Natuna ta Ia Gwau-Edeede Neganai, Tama Sina Idia Gini Goada Dalana

KERISTANI hahine ta ladana Joya ia hekwarahi ena natuna mero ia naria totona, unai amo iena natuna be Iehova do ia lalokau henia. To, ena natuna ia bada neganai, ia gwau-edeede bona ruma ia rakatania. Joy ia gwau: “Lau laloa egu natuna ese lau ia koia, unai dainai lau lalometau bona lau badu, bona ia dekenai do idia vara gau dikadia sibona lau laloa.”

Reana oi danu oi ura emu natudia be Iehova do idia lalokau henia bona hesiai henia, unai dainai oi hekwarahi idia oi naria totona. To gabeai, natuna ta eiava haida be Iehova idia rakatania. Edena bamona emu lalohisihisi oi haheaukalaia diba? Dahaka ese oi do ia durua Iehova ena hesiai gaukara oi karaia noho totona?

Iehova Ena Natudia Idia Gwau-Edeede Neganai

Gau ginigunana be oi diba Iehova be oiemu hemami ia diba. Isaia 49:15 ia gwau: “Hahine ta ese iena natuna maragina ia laloaboio diba, a? Iena bogana dekena amo ia havaraia merona, be do ia bogahisihisi henia lasi, a? Io, sedira sinana ta ese iena natuna maragina ia laloaboio diba, to lau ese umui do lau laloaboio lasi momokani.” Oibe, tama sina ese idia abia hemami be Iehova ese ia mamia danu. Vadaeni, guba anerudia ibounai ese Ia idia hanamoa bona hesiai henia neganai, ia abia moalena mani oi laloa. Iehova ese “lai guba dekena amo” Iobu ia hereva henia neganai, Iehova be iena guba oreana ida Ia moalelaia negadia ia laloa lou, ia gwau: “Lau ese tanobada lau karaia neganai oi be edeseni? . . . Unai dina ena daba neganai, daba ena hisiu be idia ane abia hebou, bona guba ena aneru ibounai, be mai moale danu idia boiboi.”​​—⁠Iobu 38:​1, 4, 7.

Iehova ia itaia ena goevadae aneru natuna ta be ia gwau-edeede, bena Satani, anina be Dirava ia “Inai Henia Tauna” ai ia lao. Bona, Iehova ia itaia ena goevadae natudia Adamu bona Heva be idia gwau-edeede danu. (Genese 3:​1-6; Apokalupo 12:⁠9) Gabeai, aneru haida danu be Dirava idia gwau-edeede henia bona “edia gabu korikori idia rakatania.”​​—⁠Iuda 6.

Iehova ena goevadae natudia idia gwau-edeede neganai, Iehova be edena bamona hemami ia abia be Baibel ese ia gwauraia lasi. To, Baibel ia gwau: “Lohiabada ese taunimanima ia itaia, edia kara dika be bada herea gabu ibounai dekenai, bona edia laloa be nega ibounai ia dika sibona mo. Lohiabada ena lalona be ia hisihisi, taunimanima tanobada dekenai ia havaraia dainai, bona iena lalohisihisi be ia bada momokani.” (Genese 6:​5, 6) Iehova ena abia hidi besena, Israela, edia gwau-edeede karana ese ‘Dirava ena lalona idia hahisia’ bona “idia habadua” danu.​​—⁠Salamo 78:​40, 41.

Ita daradara lasi, natudia edia gwau-edeede karana dainai idia lalohisihisi tama sina be Iehova ese ia hebogahisi henidia. Iena Hereva, Baibel lalonai sisiba bona hagoadaia hereva namodia idia noho, idia lalohekwarahi tama sina ia durudia idia haheauka totona. Dirava ese idia ia hagoadaia edia lalohekwarahi ibounai be Iena imana dekenai do idia atoa, idia manau bona Satani Diabolo do idia dadaraia. Mani ita itaia, emu natuna ia gwau-edeede neganai, Baibel ena sisiba ese edena dala ai oi do ia durua oi gini goada noho totona.

Emu Lalohekwarahi Gaudia be Iehova Dekenai Oi Henia

Natudia be sibodia edia mauri do idia hadikaia eiava ma haida ese do idia kara dika henia dainai, tama sina idia lalohekwarahi, bona Iehova be edia lalohekwarahi ia diba. Aposetolo Petero ese unai hekwakwanai bona gau ma haida haheaukalaia dalana ia hahedinaraia. Ia gwau: “Ia ese umui ia naria noho. Unai dainai emui laloa hekwarahi gaudia ibounai be iena imana dekenai do umui atoa.” (1 Petero 5:⁠7) Dahaka dainai inai hereva ese idia gwau-edeede natudia edia tama sina ia hagoadaia?

Emu natuna ia maragi neganai, dika ia davaria lasi totona mai lalokau ida oi hakaua bona oi naria namonamo bona ia ese oi ia kamonai henia. To ia bada neganai, oi ia kamonai henia lasi, bona oi lalohekwarahi bada badina dika do ia davaria garina.

Emu natuna ia gwau-edeede dainai, ena hetura karana Iehova ida ia hadikaia, ena hemami ia dika, o tauanina dekenai dika ia davaria neganai, do oi laloa unai be oiemu kerere. Guna ita herevalaia taihuna, Joy be inai bamona ia mamia danu. Ia gwau: “Dina ta ta ai, lau lalohisihisi bada, bona guna lau karaia gaudia lau laloa lou badina lau ura lau diba dahaka kerere lau karaia.” Unai bamona negadia ai Iehova ia ura “oiemu lalohekwarahi be ia dekenai do oi henia.” Bema unai oi karaia, Ia ese oi do ia durua. Salamo torea tauna ia gwau: “Oiemu lalohekwarahi be [Iehova] dekenai do oi henia, bona ia ese idia dekena amo oi do ia durua. Ia ese kara maoromaoro taudia ia durua noho. Idia be do idia moru lasi, lasi momokani.” (Salamo 55:22) Joy be unai bamona heduru ia abia. Ia gwau: “Egu lalohekwarahi ibounai be Iehova dekenai lau gwauraia hedinarai, bona egu mamina ia namo.”

Oi be goevadae lasi dainai, emu natuna oi naria negadia lalonai reana kerere haida oi karaia. To, dahaka dainai oiemu kerere sibona oi laloa momo? Iehova be unai bamona ia karaia lasi, salamo torea tauna ia gwau: “Bema oi ese aiemai kara dika ibounai oi duahia neganai, daika ese oiemu kota lalonai ia kwalimu diba?” (Salamo 130:⁠3) Herevana kerere ta oi karaia lasi, to emu natuna ia gwau-edeede diba. Unai dainai, namona be guriguri amo emu hemami be Iehova dekenai oi gwauraia hedinarai, bona Ia ese oi do ia durua oi haheauka totona. To, bema oi ura Iehova ena hesiai gaukara lalonai oi gini goada, bona Satani ese oi do ia hamorua lasi totona, namona be gau ma haida oi karaia danu.

Oi Manau

Petero ia gwau: “Dirava ena imana goadana henunai do umui manau, vadaeni iena nega namona lalonai ia ese umui do ia abia isi.” (1 Petero 5:⁠6) Bema oiemu natuna ia gwau-edeede, dahaka dainai manau oi hahedinaraia be mai anina bada? Emu natuna ta ia gwau-edeede neganai, oi lalohisihisi diba bona reana oi hemarai danu. Bona, bema emu natuna be Keristani kongrigeisen amo idia atoa siri, do oi laloa ena kara ese emu ruma bese ena ladana ia hadikaia. Unai bamona lalohadai bona hemarai dainai do oi ura lasi Keristani hebou dekenai oi lao.

Unai hekwakwanai oi hanaia totona, oi aonega be namo. Aonega Herevadia 18:1 ia gwau: “Ia sibona ia noho, turana lasi tauna, ese sibona ena ura mo ia tahua noho. Ia ese taunimanima haida edia laloa namodia ia ura lasi.” Ena be oi lalohisihisi, to Keristani hebou oi lao henia hanaihanai neganai, oi do idia durua bada hagoadaia herevadia do oi kamonai. Joy ia gwau: “Matamanai lau ura lasi ta lau hereva henia. To, lau sibona dekenai lau gwau hebou lao henia karana be gau badana. Bema ruma dekenai lau noho, lau be egu hekwakwanai sibona do lau laloa momo. Hebou lau lao henia karana ese lau ia hagoadaia Iehova tura henia karana lau laloa bada totona. Lau moale badina hebou lao henia karana lau hadokoa lasi bona tadikaka bona taihu ese mai lalokau ida lau idia durua bada.”​​—⁠Heberu 10:​24, 25.

Namona be ita laloatao danu, ruma bese taudia ta ta be edia Keristani maduna “ena metau do idia huaia.” (Galatia 6:⁠5) Iehova ia ura tama sina ese edia natudia idia lalokau henia bona matahakani henia. Danu, Ia ura natudia ese edia tama sina do idia matauraia bona kamonai henia. Tama sina ese “Iehova ena matahakani bona lalona biagua karana” dekenai edia natudia idia naria neganai, Dirava vairanai ladana namona do idia abia. (Efeso 6:​1-4; NW ) Bema natu ta be tama sina edia matahakani dainai ia gwau-edeede, ia be sibona ena ladana ia hadikaia. Aonega Herevadia 20:11 ia gwau: “Mero maragina ese iena kara dekena amo, sibona ena mauri ia hedinaraia noho. Iena kara dekena amo do oi diba, unai mero ia goeva bona ia maoro, o lasi.” Ena be Satani ese Dirava ia gwauraia dika, to ita be hereva momokani ita diba dainai Iehova ena ladana ita abia isi.

Satani Do Umui Dadaraia

Petero ia gwau: “Do umui laloa maoromaoro, bona naria namonamo. Umui dekenai ia tuari henia tauna, Satani, be laiona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho.” (1 Petero 5:⁠8) Satani be laiona ta bamona, matamata bona diba bada lasi taudia ia tahua noho. Guna, Israela dekenai laiona be taunimanima ese idia naria animal idia hamasea. Bema, mamoe maragina be mamoe serina amo ia raka oho, laiona ese ia abia haraga diba. To mamoe hahine ese ena natuna ia hamauria totona, laiona ia heatu henia diba. To, mamoe ena goada be ia hegeregere lasi laiona ia koua totona. Unai dainai, mamoe naria taudia goadadia ese mamoe idia naria be namo.​​—⁠1 Samuela 17:​34, 35.

Iehova ese ena mamoe be “ia boiboi bada laiona” amo ia gimadia totona, “Mamoe Naria Tauna Badana” Iesu Keriso henunai, mamoe naria taudia ia abia hidi Iena mamoe oreana idia naria totona. (1 Petero 5:⁠4) Aposetolo Petero ese elda taudia ia hagoadaia: “Dirava ese umui ia henia mamoe orea do umui naridia namonamo. Do umui gunalaia, Dirava ena ura hegeregerena. Do umui maumau lasi, to mai emui ura namona inai dagi do umui karaia. Ta ese umui ia oda dainai do umui karaia lasi, to sibona emui ura dainai. Kohu do umui davaria totona do umui karaia lasi.” (1 Petero 5:​1, 2) Tama sina e, elda taudia ida umui gaukara hebou neganai, matamata tauna idia durua diba Iehova ena dala ia badinaia lou totona.

Bema Keristani elda taudia ese emu gwau-edeede natuna idia ura sisiba henia neganai, reana do oi ura lasi unai bamona idia karaia. To, unai bamona kara ese dika bada ia havaraia diba. Petero ia gwau lasi elda taudia umui koua, to ia gwau: “[Satani] do umui koua.”​​—⁠1 Petero 5:⁠9.

Sisiba Aukana Ia Abia Neganai

Bema emu natuna be ia helalo-kerehai lasi bona ia be ia bapatiso vadaeni, reana sisiba aukana do ia abia bona Keristani kongrigeisen amo do idia atoa siri diba. Iena lagani bona noho dalana hegeregerena, ia danu do umui herevahereva eiava lasi.

Bema natuna be maragi bona ruma dekenai ia noho, tauanina dalanai do umui naria noho. Danu, tama sina be mai edia maduna kara maoromaoro dalana be natuna dekenai idia hadibaia totona. (Aonega Herevadia 1:​8-​18; 6:​20-​22; 29:17) Reana ia danu Baibel stadi oi karaia. Baibel siridia bona “hesiai tauna mai ena kamonai, bona mai ena kara maoromaoro” oreana ese idia karaia bukadia oi gaukaralaia ia oi durua totona. (Mataio 24:45) Kongrigeisen heboudia dekenai oi hakaua lao diba bona oi danu ia helai. Unai bamona do oi karaia badina oi ura Baibel ena sisiba do ia badinaia lou.

To bema kongrigeisen amo idia atoa siri natuna ena mauri lagani be bada bona oi danu ia noho lasi, ia oi kara henia dalana be idau. Aposetolo Paulo ese guna idia noho Korinto Keristani taudia ia sisiba henia: “Iseda Keristani varavara tauna ta, bema ia be heudahanai tauna, o mataganigani tauna, o kaivakuku tomadiho henia tauna, o hereva dika tauna, o kekero tauna, o henaoa tauna, umui be ia danu do umui turana karaia lasi. Bona ia danu do umui aniani hebou lasi.” (1 Korinto 5:​11) Ena be famili lalonai idia vara gaudia haida dainai ia ita hereva henia diba, to ia danu do ita hebamo be maoro lasi.

Keristani elda taudia be Baibel ena hereva hegeregerena emu gwau-edeede natuna idia sisiba henia neganai, namo lasi unai sisiba oi dadaraia eiava oi laloa bada lasi. Bema oi laloa emu natuna ia kerere lasi, vadaeni oi be Satani amo emu natuna oi gimaia lasi. Bona, oi be sibona emu hetura karana Iehova ida oi hadikaia diba. To, elda taudia edia heduru oi abia dae neganai, “abidadama dekenai do umui gini goada” noho bona emu natuna be heduru namona ia abia diba.​​—⁠1 Petero 5:⁠9.

Iehova ese Oi Do Ia Hagoadaia

Bema emu natuna ia gwau-edeede, laloatao unai be oi sibona dekenai ia vara lasi. Keristani tama sina haida dekenai unai bamona ia vara danu. Herevana dahaka hahetoho ita davaria, Iehova ese ita do ia hagoadaia.​​—⁠Salamo 68:⁠19.

Emu guriguri karana amo Iehova dekenai oi tabekau. Nega ibounai Keristani kongrigeisen oi bamoa. Elda taudia edia matahakani karana oi abia dae. Bema unai bamona oi karaia, do oi gini goada noho. Oiemu gini goada karana ese oiemu natuna do ia durua bona Iehova dekenai do ia giroa lou.​​—⁠Malaki 3:​6, 7.

[Footnote]

[Pictures on page 4]

Keristani kongrigeisen bona guriguri karana amo goada oi abia