Iehova Oi Laloaboio Lasi be Namo

ISRAELA taudia haida be guna unai bamona idia karaia. To, momo dekenai, inai be edia nega ginigunana sinavai idia raka hanaia bona idia paripari lasi. Oibe, Iehova ese Ioridane Sinavaina ia hakaukaua. Israela taudia milioni momo be unai sinavai idia hanaia bona Gwauhamata Tanona dekenai idia lao. Lagani 40 gunanai Davara Kakakakana ai Israela taudia edia tubudia ese idia karaia bamona, Ioridane Sinavai idia hanaia taudia momo be reana idia laloa, ‘Iehova ese ia karaia gaudia do lau laloaboio diba lasi.’​​—Ios. 3:​13-​17.

To, Iehova ia diba Israela taudia haida be ia karaia karana “idia laloaboio haraga.” (Sal. 106:13) Unai dainai, Iehova ese Iosua, Israela taudia ia gunalaia tauna ia hamaoroa sinavai amo nadi 12 do ia abia bona idia kamepa gabuna ginigunana dekenai do ia atoa. Iosua ia gwau: “Inai nadi be Israela taudia edia laloatao toana, idia itadia neganai, iniseni idia vara gaudia do idia laloa lou.” (Ios. 4:​1-8) Israela taudia be unai nadi do idia itaia neganai, Iehova ena kara badadia do idia laloatao bona unai ese idia do ia hagoadaia Iehova do idia badinaia hanaihanai totona.

Hari inai negai idia noho Iehova ena hesiai taudia dekenai unai sivarai be mai anina bada, a? Oibe. Namona be Iehova ita laloaboio lasi, bona hanaihanai iena hesiai gaukara ita karaia. Hari inai negai idia noho Iehova ena hesiai taudia dekenai, Iehova ese Israela taudia dekenai ia henia sisiba be mai anina bada. Mani Mose ena hereva oi laloa, ia gwau: “Do umui naria namonamo, Lohiabada, emui Dirava do umui laloaboio garina, o iena Taravatu o iena oda, hari dina umui dekenai lau henia gaudia do umui badinaia lasi garina.” (Deu. 8:​11) Unai ese ia hahedinaraia bema Iehova ita laloaboio, Ia do ita badinaia lasi. Hari iseda negai danu unai ia vara diba. Unai dainai, aposetolo Paulo be Keristani taudia ia tore henia neganai, ia be idaunegai tano gagaena dekenai Israela taudia ese ‘Dirava ena hereva idia utua karana’ ia herevalaia.​​—Heb. 4:​8-​11.

Israela taudia dekenai idia vara gaudia haida do ita herevalaia, bona unai ese do ia hahedinaraia Dirava ita laloaboio lasi be gau badana. Bona danu, Iehova idia badinaia tatau rua edia haheitalai ese ita do ia durua, mai haheauka ida Iehova ita hesiai henia bona ena gaukara ita laloa bada totona.

Iehova Ita Laloatao Ena Badina Haida

Israela taudia be lagani momo lalonai Aigupito dekenai idia noho neganai, Iehova ese idia ia laloaboio lasi. Iehova be “iena gwauhamata, Aberahamo bona Isako bona Iakobo dekenai ia gwauhamata henia gauna ia laloa.” (Eso. 2:​23, 24) Iehova ese Israela taudia be igui hesiai amo ia hamauridia karana be idia laloaboio diba lasi.

Iehova ese Aigupito taudia dekenai hisihisi 9 ia havaraia. Farao ena meamea pris taudia be unai hisihisi idia koua diba lasi. To, Farao be Iehova ia gwau-edeede henia noho bona Israela taudia ia ruhaia lasi. (Eso. 7:14–​10:29) To hisihisi namba 10 murinai, unai hekokoroku tauna Farao be Dirava ena ura ia badinaia. (Eso. 11:​1-​10; 12:12) Mose ese Israela besena bona taunimanima ma haida, reana edia namba be 3,000,000 bamona be Aigupito amo ia hakaudia. (Eso. 12:​37, 38) To Israela taudia idia lao murinai, Farao be ena lalona ia haidaua. Iena tuari oreana​​—unai nega ai unai tuari orea be orea goadana​​—ia oda henia Israela taudia ia abia lou totona. To, Iehova ese Mose ia hamaoroa Israela taudia be do ia abia lao Davara Kakakakana bona ororo badadia huanai, unai gabu ladana idia gwauraia Pi Hahiroto dekenai bona toana be Israela taudia be dala lasi idia heau totona.​​—Eso. 14:​1-9.

Farao ia laloa Israela taudia be dala lasi idia heau mauri totona bona iena tuari oreana ese do idia tuari henidia. Aigupito taudia be Israela taudia idia abia haraga lasi, badina Iehova ese ori bona lahi be Israela taudia bona Aigupito taudia huanai ia atoa. Bena Dirava ese Davara Kakakakana ia hapararaia, bena ena ranu be haba bamona ia haginia ena lata be mita 15, bona ena huanai amo Israela taudia be tano kaukauna amo idia raka hanai. Daudau lasi murinai, Aigupito taudia be kone dekenai idia ginidae bona idia itaia Israela taudia be davara ena kahana dekenai idia lao noho.​​—Eso. 13:21; 14:​10-​22.

Bema Farao ia laloa namonamo, Israela taudia do ia rakatania bona do ia giroa lou​​—to lasi, Farao be unai bamona ia karaia lasi. Farao ia laloa do ia kwalimu dainai, ena kariota bona guia taudia ia oda henidia Israela taudia idia lulua noho totona. To, Aigupito taudia be Israela taudia dekenai idia do ginidae lasi neganai, dika idia davaria. Aigupito taudia edia kariota be idia heau diba lasi! Badina Iehova ese edia kariota ena uili ia kokia.​​—Eso. 14:​23-​25; 15:9.

Aigupito taudia edia kariota idia dika bona idia hekwarahi noho lalonai, Israela taudia be Davara Kakakakana ena ist kahanai idia ginidae. Vadaeni, Mose ese ena imana be Davara Kakakakana dekenai ia duduia. Unai neganai, Iehova ese unai haba bamona ia haginia ranu be Farao bona iena tuari taudia latanai ia hamorua. Idia ibounai idia mase. To Israela taudia ibounai idia roho mauri!​​—Eso. 14:​26-​28; Sal. 136:​13-​15.

Kahirakahira idia noho hanuadia be unai sivarai idia kamonai neganai, idia gari dikadika. (Eso. 15:​14-​16) Lagani 40 ia ore murinai, Ieriko hanua hahinena, Rahaba ese Israela tatau rua ia hamaoroa, ia gwau: “Umui dekenai ai gari bada. . . . Badina be ai kamonai Lohiabada ese Davara Kakakaka be umui emui vairanai ia hakaukaua, Aigupito tano dekena amo umui raka mai neganai.” (Ios. 2:​9, 10) Dirava idia diba lasi besedia danu be Iehova ese ena bese ia hamauria dalana idia laloaboio diba lasi. Momokani, Israela taudia be Iehova idia laloatao noho be gau badana.

“Ia Gimaia, Sibona Ena Lalokau Tauna Ia Gimaia Bamona”

Israela taudia be Davara Kakakakana idia hanaia murinai, idia be Sinai Ororona, “taunimanima noho lasi tano badana bona dikana” dekenai idia lao. Ena be idia be ‘ranu lasi tanona’ dekenai idia loaloa bona idia ibounai totona aniani be bada lasi, to Iehova be idia ia naria. Mose ia gwau: “[Iehova] ese taunimanima noho lasi tano dekenai, [Israela taudia] ia davaria. Rei lasi tano dekenai idia ia davaria. Lohiabada ese idia ia naria bona ia ubua. Ia ese idia ia gimaia, sibona ena lalokau tauna ia gimaia bamona.” (Deu. 8:​15; 32:10; BHğ) Edena dala ai Dirava ese idia ia naria?

Iehova ese idia dekenai guba dekena amo ia mai aniani, mana, ia henidia. Unai aniani be Iehova ese hoa dalanai tano latanai ia atoa. Unai aniani be “gau maragidia idia noho tano dekenai, edia toana be kurokuro, aisi medu ranu ia auka bamona.” (Eso. 16:​4, 14, 15, 35) Iehova ese hoa dalanai nadi hagahaga amo Israela taudia dekenai ranu ia henia. Tano gagaena dekenai lagani 40 lalonai idia loaloa neganai, Iehova ese idia ia naria dainai edia dabua ia dika lasi bona edia aena ia gudu lasi. (Deu. 8:​4) Israela taudia be edena dala ai Iehova do idia tanikiu henia? Mose ese Israela taudia ia hamaoroa: “Do umui naria namonamo! Emui mauri do umui naria, Lohiabada ena hoa kara do umui laloaboio garina. To emui mauri dinadia ibounai lalonai, emui matana idia itaia vadaeni hoa gaudia do umui laloatao.” (Deu. 4:9) Israela taudia be Iehova idia tanikiu henia bona idia ia hamauria karadia idia laloa neganai, nega ibounai Ia do idia hesiai henia bona iena taravatu do idia badinaia. Israela taudia be dahaka do idia karaia?

Dirava Laloaboio Karana ese Gwau-Edeede Ia Havaraia

Mose be Israela taudia ia hamaoroa: “Edia Dirava, edia Hamauria Tauna badana, be idia laloaboio.” (Deu. 32:18) Israela taudia be Iehova ese Davara Kakakakana ai ia karaia karana, tano gagaena ai ia naridia dalana, bona Ia karaia gau namodia momo idia laloaboio haraga. Unai dainai Israela taudia idia gwau-edeede.

Nega ta ranu be lasi dainai, Israela taudia be Mose dekenai idia badu. (Num. 20:​2-5) Israela taudia be idia ania mana dainai idia maumau, idia gwau: “Inai aniani gauna dikana dekenai be ai hesiku momokani.” (Num. 21:5) Idia be Iehova ese ia karaia gaudia idia dadaraia bona idia ura lasi Mose be idia ia gunalaia dainai idia gwau: “Aigupito dekenai o inai taunimanima noho lasi tanona dekenai ai mase be namo. . . . Iseda biaguna ta do ita abia hidi, Aigupito dekenai do ita giroa lou.”​​—Num. 14:​2-4.

Israela taudia idia gwau-edeede neganai, Iehova ena hemami be edena bamona? Salamo torea tauna ta be idia vara gaudia ia laloa neganai, ia gwau: “Nega momo, taunimanima idia noho lasi tano dekenai, iena bese taudia ese Dirava idia kamonai henia lasi, mai dagedage danu. Io, nega momo tano kaukau dekenai, idia ese Dirava ena lalona idia hisihisi henia. Dirava ena bogahisihisi idia tohoa lou, tohoa lou, bona idia ese Israela edia Helaga Dirava idia habadua. Iena siahu bada herea be idia laloaboio. Dirava ese dagedage taudia dekena amo ia hamauridia dinana, be idia ese idia laloaboio. Unai dina dekenai, Dirava ese Aigupito dekenai kara badadia ia karaia.” (Sal. 78:​40-​43) Momokani, Israela taudia ese Iehova idia laloaboio dainai, unai ese Iena lalona ia hahisia bada.

Iehova Idia Laloatao Tatau Rua

To, Israela taudia haida be Iehova idia laloaboio lasi. Hegeregere, Iosua bona Kaleba. Idia ruaosi bona ma tatau 10 be Mose ese Kadesi Baranea amo ia siaia lao Gwauhamata Tanona idia itaia totona. Unai tatau 10 be Mose dekenai sivarai dikana idia gwauraia, to Iosua bona Kaleba be taunimanima idia hamaoroa, idia gwau: “Unai ai itaia tanona be namo herea. Bema Lohiabada ese ita dekenai ia laloa namo neganai, ia ese unai tano dekenai ita do ia hakaua. Oibe, ia ese unai tano, rata bona hani dekenai ia honu tanona ita dekenai do ia henia. To Lohiabada do umui tuari henia lasi.” Israela taudia be unai hereva idia kamonai neganai, idia ura Iosua bona Kaleba be nadi amo idia hodoa. To, idia ruaosi be idia gini goada bona Iehova dekenai idia tabekau.​​—Num. 14:​6-​10.

Lagani haida idia ore murinai, Kaleba ese Iosua ia hamaoroa: “Lohiabada ena hesiai tauna Mose ese lau ia siaia, Kadesi Baranea dekena amo lau lao, inai tano hunia dekenai do lau itaia totona. Lau ese inai tano ena sivarai lau abia lou neganai, sivarai momokani lau henia. Lauegu tadikaka taudia, lau danu idia lao taudia, ese taunimanima edia lalona idia hamanokaia, to lau ese Lohiabada egu Dirava lau badinaia momokani, mai egu kudouna ibounai.” (Ios. 14:​6-8) Kaleba bona Iosua be Dirava idia abidadama henia bona hahetoho idauidau idia haheaukalaia. Idia ruaosi be edia lalona idia hadaia Iehova do idia laloaboio lasi ela bona idia mase.

Kaleba bona Iosua be Dirava idia tanikiu henia badina Iehova be ena bese taudia dekenai tano namona ia henia, unai amo iena gwauhamata ia hamomokania. Unai dainai namona be Israela taudia ese Iehova idia tanikiu henia. Iosua ia gwau: “Lohiabada ese Israela taudia dekenai edia tano ibounai ia henia, edia sene taudia dekenai ia gwauhamata do ia henia hegeregerena. . . . Israela taudia dekenai ia gwauhamata henia gaudia ibounai, be Lohiabada ese ia badinaia momokani.” (Ios. 21:​43, 45) Kaleba bona Iosua idia karaia bamona, hari inai negai, edena dala ai Iehova dekenai iseda tanikiu karana ita hahedinaraia diba?

Tanikiu Karana Hahedinaraia

Dirava ia gari henia tauna ta ia gwau: “Lohiabada dekenai dahaka do lau henia, iena hariharibada ibounai lau dekenai ena davana?” (Sal. 116:12) Dirava ese tauanina dalanai ita ia hanamoa bada, Baibel amo ita ia hakaua dalana, bona vaira neganai ita do ia hamauria karana ita laloa neganai, ia dekenai gau ta ita henia diba, a? Iehova dekenai gau ta ita henia diba lasi. To, iseda tanikiu karana ita hahedinaraia diba.

Iehova ena sisiba herevadia ese oi idia durua hekwakwanai oi hanaia totona, a? Iehova be kara dika ia gwauatao dainai, unai ese oi ia durua lalomamina goevana oi abia totona, a? Dirava ena kara dainai ita abia namo be do idia noho hanaihanai, unai dainai namona be hanaihanai ia ita tanikiu henia. Sandra, ena mauri lagani 14 kekenina, be hekwakwanai haida ia davaria, to Iehova ena heduru amo unai ia hanaia. Ia gwau: “Iehova lau guriguri henia heduru totona, bona egu hekwakwanai hanaia totona, lau ia durua dalana ese lau ia hagoadaia. Hari lau diba dahaka dainai egu tamana be hanaihanai Aonega Herevadia 3:​5, 6 be lau dekenai ia gwauraia, unai siri ia gwau: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.” Lau diba Iehova ese lau ia durua ema bona hari, bona lau do ia durua noho.”

Haheauka Karana amo Oi Hahedinaraia Iehova Oi Laloatao

Baibel ese Iehova laloatao karana be ma kara ta ida ia hahegeregerea, ia gwau: “Nega ibounai metau bona hisihisi lalonai do umui haheauka noho, ela bona inai haheauka emui lalona dekenai ia goada momokani. Unai neganai emui kara be namo, bona Dirava ena dala hegeregerena do umui raka, kerere ta lasi.” (Iam. 1:4) “Emui kara be namo, bona Dirava ena dala hegeregerena do umui raka” ena anina be dahaka? Anina be kara namodia ita hahedinaraia bona Iehova ita abidadama henia karana ese ita do ia durua hahetoho ita haheaukalaia totona. Bema hahetoho ita haheaukalaia, unai ese iseda abidadama do ia hagoadaia bona do ita moale. Bona hahetoho be do ia ore.​​—1 Kor. 10:13.

Nega daudau Iehova ia hesiai henia tadikaka ta, be gorere badana ta ia haheaukalaia. Dahaka ese ia durua? Ia gwau: “Lau hekwarahi lau ura karaia gaudia lau laloa lasi totona, to Iehova ese ia karaia gaudia lau laloa. Dirava badinaia karana ena anina be, Iehova ese do ia karaia gaudia lau laloa guna, to lau karaia gaudia lau laloa momo lasi. Hekwakwanai lau davaria neganai, lau gwau lasi, ‘Iehova, dahaka dainai inai hekwakwanai lau davaria?’ Ena be Iehova lau hesiai henia bona Ia dekenai lau tabekau noho, to hekwakwanai lau davaria.”

Hari inai negai, Keristani kongrigeisen ese Iehova be ‘lauma bona momokani dekena amo idia tomadiho’ henia. (Ioa. 4:​23, 24) Namona be Keristani momokani taudia ese Iehova idia laloatao, to namo lasi Israela taudia idia karaia bamona idia karaia. To ita be kongrigeisen ta lalonai ita noho dainai, ita gwau lasi ita be Dirava ita badinaia noho. Kaleba bona Iosua idia karaia bamona, namona be ita ta ta be Iehova dekenai iseda tanikiu karana ita hahedinaraia bona mai haheauka ida Iehova ita hesiai henia. Unai bamona ita karaia be namo.

Iosua ese ia haginia nadi ese Israela taudia ia hadibaia Iehova ena hahemauri karadia idia laloatao totona, unai hegeregerena Dirava ena hereva lalonai idia noho sivaraidia ese ita idia hadibaia Dirava be iena taunimanima ia laloaboio lasi. Unai dainai, namona be salamo torea tauna bamona ita laloa, ia gwau: “To Lohiabada e, lau ese oiemu kara do lau laloa noho. Oiemu hoa karadia gunadia do lau laloa lou. Oiemu gaukara ibounai do lau laloa noho, bona oiemu siahu karadia danu do lau laloa.”​​—Sal. 77:​11, 12.

[Picture on page 7]

Israela taudia ibounai be ‘ranu lasi tanona’ dekenai idia raka loaloa

[Credit Line]

Pictorial Archive (Near Eastern History) Est.

[Picture on page 8]

Israela taudia be Kadesi Baranea ai idia kamepa neganai, spai taudia idia siaia Gwauhamata Tanona idia itaia totona

[Credit Line]

Pictorial Archive (Near Eastern History) Est.

[Picture on page 9]

Israela taudia be lagani momo tano gagaena dekenai idia noho dainai, Gwauhamata Tanona idia abia neganai, Iehova idia tanikiu henia

[Credit Line]

Pictorial Archive (Near Eastern History) Est.

[Picture on page 10]

Hekwakwanai idauidau ita haheaukalaia neganai, unai ese ita ia durua Iehova ena ura ita laloa bada totona