma namona idia noholaia lasi to palai rumadia lalonai idia noho. (Heberu 11:⁠9) Aberamo ena gaukara be bada; ena animal bona ena hesiai taudia ia naria. Bona ita daradara lasi Sarai ese unai mauri dalana idia badinaia hahine taudia edia gaukara idauidau ia karaia: paraoa idia karaia, beredi idia gabua, vulu varona idia karaia, dabua idia turia. (Genese 18:​6, 7; 2 King Taudia 23:7; Aonega Herevadia 31:19; Esekiela 13:18) To, hekwakwanai ma haida do idia davaria. Daudau lasi murinai, Aberamo bona ena ruma taudia ese idia davaria hahetoho dainai reana edia mauri idia haboioa diba! Aberamo ena abidadama do ia goada noho, a?

[Footnotes]

Inai Oi Dibaia, A?

• Dahaka dainai Aberamo idia gwauraia ‘abidadama taudia edia tubuna’?

• Dahaka dainai Aberamo ena abidadama ia goada be namo, Kaledea taudia edia Uru ia rakatania totona?

• Edena dala ai Aberamo ia hahedinaraia Iehova tomadiho henia karana ia atoa guna?

[Map on page 16]

(For fully formatted text, see publication)

ABERAMO ENA LAOLAO

Uru

Harana

Karakemisi

KANANA

Davara Badana

[Credit Line]

Based on a map copyrighted by Pictorial Archive (Near Eastern History) Est. and Survey of Israel

[Picture on page 15]

Aberamo ena abidadama ia goada be namo Uru ena mauri namona ia rakatania totona

[Picture on page 18]

Aberamo bona ena ruma taudia be palai rumadia ai idia noho karana amo idia hahedinaraia ‘idia be gabu idau taudia bona do idia noho daudau lasi’