“Naria Noho” Lalohadaina Oi Hahedinaraia, A?

“Umui be edena bamona do umui noho? Umui emui kara ibounai do idia helaga be namo, bona Dirava do umui badinaia namonamo. Ma Dirava ena Dina do umui naria noho, [“bona laloa noho,” “NW”] bona do ia ginidae haraga totona do umui gaukara goada noho.”​—⁠2 PETERO 3:​11, 12.

1, 2. Iehova ena dina ita “naria noho” karana be reana edena bamona ita haheitalaia diba?

MANI inai oi laloa, ruma bese ta be vadivadi taudia haida idia naria, idia ida adorahi aniani do idia ania hebou totona. Kahirakahira do idia ginidae. Sinana be aniani hegaegaelaia gaukara oredia ia karaia noho. Tamana bona natudia idia itaia bema gau ibounai idia noho vadaeni. Idia ibounai be idia moale. Oibe, ruma bese taudia ibounai be mai edia ura bada ida vadivadi taudia idia naria noho, bona idia ura idia ida aniani mai digarana bona hebamo namona idia moalelaia.

² Ita be Keristani taudia dainai, mai anina bada gauna ta ita naria noho. Dahaka ita naria? Ita ibounai be “Dirava ena dina” ita naria noho! Ela bona unai dina ia ginidae, namona be ita be peroveta tauna Mika bamona, ia gwau: “Lau ese Lohiabada do lau naria noho. Ia ese lauegu guriguri do ia kamonai, bona lau abidadama henia, ia ese lau do ia hamauria.” (Mika 7:⁠7) Anina be do ita gaukara lasi, a? Lasi. Gaukara bada herea ia noho.

 3. Petero Iharuana 3:​11, 12 ena hereva hegeregerena, Keristani taudia ese dahaka lalohadai idia abia be namo?

³ Aposetolo Petero ese ita ia durua, ita naria noho lalonai lalohadai maorona ita abia. Ia gwau: “Umui be edena bamona do umui noho? Umui emui kara ibounai do idia helaga be namo, bona Dirava do umui badinaia namonamo. Ma Dirava ena Dina do umui naria noho, [“bona laloa noho,” NW ] bona do ia ginidae haraga totona do umui gaukara goada noho.” (2 Petero 3:​11, 12) Unai hereva amo Petero ese daradara herevana ta ia gwauraia lasi. Iena revareva helagadia rua lalonai, ia hahedinaraia Keristani taudia be edena bamona idia noho be namo. Idia ia hagoadaia danu ‘edia kara ibounai do idia helaga be namo, bona Dirava do idia badinaia namonamo.’ Ena be lagani 30 bamona idia ore vadaeni, Iesu Keriso ese “tanobada ena dokona” ena toa idauidau ia gwauraia neganai, to Keristani taudia idia noga noho be namo. (Mataio 24:⁠3) Iehova ena dina do ‘idia naria’ bona laloa noho.

 4. ‘Dirava ena dina do ita naria noho’ ena anina be dahaka?

⁴ Namona be idia ese “Dirava ena dina do idia naria noho, bona do ia ginidae haraga totona do idia gaukara goada noho.” Momokani, ita ese Iehova ena dina do ita haharagaia diba lasi. Unai dainai, Iesu Keriso be ena Tamana ena inai taudia do ia hahemaoro henia totona ia mai neganai, unai ‘dina bona hora ita diba lasi.’ (Mataio 24:36; 25:13) Buka ta ia gwau unai hereva “haharagaia” ena anina be “ ‘karaia haragaharaga’ bona ia ida idia gaukaralaia hebou hereva haida be ‘goadalaia, gaukara, gau ta laloa bada karana.’ ” Unai dainai Petero ese ena abidadama tamona taudia ia hagoadaia, namona be idia ura dikadika Iehova ena dina do ia mai. Unai idia karaia dalana be hanaihanai unai dina idia laloa noho. (2 Petero 3:​12) Iehova ena dina badana mai garina be ia mai kahirakahira momokani dainai, ita danu be unai bamona lalohadai ita abia be namo.​—⁠Ioela 2:31.

Ita Naria Noho Lalonai ‘Iseda Kara Ia Helaga be Namo’

 5. Edena bamona ita hahedinaraia diba ita ura dikadika “Dirava ena dina” ita itaia?

⁵ Bema ita ura dikadika Iehova ena dina amo ita roho mauri, ‘ita helaga bona Dirava ita badinaia namonamo’ karana amo unai do ita hahedinaraia. Unai hereva “kara ibounai do idia helaga” dainai Petero ena sisiba herevana ita laloatao, ia gwau: “Dirava do umui kamonai henia. Guna, umui be do diari umui diba lasi neganai, emui tauanina ena ura dikadia ese umui idia biagua. Unai bamona do umui karaia lou lasi. To emui kara ibounai lalonai do umui helaga, umui ia boiria Diravana ese ia helaga hegeregerena. Badina be Buka Helaga lalonai Dirava sibona ia gwau, ‘Do umui helaga, badina lau be lau helaga noho.’ ”​—⁠1 Petero 1:​14-16.

 6. Ita helaga totona, gau badana be dahaka ita karaia?

⁶ Ita helaga totona, gau badana be tauanina dalanai, lauma dalanai, iseda laloa dalanai, bona kara maoromaoro badinaia dalanai ita goeva. Iehova ena ladana idia abia taudia ta ta bamona ita hahedinaraia ita be “Dirava ena dina” totona ita hegaegae noho, a? Hari inai negai, unai bamona goeva karana ita dogoatao be auka, badina tanobada ena kara be ia dika ia lao noho. (1 Korinto 7:31; 2 Timoteo 3:13) Iseda kara bona tanobada taudia edia kara be idia idau, a? Bema lasi, unai ita laloa bada be namo. Eiava ita sibona ita badinaia taravatudia, ena be tanobada taudia edia ia hereaia, be ia dika ia lao noho, a? Bema oibe, kara haida ita karaia be namo unai ita hamaoromaoroa totona, unai amo Dirava ita hamoalea diba.

7, 8. (a) ‘Iseda kara ia helaga’ be gau badana, be edena bamona ita laloaboio diba? (b) Unai ita hamaoromaoroa totona, dahaka ita karaia be gau badana?

⁷ Hari, matabodaga sivarai bona laulau be Internet dekenai idia halasia bona ta be hehuni ai unai gaudia ia itaia diba dainai, guna unai bamona matabodaga gaudia idia itaia lasi taudia be, medikol doketa ta ia hereva bamona, “karaharaga matabodaga karadia idia karaia diba daladia momo idia davaria.” Bema Internet dekenai unai bamona miro gaudia ita tahua, ita be momokani Baibel ena hahegani, “miro gauna ta do umui dogoatao lasi” ita dadaraia. (Isaia 52:11) Ita gwau diba ita be ‘Dirava ena dina ita naria noho’ bona laloa noho, a? Eiava reana ita laloa unai dina be do ia mai haraga lasi dainai, bema iseda lalona be matabodaga gaudia amo ita hamiroa, nega ia noho ita sibona ita hagoevaia totona, a? Bema unai bamona hekwakwanai ita davaria vadaeni, namona be karaharaga guriguri amo Iehova ita noia, ‘ita ia durua anina lasi gaudia ita itaia lasi, to iena dala dekenai iseda mauri do ia hamatamataia’!​—⁠Salamo 119:⁠37.

⁸ Iehova ena Witnes taudia momo herea, matamata bona buruka taudia, be Dirava ena kara maoromaoro taravatudia idia badinaia noho bona inai tanobada ena matabodaga karadia idia dadaraia. Idia diba ita be nega dokona lalonai ita noho bona “Lohiabada ena Dina be do ia ginidae, henaoa tauna ia ginidae bamona,” unai dainai ‘helaga karadia’ idia karaia noho. (2 Petero 3:10) Edia kara ese ia hamomokania idia be ‘Dirava ena dina idia naria noho’ bona idia laloa noho.a

Ita Naria Noho Lalonai “Dirava Badinaia” Karadia Ita Hahedinaraia

 9. Namona be Dirava badinaia karana ese iseda lalona ia veria dahaka ita karaia totona?

⁹ Iehova ena dina ita laloa noho totona, gau badana be “Dirava badinaia” karadia ita hahedinaraia noho. “Dirava badinaia” karana amo ita hahedinaraia Dirava ita matauraia, unai ese iseda lalona ia veria Iehova hamoalea karadia ita karaia totona. Iehova ita tura henia dainai ia badinaia karadia ita hahedinaraia. Ia ura “taunimanima ibounai ese mauri do idia davaria, bona hereva momokani do idia diba.” (1 Timoteo 2:⁠4) Dirava “ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.” (2 Petero 3:⁠9) Unai dainai, iseda Dirava badinaia karana ese ita ia hagoadaia iseda gaukara ita habadaia, taunimanima be Iehova idia dibaia bona idia tohotohoa totona ita durua be namo, ani?​—⁠Efeso 5:⁠1.

10. Dahaka dainai “kohu ura henia” karana dekenai ita naria namonamo be namo?

¹⁰ Bema Dirava ena Basileia ita tahua guna, iseda mauri lalonai Dirava badinaia karadia do ita hahedinaraia badabada. (Mataio 6:33) Unai ena anina be kohu bona moni dekenai lalohadai maorona ita abia. Iesu ia sisiba, ia gwau: “Do umui naria namonamo, kohu dekenai do umui ura henia dikadika garina. Badina taunimanima edia mauri badina be kohu momo dekena amo lasi, lasi momokani.” (Luka 12:15) Ena be moni ura henia karana ese iseda matana ia hakepulua karana ita laloa be auka, to namona be ita diba “tanobada ena laloa metau idauidau bona kohu ura henia dikadika ese Dirava ena hereva idia koua” diba. (Mataio 13:22) Mauri durua gaudia abia totona be mai ena hekwarahi. Tanobada ena gabu haida dekenai, momo idia laloa mauri namona idia abia totona, reana lagani haida lalonai edia ruma bese idia rakatania bona taga bada tanona ta dekenai idia lao be namo. Dirava ena taunimanima haida danu be unai bamona lalohadai idia abia. Idia laloa tano ma ta dekenai idia lao neganai, edia ruma bese totona kohu matamatadia idia hoia diba. To, edia lalokau ruma bese taudia edia lauma dalana dekenai dahaka ia vara diba? Ruma bese ena kwarana ia noho lasi dainai, Iehova ena dina amo do idia roho mauri totona lauma dalanai do idia goada noho, a?

11. Tano idauna dekenai nega sisina ia gaukara tauna ese edena bamona ia hahedinaraia, Dirava badinaia karana be mai anina bada, to kohu be anina bada gauna lasi?

¹¹ Tano idauna dekenai nega sisina ia gaukara Filipino tauna, be Japan dekenai Iehova ena Witnes taudia amo hereva momokani ia dibaia. Bona Baibel amo ruma bese kwarana ena maduna idauidau ia dibaia neganai, ia lalo-parara ena ruma bese taudia ia durua be namo Iehova tomadiho henia taudia ai idia lao totona. (1 Korinto 11:⁠3) Philippines dekenai ena adavana ese ena abidadama matamatana ia abia dae lasi, ia ura ena tau be Japan dekenai ia noho bona idia dekenai moni ia siaia, to ia ura lasi ia giroa lou bona idia dekenai Baibel ena hahediba herevadia ia hadibaia. To unai tauna ia diba nega dokona ai ita noho bona ena lalokau taudia ia laloa bada dainai, ena tano dekenai ia giroa lou. Mai haheauka bona lalokau ida ena ruma bese taudia ia kara henia dainai, davana namona ia abia. Gabeai, iena ruma bese taudia be tomadiho momokani lalonai ia ida idia lalo-tamona, bona ena adavana be ful-taim hesiai gaukarana lalonai ia vareai.

12. Dahaka dainai mauri lalonai lauma gaudia ita atoa guna be namo?

¹² Iseda noho dalana be lahi ese ia araia noho rumana lalonai idia noho taudia ida ita hahegeregerea diba. Unai ruma be lahi ese ia gabua bona kahirakahira do ia moru, emu kohu abia totona ia lalonai oi heau loaloa be aonega karana, a? Mai anina bada gauna be ita sibona, iseda ruma bese taudia, bona unai ruma ai idia noho taudia ma haida ita hamauridia be namo, ani? Oibe, inai tanobada dikana be kahirakahira do ia moru, bona taunimanima momo be edia mauri do idia haboioa. Unai ita diba dainai, namona be lauma gaudia ita atoa guna bona taunimanima ia hamauria Basileia sivaraina harorolaia gaukarana ita goadalaia.​—⁠1 Timoteo 4:⁠16.

Mai ‘Goeva’ Danu Ita Noho be Gau Badana

13. Iehova ena dina badana ia ginidae neganai, iseda noho be edena bamona be namo?

¹³ Petero be naria noho lalohadaina ita dogoatao be gau badana ia herevalaia, ia gwau: “Lauegu lalokau taudia e, inai gaudia umui naria noho dainai, do umui noho namonamo. Mai goevagoeva bona kerere lasi danu Dirava ena vairanai do umui noho. Bona Dirava danu mai maino danu do umui noho.” (2 Petero 3:14) Petero ese iseda kara do idia helaga bona Dirava ita badinaia ena sisiba sibona ia henia lasi. To, ia hahedinaraia Iesu ena dava bada rarana ese ita ia hagoevaia dainai Iehova vairanai mai goeva danu ita noho be gau badana. (Apokalupo 7:​9, 14) Unai ena anina be ta ese Iesu ena boubou gauna ia abidadama henia bona sibona ena mauri ia gwauhamatalaia bona Iehova ena bapatiso hesiai tauna ta ai ia lao.

14. Ita “goeva” noho ena anina be dahaka?

¹⁴ Petero ese ita ia hagoadaia, ita gaukara goada be namo ita ‘goeva’ noho totona. Iseda Keristani kara be ia goeva noho bona inai tanobada ena kara ese ia hamiroa lasi, a? Iseda dabua dekenai miro ta ita itaia neganai, ita ura maoromaoro unai miro ita kokia. Bema iseda dabua namona ta ita hamiroa, ita ura ita hagoevaia namonamo. Kara kererena ta ita karaia bona iseda Keristani kara ita hadikaia neganai, ita gaukara goadagoada ita hanamoa totona, a?

15. (a) Dahaka dainai Israela taudia be edia dabua edia kona dekenai varo idia turia? (b) Dahaka dainai Iehova ena hesiai taudia hari inai negai be tanobada amo idia idau?

¹⁵ Israela taudia be ‘edia dabua edia kona dekenai varo do idia turia namonamo, herahera edia toana bamona. Bona inai herahera gaudia ta ta edia latanai varo ta, ena kala bulu do idia kwatua.’ Dahaka dainai? Unai amo Iehova ena taravatu idia laloatao, badinaia, bona edia ‘Dirava dekenai do idia helaga’ noho. (Numera 15:​38-40) Hari inai negai ita be Iehova ena hesiai taudia dainai, tanobada amo ita idau badina ita ese Dirava ena taravatu bona hakaua herevadia ita badinaia. Hegeregere, kara goeva ita badinaia, rara ena helaga ita matauraia, bona kaivakuku tomadiho henia karadia idauidau ita dadaraia. (Kara 15:​28, 29) Iseda lalona ita hadaia ita sibona do ita hamiroa lasi dainai taunimanima momo ese ita idia matauraia.​—⁠Iamesi 1:⁠27.

Mai “Kerere Lasi” Danu Ita Noho be Gau Badana

16. Mai “kerere lasi” danu ita noho ena anina be dahaka?

¹⁶ Petero ia gwau danu ita “kerere lasi” be namo. Edena bamona unai do ia vara? Miro ta ita hagoevaia haraga diba, to kerere ta ita hagoevaia diba lasi. Kerere anina be gau ta be ia maoro lasi. Aposetolo Paulo ese ena abidadama tamona taudia Filipi dekenai ia hagoadaia, ia gwau: “Gau ibounai umui karaia neganai, do umui maumau lasi o hepapahuahu lasi. Unai dekena amo umui be kerere ta lasi, bona emui lalona dekenai dika ta do ia noho lasi, Dirava ena natuna taudia edia kara bamona. Bona umui be inai tanobada taudia mai edia dika bona mai edia kerere bada danu edia huanai umui noho. Umui ese idia edia huanai diari bamona do umui hedinarai, hisiu ese tanobada idia hadiaria bamona.” (Filipi 2:​14, 15) Bema unai sisiba ita badinaia, do ita maumau bona hepapahuahu lasi bona ura namona dainai Dirava do ita hesiai henia. Iehova bona iseda dekena taudia lalokau henia karana ese ita ia veria “Basileia ena Sivarai Namona” ita harorolaia totona. (Mataio 22:​35-40; 24:14) Ma danu, sivarai namona do ita harorolaia noho, ena be taunimanima idia lalo-parara lasi dahaka dainai iseda nega bona goada ita henia ma haida ita durua Dirava bona ena Hereva, Baibel, amo diba idia abia totona.

17. Dahaka badina namona dainai, Keristani kongregesen lalonai ita ura maduna ita abia?

¹⁷ Ita ura ita “kerere lasi” dainai, ita karaia gaudia ibounai dekenai iseda ura korikori ita tahua be namo. Tanobada taudia be sibodia edia ura gaudia abia totona gau idauidau idia karaia, hegeregere kohu bada eiava siahu abia totona, to unai gaudia ita rakatania vadaeni. Bema ita ura Keristani kongregesen lalonai hesiai gaukara ena maduna haida ita abia, ura namona dainai ita karaia be namo bona hanaihanai Iehova bona ma haida lalokau henia karana ese ita ia hagoadaia unai gaukara ita abia totona. Lauma gaudia idia laloa bada tatau be mai moale bona manau ida Iehova bona edia tadikaka idia hesiai henia totona, ‘ekalesia gunalaia tauna ena dagi idia tahua,’ unai ita itaia be moale gauna. (1 Timoteo 3:1; 2 Korinto 1:24) Momokani, idia hegeregere elda gaukara idia abia taudia dekenai, ‘Dirava ese mamoe orea ia henia do idia naridia namonamo, mai edia ura namona ida. Kohu davaria totona idia karaia lasi. Lohia mai hekokoroku bamona edia orea do idia gunalaia lasi, to edia kara namodia do idia hedinaraia, vadaeni edia kara bamona do idia karaia.’​—⁠1 Petero 5:​1-4.

“Maino” ai Ita Noho be Gau Badana

18. Taunimanima momo be Iehova ena Witnes taudia idia diba badina edena kara idia hahedinaraia dainai?

¹⁸ Dokonai, Petero ese ita ia hamaoroa “maino” ai do ita noho. Unai hahegani ita badinaia totona, gau badana be Iehova bona iseda dekena tauna ida maino ai ita noho. Petero ia hahedinaraia gau badana be ‘ta ta do ita lalokau henia, mai eda lalona ibounai ida’ bona iseda tadikaka ida maino ai ita noho. (1 Petero 2:17; 3:​10, 11; 4:8; 2 Petero 1:​5-7) Maino ai ita noho totona, ta ta ita lalokau henia be namo. (Ioane 13:​34, 35; Efeso 4:​1, 2) Intenesenel hebouhebou ita abia negadiai unai lalokau bona maino idia hedinarai goevagoeva. Lagani 1999 ai, Costa Rica ai hebouhebou ta idia abia, peleini abia gabuna dekenai kohu hoihoilaia tauna ta be ia badu, badina unai gabu ai idia noho Witnes taudia ese hebouhebou totona idia mai taudia idia welkam henidia bona ena bisinesi gabuna idia koua. To dina iharuana ai, ia itaia ena be unai gabu dekenai idia noho Witnes taudia be hebou totona idia mai taudia idia diba lasi, to edia welkam heheni karana huanai lalokau bona maino ia noho. Dina ginigabena ai, unai tauna be edia welkam karana lalonai ia vareai bona ia noidia bema Baibel stadi ia abia diba.

19. Dahaka dainai iseda tadikaka ida maino ena dala ita badinaia be mai anina bada?

¹⁹ Iseda tadikaka bona taihu ida maino ena dala ita badinaia lasi neganai, unai ese do ia hahedinaraia ita be mai eda momokani ida Iehova ena dina bona ia gwauhamatalaia tanobada matamatana ita naria noho lasi. (Salamo 37:11; 2 Petero 3:13) Bema iseda tadikaka ta ida maino ai ita noho be ia auka, mani inai oi laloa, umui ruaosi be Paradaiso ai mai maino ida do umui noho hebou diba, a? Bema tadikaka ta be ita dekenai ia badu, namona be ‘ia ida maino ita karaia’ haraga. (Mataio 5:​23, 24) Unai bamona ita karaia be mai anina bada, bema ita ura Iehova ida maino ai ita noho.​—⁠Salamo 34:14; 1 Ioane 4:⁠20.

20. Edena dala idauidau ai “naria noho” lalohadaina ita hahedinaraia be namo?

²⁰ Ita be ‘Dirava ena dina ita naria noho’ bona laloa noho, a? Inai matabodaga tanobadana lalonai ita helaga noho karana amo, ita hahedinaraia diba ita ura dikadika kara dika ia ore. Ma danu, Dirava badinaia karana amo do ita hahedinaraia ita ura momokani Iehova ena dina ia mai bona Basileia ena lohia henunai ita noho. Hari, iseda tadikaka ida maino ai ita noho daladia ita badinaia ese ia hahedinaraia, ita ura tanobada matamatana lalonai mai maino danu ita noho. Unai dala amo, naria noho lalohadaina ita hahedinaraia bona ita hahedinaraia danu ita be ‘Dirava ena dina ita naria noho’ bona laloa noho.

[Footnote]

Oi Laloatao, A?

• Iehova ena dina ita “laloa noho,” ena anina be dahaka?

• Ita “naria noho” lalonai, namona be iseda kara be edena bamona?

• Dahaka dainai “Dirava badinaia” karana ita hahedinaraia be gau badana?

• Iehova vairanai ‘mai goeva, mai kerere lasi bona maino danu ita noho’ totona, dahaka ita karaia be namo?

[Picture on page 9]

Helaga kara ita karaia karana amo “naria noho” lalohadaina ita hahedinaraia

[Pictures on page 10]

Basileia harorolaia gaukarana amo taunimanima ita hamauria diba

[Picture on page 12]

Iehova ena dina ita naria noho lalonai, namona be ma haida ida maino daladia ita badinaia