Daika Ena Taravatu Oi Abidadama Henia Diba?

Nega ginigunana Africa ia vadivadi henia tauna ta be dala badinai tau ta ia gini maoromaoro ia itaia bona unai ia laloa. Ia itaia miniti haida murinai, unai tau ia gini maoromaoro noho lalonai iena aena ia hamarerea sisina bona metairametaira kahana dekenai ia marere lao. Gabeai, unai vadivadi tauna ia lalo-parara dahaka dainai unai tau be unai bamona ia marere. Unai tau be ia ura telegraf auna ena ikerukeru dekenai ia gini. Adorahi ai dina ia diho lalonai, metairametaira au ena ikerukeru ia idau danu.

DINA ia diho bona daekau neganai au ena ikerukeru ia idau, unai hegeregerena taunimanima edia kara bona taravatu be idia idau hanaihanai. To, Iehova Dirava, “diari ibounai ia karaia” Tamana, be ia idau lasi. Hahediba tauna Iamesi ia gwau: “Dirava ese iena kara ia senisia lasi, ia diari hanaihanai, bona ia be mai ena dibura sisina lasi.” (Iamesi 1:17) Heberu peroveta tauna Malaki be Dirava ena hereva ia torea, ia gwau: “Lau be Lohiabada, bona lauegu kara lau haidaua lasi.” (Malaki 3:⁠6) Isaia ena negai, Dirava be Israela besena dekenai, ia gwau: “Lau be emui Dirava [“tamona sibona,” NW ], bona lau ese umui do lau naria noho, ela bona umui be buruka, bona emui huina idia kurokuro. Lau ese umui lau karaia, bona umui do lau naria.” (Isaia 46:⁠4) Unai hegeregerena, nega ia hanaia noho karana ese Siahu Ibounai Diravana ena gwauhamata herevadia ita abidadama henia diba karana ia haidaua lasi.

Taravatu amo Gau ta Ita Dibaia

Iehova ena gwauhamata herevadia be momokani bona ia haidaudia lasi, unai hegeregerena iena taravatu, dahaka be maoro bona dahaka be dika taravatudia, be ia haidaudia lasi. Kohu hoihoilaia tauna ta ese metau tohoa gauna koikoina bona maorona ia gaukaralaia neganai, oi abidadama henia diba, a? Lasi. Unai hegeregerena, “metau sikele koikoidia idia gaukaralaia noho taudia, be Lohiabada ese ia badu henidia noho, to sikele maoromaorodia dekenai Lohiabada ia moale noho.” (Aonega Herevadia 11:1; 20:10) Iehova ese Israela taudia dekenai Taravatu ia henia neganai, ia haganidia ia gwau: “Tau ta danu umui hoihoi neganai, hoihoi gaudia edia metau, edia lata bona edia momo do umui duahia karaia mai maoromaoro danu. Do umui koikoi lasi. Emui sikele bona edia metau gaudia bona emui hahetoho gauna be do idia maoromaoro momokani. Lau inai Lohiabada, emui Dirava, bona Aigupito tano dekena amo umui lau hakaua mai.”​​—⁠Levitiko 19:​35, 36.

Israela taudia ese unai hahegani idia badinaia dainai, idia ese Dirava ena lalo-namo idia abia bona tauanina dalanai ia hanamodia bada. Unai hegeregerena, Iehova idia tomadiho henia taudia ese iena taravatu, idia idau lasi gaudia, be sikele bona hahetohoa gaudia dekenai sibona lasi, to edia mauri ena kahana ibounai lalonai idia badinaia neganai, idia ia hanamoa bada. Dirava ia gwau: “Lau inai Lohiabada, emui Dirava. Emui namo habadaia dalana, be umui dekenai lau hadibaia noho. Emui raka dalana namona dekenai umui lau hakaua noho.”​​—⁠Isaia 48:⁠17.

Dahaka Dainai Hari Taravatu Badinaia Lasi Karana Ia Bada Ia Lao?

Baibel ese hari inai negai taunimanima ese taravatu idia badinaia lasi ena badina ia gwauraia. Baibel ena buka ginigabena, Apokalupo, ese guba dekenai ia vara tuarina ia herevalaia, bona ia vara gauna ese taunimanima ibounai edia mauri ia hadikaia ema bona hari. Aposetolo Ioane ia gwau: “Vadaeni guba dekenai tuari ia vara. Mikaela mai ena aneru momo danu ese huala idia tuari henia. Huala mai ena aneru momo danu ese Mikaela idia tuari henia. To huala ena goada hegeregere lasi dainai ia kwalimu lasi. Unai dainai huala mai ena aneru be dala lasi guba dekenai do idia noho. Vadaeni unai huala badana, be Dirava ena aneru ese idia negea diho. Ia be unai idaunegai gaigaina, bona iena ladana be Diabolo bona Satani. Ia be tanobada taudia ibounai ia koia noho gauna. Oibe, ia, mai ena aneru ibounai danu, be idia ese tanobada dekenai idia negea diho.”​​—⁠Apokalupo 12:​7-9.

Unai tuari murinai maoromaoro dahaka ia vara? Ioane ma ia gwau: “Guba e, bona guba lalonai noho taudia e! Unai kara dainai do umui moale bada! To tanobada bona davara, madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.”​​—⁠Apokalupo 12:⁠12.

Lagani 1914 lalonai Tanobada Ibounai Tuarina Ginigunana ia vara neganai, ‘tanobada madi, dika bada ia davaria’ bona guna idia badinaia mauri dalana idauna ena nega ia doko. Histori stadilaia hahinena Barbara Tuchman ia gwau: “Lagani 1914 ia lao lagani 1918 ena Tuari Badana be unai nega ia hapararaia iseda nega amo, bona hari iseda nega ena hetoana ia havaraia. Taunimanima momo be unai tuari lalonai idia mase ore, to bema idia mauri noho, anina namodia momo do idia havaraia diba, taunimanima edia abidadama idauidau idia boio, edia lalohadai idia haidaua, lalohadai maorodia idia hadikaia momokani, bona unai negai idia noho taudia edia kara bona lalohadai be hari inai nega idia noho taudia edia kara bona lalohadai amo idia idau.” Histori torea tauna ma ta, Eric Hobsbawm, ese unai ia abia dae, ia gwau: “Lagani 1914 amo, tanobada badadia dekenai idia gwauraia noho dalana namona be ia dika ia lao. . . . Iseda tubudia, lagani 1801 ia lao 1900 lalonai idia noho taudia, ese do idia gwauraia dagedage dikadika mauri dalana dekenai ita giroa lou haraga karana ita lalo-pararalaia be auka.”

Toretore tauna, Jonathan Glover, be ena buka Humanity​​—⁠A Moral History of the Twentieth Century lalonai, ia gwau: “Iseda nega toana ta be kara maoromaoro taravatuna ia boio ia lao.” Ena be ia ese murimuri amo ia mai kara maoromaoro taravatuna ena siahu ia daradaralaia, badina be West tanodia dekenai taunimanima be dubu idia badinaia lasi, to sisiba ia henia, ia gwau: “Unai taravatu ia boio ia lao dainai, namona be ita dubu ena kara maoromaoro taravatuna ita abia dae lasi taudia ita lalo-hekwarahi.”

Hari inai negai, abidadama hadikaia karana​​—⁠bisinesi, politikol, eiava tomadiho lalodiai eiava ita sibona eda bona ruma bese ena hetura karana ai​​—⁠bona unai kara dainai idia vara hisihisi be Diabolo ese ia havaraia dala dikadia ta, tanobada taudia ia hadikaia totona. Satani ese iena lalona ia hadaia vadaeni do ia tuari noho ela bona dokona bona Dirava ena taravatu idia badinaia taudia ibounai do ia hamorudia toho, ia ida do idia mase hebou totona.​​—⁠Apokalupo 12:⁠17.

To, abidadama hadikaia karana kokia totona dala ta ia noho, a? Aposetolo Petero ia haere, ia gwau: “Dirava ese ia gwauhamata vadaeni, guba matamata bona tanobada matamata do ia havaraia. Inai totona do ita naria noho. Unai gabu dekenai be kara maoromaoro sibona do ia noho.” (2 Petero 3:​13) Unai gwauhamata herevana ita abidadama henia diba, badina Dirava be mai ena siahu iena ura do ia hagugurua totona sibona lasi, to danu ia gwauhamata unai do ia hagugurua. Iehova ia gwau: “Lau ese lau gwauraia hereva, be anina do ia havaraia, bona lau dekenai do ia giroa kava lasi. Lau siaia totona gaukarana be do ia karaia momokani.” Ita abidadama henia gwauhamata herevana unai!​​—⁠Isaia 55:⁠11; Apokalupo 21:​4, 5.

Iehova Ena Taravatu Ita Badinaia

Inai tanobada ena noho dalana ia idau noho bona dika ia lao lalonai, Iehova ena Witnes taudia be idia hekwarahi Baibel ia gwauraia kara maoromaoro taravatudia idia badinaia totona. Unai dainai, taunimanima ibounai amo idia idau, bona nega momo unai ese ma haida edia lalona ia veria​​—⁠bona haida ese idia hevasehalaidia.

London dekenai Iehova ena Witnes taudia edia hebouhebou ta ai, TV ena nius gwauraia tauna ta ese Witnes tauna ta ia henanadai henia Iehova ena Witnes taudia be Keristani taudia momokanidia eiava. Ia haere ia gwau: “Oibe, badina Iesu be emai haheitalai tauna. Inai tanobada dekenai, taunimanima momo herea be sibona edia ura idia tahua, bona ai laloa gauna badana be Iesu Keriso be dala, hereva momokani, bona mauri. Ai abia dae ia be Dirava ena Natuna, Toi Tamona ena kahana ta lasi, unai dainai Baibel ai lalo-pararalaia dalana be tomadiho ma haida ese idia badinaia auka dalana amo ia idau.”

BBC televisen dekenai unai hereva idia hahedinaraia murinai, nius gwauraia tauna ese unai program be inai bamona ia hadokoa, ia gwau: “Gau momo lau dibaia, dahaka dainai Iehova ena Witnes taudia be eda iduara dekenai idia pidipidi. Bona lau laloa nega tamona ai, gabu tamona dekenai idia hebou taudia 25,000 ese dabua namona idia karaia bona edia kara be namo herea be nega ta unai bamona lau itaia lasi.” Unai bamona murimuri tauna ese unai aonega taudia, Dirava ese ia haidaua lasi taravatudia idia badinaia taudia, ia herevalaia dalana be namo herea!

Reana taunimanima haida idia ura lasi haida ese idia haginia taravatudia do idia badinaia, to oi ai hagoadaia emu Baibel oi tahua namonamo bona Dirava ena taravatu be dahaka oi dibaia be namo. To, namo lasi sisina sibona oi stadilaia. Namona be aposetolo Paulo ena sisiba oi badinaia, ia gwau: “Inai tanobada taudia edia kara bamona do umui karaia lasi, to Dirava ese emui lalona do ia hagiroa, vadaeni do umui matamata, bona idau momokani. Unai dekena amo Dirava ena ura be do umui diba momokani. Do umui diba edena kara be namo, edena kara Dirava ia ura henia, bona edena kara be goeva momokani.” (Roma 12:⁠2) Namona be emu gabu dekenai ia noho Kingdom Hall oi vadivadi henia, bona unuseniai Witnes taudia oi dibaia. Do oi davaria idia be taunimanima sibona, Baibel ena gwauhamata idia abidadama henia bona Dirava ena taravatu idia badinaia neganai idia hahedinaraia ia idia abidadama henia.

Dirava ese ena taravatu ia haidaua lasi bona idia be momokani, unai dainai emu mauri lalonai oi badinaia neganai hahenamo momo do oi abia. Namona be Dirava ena boiboi herevana oi badinaia, ia gwau: “Egu oda hereva bema umui kamonai henia neganai, emui noho be do ia namo, mai maino danu, sinavai hegeregerena, bona emui kara maoromaoro be goada, davara ena hurehure bamona.”​​—⁠Isaia 48:⁠18.

[Pictures on page 5]

Hari inai negai, bisinesi, politikol, tomadiho, bona ruma bese edia hetura karana dekenai, abidadama hadikaia karana ia vara