Karoa 13

Hutuma Bada Herea Iehova Ena Terona Vairanai

 1. (a) Dirava ena idaunegai hesiai taudia bona 144,000 taudia dekenai dahaka do ia vara guna, bena edia ahuna do idia abia? (b) Inai negai idia noho ‘hutuma bada herea’ taudia dekenai dahaka do ia vara lasi?

DIRAVA ena kamonai hesiai taudia, Abela amo ia lao Ioane Bapatiso, ese edia mauri lalonai Dirava ena ura idia tahua guna. To, idia ibounai idia mase vadaeni, Dirava ena tanobada matamatana lalonai do idia toreisi lou. Keriso ida Dirava ena guba Basileiana lalonai do idia lohia 144,000 taudia danu be do idia mase guna, bena gabeai edia ahuna do idia abia. To, Apokalupo 7:9 ia hahedinaraia, nega dokona lalonai bese idauidau amo ‘hutuma bada herea’ taudia do idia hedinarai bona do idia mase lasi to tanobada dekenai mauri hanaihanai do idia abia. Oi be idia huanai oi noho, a?

Hutuma Bada Herea Taudia Ita Dibaia Dalana

 2. Dahaka idia lalo-pararalaia guna bena idia diba goevagoeva Apokalupo 7:9 ese ‘hutuma bada herea’ taudia ia gwauraia?

² Lagani 1923 ai, Iehova ena hesiai taudia idia lalo-parara Iesu ese Mataio 25:​31-46 ai ia herevalaia “mamoe” parabolena bona Ioane 10:16 lalonai ia herevalaia “mamoe idaudia” be tanobada dekenai mauri hanaihanai do idia abia taudia. Lagani 1931 ai idia lalo-parara edia baguna dekenai maka idia abia taudia, Esekiela 9:​1-11 ese ia sivaralaia taudia unai, be tanobada dekenai mauri do idia abia danu. Bena lagani 1935 ai idia lalo-parara unai hutuma bada herea be Iesu ese ia herevalaia mamoe idaudia taudia edia orea ena kahana. Hari, unai hutuma bada herea taudia edia namba be milioni momo.

 3. Dahaka dainai inai hereva, ‘helai gabuna badana ena vairanai idia gini,’ ese guba lao taudia ia herevalaia lasi?

³ Apokalupo 7:9 ai, hutuma bada herea taudia be guba dekenai idia gini lasi. Dirava ena ‘helai gabuna badana ena vairanai idia gini,’ to guba dekenai idia noho lasi. Ena anina be Dirava ese idia ia itaia diba. (Salamo 11:⁠4) Hutuma bada herea taudia, idia “duahia diba lasi,” be guba oreana ta lasi, badina Baibel ese guba dekenai idia lao taudia edia namba ia gwauraia, hegeregere Apokalupo 7:​4-8 bona Apokalupo 14:​1-4 ese ia gwauraia bamona. Unai siri idia hahedinaraia guba dekenai do idia lao taudia edia namba be 144,000, Dirava ese tanobada amo ia abidia hidi.

 4. (a) Hutuma bada herea taudia be dahaka “hisihisi bada herea” amo do idia roho mauri? (b) Apokalupo 7:​11, 12 ena hereva hegeregerena, daidia be hutuma bada herea taudia idia raraia bona idia ida idia tomadiho hebou?

⁴ Apokalupo 7:14 (NW ) ese hutuma bada herea ia herevalaia, ia gwau: “Inai be hisihisi badana lalona amo idia mai taudia.” Taunimanima edia histori lalonai, dika ibounai ia hereaia hisihisina amo idia roho mauri. (Mataio 24:21) Idia roho mauri dainai Dirava bona Keriso idia tanikiu henia neganai, kamonai taudia ibounai guba dekenai be idia ida do idia gwau: “Momokani! Iseda Dirava ita hanamoa bada, bona iena hairaina ita gwauraia hedinarai badabada be namo! Iena aonega bona iena laloa ibounai be namo herea dainai ita tanikiu henia, bona iena ladana ita hanamoa bada! Iena siahu bona goada be bada herea! Oibe, siahu ibounai be ia sibona ena, ela bona hanaihanai! Amen.”​​—⁠Apokalupo 7:​11, 12.

Idia Hahedinaraia Idia be Hegeregere

 5. Hutuma bada herea taudia edia kara toana be edena bamona ita dibaia diba?

⁵ Iehova ese ena kara maoromaoro taravatudia ia badinaia dainai, hisihisi badana amo hutuma bada herea taudia do ia hamauria. Do idia roho mauri taudia edia kara toana be Baibel ese ia herevalaia goevagoeva. Unai dainai, dala ia noho kara maoromaoro idia ura henia taudia be hari edia kara amo do idia hahedinaraia, idia hegeregere idia roho mauri totona. Dahaka idia karaia be namo?

 6. Dahaka dainai hutuma bada herea taudia be mamoe ida ita hahegeregerea diba?

⁶ Mamoe be lalo-manau bona kamonai haraga animal. Unai dainai, Iesu ese ena mamoe idaudia, guba dekenai do idia lao lasi taudia unai, ia gwauraidia neganai, ia gwau idia ura tanobada dekenai mauri hanaihanai idia abia sibona lasi, to ena hadibaia herevadia do idia kamonai bona badinaia danu. Ia gwau: “Egu mamoe ese lauegu gadona idia kamonai, lau diba vadaeni idia, bona idia ese lauegu murina dekenai idia raka.” (Ioane 10:​16, 27) Unai taudia ese Iesu ena hereva idia kamonai henia namonamo bona idia badinaia, bena ena hahediba taudia ai idia lao.

 7. Iesu murinai idia raka taudia ese edena kara idauidau idia habadaia be namo?

⁷ Iesu murinai idia raka taudia ta ta ese edena bamona kara do idia hahedinaraia be namo? Dirava ena Hereva ia gwau: “Emui mauri gunana be dabua gunana bamona do umui kokia. . . . Mauri matamata do umui atoa, dabua matamata umui atoa bamona. Inai mauri matamata dainai, emui toana be Dirava ena toana bamona, ia ese ia karaia gauna. Inai mauri matamata ena kara be maoromaoro, helaga bona momokani.” (Efeso 4:​22-24) Idia ese Dirava ena hesiai taudia edia lalo-tamona ia havaraia karadia, hegeregere “lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana” idia habadaia.​—⁠Galatia 5:​22, 23.

 8. Hutuma bada herea taudia ese orena taudia idia durua lalonai dahaka do idia davaria?

⁸ Hutuma bada herea taudia ese guba helarona idia abia taudia edia orea maragina, haroro gaukara idia hakaua taudia unai, idia durua. (Mataio 24:14; 25:40) Mamoe idaudia taudia ese unai heduru idia henia, ena be idia diba inai nega dokona ena matamana ai, Keriso Iesu bona ena aneru ese guba amo Satani bona ena demoni idia negea diho. Unai dainai idia gwau “tanobada . . . madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.” (Apokalupo 12:​7-12) Unai dainai, inai tanobada ena dokona ia mai kahirakahira lalonai, Satani ese Dirava ena hesiai taudia dagedage henidia karana ia habadaia.

 9. Dirava ena hesiai taudia be edena dala ai sivarai namona harorolaia gaukarana dekenai idia kwalimu, bona dahaka dainai?

⁹ Ena be dagedage ia bada ia lao, to haroro gaukara idia habadaia noho. Tanobada Tuarina Ginigunana dokonai, Basileia harorolaia taudia be tausen haida sibona, to hari idia be milioni momo, badina Iehova ia gwauhamata: “Tuari gauna ta ese oi do ia hadikaia diba lasi.” (Isaia 54:17) Iuda taudia edia kota badana tauna ta danu ia lalo-parara Dirava ena gaukara idia koua diba lasi. Aposetolo edia negai, ia ese Farisea taudia dekenai hahediba taudia ia herevalaidia, ia gwau: “Inai taudia umui dogoatao lasi, umui rakatanidia. Badina be bema inai hereva bona inai kara be taunimanima dekena amo ia mai, dohore anina ia vara lasi. To, bema ia be Dirava dekena amo ia mai, umui be hegeregere lasi edia dala umui koua, Dirava danu umui tuari henia garina.”​—⁠Kara 5:​38, 39.

10. (a) Hutuma bada herea taudia edia baguna ai ia noho maka ena anina be dahaka? (b) Edena bamona Dirava ena hesiai taudia ese “gado ta guba dekena amo” ia mai idia kamonai henia?

¹⁰ Hutuma bada herea taudia be edia baguna dekenai maka idia abia vadaeni, idia roho mauri totona. (Esekiela 9:​4-6) Unai “maka” ena anina be Iehova dekenai edia mauri idia gwauhamatalaia, Iesu ena hahediba taudia bamona idia bapatiso vadaeni, bona idia hekwarahi Keriso ena kara idia hahedinaraia noho totona. Idia ese “gado ta guba dekena amo” ia mai idia kamonai henia, unai gado ese Satani ena tanobada ibounai tomadiho koikoi oreana ia herevalaia, ia gwau: “Lauegu orea taudia e, ia dekena amo do umui raka siri, ia danu do umui kara dika hebou garina, bona ia danu panisi do umui abia hebou garina!”​—⁠Apokalupo 18:​1-5.

11.  Hutuma bada herea taudia ese dahaka idia karaia, unai amo idia hahedinaraia idia be Iehova ena hesiai taudia?

¹¹ Danu, Iesu ese ia murinai idia raka taudia ia hamaoroa: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:35) To, inai tanobada ena tomadiho oreadia ese tuari lalonai edia tomadiho taudia ma haida idia hamasea, unai bamona idia karaia badina idia be bese idaudia dainai! Dirava ena Hereva ia gwau: “Dirava ena natuna taudia be idau, bona Satani ena natuna taudia be ma idau. Edia idau be inai: Kara maoromaoro ia karaia noho lasi tauna be Dirava ena natuna lasi, bona iena tadikakana ia lalokau henia lasi tauna be Dirava ena natuna lasi. . . . Ibounai ta ta dekenai do ita lalokau henia. Kaino ena kara bamona do ita karaia lasi, ia be Satani ena tau, bona ia ese iena tadina Abela ia alaia mase.”​—⁠1 Ioane 3:​10-12.

12. Hisihisi badana ai, Iehova ese dahaka do ia karaia huahua dikana idia havaraia tomadiho “au” dikadia dekenai?

¹² Iesu ia gwau: “Au namona ena huahua be ia namo, to au dikana ena huahua be ia dika. Au namona ese huahua dika ia havaraia diba lasi, bona au dikana ese huahua namo ia havaraia diba lasi. Au ibounai huahua namona idia havaraia lasi gaudia be do idia utua, lahi dekenai do idia negea. Unai dainai peroveta koikoi taudia edia kara dekena amo idia do umui diba.” (Mataio 7:​17-20) Inai tanobada ena tomadiho ese idia havaraia huahua ese ia hahedinaraia idia be “au” dikadia, bona kahirakahira Iehova ese hisihisi badana lalonai idia do ia hadikaia ore.​—⁠Apokalupo 17:⁠16.

13. Edena dala ai hutuma bada herea taudia idia hahedinaraia, idia be mai edia lalo-tamona ida Iehova ena “helai gabuna badana ena vairanai” idia gini?

¹³ Apokalupo 7:​9-15 ese hutuma bada herea taudia idia roho mauri ena badina idauidau ia hahedinaraia. Ia hahedinaraia idia be mai lalo-tamona ida Iehova ena “helai gabuna badana ena vairanai” idia gini, ena lohia siahuna idia abia isi. “Idia ese edia dabua idia huria vadaeni Mamoe ena Natuna ena rarana lalonai, vadaeni edia dabua be kurokuro,” unai amo idia hahedinaraia Iesu Keriso ena boubou, kara dika ia kokia boubouna unai, idia abia dae. (Ioane 1:29) Idia ese Dirava dekenai edia mauri idia gwauhamatalaia bona ranu bapatisona amo unai idia hahedinaraia. Unai dainai Dirava vairanai idia goeva karana be dabua kurokurona ese ia laulaulaia, bona “dina bona hanuaboi idia ese Dirava ena hesiai gaukara idia karaia noho.” Gau haida oi karaia diba unai amo oi hahedinaraia emu mauri lalonai unai hereva oi badinaia, a?

Hari Ita Abia Hahenamo

14. Hari inai negai, Iehova ena hesiai taudia ese dahaka hahenamo idauidau idia abia?

¹⁴ Hari inai negai, reana oi ese Iehova idia hesiai henia taudia idia abia hahenamo idauidau oi itaia vadaeni. Hegeregere, Iehova ese do ia karaia gau namodia oi dibaia neganai, oi lalo-parara vaira negana ai helaro namona ia noho. Hari, emu mauri be mai ena anina​—⁠Dirava momokani tamona oi hesiai henia bona nega vairai tanobada paradaisona dekenai mauri hanaihanai do oi moalelaia. Oibe, Pavapava Iesu Keriso ese ‘mauri ranuna, ia lohilohi gauna, dekenai idia [hutuma bada herea taudia] do ia hakaudia lao.’​—⁠Apokalupo 7:⁠17.

15. Iehova ena Witnes taudia ese Baibel ena hakaua herevadia, politikol bona kara maoromaoro taravatudia dekenai idia badinaia dainai, edena dala ai namo idia davaria?

¹⁵ Hutuma bada herea taudia ese hari idia moalelaia hahenamo ta be, tanobada hegegemadai Iehova ena hesiai taudia huanai lalokau bona lalo-tamona karana ia noho. Ita ibounai be lauma aniani tamona ita abia dainai, Dirava ena Hereva lalonai idia noho taravatu bona hakaua herevadia tamona ita badinaia. Unai dainai politikol eiava bese edia lalohadai idauidau ese ita idia hapararaia lasi. Danu, Dirava ia ura ena taunimanima ese do idia badinaia kara maoromaoro taravatudia ita badinaia. (1 Korinto 6:​9-11) Iehova ena taunimanima be lauma paradaisona lalonai idia noho dainai, inai tanobada ena heai, lalo-tamona lasi karana bona matabodaga karadia idia karaia lasi. Isaia 65:​13, 14 ese unai ia herevalaia dalana mani oi itaia.

16. Ena be hutuma bada herea taudia ese mauri ena hekwakwanai idauidau idia davaria, to edia helaro be dahaka?

¹⁶ Momokani, Dirava ena hesiai taudia be idia goevadae lasi. Bona inai tanobada lalonai idia vara mauri ena hekwakwanai idauidau idia mamia danu, hegeregere mauri ia auka eiava ena be idia kerere lasi to bese edia tuari lalonai hisihisi idia davaria. Gorere, hisihisi, bona mase idia davaria danu. To idia abia dae momokani, tanobada matamatana lalonai Dirava ese “matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani.”​—⁠Apokalupo 21:⁠4.

17. Herevana hari dahaka do ia vara ita dekenai, to vaira negana ai Dirava momokani idia tomadiho henia taudia be dahaka do idia abia?

¹⁷ Ena be hari buruka, gorere, aksiden, eiava dagedage dainai emu mauri oi haboioa, to Iehova ese Paradaiso lalonai oi do ia hatoreaisi lou. (Kara 24:15) Bena Keriso ena lagani 1,000 Lohia Negana lalonai, lauma aniani bada herea do oi moalelaia noho. Dirava ena ura gaudia idia guguru oi itaia neganai, emu lalokau ia dekenai do ia bada. Bona Iehova ese tauanina dalanai ita do ia hanamoa karana ese emu lalokau ia dekenai do ia habadaia momokani. (Isaia 25:​6-9) Dirava ena taunimanima totona vaira nega namona ia noho!

Riviu Henanadai

• Baibel ia hahedinaraia hutuma bada herea be dahaka hoa gauna amo idia roho mauri?

• Bema ita ura momokani Dirava ese ia lalo-namo henia hutuma bada taudia huanai ita noho, hari dahaka ita karaia be namo?

• Hutuma bada herea taudia ese hari bona gabeai Dirava ena tanobada matamatana lalonai do idia moalelaia hahenamo idauidau, be edena bamona oi laloa?

[Picture on page 123]

Hutuma bada herea taudia milioni momo ese mai lalo-tamona ida Dirava momokanina idia tomadiho henia